সভাপর্ব – অধ্যায় 091

সভাপর্ব – অধ্যায় 091
॥ শ্রীঃ ॥
2.91. অধ্যায়ঃ 091
Mahabharata – Sabha Parva – Chapter Topics
দ্রৌপদীবচনম্॥ 1॥ যুধিষ্ঠিরেণৈব দ্রৌপদীপ্রশ্নস্যোত্তরং বক্তব্যমিতি ভীষ্মবচনম্॥ 2॥
Mahabharata – Sabha Parva – Chapter Text


দ্রৌপদ্যুবাচ॥

পুরস্তাৎকরণীয়ং মে ন কৃতং কার্যমুত্তরম্।
বিহ্বলাঽস্মি কৃতাঽনেন কর্ষতা বলিনা বলাৎ॥ 2-91-1(15012)
অভিবাদং করোম্যেষাং কুরূণাং কুরুসংসদি।
ন মে স্যাদপরাধোঽয়ং তদিদং ন কৃতং ময়া॥
বৈশম্পায়ন উবাচ॥ 2-91-2(15013)
সা তেন চ সমাধূতা দুঃখেন চ তপস্বিনী।
পতিতা বিললাপেদং সভায়ামতথোচিতা॥ 2-91-3(15014)
দ্রৌপদ্যুবাচ। 2-91-4x(1649)
স্বয়ংবরে যাস্মি নৃপৈদৃষ্টা রঙ্গে সমাগতৈঃ।
ন দৃষ্টপূর্বা চান্যত্র সাঽহমদ্য সভাং গতা॥ 2-91-4(15015)
যাং ন বায়ুর্ন চাদিত্যো দৃষ্টবন্তৌ পুরা গৃহে।
সাঽহমদ্য সভামধ্যে দৃষ্টাস্মি জনসংসদি॥ 2-91-5(15016)
যাং ন মৃষ্যন্তি বাতেন স্পৃশ্যমানাং গৃহে পুরা।
স্পৃশ্যমানাং সহন্তেঽদ্য পাণ্ডবাস্তাং দূরাত্মনা॥ 2-91-6(15017)
মৃষ্যন্তি কুরবশ্চেমে মন্যে কালস্য পর্যযম্।
স্নুষাং দুহিতরং চৈব ক্লিশ্যমানামনর্হতীম্॥ 2-91-7(15018)
কিংন্বতঃ কৃপণং ভূয়ো যদহং স্ত্রী সতী শুভা।
সভামধ্যং বিগাহেঽদ্য ক্ব নু ধর্মো মহীক্ষিতাম্॥ 2-91-8(15019)
ধর্ম্যং স্ত্রিয়ং সভাং পূর্বে ন নয়ন্তীতি নঃ শ্রুতম্।
স নষ্টঃ কৌরবেয়েষু পূর্বো ধর্মঃ সনাতনঃ॥ 2-91-9(15020)
কথং হি ভার্যা পাণ্ডুনাং পার্ষতস্য স্বসা সতী।
বাসুদেবস্য চ সখী পার্থিবানাং সভামিয়াম্॥ 2-91-10(15021)
তামিমাং ধর্মরাজস্য ভার্যাং সদৃশবর্ণজাম্।
ব্রূত দাসীমদাসীং বা তৎকরিষ্যামি কৌরবাঃ। 2-91-11(15022)
অয়ং মাং সুদৃঢং ক্ষুদ্রঃ কৌরবাণাং যশোহরঃ.
ক্লিশ্নাতি নাহং তৎসোঢুং ক্ষুদ্রঃ কৌরবাণাং যশোহরঃ। 2-91-12(15023)
জিতাং বাঽপ্যজিতাং বাপি মন্যধ্বং মাং যথা নৃপাঃ।
তথা প্রত্যুক্তমিচ্ছামি তৎকরিষ্যামি কৌরবাঃ॥ 2-91-13(15024)
ভীষ্ম উবাচ॥ 2-91-14x(1650)
উক্তবানস্মি কল্যাণি ধর্মস্য পরমা গতিঃ।
লোকে ন শক্যতে জ্ঞাতুমপি বিজ্ঞৈর্মহাত্মভিঃ॥ 2-91-14(15025)
বলবাংশ্চ যথা ধর্মং লোকে পশ্যতি পুরুষঃ॥
স ধর্মো ধর্মবেলায়াং ভবত্যভিহতঃ পরঃ॥ 2-91-15(15026)
ন বিবেক্তুং চ তে প্রশ্নমিমং শক্নোমি নিশ্চয়াৎ।
সূক্ষ্মৎবাদ্গহনৎবাচ্চ কার্যস্যাস্য চ গৌরবাৎ॥ 2-91-16(15027)
নূনমন্তঃ কুলস্যাস্য ভবিতা ন চিরাদিব।
তথা হি কুরবঃ সর্বে লোভমোহপরায়ণাঃ॥ 2-91-17(15028)
কুলেষু জাতাঃ কল্যাণি ব্যসনৈরাহতা ভৃশম্।
ধর্ম্যান্মার্গান্ন চ্যবন্তে যেষাং নস্ৎবং বধূঃ স্থিতা॥ 2-91-18(15029)
উপপন্নং চ পাঞ্চালি তবেদং বৃত্তমীদৃশম্।
যৎকৃচ্ছ্রমপি সম্প্রাপ্তা ধর্মমেবান্ববেক্ষসে॥ 2-91-19(15030)
এতে দ্রোণাদয়শ্চৈব বৃদ্ধা ধর্মবিদো জনাঃ।
শূন্যৈঃ শরীরৈস্তিষ্ঠন্তি গতাসব ইবানতাঃ॥ 2-91-20(15031)
যুধিষ্ঠিরস্তু প্রশ্নোঽস্মিন্প্রমাণমিতি মে মতিঃ।
অজিতাং বা জিতাং বেতি স্বয়ং ব্যাখ্যাতুমর্হতি॥ ॥ 2-91-21(15032)

ইতি শ্রীমন্মহাভারতে সভাপর্বণি দ্যূতপর্বণি একনবতিতমোঽধ্যায়ঃ॥91 ॥