সভাপর্ব – অধ্যায় 053

সভাপর্ব – অধ্যায় 053
॥ শ্রীঃ ॥
2.53. অধ্যায়ঃ 053
Mahabharata – Sabha Parva – Chapter Topics
কৃষ্ণেন বালকৈঃ সহ বিহৃত্য কালিয়মর্দনম্॥ 1॥ বলরামেণ ধেনুকাসুরহননম্॥ 2॥ কৃষ্ণেন গোবর্ধনোদ্ধরণম্॥ 3॥ অরিষ্টাসুরাদিহননম্॥ 4॥ মধুরায়াং কংসং হৎবা পিত্রোঃ পাদাভিবন্দনম্॥ 5।
Mahabharata – Sabha Parva – Chapter Text


ভীষ্ণ উবাচ।

ততঃ কদচিদ্গোবিন্দো জ্যেষ্ঠং সঙ্কর্ষণং বিনা।
চচার তদ্বনং রম্যং সুস্বরূপো বরাননঃ॥ 2-53-1(13433)
কাকপক্ষধরঃ শ্রীমাঞ্ছ্যামঃ পদ্মনিভেক্ষণঃ।
শ্রীবৎসেনোরসা যুক্তঃ শশাঙ্ক ইব লক্ষ্মণা॥ 2-53-2(13434)
রজ্জুয়জ্ঞোপবীতী স পীতাম্বরধরো যুবা।
শ্বেতচন্দ্রনলিপ্রাঙ্গো নীলকুঞ্চিতমূর্ধজঃ॥ 2-53-3(13435)
রাজতা বর্হিপত্রেণ মন্দমারুতকম্পিনা।
ক্বচিদ্গায়ন্ক্বঞ্চিৎক্রীডন্ক্বচিন্নৃত্যন্ক্বচিদ্ধসন্॥ 2-53-4(13436)
গোপবেণুং সুমধুরং কামং তদপি বাদয়ন্।
প্রহ্লাদনার্থং চ গবাং ক ক্বচিদ্বনগতো যুবা॥ 2-53-5(13437)
গোকুলে মেঘকালে তু চচার দ্যুতিমান্প্রভুঃ।
বহুরম্যেষু দেশেষু বনস্য বনরাজিপু॥ 2-53-6(13438)
তাসু কৃষ্ণো মুদা যুক্তঃ ক্রীডয়ন্ভরতর্ষভ।
স কদাচিদ্বনে তস্মিন্গোভিঃ সহ পরিব্রজন্॥ 2-53-7(13439)
ভাণ্ডীরং নাম দৃষ্ট্বাঽথ ন্যগ্রোধং কেশবো মহান্।
তচ্ছায়ায়াং মতিং চক্রে নিবাসায় তদা প্রভুঃ॥ 2-53-8(13440)
স তত্র বয়সা তুল্যৈর্বৎসপালৈস্তদাঽনঘ।
রেমে স দিবসং কৃষ্ণঃ পুরা স্বর্গগতো যথা॥ 2-53-9(13441)
তং ক্রীডমানং গোপালাঃ কৃষ্ণং ভাণ্ডীরবাসিনঃ।
রময়ন্তি স্ম বহবো মান্যৈঃ ক্রীডনকৈস্তদা॥ 2-53-10(13442)
অন্যে স্ম পরিগায়ন্তি গোপা মুদিতমানসাঃ।
গোপালকৃষ্ণমেবান্যে গায়ন্তি স্ম বনপ্রিয়াঃ॥ 2-53-11(13443)
তেষাং সঙ্গায়তামেব বাদয়ামাস কেশবঃ।
পর্ণবাদ্যান্তরে বেণুং তুম্ববীণাং চ তত্র বৈ॥ 2-53-12(13444)
এবং ক্রীডান্তরৈঃ কৃষ্ণো গোপালৈর্বিজহার সঃ।
তেন বালেন কৌন্তেয় কৃতং লোকহিতং তদা॥ 2-53-13(13445)
পশ্যতাং সর্বভূতানাং বাসুদেবেন ভারত।
হ্রদে নিপাততা তত্র ক্রীডিতং নাগমূর্ধনি॥ 2-53-14(13446)
শাসয়িৎবা তু কালীয়ং সর্বলোকস্য পশ্যতঃ।
বিজহার ততঃ কৃষ্ণো বলেদবসহায়বান্॥ 2-53-15(13447)
ধেনুকো দারুণো রাজন্দৈত্যো রাসভবিগ্রহঃ।
তদা তালবনে রাজন্বলদেবেন বৈ হতঃ॥ 2-53-16(13448)
ততঃ কদাচিৎকৌন্তেয় রামকৃষ্ণৌ বনং গতৌ।
চারয়ন্তৌ প্রবৃদ্ধানি গোধনানি শুভাননৌ॥ 2-53-17(13449)
বিহরন্তৌ মুদা যুক্তৌ বীক্ষমাণৌ বনানি বৈ।
শ্বেলয়ন্তৌ প্রগায়ন্তৌ বিচিন্বন্তৌ চ পাদপান্॥ 2-53-18(13450)
নামভির্ব্যাহরন্তৌ চ বৎসান্গাশ্চ পরন্তপৌ।
চেরতুর্লোকসিদ্ধাভিঃ ক্রীডাভিরপরাজিতৌ॥ 2-53-19(13451)
তৌ দেবৌ মানুষীং দীক্ষাং বহন্তৌ সুরপূজিতৌ।
তজ্জাতিগুণয়ুক্তাভিঃ ক্রীডাভিশ্চেরতুর্বনম্॥ 2-53-20(13452)
এবং বাল্যেঽপি গোপালৈঃ ক্রীডাভিশ্চ বিজহ্রতুঃ॥ 2-53-21(13453)
ততঃ কৃষ্ণো মহাতেজাস্তদা গৎবা তু গোব্রজম্।
গিরিয়জ্ঞং তমেবৈষ প্রবৃত্তং গোপদারকৈঃ॥ 2-53-22(13454)
বুভুজে পায়সং শৌরিরীশ্বরঃ সর্বভূতকৃৎ।
তং দৃষ্ট্বা গোপকাঃ সর্বে কৃষ্ণমেব সমর্চয়ন্॥ 2-53-23(13455)
পূজ্যমানস্তদা দেবৈর্দিব্যং বপুরধারয়ৎ।
ধৃতো গোবর্ধনো নাম সপ্তাহং পর্বতো ধৃতঃ॥ 2-53-24(13456)
শিশুনা বাসুদেবেন গবার্থমরিমর্দন।
ক্রীডমানস্তদা কৃষ্ণঃ কৃতবান্কর্ম দুষ্করম্॥ 2-53-25(13457)
তদদ্ভুতমতীবাসীৎসর্বলোকস্য ভারত।
দেবদেবঃ ক্ষিতং গৎবা কৃষ্ণং নৎবা মুদান্বিতঃ। 2-53-26(13458)
গোবিন্দ ইতি তং হ্যুক্ৎবা হ্যভ্যষিঞ্চৎপুরন্দরঃ।
ইত্যুক্ৎবাশ্লিষ্য গোবিন্দং পুরুহূতোভ্যযাদ্দিবম্॥ 2-53-27(13459)
অথারিষ্ট ইতি খ্যাতং দৈত্যং বৃষভবিগ্রহম্।
জঘান তরসা কৃষ্ণঃ পশূনাং হিতকাম্যযা॥ 2-53-28(13460)
কেশিনামা ততো দৈত্যো রাজংস্তুরগবিগ্রহঃ।
তথা বনগতং পার্থ গজায়ুতবলং হয়ম্॥ 2-53-29(13461)
করাম্ভোরুহবজ্রেণ জঘান মধুসূদনঃ।
অথ মল্লং তু চাণূরং নিজঘান মহাঽসুরম্॥ 2-53-30(13462)
সুদামানমমিত্রঘ্ন সর্বসৈন্যপুরস্কৃতম্।
বালরূপেণ গোবিন্দো নিজঘান চ ভারত॥ 2-53-31(13463)
বলদেবেন চায়ত্নাৎসমাজে মুষ্টিকো হতঃ।
তাডিতশ্চ সহামাত্যঃ কংসঃ কৃষ্ণেন ভারত॥ 2-53-32(13464)
হৎবা কংসমমিত্রঘ্নঃ সর্বেষাং পশ্যতাং তদা।
অভিষিচ্যোগ্রসেনং তং পিত্রোঃ পাদমবন্দত। 2-53-33(13465)
এবমাদীনি কর্মাণি কৃতবান্বৈ জনার্দনঃ॥ ॥ 2-53-34(13466)

ইতি শ্রীমন্মহাভারতে সভাপর্বণি অর্ঘাহরণপর্বণি ত্রিপঞ্চাশোঽধ্যায়ঃ॥53 ॥