আদিপর্ব – অধ্যায় ২৪২

আদিপর্ব – অধ্যায় ২৪২

॥ শ্রীঃ ॥

১.২৪২. অধ্যায়ঃ ২৪২

Mahabharata – Adi Parva – Chapter Topics

সুভদ্রাবিবাহঃ॥ ১ ॥

Mahabharata – Adi Parva – Chapter Text

১-২৪২-০ (১০৪৬৫)
বৈশম্পায়ন উবাচ। ১-২৪২-০x (১২৯৯)
কুকুরান্ধকবৃষ্ণীনামপয়ানং চ পাণ্ডবঃ।
বিনিশ্চিত্য ততঃ পার্থঃ সুভদ্রামিদমব্রবীৎ॥ ১-২৪২-১ (১০৪৬৬)
শৃণু ভদ্রে যথাশাস্ত্রং হিতার্থং মুনিভিঃ কৃতম্।
বিবাহং বহুধা সৎসু বর্ণানাং ধর্মসংয়ুতম্॥ ১-২৪২-২ (১০৪৬৭)
কন্যায়াস্তু পিতা ভ্রাতা মাতা মাতুল এব বা।
পিতুঃ পিতা পিতুর্ভ্রাতা দানে তু প্রভুতাং গতঃ॥ ১-২৪২-৩ (১০৪৬৮)
মহোৎসবং পশুপতের্দ্রষ্টুকামঃ পিতা তব।
অন্তর্দ্বীপং গতো ভদ্রে পুত্রৈঃ পৌত্রৈঃ সবান্ধবৈঃ॥ ১-২৪২-৪ (১০৪৬৯)
মম চৈব বিশালাক্ষি বিদেশস্থা হি বান্ধবাঃ।
তস্মাৎসুভদ্রে গান্ধর্বো বিবাহঃ পঞ্চমঃ স্মৃতঃ॥ ১-২৪২-৫ (১০৪৭০)
সমাগমে তু কন্যায়াঃ ক্রিয়াঃ প্রোক্তাশ্চতুর্বিধাঃ।
তেষাং প্রবৃত্তিং সাধূনাং শৃণু মাধবি তদ্যথা॥ ১-২৪২-৬ (১০৪৭১)
বরমাহূয় বিধিনা পিত্রা দত্তা তথার্থিনে।
সা পত্নী তু পরৈরুক্তা সা বশ্যা তু পতিব্রতা॥ ১-২৪২-৭ (১০৪৭২)
ভৃত্যানাং ভরণার্থায় আত্মনঃ পোষণায় চ।
দানে গৃহীতা যা নারী সা ভার্যেতি স্মৃতা বুধৈঃ॥ ১-২৪২-৮ (১০৪৭৩)
ধর্মতো বরয়িৎবা তু আনীয় স্বং নিবেশনম্।
ন্যায়েন দত্তাতারুণ্যে দারাঃ পিতৃকৃতাঃ স্মৃতাঃ॥ ১-২৪২-৯ (১০৪৭৪)
গান্ধর্বেণ বিবাহেন রাগাৎপুত্রার্থকারণাৎ।
আত্মনাঽনুগৃহীতা যা বশ্যা সা তু প্রজাবতী॥ ১-২৪২-১০ (১০৪৭৫)
জনয়েদ্যা তু ভর্তারং জায়া ইত্যেব নামতঃ।
পত্নী ভার্যা চ দারাশ্চ জায়া চেতি চতুর্বিধাঃ॥ ১-২৪২-১১ (১০৪৭৬)
চতস্র এবাগ্নিসাক্ষ্যাঃ ক্রিয়ায়ুক্তাশ্চ ধর্মতঃ।
গান্ধর্বস্তু ক্রিয়াহীনো রাগাদেব প্রবর্ততে॥ ১-২৪২-১২ (১০৪৭৭)
সকামায়াঃ সকামেন নির্মন্ত্রো রহসি স্মৃতঃ।
ময়োক্তমক্রিয়ং চাপি কর্তব্যং মাধবি ৎবয়া॥ ১-২৪২-১৩ (১০৪৭৮)
অয়নং চৈব মাসশ্চ ঋতুঃ পক্ষস্তথা তিথিঃ।
করণং চ মুহূর্তং চ লগ্নসংপত্তথৈব চ॥ ১-২৪২-১৪ (১০৪৭৯)
বিবাহস্য বিশালাক্ষি প্রশস্তং চোত্তরায়ণম্।
বৈশাখশ্চৈব মাসানাং পক্ষাণাং শুক্ল এব চ॥ ১-২৪২-১৫ (১০৪৮০)
নক্ষত্রাণাং তথা হস্তস্তৃতীয়া চ তিথিষ্বপি।
লগ্নো হি মকরঃ শ্রেষ্ঠঃ করণানাং ববস্তথা॥ ১-২৪২-১৬ (১০৪৮১)
মৈত্রো মুহূর্তো বৈবাহ্য আবয়োঃ শুভকর্মণি।
সর্বসংপদিয়ং ভদ্রে অদ্য রাত্রৌ ভবিষ্যতি॥ ১-২৪২-১৭ (১০৪৮২)
ভগবানস্তমভ্যেতি আদিত্যস্তপতাং বরঃ।
রাত্রৌ বিবাহকালোঽয়ং ভবিষ্যতি ন সংশয়ঃ॥ ১-২৪২-১৮ (১০৪৮৩)
নারায়ণোঽপি সর্বজ্ঞো নাববুধ্যেত বিশ্বকৃৎ।
ধর্মসঙ্কটমাপন্নে কিং নু কৃৎবা সুখং ভবেৎ॥ ১-২৪২-১৯ (১০৪৮৪)
মনোভবেন কামেন মোহিতং মাং প্রলাপিনম্।
প্রতিবাক্যং চ মে দেবি কিং ন বক্ষ্যসি মাধবি॥ ১-২৪২-২০ (১০৪৮৫)
বৈশম্পায়ন উবাচ। ১-২৪২-২১x (১৩০০)
অর্জুনস্য বচঃ শ্রুৎবা চিন্তয়ন্তী জনার্দনম্।
নোবাচ কিংচিদ্বচনং বাষ্পদূষিতলোচনা॥ ১-২৪২-২১ (১০৪৮৬)
রাগোন্মাদপ্রলাপী সন্নর্জুনো জয়তাং বরঃ।
চিন্তয়ামাস পিতরং প্রবিশ্য চ লতাগৃহম্॥ ১-২৪২-২২ (১০৪৮৭)
চিন্তয়ানং তু কৌন্তেয়ং মৎবা শচ্যা শচীপতিঃ।
সহিতো নারদাদ্যৈশ্চ মুনিভিশ্চ মহামনাঃ॥ ১-২৪২-২৩ (১০৪৮৮)
গন্ধর্বৈরপ্সরোভিশ্চ চারণৈশ্চাপি গুহ্যকৈঃ।
অরুন্ধত্যা বসিষ্ঠেন হ্যাজগাম কুশস্থলীম্॥ ১-২৪২-২৪ (১০৪৮৯)
চিন্তিতং চ সুভদ্রায়াশ্চিন্তয়িৎবা জনার্দনঃ।
নিদ্রয়াপহৃতজ্ঞানং রৌহিণেয়ং বিনা তদা॥ ১-২৪২-২৫ (১০৪৯০)
সহাক্রূরেণ শিনিনা সত্যকেন গদেন চ।
বসুদেবেন দেবক্যা আহূকেন চ ধীমতা॥ ১-২৪২-২৬ (১০৪৯১)
আজগাম পুরীং রাত্রৌ দ্বারকাং স্বজনৈর্বৃতঃ।
পূজয়িৎবা তু দেবেশো নারদাদীন্মহায়শাঃ॥ ১-২৪২-২৭ (১০৪৯২)
কুশলপ্রশ্নমুক্ৎবা তু দেবেন্দ্রেণাভিয়াচিতঃ।
বৈবাহিকীং ক্রিয়াং কৃষ্ণঃ স তথেত্যেবমুক্তবান্॥ ১-২৪২-২৮ (১০৪৯৩)
আহুকো বসুদেবশ্চ সহাক্রূরঃ সসাত্যকিঃ।
অভিপ্রণম্য শিরসা পাকশাসনমব্রুবন্।
দেবদেব নমস্তেস্তু লোকনাথ জগৎপতে॥ ১-২৪২-২৯ (১০৪৯৪)
বয়ং ধন্যাঃ স্ম সহিতৈর্বান্ধবৈঃ সহিতাঃ প্রভো।
কৃতপ্রসাদাস্তু বয়ং তব বাক্যেন বিশ্বজিৎ॥ ১-২৪২-৩০ (১০৪৯৫)
বৈশম্পায়ন উবাচ। ১-২৪২-৩১x (১৩০১)
এবমুক্ৎবা প্রসাদ্যৈনং পূজয়িৎবা প্রয়ত্নতঃ।
মহেন্দ্রশাসনাৎসর্বে সহিতা ঋষিভিস্তদা॥ ১-২৪২-৩১ (১০৪৯৬)
বিবাহং কারয়ামাসুঃ শক্রপুত্রস্য শাস্ত্রতঃ।
অরুন্ধতী শচী দেবী রুগ্মিণী দেবকী তথা॥ ১-২৪২-৩২ (১০৪৯৭)
দিব্যস্ত্রীভিশ্চ সহিতাঃ সুভদ্রায়াঃ শুভাঃ ক্রিয়াঃ।
অর্জুনেঽপি তথা সর্বাঃ ক্রিয়া ভদ্রাঃ প্রয়োজয়ন্॥ ১-২৪২-৩৩ (১০৪৯৮)
মহর্ষিঃ কাশ্যপো হোতা সদস্যা নারদাদয়ঃ।
পুণ্যাশিষঃ প্রয়োক্তারঃ সর্বে তে হি তদার্জুনে॥ ১-২৪২-৩৪ (১০৪৯৯)
অভিষেকং তদা কৃৎবা মহেন্দ্রঃ পাকশাসনিম্।
লোকপালৈস্তু সহিতঃ সর্বদেবৈরভিষ্টুতঃ॥ ১-২৪২-৩৫ (১০৫০০)
কিরীটাঙ্গদহারাদ্যৈর্হস্তাভরণকুণ্ডলৈঃ।
ভূষয়িৎবা তদা পার্থং দ্বিতীয়মিব বাসবম্॥ ১-২৪২-৩৬ (১০৫০১)
পুত্রং পরিষ্বজ্য তদা প্রীতিমাপ পুরন্দরঃ।
শছী দেবী তদা ভদ্রামরুন্ধত্যাদিভিস্তথা॥ ১-২৪২-৩৭ (১০৫০২)
কারয়ামাস বৈবাহ্যমঙ্গলান্যাদবস্ত্রিয়ঃ।
সহাপ্সরোভির্মুদিতা ভূষয়িৎবা স্বভূষণৈঃ॥ ১-২৪২-৩৮ (১০৫০৩)
পৌলোমীমিব মন্যন্তে সুভদ্রাং তত্র যোষিতঃ।
ততো বিবাহো ববৃধে কৃতঃ সর্বগুণান্বিতঃ॥ ১-২৪২-৩৯ (১০৫০৪)
তস্যাঃ পাণিং গৃহীৎবা তু মন্ত্রৈর্হোমপুরস্কৃতম্।
সুভদ্রয়া বভৌ জিষ্ণুঃ শচ্যা ইব শচীপতিঃ॥ ১-২৪২-৪০ (১০৫০৫)
সা জিষ্ণুমধিকং ভেজে সুভদ্রা চারুদর্শনা।
পার্থস্য সদৃশী ভদ্রা রূপেণ বয়সা তথা॥ ১-২৪২-৪১ (১০৫০৬)
সুভদ্রায়াশ্চ পার্থোঽপি সদৃশো রূপলক্ষণৈঃ।
ইত্যূচুশ্চ তদা দেবাঃ প্রীতাঃ সেন্দ্রপুরোগমাঃ॥ ১-২৪২-৪২ (১০৫০৭)
এবং নিবেশ্য দেবাস্তে গন্ধর্বৈঃ সাপ্সরোগণৈঃ।
আমন্ত্র্য যাদবাঃ সর্বে বিপ্রজগ্মুর্যথাগতম্॥ ১-২৪২-৪৩ (১০৫০৮)
যাদবাঃ পার্থমামন্ত্র্য অন্তর্দ্বীপং গতাস্তদা।
বাসুদেবস্তদা পার্থমুবাচ যদুনন্দনঃ॥ ১-২৪২-৪৪ (১০৫০৯)
দ্বাবিংশদ্দিবসান্পার্থ ইহোষ্য ভরতর্ষভ।
মামকং রথমারুহ্য শৈব্যসুগ্রীবয়োজিতম্॥ ১-২৪২-৪৫ (১০৫১০)
সুভদ্রয়া সুখং পার্থ খাণ্ডবপ্রস্থমাবিশ।
যাদবৈঃ সহিতঃ পশ্চাদাগমিষ্যামি ভারত।
যতিবেষেণ নিয়তো বস ৎবং রুক্মিণীগৃহে॥ ১-২৪২-৪৬ (১০৫১১)
বৈশম্পায়ন উবাচ। ১-২৪২-৪৭x (১৩০২)
এবমুক্ৎবা প্রচক্রাম অন্তর্দ্বীপং জনার্দনঃ।
কৃতোদ্বাহস্ততঃ পার্থঃ কৃতকার্যোঽভবত্তদা॥ ১-২৪২-৪৭ (১০৫১২)
তস্যাং চোপগতো ভাবঃ পার্থস্য সুমহাত্মনঃ।
তস্মিন্ভাবঃ সুভদ্রায়া অন্যোন্যং সমবর্ধত॥ ১-২৪২-৪৮ (১০৫১৩)
স তথা যুয়ুজে বীরো ভদ্রয়া ভরতর্ষভঃ।
অভিনিষ্পন্নয়া রামঃ সীতয়েব সমন্বিতঃ॥ ১-২৪২-৪৯ (১০৫১৪)
অপি জিষ্ণুর্বিজজ্ঞে তাং হ্রীং শ্রিয়ং সন্নতিক্রিয়াম্।
দেবতানাং বরস্ত্রীণাং রূপেণ সদৃশীং সতীম্॥ ১-২৪২-৫০ (১০৫১৫)
স প্রকৃত্যা শ্রিয়া দীপ্ত্যা সংদিদীপে তয়াঽধিকম্।
উদ্যৎসহস্রদীপ্তাংশুঃ শরদীব দিবাকরঃ॥ ১-২৪২-৫১ (১০৫১৬)
সা তু তং মনুজব্যাঘ্রমনুরক্তা যশস্বিনী।
কন্যাপুরগতা ভূৎবা তৎপরা সমপদ্যত॥ ॥ ১-২৪২-৫২ (১০৫১৭)

ইতি শ্রীমন্মহাভারতে আদিপর্বণি সুভদ্রাহরণপর্বণি দ্বিচৎবারিংশদধিকদ্বিশততমোঽধ্যায়ঃ॥ ২৪২ ॥