আদিপর্ব – অধ্যায় ২১৭

আদিপর্ব – অধ্যায় ২১৭

॥ শ্রীঃ ॥

১.২১৭. অধ্যায়ঃ ২১৭

(অথ বিদুরাগমনরাজ্যলাভপর্ব ॥ ১৪ ॥)

Mahabharata – Adi Parva – Chapter Topics

চারদ্বারা পাণ্ডববিবাহাদিবৃত্তান্তশ্রবণেন অন্যৈঃ রাজভিঃ ভীষ্মধৃতরাষ্ট্রাদীনাং ধিক্কারঃ॥ ১ ॥ ধার্তরাষ্ট্রৈঃ পাণ্ডবান্প্রতি মন্ত্রালোচনং॥ ২ ॥ পাণ্ডবা হন্তব্যা ইতি শকুনেরুক্তিঃ॥ ৩ ॥ পাণ্ডবানাং হন্তুমশক্যৎবাত্তৈঃ সহ সন্ধিঃ কর্তব্য ইতি সৌমদত্তেরুক্তিঃ॥ ৪ ॥

Mahabharata – Adi Parva – Chapter Text

১-২১৭-০ (৯৪৪৬)
বৈশম্পায়ন উবাচ। ১-২১৭-০x (১২০৮)
ততো রাজ্ঞাং চৈররাপ্তৈঃ প্রবৃত্তিরুপনীয়ত।
পাণ্ডবৈরুপসংপন্না দ্রৌপদী পতিভিঃ শুভা॥ ১-২১৭-১ (৯৪৪৭)
যেন তদ্ধনুরাদায় লক্ষ্যং বিদ্ধং মহাত্মনা।
সোঽর্জুনো জয়তাং শ্রেষ্ঠো মহাবাণধনুর্ধরঃ॥ ১-২১৭-২ (৯৪৪৮)
যঃ শল্যং মদ্ররাজং বৈ প্রোৎক্ষিপ্যাপাতয়দ্বলী।
ত্রাসয়ামাস সংক্রুদ্ধো বৃক্ষেণ পুরুষান্রণে॥ ১-২১৭-৩ (৯৪৪৯)
ন চাস্য সংভ্রমঃ কশ্চিদাসীত্তত্র মহাত্মনঃ।
স ভীমো ভীমসংস্পর্শঃ শত্রুসেনাঙ্গপাতনঃ॥ ১-২১৭-৪ (৯৪৫০)
`যোঽসাবত্যক্রমীদ্যুধ্যন্যুদ্ধে দুর্যোধনং তথা।
স রাজা পাণ্ডবশ্রেষ্ঠঃ পুণ্যভাগ্বুদ্ধিবর্ধনঃ॥ ১-২১৭-৫ (৯৪৫১)
দুর্যোধনস্যাবরজৈর্যৌ যুধ্যেতাং প্রতীপবৎ।
তৌ যমৌ বৃত্তসংপন্নৌ সংপন্নবলবিক্রমৌ॥’ ১-২১৭-৬ (৯৪৫২)
ব্রহ্মরূপধরাঞ্শ্রুৎবা প্রশান্তান্পাণ্ডুনন্দনান্।
কৌন্তেয়ান্মনুজেন্দ্রাণাং বিস্ময়ঃ সমজায়ত॥ ১-২১৭-৭ (৯৪৫৩)
`পৌরা হি সর্বে রাজন্যাঃ সমপদ্যন্ত বিস্মিতাঃ।’
সপুত্রা হি পুরা কুন্তী দগ্ধা জতুগৃহে শ্রুতা॥ ১-২১৭-৮ (৯৪৫৪)
`সর্বভূমিপতীনাং চ রাষ্ট্রাণাং চ যশস্বিনী।’
পুনর্জাতানিব চ তাংস্তেঽমন্যন্ত নরাধিপাঃ॥ ১-২১৭-৯ (৯৪৫৫)
ধিগকুর্বংস্তদা ভীষ্মং ধৃতরাষ্ট্রং চ কৌরবম্।
কর্মণাঽতিনৃশংসেন পুরোচনকৃতেন বৈ॥ ১-২১৭-১০ (৯৪৫৬)
ধার্মিকান্বৃত্তসংপন্নান্মাতুঃ প্রিয়হিতে রতান্।
যদা তানীদৃশান্পার্থানুৎসাদয়িতুমিচ্ছতি॥ ১-২১৭-১১ (৯৪৫৭)
ততঃ স্বয়ংবরে বৃত্তে ধার্তরাষ্ট্রাশ্চ ভারত।
মন্ত্রয়ন্তি ততঃ সর্বে কর্ণসৌবলদূষিতাঃ॥ ১-২১৭-১২ (৯৪৫৮)
শকুনিরুবাচ। ১-২১৭-১৩x (১২০৯)
কশ্চিচ্ছত্রুঃ কর্শনীয়ঃ পীডনীয়স্তথাঽপরঃ।
উৎসাদনীয়াঃ কৌন্তেয়াঃ সর্বক্ষত্রস্য মে মতাঃ॥ ১-২১৭-১৩ (৯৪৫৯)
এবং পরাজিতাঃ সর্বে যদি যূয়ং গমিষ্যথ।
অকৃৎবা সংবিদং কাংচিন্মনস্তপ্স্যত্যসংশয়ম্॥ ১-২১৭-১৪ (৯৪৬০)
অয়ং দেশশ্চ কালশ্চ পাণ্ডবাহরণায় নঃ।
ন চেদেবং করিষ্যধ্বং লোকে হাস্যা ভবিষ্যথ॥ ১-২১৭-১৫ (৯৪৬১)
যমেতে সংশ্রিতা বস্তুং কাময়ন্তে চ ভূমিপম্।
সোঽল্পবীর্যবলো রাজা দ্রুপদো বৈ মতো মম॥ ১-২১৭-১৬ (৯৪৬২)
যাবদেতান্ন জানন্তি জীবতো বৃষ্ণিপুঙ্গবাঃ।
চৈদ্যশ্চ পুরুষব্যাঘ্রঃ শিশুপালঃ প্রতাপবান্॥ ১-২১৭-১৭ (৯৪৬৩)
একীভাবং গতো রাজ্ঞা দ্রুপদেন মহাত্মনা।
দুরাধর্ষতরা রাজন্ভবিষ্যন্তি ন সংশয়ঃ॥ ১-২১৭-১৮ (৯৪৬৪)
যাবচ্চঞ্চলতাং সর্বে প্রাপ্নুবন্তি নরাধিপাঃ।
তাবদেব ব্যবস্যামঃ পাণ্ডবানাং বধং প্রতি॥ ১-২১৭-১৯ (৯৪৬৫)
মুক্তা জতুগৃহাদ্ভীমাদাশীবিষমুখাদিব।
পুনস্তে যদি মুচ্যন্তে মহন্নো ভয়মাগতম্॥ ১-২১৭-২০ (৯৪৬৬)
তেষামিহোপয়াতানামেষাং তু চিরবাসিনাম্।
অন্তরে দুষ্করং স্থাতুং গজয়োর্মহতোরিব॥ ১-২১৭-২১ (৯৪৬৭)
হনধ্বং প্রগৃহীতানি বলানি বলিনাং বরাঃ।
যাবন্নঃ কুরুসেনায়াং পতন্তি পতগা ইব॥ ১-২১৭-২২ (৯৪৬৮)
তাবৎসর্বাভিসারেণ পুরমেতদ্বিহন্যতাম্।
এতন্মম মতং চৈব প্রাপ্তকালং নরর্ষভ॥ ১-২১৭-২৩ (৯৪৬৯)
বৈশম্পায়ন উবাচ। ১-২১৭-২৪x (১২১০)
শকুনের্বচনং শ্রুৎবা ভাষমাণস্য দুর্মতেঃ।
সোমদত্তিরিদং বাক্যং জগাদ পরমং ততঃ॥ ১-২১৭-২৪ (৯৪৭০)
প্রকৃতীঃ সপ্ত বৈ জ্ঞাৎবা আত্মনশ্চ পরস্য চ।
তথা দেশং চ কালং চ ষড্বিধান্স নয়োদ্গুণান্॥ ১-২১৭-২৫ (৯৪৭১)
স্থানং বৃদ্ধিং ক্ষয়ং চৈব ভূমিং মিত্রাণি বিক্রমম্।
প্রসমীক্ষ্যাভিয়ুঞ্জীত পরং ব্যসনপীডিতম্॥ ১-২১৭-২৬ (৯৪৭২)
ততোঽহং পাণ্ডবান্মন্যে মিত্রকোশসমন্বিতান্।
বলস্থান্বিক্রমস্থাংশ্চ স্বকৃতৈঃ প্রকৃতিপ্রিয়ান্॥ ১-২১৭-২৭ (৯৪৭৩)
বপুষা হি তু ভূতানাং নেত্রাণি হৃদয়ানি চ।
শ্রোত্রং মধুরয়া বাচা রময়ত্যর্জুনো নৃণাম্॥ ১-২১৭-২৮ (৯৪৭৪)
ন তু কেবলদৈবেন প্রজা ভাবেন ভেজিরে।
যদ্বভূব মনঃকান্তং কর্মণা স চকার তৎ॥ ১-২১৭-২৯ (৯৪৭৫)
ন হ্যযুক্তং ন চাসক্তং নানৃতং ন চ বিপ্রিয়ম্।
ভাষিতং চারুভাষস্য জজ্ঞে পার্থস্য ভারতী॥ ১-২১৭-৩০ (৯৪৭৬)
তানেবংগুণসংপন্নান্সংপন্নান্রাজলক্ষণৈঃ।
ন তান্পশ্যামি যে শক্তাঃ সমুচ্ছেত্তুং যথা বলাৎ॥ ১-২১৭-৩১ (৯৪৭৭)
প্রভাবশক্তির্বিপুলা মন্ত্রশক্তিশ্চ পুষ্কলা।
তথৈবোৎসাহশক্তিশ্চ পার্থেষ্বপ্যধিতিষ্ঠতি॥ ১-২১৭-৩২ (৯৪৭৮)
মৌলমিত্রবলানাং চ কালজ্ঞো বৈ যুধিষ্ঠিরঃ।
সাম্না দানেন ভেদেন দণ্ডেনেতি যুধিষ্ঠিরঃ॥ ১-২১৭-৩৩ (৯৪৭৯)
অমিত্রাংশ্চ ততো জেতুনং ন রোষেণেতি মে মতিঃ।
পরিক্রীয় ধনৈঃ শত্রুং মিত্রাণি চ বলানি চ॥ ১-২১৭-৩৪ (৯৪৮০)
মূলং চ সুকৃতং কৃৎবা ভুঙ্ক্তে ভূমিং চ পাণ্ডবঃ।
অশক্যান্পাণ্ডবান্মন্যে দেবৈরপি সবাসবৈঃ॥ ১-২১৭-৩৫ (৯৪৮১)
যেষামর্থে সদা যুক্তৌ কৃষ্ণসংকর্ষণাবুভৌ।
শ্রেয়শ্চ যদি মন্যদ্বং মন্মতং যদি বা মতম্॥ ১-২১৭-৩৬ (৯৪৮২)
সংবিদং পাণ্ডবৈঃ সর্বৈঃ কৃৎবা যাম যথাগতম্।
গোপুরাট্টালকৈরুচ্চৈরুপতল্পশতৈরপি॥ ১-২১৭-৩৭ (৯৪৮৩)
গুপ্তং পুরবরশ্রেষ্ঠমেতদদ্ভিশ্চ সংবৃতম্।
তৃণধান্যেন্ধরসৈস্তথা যন্ত্রায়ুধৌষধৈঃ॥ ১-২১৭-৩৮ (৯৪৮৪)
যুক্তং বহুকবাটৈশ্চ দ্রব্যাগারসুবেদিকৈঃ।
ভীমোচ্ছ্রিতমহাচক্রং বৃহদট্টালসংবৃতম্॥ ১-২১৭-৩৯ (৯৪৮৫)
দৃঢপ্রাকারনির্যূহং শতঘ্নীশতসংকুলম্।
ঐষ্টকো দারবো বপ্রো মানুষশ্চেতি যঃ স্মৃতঃ॥ ১-২১৭-৪০ (৯৪৮৬)
প্রাকারকর্তৃভির্বীরৈর্নৃগর্ভস্তত্র পূজিতঃ।
তদেতন্নরগর্ভেণ পাণ্ডরেণ বিরাজতে॥ ১-২১৭-৪১ (৯৪৮৭)
সালেনানেকতালেন সর্বতঃ সংবৃতং পুরম্।
অনুরক্তাঃ প্রকৃতয়ো দ্রুপদস্য মহাত্মনঃ॥ ১-২১৭-৪২ (৯৪৮৮)
দানমানার্জিতাঃ সর্বে বাহ্যাভ্যন্তরগাশ্চ যে।
প্রতিরুদ্ধানিমাঞ্জ্ঞাৎবা রাজভির্ভীমবিক্রমৈঃ॥ ১-২১৭-৪৩ (৯৪৮৯)
উপয়াস্যন্তি দাশার্হাঃ সমুদগ্রোচ্ছ্রিতায়ুধাঃ।
তস্মাৎসংন্ধিং বয়ং কৃৎবা ধার্তরাষ্ট্রস্য পাণ্ডবৈঃ॥ ১-২১৭-৪৪ (৯৪৯০)
স্বরাষ্ট্রমেব গচ্ছামো যদ্যাপ্তং বচনং মম।
এতন্মম মতং সর্বৈঃ ক্রিয়তাং যদি রোচতে।
এতদ্ধি সুকৃতং মন্যে ক্ষেমং চাপি মহীভিতাম্॥ ॥ ১-২১৭-৪৫ (৯৪৯১)

ইতি শ্রীমন্মহাভারতে আদিপর্বণি বিদুরাগমনরাজ্যলাভপর্বণি সপ্তদশাধিকদ্বিশততমোঽধ্যায়ঃ॥ ২১৭ ॥

Mahabharata – Adi Parva – Chapter Footnotes

১-২১৭-২৯ ভেজির অর্জুনমিতি শেষঃ॥ সপ্তদশাধিকদ্বিশততমোঽধ্যায়ঃ॥ ২১৭ ॥