আদিপর্ব – অধ্যায় ২১৪

আদিপর্ব – অধ্যায় ২১৪

॥ শ্রীঃ ॥

১.২১৪. অধ্যায়ঃ ২১৪

Mahabharata – Adi Parva – Chapter Topics

পঞ্চে উপাখ্যানপ্রারম্ভঃ॥ ১ ॥ নৈমিশারণ্যে দেবৈরারব্ধে সত্রে যমস্য শামিত্রকর্মণি ব্যাপৃতৎবাৎ লোকে প্রজাবাহুল্যং দৃষ্ট্বা তৎপরিজিহীর্ষয়া দেবৈর্ব্রহ্মসমীপগমনম্॥ ২ ॥ ব্রহ্মাজ্ঞয়া পুনর্নৈমিশারণ্যং গতস্য গঙ্গায়াং পুণ্ডরীকং দৃষ্ট্বা তজ্জিহীর্ষয়া গতস্য ইন্দ্রস্য তত্র রুদন্তাঃ স্ত্রিয়াঃ দর্শনম্॥ ৩ ॥ তামনুগচ্ছতেন্দ্রেণ পর্বতবিবরে পূর্বেষাং চতুর্ণাং ইন্দ্রাণাং দর্শনম্॥ ৪ ॥ বলরামকেশবদ্রৌপদ্যাদীনামুৎপত্তিকথা॥ ৫ ॥ ব্যাসদত্তদিব্যদৃষ্টের্দ্রুপদস্য পাণ্ডবদ্রৌপদীপূর্বরূপদর্শনং॥ ৬ ॥ দ্রৌপদ্যা অব্যবহিতপূর্বজন্মবৃত্তান্তকথনম্॥ ৭ ॥

Mahabharata – Adi Parva – Chapter Text

১-২১৪-০ (৯৩২৮)
ব্যাস উবাচ। ১-২১৪-০x (১১৯০)
পুরা বৈ নৈমিশারণ্যে দেবাঃ সত্রমুপাসতে।
তত্র বৈবস্বতো রাজঞ্শামিত্রমকরোত্তদা॥ ১-২১৪-১ (৯৩২৯)
ততো যমো দীক্ষিতস্তত্র রাজ-
ন্নামারয়ৎকংচিদপি প্রজানাম্।
ততঃ প্রজাস্তা বহুলা বভূবুঃ
কালাতিপাতান্মরণপ্রহীণাঃ॥ ১-২১৪-২ (৯৩৩০)
সোমশ্চ শক্রো বরুণঃ কুবেরঃ
সাধ্যা রুদ্রা বসবোঽথাশ্বিনৌ চ।
প্রজাপতির্ভুবনস্য প্রণেতা
সমাজগ্মুস্তত্র দেবাস্তথাঽন্যে॥ ১-২১৪-৩ (৯৩৩১)
ততোঽব্রুবঁল্লোকগুরুং সমেতা
ভয়াত্তীব্রান্মানুষাণাং বিবৃদ্ধ্যা।
তস্মাদ্ভয়াদুদ্বিজন্তঃ সুখেপ্সবঃ
প্রয়াম সর্বে শরণং ভবন্তম্॥ ১-২১৪-৪ (৯৩৩২)
পিতামহ উবাচ। ১-২১৪-৫x (১১৯১)
কিং বো ভয়ং মানুষেভ্যো যূয়ং সর্বে যদাঽমরাঃ।
মা বো মর্ত্যসকাশাদ্বৈ ভয়ং ভবিতুমর্হতি॥ ১-২১৪-৫ (৯৩৩৩)
দেবা ঊচুঃ। ১-২১৪-৬x (১১৯২)
মর্ত্যা অমর্ত্যাঃ সংবৃত্তা ন বিশেষোঽস্তি কশ্চন।
অবিশেষাদুদ্বিজন্তো বিশেষার্থমিহাগতাঃ॥ ১-২১৪-৬ (৯৩৩৪)
শ্রীভগবানুবাচ। ১-২১৪-৭x (১১৯৩)
বৈবস্বতো ব্যাপৃতঃ সত্রহেতো-
স্তেন ৎবিমে ন ম্রিয়ন্তে মনুষ্যাঃ।
তস্মিন্নেকাগ্রে কৃতসর্বকার্যে
তত এষাং ভবিতৈবান্তকালঃ॥ ১-২১৪-৭ (৯৩৩৫)
বৈবস্বতস্যৈব তনুর্বিভক্তা
বীর্যেণ যুষ্মাকমুত প্রবৃদ্ধা।
সৈষামন্তো ভবিতা হ্যন্তকালে
ন তত্র বীর্যং ভবিতা নরেষু॥ ১-২১৪-৮ (৯৩৩৬)
ব্যাস উবাচ। ১-২১৪-৯x (১১৯৪)
ততস্তু তে পূর্বজদেববাক্যং
শ্রুৎবা জগ্মুর্যত্র দেবা যজন্তে।
সমাসীনাস্তে সমেতা মহাবলা
ভাগীরথ্যাং দদৃশুঃ পুণ্ডরীকম্॥ ১-২১৪-৯ (৯৩৩৭)
দৃষ্ট্বা চ তদ্বিস্মিতাস্তে বভূবু-
স্তেষামিন্দ্রস্তত্র শূরো জগাম।
সোঽপশ্যদ্যোষামথ পাবকপ্রভাং
যত্র দেবী গঙ্গা সততং প্রসূতা॥ ১-২১৪-১০ (৯৩৩৮)
সা তত্র যোষা রুদতী জলার্থিনী
গঙ্গাং দেবীং ব্যবগাহ্য ব্যতিষ্ঠৎ।
তস্যাশ্রুবিন্দুঃ পতিতো জলে য-
স্তৎপদ্মমাসীদথ তত্র কাঞ্চনম্॥ ১-২১৪-১১ (৯৩৩৯)
তদদ্ভুতং প্রেক্ষ্য বজ্রী তদানী-
মপৃচ্ছত্তাং যোষিতমন্তিকাদ্বৈ।
কা ৎবং ভদ্রে রোদিষি কস্য হেতো-
র্বাক্যং তথ্যং কাময়েঽহং ব্রবীহি॥ ১-২১৪-১২ (৯৩৪০)
স্ত্র্যুবাচ। ১-২১৪-১৩x (১১৯৫)
ৎবং বেৎস্যসে মামিহ যাঽস্মি শক্র
যদর্থং চাহং রোদিমি মন্দভাগ্যা।
আগচ্ছ রাজন্পুরতো গমিষ্যে
দ্রষ্টাঽসি তদ্রোদিমি যৎকৃতেঽহম্॥ ১-২১৪-১৩ (৯৩৪১)
ব্যাস উবাচ। ১-২১৪-১৪x (১১৯৬)
তাং গচ্ছন্তীমন্বগচ্ছত্তদানীং
সোঽপশ্যদারাত্তরুণং দর্শনীয়ম্।
সিদ্ধাসনস্থং যুবতীসহায়ং
ক্রীডন্তমক্ষৈর্গিরিরাজমূর্ধ্নি॥ ১-২১৪-১৪ (৯৩৪২)
তমব্রবীদ্দেবরাজো মমেদং
ৎবং বিদ্ধি বিদ্বন্ভুবনং বশে স্থিতম্।
ঈশোঽহস্মীতি সমন্যুরব্রবী-
দ্দৃষ্ট্বা তমক্ষৈঃ সুভৃশং প্রমত্তম্॥ ১-২১৪-১৫ (৯৩৪৩)
ক্রুদ্ধং চ শক্রং প্রসমীক্ষ্য দেবো
জহায় শক্রং চ শৈরুদৈক্ষত।
সংস্তম্ভিতোঽভূদথ দেবরাজ-
স্তেনেক্ষিতঃ স্থাণুরিবাবতস্থে॥ ১-২১৪-১৬ (৯৩৪৪)
যদা তু পর্যাপ্তমিহাস্য ক্রীডয়া
তদা দেবীং রুদতীং তামুবাচ।
আনীয়তামেষ যতোঽহমারা-
ন্নৈনং দর্পঃ পুনরপ্যাবিশেত॥ ১-২১৪-১৭ (৯৩৪৫)
ততঃ শক্রঃ স্পৃষ্টমাত্রস্তয়া তু
স্রস্তৈরঙ্গৈঃ পতিতোঽভূদ্ধরণ্যাম্।
তমব্রবীদ্ভগবানুগ্রতেজা
মৈবং পুনঃ শক্র কৃথাঃ কথংচিৎ॥ ১-২১৪-১৮ (৯৩৪৬)
নিবর্তয়ৈনং চ মহাদ্রিরাজং
বলং চ বীর্যং চ তবাপ্রমেয়ম্।
ছিদ্রস্য চৈবাবিশ মধ্যমস্য
যত্রাসতে ৎবদ্বিধাঃ সূর্যভাসঃ॥ ১-২১৪-১৯ (৯৩৪৭)
স তদ্বিবৃত্য বিবরং মহাগিরে-
স্তুল্যদ্যুতীংশ্চতুরোঽন্যান্দদর্শ।
স তানভিপ্রেক্ষ্য বভূব দুঃখিতঃ
কচ্চিন্নাহং ভবিতা বৈ যথেমে॥ ১-২১৪-২০ (৯৩৪৮)
ততো দেবো গিরিশো বজ্রপাণিং
বিবৃত্য নেত্রে কুপিতোঽভ্যুবাচ।
দরীমেতাং প্রবিশ ৎবং শতক্রতো
যন্মাং বাল্যাদবমংস্থাঃ পুরস্তাৎ॥ ১-২১৪-২১ (৯৩৪৯)
উক্তস্ৎবেবং বিভুনা দেবরাজঃ
প্রাবেপতাঽঽর্তো ভৃশমেবাভিষঙ্গাৎ।
স্রস্তৈরঙ্গৈরনিলেনেব নুন্ন-
মশ্বত্থপত্রং গিরিরাজমূর্ধ্নি॥ ১-২১৪-২২ (৯৩৫০)
স প্রাঞ্জলির্বৈ বৃষবাহনেন
প্রবেপমানঃ সহসৈবমুক্তঃ।
উবাচ দেবং বহুরূপমুগ্র-
মদ্যাশেষস্য ভুবনস্য ৎবং ভবাদ্যঃ॥ ১-২১৪-২৩ (৯৩৫১)
তমব্রবীদুগ্রবর্চাঃ প্রহস্য
নৈবংশীলাঃ শেষমিহাপ্নুবন্তি।
এতেঽপ্যেবং ভবিতারঃ পুরস্তা-
ত্তস্মাদেতাং দরীমাবিশ্য শেষ্য॥ ১-২১৪-২৪ (৯৩৫২)
এষা ভার্যা ভবিতা বো ন সংশয়ো
যোনিং সর্বে মানুষীমাবিশধ্বম্।
তত্র যূয়ং কর্ম কৃৎবাঽবিষহ্যং
বহূনন্যান্নিধনং প্রাপয়িৎবা॥ ১-২১৪-২৫ (৯৩৫৩)
`অস্ত্রৈর্দিব্যৈর্মানুষান্যোধয়িৎবা
শূরান্সর্বানাহবে সংবিজিত্য।’
আগন্তারঃ পুনরেবেন্দ্রবলোকং
স্বকর্মণা পূর্বচিতং মহার্হম্।
সর্বং ময়া ভাষিতমেতদেবং
কর্তব্যমন্যদ্বিবিধার্থয়ুক্তম্॥ ১-২১৪-২৬ (৯৩৫৪)
পূর্বেন্দ্রা ঊচুঃ। ১-২১৪-২৭x (১১৯৭)
গমিষ্যামো মানুষং দেবলোকা-
দ্দুরাধরো বিহিতো যত্র মোক্ষঃ।
দেবাস্ৎবস্মানাদধীরঞ্জনন্যাং
ধর্মো বায়ুর্মঘবানশ্বিনৌ চ॥ ১-২১৪-২৭ (৯৩৫৫)
ব্যাস উবাচ। ১-২১৪-২৮x (১১৯৮)
এতচ্ছ্রুৎবা বজ্রপাণির্বচস্তু
দেবশ্রেষ্ঠং পুনরেবেদমাহ।
বীর্যেণাহং পুরুষং কার্যহেতো-
র্দদ্যামেষাং পঞ্চমং মৎপ্রসূতম্॥ ১-২১৪-২৮ (৯৩৫৬)
বিশ্বভুগ্ভূতধামা চ শিবিরিন্দ্রঃ প্রতাপবান্।
শান্তিশ্চতুর্থস্তেষাং বৈ তেজস্বী পঞ্চমঃ স্মৃতঃ॥ ১-২১৪-২৯ (৯৩৫৭)
তেষাং কামং ভগবানুগ্রধন্বা
প্রাদাদিষ্টং সন্নিসর্গাদ্যথোক্তম্।
তাং চাপ্যেষাং যোষিতং লোককান্তাং
শ্রিয়ং ভার্যাং ব্যদধান্মানুষেষু॥ ১-২১৪-৩০ (৯৩৫৮)
তৈরেব সার্ধং তু ততঃ স দেবো
জগাম নারায়ণমপ্রমেয়ম্।
অনন্তমব্যক্তমজং পুরাণং
সনাতনং বিশ্বমনন্তরূপম্॥ ১-২১৪-৩১ (৯৩৫৯)
স চাপি তদ্ব্যদধাৎসর্বমেব
ততঃ সর্বে সংবভূবুর্ধরণ্যমাম্।
`নরং তু দেবং বিবুধপ্রধান-
মিন্দ্রাজ্জিষ্ণুং পঞ্চমং কল্পয়িৎবা।’
স চাপি কেশৌ হরিরুদ্ববর্হ
শুক্লমেকমপরং চাপি কৃষ্ণম্॥ ১-২১৪-৩২ (৯৩৬০)
তৌ চাপি কেশৌ বিশতাং যদূনাং
কুলে স্ত্রিয়ৌ দেবকীং রোহিণীং চ।
তয়োরেকো বলদেবো বভূব
যোঽসৌ শ্বেতস্য দেবস্য কেশঃ।
কৃষ্ণো দ্বিতীয়ঃ কেশবঃ সংবভূব
কেশো যোঽসৌ বর্ণতঃ কৃষ্ণ উক্তঃ॥ ১-২১৪-৩৩ (৯৩৬১)
যে তে পূর্বং শক্ররূপা নিবদ্ধা-
স্তস্যাং দর্যাং পর্বতস্যোত্তরস্য।
ইহৈব তে পাণ্ডবা বীর্যবন্তঃ
শক্রস্যাংশঃ পাণ্ডবঃ সব্যসাচী॥ ১-২১৪-৩৪ (৯৩৬২)
এবমেতে পাণ্ডবাঃ সংবভূবু-
র্যে তে রাজন্পূর্বমিন্দ্রা বভূবুঃ।
লক্ষ্মীশ্চৈষাং পূর্বমেবোপদিষ্টা
ভার্যা যৈষা দ্রৌপদী দিব্যরূপা॥ ১-২১৪-৩৫ (৯৩৬৩)
কথং হি স্ত্রী কর্মণা তে মহীতলা-
ৎসমুত্তিষ্ঠেদন্যতো দৈবয়োগাৎ।
যস্যা রূপং সোমসূর্যপ্রকাশং
গন্ধশ্চাস্যাঃ কোশমাত্রাৎপ্রবাতি॥ ১-২১৪-৩৬ (৯৩৬৪)
ইদং চান্যৎপ্রীতিপূর্বং নরেন্দ্র
দদানি তে বরমত্যদ্ভুতং চ।
দিব্যং চক্ষুঃ পশ্য কুন্তীসুতাংস্ৎবং
পুণ্যৈর্দিব্যৈঃ পূর্বদেহৈরুপেতান্॥ ১-২১৪-৩৭ (৯৩৬৫)
বৈশম্পায়ন উবাচ। ১-২১৪-৩৮x (১১৯৯)
ততো ব্যাসঃ পরমোদারকর্মা
শুচির্বিপ্রস্তপসা তস্য রাজ্ঞঃ।
চক্ষুর্দিব্যং প্রদদৌ তাংশ্চ সর্বান্
রাজাঽপশ্যৎপূর্বদেহৈর্যথাবৎ॥ ১-২১৪-৩৮ (৯৩৬৬)
ততো দিব্যান্হেমকিরীটমালিনঃ
শক্রপ্রখ্যান্পাবকাদিত্যবর্ণান্।
বদ্ধাপীডাংশ্চারুরূপাংশ্চ যূনো
ব্যূঢোরস্কাংস্তালমাত্রান্দদর্শ॥ ১-২১৪-৩৯ (৯৩৬৭)
দিব্যৈর্বস্ত্রৈরজোভিঃ সুগন্ধৈ-
র্মাল্যৈশ্চাগ্র্যৈঃ শোভমানানতীব।
সাক্ষাত্ত্র্যক্ষান্বা বসূংশ্চাপি রুদ্রা-
নাদিত্যান্বা সর্বগুণোপপন্নান্॥ ১-২১৪-৪০ (৯৩৬৮)
তান্পূর্বেন্দ্রানভিবীক্ষ্যাভিরূপা-
ত্র্শক্রাত্মজং চেন্দ্ররূপং নিশম্য।
প্রীতো রাজা দ্রুপদো বিস্মিতশ্চ
দিব্যাং মায়াং তামবেক্ষ্যাপ্রমেয়াম্॥ ১-২১৪-৪১ (৯৩৬৯)
তাং চৈবাগ্র্যাং স্ত্রিয়মতিরূপয়ুক্তাং
দিব্যাং সাক্ষাৎসোমবহ্নিপ্রকাশাম্।
যোগ্যাং তেষাং রূপতেজোয়শোভিঃ
পত্নী মৎবা হৃষ্টবান্পার্থিবেন্দ্রঃ॥ ১-২১৪-৪২ (৯৩৭০)
স তদ্দৃষ্ট্বা মহদাশ্চর্যরূপং
জগ্রাহ পাদৌ সত্যবত্যাঃ সুতস্য।
নৈতচ্চিত্রং পরমর্ষে ৎবয়ীতি
প্রসন্নচেতাঃ স উবাচ চৈনম্॥ ১-২১৪-৪৩ (৯৩৭১)
`ব্যাস উবাচ। ১-২১৪-৪৪x (১২০০)
ইদং চাপি পুরাবৃত্তং তন্নিবোধ চ ভূমিম।
কীর্ত্যমানং নৃপর্ষীণাং পূর্বেষাং দারকর্মণি॥ ১-২১৪-৪৪ (৯৩৭২)
নিতন্তুর্নাম রাজর্ষির্বভূব ভুবি বিশ্রুতঃ।
তস্য পুত্রা মহেষ্বাসা বভূবুঃ পঞ্চ ভূমিতাঃ॥ ১-২১৪-৪৫ (৯৩৭৩)
সাল্বেয়ঃ শূরসেনশ্চ শ্রুতসেনশ্চ বীর্যবান্।
তিন্দুসারোঽতিসারশ্চ ক্ষত্রিয়াঃ ক্রতুয়াজিনঃ॥ ১-২১৪-৪৬ (৯৩৭৪)
নাতিচক্রমুরন্যোন্যমন্যোন্যস্য প্রিয়ংবদাঃ।
অনীর্ষ্যবো ধর্মবিদঃ সৌম্যাশ্চৈব প্রিয়করাঃ॥ ১-২১৪-৪৭ (৯৩৭৫)
এতান্নৈতন্তবান্পঞ্চ শিবিপুত্রী স্বয়ংবরে।
অবাপ স্বপতীন্বীরান্ভৌমাশ্বী মনুজাধিপান্॥ ১-২১৪-৪৮ (৯৩৭৬)
বীণেব মধুরারাবা গান্ধর্বস্বরমূর্চ্ছিতা।
উত্তমা সর্বনারীণাং ভৌমাশ্বী হ্যভবত্তদা॥ ১-২১৪-৪৯ (৯৩৭৭)
যস্যা নৈতন্তবাঃ পঞ্চ পতয়ঃ ক্ষত্রিয়র্ষভাঃ।
বভূবুঃ পৃথিবীপালাঃ সর্বৈঃ সমুদিতা গুণৈঃ॥ ১-২১৪-৫০ (৯৩৭৮)
তেষামেকাভবদ্ভার্যা রাজ্ঞামৌশীনরী শুভা।
ভৌমাশ্বী নাম ভদ্রং তে তথারূপগুণান্বিতা॥ ১-২১৪-৫১ (৯৩৭৯)
পঞ্চভ্যঃ পঞ্চধা পঞ্চ দায়াদান্সা ব্যজায়ত।
তেভ্যো নৈতন্তবেভ্যস্তু রাজশার্দূল বৈ তদা॥ ১-২১৪-৫২ (৯৩৮০)
পৃথগাখ্যাঽভবত্তেষাং ভ্রাতৄণাং পঞ্চধা ভুবি।
যথাবৎকীর্ত্যমানাংস্তাঞ্ছৃণু মে রাজসত্তম॥ ১-২১৪-৫৩ (৯৩৮১)
সাল্বেয়াঃ শূরসেনাশ্চ শ্রুতসেনাশ্চ পার্থিবাঃ।
তিন্দুসারাতিসারাশ্চ বংশা এষাং নৃপোত্তম॥ ১-২১৪-৫৪ (৯৩৮২)
এবমেকাঽভবদ্ভার্যা ভৌমাশ্বী ভুবি বিশ্রুতা।
তথৈব দ্রুপদৈষা তে সুতা বৈ দেবরূপিণী।
পঞ্চানাং বিহিতা পত্নী কৃষ্ণা পার্ষত্যনিন্দিতা’॥ ১-২১৪-৫৫ (৯৩৮৩)
ব্যাস উবাচ। ১-২১৪-৫৬x (১২০১)
আসীত্তপোবংনে কাচিদৃষেঃ কন্যা মহাত্মনঃ।
নাধ্যগচ্ছৎপতিং সা তু কন্যা রূপবতী সতী॥ ১-২১৪-৫৬ (৯৩৮৪)
তোষয়ামাস তপসা সা কিলোগ্রেণ শঙ্করম্।
তামুবাচেশ্বরঃ প্রীতো বৃণু কামমিতি স্বয়ম্॥ ১-২১৪-৫৭ (৯৩৮৫)
সৈবমুক্তাঽব্রবীৎকন্যা দেবং বরদমীশ্বরম্।
পতিং সর্বগুণোপেতমিচ্ছামীতি পুনঃপুনঃ॥ ১-২১৪-৫৮ (৯৩৮৬)
দদৌ তস্যৈ স দেবেশস্তং বরং প্রীতমানসঃ।
পঞ্চ তে পতয়ো ভদ্রে ভবিষ্যন্তীতি শঙ্করঃ॥ ১-২১৪-৫৯ (৯৩৮৭)
সা প্রসাদয়তী দেবমিদং ভূয়োঽভ্যভাষত।
একং পতিং গুণোপেতং ৎবত্তোঽর্হামীতি শঙ্কর॥ ১-২১৪-৬০ (৯৩৮৮)
তাং দেবদেবঃ প্রীতাত্মা পুনঃ প্রাহ শুভং বচঃ।
পঞ্চকৃৎবস্ৎবয়োক্তোঽহং পতিং দেহীতি বৈ পুনঃ॥ ১-২১৪-৬১ (৯৩৮৯)
তত্তথা ভবিতা ভদ্রে বচস্তদ্ভদ্রমস্তু তে।
দেহমন্যং গতায়াস্তে সর্বমেতদ্ভবিষ্যতি॥ ১-২১৪-৬২ (৯৩৯০)
দ্রুপদৈষা হি সা জজ্ঞে সুতা বৈ দেবরূপিণী।
পঞ্চানাং বিহিতা পত্নী কৃষ্ণা পার্ষত্যনিন্দিতা॥ ১-২১৪-৬৩ (৯৩৯১)
`সৈব নালায়নী ভূৎবা রূপেণাপ্রতিমা ভুবি।
মৌদ্গল্যং পতিমাস্থায় শিবাদ্বরমভীপ্সতী॥ ১-২১৪-৬৪ (৯৩৯২)
এতদ্দেবরহস্যং তে শ্রাবিতং রাজসত্তম।
নাখ্যাতব্যং কস্যচিদ্বৈ দেবগুহ্যমিদং যতঃ॥’ ১-২১৪-৬৫ (৯৩৯৩)
স্বর্গশ্রীঃ পাণ্ডবার্থং তু সমুৎপন্না মহামখে।
সেহ তপ্ৎবা তপো ঘোরং দুহিতৃৎবং তবাগতা॥ ১-২১৪-৬৬ (৯৩৯৪)
সৈষা দেবী রুচিরা দেবজুষ্টা
পঞ্চানামেকা স্বকৃতেনেহ কর্মণা।
সৃষ্টা স্বয়ং দেবপত্নী স্বয়ংভুবা
শ্রুৎবা রাজন্দ্রুপদেষ্টং কুরুষ্ব॥ ॥ ১-২১৪-৬৭ (৯৩৯৫)

ইতি শ্রীমন্মহাভারতে আদিপর্বণি বৈবাহিকপর্বণি চতুর্দশাধিকদ্বিশততমোঽধ্যায়ঃ॥ ২১৪ ॥

Mahabharata – Adi Parva – Chapter Footnotes

১-২১৪-১ শমিতা যজ্ঞে পশুবধকর্তা তস্য ভাবঃ শামিত্রম্॥ ১-২১৪-৩ যত্র প্রজাপতিস্তত্র সোমাদয়ঃ সমাজগ্মুঃ॥ ১-২১৪-১১ তস্যাঃ অশ্রুবিন্দুঃ। সন্ধিরার্ষঃ॥ ১-২১৪-২১ ততঃ শীঘ্রমপ্রবেশাদ্ধেতোঃ॥ ১-২১৪-২৩ হে ভব অদ্য ৎবমশেষস্য ভুবনস্য আদ্যঃ পতিরসি। অদ্যেত্যনেন মাং জিৎবৈব নৎবন্যথেতি সূচিতম্॥ ১-২১৪-২৪ শেষং প্রসাদম্॥ ১-২১৪-২৭ দুরাধরো দুষ্প্রাপঃ॥ ১-২১৪-২৮ বীর্যেণ শুক্রদ্বারা পুরুষমংশভূতং দদ্যাম্॥ ১-২১৪-২৯ তেজস্বী ইন্দ্রাংশঃ॥ ১-২১৪-৩১ তৈর্বিশ্বভুগাদিভিঃ। স দেবো মহাদেবঃ॥ ১-২১৪-৩২ ব্যদধাদ্বিহিতবান্ আজ্ঞপ্তবানিত্যর্থঃ। উদ্ববর্হ উদ্ধৃতবান্॥ ১-২১৪-৩৮ তস্য রাজ্ঞঃ। তস্মৈ রাজ্ঞে॥ চতুর্দশাধিকদ্বিশততমোঽধ্যায়ঃ॥ ২১৪ ॥