আদিপর্ব – অধ্যায় ২০৭

আদিপর্ব – অধ্যায় ২০৭

॥ শ্রীঃ ॥

১.২০৭. অধ্যায়ঃ ২০৭

Mahabharata – Adi Parva – Chapter Topics

পাণ্ডবাবাসে ধৃষ্টদ্যুম্নস্য নিলীয়াবস্থানম্॥ ১ ॥ ভীমাদ্যানীতস্য ভৈক্ষস্য কুন্ত্যাজ্ঞয়া দ্রৌপদ্যা পরিবেষণম্॥ ২ ॥ সর্বং পাণ্ডববৃত্তান্তং জ্ঞাৎবা ধৃষ্টদ্যুম্নস্য প্রতিনিবর্তনম্॥ ৩ ॥

Mahabharata – Adi Parva – Chapter Text

১-২০৭-০ (৯১৪১)
বৈশম্পায়ন উবাচ। ১-২০৭-০x (১১৫১)
ধৃষ্টদ্যুমনস্তু পাঞ্চাল্যঃ পৃষ্ঠতঃ কুরুনন্দনৌ।
অন্বগচ্ছত্তদা যান্তৌ ভার্গবস্য নিবেশনে॥ ১-২০৭-১ (৯১৪২)
সোজ্ঞায়মানঃ পুরুষানবধায় সমন্ততঃ।
স্বয়মারান্নিলীনোঽভূদ্ভার্গবস্য নিবেশনে॥ ১-২০৭-২ (৯১৪৩)
সায়ং চ ভীমস্তু রিপুপ্রমাথী
জিষ্ণুর্যমৌ চাপি মহানুভাবৌ।
ভৈক্ষং চরিৎবা তু যুধিষ্ঠিরায়
নিবেদয়াংচক্রুরদীনসৎবাঃ॥ ১-২০৭-৩ (৯১৪৪)
ততস্তু কুন্তী দ্রুপদাত্মজাং তা-
মুবাচ কালে বচনং বদান্যা।
ততোঽগ্রমাদায় কুরুষ্ব ভদ্রে
বলিং চ বিপ্রায় চ দেহি ভিক্ষাম্॥ ১-২০৭-৪ (৯১৪৫)
যে চান্নমিচ্ছন্তি দদস্ব তেভ্যঃ
পরিশ্রিতা যে পরিতো মনুষ্যাঃ।
ততশ্চ শেষং প্রবিভজ্য শীঘ্র-
মর্ধং চতুর্ণাং মম চাত্মনশ্চ॥ ১-২০৭-৫ (৯১৪৬)
অর্ধং তু ভীমায় চ দেহি ভদ্রে
য এষ নাগর্ষভতুল্যরূপঃ।
গৌরো যুবা সংহননোপপন্ন
এষো হি বীরো বহুভুক্ সদৈব॥ ১-২০৭-৬ (৯১৪৭)
সা হৃষ্টরূপৈব তু রাজপুত্রী
তস্যা বচঃ সাধ্ববিশঙ্কমানা।
যথাবদুক্তং প্রচকার সাধ্বী
তে চাপি সর্বে বুভুজুস্তদন্নম্॥ ১-২০৭-৭ (৯১৪৮)
কুশৈস্তু ভূমৌ শয়নং চকার
মাদ্রীপুত্রঃ সহদেবস্তপস্বী।
অথাত্মকীয়ান্যজিনানি সর্বে
সংস্তীর্য বীরাঃ সুষুপুর্ধরণ্যাম্॥ ১-২০৭-৮ (৯১৪৯)
অগস্ত্যকান্তামভিতো দিশং তু
শিরাংসি তেষাং কুরুসত্তমানাম্।
কুন্তী পুরস্তাত্তু বভূব তেষাং
পাদান্তরে চাথ বভূব কৃষ্ণা॥ ১-২০৭-৯ (৯১৫০)
অশেত ভূমৌ সহ পাণ্ডুপুত্রৈঃ
পাদোপধানীব কৃতা কুশেষু।
ন তত্র দুঃখং মনসাপি তস্যা
ন চাবমেনে কুরুপুঙ্গবাংস্তান্॥ ১-২০৭-১০ (৯১৫১)
তে তত্র শূরাঃ কথয়াংবভূবুঃ
কথা বিচিত্রাঃ পৃতনাধিকারাঃ।
অস্ত্রাণি দিব্যানি রথাংশ্চ নাগান্
খড্গান্গদাশ্চাপি পরশ্বধাংশ্চ॥ ১-২০৭-১১ (৯১৫২)
তেষাং কথাস্তাঃ পরিকীর্ত্যমানাঃ
পাঞ্চালরাজস্য সুতস্তদানীম্।
সুশ্রাব কৃষ্ণাং চ তদা নিষণ্ণাং
তে চাপি সর্বে দদৃশুর্মনুষ্যাঃ॥ ১-২০৭-১২ (৯১৫৩)
ধৃষ্টদ্যুম্নো রাজপুত্রস্তু সর্বং
বৃত্তং তেষাং কথিতং চৈব রাত্রৌ।
সর্বং রাজ্ঞে দ্রুপদায়াখিলেন
নিবেদয়িষ্যংস্ৎবরিতো জগাম॥ ১-২০৭-১৩ (৯১৫৪)
পাঞ্চালরাজস্তু বিষণ্ণরূপ-
স্তান্পাণ্ডবানপ্রতিবিন্দমানঃ।
ধৃষ্টদ্যুম্নং পর্যপৃচ্ছন্মহাত্মা
ক্ব সা গতা কেন নীতা চ কৃষ্ণা॥ ১-২০৭-১৪ (৯১৫৫)
কচ্চিন্ন শূদ্রেণ ন হীনজেন
বৈশ্যেন বা করদেনোপপন্না।
কচ্চিৎপদং মূর্ধ্নি ন পঙ্কদিগ্ধং
কচ্চিন্ন মালা পতিতা শ্মশানে॥ ১-২০৭-১৫ (৯১৫৬)
কচ্চিৎস বর্ণপ্রবরো মনুষ্য
উদ্রিক্তবর্ণোঽপ্যুত এব কচ্চিৎ।
কচ্চিন্ন বামো মম মূর্ধ্নি পাদঃ
কৃষ্ণাভিমর্শেন কৃতোঽদ্য পুত্র॥ ১-২০৭-১৬ (৯১৫৭)
কচ্চিন্ন তপ্স্যে পরমপ্রতীতঃ
সংয়ুজ্য পার্থেন নরর্ষভেণ।
বদস্ব তত্ৎবেন মহানুভাব
কোঽসৌ বিজেতা দুহিতুর্মমাদ্য॥ ১-২০৭-১৭ (৯১৫৮)
বিচিত্রবীর্যস্য সুতস্য কচ্চি-
ৎকুরুপ্রবীরস্য ধ্রিয়ন্তি পুত্রাঃ।
কচ্চিত্তু পার্থেন যবীয়সাঽধ্য
ধনুর্গৃহীতং নিহতং চ লক্ষ্যম্॥ ॥ ১-২০৭-১৮ (৯১৫৯)

ইতি শ্রীমন্মহাভারতে আদিপর্বণি স্বয়ংবরপর্বণি সপ্তাধিকদ্বিশততমোঽধ্যায়ঃ॥ ২০৭ ॥ ॥ সমাপ্তং স্বয়ংবরপর্ব ॥

Mahabharata – Adi Parva – Chapter Footnotes

১-২০৭-৪ অগ্রং প্রথমমাদায় বলিং কুরুষ্ব ভিক্ষাং চ দেহি॥ ১-২০৭-১৮ ধ্রেয়ন্তি জীবন্তি॥ সপ্তাধিকদ্বিশততমোঽধ্যায়ঃ॥ ২০৭ ॥