আদিপর্ব – অধ্যায় ১৫৭

আদিপর্ব – অধ্যায় ১৫৭

॥ শ্রীঃ ॥

১.১৫৭. অধ্যায়ঃ ১৫৭

Mahabharata – Adi Parva – Chapter Topics

হাস্তিনপুরং ত্যক্ৎবা বারণাবতং গচ্ছতা যুধিষ্ঠিরেণ অনুগচ্ছথাং পৌরাণাং নিবর্তনম্॥ ১ ॥ ম্লেচ্ছভাষয়া যুধিষ্ঠিরং প্রতি বিদুরস্যোপদেশঃ॥ ২ ॥

Mahabharata – Adi Parva – Chapter Text

১-১৫৭-০ (৭১৬৪)
বৈশম্পায়ন উবাচ। ১-১৫৭-০x (৯২৪)
পাণ্ডবাস্তু রথান্যুক্তান্সদশ্বৈরনিলোপমৈঃ।
আরোহমাণা ভীষ্মস্য পাদৌ জগৃহুরার্তবৎ॥ ১-১৫৭-১ (৭১৬৫)
রাজ্ঞশ্চ ধৃতরাষ্ট্রস্য দ্রোণস্য চ মহাত্মনঃ।
অন্যেষাং চৈব বৃদ্ধানাং কৃপস্য বিদুরস্য চ॥ ১-১৫৭-২ (৭১৬৬)
এবং সর্বান্কুরূন্বৃদ্ধানভিবাদ্য যতব্রতাঃ।
সমালিঙ্গ্য সমানান্বৈ বালৈশ্চাপ্যভিবাদিতাঃ॥ ১-১৫৭-৩ (৭১৬৭)
সর্বা মাতৄস্তথাঽঽপৃচ্ছ্য কৃৎবা চৈব প্রদক্ষিণম্।
প্রকৃতীরপি সর্বাশ্চ প্রয়যুর্বারণাবতম্॥ ১-১৫৭-৪ (৭১৬৮)
বিদুরশ্চ মহাপ্রাজ্ঞস্তথাঽন্যে কুরুপুঙ্গবাঃ।
পৌরাশ্চ পুরুষব্যাঘ্রানন্বীয়ুঃ শোককর্শিতাঃ॥ ১-১৫৭-৫ (৭১৬৯)
তত্র কেচিদ্ব্রুবন্তি স্ম ব্রাহ্মণা নির্ভয়াস্তদা।
দীনান্দৃষ্ট্বা পাণ্ডুসুতানতীব ভৃশদুঃখিতাঃ॥ ১-১৫৭-৬ (৭১৭০)
বিষমং পশ্যতে রাজা সর্বথা স সুমন্দধীঃ।
কৌরব্যো ধৃতরাষ্ট্রস্তু ন চ ধর্মং প্রপশ্যতি॥ ১-১৫৭-৭ (৭১৭১)
ন হি পাপমপাপাত্মা রোচয়িষ্যতি পাণ্ডবঃ।
ভীমো বা বলিনাং শ্রেষ্ঠঃ কৌন্তেয়ো বা ধনঞ্জয়ঃ॥ ১-১৫৭-৮ (৭১৭২)
কুত এব মহাত্মানৌ মাদ্রীপুত্রৌ করিষ্যতঃ।
তান্রাজ্যং পিতৃতঃ প্রাপ্তান্ধৃতরাষ্ট্রো ন মৃষ্যতি॥ ১-১৫৭-৯ (৭১৭৩)
অধর্ম্যমিদমত্যন্তং কথং ভীষ্মোঽনুমন্যতে।
বিবাস্যমানানস্থানে নগরে যোঽভিমন্যতে॥ ১-১৫৭-১০ (৭১৭৪)
পিতেব হি নৃপোঽস্মাকমভূচ্ছান্তনবঃ পুরা।
বিচিত্রবীর্যো রাজর্ষিঃ পাণ্ডুশ্চ কুরুনন্দনঃ॥ ১-১৫৭-১১ (৭১৭৫)
স তস্মিন্পুরুষব্যাঘ্রে দেবভাবং গতে সতি।
রাজপুত্রানিমান্বালান্ধৃতরাষ্ট্রো ন মৃষ্যতি॥ ১-১৫৭-১২ (৭১৭৬)
বয়মেতদনিচ্ছন্তঃ সর্ব এব পুরোত্তমাৎ।
গৃহান্বিহায় গচ্ছামো যত্র গন্তা যুধিষ্ঠিরঃ॥ ১-১৫৭-১৩ (৭১৭৭)
বৈশম্পায়ন উবাচ। ১-১৫৭-১৪x (৯২৫)
তাংস্তথা বাদিনঃ পৌরান্দুঃকিতান্দুঃখকর্শিতঃ।
উবাচ মনসা ধ্যাৎবা ধর্মরাজো যুধিষ্ঠিরঃ॥ ১-১৫৭-১৪ (৭১৭৮)
পিতা মান্যো গুরুঃ শ্রেষ্ঠো যদাহ পৃথিবীপতিঃ।
অশঙ্কমানৈস্তৎকার্যমস্মাভিরিতি নো ব্রতম্॥ ১-১৫৭-১৫ (৭১৭৯)
ভবন্তঃ সুহৃদোঽস্মাকং যাত কৃৎবা প্রদক্ষিণম্।
প্রতিনন্দ্য তথাঽঽশীর্ভির্নিবর্তধ্বং যথাগৃহম্॥ ১-১৫৭-১৬ (৭১৮০)
যদা তু কার্যমস্মাকং ভবদ্ভিরুপপৎস্যতে।
তদা করিষ্যথাস্মাকং প্রিয়াণি চ হিতানি চ॥ ১-১৫৭-১৭ (৭১৮১)
এবমুক্তাস্তদা পৌরাঃ কৃৎবা চাপি প্রদক্ষিণম্।
আশীর্ভিশ্চাভিনন্দ্যৈতাঞ্জগ্মুর্নগরমেব হি॥ ১-১৫৭-১৮ (৭১৮২)
পৌরেষু বিনিবৃত্তেষু বিদুরঃ সর্বধর্মবিৎ।
বোধয়ন্পাণ্ডবশ্রেষ্ঠমিদংবচনমব্রবীৎ॥ ১-১৫৭-১৯ (৭১৮৩)
প্রাজ্ঞঃ প্রাজ্ঞং প্রলাপজ্ঞঃ প্রলাপজ্ঞমিদং বচঃ।
যো জানাতি পরপ্রজ্ঞাং নীতিশাস্ত্রানুসারিণীম্।
বিজ্ঞায়েহ তথা কুর্যাদাপদং নিস্তরেদ্যথা॥ ১-১৫৭-২০ (৭১৮৪)
অলোহং নিশিতং শস্ত্রং শরীপরিকর্তনম্।
যো বেত্তি ন তু তং ঘ্নন্তি প্রতিঘাতবিদং দ্বিষঃ॥ ১-১৫৭-২১ (৭১৮৫)
কক্ষঘ্নঃ শিশিরঘ্নশ্চ মহাকক্ষে বিলৌকসঃ।
ন দহেদিতি চাত্মানং যো রক্ষতি স জীবতি॥ ১-১৫৭-২২ (৭১৮৬)
নাচক্ষুর্বেত্তি পন্থানং নাচক্ষুর্বিন্দতে দিশঃ।
নাধৃতির্ভূতিমাপ্নোতি বুধ্যস্বৈবং প্রবোধিতঃ॥ ১-১৫৭-২৩ (৭১৮৭)
অনাপ্তৈর্দত্তমাদত্তে নরঃ শস্ত্রমলোহজম্।
শ্বাবিচ্ছরণমাসাদ্য প্রমুচ্যেত হুতাশনাৎ॥ ১-১৫৭-২৪ (৭১৮৮)
চরন্মার্গান্বিজানাতি নক্ষত্রৈর্বিন্দতে দিশঃ।
আত্মনা চাত্মনঃ পঞ্চ পীডয়ন্নানুপীড্যতে॥ ১-১৫৭-২৫ (৭১৮৯)
এবমুক্তঃ প্রত্যুবাচ ধর্মরাজো যুধিষ্ঠিরঃ।
বিদুরং বিদুষাং শ্রেষ্ঠং জ্ঞাতমিত্যেব পাণ্ডবঃ॥ ১-১৫৭-২৬ (৭১৯০)
অনুশিক্ষ্যানুগম্যৈতান্কৃৎবা চৈব প্রদক্ষিণম্।
পাণ্ডবানভ্যনুজ্ঞায় বিদুরঃ প্রয়যৌ গৃহান্॥ ১-১৫৭-২৭ (৭১৯১)
নিবৃত্তে বিদুরে চাপি ভীষ্মে পৌরজনে তথা।
অজাতশত্রুমাসাদ্য কুন্তী বচনমব্রবীৎ॥ ১-১৫৭-২৮ (৭১৯২)
ক্ষত্তা যদব্রবীদ্বাক্যং জনমধ্যেঽব্রুবন্নিব।
ৎবয়া চ স তথেত্যুক্তো জানীমো ন চ তদ্বয়ম্॥ ১-১৫৭-২৯ (৭১৯৩)
যদীদং শক্যমস্মাভির্জ্ঞাতুং নৈব চ দোষবৎ।
শ্রোতুমিচ্ছামি তৎসর্বং সংবাদং তব তস্য চ॥ ১-১৫৭-৩০ (৭১৯৪)
যুধিষ্ঠির উবাচ। ১-১৫৭-৩১x (৯২৬)
বিষাদগ্নেশ্চ বোদ্ধব্যমিতি মাং বিদুরোঽব্রবীৎ।
পন্থানো বেদিতব্যাশ্চ নক্ষত্রৈশ্চ তথা দিশঃ।
`কুড্যাশ্চবিদিতাঃকার্যাঃস্যাচ্ছুদ্ধিরিতিচাব্রবীৎ॥ ১-১৫৭-৩১ (৭১৯৫)
জিতেন্দ্রিয়শ্চ বসুধাং প্রাপ্স্যতীতি চ মেঽব্রবীৎ।
বিজ্ঞাতমিতি তৎসর্বং প্রত্যুক্তো বিদুরো ময়া॥ ১-১৫৭-৩২ (৭১৯৬)
বৈশম্পায়ন উবাচ। ১-১৫৭-৩৩x (৯২৭)
অষ্টমেঽহনি রোহিণ্যাং প্রয়াতাঃ ফাল্গুনস্য তে।
বারণাবতমাসাদ্য দদৃশুর্নাগরং জনম্॥ ॥ ১-১৫৭-৩৩ (৭১৯৭)

ইতি শ্রীমন্মহাভারতে আদিপর্বণি জতুগৃহপর্বণি সপ্তপঞ্চাদশদধিকশততমোঽধ্যায়ঃ॥ ১৫৭ ॥

Mahabharata – Adi Parva – Chapter Footnotes

১-১৫৭-১০ অস্থানে অয়ুক্তম্ যোঽভিমন্যতে স ভীষ্মঃ কথমনুমন্যত ইত্যর্থঃ॥ ১-১৫৭-২০ প্রাজ্ঞঃ ঊহাপোহসমর্থঃ। প্রলাপজ্ঞঃ অনর্থবচনাভাসাভিজ্ঞঃ। যুধিষ্ঠিরমপ্যেতাদৃশম্। বচনমেবাহ। ইদমিতি। ইদং প্রলাপাত্মকং মম বচো যো জানাতি সঃ পরস্য শত্রোঃ প্রজ্ঞাং স্ববাধার্থং নীত্যা প্রয়ুক্তাং বিজ্ঞায় তথা কুর্যাৎ। যথা স্বয়মাপদং নিস্তরেদিত্যন্বয়ঃ॥ ১-১৫৭-২১ প্রলাপাকারবচনমেবাহ। অলোহমিতি। অলোহমগ্নিময়ং শস্ত্রমিব শস্ত্রং ঘাতকং তস্য প্রতিঘাতবিদং দ্বিষো ন ঘ্নন্তি। প্রতিঘাতকৃতমিতি পাঠে প্রতিঘাতায় কৃতমিত্যর্থঃ॥ ১-১৫৭-২২ অগ্নিকৃতে ভয়ে জ্ঞাতেঽপি কথং প্রতীকারস্তত্রাহ। কক্ষঘ্ন ইতি। কক্ষস্তৃণেন্ধনং হন্তীতি তথা। শিশিরং শীতং হন্তীতি তথাবিধোঽপি অগ্নিঃ মহাকক্ষে অরণ্যে দহ্যমানেঽপি বিলৌকসো মূষিকাদীন্ন দহতি ইত্থমাত্মানং যো রক্ষতি স জীবতি। তথা বিলেষ্বাবিশ্যাগারাদ্রক্ষণীয় ইত্যর্থঃ॥ ১-১৫৭-২৩ ততশ্চ বিলনির্গমানন্তরমরণ্যগমন্প্রকারমুপদিশতি। নাচক্ষুরিতি। অচক্ষুঃ পূর্বং বর্ত্মদর্শনবিহীনঃ পন্থানং রাত্রৌ ন বেত্তি। তথা অচক্ষুঃ বিজ্ঞানবিহীনঃ দিশো ন বিন্দতে ন প্রত্যভিজানাতি। অতঃ পূর্বমেব বর্ত্মদিশৌ দ্রষ্টব্যে ইতি ভাবঃ। কথমস্মাকং বিলপ্রবেশনির্গমাবিতি চেত্তত্রাহ। নাধৃতিরিতি। দুঃখে ধৈর্যরহিতো ভূতিমৈশ্বর্যং জীবনং বা ন বিন্দতি। বিপদি ধৈর্যমেব কার্যমিত্যর্থঃ॥ ১-১৫৭-২৪ কিংচ যৎপুরোচনাদিভিঃ কর্তব্যং তৎস্বয়মেব কার্যমিত্যাহ। অনাপ্তৈরিতি। অনাপ্তৈঃ পুরোচনাদিভির্দত্তং দাতুমারব্ধং যদলোহজং শস্ত্রং তৎস্বয়মাদত্তে স্বীকরোতি তান্হৎবা আত্মানং রক্ষতি। পুরোচনাদিষু জীবৎসু অনু সারাদিশঙ্কা স্যাদিতি ভাবঃ। শরণং সুরঙ্গাম্॥ ১-১৫৭-২৫ আত্মনা সহ পঞ্চ ইন্দ্রিয়াণি। আহারাদ্যভাবেন পীডয়ম্ অনু পশ্চাৎ ন পীড্যতে ভবানিতি শেষঃ। যদ্বা। নাচক্ষুরিত্যুক্তস্যৈব বিবরণং। চরন্মার্গানিতি। বিশ্বাসার্থং ষড্দগ্ধব্যা ইত্যাহ। আত্মনেতি। লুপ্তোপমমেতৎ। ৎবৎসদৃশেন সহ আত্মনঃ তব সদৃশান্পঞ্চ নানুপীড্যতে ভবানিতি শেষঃ॥ ১-১৫৭-২৯ অব্রুবন্নিব ব্যক্তাং বাচমকুর্বন্নিব॥ সপ্তপঞ্চাশদধিকশততমোঽধ্যায়ঃ॥ ১৫৭ ॥