আদিপর্ব – অধ্যায় ০৯৩

আদিপর্ব – অধ্যায় ০৯৩

॥ শ্রীঃ ॥

১.৯৩. অধ্যায়ঃ ০৯৩

Mahabharata – Adi Parva – Chapter Topics

বিশ্বামিত্রান্মেনকায়াং শকুন্তলায়া জন্মকথনম্॥ ১ ॥

Mahabharata – Adi Parva – Chapter Text

১-৯৩-০ (৪০২২)
কণ্ব উবাচ। ১-৯৩-০x (৫৭৯)
এবমুক্তস্তয়া শক্রঃ সংদিদেশ সদাগতিম্।
প্রাতিষ্ঠত তদা কালে মেনকা বায়ুনা সহ॥ ১-৯৩-১ (৪০২৩)
অথাপশ্যদ্বরারোহা তপসা দগ্ধকিল্বিষম্।
মিশ্বামিত্রং তপ্যমানং মেনকা ভীরুরাশ্রমে॥ ১-৯৩-২ (৪০২৪)
অভিবাদ্য ততঃ সা তং প্রাক্রীডদৃষিসন্নিধৌ।
অপোবাহ চ বাসোঽস্যা মারুতঃ শশিসংনিভম্॥ ১-৯৩-৩ (৪০২৫)
সাগচ্ছত্ৎবরিতা ভূমিং বাসস্তদভিলিপ্সতী।
কুৎসয়ন্তীব সব্রীডং মারুতং বরবর্ণিনী॥ ১-৯৩-৪ (৪০২৬)
পশ্যতস্তস্য রাজর্ষেরপ্যগ্নিসমতেজসঃ।
বিশ্বামিত্রস্ততস্তাং তু বিষমস্থামনিন্দিতাম্॥ ১-৯৩-৫ (৪০২৭)
গৃদ্ধাং বাসসি সংভ্রান্তাং মেনকাং মুনিসত্তমঃ।
অনির্দেশ্যবয়োরূপামপশ্যদ্বিবৃতাং তদা॥ ১-৯৩-৬ (৪০২৮)
তস্যা রূপগুণান্দৃষ্ট্বা স তু বিপ্রর্ষভস্তদা।
চকার ভাবং সংসর্গে তয়া কামবশং গতঃ॥ ১-৯৩-৭ (৪০২৯)
ন্যমন্ত্রয়ত চাপ্যেনাং সা চাপ্যৈচ্ছদনিন্দিতা।
তৌ তত্র সুচিরং কালমুভৌ ব্যবহরতাং তদা॥ ১-৯৩-৮ (৪০৩০)
রমমাণৌ যথাকামং যতৈকদিবসং তথা।
`এবং বর্ষসহস্রাণামতীতং নান্বচিন্তয়ৎ॥ ১-৯৩-৯ (৪০৩১)
কামক্রোধাবজিতবান্মুনির্নিত্যং সমাহিতঃ।
চিরার্জিতস্য তপসঃ ক্ষয়ং স কৃতবান্মুনিঃ॥ ১-৯৩-১০ (৪০৩২)
তপসঃ সংক্ষয়াদেব মুনির্মোহং সমাবিশৎ।
মোহাভিভূতঃ ক্রোধাত্মা গ্রসন্মূলফলান্মুনিঃ॥ ১-৯৩-১১ (৪০৩৩)
পাদৈর্জলরবং কৃৎবা অন্তর্দ্বীপে কুটীং গতঃ।
মেনকা গন্তুকামা তু শুশ্রাব জলনিস্বনম্॥ ১-৯৩-১২ (৪০৩৪)
তপসা দীপ্তবীর্যোঽসাবাকাশাদেতি যাতি চ।
অদ্য সংজ্ঞাং বিজানামি যয়াঽদ্য তপসঃ ক্ষয়ঃ॥ ১-৯৩-১৩ (৪০৩৫)
গন্তুং ন যুক্তমিত্যুক্ৎবা ঋতুস্নাতাথ মেনকা।
কামরাগাভিভূতস্য মুনেঃ পার্স্বং জগাম হ॥’ ১-৯৩-১৪ (৪০৩৬)
জনয়ামাস স মুনির্মেনকায়াং শকুন্তলাম্।
প্রস্থে হিমবতো রম্যে মালিনীমভিতো নদীম্॥ ১-৯৩-১৫ (৪০৩৭)
`দেবগর্ভোপমাং বালাং সর্বাভরণভূষিতাম্।
শয়ানাং শয়নে রম্যে মেনকা বাক্যমব্রবীৎ॥ ১-৯৩-১৬ (৪০৩৮)
মহর্ষেরুগ্রতপসস্তেজস্ৎবমসি ভামিনি।
তস্মাৎস্বর্গং গমিষ্যামি দেবকার্যার্থমাগতা॥’ ১-৯৩-১৭ (৪০৩৯)
জাতমুৎসৃজ্য তং গর্ভং মেনকা মালিনীমনু।
কৃতকার্যা ততস্তূর্ণমগচ্ছচ্ছক্রসংসদম্॥ ১-৯৩-১৮ (৪০৪০)
তং বনে বিজনে গর্ভং সিংহব্যাঘ্রসমাকুলে।
দৃষ্ট্বা শয়ানং শকুনাঃ সমন্তাৎপর্যবারয়ন্।
নেমাং হিংস্যুর্বনে বালাং ক্রব্যাদা মাংসগৃদ্ধিনঃ॥ ১-৯৩-১৯ (৪০৪১)
পর্যরক্ষন্ত তাং তত্র শকুন্তা মেনকাত্মজাম্।
উপস্প্রষ্টুং গতশ্চাহমপশ্যং শয়িতামিমাম্॥ ১-৯৩-২০ (৪০৪২)
নির্জনে বিপিনে রম্যে শকুন্তৈঃ পরিবারিতাম্।
`মাং দৃষ্ট্বৈবাভ্যপদ্যন্ত পাদয়োঃ পতিতা দ্বিজাঃ।
অব্রুঞ্শকুনাঃ সর্বে কলং মধুরভাষিণঃ॥ ১-৯৩-২১ (৪০৪৩)
বিশ্বামিত্রসুতাং ব্রহ্মন্ন্যাসভূতাং ভরস্ব বৈ।
কামক্রোধাবজিতবান্সখা তে কৌশিকীং গতঃ॥ ১-৯৩-২২ (৪০৪৪)
তস্মাৎপোষয় তৎপুত্রীং দয়াবানিতি তেঽব্রুবন্।
সর্বভূতরুতজ্ঞোঽহং দয়াবান্সর্বজন্তুষু॥’ ১-৯৩-২৩ (৪০৪৫)
আনয়িৎবা ততশ্চৈনাং দুহিতৃৎবে ন্যবেশয়ম্॥ ১-৯৩-২৪ (৪০৪৬)
শরীরকৃৎপ্রাণদাতা যস্য চান্নানি ভুঞ্জতে।
ক্রমেণৈতে ত্রয়োঽপ্যুক্তাঃ পিতরো ধর্মশাসনে॥ ১-৯৩-২৫ (৪০৪৭)
নির্জনে তু বনে যস্মাচ্ছকুন্তৈঃ পরিবারিতা।
শকুন্তলেতি নামাস্যাঃ কৃতং চাপি ততো ময়া॥ ১-৯৩-২৬ (৪০৪৮)
এবং দুহিতরং বিদ্ধি মম বিপ্র শকুন্তলাম্।
শকুন্তলা চ পিতরং মন্যতে মামনিন্দিতা॥ ১-৯৩-২৭ (৪০৪৯)
শকুন্তলোবাচ। ১-৯৩-২৮x (৫৮০)
এতদাচষ্ট পৃষ্টঃ সন্মম জন্ম মহর্ষয়ে।
সুতাং কণ্বস্য মামেবং বিদ্ধি ৎবং মনুজাধিপ॥ ১-৯৩-২৮ (৪০৫০)
কণ্বং হি পিতরং মন্যে পিতরং স্বমজানতী।
ইতি তে কথিতং রাজন্যথাবৃত্তং শ্রুতং ময়া॥ ॥ ১-৯৩-২৯ (৪০৫১)

ইতি শ্রীমন্মহাভারতে আদিপর্বণি সংভবপর্বণি ত্রিনবতিতমোঽধ্যায়ঃ॥ ৯৩ ॥

Mahabharata – Adi Parva – Chapter Footnotes

১-৯৩-১ সদাগতিম্ বায়ুম্॥ ১-৯৩-৬ গৃদ্ধাং সক্তাম্। বিবৃতামনাচ্ছাদিতাম্॥ ১-৯৩-৮ ন্যমন্ত্রয়ত এহীত্যাকারিতবান্। ব্যহরতাং বিহারং চক্রতুঃ॥ ১-৯৩-২০ উপস্প্রষ্টুং আচমনাদিকং কর্তুম্॥ ১-৯৩-২৫ শরীরকৃন্নিষেক্তা। প্রাণদাতাঽভয়প্রদঃ॥ ত্রিনবতিতমোঽধ্যায়ঃ॥ ৯৩ ॥