আদিপর্ব – অধ্যায় ০৮৪
॥ শ্রীঃ ॥
১.৮৪. অধ্যায়ঃ ০৮৪
Mahabharata – Adi Parva – Chapter Topics
মৃতস্য স্বর্গাদিভোগানন্তরং পুনর্জননপ্রকারকথনম্॥১ ॥
Mahabharata – Adi Parva – Chapter Text
১-৮৪-০ (৩৭২০)
অষ্টক উবাচ। ১-৮৪-০x (৫০৪)
যদাঽবসো নন্দনে কামরূপী
সংবৎসরাণাময়ুতং শতানাম্।
কিং কারণং কার্তয়ুগপ্রধান
হিৎবা চ ৎবং বসুধামন্বপদ্যঃ॥ ১-৮৪-১ (৩৭২১)
যয়াতিরুবাচ। ১-৮৪-২x (৫০৫)
জ্ঞাতিঃ সুহৃৎস্বজনো বা যথেহ
ক্ষীণে বিত্তে ত্যজ্যতে মানবৈর্হি।
তথা তত্র ক্ষীণপুণ্যং মনুষ্যং
ত্যজন্তি সদ্যঃ সেশ্বরা দেবসঙ্ঘাঃ॥ ১-৮৪-২ (৩৭২২)
অষ্টক উবাচ। ১-৮৪-৩x (৫০৬)
তস্মিন্কথং ক্ষীণপুণ্যা ভবন্তি
সংমুহ্যতে মেঽত্র মনোঽতিমাত্রম্।
কিং বা বিশিষ্টাঃ কস্য ধামোপয়ান্তি
তদ্বৈ ব্রূহি ক্ষেত্রবিত্ৎবং মতো মে॥ ১-৮৪-৩ (৩৭২৩)
যয়াতিরুবাচ। ১-৮৪-৪x (৫০৭)
ইমং ভৌমং নরকং তে পতন্তি
ললাপ্যমানা নরদেব সর্বে।
তে কঙ্কগোমায়ুবলাশনার্থে
ক্ষীণে পুণ্যে বহুধা প্রব্রজন্তি॥ ১-৮৪-৪ (৩৭২৪)
তস্মাদেতদ্বর্জনীয়ং নরেন্দ্র
দুষ্টং লোকে গর্হণীয়ং চ কর্ম।
আখ্যাতং তে পার্থিব সর্বমেব
ভূয়শ্চেদানীং বদ কিং তে বদামি॥ ১-৮৪-৫ (৩৭২৫)
অষ্টক উবাচ। ১-৮৪-৬x (৫০৮)
যদা তু তান্বিতুদন্তে বয়াংসি
তথা গৃধ্রাঃ শিতিকণ্ঠাঃ পতঙ্গাঃ।
কথং ভবন্তি কথমাভবন্তি
ন ভৌমমন্যং নরকং শৃণোমি॥ ১-৮৪-৬ (৩৭২৬)
যয়াতিরুবাচ। ১-৮৪-৭x (৫০৯)
ঊর্ধ্বং দেহাৎকর্মণো জৃম্ভমাণা-
দ্ব্যক্তং পৃথিব্যামনুসংচরন্তি।
ইমং ভৌমং নরকং তে পতন্তি
নাবেক্ষন্তে বর্ষপূগাননেকান্॥ ১-৮৪-৭ (৩৭২৭)
ষষ্টিং সহস্রাণি পতন্তি ব্যোম্নি
তথা অশীতিং পরিবৎসরাণি।
তান্বৈ তুদন্তি পততঃ প্রপাতং
ভীমা ভৌমা রাক্ষসাস্তীক্ষ্ণদংষ্ট্রাঃ॥ ১-৮৪-৮ (৩৭২৮)
অষ্টক উবাচ। ১-৮৪-৯x (৫১০)
যদেনসস্তে পততস্তুদন্তি
ভীমা ভৌমা রাক্ষসাস্তীক্ষ্ণদংষ্ট্রাঃ।
কথং ভবন্তি কথমাভবন্তি
কথংভূতা গর্ভভূতা ভবন্তি॥ ১-৮৪-৯ (৩৭২৯)
যয়াতিরুবাচ। ১-৮৪-১০x (৫১১)
অস্রং রেতঃ পুষ্পফলানুপৃক্ত-
মন্বেতি তদ্বৈ পুরুষেণ সৃষ্টম্।
স বৈ তস্যা রজ আপদ্যতে বৈ
স গর্ভভূতঃ সমুপৈতি তত্র॥ ১-৮৪-১০ (৩৭৩০)
বনস্পতীনোষধীশ্চাবিশন্তি
আপো বায়ুং পৃথিবীং চান্তরিক্ষম্।
চতুষ্পদং দ্বিপদং চাতি সর্ব-
মেবংভূতা গর্ভভূতা ভবন্তি॥ ১-৮৪-১১ (৩৭৩১)
অষ্টক উবাচ। ১-৮৪-১২x (৫১২)
অন্যদ্বপুর্বিদধাতীহ গর্ভ-
মুতাহোস্বিৎস্বেন কায়েন যাতি।
আপদ্যমানো নরয়োনিমেতা-
মাচক্ষ্ব মে সংশয়াৎপ্রব্রবীমি॥ ১-৮৪-১২ (৩৭৩২)
শরীরদেহাতিসমুচ্ছ্রয়ং চ
চক্ষুঃশ্রোত্রে লভতে কেন সংজ্ঞাম্।
এতত্তত্ৎবং সর্বমাচক্ষ্ব পৃষ্টঃ
ক্ষেত্রজ্ঞং ৎবাং তাত মন্যাম সর্বে॥ ১-৮৪-১৩ (৩৭৩৩)
যয়াতিরুবাচ। ১-৮৪-১৪x (৫১৩)
বায়ুঃ সমুৎকর্ষতি গর্ভয়োনি-
মৃতৌ রেতঃ পুষ্পফলানুপৃক্তম্।
স তত্র তন্মাত্রকৃতাধিকারঃ
ক্রমেণ সংবর্ধয়তীহ গর্ভম্॥ ১-৮৪-১৪ (৩৭৩৪)
স জায়মানো বিগৃহীতমাত্রঃ
সংজ্ঞামধিষ্ঠায় ততো মনুষ্যঃ।
স শ্রোত্রাভ্যাং বেদয়তীহ শব্দং
স বৈ রূপং পশ্যতি চক্ষুষা চ॥ ১-৮৪-১৫ (৩৭৩৫)
ঘ্রাণেন গন্ধং জিহ্বয়াঽথো রসং চ
ৎবচা স্পর্শং মনসা বেদভাবম্।
ইত্যষ্টকেহোপহিতং হি বিদ্ধি
মহাত্মনঃ প্রাণভৃতঃ শরীরে॥ ১-৮৪-১৬ (৩৭৩৬)
অষ্টক উবাচ। ১-৮৪-১৭x (৫১৪)
যঃ সংস্থিতঃ পুরুষো দহ্যতে বা
নিখন্যতে বাপি নিকৃষ্যতে বা।
অভাবভূতঃ স বিনাশমেত্য
কেনাত্মানং চেতয়তে পরস্তাৎ॥ ১-৮৪-১৭ (৩৭৩৭)
যয়াতিরুবাচ। ১-৮৪-১৮x (৫১৫)
হিৎবা সোঽসূন্সুপ্তবন্নিষ্টনিৎবা
পুরোধায় সুকৃতং দুষ্কৃতং বা।
অন্যাং যোনিং পবনাগ্রানুসারী
হিৎবা দেহং ভজতে রাজসিংহ॥ ১-৮৪-১৮ (৩৭৩৮)
পুণ্যাং যোনিং পুণ্যকৃতো ব্রজন্তি
পাপাং যোনিং পাপকৃতো ব্রজন্তি।
কীটাঃ পতঙ্গাশ্চ ভবন্তি পাপা
ন মে বিবক্ষাস্তি মহানুভাব॥ ১-৮৪-১৯ (৩৭৩৯)
চতুষ্পদা দ্বিপদাঃ ষট্পদাশ্চ
তথাভূতা গর্ভভূতা ভবন্তি।
আখ্যাতমেতন্নিখিলেন সর্বং
ভূয়স্তু কিং পৃচ্ছসি রাজসিংহ॥ ১-৮৪-২০ (৩৭৪০)
অষ্টক উবাচ। ১-৮৪-২১x (৫১৬)
কিংস্বিৎকৃৎবা লভতে তাত লোকা-
ন্মর্ত্যঃ শ্রেষ্ঠাংস্তপসা বিদ্যযা চ।
তন্মে পৃষ্টঃ শংস সর্বং যথাব-
চ্ছুভাঁল্লোকান্যেন গচ্ছেৎক্রমেণ॥ ১-৮৪-২১ (৩৭৪১)
যয়াতিরুবাচ। ১-৮৪-২২x (৫১৭)
তপশ্চ দানং চ শমো দমশ্চ
হ্রীরার্জবং সর্বভূতানুকম্পা।
স্বর্গস্য লোকস্য বদন্তি সন্তো
দ্বারাণি সপ্তৈব মহান্তি পুংসাম্।
নশ্যন্তি মানেন তমোঽভিভূতাঃ
পুংসঃ সদৈবেতি বদন্তি সন্তঃ॥ ১-৮৪-২২ (৩৭৪২)
অধীয়ানঃ পণ্ডিতংমন্যমানো
যো বিদ্যযা হন্তি যশঃ পরেষাম্।
তস্যান্তবন্তশ্চ ভবন্তি লোকা
ন চাস্য তদ্ব্রহ্ম ফলং দদাতি॥ ১-৮৪-২৩ (৩৭৪৩)
চৎবারি কর্মাণ্যভয়ঙ্করাণি
ভয়ং প্রয়চ্ছন্ত্যযথাকৃতানি।
মানাগ্নিহোত্রমুত মানমৌনং
মানেনাধীতমুত মানয়জ্ঞঃ॥ ১-৮৪-২৪ (৩৭৪৪)
ন মানমান্যো মুদমাদদীত
ন সন্তাপং প্রাপ্নুয়াচ্চাবমানাৎ।
সন্তঃ সতঃ পূজয়ন্তীহ লোকে
নাসাধবঃ সাধুবুদ্ধিং লভন্তে॥ ১-৮৪-২৫ (৩৭৪৫)
ইতি দদ্যামিতি যজ ইত্যদীয় ইতি ব্রতম্।
ইত্যেতানি ভয়ান্যাহুস্তানি বর্জ্যানি সর্বশঃ॥ ১-৮৪-২৬ (৩৭৪৬)
যে চাশ্রয়ং বেদয়ন্তে পুরাণং
মনীষিণো মানসমার্গরুদ্ধম্।
তন্নিঃশ্রেয়স্তেন সংয়োগমেত্য
পরাং শান্তিং প্রত্যুঃ প্রেত্য চেহ॥ ॥ ১-৮৪-২৭ (৩৭৪৭)
ইতি শ্রীমন্মহাভারতে আদিপর্বণি সংভবপর্বণি চতুরশীতিতমোঽধ্যায়ঃ॥ ৮৪ ॥
Mahabharata – Adi Parva – Chapter Footnotes
১-৮৪-১ কার্তয়ুগপ্রধানা কৃতয়ুগে ভবাঃ কার্তয়ুগা অত্যন্তনিষ্পাপাস্তেষাং মুখ্যতমেত্যর্থঃ॥ ১-৮৪-৩ তত্র ক্ষীণপুণ্যাঃ কথং কিংপ্রকারা ভবন্তি। ততশ্চ কিংবিশিষ্টাঃ কীদৃসাঃ সন্তঃ কস্য ধাম স্থানং যান্তি কং লোকং যান্তীত্যর্থঃ॥ ১-৮৪-৪ তত্র কস্য ধামেত্যস্যোত্তরং ইমং ভৌমমিতি। পুণ্যে ক্ষীণে সতি নরকং নরকোপমং বৌমং ভূসম্বন্ধিনং ইমং লোকং প্রতি পতন্তি। কথং ভবন্তীত্যস্যোত্তরং তে কঙ্কেতি। কঙ্কাশ্চ গোমায়বশ্চ তেষাং বলং সঙ্ঘঃ তস্যা শনার্থে অশনবিষয়ীভূতৈতদ্দেহরক্ষণার্থে বহুধা প্রব্রজন্তি পর্যটন্তি॥ ১-৮৪-৫ তস্মাদেতৎকাম্যকর্ম দুষ্টং বিষিদ্ধং গর্হণীয়ম্॥ ১-৮৪-৬ ননু কঙ্কাদিভক্ষিতস্য কথং স্বরূপসত্তা কথং বা শরীরান্তরেণাবির্ভাব ইতি দেহাত্মবাদমাশ্রিত্য শঙ্কতে। ভৌমো নরকশ্চ ক ইতি পৃচ্ছতি চ। যদা তু তানিতি॥ ১-৮৪-৭ ঊর্ধ্বং দেহাৎ দেহক্ষয়ানন্তরম্। জৃম্ভমাণাৎপ্রবুদ্ধাৎকর্মণো হেতোঃ ব্যক্তং স্থূলং শরীরং অনু অনুপ্রবিশ্য জীবাঃ সংচরন্তি কর্মফলানি ভুঞ্জতে ইতি যৎ তদেব ভৌমো নরকঃ। কুতোঽস্য নরকৎবমত আহ। নাবেক্ষন্তে বর্ষপূগাননেকান্ যস্মাদত্র পতিতা গতং বয়ো ন বুধ্যন্তে কর্মভূমিং প্রাপ্যাপি স্বহিতায় ন যতন্তেঽত ইত্যর্থঃ। এতেন কঙ্কাদিভক্ষিতস্যাপি সৎবং দেহয়োগশ্চাস্তীত্যুক্তম্॥ ১-৮৪-৮ ষষ্টিং সহস্রাণ্যশীতিং চ সহস্রাণি পরিবৎসরাণি ব্যোম্নি স্বর্গে স্থিৎবা পতন্তি। দারাদয়ো ভৌমা রাক্ষসাঃ। পাতং ভূমিস্থিতিং প্রপততঃ অনুভবতঃ॥ ১-৮৪-৯ যৎ যান্ এনসঃ পাপাদ্ধেতোঃ পততঃ স্বর্গাহ্যবমানান্ তে রাক্ষসাস্তুদন্তি তে পুরুষাঃ কথং ভবন্তি প্রপাতভ্রষ্টা ইব কথং ন শীর্যন্তে। কথং বা আভবন্তি ইন্দ্রিয়াদিমন্তো ভবন্তি। কথং বা গর্ভৎবং প্রাপ্নুবন্তীতি প্রশ্নত্রয়ম্॥ ১-৮৪-১০ রেতঃ কর্তৃ। অস্রং স্ত্রীরজঃ কর্মভূতং অন্বেতি। তদ্দ্বয়ং পুষ্পফলাদিভাবেনানুপৃক্তং কললাদিরূপং ভবতি। তৎ আহারাদিবৎকথং ন জীর্যত ইত্যত আহ। পুরুষেণেতি। ঈশ্বরেণেত্যর্থঃ। রজঃ তদুপলক্ষিতান্ ধাতূন্। সমুপৈতি দুঃখাদীনীতি শেষঃ॥ ১-৮৪-১১ মাত্রুদরপর্যন্তং প্রবেশক্রমমাহ। বনস্পতীতি॥ ১-৮৪-১২ নরয়োনিমাপদ্যমানো জীবঃ স্বেন কায়েন জৈবেনৈব রূপেণ গর্ভং মাতুরুদরং যাতি উত তত্র প্রবেষ্টুমন্যদ্বপুর্বিদধাতি॥ ১-৮৪-১৩ শরীরদেহাতিসমুচ্ছ্রয়ং মাতুঃ শরীরে গর্ভদেহস্যাতিসমুচ্ছ্রয়ং বৃদ্ধিম্। চক্ষুঃশ্রোত্রে ইতীন্দ্রিয়মাত্রোপলক্ষণম্॥ ১-৮৪-১৪ দেহসমুচ্ছ্রয়ক্রমমাহ। বায়ুরিতি। ঋতৌ তৎকালে বায়ুঃ গর্ভয়োনিং অস্রং প্রতি রেতঃ সমুৎকর্ষতি প্রাপয়তি। ততশ্চ পুষ্পফলানুপৃক্তং কললাদিরূপগর্ভং সএব তত্র গর্ভাশয়ে ক্রমেণ সংবর্ধয়তি। কথংভূতঃ তন্মাত্রে বৃদ্ধিমাত্রএব কৃতাধিকারঃ সমর্থঃ॥ ১-৮৪-১৫ স জীবঃ বিগৃহীতা মাত্রা সূক্ষ্মশরীরং যেন সঃ॥ ১-৮৪-১৬ শ্রোত্রাদিকং ইত্যুপহিতং সংবদ্ধং বিদ্ধি॥ ১-৮৪-১৭ দেহাত্মবাদেন পুনঃ শঙ্কতে। যঃ সংস্থিত ইতি। পরস্তাৎ আত্মানং কেন কারণেন চেতয়তে জানাতি। দেহাতিরিক্তজীবাভাবাদিতি বাবঃ॥ ১-৮৪-১৮ জীবো দেহাদ্ভিন্নঃ পূর্বদেহং ত্যক্ৎবা সূক্ষ্মদেহেন দেহান্তরং প্রাপ্নোতীত্যাহ। হিৎবেতি। পবনাগ্রানুসারী আতিবাহিকপবনানুসারী॥ ১-৮৪-১৯ কর্মানুসারেণ যোনিপ্রাপ্তিমাহ। পুণ্যামিতি॥ ১-৮৪-২১ কিংস্বিৎকৃৎবেতি সামান্যপ্রশ্নঃ। তপসা বিদ্যযেতি বিশেষপ্রশ্নঃ। চো বার্থে॥ ১-৮৪-২২ পুংসঃ পুমাংসঃ॥ ১-৮৪-২৩ দর্পবতা কৃতমধ্যযনাদি ন মোক্ষোপয়োগি নাপি স্বর্গদং প্রত্যুত ভয়াবহমিত্যাহ দ্বাভ্যাম্। অধীয়ান ইতি॥ ১-৮৪-২৫ অতো মানাপমানাদিদ্বন্দ্বসহিষ্ণুর্ভবেদিত্যাহ। ন মানমান্য ইতি॥ ১-৮৪-২৬ ইতি দদ্যামিতি দাম্ভিকস্য স্বধর্মপ্রকাশনাভিনয়ঃ॥ ১-৮৪-২৭ মানসমার্গরুদ্ধং ধ্যানবিষয়ীভূতং। বেদয়ন্তে জানন্তি। তদ্বেদনং নিঃশ্রেয়ঃ সুখসাধনম্॥ চতুরশীতিতমোঽধ্যায়ঃ॥ ৮৪ ॥