আদিপর্ব – অধ্যায় ০৮৩

আদিপর্ব – অধ্যায় ০৮৩

॥ শ্রীঃ ॥

১.৮৩. অধ্যায়ঃ ০৮৩

Mahabharata – Adi Parva – Chapter Topics

যয়াতেঃ স্বনামকথনপূর্বকং অষ্টকেন সহ সংবাদঃ॥ ১ ॥ তত্র যয়াতিনা স্বস্য স্বর্গাদধঃপতনকারণকথনম্॥ ২ ॥

Mahabharata – Adi Parva – Chapter Text

১-৮৩-০ (৩৬৯৬)
যয়াতিরুবাচ। ১-৮৩-০x (৪৯৮)
অহং যয়াতির্নহুষস্য পুত্রঃ
পূরোঃ পিতা সর্বভূতাবমানাৎ।
প্রভ্রংশিতঃ সুরসিদ্ধর্ষিলোকা-
ৎপরিচ্যুতঃ প্রপতাম্যল্পপুণ্যঃ॥ ১-৮৩-১ (৩৬৯৭)
অহং হি পূর্বো বয়সা ভবদ্ভ্য-
স্তেনাভিবাদং ভবতাং ন প্রয়ুঞ্জে।
যো বিদ্যযা তপসা জন্মনা বা
বৃদ্ধঃ স পূজ্যো ভবতি দ্বিজানাম্॥ ১-৮৩-২ (৩৬৯৮)
অষ্টক উবাচ। ১-৮৩-৩x (৪৯৯)
অবাদীস্ৎবং বয়সা যঃ প্রবৃদ্ধঃ
স বৈ রাজন্নাভ্যধিকঃ কথ্যতে চ।
যো বিদ্যযা তপসা সংপ্রবৃদ্ধঃ
স এব পূজ্যো ভবতি দ্বিজানাম্॥ ১-৮৩-৩ (৩৬৯৯)
যয়াতিরুবাচ। ১-৮৩-৪x (৫০০)
প্রতিকূলং কর্মণাং পাপমাহু-
স্তদ্বর্ততেঽপ্রবণে পাপলোক্যম্।
সন্তোঽসতাং নানুবর্তন্তি চৈত-
দ্যথা চৈষামনুকূলাস্তথাঽঽসন্॥ ১-৮৩-৪ (৩৭০০)
অভূদ্ধনং মে বিপুলং গতং ত-
দ্বিচেষ্টমানো নাধিগন্তা তদস্মি।
এবং প্রধার্যাত্মহিতে নিবিষ্টো
যো বর্ততে স বিজানাতি জীবঃ॥ ১-৮৩-৫ (৩৭০১)
মহাধনো যো যজতে সুয়জ্ঞৈ-
র্যঃ সর্ববিদ্যাসু বিনীতবুদ্ধিঃ।
বেদানধীত্য তপসা যোজ্য দেহং
দিবং স যায়াৎপুরুষো বীতমোহঃ॥ ১-৮৩-৬ (৩৭০২)
ন জাতু হৃষ্যেন্মহতা ধনেন
বেদানধীয়ীতানহংকৃতঃ স্যাৎ।
নানাভাবা বহবো জীবলোকে
দৈবাধীনা নষ্টচেষ্টাধিকারাঃ।
তত্তৎপ্রাপ্য ন বিহন্যেত ধীরো
দিষ্টং বলীয় ইতি মৎবাঽঽত্মবুদ্ধ্যা॥ ১-৮৩-৭ (৩৭০৩)
সুখং হি জন্তুর্যদি বাঽপি দুঃখং
দৈবাধীনং বিন্দতে নাত্মশক্ত্যা।
তস্মাদ্দিষ্টং বলবন্মন্যমানো
ন সংজ্বরেন্নাপি হৃষ্যেৎকথংচিৎ॥ ১-৮৩-৮ (৩৭০৪)
দুঃখৈর্ন তপ্যেন্ন সুখৈঃ প্রহৃষ্যে-
ৎসমেন বর্তেত সদৈব ধীরঃ।
দিষ্টং বলীয় ইতি মন্যমানো
ন সংজ্বরেন্নাপি হৃষ্যেৎকথংচিৎ॥ ১-৮৩-৯ (৩৭০৫)
ভয়ে ন মুহ্যাম্যষ্টকাহং কদাচি-
ৎসন্তাপো মে মানসো নাস্তি কশ্চিৎ।
ধাতা যথা মাং বিদধীত লোকে
ধ্রুবং তথাঽহং ভবিতেতি মৎবা॥ ১-৮৩-১০ (৩৭০৬)
সংস্বেদজা অণ্ডজাশ্চোদ্ভিদশ্চ
সরীসৃপাঃ কৃময়োঽথাপ্সু মৎস্যাঃ।
তথাশ্মনস্তৃণকাষ্ঠং চ সর্বে
দিষ্টক্ষয়ে স্বাং প্রকৃতিং ভজন্তি॥ ১-৮৩-১১ (৩৭০৭)
অনিত্যতাং সুখদুঃস্বস্য বুদ্ধ্বা
কস্মাৎসংতাপমষ্টকাহং ভজেয়ম্।
কিং কুর্যাং বৈ কিং চ কৃৎবা ন তপ্যে
তস্মাৎসন্তাপং বর্জয়াম্যপ্রমত্তঃ॥ ১-৮৩-১২ (৩৭০৮)
বৈশম্পায়ন উবাচ। ১-৮৩-১৩x (৫০১)
এবং ব্রুবাণং নৃপতিং যয়াতি-
মথাষ্টকঃ পুনরেবান্বপৃচ্ছৎ।
মাতামহং সর্বগুণোপপন্নং
তত্রস্থিতং স্বর্গলোকে যথাবৎ॥ ১-৮৩-১৩ (৩৭০৯)
অষ্টক উবাচ। ১-৮৩-১৪x (৫০২)
যে যে লোকাঃ পার্থিবেন্দ্রপ্রধানা-
স্ৎবয়া ভুক্তা যং চ কালং যথাবৎ।
তান্মে রাজন্ব্রূহি সর্বান্যথাব-
ৎক্ষেত্রজ্ঞবদ্ভাষসে ৎবং হি ধর্মান্॥ ১-৮৩-১৪ (৩৭১০)
যয়াতিরুবাচ। ১-৮৩-১৫x (৫০৩)
রাজাঽহমাসমিহ সার্বভৌম-
স্ততো লোকান্মহতশ্চাজয়ং বৈ।
তত্রাবসং বর্ষসহস্রমাত্রং
ততো লোকং পরমস্ম্যভ্যুপেতঃ॥ ১-৮৩-১৫ (৩৭১১)
ততঃ পুরীং পুরুহূতস্য রম্যাং
সহস্রদ্বারাং শতয়োজনায়তাম্।
অধ্যাবসং বর্ষসহস্রমাত্রং
ততো লোকং পরমস্ম্যভ্যুপেতঃ॥ ১-৮৩-১৬ (৩৭১২)
ততো দিব্যমজরং প্রাপ্য লোকং
প্রজাপতের্লোকপতের্দুরাপম্।
তত্রাবসং বর্ষসহস্রমাত্রং
ততো লোকং পরমস্ম্যভ্যুপেতঃ॥ ১-৮৩-১৭ (৩৭১৩)
স দেবদেবস্য নিবেশনে চ
বিহৃত্য লোকানবসং যথেষ্টম্।
সংপূজ্যমানস্ত্রিদশৈঃ সমস্তৈ-
স্তুল্যপ্রভাবদ্যুতিরীশ্বরাণাম্॥ ১-৮৩-১৮ (৩৭১৪)
তথাঽঽবসং নন্দনে কামরূপী
সংবৎসরাণাময়ুতং শতানাম্।
সহাপ্সরোভির্বিহরন্পুণ্যগন্ধা-
ন্পশ্যন্নগান্পুষ্পিতাংশ্চারুরূপান্॥ ১-৮৩-১৯ (৩৭১৫)
তত্র স্থিতং মাং দেব সুখেষু সক্তং
কালেঽতীতে মহতি ততোঽতিমাত্রম্।
দূতো দেবানামব্রবীদুগ্ররূপো
ধ্বংসেত্যুচ্চৈস্ত্রিঃ প্লুতেন স্বরেণ॥ ১-৮৩-২০ (৩৭১৬)
এতাবন্মে বিদিতং রাজসিংহ
ততো ভ্রষ্টোঽহং নন্দনাৎক্ষীণপুণ্যঃ।
বাচোঽশ্রৌষং চান্তরিক্ষে সুরাণাং
সানুক্রোংশাঃ শোচতাং মাং নরেন্দ্র॥ ১-৮৩-২১ (৩৭১৭)
অহো কষ্টং ক্ষীণপুণ্যো যয়াতিঃ
পতত্যসৌ পুণ্যকৃৎপুণ্যকীর্তিঃ।
তানব্রুবং পতমানস্ততোঽহং
সতাং মধ্যে নিপতেয়ং কথং নু॥ ১-৮৩-২২ (৩৭১৮)
তৈরাখ্যাতা ভবতাং যজ্ঞভূমিঃ
সমীক্ষ্য চেমাং ৎবরিতমুপাগতোঽস্মি।
হবির্গন্ধং দেশিকং যজ্ঞভূমে-
র্ধূমাপাঙ্গং প্রতিগৃহ্য প্রতীতঃ॥ ॥ ১-৮৩-২৩ (৩৭১৯)

ইতি শ্রীমন্মহাভারতে আদিপর্বণি সংভবপর্বণি ত্র্যশীতিতমোঽধ্যায়ঃ॥ ৮৩ ॥

Mahabharata – Adi Parva – Chapter Footnotes

১-৮৩-২ যয়াতিরপনীততপোবিদ্যাগর্বৎবাদ্বয়োজ্যৈষ্ঠ্যমেব পুরস্কৃত্যাহ। অহং হীতি। তদেবোপপাদয়ত্যুত্তরার্ধেন॥ ১-৮৩-৩ তদসহমানোঽষ্টক আহ। অবাদীরিতি। ৎবং চ বিদ্যাতপঃসংপ্রবৃদ্ধ ইতি ভাবঃ॥ ১-৮৩-৪ বিদ্যাতপসোঃ শ্রৈষ্ঠ্যে অষ্টকেন স্তুতে তত্র স্বানুভূতং বিঘ্নং দর্শয়ন্যযাতিরুবাচ। প্রতিকূলমিতি। কর্মণাং পুণ্যানাং প্রতিকূলং নাশকং পাপং গর্বস্তচ্চাপ্রবণেঽনম্রে দর্পবতি বর্ততে। পাপলোক্যং নরকপ্রদম্। এতৎপাপমসতাং সংবন্ধি সন্তো নানুবর্তন্তে ইদানীমপি। কিংচ প্রাঞ্চোপি সন্তো যথৈষাং কর্মণামনুকূলা উপবৃংহকাঃ স্যুস্তথা তেন প্রকারেণ দম্ভদর্পাদিরাহিত্যেন আসন্। অহং ৎবত দ্বিধৎবাৎস্বর্গাদিন্দ্রেণ চ্যাবিত ইত্যাশয়ঃ॥ ১-৮৩-৫ তদ্দম্ভাদিরাহিত্যেন প্রসিদ্ধং ধনং পুণ্যং মে মম বিপুলং যদভূত্তদ্গতং নষ্টং দর্পাদিত্যর্থঃ। পুনরিদানীং তচ্চেষ্টমানোঽপি তৎপুনর্নাধিগন্তাস্মি। এবং প্রধার্য মামিকাং গতিং জ্ঞাৎবা য আত্মহিতে নিবিষ্টো যো বর্ততে স ধীরো জানাতি নান্য ইত্যর্থঃ॥ ১-৮৩-৭ এতদেবাহ। ন জাৎবিতি ধনেন তপসা তর্হি ৎবমে কুতোঽহংকারং কৃতবানিত্যত আহ। নানেতি। জীবলোকেঽস্মিন্ জীবা নানাভাবাঃ পৃথক্স্বভাবাঃ কেচিদ্ধর্মরুচয়ঃ কেচিদ্বিপরীতাঃ। যতো দৈবাধীনাঃ। অতএব নষ্টা বৃথাভূতা চেষ্টা উদ্যোগোঽধিকারঃ সামর্থ্যং চ যেষাং তে তথা। দৃষ্টা ইতি শেষঃ। মূঢানাং পুণ্যে পণ্ডিতানাং পাপে চ প্রবৃত্তিকরং দৈবমেব বলবদিত্যর্থঃ। এবং বিদ্বাংস্তত্তপ্রাপ্য তৎসুখং দুঃখং বা প্রাপ্য ন বিহন্যেত। হর্ষবিষাদাভ্যামাত্মানং ন হিংস্যাদিত্যর্থঃ॥ ১-৮৩-৮ এতদেব বিবৃণোতি। সুখং হীতি দ্বাভ্যাম্॥ ১-৮৩-১০ ভয়ং তু তে ব্যেতু বিষাদমোহাবিতি যদষ্টকেনোক্তং তত্রোত্তরমাহ। ভয়ে ইতি। ধাতা দিষ্টং॥ ১-৮৩-১১ অহমিবান্যেঽপি দিষ্টাধীনা এবেত্যাহ। সংস্বেদজা ইতি। এতেপি দিষ্টক্ষয়ে পুণ্যপাপানুভবানন্তরম্। স্বাং প্রকৃতিং স্বকর্মশেষানুগুণাং যোনিং ভজন্তি প্রাপ্নুবন্তি॥ ১-৮৩-১২ অহং তু দিষ্টক্ষয়াভাবাৎপ্রাপ্তেপি দুঃখে ন তপ্যে ইত্যাহ। অনিত্যতামিতি॥ ১-৮৩-১৪ ক্ষেত্রজ্ঞবৎ জ্ঞানিবৎ॥ ১-৮৩-২৩ তৈরিতি। দেশিকমুপদেষ্টারমিব স্থিতং। হবিষাং গন্ধো যত্র তং ধূমাপাঙ্গং ধূমপ্রান্তং প্রতিগৃহ্য আঘ্রায় প্রতীতঃ জাতপ্রত্যযঃ॥ ত্র্যশীতিতমোঽধ্যায়ঃ॥ ৮৩ ॥