আদিপর্ব – অধ্যায় ০৭৩

আদিপর্ব – অধ্যায় ০৭৩

॥ শ্রীঃ ॥

১.৭৩. অধ্যায়ঃ ০৭৩

Mahabharata – Adi Parva – Chapter Topics

শুক্রদেবয়ানীসংবাদঃ॥ ১ ॥

Mahabharata – Adi Parva – Chapter Text

১-৭৩-০ (৩৩৩৮)
শুক্র উবাচ। ১-৭৩-০x (৩৭৯)
যঃ পরেষাং নরো নিত্যমতিবাদাংস্তিতিক্ষতে।
দেবয়ানি বিজানীহি তেন সর্বমিদং জিতম্॥ ১-৭৩-১ (৩৩৩৯)
যঃ সমুৎপতিতং ক্রোধং নিগৃহ্ণাতি ইয়ং যথা।
স যন্তেত্যুচ্যতে সদ্ভির্ন যো রশ্মিষু লম্বতে॥ ১-৭৩-২ (৩৩৪০)
যঃ সমুৎপতিতং ক্রোধমক্রোধেন নিরস্যতি।
দেবয়ানি বিজানীহি তেন সর্বমিদং জিতম্॥ ১-৭৩-৩ (৩৩৪১)
যঃ সমুৎপতিতং ক্রোধং ক্ষময়েহ নিরস্যতি।
যথোরগস্ৎবচং জীর্ণাং স বৈ পুরুষ উচ্যতে॥ ১-৭৩-৪ (৩৩৪২)
যঃ সংধারয়তে মন্যুং যোঽতিবাদাংস্তিতিক্ষতে।
যশ্চ তপ্তো ন তপতি দৃঢং সোঽর্থস্য ভাজনম্॥ ১-৭৩-৫ (৩৩৪৩)
যো যজেদপরিশ্রান্তো মাসিমাসি শতং সমাঃ।
ন ক্রুদ্ধ্যেদ্যশ্চ সর্বস্য তয়োরক্রোধনোঽধিকঃ॥ ১-৭৩-৬ (৩৩৪৪)
`তস্মাদক্রোধনঃ শ্রেষ্ঠঃ কামক্রোধৌ বিগর্হিতৌ।
ক্রুদ্ধস্য নিষ্ফলান্যেব দানয়জ্ঞতপাংসি চ॥ ১-৭৩-৭ (৩৩৪৫)
তস্মাদক্রোধনে যজ্ঞতপোদানফলং মহৎ।
ভবেদসংশয়ং ভদ্রে নেতরস্মিন্কদাচন॥ ১-৭৩-৮ (৩৩৪৬)
ন যতির্ন তপস্বী চ ন যজ্বা ন চ ধর্মভাক্।
ক্রোধস্য যো বশং গচ্ছেত্তস্য লোকদ্বয়ং ন চ॥ ১-৭৩-৯ (৩৩৪৭)
পুত্রো ভৃত্যঃ সুহৃদ্ভ্রাতা ভার্যা ধর্মশ্চ সত্যতা।
তস্যৈতান্যপয়াস্যন্তি ক্রোধশীলস্য নিশ্চিতম্॥ ১-৭৩-১০ (৩৩৪৮)
যৎকুমারাঃ কুমার্যশ্চ বৈরং কুর্যুরচেতসঃ।
ন তৎপ্রাজ্ঞোঽনুকুর্বীত ন বিদুস্তে বলাবলম্॥ ১-৭৩-১১ (৩৩৪৯)
দেবয়ান্যুবাচ। ১-৭৩-১২x (৩৮০)
বেদাহং তাত বালাঽপি ধর্মাণাং যদিহান্তরম্।
অক্রোধে চাতিবাদে চ বেদ চাপি বলাবলম্॥ ১-৭৩-১২ (৩৩৫০)
`স্ববৃত্তিমননুষ্ঠায় ধর্মমুৎসৃজ্য তত্ৎবতঃ।’
শিষ্যস্যাশিষ্যবৃত্তেস্তু ন ক্ষন্তব্যং বুভূষতা॥ ১-৭৩-১৩ (৩৩৫১)
`প্রেষ্যঃ শিষ্যঃ স্ববৃত্তিং হি বিসৃজ্য বিফলং গতঃ।’
তস্মাৎসংকীর্ণবৃত্তেষু বাসো মম ন রোচতে॥ ১-৭৩-১৪ (৩৩৫২)
পুমাংসো যে হি নিন্দন্তি বৃত্তেনাভিজনেন চ।
ন তেষু নিবসেৎপ্রাজ্ঞঃ শ্রেয়োঽর্থী পাপবুদ্ধিষু॥ ১-৭৩-১৫ (৩৩৫৩)
যে ৎবেনমভিজানন্তি বৃত্তেনাভিজনেন বা।
তেষু সাধুষু বস্তব্যং স বাসঃ শ্রেষ্ঠ উচ্যতে॥ ১-৭৩-১৬ (৩৩৫৪)
`সুয়ন্ত্রিতপরা নিত্যং বিহীনাশ্চ ধনৈর্বরাঃ।
দুর্বৃত্তাঃ পাপকর্মাণশ্চণ্ডালা ধনিনোপি চ॥ ১-৭৩-১৭ (৩৩৫৫)
নৈব জাত্যা হি চণ্ডালাঃ স্বকর্মবিহিতৈর্বিনা।
ধনাভিজনবিদ্যাসু সক্তাশ্চণ্ডালধর্মিণঃ॥ ১-৭৩-১৮ (৩৩৫৬)
অকারণাশ্চ দ্বেষ্যন্তি পরিবাদং বদন্তি তে।
সাধোস্তত্র ন বাসোস্তি পাপিভিঃ পাপতাং ব্রজেৎ॥ ১-৭৩-১৯ (৩৩৫৭)
সুকৃতে দুষ্কৃতে বাপি যত্র সজ্জতি যো নরঃ।
ধ্রুবং রতির্ভবেত্তস্য তস্মাদ্দ্বেষং ন রোচয়েৎ॥’ ১-৭৩-২০ (৩৩৫৮)
বাগ্দুরুক্তং মহাঘোরং দুহিতুর্বৃষপর্বণঃ।
মম মথ্নাতি হৃদয়মগ্নিকাম ইবারণিম্॥ ১-৭৩-২১ (৩৩৫৯)
ন হ্যতো দুষ্করতরং মন্যে লোকেষ্বপি ত্রিষু।
যঃ সপত্নশ্রিয়ং দীপ্তাং হীনশ্রীঃ পর্যুপাসতে॥ ১-৭৩-২২ (৩৩৬০)
মরণং শোভনং তস্য ইতি বিদ্বজ্জনা বিদুঃ।
`অবমানমবাপ্নোতি শনৈর্নীচসমাগমাৎ॥ ১-৭৩-২৩ (৩৩৬১)
অতিবাদা বক্ত্রতো নিঃসরন্তি
যৈরাহতঃ শোচতি রাত্র্যহানি।
পরস্য বৈ মর্মসু তে পতন্তি
তস্মাদ্ধীরো নৈব মুচ্যেৎপরেষু॥ ১-৭৩-২৪ (৩৩৬২)
নিরোহেদায়ুধৈশ্ছিন্নং সংরোহেদ্দগ্ধমাগ্নিনা।
বাক্ক্ষতং চ ন সংরোহেদাশরীরং শরীরিণাম্॥ ১-৭৩-২৫ (৩৩৬৩)
সংরোহিত শরৈর্বিদ্ধং নবং পরশুনা হতম্।
বাচা দুরুক্তং বীভৎসং ন সংরোহেত বাক্ক্ষতম্’॥ ॥ ১-৭৩-২৬ (৩৩৬৪)

ইতি শ্রীমন্মহাভারতে আদিপর্বণি সংভবপর্বণি ত্রিসপ্ততিতমোঽধ্যায়ঃ॥ ৭৩ ॥

Mahabharata – Adi Parva – Chapter Footnotes

১-৭৩-২ রশ্মিষু ক্রোধফলভূতাস্বাপৎসু। পক্ষে স্পষ্টোঽর্থঃ॥ ১-৭৩-৩ অক্রোধেন ক্রোধবিরোধিনা সহনেন॥ ত্রিসপ্ততিতমোঽধ্যায়ঃ॥ ৭৩ ॥