আদিপর্ব – অধ্যায় ০৬০

আদিপর্ব – অধ্যায় ০৬০

॥ শ্রীঃ ॥

১.৬০. অধ্যায়ঃ ০৬০

Mahabharata – Adi Parva – Chapter Topics

ভারতকথানুবন্ধঃ॥ ১ ॥

Mahabharata – Adi Parva – Chapter Text

১-৬০-০ (২৩৬০)
সৌতিরুবাচ। ১-৬০-০x (২৯৩)
শ্রুৎবা তু সর্পসত্রায় দীক্ষিতং জনমেজয়ম্।
অভ্যগচ্ছদৃষির্বিদ্বান্কৃষ্ণদ্বৈপায়নস্তদা॥ ১-৬০-১ (২৩৬১)
জনয়ামাস যং কালী শক্তেঃ পুত্রাৎপরাশরাৎ।
কন্যৈব যমুনাদ্বীপে পাণ্ডবানাং পিতামহম্॥ ১-৬০-২ (২৩৬২)
জাতমাত্রশ্চ যঃ সদ্য ইষ্ট্যা দেহমবীবৃধৎ।
বেদাংশ্চাধিজগে সাঙ্গন্সেতিহাসান্মহায়শাঃ॥ ১-৬০-৩ (২৩৬৩)
যং নাতি তপসা কশ্চিন্ন বেদাধ্যযনেন চ।
ন ব্রতৈর্নোপবাসৈশ্চ ন প্রসূত্যা ন মন্যুনা॥ ১-৬০-৪ (২৩৬৪)
বিব্যাসৈকং চতুর্ধা যো বেদং বেদবিদাং বরঃ।
পরাবরজ্ঞো ব্রহ্মর্ষিঃ কবিঃ সত্যব্রতঃ শুচিঃ॥ ১-৬০-৫ (২৩৬৫)
যঃ পাণ্ডুং ধৃতরাষ্ট্রং চ বিদুরং চাপ্যজীজনৎ।
শন্তনোঃ সংততিং তন্বন্পুণ্যকীর্তির্মহায়শাঃ॥ ১-৬০-৬ (২৩৬৬)
জনমেজয়স্য রাজর্ষেঃ স মহাত্মা সদস্তথা।
বিবেশ সহিতঃ শিষ্যৈর্বেদবেদাঙ্গপারগৈঃ॥ ১-৬০-৭ (২৩৬৭)
তত্র রাজানমাসীনং দদর্শ জনমেজয়ম্।
বৃতং সদস্যৈর্বহুভির্দেবৈরিব পুরন্দরম্॥ ১-৬০-৮ (২৩৬৮)
তথা মূর্ধাভিষিক্তৈশ্চ নানাজনপদেশ্বরৈঃ।
ঋৎবিগ্ভির্ব্রহ্মকল্পৈশ্চ কুশলৈর্যজ্ঞসংস্তরে॥ ১-৬০-৯ (২৩৬৯)
জনমেজয়স্তু রাজর্ষির্দৃষ্ট্বা তমৃষিমাগতম্।
সগণোঽভ্যুদ্যযৌ তূর্ণং প্রীত্যা ভরতসত্তমঃ॥ ১-৬০-১০ (২৩৭০)
কাঞ্চনং বিষ্টরং তস্মৈ সদস্যানুমতঃ প্রভুঃ।
আসনং কল্পয়ামাস যথা শক্রো বৃহস্পতেঃ॥ ১-৬০-১১ (২৩৭১)
তত্রোপবিষ্টং বরদং দেবর্ষিগণপূজিতম্।
পূজয়ামাস রাজেন্দ্রঃ শাস্ত্রদৃষ্টেন কর্মণা॥ ১-৬০-১২ (২৩৭২)
পাদ্যমাচমনীয়ং চ অর্ঘ্যং গাং চ বিধানতঃ।
পিতামহায় কৃষ্ণায় তদর্হায় ন্যবেদয়ৎ॥ ১-৬০-১৩ (২৩৭৩)
প্রতিগৃহ্য তু তাং পূজাং পাম্ডবাজ্জনমেজয়াৎ।
গাং চৈব সমনুজ্ঞায় ব্যাসঃ প্রীতোঽভবত্তদা॥ ১-৬০-১৪ (২৩৭৪)
তথা চ পূজয়িৎবা তং প্রণয়াৎপ্রতিতামহম্।
উপোপবিশ্য প্রীতাত্মা পর্যপৃচ্ছদনাময়ম্॥ ১-৬০-১৫ (২৩৭৫)
ভগবানাপি তং দৃষ্ট্বা কুশলং প্রতিবেদ্য চ।
সদস্যৈঃ পূজিতঃ সর্বৈঃ সদস্যান্প্রত্যপূজয়ৎ॥ ১-৬০-১৬ (২৩৭৬)
ততস্তু সহিতঃ সর্বৈঃ সদস্যৈর্জনমেজয়ঃ।
ইদং পশ্চাদ্দ্বিজশ্রেষ্ঠং পর্যপৃচ্ছৎকৃতাঞ্জলিঃ॥ ১-৬০-১৭ (২৩৭৭)
জনমেজয় উবাচ। ১-৬০-১৮x (২৯৪)
কুরূণাং পাণ্ডবানাং চ ভবান্প্রত্যক্ষদর্শিবান্।
তেষাং চরিতমিচ্ছামি কথ্যমানং ৎবয়া দ্বিজ॥ ১-৬০-১৮ (২৩৭৮)
কথং সমভবদ্ভেদস্তেষামক্লিষ্টকর্মণাম্।
তচ্চ যুদ্ধং কথং বৃত্তং ভূতান্তকরণং মহৎ॥ ১-৬০-১৯ (২৩৭৯)
পিতামহানাং সর্বেষাং দৈবেনাবিষ্টচেতসাম্।
কার্ৎস্ন্যেনৈতন্মমাচক্ষ্ব যথা বৃত্তং দ্বিজোত্তম।
`ইচ্ছামি তত্ৎবতঃ শ্রোতুং ভগবন্কুশলো হ্যসি’॥ ১-৬০-২০ (২৩৮০)
সৌতিরুবাচ। ১-৬০-২১x (২৯৫)
তস্য তদ্বচনং শ্রুৎবা কৃষ্ণদ্বৈপায়নস্তদা।
শশাস শিষ্যমাসীনং বৈশম্পায়নমন্তিকে॥ ১-৬০-২১ (২৩৮১)
ব্যাস উবাচ। ১-৬০-২২x (২৯৬)
কুরূণাং পাণ্ডবানাং চ যথা ভেদোঽভবৎপুরা।
তদস্মৈ সর্বমাচক্ষ্ব যন্মত্তঃ শ্রুতবানসি॥ ১-৬০-২২ (২৩৮২)
গুরোর্বচনমাজ্ঞায় স তু বিপ্রর্ষভস্তদা।
আচচক্ষে ততঃ সর্বমিতিহাসং পুরাতনম্॥ ১-৬০-২৩ (২৩৮৩)
রাজ্ঞে তস্মৈ সদস্যেভ্যঃ পার্থিবেভ্যশ্চ সর্বশঃ।
ভেদং সর্ববিনাশং চ কুরুপাণ্ডবয়োস্তদা॥ ॥ ১-৬০-২৪ (২৩৮৪)

ইতি শ্রীমন্মহাভারতে আদিপর্বণি অংশাবতরণপর্বণি ষষ্টিতমোঽধ্যায়ঃ॥ ৬০ ॥

Mahabharata – Adi Parva – Chapter Footnotes

১-৬০-২ কালী সত্যবতী॥ ১-৬০-৩ ইষ্ট্যা ইচ্ছয়া দেহং সদ্যোঽবীবৃধৎ বর্ধিতবান্॥ ১-৬০-৪ যং ব্যাসম্। তপআদিনা কশ্চিন্নাতি নাত্যেতি নাতিশেতে॥ ১-৬০-১৫ উপোপবিশ্য সমীপে উপবিশ্য॥ ১-৬০-১৬ প্রতিবেদ্য প্রতিখ্যাপ্য। অত্র পূজা স্তুতিরেব॥ ১-৬০-১৭ ইদং বক্ষ্যমাণম্॥ ১-৬০-১৮ প্রত্যক্ষদর্শিবান্ প্রত্যক্ষদর্শী॥ ১-৬০-১৯ ভেদো বৈরম্॥ ১-৬০-২০ পিতামহানাং প্রপিতামহানাম্॥ ষষ্টিতমোঽধ্যায়ঃ॥ ৬০ ॥