স্বর্গারোহণপর্ব – অধ্যায় ৪

স্বর্গারোহণপর্ব – অধ্যায় 004
॥ শ্রীঃ ॥
18.4. অধ্যায়ঃ 004
Mahabharata – SwargarohaNa Parva – Chapter Topics
যুধিষ্ঠিরেণ স্বর্গে নিবসতাং কৃষ্ণকর্ণাদীনাং দর্শনম্॥ 1 ॥ ইন্দ্রেণ যুধিষ্ঠিরায় দ্রৌপদেয়াদীনাং তত্তৎস্থানগতানাং পৃথক্পৃথক্প্রদরশনম্॥ 2 ॥
Mahabharata – SwargarohaNa Parva – Chapter Text


বৈশম্পায়ন উবাচ

ততো যুধিষ্ঠিরো রাজা দেবৈঃ সর্ষিমরুদ্গণৈঃ।
স্তূয়মানো যয়ৌ তত্র যত্র তে কুরুপুঙ্গবাঃ॥ 18-4-1(98553)
দদর্শ তত্র গোবিন্দং ব্রাহ্মেণ বপুষাঽন্বিতম্।
তেনৈব দৃষ্টপূর্বেণ সাদৃশ্যেনৈব সূচিতম্॥ 18-4-2(98554)
দীপ্যমানং স্ববপুষা দিব্যৈরস্ত্রৈরুপস্থিতম্।
চক্রপ্রভৃতিভির্ঘোরৈর্দিব্যৈঃ পুরুষবিগ্রহৈঃ॥ 18-4-3(98555)
উপাস্যমানং বীরেণ ফল্গুনেন সুবর্চসা।
তথাস্বরূপং কৌন্তেয়ো দদর্শ মধুসূদনম্॥ 18-4-4(98556)
তাবুভৌ পুরুষব্যাঘ্রৌ সমুদ্বীক্ষ্য যুধিষ্ঠিরম্।
যথাবৎপ্রতিপেদাতে পূজয়া দেবপূজিতৌ॥ 18-4-5(98557)
অপরস্মিন্নথোদ্দেশে কর্ণং শস্ত্রভৃতাং বরম্।
দ্বাদশাদিত্যসহিতং দদর্শ কুরুনন্দনঃ॥ 18-4-6(98558)
অথাপরস্মিন্নুদ্দেশে মরুদ্গণবৃতং বিভুম্।
ভীমসেনমথাপশ্যত্তেনৈব বপুষাঽন্বিতম্॥ 18-4-7(98559)
বায়োর্মূর্তিমতঃ পার্শ্বে দিব্যমূর্তিসমন্বিতম্।
শ্রিয়া পরময়া যুক্তং সিদ্ধিং পরমিকাং গতম্॥ 18-4-8(98560)
অশ্বিনোস্তু তথা স্থানে দীপ্যমানৌ স্বতেজসা।
নকুলং সহদেবং চ দদর্শ কুরুনন্দনঃ॥ 18-4-9(98561)
তথা দদর্শ পাঞ্চালীং কমলোৎপলমালিনীম্।
বপুষা স্বর্গমাক্রম্য তিষ্ঠন্তীমর্কবর্চসম্॥ 18-4-10(98562)
তত্রৈনাং সহসা রাজা স্প্রষ্টুমৈচ্ছদ্যুধিষ্ঠিরঃ।
ততোঽস্য ভগবানিন্দ্রঃ কথয়ামাস দেবরাট্॥ 18-4-11(98563)
শ্রীরেষা দ্রৌপদীরূপা ৎবদর্থে মানুষং গতা।
অয়োনিজা লোককান্তা পুণ্যগন্ধা যুধিষ্ঠির॥ 18-4-12(98564)
রত্যর্থং ভবতাং হ্যেষা নির্মিতা শূলপাণিনা।
দ্রুপদস্য কুলে জাতা ভবদ্ভিশ্চোপজীবিতা॥ 18-4-13(98565)
এতে পঞ্চ মহাভাগা গন্ধর্বাঃ পাবকপ্রভাঃ।
দ্রৌপদ্যাস্তনয়া রাজন্যুষ্মাকমমিতৌজসঃ॥ 18-4-14(98566)
পশ্য গন্ধর্বরাজানং ধৃতরাষ্ট্রং মনীষিণম্।
এনং চ ৎবং বিজানীহি ভ্রাতরং পূর্বজং পিতুঃ॥ 18-4-15(98567)
অয়ং তে পূর্বজো ভ্রাতা কৌন্তেয়ঃ পাবকদ্যুতিঃ।
সূর্যপুত্রো রথিশ্রেষ্ঠো রাধেয় ইতি বিশ্রুতঃ।
আদিত্যসহিতো ভাতি পশ্যৈনং পুরুষর্ষভম্॥ 18-4-16(98568)
সাধ্যানামথ দেবানাং বিশ্বেষাং মরুতামপি।
গণেষু পশ্য রাজেন্দ্র বৃষ্ণন্ধকমহারথান্।
সাত্যকিপ্রমুখান্বীরান্ভোজাংশ্চৈব মহাবলান্॥ 18-4-17(98569)
সোমেন সহিতং পশ্য সৌভদ্রমপরাজিতম্।
অভিমন্যুং মহেষ্বাসং নিশাকরসমদ্যুতিম্॥ 18-4-18(98570)
এষ পাণ্ডুর্মহেষ্বাসঃ কুন্ত্যা মাদ্র্যা চ সঙ্গতঃ।
বিমানেন সদাঽভ্যেতি পিতা তব মমান্তিকম্॥ 18-4-19(98571)
বসুভিঃ সহিতং পশ্য ভীষ্মং শান্তনবং নৃপম্।
দ্রোণং বৃহস্পতেঃ পার্শ্বে গুরুমেনং নিশাময়॥ 18-4-20(98572)
এতে চান্যে মহীপালা যোধাস্তব চ পাণ্ডব।
গন্ধর্বসহিতা যান্তি যক্ষপুণ্যজনৈস্তথা॥ 18-4-21(98573)
গুহ্যকানাং গতিং চাপি কেচিৎপ্রাপ্তা নরাধিপাঃ।
ত্যক্ৎবা দেহং জিতঃ স্বর্গঃ পুণ্যবাগ্বুদ্ধিকর্মভিঃ॥ ॥ 18-4-22(98574)

ইতি শ্রীমন্মহাভারতে স্বার্গারোহণপর্বণি চতুর্থোঽধ্যায়ঃ॥ 4 ॥

Mahabharata – SwargarohaNa Parva – Chapter Footnotes
7-4-2 ব্রাহ্মেণ ব্রহ্মণা আরাধ্যেন॥ 7-4-3 উপস্থিতং সেবিতং অস্ত্রৈঃ॥ 7-4-12 মানুষং মানুষভাবম্॥