আশ্রমবাসিকপর্ব – অধ্যায় 010

আশ্রমবাসিকপর্ব – অধ্যায় 010
॥ শ্রীঃ ॥
16.10. অধ্যায়ঃ 010
অথাশ্রমবাসপর্ব ॥ 1 ॥
Mahabharata – AshramaVasika Parva – Chapter Topics
ধৃতরাষ্ট্রেণ পৌরান্প্রতি দুর্যোধনপক্ষপাতেন স্বকৃতাপনয়ক্ষমাপনম্॥ 1 ॥
Mahabharata – AshramaVasika Parva – Chapter Text


ধৃতরাষ্ট্র উবাচ।

শান্তনুঃ পালয়ামাস যথাবদ্বসুধামিমাম্।
তথা বিচিত্রবীর্যশ্চ ভীষ্মেণ পরিপালিতঃ।
পালয়ামাস নস্তাতো বিদিতং বো ন সংশয়ঃ॥ 16-10-1(97496)
যথা চ পাণ্ডুর্ভাতা মে দয়িতো ভবতামভূৎ।
স চাপি পালয়ামাস যথাবত্তচ্চ বেত্থ হ॥ 16-10-2(97497)
`অনন্তরং হি পিতরমনুজ্ঞাতো যুধিষ্ঠিরঃ।
নাত্র কিঞ্চিন্মৃষা জাতু ভাষতেতি মতির্মম॥’ 16-10-3(97498)
ময়া চ ভবতাং সম্যক্ শুশ্রূষা যা কৃতাঽনঘাঃ।
অসম্যগ্বা মহাভাগাস্তৎক্ষন্তব্যমতন্দ্রিতৈঃ॥ 16-10-4(97499)
যদা দুর্যোধনেনেদং ভুক্তং রাজ্যমকণ্টকম্।
অপি তত্র ন বো মন্দো দুর্বুদ্ধিরপরাদ্ধবান্॥ 16-10-5(97500)
তস্যাপরাধাদ্দুর্বুদ্ধেরভিমানান্মহীক্ষিতাম্।
বিমর্দঃ সুমহানাসীদনয়াৎস্বকৃতাদথ।
`ঘাতিতাঃ কৌরবেয়াশ্চ পৃথিবী চ বিনাশিতা॥’ 16-10-6(97501)
তন্ময়া সাধু বাঽপীদং যদি বাঽসাধু বৈ কৃতম্।
তদ্বো হৃদি ন কর্তব্যং ময়া বদ্ধোঽয়মঞ্জলিঃ॥ 16-10-7(97502)
বৃদ্ধোঽয়ং হতপুত্রোঽয়ং দুঃখিতোঽয়ং নরাধিপঃ।
পূর্বরাজ্ঞাং চ পুত্রোঽয়মিতি কৃৎবাঽনুজানথ॥ 16-10-8(97503)
ইয়ং চ কৃপণা বৃদ্ধা হতপুত্রা তপস্বিনী।
গান্ধারী পুত্রশোকার্তা তুল্যং যাচতি বো ময়া॥ 16-10-9(97504)
হতপুত্রাবিমৌ বৃদ্ধৌ বিদিৎবা দুঃখিতৌ তথা।
অনুজানীত ভদ্রং বো ব্রজাব শরণং চ বঃ॥ 16-10-10(97505)
অয়ং চ কৌরবো রাজা কুন্তীপুত্রো যুধিষ্ঠিরঃ।
সর্বৈর্ভবদ্ভির্দ্রব্যঃ সমেষু বিষমেষু চ।
ন জাতু বিষমং চৈব গমিষ্যতি কদাচন॥ 16-10-11(97506)
চৎবারঃ সচিবা যস্য ভ্রাতরো বিপুলৌজসঃ।
লোককপালসমা হ্যেতে সর্বধর্মার্থদর্শিনঃ॥ 16-10-12(97507)
`চতুর্ণাং লোকপালানাং মধ্যে বিপরিবর্ততে।’
ব্রহ্মেব ভগবানেষ সর্বভূতজগৎপতিঃ॥ 16-10-13(97508)
`এবমেব মহাবাহুর্ভীমার্জুনয়মৈর্বৃতঃ।’
যুধিষ্ঠিরো মহাতেজা ভবতঃ পালয়িষ্যতি॥ 16-10-14(97509)
অবশ্যমেব বক্তব্যমিতি কৃৎবা ব্রবীমি বঃ।
এষ ন্যাসো ময়া দত্তঃ সর্বেষাং বো যুধিষ্ঠিরঃ।
ভবন্তোঽস্য চ বীরস্য ন্যাসভূতাঃ কৃতা ময়া॥ 16-10-15(97510)
যদেব তৈঃ কৃতং কিঞ্চিদ্ব্যলীকং বঃ সুতৈর্মম।
যদন্যেনি মদীয়েন তদনুজ্ঞাতুমর্হথ॥ 16-10-16(97511)
ভবদ্ভির্ন হি মে মন্যুঃ কৃতপূর্বঃ কথঞ্চন।
অত্যন্তগুরুভক্তানামেষোঽঞ্জলিরিদং নমঃ॥ 16-10-17(97512)
তেষামস্থিরবুদ্ধীনাং লুব্ধানাং কামচারিণাম্।
কৃতে যাচেঽদ্য বঃ সর্বান্গান্ধারীসহিতোঽনঘাঃ॥ 16-10-18(97513)
ইত্যুক্তাংস্তেন তে সর্বে পৌরজানপদা জনাঃ।
নোচুর্বাষ্পকলাঃ কিঞ্চিদ্বীক্ষাংচক্রুঃ পরস্পরম্॥ ॥ 16-10-19(97514)

ইতি শ্রীমন্মহাভারতে আশ্রমবাসিকপর্বণি আশ্রমবাসপর্বণি দশমোঽধ্যায়ঃ॥ 10 ॥

Mahabharata – AshramaVasika Parva – Chapter Footnotes
7-10-7 ন কর্তব্যমনুজ্ঞাতুমিহার্হথেতি ক.ট.থ.পাঠঃ॥ 7-10-16 অন্যেন ভৃত্যেন। অনুজ্ঞাতুং ক্ষন্তুম্॥