আদিপর্ব – অধ্যায় ২৫৩
॥ শ্রীঃ ॥
১.২৫৩. অধ্যায়ঃ ২৫৩
Mahabharata – Adi Parva – Chapter Topics
ইন্দ্রাভিবৃষ্টস্য জলস্যার্জুনেন নিবারণম্॥ ১ ॥ পুত্রং নিগীর্যাকাশমুৎপতন্ত্যাঃ তক্ষকভার্যায়াঃ অর্জুনেন শিরশ্ছেদঃ॥ ২ ॥ ইন্দ্রেণ স্বকৃতবায়ুবর্ষমোহিতাদর্জুনাত্তক্ষকপুত্রস্যাশ্বসেনস্য মোচনম্॥ ৩ ॥ পাবকান্মুমুক্ষূণাং নাগাদীনাং মারণম্॥ ৪ ॥ ইন্দ্রস্য কৃষ্ণার্জুনাভ্যাং যুদ্ধম্॥ ৫ ॥
Mahabharata – Adi Parva – Chapter Text
১-২৫৩-০ (১০৯৯০)
বৈশম্পায়ন উবাচ। ১-২৫৩-০x (১৩৩০)
তস্যাথ বর্ষতো বারি পাণ্ডবঃ প্রত্যবারয়ৎ।
শরবর্ষেণ বীভৎসুরুত্তমাস্ত্রাণি দর্শয়ন্॥ ১-২৫৩-১ (১০৯৯১)
খাণ্ডবং চ বনং সর্বং পাণ্ডবো বহুভিঃ শরৈঃ।
প্রাচ্ছাদয়দমেয়াত্মা নীহারেণেব চন্দ্রমাঃ॥ ১-২৫৩-২ (১০৯৯২)
ন চ স্ম কিংচিচ্ছক্নোতি ভূতং নিশ্চরিতুং ততঃ।
সংছাদ্যমানে খে বাণৈরস্যতা সব্যসাচিনা॥ ১-২৫৩-৩ (১০৯৯৩)
তক্ষকস্তু ন তত্রাসীন্নাগরাজো মহাবলঃ।
দহ্যমানে বনে তস্মিন্কুরুক্ষেত্রং গতো হি সঃ॥ ১-২৫৩-৪ (১০৯৯৪)
অশ্বসেনোঽভবত্তত্র তক্ষকস্য সুতো বলী।
স যত্নমকরোত্তীব্রং মোক্ষার্থং জাতবেদসঃ॥ ১-২৫৩-৫ (১০৯৯৫)
ন শশাক স নির্গন্তুং নিরুদ্ধোঽর্জুনপত্রিভিঃ।
মোক্ষয়ামাস তং মাতা নিগীর্য ভুজগাত্মজা॥ ১-২৫৩-৬ (১০৯৯৬)
তস্য পূর্বং শিরো গ্রস্তং পুচ্ছমস্য নিগীর্যতে।
নিগীর্য সোর্ধ্বমক্রামৎসুতং নাগী মুমুক্ষয়া॥ ১-২৫৩-৭ (১০৯৯৭)
তস্যাঃ শরেণ তীক্ষ্ণেন পৃথুধারেণ পাণ্ডবঃ।
শিরশ্চিচ্ছেদ গচ্ছন্ত্যাস্তামপশ্যচ্ছচীপতিঃ॥ ১-২৫৩-৮ (১০৯৯৮)
তং মুমোচয়িষুর্বজ্রী বাতবর্ষেণ পাণ্ডবম্।
মোহয়ামাস তৎকালমশ্বসেনস্ৎবমুচ্যত॥ ১-২৫৩-৯ (১০৯৯৯)
তাং চ মায়াং তদা দৃষ্টা ঘোরাং নাগেন বঞ্চিতঃ।
দ্বিধা ত্রিধা চ খগতান্প্রাণিনঃ পাণ্ডবোচ্ছিনৎ॥ ১-২৫৩-১০ (১১০০০)
শশাপ তং চ সংক্রুদ্ধো বীভৎসুর্জিহ্মগামিনম্।
পাবকো বাসুদেবশ্চাপ্যপ্রতিষ্ঠো ভবিষ্যসি॥ ১-২৫৩-১১ (১১০০১)
ততো জিষ্ণুঃ সহস্রাক্ষং খং বিতত্যাশুগৈঃ শরৈঃ।
যোধয়ামাস সংক্রুদ্ধো বঞ্চনাং তামনুস্মরন্॥ ১-২৫৩-১২ (১১০০২)
দেবরাজোঽপি তং দৃষ্ট্বা সংরব্ধং সমরেঽর্জুনম্।
স্বমস্ত্রমসৃজত্তীব্রং ছাদয়িৎবাঽখিলং নভঃ॥ ১-২৫৩-১৩ (১১০০৩)
ততো বায়ুর্মহাঘোষঃ ক্ষোভয়ন্সর্বসাগরান্।
বিয়ৎস্থো জনয়ন্মেঘাঞ্জলধারাসমাকুলান্॥ ১-২৫৩-১৪ (১১০০৪)
ততোঽশনিমুচো ঘোরাংস্তডিৎস্তনিতনিঃস্বনান্।
তদ্বিঘাতার্থমসৃজদর্জুনোঽপ্যস্ত্রমুত্তমম্॥ ১-২৫৩-১৫ (১১০০৫)
বায়ব্যমভিমন্ত্র্যাথ প্রতিপত্তিবিশারদঃ।
তেনেন্দ্রাশনিমেঘানাং বীর্যৌজস্তদ্বিনাশিতম্॥ ১-২৫৩-১৬ (১১০০৬)
জলধারাশ্চ তাঃ শোষং জগ্মুর্নেশুশ্চ বিদ্যুতঃ।
ক্ষণেন চাভবদ্ব্যোম সংপ্রশান্তরজস্তমঃ॥ ১-২৫৩-১৭ (১১০০৭)
সুখশীতানিলবহং প্রকৃতিস্থার্কমণ্ডলম্।
নিষ্প্রতীকারহৃষ্টশ্চ হুতভুগ্বিবিধাকৃতিঃ॥ ১-২৫৩-১৮ (১১০০৮)
সিচ্যমানো বসৌঘৈস্তৈঃ প্রাণিনাং দেহনিঃসৃতৈঃ।
প্রজজ্বালাথ সোঽর্চিষ্মান্স্বনাদৈঃ পূরয়ঞ্জগৎ॥ ১-২৫৩-১৯ (১১০০৯)
কৃষ্ণাভ্যাং রক্ষিতং দৃষ্ট্বা তং চ দাবমহঙ্কৃতাঃ।
খমুৎপেতুর্মহারাজ সুপর্ণাদ্যাঃ পতত্ত্রিণঃ॥ ১-২৫৩-২০ (১১০১০)
গরুত্মান্বজ্রসদৃশৈঃ পক্ষতুণ্ডনখৈস্তথা।
প্রহর্তুকামো ন্যপতদাকাশাৎকৃষ্ণপাণ্ডবৌ॥ ১-২৫৩-২১ (১১০১১)
তথৈবোরগসঙ্ঘাতাঃ পাণ্ডবস্য সমীপতঃ।
উৎসৃজন্তো বিষং ঘোরং নিপেতুর্জ্বলিতাননাঃ॥ ১-২৫৩-২২ (১১০১২)
তাংশ্চকর্ত শরৈঃ পার্থঃ সরোষাগ্নিসমুক্ষিতৈঃ।
বিবিশুশ্চাপি তং দীপ্তং দেহাভাবায় পাবকম্॥ ১-২৫৩-২৩ (১১০১৩)
ততঃ সুরাঃ সগন্ধর্বা যক্ষরাক্ষসপন্নগাঃ।
উৎপেতুর্নাদমতুলমুৎসৃজন্তো রণার্থিনঃ॥ ১-২৫৩-২৪ (১১০১৪)
অয়ঃকণপচক্রাশ্মভুশুণ্ড্যুদ্যতবাহবঃ।
কৃষ্ণপার্থৌ জিঘাংসন্তঃ ক্রোধসংমূর্চ্ছিতৌজসঃ॥ ১-২৫৩-২৫ (১১০১৫)
তেষামতিব্যাহরতাং শস্ত্রবর্ষং প্রমুঞ্চতাম্।
প্রমমাথোত্তমাঙ্গানি বীভৎসুর্নিশিতৈঃ শরৈঃ॥ ১-২৫৩-২৬ (১১০১৬)
কৃষ্ণশ্চ সুমহাতেজাশ্চক্রেণারিবিনাশনঃ।
দৈত্যদানবসঙ্ঘানাং চকার কদনং মহৎ॥ ১-২৫৩-২৭ (১১০১৭)
অথাপরে শরৈর্বিদ্ধাশ্চক্রবেগেরিতাস্তথা।
বেলামিব সমাসাদ্য ব্যতিষ্ঠন্নমিতৌজসঃ॥ ১-২৫৩-২৮ (১১০১৮)
ততঃ শক্রোঽতিসক্রুদ্ধস্ত্রিদশানাং মহেশ্বরঃ।
পাণ্ডুরং গজমাস্থায় তাবুভৌ সমুপাদ্রবৎ॥ ১-২৫৩-২৯ (১১০১৯)
বেগেনাশনিমাদায় বজ্রমস্ত্রং চ সোঽসৃজৎ।
হতাবেতাবিতি প্রাহ সুরানসুরসূদনঃ॥ ১-২৫৩-৩০ (১১০২০)
ততঃ সমুদ্যতাং দৃষ্ট্বা দেবেন্দ্রেণ মহাশনিম্।
জগৃহুঃ সর্বশস্ত্রাণি স্বানি স্বানি সুরাস্তথা॥ ১-২৫৩-৩১ (১১০২১)
কালদণ্ডং যমো রাজন্ গদাং চৈব ধনেশ্বরঃ।
পাশাংশ্চ তত্র বরুণো বিচিত্রাং চ তথাঽশনিম্॥ ১-২৫৩-৩২ (১১০২২)
স্কন্দঃ শক্তিং সমাদায় তস্থৌ মেরুরিবাচলঃ।
ওষধীর্দীপ্যমানাশ্চ জগৃহাতেঽস্বিনাবপি॥ ১-২৫৩-৩৩ (১১০২৩)
জগৃহে চ ধনুর্ধাতা মুসলং তু জয়স্তথা।
পর্বতং চাপি জগ্রাহ ক্রূদ্ধস্ৎবষ্টা মহাবলঃ॥ ১-২৫৩-৩৪ (১১০২৪)
অংশস্তু শক্তিং জগ্রাহ মৃত্যুর্দেবঃ পরশ্বধম্।
প্রগৃহ্য পরিঘং ঘোরং বিচচারার্যমা অপি॥ ১-২৫৩-৩৫ (১১০২৫)
মিত্রশ্চ ক্ষুরপর্যন্তং চক্রমাদায় তস্থিবান্।
পূষা ভগশ্চ সংক্রুদ্ধঃ সবিতা চ বিশাংপতে॥ ১-২৫৩-৩৬ (১১০২৬)
আত্তকার্মুকনিস্ত্রিংশাঃ কৃষ্ণাপার্থৌ প্রদুদ্রুবুঃ।
রুদ্রাশ্চ বসবশ্চৈব মরুতশ্চ মহাবলাঃ॥ ১-২৫৩-৩৭ (১১০২৭)
বিশ্বেদেবাস্তথা সাধ্যা দীপ্যমানাঃ স্বতেজসা।
এতে চান্যে চ বহবো দেবাস্তৌ পুরুষোত্তমৌ॥ ১-২৫৩-৩৮ (১১০২৮)
কৃষ্ণপার্থৌ জিঘাংসন্তঃ প্রতীয়ুর্বিবিধায়ুধাঃ।
তত্রাদ্ভুতান্যদৃশ্যন্ত নিমিত্তানি মহাহবে॥ ১-২৫৩-৩৯ (১১০২৯)
যুগান্তসমরূপাণি ভূতসংমোহনানি চ।
তথা দৃষ্ট্বা সুসংরব্ধং শক্রং দেবৈঃ সহাচ্যুতৌ॥ ১-২৫৩-৪০ (১১০৩০)
অভীতৌ যুধি দুর্ধর্ষৌ তস্থতুঃ সজ্জকার্মুকৌ।
আগচ্ছতস্ততো দেবানুভৌ যুদ্ধবিশারদৌ॥ ১-২৫৩-৪১ (১১০৩১)
ব্যতাডয়েতাং সংক্রুদ্ধৌ শরৈর্বজ্রোপমৈস্তদা।
অসকৃদ্ভগ্নসংকল্পাঃ সুরাশ্চ বহুশঃ কৃতাঃ॥ ১-২৫৩-৪২ (১১০৩২)
ভয়াদ্রণং পরিত্যজ্য শখ্রমেবাভিশিশ্রিয়ুঃ।
দৃষ্ট্বা নিবারিতান্দেবান্মাধবেনার্জুনেন চ॥ ১-২৫৩-৪৩ (১১০৩৩)
আশ্চর্যমগমংস্তত্র মুনয়ো নভসি স্থিতাঃ।
শক্রশ্চাপি তয়োর্বীর্যমুপলভ্যাসকৃদ্রণে॥ ১-২৫৩-৪৪ (১১০৩৪)
বভূব পরমপ্রীতো ভূয়শ্চৈতাবয়োধয়ৎ।
ততোঽশ্মবর্ষং সুমহদ্ব্যসৃজৎপাকশাসনঃ॥ ১-২৫৩-৪৫ (১১০৩৫)
ভূয় এব তদা বীর্যং জিজ্ঞাসুঃ সব্যসাচিনঃ।
তচ্ছৈরর্জুনো বর্ষং প্রতিজঘ্নেঽত্যমর্ষিতঃ॥ ১-২৫৩-৪৬ (১১০৩৬)
বিফলং ক্রিয়মাণং তৎসমবেক্ষ্য শতক্রতুঃ।
ভূয়ঃ সংবর্ধয়ামাস তদ্বর্ষং পাকশাসনঃ॥ ১-২৫৩-৪৭ (১১০৩৭)
সোশ্মবর্ষং মহাবেগৈরিষুভিঃ পাকশাসনিঃ।
বিলয়ং গময়ামাস হর্ষয়ন্পিতরং তথা॥ ১-২৫৩-৪৮ (১১০৩৮)
তত উৎপাট্য পাণিভ্যাং মন্দরাচ্ছিখরং মহৎ।
সদ্রুমং ব্যসৃজচ্ছক্রো জিঘাংসুঃ পাণ্ডুনন্দনম্॥ ১-২৫৩-৪৯ (১১০৩৯)
ততোঽর্জুনো বেগবদ্ভির্জ্বলিতাগ্রৈরজিহ্মগৈঃ।
শরৈর্বিধ্বংসয়ামাস গিরেঃ শৃঙ্গং সহস্রধা॥ ১-২৫৩-৫০ (১১০৪০)
গিরের্বিশীর্যমাণস্য তস্য রূপং তদা বভৌ।
সার্কচন্দ্রগ্রহস্যেব নভসঃ পরিশীর্যতঃ॥ ১-২৫৩-৫১ (১১০৪১)
তেনাভিপততা দাবং শৈলেন মহতা ভৃশম্।
শৃঙ্গেণ নিহতাস্তত্র প্রাণিনঃ খাণ্ডবালয়াঃ॥ ॥ ১-২৫৩-৫২ (১১০৪২)
ইতি শ্রীমন্মহাভারতে আদিপর্বণি খাণ্ডবদাহপর্বণি ত্রিপঞ্চাশদধিকদ্বিশততমোঽধ্যায়ঃ॥ ২৫৩ ॥ ॥ সমাপ্তং চ খাণ্ডবদাহপর্ব ॥