আদিপর্ব – অধ্যায় ২৩৮

আদিপর্ব – অধ্যায় ২৩৮

॥ শ্রীঃ ॥

১.২৩৮. অধ্যায়ঃ ২৩৮

Mahabharata – Adi Parva – Chapter Topics

অর্জুনস্য প্রভাসতীর্থগমনম্॥ ১ ॥ তত্র স্মৃতিপথাগতসুভদ্রারূপলাবণ্যাদিকং চিন্তয়তোঽর্জুনস্য পরিব্রাজকবেষস্বীকারেণ তস্যা হরণে নিশ্চয়ঃ॥ ২ ॥ অর্জুনস্য চিন্তিতজ্ঞানেন হসতা শ্রীকৃষ্ণেন সহ শায়িন্যা সত্যভাময়া হাসকারণে পৃষ্টে তাং প্রতি অর্জুনবৃত্তান্তকথনম্॥ ৩ ॥ সত্যভামাং শয়নে বিহায় একাকিনা শ্রীকৃষ্ণেন প্রভাসতীর্থংপ্রতি প্রস্থানম্॥ ৪ ॥ চারমুখেন অর্জুনস্য তত্রাগমনং শ্রুৎবা কৃষ্ণস্য তত্রাগমনম্॥ ৫ ॥ অর্জুনেন সংভাপ্য কৃষ্ণস্য দ্বারকাংপ্রতি পুনরাগমনম্॥ ৬ ॥

Mahabharata – Adi Parva – Chapter Text

১-২৩৮-০ (১০২৭০)
বৈশম্পায়ন উবাচ। ১-২৩৮-০x (১২৮৩)
সোঽপরান্তেষু তীর্থানি পুণ্যান্যায়তনানি চ।
সর্বাণ্যেবানুপূর্ব্যেণ জগামামিতবিক্রমঃ॥ ১-২৩৮-১ (১০২৭১)
সমুদ্রে পশ্চিমে যানি তীর্থান্যায়তনানি চ।
তানি সর্বাণি গৎবা স প্রভাসমুপজগ্মিবান্॥ ১-২৩৮-২ (১০২৭২)
`চিন্তয়ামাস রাত্রৌ তু গদেন কথিতং পুরা।
সুভদ্রায়াশ্চ মাধুর্যরূপসংপদ্গুণানি চ॥ ১-২৩৮-৩ (১০২৭৩)
প্রাপ্তুমং তাং চিন্তয়ামাস কোঽত্রোপায়ো ভবেদিতি।
বেষবৈকৃত্যমাপন্নঃ পরিব্রাজকরূপধৃৎ॥ ১-২৩৮-৪ (১০২৭৪)
কুকুরান্ধকবৃষ্ণীনামজ্ঞাতো বেষধারণাৎ।
ভ্রমমাণশ্চরন্ভৈক্ষং পরিব্রাজকবেষবান্॥ ১-২৩৮-৫ (১০২৭৫)
যেনকেনাপ্যুপায়েন প্রবিশ্য চ গৃহং মহৎ।
দৃষ্ট্বা সুভদ্রাং কৃষ্ণস্য ভগিনীমেকসুন্দরীম্॥ ১-২৩৮-৬ (১০২৭৬)
বাসুদেবমতং জ্ঞাৎবা করিষ্যামি হিতং শুভম্।
এবং বিনিশ্চয়ং কৃৎবা দীক্ষিতো বৈ তদাঽভবৎ॥ ১-২৩৮-৭ (১০২৭৭)
ত্রিদণ্ডী মুণ্ডিতঃ কুণ্ডী অক্ষমালাঙ্গুলীয়কঃ।
যোগভারং বহন্পার্থো বটবৃক্ষস্য কোটরম্॥ ১-২৩৮-৮ (১০২৭৮)
প্রবিশংশ্চৈব বীভৎসুর্বৃষ্টিং বর্ষতি বাসবে।
চিন্তয়ামাস দেবেশং কেশবং ক্লেশনাশনম্॥ ১-২৩৮-৯ (১০২৭৯)
কেশবশ্চিন্তিতং জ্ঞাৎবা দিব্যজ্ঞানেন দৃষ্টবান্।
শয়ানঃ শয়নে দিব্যে সত্যভামাসহায়বান্॥ ১-২৩৮-১০ (১০২৮০)
কেশবঃ সহসা রাজঞ্জহায় চ ননন্দ চ।
পুনঃ পুনঃ সত্যভামা চাব্রবীৎপুরুষোত্তমম্॥ ১-২৩৮-১১ (১০২৮১)
ভগবংশ্চিন্তয়াবিষ্টঃ শয়নে শয়িতঃ সুখম্।
ভবান্বহুপ্রকারেণ জহাস চ পুনঃ পুনঃ॥ ১-২৩৮-১২ (১০২৮২)
শ্রোতব্যং যদি বা কৃষ্ণ প্রসাদো যদি তে ময়ি।
বক্তুমর্হসি দেবেশ তচ্ছ্রোতুং কাময়াম্যহম্॥ ১-২৩৮-১৩ (১০২৮৩)
শ্রীভগবানুবাচ। ১-২৩৮-১৪x (১২৮৪)
পিতৃষ্বসুর্যঃ পুত্রো মে ভীমসেনানুজোঽর্জুনঃ।
তীর্থয়াত্রাং গতঃ পার্থঃ কারণাৎসময়াত্তদা॥ ১-২৩৮-১৪ (১০২৮৪)
তীর্থয়াত্রাসমাপ্তৌ তু নিবৃত্তো নিশি ভারতঃ।
সুভধ্রাং চিন্তয়ামাস রূপেণাপ্রতিমাং ভুবি॥ ১-২৩৮-১৫ (১০২৮৫)
চিন্তয়েন্নেব তাং ভদ্রাং যতিরূপধরোঽর্জুনঃ।
যতিরূপপ্রতিচ্ছন্নো দ্বারকাং প্রাপ্য মাধবীম্॥ ১-২৩৮-১৬ (১০২৮৬)
যেনকেনাপ্যুপায়েন দৃষ্ট্বা তু বরবর্ণিনীম্।
বাসুদেবমতং জ্ঞাৎবা প্রয়তিষ্যে মনোরথম্॥ ১-২৩৮-১৭ (১০২৮৭)
এবং ব্যবসিতঃ পার্থো যতিলিঙ্গেন পাণ্ডবঃ।
ছায়ায়াং বটবৃক্ষস্য বৃষ্টিং বর্ষতি বাসবে॥ ১-২৩৮-১৮ (১০২৮৮)
যোগভারং বহন্নেব মানসং দুঃখমাপ্তবান্।
এতদর্থং বিজানীহি হসন্তং মাং মুদা প্রিয়ে॥ ১-২৩৮-১৯ (১০২৮৯)
ভ্রাতরং তব পশ্যেতি সত্যভামাং ব্যসর্জয়ৎ।
তত উত্থায় শয়নাৎপ্রস্থিতো মধুসূদনঃ॥’ ১-২৩৮-২০ (১০২৯০)
প্রভাসদেশং সংপ্রাপ্তং বীভৎসুমপরাজিতম্।
তীর্থান্যনুচরন্তং তং শুশ্রাব মধুসূদনঃ॥ ১-২৩৮-২১ (১০২৯১)
চারাণাং চৈব বচনাদেকাকী স জনার্দনঃ।
তত্রাভ্যগচ্ছৎকৌন্তেয়ং মহাত্মাতং স মাধবঃ॥ ১-২৩৮-২২ (১০২৯২)
দদৃশাতে তদান্যোন্যং প্রভাসে কৃষ্ণপাণ্ডবৌ॥ ১-২৩৮-২৩ (১০২৯৩)
তাবন্যোন্যং সমাশ্লিষ্য পৃষ্ট্বা চ কুশলং বনে।
আস্তাং প্রিয়সখায়ৌ তৌ নরনারায়ণাবৃষী॥ ১-২৩৮-২৪ (১০২৯৪)
ততোঽর্জুনং বাসুদেবস্তাং চর্যাং পর্যপৃচ্ছত।
কিমর্থং পাণ্ডবৈতানি তীর্থান্যনুচরস্যুত॥ ১-২৩৮-২৫ (১০২৯৫)
ততোঽর্জনো যথাবৃত্তং সর্বমাখ্যাতবাংস্তদা।
শ্রুৎবোবাচ চ বার্ষ্ণেয় এবমেতদিতি প্রভুঃ॥ ১-২৩৮-২৬ (১০২৯৬)
তৌ বিহৃত্য যথাকামং প্রভাসে কৃষ্ণপাণ্ডবৌ।
মহীধরং রৈবতকং বাসায়ৈবাভিজগ্মতুঃ॥ ১-২৩৮-২৭ (১০২৯৭)
পূর্বমেব তু কৃষ্ণস্য বচনাত্তং মহীধরম্।
পুরুষা মণ্ডয়াঞ্চক্রুরুপজহ্রশ্চ ভোজনম্॥ ১-২৩৮-২৮ (১০২৯৮)
প্রতিগৃহ্যার্জুনঃ সর্বমুপভুজ্য চ পাণ্ডবঃ।
সহৈব বাসুদেবেন দৃষ্টবান্নটনর্তকান্॥ ১-২৩৮-২৯ (১০২৯৯)
অভ্যনুজ্ঞায় তান্সর্বানর্চয়িৎবা চ পাণ্ডবঃ।
সৎকৃতং শনং দিব্যমভ্যগচ্ছন্মহামতিঃ॥ ১-২৩৮-৩০ (১০৩০০)
ততস্তত্র মহাবাহুঃ শয়ানঃ শয়নে শুভে।
তীর্থানাং পল্বলানাং চ পর্বতানাং চ দর্শনম্।
আপগানাং বনানাং চ কথয়ামাস সাৎবতে॥ ১-২৩৮-৩১ (১০৩০১)
এবং স কথয়ন্নেব নিদ্রয়া জনমেজয়।
কৌন্তেয়োঽপি হৃতস্তস্মিঞ্শয়নে স্বর্গসন্নিভে॥ ১-২৩৮-৩২ (১০৩০২)
মধুরেণৈব গীতেন বীণাশব্দেন চৈব হ।
প্রবোধ্যমানো বুবুধে স্তুতিভির্মঙ্গলৈস্ততা॥ ১-২৩৮-৩৩ (১০৩০৩)
স কৃৎবাঽবশ্যকার্যাণি বার্ষ্ণেয়েনাভিনন্দিতঃ।
`বার্ষ্ণেয়ং সমনুজ্ঞাপ্য তত্র বাসমরোচয়ৎ॥ ১-২৩৮-৩৪ (১০৩০৪)
তথেত্যুক্ৎবা বাসুদেবো ভোজনং বৈ শশাস হ।
যতিরূপধরং পার্থং বিসৃজ্য সহসা হরিঃ।’
রথেন কাঞ্চনাঙ্গেন দ্বারকামভিজগ্মিবান্॥ ১-২৩৮-৩৫ (১০৩০৫)
অলঙ্কৃতা দ্বারকা তু বভূব জনমেজয়॥ ১-২৩৮-৩৬ (১০৩০৬)
দিদৃক্ষন্তশ্চ গোবিন্দং দ্বারকাবাসিনো জনাঃ।
নরেন্দ্রমার্গমাজগ্মুস্তূর্ণং শতসহস্রশঃ॥ ১-২৩৮-৩৭ (১০৩০৭)
`ক্ষণার্ধমপি বার্ষ্ণেয়া গোবিন্দবিরহাক্ষমাঃ।
কৌতূহলসমাবিষ্টা ভৃশমুৎপ্রেক্ষ্য সংস্থিতাঃ॥’ ১-২৩৮-৩৮ (১০৩০৮)
অবলোকেষু নারীণাং সহস্রাণি শতানি চ।
ভোজবৃষ্ণ্যন্ধকানাং চ সমবায়ো মহানভূৎ॥ ১-২৩৮-৩৯ (১০৩০৯)
স তথা সৎকৃতঃ সর্বৈর্ভোজবৃষ্ণ্যন্ধকাত্মজৈঃ।
অভিবাদ্যাভিবাদ্যাংশ্চ সর্বৈশ্চ প্রতিনন্দিতঃ॥ ১-২৩৮-৪০ (১০৩১০)
কুমারৈঃ সর্বশো বীরঃ সৎকারেণাভিচোদিতঃ।
সমানবয়সঃ সর্বানাশ্লিষ্য স পুনঃপুনঃ॥ ১-২৩৮-৪১ (১০৩১১)
কৃষ্ণঃ স্বভবনং রম্যং প্রবিবেশ মহাবলঃ।
প্রভাসাদাগতং দেব্যঃ সর্বাঃ কৃষ্ণমপূজয়ন্॥ ॥ ১-২৩৮-৪২ (১০৩১২)

ইতি শ্রীমন্মহাভারতে আদিপর্বণি অর্জুনবনবাসপর্বণি অষ্টত্রিংশদধিকদ্বিশততমোঽধ্যায়ঃ॥ ২৩৮ ॥ ॥ সমাপ্তং চার্জুনবনবাসপর্ব ॥

Mahabharata – Adi Parva – Chapter Footnotes

১-২৩৮-১ অপরান্তেষু পশ্চিসমুদ্রতীরেষু॥ ১-২৩৮-৩৬ অলংকৃতা দ্বারকা তু বভূব জনমেজয়। কুন্তীপুত্রস্য পূজার্থমপি নিষ্কুটকেষ্বপি॥ ইতি চ, জ, ঝ, ঞ, ড, পাঠঃ॥ ১-২৩৮-৩৭ দিদৃক্ষন্তশ্চ কৌন্তেয়ং ইতি চ, জ, ঝ, ঞ, জ, পাঠঃ॥ ১-২৩৮-৪২ কৃষ্ণস্য ভবনে রম্যে রত্নভোজ্যসমাবৃতে। উবাস সহ কৃষ্ণেন বহুলাস্তত্র শর্বরীঃ॥ ইতি চ, জ, ঝ, ঞ, ড, পাঠঃ॥ অষ্টত্রিংশদধিকদ্বিশততমোঽধ্যায়ঃ॥ ২৩৮ ॥