আদিপর্ব – অধ্যায় ২৩১
॥ শ্রীঃ ॥
১.২৩১. অধ্যায়ঃ ২৩১
Mahabharata – Adi Parva – Chapter Topics
সুন্দোপসুন্দকৃতোপদ্রবং নিবেদ্য দেবাদিভিঃ প্রার্থিতেন ব্রহ্মণা আজ্ঞপ্তেন বিশ্বকর্মণা তিলোত্তমাসৃষ্টিঃ॥ ১ ॥ তিলোত্তময়া ব্রহ্মাজ্ঞাস্বীকারঃ॥ ২ ॥
Mahabharata – Adi Parva – Chapter Text
১-২৩১-০ (১০০৩৪)
নারদ উবাচ। ১-২৩১-০x (১২৫৯)
ততো দেবর্ষয়ঃ সর্বে সিদ্ধাশ্চ পরমর্ষয়ঃ।
জগ্মুস্তদা পরমার্তিং দৃষ্ট্বা তৎকদনং মহৎ॥ ১-২৩১-১ (১০০৩৫)
তেঽভিজগ্মুর্জিতক্রোধা জিতাত্মানো জিতেন্দ্রিয়াঃ।
পিতামহস্য ভনং জগতঃ কৃপয়া তদা॥ ১-২৩১-২ (১০০৩৬)
ততো দদৃশুরাসীনং সহ দেবৈঃ পিতামহম্।
সিদ্ধৈর্ব্রহ্মর্ষিভিশ্চৈব সমন্তাৎপরিবারিতম্॥ ১-২৩১-৩ (১০০৩৭)
তত্র দেবো মহাদেবস্তত্রাগ্নির্বায়ুনা সহ।
চন্দ্রাদিত্যৌ চ শক্রশ্চ পারমেষ্ঠ্যাস্তথর্ষয়ঃ॥ ১-২৩১-৪ (১০০৩৮)
বৈখানসা বালখিল্যা বানপ্রস্থা মরীচিপাঃ।
অজাশ্চৈবাবিমূঢাশ্চ তেজোগর্ভাস্তপস্বিনঃ॥ ১-২৩১-৫ (১০০৩৯)
ঋষয়ঃ সর্ব এবৈতে পিতামহমুপাগমন্।
ততোঽভিগম্য তে দীনাঃ সর্ব এব মহর্ষয়ঃ॥ ১-২৩১-৬ (১০০৪০)
সুন্দোপসুন্দয়ৌঃ কর্ম সর্বমেব শশংসিরে।
যথা হৃতং যথা চৈব কৃতং যেন ক্রমেণ চ॥ ১-২৩১-৭ (১০০৪১)
ন্যবেদয়ংস্ততঃ সর্বমখিলেন পিতামহে।
ততো দেবগণাঃ সর্বে তে চৈব পরমর্ষয়ঃ॥ ১-২৩১-৮ (১০০৪২)
তমেবার্থং পুরস্কৃত্য পিতামহমচোদয়ন্।
ততঃ পিতামহঃ শ্রুৎবা সর্বেষাং তদ্বচস্তদা॥ ১-২৩১-৯ (১০০৪৩)
মুহূর্তমিব সংচিন্ত্য কর্তব্যস্য চ নিশ্চয়ম্।
তয়োর্বধং সমুদ্দিশ্য বিশ্বকর্মাণমাহ্বয়ৎ॥ ১-২৩১-১০ (১০০৪৪)
দৃষ্ট্বা চ বিশ্বকর্মাণং ব্যাদিদেশ পিতামহঃ।
সৃজ্যতাং প্রার্থনীয়ৈকা প্রমদেতি মহাতপাঃ॥ ১-২৩১-১১ (১০০৪৫)
পিতামহং নমস্কৃত্য তদ্বাক্যমভিনন্দ্য চ।
নির্মমে যোষিতং দিব্যাং চিন্তয়িৎবা পুনঃপুনঃ॥ ১-২৩১-১২ (১০০৪৬)
ত্রিষু লোকেষু যৎকিংচিদ্ভূতং স্থাবরজঙ্গমম্।
সমানয়দ্দর্শনীয়ং তত্তদত্র স বিশ্ববিৎ॥ ১-২৩১-১৩ (১০০৪৭)
কোটিশশ্চৈব রত্নানি তস্যা গাত্রে ন্যবেশৎ।
তাং রত্নসঙ্ঘাতময়ীমসৃজদ্দেবরূপিণীম্॥ ১-২৩১-১৪ (১০০৪৮)
সা প্রয়ত্নেন মহতা নির্মিতা বিশ্বকর্মণা।
ত্রিষু লোকেষু নারীণাং রূপেণাপ্রতিমাভবৎ॥ ১-২৩১-১৫ (১০০৪৯)
ন তস্যাঃ সূক্ষ্মমপ্যস্তি যদ্গাত্রে রূপসংপদা।
নিয়ুক্তা যত্র বা দৃষ্টির্ন সজ্জতি নিরীক্ষতাম্॥ ১-২৩১-১৬ (১০০৫০)
সা বিগ্রহবতীব শ্রীঃ কামরূপা বপুষ্মতী।
`পিতামহমুপাতিষ্ঠৎকিং করোমীতি চাব্রবীৎ॥ ১-২৩১-১৭ (১০০৫১)
প্রীতো ভূৎবা স দৃষ্ট্বৈব প্রীত্যা চাস্যৈ বরং দদৌ।
কান্তৎবং সর্বভূতানাং সাশ্রিয়ানুত্তমং বপুঃ॥ ১-২৩১-১৮ (১০০৫২)
সা তেন বরদানেন কর্তুশ্চ ক্রিয়যা তদা।’
জহার সর্বভূতানাং চক্ষূংষি চ মনাংসি চ॥ ১-২৩১-১৯ (১০০৫৩)
তিলংতিলং সমানীয় রত্নানাং যদ্বিনির্মিতা।
তিলোত্তমেতি তত্তস্যা নাম চক্রে পিতামহঃ॥ ১-২৩১-২০ (১০০৫৪)
ব্রহ্মাণং সা নমস্কৃত্য প্রাঞ্জলির্বাক্যমব্রবীৎ।
কিং কার্যং ময়ি ভূতেশ যেনাস্ম্যদ্যেহ নির্মিতা॥ ১-২৩১-২১ (১০০৫৫)
পিতামহ উবাচ। ১-২৩১-২২x (১২৬০)
গচ্ছ সুন্দোপসুন্দাভ্যামসুরাভ্যাং তিলোত্তমে।
প্রার্থনীয়েন রূপেণ কুরু ভদ্রে প্রলোভনম্॥ ১-২৩১-২২ (১০০৫৬)
ৎবৎকৃতে দর্শাদেব রূপসংপৎকৃতেন বৈ।
বিরোধঃ স্যাদ্যথা তাভ্যামন্যোন্যেন তথা কুরু॥ ১-২৩১-২৩ (১০০৫৭)
নারদ উবাচ। ১-২৩১-২৪x (১২৬১)
সা তথেতি প্রতিজ্ঞায় নমস্কৃত্য পিতামহম্।
চকার মণ্ডলং তত্র বিবুধানাং প্রদক্ষিণম্॥ ১-২৩১-২৪ (১০০৫৮)
প্রাঙ্মুখো ভগবানাস্তে দক্ষিণেন মহেশ্বরঃ।
দেবাশ্চৈবোত্তরেণাসন্সর্বতস্ৎবৃষয়োঽভবন্॥ ১-২৩১-২৫ (১০০৫৯)
কুর্বন্ত্যাং তু তদা তত্র মণ্ডলং তৎপ্রদক্ষিণম্।
ইন্দ্রঃ স্থাণুশ্চ ভগবান্ধৈর্যেণ তু পরিচ্যুতৌ॥ ১-২৩১-২৬ (১০০৬০)
দ্রষ্টুকামস্য চাত্যর্থং গতায়াং পার্শ্বতস্তথা।
অন্যদঞ্চিতপদ্মাক্ষং দক্ষিণং নিঃসৃতং মুখম্॥ ১-২৩১-২৭ (১০০৬১)
পৃষ্ঠতঃ পরিবর্তন্ত্যাং পশ্চিমং নিঃসৃতং মুখম্।
গতায়াং চোত্তরং পার্শ্বমুত্তরং নিঃসৃতং মুখম্॥ ১-২৩১-২৮ (১০০৬২)
মহেন্দ্রস্যাপি নেত্রাণাং পৃষ্ঠতঃ পার্শ্বতোগ্রতঃ।
রক্তান্তানাং বিশালানাং সহস্রং সর্বতোঽভবৎ॥ ১-২৩১-২৯ (১০০৬৩)
এবং চতুর্মুখঃ স্থাণুর্মহাদেবোঽভবৎপুরা।
তথা সহস্রনেত্রশ্চ বভূব বলসূদনঃ॥ ১-২৩১-৩০ (১০০৬৪)
তথা দেবনিকায়ানাং মহর্ষীণাং চ সর্বশঃ।
মুখানি চাভ্যবর্তন্ত যেন যাতি তিলোত্তমা॥ ১-২৩১-৩১ (১০০৬৫)
তস্যা গাত্রে নিপতিতা দৃষ্টিস্তেষাং মহাত্মনাম্।
সর্বেষামেব ভূয়িষ্ঠমৃতে দেবং পিতামহম্॥ ১-২৩১-৩২ (১০০৬৬)
গচ্ছন্ত্যাং তু তয়া সর্বে দেবাশ্চ পরমর্ষয়ঃ।
কৃতমিত্যেব তৎকার্যং মেনিরে রূপসংপদা॥ ১-২৩১-৩৩ (১০০৬৭)
তিলোত্তমায়াং তস্যাং তু গতায়াং লোকভাবনঃ।
`কৃতং কার্যমিতি শ্রীমানব্রবীচ্চ পিতামহঃ।’
সর্বান্বিসর্জয়ামাস দেবানৃষিগণাংশ্চ তান্॥ ॥ ১-২৩১-৩৪ (১০০৬৮)
ইতি শ্রীমন্মহাভারতে আদিপর্বণি বিদুরাগমনরাজ্যলাভপর্বণি একত্রিংশদধিকদ্বিশততমোঽধ্যায়ঃ॥ ২৩১ ॥
Mahabharata – Adi Parva – Chapter Footnotes
১-২৩১-২৩ তাভ্যাং তয়োঃ॥ ১-২৩১-৩১ দেবনিকায়ানাং দেবসঙ্ঘানাং যেন দেশেন মার্গেণ সা যাতি তথা মুখান্যভ্যবর্তন্ত॥ একত্রিংশদধিকদ্বিশততমোঽধ্যায়ঃ॥ ২৩১ ॥