আদিপর্ব – অধ্যায় ২২৫

আদিপর্ব – অধ্যায় ২২৫

॥ শ্রীঃ ॥

১.২২৫. অধ্যায়ঃ ২২৫

Mahabharata – Adi Parva – Chapter Topics

ধৃতরাষ্ট্রাজ্ঞয়া বিদুরস্য দ্রুপদনগরগমনম্॥ ১ ॥ তত্র শ্রীকৃষ্ণাদীনাং সমীপে ধৃতরাষ্ট্রসন্দেশকথনম্॥ ২ ॥

Mahabharata – Adi Parva – Chapter Text

১-২২৫-০ (৯৭৩৮)
ধৃতরাষ্ট্র উবাচ। ১-২২৫-০x (১২২৮)
ভীষ্মঃ শান্তনবো বিদ্বান্দ্রোণশ্চ ভগবানৃষিঃ।
`হিতং চ পরমং সত্যমব্রূতাং বাক্যমুত্তমম্।’
হিতং চ পরমং বাক্যং ৎবং চ সত্যং ব্রবীষি মাম্॥ ১-২২৫-১ (৯৭৩৯)
যথৈব পাণ্ডোস্তে বীরাঃ কুন্তীপুত্রা মহারথাঃ।
তথৈব ধর্মতঃ সর্বে মম পুত্রা ন সংশয়ঃ॥ ১-২২৫-২ (৯৭৪০)
যথৈব মম পুত্রাণামিদং রাজ্যং বিধীয়তে।
তথৈব পাণ্ডুপুত্রাণামিদং রাজ্যং ন সংশয়ঃ॥ ১-২২৫-৩ (৯৭৪১)
ক্ষত্তরানয় গচ্ছৈতান্সহ মাত্রা সুসৎকৃতান্।
তয়া চ দেবরূপিণ্যা কৃষ্ণয়া সহ ভারত॥ ১-২২৫-৪ (৯৭৪২)
দিষ্ট্যা জীবন্তি তে পার্থা দিষ্ট্যা জীবতি সা পৃথা।
দিষ্ট্যা দ্রুপদকন্যাং চ লব্ধবন্তো মহারথাঃ॥ ১-২২৫-৫ (৯৭৪৩)
দিষ্ট্যা বর্ধামহে সর্বে দিষ্ট্যা শান্তঃ পুরোচনঃ।
দিষ্ট্যা মম পরং দুঃখমপনীতং মহাদ্যুতে॥ ১-২২৫-৬ (৯৭৪৪)
`ৎবমেব গৎবা বিদুর তানিহানয় মা চিরম্। ১-২২৫-৭ (৯৭৪৫)
বৈশম্পায়ন উবাচ।
এবমুক্তস্ততঃ ক্ষত্তা রথমারুহ্য শীঘ্রগম্।
আগাৎকতিপয়াহোভিঃ পাঞ্চালান্রাজধর্মবিৎ’॥ ১-২২৫-৭x (১২২৯)
ততো জগাম বিদুরো ধৃতরাষ্ট্রস্য শাসনাৎ।
সকাশং যজ্ঞসেনস্য পাণ্ডবানাং চ ভারত॥ ১-২২৫-৮ (৯৭৪৬)
সমুপাদায় রত্নানি বসূনি বিবিধানি চ।
দ্রৌপদ্যাঃ পাণ্ডবানাং চ যজ্ঞসেনস্য চৈব হ॥ ১-২২৫-৯ (৯৭৪৭)
তত্র গৎবা স ধর্মজ্ঞঃ সর্বশাস্ত্রবিশারদঃ।
দ্রুপদং ন্যায়তো রাজন্সংয়ুক্তমুপতস্থিবান্॥ ১-২২৫-১০ (৯৭৪৮)
স চাপি প্রতিজগ্রাহ ধর্মেণ বিদুরং ততঃ।
চক্রতুশ্চ যথান্যায়ং কুশলপ্রশ্নসংবিদম্॥ ১-২২৫-১১ (৯৭৪৯)
দদর্শ পাণ্ডবাংস্তত্র বাসুদেবং চ ভারত।
স্নেহাৎপরিষ্বজ্য স তান্পপ্রচ্ছানাময়ং ততঃ॥ ১-২২৫-১২ (৯৭৫০)
তৈশ্চাপ্যমিতবুদ্দিঃ স পূজিতো হি যথাক্রমম্।
বচনাদ্ধৃতরাষ্ট্রস্য স্নেহয়ুক্তং পুনঃপুনঃ॥ ১-২২৫-১৩ (৯৭৫১)
পপ্রচ্ছানাময়ং রাজংস্ততস্তান্পাণ্ডুনন্দনান্।
প্রদদৌ চাপি রত্নানি বিবিধানি বসূনি চ॥ ১-২২৫-১৪ (৯৭৫২)
পাণ্ডবানাং চ কুন্ত্যাশ্চ দ্রৌপদ্যাশ্চ বিশাংপতে।
দ্রুপদস্য চ পুত্রাণাং যথা দত্তানি কৌরবৈঃ॥ ১-২২৫-১৫ (৯৭৫৩)
প্রোবাচ চামিতমতিঃ প্রশ্রিতং বিনয়ান্বিতঃ।
দ্রুপদং পাণ্ডুপুত্রাণাং সন্নিধৌ কেশবস্য চ॥ ১-২২৫-১৬ (৯৭৫৪)
বিদুর উবাচ। ১-২২৫-১৭x (১২৩০)
রাজঞ্ছৃণু সহামাত্যঃ সপুত্রশ্চ বচো মম।
ধৃতরাষ্ট্রঃ সপুত্রস্ৎবাং সহামাত্যঃ সবান্ধবঃ॥ ১-২২৫-১৭ (৯৭৫৫)
অব্রবীৎকুশলং রাজন্প্রীয়মাণঃ পুনঃপুনঃ।
প্রীতিমাংস্তে দৃঢং চাপি সংবন্ধেন নরাধিপ॥ ১-২২৫-১৮ (৯৭৫৬)
তথা ভীষ্মঃ শান্তনবঃ কৌরবৈঃ সহ সর্বশঃ।
কুশলং ৎবাং মহাপ্রাজ্ঞঃ সর্বতঃ পরিপৃচ্ছতি॥ ১-২২৫-১৯ (৯৭৫৭)
ভারদ্বাজো মহাপ্রাজ্ঞো দ্রোণঃ প্রিয়সখস্তব।
সমাশ্লেষমুপেত্য ৎবাং কুশলং পরিপৃচ্ছতি॥ ১-২২৫-২০ (৯৭৫৮)
ধৃতরাষ্ট্রশ্চ পাঞ্চাল্য ৎবয়া সংবন্ধমেয়িবান্।
কৃতার্থং মন্যতেত্মানং তথা সর্বেঽপি কৌরবাঃ॥ ১-২২৫-২১ (৯৭৫৯)
ন তথা রাজ্যসংপ্রাপ্তিস্তেষাং প্রীতিকরী মতা।
যথা সংবন্ধকং প্রাপ্য যজ্ঞসেন ৎবয়া সহ॥ ১-২২৫-২২ (৯৭৬০)
এতদ্বিদিৎবা তু ভবান্প্রস্থাপয়তু পাণ্ডবান্।
দ্রষ্টুং হি পাণ্ডুপুত্রাংশ্চ ৎবরন্তি কুরবো ভৃশম্॥ ১-২২৫-২৩ (৯৭৬১)
বিপ্রোষিতা দীর্ঘকালমেতে চাপি নরর্ষভাঃ।
উৎসুকা নগরং দ্রষ্টুং ভবিষ্যন্তি তথা পৃথা॥ ১-২২৫-২৪ (৯৭৬২)
কৃষ্ণামপি চ পাঞ্চালীং সর্বাঃ কুরুবরস্ত্রিয়ঃ।
দ্রষ্টুকামাঃ প্রতীক্ষ্তে পুরং চ বিষয়াশ্চ নঃ॥ ১-২২৫-২৫ (৯৭৬৩)
স ভবান্পাণ্ডুপুত্রাণামাজ্ঞাপয়তু মা চিরম্।
গমনং সহদারাণামেতদত্র মতং মম॥ ১-২২৫-২৬ (৯৭৬৪)
নিসৃষ্টেষু ৎবয়া রাজন্পাণ্ডবেষু মহাত্মসু।
ততোঽহং প্রেষয়িষ্যামি ধৃতরাষ্ট্রস্য শীঘ্রগান্।
আগমিষ্যন্তি কৌন্তেয়াঃ কুন্তী চ সহ কৃষ্ণয়া॥ ॥ ১-২২৫-২৭ (৯৭৬৫)

ইতি শ্রীমন্মহাভারতে আদিপর্বণি বিদুরাগমনরাজ্যলাভপর্বণি পঞ্চবিংশত্যধিকদ্বিশততমোঽধ্যায়ঃ॥ ২২৫ ॥