আদিপর্ব – অধ্যায় ২১৫
॥ শ্রীঃ ॥
১.২১৫. অধ্যায়ঃ ২১৫
Mahabharata – Adi Parva – Chapter Topics
যুধিষ্ঠিরাদীনাং ক্রমেণ দ্রৌপদ্যাঃ পাণিগ্রহণম্॥ ১ ॥
Mahabharata – Adi Parva – Chapter Text
১-২১৫-০ (৯৩৯৬)
দ্রুপদ উবাচ। ১-২১৫-০x (১২০২)
অশ্রুৎবৈবং বচনং তে মহর্ষে
ময়া পূর্বং যতিতং সংবিধাতুম্।
ন বৈ শক্যং বিহিতস্যাপয়ানং
তদেবেদমুপপন্নং বিধানম্॥ ১-২১৫-১ (৯৩৯৭)
দিষ্টস্য গ্রন্থিরনিবর্তনীয়ঃ
স্বকর্মণা বিহিতং তেন কিংচিৎ।
কৃতং নিমিত্তমিহ নৈকহেতো-
স্তদেবেদমুপন্নং বিধানম্॥ ১-২১৫-২ (৯৩৯৮)
যথৈব কৃষ্ণোক্তবতী পুরস্তা-
ন্নৈকান্পতীন্মে ভগবান্দদাতু।
স চাপ্যেবং বরমিত্যব্রবীত্তাং
দেবো হি বেত্তা পরমং যদত্র॥ ১-২১৫-৩ (৯৩৯৯)
যদি চৈবং বিহিতঃ শঙ্করেণ
ধর্মোঽধর্মো বা নাত্র মমাপরাধঃ।
গৃহ্ণন্ৎবিমে বিধিতৎপাণিমস্যা
যথোপজোষং বিহিতৈষাং হি কৃষ্ণা॥ ১-২১৫-৪ (৯৪০০)
ব্যাস উবাচ। ১-২১৫-৫x (১২০৩)
নায়ং বিধির্মানুষাণাং বিবাহে
দেবা হ্যেতে দ্রৌপদী চাপি লক্ষ্মীঃ।
প্রাক্কর্মণঃ সুকৃতাৎপাণ্ডবানাং
পঞ্চানাং ভার্যা দেবদেবপ্রসাদাৎ॥ ১-২১৫-৫ (৯৪০১)
তেষামেবায়ং বিহিতঃ স্যাদ্বিবাহো
যথা হ্যেষ দ্রৌপদীপাণ্ডবানাম্।
অন্যেষাং নৃণাং যোষিতাং চ
ন ধর্মঃ স্যান্মানবোক্তো নরেন্দ্র॥ ১-২১৫-৬ (৯৪০২)
বৈশম্পায়ন উবাচ। ১-২১৫-৭x (১২০৪)
তত আজগ্মতুস্তত্র তৌ ব্যাসদ্রুপদাবুভৌ।
কুন্তী সপুত্রা যত্রাস্তে ধৃষ্টদ্যুম্নশ্চ পার্ষতঃ।
ততো দ্বৈপায়নঃ কৃষ্ণো যুধিষ্ঠিরমথাগমৎ॥’ ১-২১৫-৭ (৯৪০৩)
ততোঽব্রবীদ্ভগবান্ধর্মরাজ-
মদ্যৈব পুণ্যেঽহনি পাণ্ডবেয়।
পুণ্যে পুষ্যে যোগমুপৈতি চন্দ্রমাঃ
পাণিং কৃষ্ণায়াস্ৎবং গৃহাণাদ্য পূর্বং॥ ১-২১৫-৮ (৯৪০৪)
`এবমুক্ৎবা ধর্মরাজং ভীমাদীনপ্যভাষত॥ ১-২১৫-৯ (৯৪০৫)
ক্রমেণ পুরুষব্যাঘ্রাঃ পাণিং গৃহ্ণন্তু পাণিভিঃ।
এবমেব ময়া সর্বং দৃষ্টমেতৎপুরাঽনঘাঃ॥ ১-২১৫-১০ (৯৪০৬)
বৈশম্পায়ন উবাচ। ১-২১৫-১১x (১২০৫)
ততো রাজা যজ্ঞসেনঃ সপুত্রো
জন্যার্থণুক্তং বহু তত্তদগ্র্যম্।
`সমর্থয়ামাস মহানুভাবো
হৃষ্টঃ সপুত্রঃ সহবন্ধুবর্গঃ।’
সমানয়ামাস সুতাং চ কৃষ্ণা-
মাপ্লাব্য রত্নৈর্বহুভির্বিভূষ্য॥ ১-২১৫-১১ (৯৪০৭)
ততস্তু সর্বে সুহৃদো নৃপস্য
সমাজগ্মুঃ সহিতা মন্ত্রিণশ্চ।
দ্রষ্টুং বিবাহং পরমপ্রতীতা
দ্বিজাশ্চ পৌরাশ্চ যথাপ্রধানাঃ॥ ১-২১৫-১২ (৯৪০৮)
ততোঽস্য বেশ্মাগ্র্যজনোপশোভিতং
বিস্তীর্ণপদ্মোৎপলভূষিতাজিরম্।
বলৌঘরত্নৌঘবিচিত্রমাবভৌ
নভো যথা নির্মলতারকান্বিতম্॥ ১-২১৫-১৩ (৯৪০৯)
ততস্তু তে কৌরবরাজপুত্রা
বিভূষিতাঃ কুণ্ডলিনো যুবানঃ।
মহার্হবস্ত্রাম্বরচন্দনোক্ষিতাঃ
কৃতাভিষেকাঃ কৃতমঙ্গলক্রিয়াঃ॥ ১-২১৫-১৪ (৯৪১০)
পুরোহিতেনাগ্নিসমানবর্চসা
সহৈব ধৌম্যেন যতাবিধি প্রভো।
ক্রমেণ সর্বে বিবিশুস্ততঃ সদো
মহর্ষভা গোষ্ঠমিবাভিনন্দিনঃ॥ ১-২১৫-১৫ (৯৪১১)
ততঃ সমাধায় স বেদপরাগো
জুহাব মন্ত্রৈর্জ্বলিতং হুতাশনম্।
যুধিষ্ঠিরং চাপ্যুপনীয় মন্ত্রবি-
ন্নিয়োজয়ামাস সহৈব কৃষ্ণয়া॥ ১-২১৫-১৬ (৯৪১২)
প্রদক্ষিণং তৌ প্রগৃহীতপাণী
সমানয়ামাস স বেদপরাগঃ।
`বিপ্রাংশ্চ সংতর্প্য যুধিষ্ঠিরো ধনৈ-
র্গোভিশ্চ রত্নৈর্বিবিধৈশ্চ পূর্বম্॥ ১-২১৫-১৭ (৯৪১৩)
তদা স রাজা দ্রুপদস্য পুত্রিকা-
পাণিং প্রজগ্রাহ হুতাশনাগ্রতঃ।
ধৌম্যেন মন্ত্রৈর্বিধিবদ্ভুতেঽগ্নৌ
সহাগ্নিকল্পৈর্ঋষিভিঃ সমেত্য॥ ১-২১৫-১৮ (৯৪১৪)
ততোঽন্তরিক্ষাৎকুসুমানি পেতু-
র্ববৌ চ বায়ুঃ সুমনোজ্ঞগন্ধঃ।
ততোঽভ্যনুজ্ঞাপ্য সমাজশোভিতং
যুধিষ্ঠিরং রাজপুরোহিতস্তদা॥ ১-২১৫-১৯ (৯৪১৫)
বিপ্রাংশ্চ সর্বান্সুহৃদশ্চ রাজ্ঞঃ
সমেত্য রাজানমদীনসৎবম্।
জগাদ ভূয়োঽপি মহানুভাবো
বচোঽর্থয়ুক্তং মনুজেশ্বরং তম্॥ ১-২১৫-২০ (৯৪১৬)
গৃহ্ণন্ৎবথান্যে নরদেবকন্যা-
পাণিং যথাবন্নরদেবপুত্রাঃ।
তমভ্যনন্দদ্দ্রুপদস্তথা দ্বিজং
তথা কুরুষ্বেতি তমাদিদেশ॥ ১-২১৫-২১ (৯৪১৭)
পুরোহিতস্যানুমতেন রাজ্ঞ-
স্তে রাজপুত্রা মুদিতা বভূবুঃ।
ক্রমেণ চান্যে চ নরাধিপাত্মজা
বরস্ত্রিয়াস্তে জগৃহুঃ করং তদা॥’ ১-২১৫-২২ (৯৪১৮)
অহন্যহন্যুত্তমরূপধারিণো
মহারথাঃ কৌরববংশবর্ধনাঃ॥ ১-২১৫-২৩ (৯৪১৯)
ইদং চ তত্রাদ্ভুতরূপমুত্তমং
জগাদ দেবর্ষিরতীতমানুষম্।
মহানুভাবা কিল সা সুমধ্যমা
বভূব কন্যৈব গতে গতেঽহনি॥ ১-২১৫-২৪ (৯৪২০)
`পতিশ্বশুরতা জ্যেষ্ঠে পতিদেবরতাঽনুজে।
মধ্যমেষু চ পাঞ্চাল্যাস্ত্রিতয়ং ত্রিতয়ং ত্রিষু॥’ ১-২১৫-২৫ (৯৪২১)
কৃতে বিবাহে দ্রুপদো ধনং দদৌ
মহারথেভ্যো বহুরূপমুত্তমম্।
শতং রথানাং বরহেমমালিনাং
চতুর্যুজাং হেমখলীনমালিনাম্॥ ১-২১৫-২৬ (৯৪২২)
শতং গজানামপি পদ্মিনাং তথা
শতং গিরিণামিব হেমশৃঙ্গিণাম্।
তথৈব দাসীশতমগ্র্যযৌবনং
মহার্হবেষাভরণাম্বরস্রজম্॥ ১-২১৫-২৭ (৯৪২৩)
পৃথক্পৃথগ্দিব্যদৃশাং পুনর্দদৌ
তদা ধনং সৌমকিরগ্নিসাক্ষিকম্।
তথৈব বস্ত্রাণি বিভূষণানি
প্রভাবয়ুক্তানি মহানুভাবঃ॥ ১-২১৫-২৮ (৯৪২৪)
কৃতে বিবাহে চ ততস্তু পাণ্ডবাঃ
প্রভূতরত্নামুপলভ্য তাং শ্রিয়ম্।
বিজহ্রুরিন্দ্রপ্রতিমা মহাবলাঃ
পুরে তু পাঞ্চালনৃপস্য তস্য হ॥ ॥ ১-২১৫-২৯ (৯৪২৫)
ইতি শ্রীমন্মহাভারতে আদিপর্বণি বৈবাহিকপর্বণি পঞ্চদশাধিকদ্বিশততমোঽধ্যায়ঃ॥ ২১৫ ॥
Mahabharata – Adi Parva – Chapter Footnotes
১-২১৫-২৬ চতুর্যুজামশ্বচতুষ্টয়যুজাম্॥ পঞ্চদশাধিকদ্বিশততমোঽধ্যায়ঃ॥ ২১৫ ॥