আদিপর্ব – অধ্যায় ২০৯

আদিপর্ব – অধ্যায় ২০৯

॥ শ্রীঃ ॥

১.২০৯. অধ্যায়ঃ ২০৯

Mahabharata – Adi Parva – Chapter Topics

কুন্ত্যা সহ পাণ্ডবানাং দ্রুপদগৃহগমনম্॥ ১ ॥ পরীক্ষণার্থং দ্রুপদেন অনেকবিধবস্তূপহরণম্॥ ২ ॥ দ্রৌপদ্যা সহ কুন্ত্যা অন্তঃপুরপ্রবেশঃ॥ ৩ ॥ ভোজনানন্তরং পাণ্ডবানাং সাঙ্গ্রামিকবস্তুপূর্ণপ্রদেশে প্রবেশঃ॥ ৪ ॥

Mahabharata – Adi Parva – Chapter Text

১-২০৯-০ (৯১৯১)
দূত উবাচ। ১-২০৯-০x (১১৫৫)
জন্যার্থমন্নং দ্রুপদেন রাজ্ঞা
বিবাহহেতোরুপসংস্কৃতং চ।
তদাপ্নুবধ্বং কৃতসর্বকার্যাঃ
কৃষ্ণা চ তত্রৈতু চিরং ন কার্যম্॥ ১-২০৯-১ (৯১৯২)
ইমে রথাঃ কাঞ্চনপদ্মচিত্রাঃ
সদশ্বয়ুক্তা বসুধাধিপার্হাঃ।
এতান্সমারুহ্য পরৈত সর্বে
পাঞ্চালরাজস্য নিবেশনং তৎ॥ ১-২০৯-২ (৯১৯৩)
বৈশম্পায়ন উবাচ। ১-২০৯-৩x (১১৫৬)
ততঃ প্রয়াতাঃ কুরুপুংগবাস্তে
পুরোহিতং তং পরিয়াপ্য সর্বে।
আস্থায় যানানি মহান্তি তানি
কুন্তী চ কৃষ্ণা চ সহৈকয়ানে॥ ১-২০৯-৩ (৯১৯৪)
`স্ত্রীভিঃ সুগন্ধাম্বরমাল্যদানৈ-
র্বিভূষিতা আভরণৈর্বিচিত্রৈঃ।
মাঙ্গল্যগীতধ্বনিবাদ্যঘোষৈ-
র্মনোহরৈঃ পুণ্যকৃতাং বরিষ্ঠৈঃ॥ ১-২০৯-৪ (৯১৯৫)
সংগীয়মানাঃ প্রয়যুঃ প্রহৃষ্টা
দীপৈর্জ্বলদ্ভিঃ সহিতাশ্চ বিপ্রৈঃ॥ ১-২০৯-৫ (৯১৯৬)
স বৈ তথোক্তস্তু যুধিষ্ঠিরেণ
পাঞ্চালরাজস্য পুরোহিতোঽগ্র্যঃ।
সর্বং যথোক্তং কুরুনন্দনেন
নিবেদয়ামাস নৃপায় গৎবা॥’ ১-২০৯-৬ (৯১৯৭)
শ্রুৎবা তু বাক্যানি পুরোহিতস্য
যান্যুক্তবান্ভারত ধর্মরাজঃ।
জিজ্ঞাসয়ৈবাথ কুরূত্তমানাং
দ্রব্যাণ্যনেকান্যুপসংজহার॥ ১-২০৯-৭ (৯১৯৮)
ফলানি মাল্যানি চ সংস্কৃতানি
বর্মাণি চর্মাণি তথাঽঽসনানি।
গাশ্চৈব রাজন্নথ চৈব রজ্জূ-
র্বীজানি চান্যানি কৃষীনিমিত্তম্॥ ১-২০৯-৮ (৯১৯৯)
অন্যেষু শিল্পেষু চ যান্যপি স্যুঃ
সর্বাণি কৃত্যান্যখিলেন তত্র।
ক্রীডানিমিত্তান্যপি যানি তত্র
সর্বাণি তত্রোপজহার রাজা॥ ১-২০৯-৯ (৯২০০)
বর্মাণি চর্মাণি চ ভানুমন্তি
খড্গা মহান্তোঽশ্বরথাশ্চ চিত্রাঃ।
ধনূংষি চাগ্র্যাণি শরাশ্চ চিত্রাঃ
শক্ত্যৃষ্টয়ঃ কাঞ্চনভূষণাশ্চ॥ ১-২০৯-১০ (৯২০১)
প্রাসা ভুশুণ্ড্যশ্চ পরশ্বধাশ্চ
সাংগ্রামিকং চৈব তথৈব সর্বম্।
শয়্যাসনান্যুত্তমবস্তুবন্তি
তথৈব বাসো বিবিধং চ তত্র॥ ১-২০৯-১১ (৯২০২)
কুন্তী তু কৃষ্ণাং পরিগৃহ্য সাধ্বী-
মন্তঃপুরং দ্রুপদস্যাবিবেশ।
স্ত্রিয়শ্চ তাং কৌরবরাজপত্নীং
প্রত্যর্চয়ামাসুরদীনসৎবাঃ॥ ১-২০৯-১২ (৯২০৩)
তান্সিংহবিক্রান্তগতীন্নিরীক্ষ্য
মহর্ষভাক্ষানজিনোত্তরীয়ান্।
গূঢোত্তরাংসান্ভুজগেন্দ্রভোগ-
প্রলম্ববাহূন্পুরুষপ্রবীরান্॥ ১-২০৯-১৩ (৯২০৪)
রাজা চ রাজ্ঞঃ সচিবাশ্চ সর্বে
পুত্রাশ্চ রাজ্ঞঃ সুহৃদস্তথৈব।
প্রেষ্যাশ্চ সর্বে নিখিলেন রাজ-
ন্হর্ষং সমাপেতুরতীব তত্র॥ ১-২০৯-১৪ (৯২০৫)
তে তত্র বীরাঃ পরমাসনেষু
সপাদপীঠেষ্ববিশঙ্কমানাঃ।
যথানুপূর্ব্যাদ্বিবিশুর্নরাগ্র্যা-
স্তথা মহার্হেষু ন বিস্ময়ন্তঃ॥ ১-২০৯-১৫ (৯২০৬)
উচ্চাবচং পার্থিবভোজনীয়ং
পাত্রীষু জাম্বূনদরাজতীষু।
দাসাশ্চ দাস্যশ্চ সুমৃষ্টবেষাঃ
সংভোজকাশ্চাপ্যুপজহ্রুরন্নম্॥ ১-২০৯-১৬ (৯২০৭)
তে তত্র ভুক্ৎবা পুরুষপ্রবীরা
যথাত্মকামং সুভৃশং প্রতীতাঃ।
উৎক্রম্য সর্বাণি বসূনি রাজ-
ন্সাংগ্রামিকং তে বিবিশুর্নৃবীরাঃ॥ ১-২০৯-১৭ (৯২০৮)
তল্লক্ষয়িৎবা দ্রুপদস্য পুত্রা
রাজা চ সর্বৈঃ সহ মন্ত্রিমুখ্যৈঃ।
সমর্থয়ামাসুরুপেত্য হৃষ্টাঃ
কুন্তীসুতান্পার্থিবরাজপুত্রান্॥ ॥ ১-২০৯-১৮ (৯২০৯)

ইতি শ্রীমন্মহাভারতে আদিপর্বণি বৈবাহিকপর্বণি নবাধিকদ্বিশততমোঽধ্যায়ঃ॥ ২০৯ ॥

Mahabharata – Adi Parva – Chapter Footnotes

১-২০৯-১ জন্যার্থং বরপক্ষীয়জতার্থং॥ ১-২০৯-৩ পরিয়াপ্য প্রস্থাপ্য॥ ১-২০৯-৯ কৃন্তন্তীতি কৃত্যানি বাস্যাদীনি॥ ১-২০৯-১১ বস্তুবন্তি মতোর্মস্য বৎবমার্ষম্॥ ১-২০৯-১৩ গূঢোত্তরাংসান্গূঢজত্রূন্ গূঢোন্নতাংসান্ ইতি ঙ. পাঠঃ॥ নবাধিকদ্বিশততমোঽধ্যায়ঃ॥ ২০৯ ॥