আদিপর্ব – অধ্যায় ২০৪
॥ শ্রীঃ ॥
১.২০৪. অধ্যায়ঃ ২০৪
Mahabharata – Adi Parva – Chapter Topics
ক্রোধাদ্রাজসু দ্রুপদহননার্থমাগতেষু রাজসংমুখে ভীমার্জুনয়োঃ সজ্জীভূয় স্থিতয়োঃ সতোঃ কৃষ্ণবলরাময়োঃ সংবাদঃ॥ ১ ॥
Mahabharata – Adi Parva – Chapter Text
১-২০৪-০ (৯০১৪)
বৈশম্পায়ন উবাচ। ১-২০৪-০x (১১৩৮)
তস্মৈ দিৎসতি কন্যাং তু ব্রাহ্মণায় তদা নৃপে।
কোপ আসীন্মহীপানামালোক্যান্যোন্যমন্তিকাৎ॥ ১-২০৪-১ (৯০১৫)
`ঊচুঃ সর্বে সমাগম্য পরস্পরহিতৈষিণঃ।
বয়ং সর্বে সমাহূতা দ্রুপদেন দুরাত্মনা।
সংহত্য চাভ্যগচ্ছাম স্বয়ংবরদিদৃক্ষয়া॥’ ১-২০৪-২ (৯০১৬)
অস্মানয়মতিক্রম্য তৃণীকৃত্য চ সংগতান্।
দাতুমিচ্ছতি বিপ্রায় দ্রৌপদীং যোষিতাং বরাম্॥ ১-২০৪-৩ (৯০১৭)
অবরোপ্যেহ বৃক্ষস্তু ফলকালে নিপাত্যতে।
নিহন্মৈনং দুরাত্মানং যোয়মস্মান্ন মন্যতে॥ ১-২০৪-৪ (৯০১৮)
ন হ্যর্হত্যেষ সংমানং নাপি বৃদ্ধক্রমং গুণৈঃ।
হন্মৈনং সহ পুত্রেণ দুরাচারং নৃপদ্বিষম্॥ ১-২০৪-৫ (৯০১৯)
অয়ং হি সর্বানাহূয় সৎকৃত্য চ নরাধিপান্।
গুণবদ্ভোজয়িৎবান্নং ততঃ পশ্চান্ন মন্যতে॥ ১-২০৪-৬ (৯০২০)
অস্মিন্রাজসমবায়ে দেবানামিব সন্নয়ে।
কিময়ং সদৃশং কংচিন্নৃপতিং নৈব দৃষ্টবান্॥ ১-২০৪-৭ (৯০২১)
ন চ বিপ্রেষ্বধীকারো বিদ্যতে বরণং প্রতি।
স্বয়ংবরঃ ক্ষত্রিয়াণামিতীয়ং প্রথিতা শ্রুতিঃ॥ ১-২০৪-৮ (৯০২২)
অথবা যদি কন্যেয়ং ন চ কংচিদ্বুভূষতি।
অগ্নাবেনাং পরিক্ষিপ্য যাম রাষ্ট্রাণি পার্থিবাঃ॥ ১-২০৪-৯ (৯০২৩)
ব্রাহ্মণো যদি চাপল্যাল্লোভাদ্বা কৃতবানিদম্।
বিপ্রিয়ং পার্থিবেন্দ্রাণাং নৈষ বধ্যঃ কথংচন॥ ১-২০৪-১০ (৯০২৪)
ব্রাহ্মণার্থং হি নো রাজ্যং জীবিতং হি বসূনি চ।
পুত্রপৌত্রং চ যচ্চান্যদস্মাকং বিদ্যতে ধনম্॥ ১-২০৪-১১ (৯০২৫)
অবমানভয়াচ্চৈব স্বধর্মস্য চ রক্ষণাৎ।
স্বয়ংবরাণামন্যেষাং মা ভূদেবংবিধা গতিঃ॥ ১-২০৪-১২ (৯০২৬)
ইত্যুক্ৎবা রাজশার্দূলা রুষ্টাঃ পরিঘবাহবঃ।
দ্রুপদং তু জিঘাংসন্তঃ সায়ুধাঃ সমুপাদ্রবন্॥ ১-২০৪-১৩ (৯০২৭)
তান্গৃহীতশরাবাপান্ক্রুদ্ধানাপততো বহূন্।
দ্রুপদো বীক্ষ্য সংগ্রাসাদ্ব্রাহ্মণাঞ্ছরণং গতঃ॥ ১-২০৪-১৪ (৯০২৮)
`ন ভয়ান্নাপি কার্পণ্যান্ন প্রাণপরিরক্ষণাৎ।
জগাম দ্রুপদো বিপ্রাঞ্শমার্থী প্রত্যপদ্যত॥’ ১-২০৪-১৫ (৯০২৯)
বেগেনাপততস্তাংস্তু প্রভিন্নানিব বারণান্।
পাণ্ডুপুত্রৌ মহেষ্বাসৌ প্রতিয়াতাবরিন্দমৌ॥ ১-২০৪-১৬ (৯০৩০)
ততঃ সমুৎপেতুরুদায়ুধাস্তে
মহীক্ষিতো বদ্ধগোধাঙ্গুলিত্রাঃ।
জিঘাংসমানাঃ কুরুরাজপুত্রা-
বমর্ষয়ন্তোঽর্জুনভীমসেনৌ॥ ১-২০৪-১৭ (৯০৩১)
ততস্তু ভীমোঽদ্ভুতভীমকর্মা
মহাবলো বজ্রসমানসারঃ।
উৎপাট্য দোর্ভ্যাং দ্রুমমেকবীরো
নিষ্পত্রয়ামাস যথা গজেন্দ্রঃ॥ ১-২০৪-১৮ (৯০৩২)
তং বৃক্ষমাদায় রিপুপ্রমাথী
দণ্ডীব দণ্ডং পিতৃরাজ উগ্রম্।
তস্থৌ সমীপে পুরুষর্ষভস্য
পার্থস্য পার্থঃ পৃথুদীর্ঘবাহুঃ॥ ১-২০৪-১৯ (৯০৩৩)
তৎপ্রেক্ষ্য কর্মাতিমনুষ্যবুদ্ধি-
র্জিষ্ণুঃ স হি ভ্রাতুরচিন্ত্যকর্মা।
বিসিষ্মিয়ে চাপি ভয়ং বিহায়
তস্থৌ ধনুর্গৃহ্য মহেন্দ্রকর্মা॥ ১-২০৪-২০ (৯০৩৪)
তৎপ্রেক্ষ্য কর্মাতিমনুষ্যবুদ্ধি-
র্জিষ্ণোঃ সহভ্রাতুরচিন্ত্যকর্মা।
দামোদরো ভ্রাতরমুগ্রবীর্যং
হলায়ুধং বাক্যমিদং বভাষে॥ ১-২০৪-২১ (৯০৩৫)
য এষ সিংহর্ষভখেলগামী
মদদ্ধনুঃ কর্ষতি তালমাত্রম্।
এষোঽর্জুনো নাত্র বিচার্যমস্তি
যদ্যস্মি সংকর্ষণ বাসুদেবঃ॥ ১-২০৪-২২ (৯০৩৬)
যস্ৎবেষ বৃক্ষং তরসাঽবভজ্য
রাজ্ঞাং নিকারে সহসা প্রবৃত্তঃ।
বৃকোদরান্নান্য ইহৈতদদ্য
কর্তুং সমর্থঃ সমরে পৃথিব্যাম্॥ ১-২০৪-২৩ (৯০৩৭)
যোঽসৌ পুরস্তাৎকমলায়তাক্ষো
মহাতনুঃ সিংহগতির্বিনীতঃ।
গৌরঃ প্রলম্বোজ্জ্বলচারুঘোণো
বিনিঃসৃতঃ সোঽপ্যুত ধর্মপুত্রঃ॥ ১-২০৪-২৪ (৯০৩৮)
যৌ তৌ কুমারাবিব কার্তিকেয়ৌ
দ্বাবাশ্বিনেয়াবিতি মে বিতর্কঃ।
মুক্তা হি তস্মাজ্জতুবেশ্মদাহা-
ন্ময়া শ্রুতাঃ পাণ্ডুসুতাঃ পৃথা চ॥ ১-২০৪-২৫ (৯০৩৯)
বৈশম্পায়ন উবাচ। ১-২০৪-২৬x (১১৩৯)
তমব্রবীন্নির্জলতোয়দাভো
হলায়ুধোঽনন্তরজং প্রতীতঃ।
প্রীতোঽস্মি দৃষ্ট্বা হি পিতৃষ্বসারং
পৃথাং বিমুক্তাং সহ কৌরবাগ্র্যৈঃ॥ ॥ ১-২০৪-২৬ (৯০৪০)
ইতি শ্রীমন্মহাভারতে আদিপর্বণি স্বয়ংবরপর্বণি চতুরধিকদ্বিশততমোঽধ্যায়ঃ॥ ২০৪ ॥