আদিপর্ব – অধ্যায় ১৭৬

আদিপর্ব – অধ্যায় ১৭৬

॥ শ্রীঃ ॥

১.১৭৬. অধ্যায়ঃ ১৭৬

Mahabharata – Adi Parva – Chapter Topics

ভিক্ষাটনার্থং গতানাং যুধিষ্ঠিরাদীনাং গৃহং প্রত্যাগমনম্॥ ১ ॥ ভীমো বকং প্রতি প্রেষ্যত ইতি জ্ঞাতবতো যুধিষ্ঠিরস্য সংতাপঃ॥ ২ ॥ ভীমসেনপ্রভাবকথনেন কুন্ত্যা কৃতং যুধিষ্ঠিরাশ্বাসনম্॥ ৩ ॥

Mahabharata – Adi Parva – Chapter Text

১-১৭৬-০ (৭৯৫৬)
বৈশম্পায়ন উবাচ। ১-১৭৬-০x (১০১৭)
করিষ্য ইতি ভীমেন প্রতিজ্ঞাতেঽথ ভারত।
আজগ্মুস্তে ততঃ সর্বে ভৈক্ষমাদায় পাণ্ডবাঃ॥ ১-১৭৬-১ (৭৯৫৭)
`ভীমসেনং ততো দৃষ্ট্বা আপূর্ণবদনং তথা।
বুবোধ ধর্মরাজস্তু হৃষিতং ভীমমচ্যুতম্॥ ১-১৭৬-২ (৭৯৫৮)
তোষস্য কারণং যত্তু মনসাঽচিন্তয়দ্গুরুঃ।
স সমীক্ষ্য তদা রাজন্যোদ্ধুকামং যুধিষ্ঠিরঃ॥’ ১-১৭৬-৩ (৭৯৫৯)
আকারেণৈব তং জ্ঞাৎবা পাণ্ডুপুত্রো যুধিষ্ঠিরঃ।
রহঃ সমুপবিশ্যৈকস্ততঃ পপ্রচ্ছ মাতরম্॥ ১-১৭৬-৪ (৭৯৬০)
কিং চিকীর্ষত্যযং কর্ম ভীমো ভমপরাক্রমঃ।
ভবত্যনুমতে কচ্চিৎস্বয়ং বা কর্তুমিচ্ছতি॥ ১-১৭৬-৫ (৭৯৬১)
কুন্ত্যুবাচ। ১-১৭৬-৬x (১০১৮)
মমৈব বচনাদেষ করিষ্যতি পরন্তপঃ।
ব্রাহ্মণার্থে মহৎকৃত্যং মোক্ষায় নগরস্য চ॥ ১-১৭৬-৬ (৭৯৬২)
`বকায় কল্পিতং পুত্র মহান্তং বলিমুত্তমম্।
ভীমো ভুনক্তু সুস্পষ্টমপ্যেকাহং তপঃসুতঃ॥’ ১-১৭৬-৭ (৭৯৬৩)
যুধিষ্ঠির উবাচ। ১-১৭৬-৮x (১০১৯)
কিমিদং সাহসং তীক্ষ্ণং ভবত্যা দুষ্করং কৃতম্।
পরিত্যাগং হি পুত্রস্য ন প্রশংসন্তি সাধবঃ॥ ১-১৭৬-৮ (৭৯৬৪)
কথং পরসুতস্যার্থে স্বসুতং ত্যক্তুমিচ্ছসি।
লোকবেদবিরুদ্ধং হি পুত্রত্যাগাৎকৃতং ৎবয়া॥ ১-১৭৬-৯ (৭৯৬৫)
যস্য বাহূ সমাশ্রিত্য সুখং সর্বে শয়ামহে।
রাজ্যং চাপহৃতং ক্ষুদ্রৈরাজিহীর্ষামহে পুনঃ॥ ১-১৭৬-১০ (৭৯৬৬)
যস্য দুর্যোধনো বীর্যং চিন্তয়ন্নমিতৌজসঃ।
ন শেতে রজনীঃ সর্বা দুঃখাচ্ছকুনিনা সহ॥ ১-১৭৬-১১ (৭৯৬৭)
যস্য বীরস্য বীর্যেণ মুক্তা জতুগৃহাদ্বয়ম্।
অন্যেভ্যশ্চৈব পাপেভ্যো নিহতশ্চ পুরোচনঃ॥ ১-১৭৬-১২ (৭৯৬৮)
যস্য বীর্যং সমাশ্রিত্য বসুপূর্ণাং বসুন্ধরাম্।
ইমাং মন্যামহে প্রাপ্তাং নিহত্য ধৃতরাষ্ট্রজান্॥ ১-১৭৬-১৩ (৭৯৬৯)
তস্য ব্যবসিতস্ত্যাগো বুদ্ধিমাস্থায় কাং ৎবয়া।
কচ্চিন্নু দুঃখৈর্বুদ্ধিস্তে বিলুপ্তা গতচেতসঃ॥ ১-১৭৬-১৪ (৭৯৭০)
কুন্ত্যুবাচ। ১-১৭৬-১৫x (১০২০)
যুধিষ্ঠির ন সংতাপস্ৎবয়া কার্যো বৃকোদরে।
ন চায়ং বুদ্ধিদৌর্বল্যাদ্ব্যবসায়ঃ কৃতো ময়া॥ ১-১৭৬-১৫ (৭৯৭১)
`ন চ শোকেন বুদ্ধিঃ সা বিলুপ্তা গতচেকসঃ।’
ইহ বিপ্রস্য ভবনে বয়ং পুত্র সুখোষিতাঃ।
অজ্ঞাতা ধার্তরাষ্ট্রাণাং সৎকৃতা বীতমন্যবঃ॥ ১-১৭৬-১৬ (৭৯৭২)
তস্য প্রতিক্রিয়া পার্থ ময়েয়ং প্রসমীক্ষিতা।
এতাবানেব পুরুষঃ কৃতং যস্মিন্ন নশ্যতি॥ ১-১৭৬-১৭ (৭৯৭৩)
যাবচ্চ কুর্যাদন্যোঽস্য কুর্যাদ্বহুগুমং ততঃ।
`ব্রাহ্মণার্থে মহান্ধর্মো জানামীত্থং বৃকোদরে॥’ ১-১৭৬-১৮ (৭৯৭৪)
দৃষ্ট্বা ভীমস্য বিক্রান্তং তদা জতুগৃহে মহৎ।
হিডিম্বস্য বধাচ্চৈবং বিশ্বাসো মে বৃকোদরে॥ ১-১৭৬-১৯ (৭৯৭৫)
বাহ্বোর্বলং হি ভীমস্য নাগায়ুতসমং মহৎ।
যেন যূয়ং গজপ্রখ্যা নির্ব্যূঢা বারণাবতাৎ॥ ১-১৭৬-২০ (৭৯৭৬)
বৃকোদরেণ সদৃশো বলেনান্যো ন বিদ্যতে।
যো ব্যতীয়াদ্যুধি শ্রেষ্ঠমপি বজ্রধরং স্বয়ম্॥ ১-১৭৬-২১ (৭৯৭৭)
জাতমাত্রঃ পুরা চৈব মমাঙ্কাৎপতিতো গিরৌ।
শরীরগৌরবাদস্য শিলা গাত্রৈর্বিচূর্ণিতা॥ ১-১৭৬-২২ (৭৯৭৮)
তদহং প্রজ্ঞয়া জ্ঞাৎবা বলং ভীমস্য পাণ্ডব।
প্রতিকার্যে চ বিপ্রস্য ততঃ কৃতবতী মতিম্॥ ১-১৭৬-২৩ (৭৯৭৯)
নেদং লোভান্ন চাজ্ঞানান্ন চ মোহাদ্বিনিশ্চিতম্।
বুদ্ধিপূর্বং তু ধর্মস্য ব্যবসায়ঃ কৃতো ময়া॥ ১-১৭৬-২৪ (৭৯৮০)
অর্থৌ দ্বাবপি নিষ্পন্নৌ যুধিষ্ঠির ভবিষ্যতঃ।
প্রতীকারশ্চ বাসস্য ধর্মশ্চ চরিতো মহান্॥ ১-১৭৬-২৫ (৭৯৮১)
যো ব্রাহ্মণস্য সাহায়্যং কুর্যাদর্থেষু কর্হিচিৎ।
ক্ষত্রিয়ঃ স শুভাঁল্লোকানাপ্নুয়াদিতি মে মতিঃ॥ ১-১৭৬-২৬ (৭৯৮২)
ক্ষত্রিয়স্যৈব কুর্বাণঃ ক্ষত্রিয়ো বধমোক্ষণম্।
বিপুলাং কীর্তিমাপ্নোতি লোকেঽস্মিংশ্চ পরত্র চ॥ ১-১৭৬-২৭ (৭৯৮৩)
বৈশ্যস্যার্থে চ সাহায়্যং কুর্বাণঃ ক্ষত্রিয়ো ভুবি।
স সর্বেষ্বপি লোকেষু প্রজা রঞ্জয়তে ধ্রুবম্॥ ১-১৭৬-২৮ (৭৯৮৪)
শূদ্রং তু মোচয়েদ্রাজা শরণার্থিনমাগতম্।
প্রাপ্নোতীহ কুলে জন্ম সদ্দ্রব্যে রাজপূজিতে॥ ১-১৭৬-২৯ (৭৯৮৫)
এবং মাং ভগবান্ব্যাসঃ পুরা পৌরবনন্দন।
প্রোবাচাসুকরপ্রজ্ঞস্তস্মাদেবং চিকীর্ষিতম্॥ ॥ ১-১৭৬-৩০ (৭৯৮৬)

ইতি শ্রীমন্মহাভারতে আদিপর্বণি বকবধপর্বণি ষট্সপ্তত্যধিকশততমোঽধ্যায়ঃ॥ ১৭৬ ॥

Mahabharata – Adi Parva – Chapter Footnotes

১-১৭৬-৬ মোক্ষায় বকভয়াদিতি শেষঃ॥ ১-১৭৬-২৫ প্রতীকারঃ প্রত্যুপকারঃ॥ ষট্সপ্তত্যধিকশততমোঽধ্যায়ঃ॥ ১৭৬ ॥