আদিপর্ব – অধ্যায় ১৭২

আদিপর্ব – অধ্যায় ১৭২

॥ শ্রীঃ ॥

১.১৭২. অধ্যায়ঃ ১৭২

Mahabharata – Adi Parva – Chapter Topics

ব্রাহ্মণ প্রতি তৎপত্নীবাক্যম্॥ ১ ॥

Mahabharata – Adi Parva – Chapter Text

১-১৭২-০ (৭৮২৫)
ব্রাহ্মণ্যুবাচ। ১-১৭২-০x (১০০৬)
ন সন্তাপস্ৎবয়া কার্যঃ প্রাকৃতেনেব কর্হিচিৎ।
ন হি সন্তাপকালোঽয়ং বৈদ্যস্য তব বিদ্যতে॥ ১-১৭২-১ (৭৮২৬)
অবশ্যং নিধনং সর্বৈর্গন্তব্যমিহ মানবৈঃ।
অবশ্যভাবিন্যর্থে বৈ সংতাপো নেহ বিদ্যতে॥ ১-১৭২-২ (৭৮২৭)
ভার্যা পুত্রোঽথ দুহিতা সর্বমাত্মার্থমিষ্যতে।
ব্যথাং জহি সুবুদ্ধ্যা ৎবং স্বয়ং যাস্যামি তত্র চ॥ ১-১৭২-৩ (৭৮২৮)
এতদ্ধি পরমং নার্যাঃ কার্যং লোকে সনাতনম্।
প্রাণানপি পরিত্যজ্য যদ্ভর্তুর্হিতমাচরেৎ॥ ১-১৭২-৪ (৭৮২৯)
তচ্চ তত্র কৃতং কর্ম তবাপীদং সুখাবহম্।
ভবত্যমুত্র চাক্ষয়্যং লোকেঽস্মিংশ্চ যশস্করম্॥ ১-১৭২-৫ (৭৮৩০)
এষ চৈব গুরুর্ধর্মো যং প্রবক্ষ্যাম্যহং তব।
অর্থশ্চ তব ধর্মশ্চ ভূয়ানত্র প্রদৃশ্যতে॥ ১-১৭২-৬ (৭৮৩১)
যদর্থমিষ্যতে ভার্যা প্রাপ্তঃ সোঽর্থস্ৎবয়া ময়ি।
কন্যা চৈকা কুমারশ্চ কৃতাহমনৃণা ৎবয়া॥ ১-১৭২-৭ (৭৮৩২)
সমর্থঃ পোষণে চাসি সুতয়ো রক্ষণে তথা।
ন ৎবহং সুতয়োঃ শক্তা তথা রক্ষণপোষণে॥ ১-১৭২-৮ (৭৮৩৩)
মম হি ৎবদ্বিহীনায়াঃ সর্বপ্রাণধনেশ্বর।
কথং স্যাতাং সুতৌ বালৌ ভরেয়ং চ কথং ৎবহম্॥ ১-১৭২-৯ (৭৮৩৪)
কথং হি বিধবাঽনাথা বালপুত্রা বিনা ৎবয়া।
মিথুনং জীবয়িষ্যামি স্থিতা সাধুগতে পথি॥ ১-১৭২-১০ (৭৮৩৫)
অহং কৃতাবলেপৈশ্চ প্রার্থ্যমানামিমাং সুতাম্।
অয়ুক্তৈস্তব সংবন্ধে কথং শক্ষ্যামি রক্ষিতুম্॥ ১-১৭২-১১ (৭৮৩৬)
উৎসৃষ্টমামিষং ভূমৌ প্রার্থয়ন্তি যথা খগাঃ।
প্রার্থয়ন্তি জনাঃ সর্বে পতিহীনাং তথা স্ত্রিয়ম্॥ ১-১৭২-১২ (৭৮৩৭)
সাঽহং বিচাল্যমানা বৈ প্রার্থ্যমানা দুরাত্মভিঃ।
স্থাতুং পথি ন শক্ষ্যামি সজ্জনেষ্টে দ্বিজোত্তম॥ ১-১৭২-১৩ (৭৮৩৮)
`স্ত্রীজন্ম গর্হিতং নাথ লোকে দুষ্টজনাকুলে।
মাতাপিত্রোর্বশে কন্যা প্রৌঢা ভর্তৃবশে তথা॥ ১-১৭২-১৪ (৭৮৩৯)
অভাবে চানয়োঃ পুত্রে খতন্ত্রা স্ত্রী বিগর্হিতা॥ ১-১৭২-১৫ (৭৮৪০)
অনাথৎবং স্ত্রিয়ো দ্বারং দুষ্টানাং বিবৃতং হি তৎ।
বস্ত্রখণ্ডং ঘৃতাক্তং হি যথা সংকৃষ্যতে শ্বভিঃ॥’ ১-১৭২-১৬ (৭৮৪১)
কথং তব কুলস্যৈকমিমং বালমনাগসম্।
পিতৃপৈতামহে মার্গে নিয়োক্তুমহমুৎসহে॥ ১-১৭২-১৭ (৭৮৪২)
কথং শক্ষ্যামি বালেঽস্মিন্গুণানাধাতুমীপ্সিতান্।
অনাথে সর্বতো লুপ্তে যথা ৎবং ধর্মদর্শিবান্॥ ১-১৭২-১৮ (৭৮৪৩)
ইমামপি চ তে বালামনাথাং পরিভূয় মাম্।
অনর্হাঃ প্রার্থয়িষ্যন্তি শূদ্রা বেদশ্রুতিং যথা॥ ১-১৭২-১৯ (৭৮৪৪)
তাং চেদহং ন দিৎসেয়ং সদ্গুণৈরুপবৃংহিতাম্।
প্রমথ্যৈনাং হরেয়ুস্তে হবির্ধ্বাঙ্ক্ষা ইবাধ্বরাৎ॥ ১-১৭২-২০ (৭৮৪৫)
সংপ্রেক্ষমাণা পুত্রীং তে নানুরূপমিবাত্মনঃ।
অনর্হবশমাপন্নামিমাং চাপি সুতাং তব॥ ১-১৭২-২১ (৭৮৪৬)
অবজ্ঞাতা চ লোকেষু তথান্মানমজানতী।
অবলিপ্তৈরৈর্ব্রহ্মন্মরিষ্যামি ন সংশয়ঃ॥ ১-১৭২-২২ (৭৮৪৭)
তৌ চ হীনৌ ময়া বালৌ ৎবয়া চৈব তথাত্মজৌ।
বিনশ্যেতাং ন সন্দেহো মৎস্যাবিব জলক্ষয়ে॥ ১-১৭২-২৩ (৭৮৪৮)
ত্রিতয়ং সর্বথাপ্যেবং বিনশিষ্যত্যসংশয়ম্।
ৎবয়া বিহীনং তস্মাত্ৎবং মাং পরিত্যক্তুমর্হসি॥ ১-১৭২-২৪ (৭৮৪৯)
ব্যুষ্টিরেষা পরা স্ত্রীণাং পূর্বং ভর্তুঃ পরা গতিঃ।
ননু ব্রহ্মন্সপুত্রাণামিতি ধর্মবিদো বিদুঃ॥ ১-১৭২-২৫ (৭৮৫০)
`অনিষ্টমিহ পুত্রাণাং বিষয়ে পরিবর্তিতুম্।
হরিদ্রাঞ্জনপুষ্পাদিসৌমঙ্গল্যযুতা সতী॥ ১-১৭২-২৬ (৭৮৫১)
মরণং যাতি যা ভর্তুস্তদ্দত্তজলপায়িনী।
ভর্তৃপাদার্পিতমনাঃ সা যাতি গিরিজাপদম্॥ ১-১৭২-২৭ (৭৮৫২)
গিরাজায়াঃ সখী ভূৎবা মোদতে নগকন্যযা।
মিতং দদাতি হি পিতা মিতং মাতা মিতং সুতঃ॥ ১-১৭২-২৮ (৭৮৫৩)
অমিতস্য হি দাতারং কা পতিং নাভিনন্দতি।
আশ্রমাশ্চাগ্নিসংস্কারা জপহোমব্রতানি চ॥ ১-১৭২-২৯ (৭৮৫৪)
স্ত্রীণাং নৈতে বিধাতব্যা বিনা পতিমনিন্দিতম্।
ক্ষমা শৌচমনাহারমেতাবদ্বিহিতং স্ত্রিয়াঃ॥’ ১-১৭২-৩০ (৭৮৫৫)
পরিত্যক্তঃ সুতশ্চায়ং দুহিতেয়ং তথা ময়া।
বান্ধবাশ্চ পরিত্যক্তাস্ৎবদর্থং জীবিতং চ মে॥ ১-১৭২-৩১ (৭৮৫৬)
যজ্ঞৈস্তপোভির্নিয়মৈর্দানৈশ্চ বিবিধৈস্তথা।
বিশিষ্যতে স্ত্রিয়া ভর্তুর্নিত্যং প্রিয়হিতে স্থিতিঃ॥ ১-১৭২-৩২ (৭৮৫৭)
তদিদং যচ্চিকীর্ষামি ধর্মং পরমসংমতম্।
ইষ্টং চৈব হিতং চৈব তব চৈব কুলস্য চ॥ ১-১৭২-৩৩ (৭৮৫৮)
ইষ্টানি চাপ্যপত্যানি দ্রব্যাণি সুহৃদঃ প্রিয়াঃ।
আপদ্ধর্মপ্রমোক্ষায় ভার্যা চাপি সতাং মতম্॥ ১-১৭২-৩৪ (৭৮৫৯)
আপদর্থে ধনং রক্ষেদ্দারান্রক্ষেদ্ধনৈরপি।
আত্মানং সততং রক্ষেদ্দারৈরপি ধনৈরপি॥ ১-১৭২-৩৫ (৭৮৬০)
দৃষ্টাদৃষ্টফলার্থং হি ভার্যা পুত্রো ধনং গৃহম্।
সর্বমেতদ্বিধাতব্যং বুধানামেষ নিশ্চয়ঃ॥ ১-১৭২-৩৬ (৭৮৬১)
একতো বা কুলং কৃৎস্নমাত্মা বা কুলবর্ধনঃ।
`উভয়োঃ কোধিকো বিদ্বন্নাত্মা চৈবাধিকঃ কুলাৎ॥ ১-১৭২-৩৭ (৭৮৬২)
আত্মনো বিদ্যমানৎবাদ্ভুবনানি চতুর্দশ।
বিদ্যন্তে দ্বিজশার্দূল আতমা রক্ষ্যস্ততস্ৎবয়া॥ ১-১৭২-৩৮ (৭৮৬৩)
আত্মন্যবিদ্যমানে চেদস্য নাস্তীহ কিংচন।
এতজ্জগদিদং সর্বমাত্মনা ন সমং কিল॥’ ১-১৭২-৩৯ (৭৮৬৪)
স কুরুষ্ব ময়া কার্যং তারয়াত্মানমাত্মনা।
অনুজানীহী মামার্য সুতৌ মে পরিপালয়॥ ১-১৭২-৪০ (৭৮৬৫)
অবধ্যাঃ স্ত্রিয় ইত্যাহুর্ধর্মজ্ঞা ধর্মনিশ্চয়ে।
ধর্মজ্ঞান্রাক্ষসানাহুর্ন হন্যাৎস চ মামপি॥ ১-১৭২-৪১ (৭৮৬৬)
নিঃসংশয়ং বধঃ পুংসাং স্ত্রীণাং সংশয়িতো বধঃ।
অতো মামেব ধর্মজ্ঞ প্রস্থাপয়িতুমর্হসি॥ ১-১৭২-৪২ (৭৮৬৭)
ভুক্তং প্রিয়াণ্যবাপ্তানি ধর্মশ্চ চরিতো ময়া।
`ৎবচ্ছুশ্রূষণসংভূতা কীর্তিশ্চাপ্যতুলা মম।’
ৎবৎপ্রসূতিঃ প্রিয়া প্রাপ্তা ন মাং তপ্স্যত্যজীবিতং॥ ১-১৭২-৪৩ (৭৮৬৮)
জাতপুত্রা চ বৃদ্ধা চ প্রিয়কামা চ তে সদা।
সমীক্ষ্যৈতদহং সর্বং ব্যবসায়ং করোম্যতঃ॥ ১-১৭২-৪৪ (৭৮৬৯)
উৎসৃজ্যাপি হি মামার্য প্রাপ্স্যস্যন্যামপি স্ত্রিয়ম্।
ততঃ প্রতিষ্ঠিতো ধর্মো ভবিষ্যতি পুনস্তব॥ ১-১৭২-৪৫ (৭৮৭০)
ন চাপ্যধর্মঃ কল্যাণ বহুপত্নীকতা নৃণাম্।
স্ত্রীণামধর্মঃ সুমহান্ভর্তুঃ পূর্বস্য লঙ্ঘনে॥ ১-১৭২-৪৬ (৭৮৭১)
এতৎসর্বং সমীক্ষ্য ৎবমাত্মত্যাগং চ গর্হিতম্।
আত্মানং তারয়াদ্যাশু কুলং চেমৌ চ দারকৌ॥ ১-১৭২-৪৭ (৭৮৭২)
বৈশম্পায়ন উবাচ। ১-১৭২-৪৮x (১০০৭)
এবমুক্তস্তয়া ভর্তা তাং সমালিঙ্গ্য ভারত।
মুমোচ বাষ্পং শনকৈঃ সভার্যো ভৃশদুঃখিতঃ॥ ১-১৭২-৪৮ (৭৮৭৩)
`মৈবং বদ ৎবং কল্যাণি তিষ্ঠ চেহ সুমধ্যমে।
ন তু ভার্যাং ত্যজেৎপ্রাজ্ঞঃ পুত্রান্বাপি কদাচন॥ ১-১৭২-৪৯ (৭৮৭৪)
বিশেষতঃ স্ত্রিয়ং রক্ষেৎপুরুষো বুদ্ধিমানিহ।
ত্যক্ৎবা তু পুরুষো জীবেন্ন হাতব্যানিমান্সদা।
ন বেত্তি কামং ধর্মং চ অর্থং মোক্ষং চ তত্ৎবতঃ॥’ ॥ ১-১৭২-৫০ (৭৮৭৫)

ইতি শ্রীমন্মহাভারতে আদিপর্বণি বকবধপর্বণি দ্বিসপ্তত্যধিকশততমোঽধ্যায়ঃ॥ ১৭২ ॥

Mahabharata – Adi Parva – Chapter Footnotes

১-১৭২-১ বৈদ্যস্য বিদ্যাবনঃ॥ ১-১৭২-২৫ পরা ব্যুষ্টির্মহদ্ভাগ্যম্॥ ১-১৭২-৪৩ ৎবৎ ৎবত্তঃ প্রসূতিঃ সংততিঃ। অজীবিতম্ মরণং॥ দ্বিসপ্তত্যধিকশততমোঽধ্যায়ঃ॥ ১৭২ ॥