আদিপর্ব – অধ্যায় ১৬৫
॥ শ্রীঃ ॥
১.১৬৫. অধ্যায়ঃ ১৬৫
Mahabharata – Adi Parva – Chapter Topics
পাণ্ডবান্প্রতি প্রেষিতয়া হিডিম্বয়া বিলম্বিতে হিডিম্বস্য তত্রাগমনম্॥ ১ ॥ ভীমহিডিম্বয়োর্যুদ্ধম্॥ ২ ॥ কুন্ত্যাদীনাং প্রবোধঃ॥ ৩ ॥
Mahabharata – Adi Parva – Chapter Text
১-১৬৫-০ (৭৫১৪)
বৈশম্পায়ন উবাচ। ১-১৬৫-০x (৯৬১)
তাং বিদিৎবা চিরগতাং হিডিম্বো রাক্ষসেশ্বরঃ।
অবতীর্য দ্রুমাত্তস্মাদাজগামাশু পাণ্ডবান্॥ ১-১৬৫-১ (৭৫১৫)
লোহিতাক্ষো মহাবাহুরূর্ধ্বকেশো মহাননঃ।
মেঘসঙ্ঘাতবর্ষ্মা চ তীক্ষ্ণদংষ্ট্রো ভয়ানকঃ॥ ১-১৬৫-২ (৭৫১৬)
তলং তলেন সংহত্য বাহূ বিক্ষিপ্য চাসকৃৎ।
উদ্বৃত্তনেত্রঃ সংক্রুদ্ধো দন্তান্দন্তেষু নিষ্কুষন্॥ ১-১৬৫-৩ (৭৫১৭)
কোঽদ্য মে ভোক্তুকামস্য বিঘ্নং চরতি দুর্মতিঃ।
ন বিভেতি হিডিম্বী চ প্রেষিতা কিমনাগতা॥ ১-১৬৫-৪ (৭৫১৮)
বৈশম্পায়ন উবাচ। ১-১৬৫-৫x (৯৬২)
তমাপতন্তং দৃষ্ট্বৈ তথা বিকৃতদর্শনম্।
হিডিম্বোবাচ বিত্রস্তা ভীমসেনমিদং বচঃ॥ ১-১৬৫-৫ (৭৫১৯)
আপতত্যেষ দুষ্টাত্মা সংক্রুদ্ধঃ পুরুষাদকঃ।
সাঽহং ৎবাং ভ্রাতৃভিঃ সার্ধং যদ্ব্রবীমি তথা কুরু॥ ১-১৬৫-৬ (৭৫২০)
অহং কামগমা বীর রক্ষোবলসমন্বিতা।
আরুহেমাং মম শ্রোণিং নেষ্যামি ৎবাং বিহায়সা॥ ১-১৬৫-৭ (৭৫২১)
প্রবোধয়ৈতান্সংসুপ্তান্মাতরং চ পরন্তপ।
সর্বানেব গমিষ্যাভি গৃহীৎবা বো বিহায়সা॥ ১-১৬৫-৮ (৭৫২২)
ভীম উবাচ। ১-১৬৫-৯x (৯৬৩)
মা ভৈস্ৎবং পৃথুসুশ্রোণি নৈষ কশ্চিন্ময়ি স্থিতে।
অহমেনং হনিষ্যামি পশ্যন্ত্যাস্তে সুমধ্যমে॥ ১-১৬৫-৯ (৭৫২৩)
নায়ং প্রতিবলো ভীরু রাক্ষসাপসদো মম।
সোঢুং যুধি পরিস্পন্দমথবা সর্বরাক্ষসাঃ॥ ১-১৬৫-১০ (৭৫২৪)
পশ্য বাহূ সুবৃত্তৌ মে হস্তিহস্তনিভাবিমৌ।
ঊরূ পরিঘসঙ্কাশৌ সংহতং চাপ্যুরো মহৎ॥ ১-১৬৫-১১ (৭৫২৫)
বিক্রমং মে যথেন্দ্রস্য সাঽদ্য দ্রক্ষ্যসি শোভনে।
মাঽবমংস্থাঃ পৃথুশ্রোণি মৎবা মামিহ মানুষম্॥ ১-১৬৫-১২ (৭৫২৬)
হিডিম্বোবাচ। ১-১৬৫-১৩x (৯৬৪)
নাবমন্যে নরব্যাঘ্র ৎবামহং দেবরূপিণম্।
দৃষ্টপ্রভাবস্তু ময়া মানুষেষ্বেব রাক্ষসঃ॥ ১-১৬৫-১৩ (৭৫২৭)
বৈশম্পায়ন উবাচ। ১-১৬৫-১৪x (৯৬৫)
তথা সংজল্পতস্তস্য ভীমসেনস্য ভারত।
বাচঃ শুশ্রাব তাঃ ক্রুদ্ধো রাক্ষসঃ পুরুষাদকঃ॥ ১-১৬৫-১৪ (৭৫২৮)
অবেক্ষমাণস্তস্যাশ্চ হিডিম্বো মানুষং বপুঃ।
স্রগ্দামপূরিতশিখাং সমগ্রেন্দুনিভাননাম্॥ ১-১৬৫-১৫ (৭৫২৯)
সুভ্রূনাসাক্ষিকেশান্তাং সুকুমারনখৎবচম্।
সর্বাভরণসংয়ুক্তাং সুসূক্ষ্মাম্বরধারিণীম্॥ ১-১৬৫-১৬ (৭৫৩০)
তাং তথা মানুষং রূপং বিভ্রতীং সুমনোহরম্।
পুংস্কামাং শঙ্কমানশ্চ চুক্রোধ পুরুষাদকঃ॥ ১-১৬৫-১৭ (৭৫৩১)
সংক্রুদ্ধো রাক্ষসস্তস্যা ভগিন্যাঃ কুরুসত্তম।
উৎফাল্য বিপুলে নেত্রে ততস্তামিদমব্রবীৎ॥ ১-১৬৫-১৮ (৭৫৩২)
কো হি মে ভোক্তুকামস্য বিঘ্নং চরতি দুর্মতিঃ।
ন বিভেষি হিডিম্বে কিং মৎকোপাদ্বিপ্রমোহিতা॥ ১-১৬৫-১৯ (৭৫৩৩)
ধিক্ৎবামসতি পুংস্কামে মম বিপ্রিয়কারিণি।
পূর্বেষাং রাক্ষসেন্দ্রাণাং সর্বেষাময়শস্করি॥ ১-১৬৫-২০ (৭৫৩৪)
যানিমানাশ্রিতাঽকার্ষীর্বিপ্রিয়ং সমুহন্মম।
এষ তানদ্য বৈ সর্বান্হনিষ্যামি ৎবয়া সহ॥ ১-১৬৫-২১ (৭৫৩৫)
বৈশম্পায়ন উবাচ। ১-১৬৫-২২x (৯৬৬)
এবমুক্ৎবা হিডিম্বাং স হিডিম্বো লোহিতেক্ষণঃ।
বধায়াভিপপাতৈনান্দন্তৈর্দন্তানুপস্পৃশন্॥ ১-১৬৫-২২ (৭৫৩৬)
গর্জন্তমেবং বিজনে ভীমসেনোঽভিবীক্ষ্য তম্।
রক্ষন্প্রবোধং ভ্রাতৄণাং মাতুশ্চ পরবীরহা॥ ১-১৬৫-২৩ (৭৫৩৭)
তমাপতান্তং সংপ্রেক্ষ্য ভীমঃ প্রহরতাং বরঃ।
ভর্ৎসয়ামাস তেজস্বী তিষ্ঠতিষ্ঠেতি চাব্রবীৎ॥ ১-১৬৫-২৪ (৭৫৩৮)
বৈশম্পায়ন উবাচ। ১-১৬৫-২৫x (৯৬৭)
ভীমসেনস্তু তং দৃষ্ট্বা রাক্ষসং প্রহসন্নিব।
ভগিনীং প্রতি সঙ্ক্রুদ্ধমিদং বচনমব্রবীৎ॥ ১-১৬৫-২৫ (৭৫৩৯)
কিং তে হিডিম্ব এতৈর্বা সুখসুপ্তৈঃ প্রবোধিতৈঃ।
মামাসাদয় দুর্বুদ্ধে তরসা ৎবং নরাশন॥ ১-১৬৫-২৬ (৭৫৪০)
ময়্যেব প্রহরৈহি ৎবং ন স্ত্রিয়ং হন্তুমর্হসি।
বিশেষতোঽনপকৃতে পরেণাপকৃতে সতি॥ ১-১৬৫-২৭ (৭৫৪১)
ন হীয়ং স্ববশা বালা কাময়ত্যদ্য মামিহ।
চোদিতৈষা হ্যনঙ্গেন শরীরান্তরচারিণা॥ ১-১৬৫-২৮ (৭৫৪২)
ভগিনী তব দুর্বৃত্ত রক্ষসাং বৈ যশোহর।
ৎবন্নিয়োগেন চৈবেয়ং রূপং মম সমীক্ষ্য চ॥ ১-১৬৫-২৯ (৭৫৪৩)
কাময়ত্যদ্য মাং ভীরুস্তব নৈষাপরাধ্যতি।
অনঙ্গেন কৃতে দোষে নেমাং গর্হিতুমর্হসি॥ ১-১৬৫-৩০ (৭৫৪৪)
ময়ি তিষ্ঠতি দুষ্টাত্মন্ন স্ত্রিয়ং হন্তুমর্হসি।
সংগচ্ছস্ব ময়া সার্ধমেকেনৈকো নরাশন॥ ১-১৬৫-৩১ (৭৫৪৫)
অহমেকো গমিষ্যামি ৎবামদ্য যমসাদনম্।
অদ্য মদ্বলনিষ্পিষ্টং শিরো রাক্ষস দীর্যতাম্।
কুঞ্জরস্যেব পাদেন বিনিষ্পিষ্টং বলীয়সাঃ॥ ১-১৬৫-৩২ (৭৫৪৬)
অদ্য গাত্রাণি তে কঙ্কাঃ শ্যেনা গোমায়বস্তথা।
কর্ষন্তু ভুবি সংহৃষ্টা নিহতস্য ময়া মৃধে॥ ১-১৬৫-৩৩ (৭৫৪৭)
ক্ষণেনাদ্য করিষ্যেঽহমিদং বনমরাক্ষসম্।
পুরা যদ্দূষিতং নিত্যং ৎবয়া ভক্ষয়তা নরান্॥ ১-১৬৫-৩৪ (৭৫৪৮)
অদ্য ৎবাং ভগিনী রক্ষঃ কৃষ্যমাণং ময়াঽসকৃৎ।
দ্রক্ষ্যত্যদ্রিপ্রতীকাশং সিংহেনেব মহাদ্বিপম্॥ ১-১৬৫-৩৫ (৭৫৪৯)
নিরাবাধাস্ৎবয়ি হতে ময়া রাক্ষসপাংসন।
বনমেতচ্চরিষ্যন্তি পুরুষা বনচারিণঃ॥ ১-১৬৫-৩৬ (৭৫৫০)
হিডিম্ব উবাচ। ১-১৬৫-৩৭x (৯৬৮)
গর্জিতেন বৃথা কিং তে কত্থিতেন চ মানুষ।
কৃৎবৈতৎকর্মণা সর্বং কত্থেয়া মা চিরং কৃথাঃ॥ ১-১৬৫-৩৭ (৭৫৫১)
বলিনং মন্যসে যচ্চাপ্যাত্মানং সপরাক্রমম্।
জ্ঞাস্যস্যদ্য সমাগম্য ময়াত্মানং বলাধিকম্॥ ১-১৬৫-৩৮ (৭৫৫২)
ন তাবদেতান্হিংসিষ্যে স্বপন্ৎবেতে যথাসুখম্।
এষ ৎবামেব দুর্বুদ্ধে নিহন্ম্যদ্যাপ্রিয়ংবদম্॥ ১-১৬৫-৩৯ (৭৫৫৩)
পীৎবা তবাসৃগ্গাত্রেভ্যস্ততঃ পশ্চাদিমানপি।
হনিষ্যামি ততঃ পশ্চাদিমাং বিপ্রিয়কারিণীম্॥ ১-১৬৫-৪০ (৭৫৫৪)
বৈশম্পায়ন উবাচ। ১-১৬৫-৪১x (৯৬৯)
এবমুক্ৎবা ততো বাহুং প্রগৃহ্য পুরুষাদকঃ।
অভ্যদ্রবত সংক্রুদ্ধো ভীমসেনমরিন্দমম্॥ ১-১৬৫-৪১ (৭৫৫৫)
তস্যাভিদ্রবতস্তূর্ণং ভীমো ভীমপরাক্রমঃ।
বেগেন প্রহিতং বাহুং নিজগ্রাহ হসন্নিব॥ ১-১৬৫-৪২ (৭৫৫৬)
নিগৃহ্য তং বলাদ্ভীমো বিস্ফুরন্তং চকর্ষ হ।
তস্মাদ্দেশাদ্ধনূংষ্যষ্টৌ সিংহঃ ক্ষুদ্রমৃগং যথা॥ ১-১৬৫-৪৩ (৭৫৫৭)
ততঃ স রাক্ষসঃ ক্রুদ্ধঃ পাণ্ডবেন বলার্দিতঃ।
ভীমসেনং সমালিঙ্গ্য ব্যনদদ্ভৈরবং রবম্॥ ১-১৬৫-৪৪ (৭৫৫৮)
পুনর্ভীমো বলাদেনং বিচকর্ষ মহাবলঃ।
মা শব্দঃ সুখসুপ্তানাং ভ্রাতৄণাং মে ভবেদিতি॥ ১-১৬৫-৪৫ (৭৫৫৯)
`হস্তে গৃহীৎবা তদ্রক্ষো দূরমন্যত্র নীতবান্।
পৃচ্ছে গৃহীৎবা তুণ্ডেন গরুডঃ পন্নগং যথা॥’ ১-১৬৫-৪৬ (৭৫৬০)
অন্যোন্যং তৌ সমাসাদ্য বিচকর্ষতুরোজসা।
হিডিম্বো ভীমসেনশ্চ বিক্রমং চক্রতুঃ পরম্॥ ১-১৬৫-৪৭ (৭৫৬১)
বভঞ্জতুস্তদা বৃক্ষাঁল্লতাশ্চাকর্ষতুস্তদা।
মত্তাবিব চং সংরব্ধৌ বারণৌ ষষ্টিহায়নৌ॥ ১-১৬৫-৪৮ (৭৫৬২)
`পাদপানুদ্ধরন্তৌ তাবূরুবেগেন বেগিতৌ।
স্ফোটয়ন্তৌ লতাজালান্যূরুভ্যাং গৃহ্য সর্বশঃ॥ ১-১৬৫-৪৯ (৭৫৬৩)
বিত্রাসয়ন্তৌ তৌ শব্দৈঃ সর্বতো মৃগপক্ষিণঃ।
বলেন বলিনৌ মত্তাবন্যোন্যবধকাঙ্ক্ষিণৌ॥ ১-১৬৫-৫০ (৭৫৬৪)
ভীমরাক্ষসয়োর্যুদ্ধং তদাঽবর্তত দারুণম্।
পুরা দেবাসুরে যুদ্ধে বৃত্রবাসবয়োরিব॥ ১-১৬৫-৫১ (৭৫৬৫)
ভঙূক্ৎবা বৃক্ষান্মহাশাখাংস্তাডয়ামাসতুঃ ক্রুধা।
সালতালতমালাম্রবটার্জুনবিভীতকান্॥ ১-১৬৫-৫২ (৭৫৬৬)
ন্যগ্রোধপ্লক্ষখর্জূরপনসানশ্মকণ্টকান্।
এতানন্যান্মহাবৃক্ষানুৎখায় তরসাঽখিলান্॥ ১-১৬৫-৫৩ (৭৫৬৭)
উৎক্ষিপ্যান্যোন্যরোষেণ তাডয়ামাসতূ রণে।
যদাঽভবদ্বনং সর্বং নির্বৃক্ষং বৃক্ষসঙ্কুলম্॥ ১-১৬৫-৫৪ (৭৫৬৮)
তদা শিলাশ্চ কুঞ্জাংশ্চ বৃক্ষান্কণ্টকিনস্তথা।
ততস্তৌ গিরিশৃঙ্গাণি পর্বতাংশ্চাভ্রলেলিহান্॥ ১-১৬৫-৫৫ (৭৫৬৯)
শৈলাংশ্চ গণ্ডপাষাণানুৎখায়াদায় বৈরিণৌ।
চিক্ষেপতুরুপর্যাজাবন্যোন্যং বিজয়েষিণৌ॥ ১-১৬৫-৫৬ (৭৫৭০)
তদ্বনং পরিতঃ পঞ্চয়োজনং নির্মহীরুহম্।
নির্লতাগুল্মপাষাণং নির্মৃগং চক্রতুর্ভৃশম্॥ ১-১৬৫-৫৭ (৭৫৭১)
তয়োর্যুদ্ধেন রাজেন্দ্র তদ্বনং ভীমরক্ষসোঃ।
মুহূর্তেনাভবৎকূমর্পৃষ্ঠবচ্ছ্লক্ষ্ণমব্যযম্॥ ১-১৬৫-৫৮ (৭৫৭২)
ঊরুবাহুপরিক্লেশাৎকর্ষন্তাবিতরেতরম্।
উৎকর্ষন্তৌ বিকর্ষন্তৌ প্রকর্ষন্তৌ পরস্পরম্॥ ১-১৬৫-৫৯ (৭৫৭৩)
তৌ স্বনেন বিনা রাজন্গর্জন্তৌ চ পরস্পরম্।
পাষাণসংঘট্টনিভৈঃ প্রহারৈরভিজঘ্নতুঃ॥ ১-১৬৫-৬০ (৭৫৭৪)
অন্যোন্যং চ সমালিঙ্গ্য বিকর্ষন্তৌ পরস্পরম্।
বাহুয়ুদ্ধমভূদ্ধোরং বলিবাসবয়োরিব।
যুদ্ধসংরম্ভনির্গচ্ছৎফূৎকাররবনিস্বনম্॥’ ১-১৬৫-৬১ (৭৫৭৫)
তয়োঃ শব্দেন মহতা বিবুদ্ধাস্তে নরর্ষভাঃ।
সহ মাত্রা চ দদৃশুর্হিডিম্বামগ্রতঃস্থিতাম্॥ ॥ ১-১৬৫-৬২ (৭৫৭৬)
ইতি শ্রীমন্মহাভারতে আদিপর্বণি হিডিম্ববধপর্বণি পঞ্চষষ্ট্যধিকশততমোঽধ্যায়ঃ॥ ১৬৫ ॥
Mahabharata – Adi Parva – Chapter Footnotes
১-১৬৫-২ মেঘসংঘাতবর্ষ্মা অতিকৃষ্ণশরীরঃ॥ ১-১৬৫-৩২ গমিষ্যামি গময়িষ্যামি॥ ১-১৬৫-৫৪ নির্বৃক্ষং অকণ্টকবৃক্ষরহিতম্॥ পঞ্চষষ্ট্যধিকশততমোঽধ্যায়ঃ॥ ১৬৫ ॥