আদিপর্ব – অধ্যায় ১৬০

আদিপর্ব – অধ্যায় ১৬০

॥ শ্রীঃ ॥

১.১৬০. অধ্যায়ঃ ১৬০

Mahabharata – Adi Parva – Chapter Topics

রাত্রৌ কুন্ত্যা অন্নাদিনা ব্রাহ্মণপূজনম্॥ ১ ॥ ভীমেন জতুগৃহস্যাদীপনম্॥ ২ ॥ তস্য কুন্তীং ভ্রাতৄংশ্চাদায় সুরঙ্গাদ্বারা বহিংর্নির্গমনম্॥ ৩ ॥

Mahabharata – Adi Parva – Chapter Text

১-১৬০-০ (৭২৬৯)
বৈশম্পায়ন উবাচ। ১-১৬০-০x (৯৩৪)
তাংস্তু দৃষ্ট্বা সুমনসঃ পরিসংবৎসরোষিতান্।
বিশ্বস্তানিব সংলক্ষ্য হর্ষং চক্রে পুরোচনঃ॥ ১-১৬০-১ (৭২৭০)
`স তু সংচিন্তয়ামাস প্রহৃষ্টেনান্তরাত্মনা।
প্রাপ্তকালমিদং মন্যে পাণ্ডবানাং বিনাশনে॥ ১-১৬০-২ (৭২৭১)
তমস্যান্তর্গতং ভাবং বিজ্ঞায় কুরুপুঙ্গবঃ।
চিন্তয়ামাস মতিমান্ধর্মপুত্রো যুধিষ্ঠিরঃ॥’ ১-১৬০-৩ (৭২৭২)
পুরোচনে তথা হৃষ্টে কৌন্তেয়োঽথ যুধিষ্ঠিরঃ।
ভীমসেনার্জুনৌ চোভৌ যমৌ প্রোবাচ ধর্মবিৎ॥ ১-১৬০-৪ (৭২৭৩)
অস্মানয়ং সুবিশ্বস্তান্বেত্তি পাপঃ পুরোচনঃ।
বঞ্চিতোঽয়ং নৃশংসাত্মা কালং মন্যে পলায়নে॥ ১-১৬০-৫ (৭২৭৪)
আয়ুধাগারমাদীপ্য দগ্ধ্বা চৈব পুরোচনম্।
ষট্প্রাণিনো নিধায়েহ দ্রবামোঽনভিলক্ষিতাঃ॥ ১-১৬০-৬ (৭২৭৫)
বৈশম্পায়ন উবাচ। ১-১৬০-৭x (৯৩৫)
অথ দানাপদেশেন কুন্তী ব্রাহ্মণভোজনম্।
চক্রে নিশি মহারাজ আজগ্মুস্তত্র যোষিতঃ॥ ১-১৬০-৭ (৭২৭৬)
তা বিহৃত্য যথাকামং ভুক্ৎবা পীৎবা চ ভারত।
জগ্মুর্নিশিং গৃহানেব সমনুজ্ঞাপ্য মাধবীম্॥ ১-১৬০-৮ (৭২৭৭)
`পুরোচনপ্রণিহিতা পৃথাং যা সেবতে সদা।
নিষাদী দুষ্টহৃদয়া নিত্যমন্তরচারিণী॥ ১-১৬০-৯ (৭২৭৮)
নিষাদী পঞ্চপুত্রা সা তস্মিন্ভোজ্যে যদৃচ্ছয়া।
পুরাভ্যাসকৃতস্নেহা সখী কুন্ত্যাঃ সুতৈঃ সহ॥ ১-১৬০-১০ (৭২৭৯)
আনীয় মধুমূলানি ফলানি বিবিধানি চ।
অন্নার্থিনী সমভ্যাগাৎসপুত্রা কালচোদিতা।
সুপাপা পঞ্চপুত্রা চ সা পৃথায়াঃ সখী মতা॥’ ১-১৬০-১১ (৭২৮০)
সা পীৎবা মদিরাং মত্তা সপুত্রা মদবিহ্বলা।
সহ সর্বৈঃ সুতৈ রাজংস্তস্মিন্নেব নিবেশনে॥ ১-১৬০-১২ (৭২৮১)
সুষ্বাপ বিগতজ্ঞানা মৃতকল্পা নরাধিপ।
অথ প্রবাতে তুমুলে নিশি সুপ্তে জনে তদা॥ ১-১৬০-১৩ (৭২৮২)
তদুপাদীপয়দ্ভীমঃ শেতে যত্র পুরোচনঃ।
ততো জতুগৃহদ্বারং দীপয়ামাস পাণ্ডবঃ॥ ১-১৬০-১৪ (৭২৮৩)
সমন্ততো দদৌ পশ্চাদগ্নিং তত্র নিবেশনে।
`পূর্বমেব গৃহং শোধ্য ভীমসেনো মহামতিঃ॥ ১-১৬০-১৫ (৭২৮৪)
পাণ্ডবৈঃ সহিতাং কুন্তীং প্রাবেশয়ত তদ্বিলম্।
দত্ৎবাগ্নিং সহসা ভীমো গৃহে তৎপরিতঃ সুধীঃ॥ ১-১৬০-১৬ (৭২৮৫)
গৃহস্থং দ্রবিণং গৃহ্য নির্জগাম বিলেন সঃ।’
জ্ঞাৎবা তু তদ্গৃহং সর্বমাদীপ্তং পাণ্ডুনন্দনাঃ॥ ১-১৬০-১৭ (৭২৮৬)
সুরঙ্গাং বিবিশুস্তূর্ণং মাত্রা সার্ধমরিন্দমাঃ।
ততঃ প্রতাপঃ সুমহাঞ্ছব্দশ্চৈব বিভাবসোঃ॥ ১-১৬০-১৮ (৭২৮৭)
প্রাদুরাসীত্তদা তেন বুবুধে স জনব্রজঃ।
তদবেক্ষ্য গৃহং দীপ্তমাহুঃ পৌরাঃ কৃশাননাঃ॥ ১-১৬০-১৯ (৭২৮৮)
দুর্যোধনপ্রয়ুক্তেন পাপেনাকৃতবুদ্ধিনা।
গৃহমাত্মবিনাশায় কারিতং দাহিতং চ তৎ॥ ১-১৬০-২০ (৭২৮৯)
অহো ধিগ্ধৃতরাষ্ট্রস্য বুদ্ধির্নাতিসমঞ্জসা।
যঃ শুচীন্পাণ্ডুদায়াদান্দাহয়ামাস শত্রুবৎ॥ ১-১৬০-২১ (৭২৯০)
দিষ্ট্যা ৎবিদানীং পাপাত্মাদগ্ধ্বা দগ্ধঃ পুরোচনঃ।
অনাগসঃ সুবিশ্বস্তান্যো দদাহ নরোত্তমান্॥ ১-১৬০-২২ (৭২৯১)
বৈশম্পায়ন উবাচ। ১-১৬০-২৩x (৯৩৬)
এবং তে বিলপন্তি স্ম বারণাবতকা জনাঃ।
পরিবার্য গৃহং তচ্চ তস্থূ রাত্রৌ সমন্ততঃ॥ ১-১৬০-২৩ (৭২৯২)
পাণ্ডবাশ্চাপি তে সর্বে সহ মাত্রা সুদুঃখিতাঃ।
বিলেন তেন নির্গত্য জগ্মুর্দ্রুতমলক্ষিতাঃ॥ ১-১৬০-২৪ (৭২৯৩)
তেন নিদ্রোপরোধেন সাধ্বসেন চ পাণ্ডবাঃ।
ন শেকুঃ সহসা গন্তুং সহ মাত্রা পরন্তপাঃ॥ ১-১৬০-২৫ (৭২৯৪)
ভীমসেনস্তু রাজেন্দ্র ভীমবেগপরাক্রমঃ।
জগাম ভ্রাতৄনাদায় সর্বান্মাতরমেব চ॥ ১-১৬০-২৬ (৭২৯৫)
স্কন্ধমারোপ্য জননীং যমাবঙ্কেন বীর্যবান্।
পার্থৌ গৃহীৎবা পাণিভ্যাং ভ্রাতরৌ সুমহাবলঃ॥ ১-১৬০-২৭ (৭২৯৬)
উরসা পাদপান্ভঞ্জন্মহীং পদ্ভ্যাং বিদারয়ন্।
স জগামাশু তেজস্বী বাতরংহা বৃকোদরঃ॥ ॥ ১-১৬০-২৮ (৭২৯৭)

ইতি শ্রীমন্মহাভারতে আদিপর্বণি জতুগৃহপর্বণি ষষ্ট্যধিকশততমোঽধ্যায়ঃ॥ ১৬০ ॥

Mahabharata – Adi Parva – Chapter Footnotes

১-১৬০-৬ জাতুষাগারমিতি ঙ. পাঠঃ॥ ষষ্ট্যধিকশততমোঽধ্যায়ঃ॥ ১৬০ ॥