আদিপর্ব – অধ্যায় ১৫৩

আদিপর্ব – অধ্যায় ১৫৩

॥ শ্রীঃ ॥

১.১৫৩. অধ্যায়ঃ ১৫৩

Mahabharata – Adi Parva – Chapter Topics

ধৃতরাষ্ট্রাদীনাং কণিকেন দুর্নীত্যুপদেশঃ॥ ১ ॥ জম্বুকোপাখ্যানম্॥ ২ ॥

Mahabharata – Adi Parva – Chapter Text

১-১৫৩-০ (৬৯৬৫)
বৈশম্পায়ন উবাচ। ১-১৫৩-০x (৯০০)
শ্রুৎবা পাণ্ডুসুতান্বীরান্বলোদ্রিক্তান্মহৌজসঃ।
ধৃতরাষ্ট্রো মহীপালশ্চিন্তামগমদাতুরঃ॥ ১-১৫৩-১ (৬৯৬৬)
তত আহূয় মন্ত্রজ্ঞং রাজশাস্ত্রার্থবিত্তমম্।
কণিকং মন্ত্রিণাং শ্রেষ্ঠং ধৃতরাষ্ট্রঽব্রবীদ্বচঃ॥ ১-১৫৩-২ (৬৯৬৭)
উৎসক্তাঃ পাণ্ডবা নিত্যং তেভ্যোঽসূয়ে দ্বিজোত্তম।
তত্র মে নিশ্চিততমং সন্ধিবিগ্রহকারণম্।
কণিক ৎবং মমাচক্ষ্ব করিষ্যে বচনং তব॥ ১-১৫৩-৩ (৬৯৬৮)
বৈশম্পায়ন উবাচ। ১-১৫৩-৪x (৯০১)
`দুর্যোধনোঽথ শকুনিঃ কর্ণদুঃশাসনাবপি।
কণিকং হ্যুপসংগৃহ্য মন্ত্রিণং সৌবলস্য চ॥ ১-১৫৩-৪ (৬৯৬৯)
পপ্রচ্ছুর্ভরতশ্রেষ্ঠ পাণ্ডবান্প্রতি নৈকধা।
প্রবুদ্ধাঃ পাণ্ডবা নিত্যং সর্বে তেভ্যস্ত্রসামহে॥ ১-১৫৩-৫ (৬৯৭০)
অনূনং সর্বপক্ষাণাং যদ্ভবেৎক্ষেমকারকম্।
ভারদ্বাজ তদাচক্ষ্ব করিষ্যামঃ কথং বয়ম্॥ ১-১৫৩-৬ (৬৯৭১)
বৈশম্পায়ন উবাচ।’ ১-১৫৩-৭x (৯০২)
স প্রসন্নমনাস্তেন পরিপৃষ্টো দ্বিজোত্তমঃ।
উবাচ বচনং তীক্ষ্ণং রাজশাস্ত্রার্থদর্শনম্॥ ১-১৫৩-৭ (৬৯৭২)
কণিক উবাচ। ১-১৫৩-৮x (৯০৩)
শৃণু রাজন্নিদং তত্র প্রোচ্যমানং ময়ানঘ।
ন মেঽভ্যসূয়া কর্তব্যা শ্রুৎবৈতৎকুরুসত্তম॥ ১-১৫৩-৮ (৬৯৭৩)
নিত্যমুদ্যতদণ্ডঃ স্যান্নিত্যং বিবৃতপৌরুষঃ।
অচ্ছিদ্রশ্ছিদ্রদর্শী স্যাৎপরেষাং বিবরানুগঃ॥ ১-১৫৩-৯ (৬৯৭৪)
নিত্যমুদ্যতদণ্ডাদ্ধি ভঋশমুদ্বিজতে জনঃ।
তস্মাৎসর্বাণি কার্যাণি দণ্ডেনৈব বিধারয়েৎ॥ ১-১৫৩-১০ (৬৯৭৫)
নাস্য চ্ছিদ্রং পরঃ পশ্যেচ্ছিদ্রেণ পরমন্বিয়াৎ।
গূহেৎকূর্ম ইবাঙ্গানি রক্ষেদ্বিবরমাত্মনঃ॥ ১-১৫৩-১১ (৬৯৭৬)
`নিত্যং চ ব্রাহ্মণাঃ পূজ্যা নৃপেণ হিতমিচ্ছতা।
সৃষ্টো নৃপো হি বিপ্রামাং পালনে দুষ্টনিগ্রহে॥ ১-১৫৩-১২ (৬৯৭৭)
উভাব্যাং বর্ধতে ধর্মো ধর্মবৃদ্ধ্যা জিতাবুভৌ।
লোকশ্চায়ং পরশ্চৈব ততো ধর্মং সমাচরেৎ॥ ১-১৫৩-১৩ (৬৯৭৮)
কৃতাপরাধং পুরুষং দৃষ্ট্বা যঃ ক্ষমতে নৃপঃ।
তেনাবমানমাপ্নোতি পাপং চেহ পরত্র চ॥ ১-১৫৩-১৪ (৬৯৭৯)
যো বিভূতিমবাপ্যোচ্চৈ রাজ্ঞো বিকুরুতেঽধমঃ।
তমানয়িৎবা হৎবা চ দদ্যাদ্ধীনায় তদ্ধনম্॥ ১-১৫৩-১৫ (৬৯৮০)
নো চেদ্ধুরি নিয়ুক্তা যে স্থাস্যন্তি বশমাত্মনঃ।
রাজা নিয়ুঞ্জ্যাৎপুরুষানাপ্তান্ধর্মার্থকোবিদান্॥ ১-১৫৩-১৬ (৬৯৮১)
যে নিয়ুক্তাস্তথা কেচিদ্রাষ্ট্রং বা যদি বা পুরম্।
গ্রামং জনপদং বাপি বাধেয়ুর্যদি বা ন বা॥ ১-১৫৩-১৭ (৬৯৮২)
পরীক্ষণার্থং বিসৃজেদানতাংশ্ছন্নরূপিণঃ।
পরীক্ষ্য পাপকং জহ্যাদ্ধনমাদায় সর্বশঃ॥’ ১-১৫৩-১৮ (৬৯৮৩)
নাসম্যক্কৃত্যকারী স্যাদুপক্রম্য কদাচন।
কণ্টকো হ্যপি দুশ্ছিন্ন আস্রাবং জনয়েচ্চিরম্॥ ১-১৫৩-১৯ (৬৯৮৪)
বধমেব প্রশংসন্তি শত্রূণামপকারিণাম্।
সুবিদীর্ণং সুবিক্রান্তং সুয়ুদ্ধং সুপলায়িতম্॥ ১-১৫৩-২০ (৬৯৮৫)
আপদ্যাপদি কালে কুর্বীত ন বিচারয়েৎ।
নাবজ্ঞেয়ো রিপুস্তাত দুর্বলোঽপি কথং চন॥ ১-১৫৩-২১ (৬৯৮৬)
অল্পোঽপ্যগ্নির্বনং কৃৎস্নং দহত্যাশ্রয়সংশ্রয়াৎ।
অন্ধঃ স্যাদন্ধবেলায়াং বাধির্যমপি চাশ্রয়েৎ॥ ১-১৫৩-২২ (৬৯৮৭)
কুর্যাত্তৃণময়ং চাপং শয়ীত মৃগশায়িকাম্।
সান্ৎবাদিভিরুপায়ৈস্তু হন্যাচ্ছত্রুং বশে স্থিতং॥ ১-১৫৩-২৩ (৬৯৮৮)
দয়া ন তস্মিন্কর্তব্যা শরণাগত ইত্যুত।
নিরুদ্বিগ্নো হি ভবতি ন হতাজ্জায়তে ভয়ম্॥ ১-১৫৩-২৪ (৬৯৮৯)
হন্যাদমিত্রং দানেন তথা পূর্বাপকারিণম্।
হন্যাত্ত্রীন্পঞ্চ সপ্তেতি পরপক্ষস্য সর্বশঃ॥ ১-১৫৩-২৫ (৬৯৯০)
মূলমেবাদিতশ্ছিন্দ্যাৎপরপক্ষস্য নিত্যশঃ।
ততঃ সহায়াংস্তৎপক্ষান্সর্বাংশ্চ তদনন্তরম্॥ ১-১৫৩-২৬ (৬৯৯১)
ছিন্নমূলে হ্যধিষ্ঠানে সর্বে তজ্জীবিনো হতাঃ।
কথং নু শাখাস্তিষ্ঠেরংশ্ছিন্নমূলে বনস্পতৌ॥ ১-১৫৩-২৭ (৬৯৯২)
একাগ্রঃ স্যাদবিবৃতো নিত্যং বিবরদর্শকঃ।
রাজন্নিত্যং সপত্নেষু নিত্যোদ্বিগ্নঃ সমাচরেৎ॥ ১-১৫৩-২৮ (৬৯৯৩)
অগ্ন্যাধানেন যজ্ঞেন কাষায়েণ জটাজিনৈঃ।
লোকান্বিশ্বাসয়িৎবৈব ততো লুম্পেদ্যথা বৃকঃ॥ ১-১৫৩-২৯ (৬৯৯৪)
অঙ্কুশং শোচমিত্যাহুরর্থানামুপধারণে।
আনাম্য ফলিতাং শাখাং পক্বং পক্বং প্রশাতয়েৎ॥ ১-১৫৩-৩০ (৬৯৯৫)
ফলার্থোঽয়ং সমারম্ভো লোকে পুংসাং বিপশ্চিতাম্।
বহেদমিত্রং স্কন্ধেন যাবৎকালস্য পর্যযঃ॥ ১-১৫৩-৩১ (৬৯৯৬)
ততঃ প্রত্যাগতে কালে ভিন্দ্যাদ্ধৃটমিবাশ্মনি।
অমিত্রো ন বিমোক্তব্যঃ কৃপণং বহ্বপি ব্রুবন্॥ ১-১৫৩-৩২ (৬৯৯৭)
কৃপা ন তস্মিন্কর্তব্যা হন্যাদেবাপকারিণম্।
হন্যাদমিত্রং সান্ৎবেন তথা দানেন বা পুনঃ॥ ১-১৫৩-৩৩ (৬৯৯৮)
তথৈব ভেদদণ্ডাভ্যাং সর্বোপায়ৈঃ প্রশাতয়েৎ। ১-১৫৩-৩৪ (৬৯৯৯)
ধৃতরাষ্ট্র উবাচ।
কথং সান্ৎবেন দানেন ভেদৈর্দণ্ডেন বা পুনঃ॥ ১-১৫৩-৩৪x (৯০৪)
অমিত্রঃ শক্যতে হন্তুং তন্মে ব্রূহি যথাতথম্। ১-১৫৩-৩৫ (৭০০০)
কণিক উবাচ।
শৃণু রাজন্যথা বৃত্তং বনে নিবসতঃ পুরা॥ ১-১৫৩-৩৫x (৯০৫)
জম্বুকস্য মহারাজ নীতিশাস্ত্রার্থদর্শিনঃ।
অথ কশ্চিৎকৃতপ্রজ্ঞঃ শৃগালঃ স্বার্থপণ্ডিতঃ॥ ১-১৫৩-৩৬ (৭০০১)
সখিভির্ন্যবসৎসার্ধং ব্যাঘ্রাখুবৃকবভ্রুভিঃ।
তেঽপশ্যন্বিপিনে তস্মিন্বলিনং মৃগয়ূথপম্॥ ১-১৫৩-৩৭ (৭০০২)
অশক্তা গ্রহণে তস্য ততো মন্ত্রমমন্ত্রয়ন্। ১-১৫৩-৩৮ (৭০০৩)
জম্বুক উবাচ।
অসকৃদ্যতিতো হ্যেষ হন্তুং ব্যাঘ্র বনে ৎবয়া॥ ১-১৫৩-৩৮x (৯০৬)
যুবা বৈ জবসংপন্নো বুদ্ধিশালী ন শক্যতে।
মূষিকোঽস্য শয়ানস্য চরণৌ ভক্ষয়ৎবয়ম্॥ ১-১৫৩-৩৯ (৭০০৪)
অথৈনং ভক্ষিতৈঃ পাদৈর্ব্যাঘ্রো গৃহ্ণাতু বৈ ততঃ।
ততো বৈ ভক্ষয়িষ্যামঃ সর্বে মুদিতমানসাঃ॥ ১-১৫৩-৪০ (৭০০৫)
জম্বুকস্য তু তদ্বাক্যং তথা চক্রঃ সমাহিতাঃ।
মূষিকাভক্ষিতৈঃ পাদৈর্মৃগং ব্যাঘ্রোঽবধীত্তদা॥ ১-১৫৩-৪১ (৭০০৬)
দৃষ্ট্বৈবাচেষ্টমানং তু ভূমৌ মৃগকলেবরম্।
স্নাৎবাঽঽগচ্ছত ভদ্রং বোরক্ষামীত্যাহ জম্বুকঃ॥ ১-১৫৩-৪২ (৭০০৭)
শৃগালবচনাত্তেঽপি গতাঃ সর্বে নদীং ততঃ।
স চিন্তাপরমো ভূৎবা তস্থৌ তত্রৈব জম্বুকঃ॥ ১-১৫৩-৪৩ (৭০০৮)
অথাজগাম পূর্বং তু স্নাৎবা ব্যাঘ্রো মহাবলঃ।
দদর্শ জম্বুকং চৈব চিন্তাকুলিতমানসম্॥ ১-১৫৩-৪৪ (৭০০৯)
ব্যাঘ্র উবাচ। ১-১৫৩-৪৫x (৯০৭)
কিং শোচসি মহাপ্রাজ্ঞ ৎবং নো বুদ্ধিমতাং বরঃ।
অশিৎবা পিশিতান্যদ্য বিহরিষ্যামহে বয়ম্॥ ১-১৫৩-৪৫ (৭০১০)
জম্বুক উবাচ। ১-১৫৩-৪৬x (৯০৮)
শৃণু মে ৎবং মহাবাহো যদ্বাক্যং মূষিকোঽব্রবীৎ।
ধিগ্বলং মৃগরাজস্য ময়াদ্যায়ং মৃগো হতঃ॥ ১-১৫৩-৪৬ (৭০১১)
মদ্বাহুবলমাশ্রিত্য তৃপ্তিমদ্য গমিষ্যতি।
তস্যৈবং গর্জিতং শ্রুৎবা ততো ভক্ষ্যং ন রোচয়ে॥ ১-১৫৩-৪৭ (৭০১২)
ব্যাঘ্র উবাচ। ১-১৫৩-৪৮x (৯০৯)
ব্রবীতি যদি স হ্যেবং কালে হ্যস্মি প্রবোধিতঃ।
স্ববাহুবলমাশ্রিত্য হনিষ্যেঽহং বনেচরান্॥ ১-১৫৩-৪৮ (৭০১৩)
খাদিষ্যে তত্র মাংসানি ইত্যুক্ৎবা প্রস্থিতোবনম্।
এতস্মিন্নেব কালে তু মূষিকোঽপ্যাজগাম হ॥ ১-১৫৩-৪৯ (৭০১৪)
তমাগতমভিপ্রেক্ষ্য শৃগালোঽপ্যব্রবীদ্বচঃ।
শৃণু মীষিক ভদ্রং তে নকুলো যদিহাব্রবীৎ॥ ১-১৫৩-৫০ (৭০১৫)
মৃগমাংসং ন খাদেয়ং গরমেতন্ন রোচতে।
মূষিকং ভক্ষয়িষ্যামি তদ্ভবাননুমন্যতাম্॥ ১-১৫৩-৫১ (৭০১৬)
তচ্ছ্রুৎবা মূষিকো বাক্যং সংত্রস্তঃ প্রগতো বিলম্।
ততঃ স্নাৎবা স বৈ তত্র আজগাম বৃকো নপৃ॥ ১-১৫৩-৫২ (৭০১৭)
তমাগতমিদং বাক্যমব্রবীজ্জম্বুকস্তদা।
মৃগরাজো হি সংক্রুদ্ধো ন তে সাধু ভবিষ্যতি॥ ১-১৫৩-৫৩ (৭০১৮)
সকলত্রস্ৎবিহায়াতি কুরুষ্ব যদনন্তরম্।
এবং সংচোদিতস্তেন জম্বুকেন তদা বৃকঃ॥ ১-১৫৩-৫৪ (৭০১৯)
ততোঽবলুম্পনং কৃৎবা প্রয়াতঃ পিশিতাশনঃ।
এতস্মিন্নেব কালে তু নকুলোঽপ্যাজগাম হ॥ ১-১৫৩-৫৫ (৭০২০)
তমুবাচ মহারাজ নকুলং জম্বুকো বনে।
স্ববাহুবলমাশ্রিত্য নির্জিতাস্তেঽন্যতো গতাঃ॥ ১-১৫৩-৫৬ (৭০২১)
মম দৎবা নিয়ুদ্ধং ৎবং ভুঙ্ক্ষ্ব মাংসং যথেপ্সিতম্। ১-১৫৩-৫৭ (৭০২২)
নকুল উবাচ।
মৃগরাজো বৃকশ্চৈব বুদ্ধিমানপি মূষিকঃ॥ ১-১৫৩-৫৭x (৯১০)
নির্জিতা যত্ৎবয়া বীরাস্তস্মাদ্বীরতরো ভবান্।
ন ৎবয়াপ্যুৎসহে যোদ্ধুমিত্যুক্ৎবা সোঽপ্যুপাগমৎ॥ ১-১৫৩-৫৮ (৭০২৩)
কণিক উবাচ। ১-১৫৩-৫৯x (৯১১)
এবং তেষু প্রয়াতেষু জম্বুকো হৃষ্টমানসঃ।
খাদতি স্ম তদা মাংসমেকঃ সন্মন্ত্রনিশ্চয়াৎ।
এবং সমাচরন্নিত্যং সুখমেধেত ভূপতিঃ॥ ১-১৫৩-৫৯ (৭০২৪)
ভয়েন ভেদয়েদ্ভীরুং শূরমঞ্জলিকর্মণা।
লুব্ধমর্থপ্রদানেন সমং ন্যূনং তথৌজসা॥ ১-১৫৩-৬০ (৭০২৫)
এবং তে কথিতং রাজন্ শৃণু চাপ্যপরং তথা॥ ১-১৫৩-৬১ (৭০২৬)
পুত্রঃ সখা বা ভ্রাতা বা পিতা বা যদি বা গুরুঃ।
রিপুস্যানেষু বর্তন্তো হন্তব্যা ভূতিমিচ্ছতা॥ ১-১৫৩-৬২ (৭০২৭)
শপথেনাপ্যরিং হন্যাদর্থদানেন বা পুনঃ।
বিষেণ মায়যা বাপি নোপেক্ষেতে কথংচন।
উভৌ চেৎসংশয়োপেতৌ শ্রদ্ধবাংস্তত্র বর্ধতে॥ ১-১৫৩-৬৩ (৭০২৮)
গুরোরপ্যবলিপ্তস্য কার্যাকার্যমজানতঃ।
উৎপথং প্রতিপন্নস্য ন্যায়্যং ভবতি শাসনম্॥ ১-১৫৩-৬৪ (৭০২৯)
ক্রুদ্ধোঽপ্যক্রুদ্ধরূপঃ স্যাৎস্মিতপূর্বাভিভাষিতা।
`ন চৈনং ক্রোধসংদীপ্তং বিদ্যাৎকশ্চিৎকথংচন।’
ন চাপ্যন্যমপধ্বংসেৎকদাচিৎকোপসংয়ুতঃ॥ ১-১৫৩-৬৫ (৭০৩০)
প্রহরিষ্যন্প্রিয়ং ব্রূয়াৎপ্রহরন্নপি ভারত।
প্রহৃত্য চ প্রিয়ং ব্রূয়াচ্ছোচন্নিব রুদন্নিব॥ ১-১৫৩-৬৬ (৭০৩১)
আশ্বাসয়েচ্চাপি পরং সান্ৎবধর্মার্থবৃত্তিভিঃ।
অথ তং প্রহরেৎকালে তথা বিচলিতং পথি॥ ১-১৫৩-৬৭ (৭০৩২)
অপি ঘোরাপরাধস্য ধর্মমাশ্রিত্য তিষ্ঠতঃ।
স হি প্রচ্ছাদ্যতে দোষঃ শৈলো মেঘৈরিবাসিতৈঃ॥ ১-১৫৩-৬৮ (৭০৩৩)
যঃ স্যাদনুপ্রাপ্তবধস্তস্যাগারং প্রদীপয়েৎ।
অধনান্নাস্তিকাংশ্চোরান্বিষকর্মসু যোজয়েৎ॥ ১-১৫৩-৬৯ (৭০৩৪)
প্রত্যুত্থানাসনাদ্যেন সংপ্রদানেন কেনচিৎ।
অতিবিশ্রব্ধঘাতী স্যাত্তীক্ষ্ণংদষ্ট্রো নিমগ্নকঃ॥ ১-১৫৩-৭০ (৭০৩৫)
অশঙ্কিতেভ্যঃ শঙ্কেত শঙ্কিতেভ্যশ্চ সর্বশঃ।
অশঙ্ক্যাদ্ভয়মুৎপন্নমপি মূলং নিকৃন্ততি॥ ১-১৫৩-৭১ (৭০৩৬)
ন বিশ্বসেদবিশ্বস্তে বিশ্বস্তে নাতিবিশ্বসেৎ।
বিশ্বাসাদ্ভয়মুৎপন্নং মূলান্যপি নিকৃন্ততি॥ ১-১৫৩-৭২ (৭০৩৭)
চারঃ সুবিহিতঃ কার্য আত্মনশ্চ পরস্য বা।
পাষণ্ডাংস্তাপসাদীংশ্চ পররাষ্ট্রেষু যোজয়েৎ॥ ১-১৫৩-৭৩ (৭০৩৮)
উদ্যানেষু বিহারেষু দেবতায়তনেষু চ।
পানাগারেষু রথ্যাসু সর্বতীর্থেষু চাপ্যথ॥ ১-১৫৩-৭৪ (৭০৩৯)
চৎবরেষু চ কূপেষু পর্বতেষু বনেষু চ।
সমবায়েষু সর্বেষু সরিৎসু চ বিচারয়েৎ॥ ১-১৫৩-৭৫ (৭০৪০)
বাচা ভৃশং বিনীতঃ স্যাদ্ধৃদয়েন তথা ক্ষুরঃ।
স্মিতপূর্বাভিভাষী স্যাৎসৃষ্টো রৌদ্রস্য কর্মণঃ॥ ১-১৫৩-৭৬ (৭০৪১)
অঞ্জলিঃ শপথঃ সান্ৎবং শিরসা পাদবন্দনম্।
আশাকরণমিত্যেবং কর্তব্যং ভূতিমিচ্ছতা॥ ১-১৫৩-৭৭ (৭০৪২)
সুপুষ্পিতঃ স্যাদফলঃ ফলবান্স্যাদ্দুরারুহঃ।
আমঃ স্যাৎপক্বসঙ্কাশো নচ জীর্যেত কর্হিচিৎ॥ ১-১৫৩-৭৮ (৭০৪৩)
ত্রিবর্গে ত্রিবিধা পীডা হ্যনুবন্ধাস্তথৈব চ।
অনুবন্ধাঃ শুভা জ্ঞেয়াঃ পীডাস্তু পরিবর্জয়েৎ॥ ১-১৫৩-৭৯ (৭০৪৪)
ধর্মং বিচরতঃ পীডা সাপি দ্বাভ্যাং নিয়চ্ছতি।
অর্থং চাপ্যর্থলুব্ধস্য কামং চাতিপ্রবর্তিনঃ॥ ১-১৫৩-৮০ (৭০৪৫)
অগর্বিতাত্মা যুক্তশ্চ সান্ৎবয়ুক্তোঽনসূয়িতা।
অবেক্ষিতার্থঃ শুদ্ধাত্মা মন্ত্রয়ীত দ্বিজৈঃ সহা॥ ১-১৫৩-৮১ (৭০৪৬)
কর্মণা যেন কেনৈব মৃদুনা দারুণেন চ।
উদ্ধরেদ্দীনমাত্মানং সমর্থো ধর্মমাচরেৎ॥ ১-১৫৩-৮২ (৭০৪৭)
ন সংশয়মনারুহ্য নরো ভদ্রাণি পশ্যতি।
সংশয়ং পুনরারুহ্য যদি জীবতি পশ্যতি॥ ১-১৫৩-৮৩ (৭০৪৮)
যস্য বুদ্ধিঃ পরিভবেত্তমতীতেন সান্ৎবয়েৎ।
অনাগতেন দুর্বুদ্ধিং প্রত্যুৎপন্নেন পণ্ডিতম্॥ ১-১৫৩-৮৪ (৭০৪৯)
যোঽরিণা সহ সন্ধায় শয়ীত কৃতকৃত্যবৎ।
স বৃক্ষাগ্রে যথা সুপ্তঃ পতিতঃ প্রতিবুধ্যতে॥ ১-১৫৩-৮৫ (৭০৫০)
মন্ত্রসংবরণে যত্নঃ সদা কার্যোঽনসূয়তা।
আকারমভিরক্ষেত চারেণাপ্যনুপালিতঃ॥ ১-১৫৩-৮৬ (৭০৫১)
`ন রাত্রৌ মন্ত্রয়েদ্বিদ্বান্ন চ কৈশ্চিদুপাসিতঃ।
প্রাসাদাগ্রে শিলাগ্রে বা বিশালে বিজনেপি বা॥ ১-১৫৩-৮৭ (৭০৫২)
সমন্তাত্তত্র পশ্যদ্ভিঃ সহাপ্তৈরেব মন্ত্রয়েৎ।
নৈব সংবেশয়েত্তত্র মন্ত্রবেশ্মনি শারিকাম্॥ ১-১৫৩-৮৮ (৭০৫৩)
শুকান্বা শারিকা বাপি বালমূর্খজডানপি।
প্রবিষ্টানপি নির্বাস্য মন্ত্রয়েদ্ধার্মিকৈর্দ্বিজৈঃ॥ ১-১৫৩-৮৯ (৭০৫৪)
নীতিজ্ঞৈর্ন্যায়শাস্ত্রজ্ঞৈরিতিহাসে সুনিষ্ঠিতৈঃ।
রক্ষাং মন্ত্রস্য নিশ্ছিদ্রাং মন্ত্রান্তে নিশ্চয়েৎস্বয়ম্॥ ১-১৫৩-৯০ (৭০৫৫)
বীরোপবর্ণিতাত্তস্মাদ্ধর্মার্থাভ্যামথাত্মনা।
একেন বাথ বিপ্রেণ জ্ঞাতবুদ্ধির্বিনিশ্চয়েৎ॥ ১-১৫৩-৯১ (৭০৫৬)
তৃতীয়েন ন চান্যেন ব্রজেন্নিশ্চয়মাত্মবান্।
ষট্কর্ণশ্ছিদ্যতে মন্ত্র ইতি নীতিষু পঠ্যতে॥ ১-১৫৩-৯২ (৭০৫৭)
নিঃসৃতো নাশয়েন্মন্ত্রো হস্তপ্রাপ্তামপি শ্রিয়ম্।
স্বমতং চ পরেষাং চ বিচার্য চ পুনঃপুনঃ।
গুণবদ্বাক্যমাদদ্যান্নৈব তৃপ্যেদ্বিচক্ষণঃ॥’ ১-১৫৩-৯৩ (৭০৫৮)
নাচ্ছিৎবা পরমর্মাণি নাকৃৎবা কর্ম দারুণম্।
নাহৎবা মৎস্যঘাতীব প্রাপ্নোতি মহতীং শ্রিয়ম্॥ ১-১৫৩-৯৪ (৭০৫৯)
কর্শিতং ব্যাধিতং ক্লিন্নমপানীয়মঘাসকম্।
পরিবিশ্বস্তমন্দং চ প্রহর্তব্যমরের্বলম্॥ ১-১৫৩-৯৫ (৭০৬০)
নার্থিকোঽর্থিনমভ্যেতি কৃতার্থে নাস্তি সঙ্গতম্।
তস্মাৎসর্বাণি সাধ্যানি সাবশেষাণি কারয়েৎ॥ ১-১৫৩-৯৬ (৭০৬১)
সংগ্রহে বিগ্রহে চৈব যত্নঃ কার্যোঽনসূয়তা।
উৎসাহশ্চাপি যত্নেন কর্তব্যো ভূতিমিচ্ছতা॥ ১-১৫৩-৯৭ (৭০৬২)
নাস্য কৃত্যানি বুধ্যেরন্মিত্রাণি রিপবস্তথা।
আরব্ধান্যেব পশ্যেরন্সুপর্যবসিতান্যপি॥ ১-১৫৩-৯৮ (৭০৬৩)
ভীতবৎসংবিধাতব্যং যাবদ্ভয়মনাগতম্।
আগতং তু ভয়ং দৃষ্ট্বা প্রহর্তব্যমভীতবৎ॥ ১-১৫৩-৯৯ (৭০৬৪)
দৈবেনোপহতং শত্রুমনুগৃহ্ণাতি যো নরঃ।
স মৃত্যুমুপগৃহ্ণাতি গর্ভমশ্বতরী যথা॥ ১-১৫৩-১০০ (৭০৬৫)
অনাগতং হি বুধ্যেত যচ্চ কার্যং পুরঃ স্থিতম্।
ন তু বুদ্ধিক্ষয়াৎকিংচিদতিক্রামেৎপ্রয়োজনম্॥ ১-১৫৩-১০১ (৭০৬৬)
উৎসাহশ্চাপি যত্নেন কর্তব্যো ভূতিমিচ্ছতা।
বিভজ্য দেশকালৌ চ দৈবং ধর্মাদয়স্ত্রয়ঃ।
নৈঃশ্রেয়সৌ তু তৌ জ্ঞেয়ৌ দেশকালাবিতি স্থিতিঃ॥ ১-১৫৩-১০২ (৭০৬৭)
তালবৎকুরুতে মূলং বালঃ শত্রুরুপেক্ষিতঃ।
গহনেঽগ্নিরিবোৎসৃষ্টঃ ক্ষিপ্রং সংজায়তে মহান্॥ ১-১৫৩-১০৩ (৭০৬৮)
অগ্নিস্তোকমিবাত্মানং সন্ধুক্ষয়তি যো নরঃ।
স বর্ধমানো গ্রসতে মহান্তমপি সংচয়ম্॥ ১-১৫৩-১০৪ (৭০৬৯)
`আদাবেব দদানীতি প্রিয়ং ব্রূয়ান্নিরর্থকম্॥’ ১-১৫৩-১০৫ (৭০৭০)
আশাং কালবতীং কুর্যাৎকালং বিঘ্নেন যোজয়েৎ।
বিঘ্নং নিমিত্ততো ব্রূয়ান্নিমিত্তং বাঽপি হেতুতঃ॥ ১-১৫৩-১০৬ (৭০৭১)
ক্ষুরো ভূৎবা হরেৎপ্রাণান্নিশিতঃ কালসাধনঃ।
প্রতিচ্ছন্নো লোমহারী দ্বিষতাং পরিকর্তনঃ॥ ১-১৫৩-১০৭ (৭০৭২)
পাণ্ডবেষু যথান্যায়মন্যেষু চ কুরূদ্বহ।
বর্তমানো ন মজ্জেস্ৎবং তথা কৃত্যং সমাচর॥ ১-১৫৩-১০৮ (৭০৭৩)
সর্বকল্যাণসংপন্নো বিশিষ্ট ইতি নিশ্চয়ঃ।
তস্মাত্ৎবং পাণ্ডুপুত্রেভ্যো রক্ষাত্মানং নরাধিপ॥ ১-১৫৩-১০৯ (৭০৭৪)
ভ্রাতৃব্যা বলবন্তস্তে পাণ্ডুপুত্রা নরাধিপ।
পশ্চাত্তাপো যথা ন স্যাত্তথা নীতির্বিধীয়তাম্॥ ১-১৫৩-১১০ (৭০৭৫)
বৈশম্পায়ন উবাচ। ১-১৫৩-১১১x (৯১২)
এবমুক্ৎবা সংপ্রতস্থে কণিকঃ স্বগৃহং ততঃ।
ধৃতরাষ্ট্রোঽপি কৌরব্যঃ শোকার্তঃ সমপদ্যত॥ ॥ ১-১৫৩-১১১ (৭০৭৬)

ইতি শ্রীমন্মহাভারতে আদিপর্বণি সংভবপর্বণি ত্রিপঞ্চাশদধিকশততমোঽধ্যায়ঃ॥ ১৫৩ ॥ ॥ সমাপ্তং চ সংভবপর্ব ॥

Mahabharata – Adi Parva – Chapter Footnotes

১-১৫৩-১৩ উভাভ্যাং ব্রাহ্মণরক্ষণদুষ্টনিগ্রহাভ্যাম্। জিতৌ সংপাদিতৌ ভবেতামিতি শেষঃ॥ ১-১৫৩-১৫ হীনায় দরিদ্রায়॥ ১-১৫৩-২০ উপসংহরতি বধমিতি। কথং বধঃ কর্তব্যং ইত্যাহ সুবিদীর্ণমিতি। সুবিক্রান্তমপি শত্রুং। কালে আপদ্যাপন্নমালভ্য সুবিদীর্ণং বিনষ্টং কুর্বীত। তথা সুয়ুদ্ধমপি শত্রুমাপদি কালে সুপলায়িতং কুর্বীতি॥ ১-১৫৩-২২ আশ্রয়সংশ্রয়াৎ আশ্রয়বলাৎ॥ ১-১৫৩-২৩ তৃণময়ং তৃণবন্নিষ্প্রয়োজনম্। ক্ষাত্রং ধর্মং ত্যক্ৎবা শত্রুগৃহে ভিক্ষাভুগপি স্যাদিত্যর্থঃ। মৃগশায়িকাং মৃগহন্তুঃ শয়্যাম্। যথা ব্যাধো মৃগান্বিশ্বাসয়িতুং মৃষা নিদ্রাতি বিশ্বস্তেষু চ তেষু প্রহরত্যেবং স হন্তুমেবাকারং গোপয়তীত্যর্থঃ। উপায়ৈঃ বশে স্থিতং শত্রুমিতি সংবন্ধঃ॥ ১-১৫৩-২৫ ত্রীন্ ঐশ্বর্যমন্ত্রোৎসাহান্। তথা পঞ্চ অমাত্যরাষ্ট্রদুর্গাণি কোশো দণ্ডশ্চ পঞ্চম ইত্যুক্তান্। দণ্ডোত্র সৈন্যং। সপ্ত স্বাম্যমাত্যসুহৃৎকোশরাষ্ট্রদুর্বলানি যেত্যুক্তানি॥ ১-১৫৩-৩০ শৌচমগ্ন্যাধানাদি। অত্র দৃষ্টান্তঃ আনাম্যেতি আনাময়িৎবা॥ ১-১৫৩-৩৭ বভ্রুর্নকুলঃ। মৃগয়ূথপং মহান্তং হরিণম্॥ ১-১৫৩-৪১ মূষিকেণ আঈষদ্ভক্ষিতৈঃ॥ ১-১৫৩-৪৬ মৃগরাজস্য ব্যাঘ্রস্য॥ ১-১৫৩-৫১ গরং মূষিকদষ্টৎবাদ্বিষভূতম্॥ ১-১৫৩-৫৫ অবলুম্পনং গাত্রসংকোচনম্॥ ১-১৫৩-৬৩ সংশয়োপেতৌ সংশয়বিষয়ৌ। শ্রদ্ধাবান্ মদুক্তাদরবান্। শ্রদ্দধানস্তু বধ্যত ইতি ঙ পাঠঃ॥ ১-১৫৩-৬৫ অপধ্বংসেৎ কুৎসয়েৎ॥ ১-১৫৩-৬৯ অনুপ্রাপ্তবধঃ শীঘ্রং হন্তুমিষ্টঃ অধনা দরিদ্রাঃ নাস্তিকাঃ পরলোকশ্রদ্ধারহিতাঃ॥ ১-১৫৩-৭০ নিমগ্নকঃ নম্রশিরাঃ তীক্ষ্ণদংষ্ট্রঃ ব্যাঘ্র ইব। তীক্ষ্ণদংষ্ট্র ইবোরত ইতি ক.ঙ.পাঠঃ॥ ১-১৫৩-৭৩ সুবিহিতঃ সম্যক্ পরীক্ষিতঃ॥ ১-১৫৩-৭৬ সৃষ্টো রৌদ্রায় কর্মণ ইতি ক.ঘ.পাঠঃ॥ ১-১৫৩-৭৯ অনুবন্ধঃ ফলম্॥ ১-১৫৩-৮০ ধর্মমত্যন্তং বিচরতঃ পুংসো দ্বাভ্যামর্থকামাভ্যাং ধনব্যযব্রহ্মচর্যোপক্ষিপ্তাভ্যাং পীডা চিত্তবৈকল্যং ভবতি। সাপি পুংসঃ পীডা ধর্মং নিয়চ্ছতি নিগৃহ্ণাতি। এবমর্থং চাপ্যর্থলুব্ধস্য কামং চাতিপ্রবর্তিন ইতি ব্যাখ্যেয়ং॥ ১-১৫৩-৮৩ উদ্দেশ্যসন্দেহেপি নীতিরবশ্যমনুসরণীয়েত্যাহ। ন সংশয়মিতি। অসংশয়মথারুহ্যেতি ক.ঘ.ট.পাঠঃ॥ ১-১৫৩-৮৪ পরিভবেৎ শোকেন। তমতীতেন নলরামাদ্যাখ্যানেন। দুর্বুদ্ধিং। লোভাদ্যুপহতবুদ্ধিম্। অনাগতেন কালান্তরে তব শ্রেয়ো ভবিষ্যতীত্যাশাপ্রদর্শনেন। পণ্ডিতং প্রত্যুৎপন্নেন বর্তমানেন ধনাদিনা সান্ৎবয়েৎ॥ ১-১৫৩-৮৬ মন্ত্রসংবরণং মন্ত্রগূহনম্॥ ১-১৫৩-৯৫ অঘাসকং অনাহারম্॥ ১-১৫৩-৯৬ সংগতং সখ্যম্॥ ১-১৫৩-৯৮ আরব্ধান্যপি সুপর্যবসিতানি সংপন্নান্যেব পশ্যেরন্॥ ১-১৫৩-৯৯ সংবিধাতব্যং প্রতিকর্তব্যম্॥ ১-১৫৩-১০২ দেশাদ্যনুগুণ উৎসাহোঽপি কর্তব্যো নৎবলসো ভবেৎ। দৈবং প্রাক্তনং কর্ম। যে ধর্মাদয়স্ত্রয়স্তাংশ্চ বিভজ্য তেষাং মধ্যে নৈঃশ্রেয়সৌ শ্রেয়োহেতূ ইতি স্থিতির্নিশ্চয়ঃ॥ ১-১৫৩-১০৩ বালঃ অল্পোপি। বলবৎকুরুতে রূপং বাল্যাদিতি ক.ঙ.ট.পাঠঃ॥ ১-১৫৩-১০৪ আত্মানং সধুক্ষয়তি সহায়াদিনা বর্ধয়তি। সংচয়মিন্ধনানাং পক্ষে শত্রূণাম্॥ ১-১৫৩-১০৬ হেতুতঃ হেৎবন্তরেণ॥ ১-১৫৩-১১১ তদা সপুত্রো রাজা চ শোকার্ত ইতি ঙ পুস্তকপাঠঃ॥ ত্রিপঞ্চাশদধিকশততমোঽধ্যায়ঃ॥ ১৫৩ ॥