আদিপর্ব – অধ্যায় ১৫২

আদিপর্ব – অধ্যায় ১৫২

॥ শ্রীঃ ॥

১.১৫২. অধ্যায়ঃ ১৫২

Mahabharata – Adi Parva – Chapter Topics

যুধিষ্ঠিরঃ সাম্রাজ্যেঽভিষেক্তব্য ইতি পৌরবার্তাং শ্রুৎবা ব্যথিতস্য দুর্যোধনস্য পিত্রা সংবাদঃ॥ ১ ॥

Mahabharata – Adi Parva – Chapter Text

১-১৫২-০ (৬৯৩১)
বৈশম্পায়ন উবাচ। ১-১৫২-০x (৮৯৬)
প্রাণাধিকং ভীমসেনং কৃতবিদ্যং ধনঞ্জয়ম্।
দুর্যোধনো লক্ষয়িৎবা পর্যতপ্যত দুর্মনাঃ॥ ১-১৫২-১ (৬৯৩২)
ততো বৈকর্তনঃ কর্ণঃ শকুনিশ্চাপি সৌবলঃ।
অনেকারভ্যুপায়ৈস্তে জিঘাংসন্তি স্ম পাণ্ডবান্॥ ১-১৫২-২ (৬৯৩৩)
পাণ্ডবা অপি তৎসর্বং প্রতিচক্রুর্যথাবলম্।
উদ্ভাবনমকুর্বন্তো বিদুরস্য মতে স্থিতাঃ॥ ১-১৫২-৩ (৬৯৩৪)
গুণৈঃ সমুদিতান্দৃষ্ট্বা পৌরাঃ পাণ্ডুসুতাংস্তদা।
কথয়াঞ্চক্রিরে তেষাং গুণান্সংসৎসু ভারত॥ ১-১৫২-৪ (৬৯৩৫)
রাজ্যপ্রাপ্তিং চ সংপ্রাপ্তং জ্যেষ্ঠং পাণ্ডুসুতং তদা।
কথয়ন্তি স্ম সংভূয় চৎবরেষু সভাসু চ॥ ১-১৫২-৫ (৬৯৩৬)
প্রজ্ঞাশ্চক্ষুরচক্ষুষ্ট্বাদ্ধৃতরাষ্ট্রো জনেশ্বরঃ।
রাজ্যং ন প্রাপ্তবান্পূর্বং স কথং নৃপতির্ভবেৎ॥ ১-১৫২-৬ (৬৯৩৭)
তথা শান্তনবো ভীষ্মঃ সত্যসন্ধো মহাব্রতঃ।
প্রত্যাখ্যায় পুরা রাজ্যং ন স জাতু গ্রহীষ্যতি॥ ১-১৫২-৭ (৬৯৩৮)
তে বয়ং পাণ্ডবজ্যেষ্ঠং তরুণং বৃদ্ধশীলিনম্।
অভিষিঞ্চাম সাধ্বদ্য সত্যকারুণ্যবেদিনম্॥ ১-১৫২-৮ (৬৯৩৯)
স হি ভীষ্মং শান্তনবং ধৃতরাষ্ট্রং চ ধর্মবিৎ।
সপুত্রং বিবিধৈর্ভোগৈর্যোজয়িষ্যতি পূজয়ন্॥ ১-১৫২-৯ (৬৯৪০)
বৈশম্পায়ন উবাচ। ১-১৫২-১০x (৮৯৭)
তেষাং দুর্যোধনঃ শ্রুৎবা তানি বাক্যানি জল্পতাম্।
যুধিষ্ঠিরানুরক্তানাং পর্যতপ্যত দুর্মতিঃ॥ ১-১৫২-১০ (৬৯৪১)
স তপ্যমানো দুষ্টাত্মা তেষাং বাচো ন চক্ষমে।
ঈর্ষ্যযা চাপি সংতপ্তো ধৃতরাষ্ট্রমুপাগমৎ॥ ১-১৫২-১১ (৬৯৪২)
ততো বিরহিতং দৃষ্ট্বা পিতরং প্রতিপূজ্য সঃ।
পৌরানুরাগসংতপ্তঃ পশ্চাদিদমভাষত॥ ১-১৫২-১২ (৬৯৪৩)
শ্রুতা মে জল্পতাং তাত পৌরাণামশিবা গিরঃ।
ৎবামনাদৃত্য ভীষ্মং চ পতিমিচ্ছন্তি পাণ্ডবম্॥ ১-১৫২-১৩ (৬৯৪৪)
মতমেতচ্চ ভীষ্মস্য ন স রাজ্যং বুভুক্ষতি।
অস্মাকং তু পরাং পীডাং চিকীর্ষন্তি পুরে জনাঃ॥ ১-১৫২-১৪ (৬৯৪৫)
পিতৃতঃ প্রাপ্তবান্রাজ্যং পাণ্ডুরাত্মগুণৈঃ পুরা।
ৎবমন্ধগুণসংয়োগাৎপ্রাপ্তং রাজ্যং ন লব্ধবান্॥ ১-১৫২-১৫ (৬৯৪৬)
স এষ পাণ্ডোর্দায়াদ্যং যদি প্রাপ্নোতি পাণ্ডবঃ।
তস্য পুত্রো ধ্রুবং প্রাপ্তস্তস্য তস্যাপি চাপরঃ॥ ১-১৫২-১৬ (৬৯৪৭)
তে বয়ং রাজবংশেন হীনাঃ সহ সুতৈরপি।
অবজ্ঞাতা ভবিষ্যামো লোকস্য জগতীপতে॥ ১-১৫২-১৭ (৬৯৪৮)
সততং নিরয়ং প্রাপ্তাঃ পরপিণ্ডোপজীবিনঃ।
ন ভবেম যথা রাজংস্তথা নীতির্বিধীয়তাম্॥ ১-১৫২-১৮ (৬৯৪৯)
যদি ৎবং হি পুরা রাজন্নিদং রাজ্যমবাপ্তবান্।
ধ্রুবং প্রাপ্স্যাম চ বয়ং রাজ্যমপ্যবশে জনে॥ ১-১৫২-১৯ (৬৯৫০)
`বৈশম্পায়ন উবাচ। ১-১৫২-২০x (৮৯৮)
ধৃতরাষ্ট্রস্তু পুত্রস্য শ্রুৎবা বচনমীদৃশম্।
মুহূর্তমিব সংচিন্ত্য দুর্যোধনমথাব্রবীৎ॥ ১-১৫২-২০ (৬৯৫১)
ধর্মনিত্যস্তথা পাণ্ডুঃ সুপ্রীতো ময়ি কৌরবঃ।
সর্বেষু জ্ঞাতিষু তথা মদীয়েষু বিশেষতঃ॥ ১-১৫২-২১ (৬৯৫২)
নাত্র কিংচন জানাতি ভোজনাদি চিকীর্ষিতম্।
নিবেদয়তি তৎসর্বং ময়ি ধর্মভৃতাং বরঃ॥ ১-১৫২-২২ (৬৯৫৩)
তস্য পুত্রো যথা পাণ্ডুস্তথা ধর্মপরঃ সদা।
গুণাবাঁল্লোকবিখ্যাতো নগরে চ প্রতিষ্ঠিতঃ॥ ১-১৫২-২৩ (৬৯৫৪)
স কথং শক্যতেঽস্মাভিরপাক্রষ্টুং নরর্ষভঃ।
রাজ্যমেষ হি নঃ প্রাপ্তঃ সসহয়ো বিশেষতঃ॥ ১-১৫২-২৪ (৬৯৫৫)
ভৃতা হি পাণ্ডুনাঽমাত্যা বলং চ সততং মতম্।
ধৃতাঃ পুত্রাশ্চ পৌত্রাশ্চ তেষামপি বিশেষতঃ॥ ১-১৫২-২৫ (৬৯৫৬)
তে তথা সংস্তুতাস্তাত বিষয়ে পাণ্ডুনা নরাঃ।
কথং যুধিষ্ঠিরস্যার্থে ন নো হন্যুঃ সবান্ধবান্॥ ১-১৫২-২৬ (৬৯৫৭)
নৈতে বিষয়মিচ্ছেয়ুর্ধর্মত্যাগে বিশেষতঃ।
তে বয়ং কৌরবেন্দ্রাণামেতেষাং চ মহাত্মনাম্॥ ১-১৫২-২৭ (৬৯৫৮)
কথং ন বাচ্যতাং তাত গচ্ছেম জগতস্তথা॥ ১-১৫২-২৮ (৬৯৫৯)
দুর্যোধন উবাচ। ১-১৫২-২৯x (৮৯৯)
মধ্যস্থঃ সততং ভীষ্মো দ্রোণপুত্রো ময়ি স্থিতঃ।
যতঃ পুতস্ততো দ্রোণো ভবিতা নাত্র সংশয়ঃ॥ ১-১৫২-২৯ (৬৯৬০)
কৃপঃ শারদ্বতশ্চৈব যত এব বয়ং ততঃ।
বাগিনেয়ং ততো দ্রৌণিং ন ত্যক্ষ্যতি কথংচন॥ ১-১৫২-৩০ (৬৯৬১)
ক্ষত্তা তু বন্ধুরস্মাকং প্রচ্ছন্নস্তু ততঃ পরৈঃ।
ন চৈকঃ স সমর্থোঽস্মান্পাণ্ডবার্থে প্রবাধিতুম্॥ ১-১৫২-৩১ (৬৯৬২)
সুবিস্রব্ধান্পাণ্ডুসুতান্সহ মাত্রা বিবাসয়।
বারণাবতমদ্যৈব নাত্র দোষো ভবিষ্যতি॥ ১-১৫২-৩২ (৬৯৬৩)
বিনিদ্রাকরণং ঘোরং হৃদি শল্যমিবার্পিতম্।
শোপকপাবকমুদ্ধূতং কর্মণানেন নাশয়॥’ ॥ ১-১৫২-৩৩ (৬৯৬৪)

ইতি শ্রীমন্মহাভারতে আদিপর্বণি সংভবপর্বণি দ্বিপঞ্চাশদধিকশততমোঽধ্যায়ঃ॥ ১৫২ ॥