আদিপর্ব – অধ্যায় ১৪৭

আদিপর্ব – অধ্যায় ১৪৭

॥ শ্রীঃ ॥

১.১৪৭. অধ্যায়ঃ ১৪৭

Mahabharata – Adi Parva – Chapter Topics

কর্ণপিতুরধিরথস্য রঙ্গপ্রবেশঃ॥ ১ ॥ ভীমেন কর্ণস্যাধিক্ষেপঃ॥ ২ ॥ সর্বেষাং রঙ্গান্নিষ্ক্রমণম্॥ ৩ ॥

Mahabharata – Adi Parva – Chapter Text

১-১৪৭-০ (৬৬৬৭)
বৈশম্পায়ন উবাচ। ১-১৪৭-০x (৮৭৪)
ততঃ স্রস্তোত্তরপটঃ সপ্রস্বেদঃ সবেপথুঃ।
বিবেশাধিরথো রঙ্গং যষ্টিপ্রাণো হ্বয়ন্নিব॥ ১-১৪৭-১ (৬৬৬৮)
তমালোক্য ধনুস্ত্যক্ৎবা পিতৃগৌরবয়ন্ত্রিতঃ।
কর্ণোঽভিষেকার্দ্রশিরাঃ শিরসা সমবন্দত॥ ১-১৪৭-২ (৬৬৬৯)
ততঃ পাদাববচ্ছাদ্য পটান্তেন সসংভ্রমঃ।
পুত্রেতি পরিপূর্ণার্থমব্রবীদ্রথসারথিম্॥ ১-১৪৭-৩ (৬৬৭০)
পরিষ্বজ্য চ তস্যাথ মূর্ধানং স্নেহবিক্লবঃ।
অঙ্গরাজ্যাভিষেকার্দ্রমশ্রুভিঃ সিষিচে পুনঃ॥ ১-১৪৭-৪ (৬৬৭১)
তং দৃষ্ট্বা সূতপুত্রোঽয়মিতি সংচিন্ত্য পাণ্ডবঃ।
ভীমসেনস্তদা বাক্যমব্রবীৎপ্রহসন্নিব॥ ১-১৪৭-৫ (৬৬৭২)
ন ৎবমর্হসি পার্থেন সূতপুত্র রণে বধম্।
কুলস্য সদৃশস্তূর্ণং প্রতোদো গৃহ্যতাং ৎবয়া॥ ১-১৪৭-৬ (৬৬৭৩)
অঙ্গরাজ্যং চ নার্হস্ৎবমুপভোক্তুং নরাধম।
শ্বা হুতাশসমীপস্থং পুরোডাশমিবাধ্বরে॥ ১-১৪৭-৭ (৬৬৭৪)
বৈশম্পায়ন উবাচ। ১-১৪৭-৮x (৮৭৫)
এবমুক্তস্ততঃ কর্ণঃ কিংচিৎপ্রস্ফুরিতাধরঃ।
গগনস্থং বিনিঃশ্বস্য দিবাকরমুদৈক্ষত॥ ১-১৪৭-৮ (৬৬৭৫)
ততো দুর্যোধনঃ কোপাদুৎপপাত মহাবলঃ।
ভ্রাতৃপদ্মবনাত্তস্মান্মদোৎকট ইব দ্বিপঃ॥ ১-১৪৭-৯ (৬৬৭৬)
সোঽব্রবীদ্ভীমকর্মাণং ভীমসেনমবস্থিতম্।
বৃকোদর ন যুক্তং তে বচনং বক্তুমীদৃশম্॥ ১-১৪৭-১০ (৬৬৭৭)
ক্ষত্রিয়াণাং বলং জ্যষ্ঠং যোক্তব্যং ক্ষত্রবন্ধুনা।
শূরাণাং চ নদীনাং চ প্রভবো দুর্বিভাবনঃ॥ ১-১৪৭-১১ (৬৬৭৮)
সলিলাদুত্থিতো বহ্নির্যেন ব্যাপ্তং চরাচরম্।
দধীচস্যাস্থিতো বজ্রং কৃতং দানবসূদনম্॥ ১-১৪৭-১২ (৬৬৭৯)
আগ্নেয়ঃ কৃত্তিকাপুত্রো রৌদ্রো গাঙ্গেয় ইত্যপি।
শ্রূয়তে ভগবান্দেবঃ সর্বগুহ্যময়ো গুহঃ॥ ১-১৪৭-১৩ (৬৬৮০)
ক্ষত্রিয়েভ্যশ্চ যে জাতা ব্রাহ্মণাস্তে চ তে শ্রুতাঃ।
বিশ্বামিত্রপ্রভৃতয়ঃ প্রাপ্তা ব্রহ্মৎবমব্যযম্॥ ১-১৪৭-১৪ (৬৬৮১)
আচার্যঃ কলশাজ্জাতো দ্রোণঃ শস্ত্রভৃতাং বরঃ।
গৌতমস্যান্ববায়ে চ শরস্তম্বাচ্চ গৌতমঃ॥ ১-১৪৭-১৫ (৬৬৮২)
ভবতাং চ যথা জন্ম তদপ্যাগমিতং ময়া।
সকুণ্ডলং সকবচং সর্বলক্ষণলক্ষিতম্।
কথমাদিত্যসদৃশং মৃগী ব্যাঘ্রং জনিষ্যতি॥ ১-১৪৭-১৬ (৬৬৮৩)
পৃথিবীরাজ্যমর্হোঽয়ং নাঙ্গরাজ্যং নরেশ্বরঃ।
অনেন বাহুবীর্যেণ ময়া চাজ্ঞানুবর্তিনা॥ ১-১৪৭-১৭ (৬৬৮৪)
যস্য বা মনুজস্যেদং ন ক্ষান্তং মদ্বিচেষ্টিতম্।
রথমারুহ্য পদ্ভ্যাং স বিনাময়তু কার্মুকম্॥ ১-১৪৭-১৮ (৬৬৮৫)
ততঃ সর্বস্য রঙ্গস্য হাহাকারো মহানভূৎ।
সাধুবাদানুসংবদ্ধঃ সূর্যশ্চাস্তমুপাগমৎ॥ ১-১৪৭-১৯ (৬৬৮৬)
ততো দুর্যোধনঃ কর্ণমালম্ব্যাগ্রকরে নৃপঃ।
দীপিকাভিঃ কৃতালোকস্তস্মাদ্রঙ্গাদ্বিনির্যযৌ॥ ১-১৪৭-২০ (৬৬৮৭)
পাণ্ডবাশ্চ সহদ্রোণাঃ সকৃপাশ্চ বিশাংপতে।
ভীষ্মেণ সহিতাঃ সর্বে যয়ুঃ স্বং স্বং নিবেশনম্॥ ১-১৪৭-২১ (৬৬৮৮)
অর্জুনেতি জনঃ কশ্চিৎকশ্চিৎকর্ণেতি ভারত।
কশ্চিদ্দুর্যোধনেত্যেবং ব্রুবন্তঃ প্রস্থিতাস্তদা॥ ১-১৪৭-২২ (৬৬৮৯)
কুন্ত্যাশ্চ প্রত্যভিজ্ঞায় দিব্যলক্ষণসূচিতম্।
পুত্রমঙ্গেশ্বরং স্নেহাচ্ছন্না প্রীতিরজায়ত॥ ১-১৪৭-২৩ (৬৬৯০)
দুর্যোধনস্যাপি তদা কর্ণমাসাদ্য পার্থিব।
ভয়মর্জুনসংজাতং ক্ষিপ্রমন্তরধীয়ত॥ ১-১৪৭-২৪ (৬৬৯১)
স চাপি বীরঃ কৃতশস্ত্রনিশ্রমঃ
পরেণ সাম্নাঽভ্যবদৎসুয়োধনম্।
যুধিষ্ঠিরস্যাপ্যভবত্তদা মতি-
র্ন কর্ণতুল্যোঽস্তি ধনুর্ধরঃ ক্ষিতৌ॥ ॥ ১-১৪৭-২৫ (৬৬৯২)

ইতি শ্রীমন্মহাভারতে আদিপ্রবণি সংভবপর্বণি সপ্তচৎবারিংশদধিকশততমোঽধ্যায়ঃ॥ ১৪৭ ॥

Mahabharata – Adi Parva – Chapter Footnotes

১-১৪৭-১৮ যস্য যেন ন ক্ষান্তং ন সোঢম্॥ ১-১৪৭-২৫ নিশ্রমো নিতরাং শ্রমঃ॥ সপ্তচৎবারিংশদধিকশততমোঽধ্যায়ঃ॥ ১৪৭ ॥