আদিপর্ব – অধ্যায় ১৪২

আদিপর্ব – অধ্যায় ১৪২

॥ শ্রীঃ ॥

১.১৪২. অধ্যায়ঃ ১৪২

Mahabharata – Adi Parva – Chapter Topics

দ্রোণেনাস্ত্রশিক্ষায়াং কুরুপাণ্ডবানাং শিষ্যৎবেনাঙ্গীকারঃ॥ ১ ॥ বিদ্যাভ্যাসসমাপ্ত্যনন্তরং বহুশঃ পরীক্ষিতস্যার্জুনস্য দ্রোণাচার্যাদ্বিশেষশিক্ষাপ্রাপ্তিঃ॥ ২ ॥ মৃণ্ময়দ্রোণপ্রতিমারাধনেন একলব্যস্য ধনুর্বেদপ্রতিভানং॥ ৩ ॥ মৃগয়ার্থং গতেষু কুরুপাণ্ডবেষু একলব্যেন বাণৈঃ শুনো মুখপূরণম্॥ ৪ ॥ অর্জুনপ্রার্থনয়া দ্রোণেনৈকলব্যং প্রতিগম্য গুরুদক্ষিণাৎবেন দক্ষিণাঙ্গুষ্ঠ যাচনম্॥ ৫ ॥ একলব্যেন দক্ষিণাঙ্গুষ্ঠস্য ছিৎবা দানম্॥ ৬ ॥ দ্রোণেন শিষ্যপরীক্ষা॥ ৭ ॥ শিষ্যপরীক্ষায়াং যুধিষ্ঠিরা দীনাং নিরাকরণম্॥ ৮ ॥

Mahabharata – Adi Parva – Chapter Text

১-১৪২-০ (৬৪২১)
`বৈশম্পায়ন উবাচ। ১-১৪২-০x (৮৪০)
প্রতিজগ্রাহ তং ভীষ্মো গুরুং পাণ্ডুসুতৈঃ সহ।
পৌত্রানাদায় তান্সর্বান্বসূনি বিবিধানি চ॥ ১-১৪২-১ (৬৪২২)
শিষ্য ইতি দদৌ রাজন্দ্রোণায় বিধিপূর্বকম্।
তদা দ্রোণোঽব্রবীদ্বাক্যং ভীষ্মং বুদ্ধিমতাং বরম্॥ ১-১৪২-২ (৬৪২৩)
কৃপস্তিষ্ঠতি চাচার্যঃ শস্ত্রজ্ঞঃ প্রাজ্ঞসংমতঃ।
ময়ি তিষ্ঠতি চেদ্বিপ্রো বৈমনস্যং গমিষ্যতি॥ ১-১৪২-৩ (৬৪২৪)
যুষ্মান্কিংচিচ্চ যাচিৎবা ধনং সংগৃহ্য হর্ষিতঃ।
স্বমাশ্রমপদং রাজন্গমিষ্যামি যথাগতম্॥ ১-১৪২-৪ (৬৪২৫)
এবমুক্তে তু বিপ্রেন্দ্রং ভীষ্মঃ প্রহরতাং বরঃ।
অব্রবীদ্দ্রোণমাচার্যমুখ্যং শস্ত্রবিদাং বরম্॥ ১-১৪২-৫ (৬৪২৬)
কৃপস্তিষ্ঠতু পূজ্যশ্চ ভর্তব্যশ্চ ময়া সদা।
ৎবং গুরুর্ভব পৌত্রাণামাচার্যস্ৎবং মতো মম।
প্রতিগৃহ্ণীষ্ব পুত্রাংস্ৎবমস্ত্রজ্ঞান্কুরু বৈ সদা॥’ ১-১৪২-৬ (৬৪২৭)
বৈশম্পায়ন উবাচ। ১-১৪২-৭x (৮৪১)
ততঃ সংপূজিতো দ্রোণো ভীষ্মেণ দ্বিপদাং বরঃ।
বিশশ্রাম মহাতেজাঃ পূজিতঃ কুরুবেশ্মনি॥ ১-১৪২-৭ (৬৪২৮)
বিশ্রান্তেঽথ গুরৌ তস্মিন্পৌত্রানাদায় কৌরবান্।
শিষ্যৎবেন দদৌ ভীষ্মো বসূনি বিবিধানি চ॥ ১-১৪২-৮ (৬৪২৯)
গৃহং চ সুপরিচ্ছন্নং ধনধান্যসমাকুলম্।
ভারদ্বাজায় সুপ্রীতঃ প্রত্যপাদয়ত প্রভুঃ॥ ১-১৪২-৯ (৬৪৩০)
স তাঞ্শিষ্যান্মহেষ্বাসঃ প্রতিজগ্রাহ কৌরবান্।
পাণ্ডবান্ধার্তরাষ্ট্রাংশ্চ দ্রোণো মুদিতমানসঃ॥ ১-১৪২-১০ (৬৪৩১)
প্রতিগৃহ্য চ তান্সর্বান্দ্রোণো বচনমব্রবীৎ।
রহস্যেকঃ প্রতীতাত্মা কৃতোপসদনাংস্তথা॥ ১-১৪২-১১ (৬৪৩২)
দ্রোণ উবাচ। ১-১৪২-১২x (৮৪২)
কার্যং মে কাঙ্ক্ষিতং কিংচিদ্ধৃদি সংপরিবর্ততে।
কৃতাস্ত্রৈস্তৎপ্রদেয়ং মে তদেতদ্বদতানঘাঃ॥ ১-১৪২-১২ (৬৪৩৩)
বৈশম্পায়ন উবাচ। ১-১৪২-১৩x (৮৪৩)
তচ্ছ্রুৎবা কৌরবেয়াস্তে তূষ্ণীমাসন্বিশাংপতে।
অর্জুনস্তু ততঃ সর্বং প্রতিজজ্ঞে পরন্তপ॥ ১-১৪২-১৩ (৬৪৩৪)
ততোঽর্জুনং তদা মূর্ধ্নি সমাঘ্রায় পুনঃ পুনঃ।
প্রীতিপূর্বং পরিষ্বজ্য প্ররুরোদ মুদা তদা॥ ১-১৪২-১৪ (৬৪৩৫)
`অশ্বত্থামানমাহূয় দ্রোণো বচনমব্রবীৎ।
সখায়ং বিদ্ধি তে পার্থং ময়া দত্তঃ প্রগৃহ্যতাম্॥ ১-১৪২-১৫ (৬৪৩৬)
সাধুসাধ্বিতি তং পার্থঃ পরিষ্বজ্যেদমব্রবীৎ।
অদ্যপ্রভৃতি বিপ্রেন্দ্র পরবানস্মি ধর্মতঃ॥ ১-১৪২-১৬ (৬৪৩৭)
শিষ্যোঽহং ৎবৎপ্রসাদেন জীবামি দ্বিজসত্তম।
ইত্যুক্ৎবা তু তদা পার্থঃ পাদৌ জগ্রাহ পাণ্ডবঃ’॥ ১-১৪২-১৭ (৬৪৩৮)
ততো দ্রোণঃ পাণ্ডুপুত্রানস্ত্রাণি বিবিধানি চ।
গ্রাহয়ামাস দিব্যানি মানুষাণি চ বীর্যবান্॥ ১-১৪২-১৮ (৬৪৩৯)
রাজপুত্রাস্তথা চান্যে সমেত্য ভরতর্ষভ।
অভিজগ্মুস্ততো দ্রোণমস্ত্রার্থে দ্বিজসত্তমম্॥ ১-১৪২-১৯ (৬৪৪০)
বৃষ্ণয়শ্চান্ধকাশ্চৈব নানাদেশ্যাশ্চ পার্থিবাঃ।
সূতপুত্রশ্চ রাধেয়ো গুরুং দ্রোণমিয়াত্তদা॥ ১-১৪২-২০ (৬৪৪১)
স্পর্ধমানস্তু পার্থেন সূতপুত্রোঽত্যমর্ষণঃ।
দুর্যোধনং সমাশ্রিত্য সোঽবমন্যত পাণ্ডবান্॥ ১-১৪২-২১ (৬৪৪২)
অভ্যযাৎস ততো দ্রোণং ধনুর্বেদচিকীর্ষয়া।
শিক্ষাভুজবলোদ্যোগৈস্তেষু সর্বেষু পাণ্ডবঃ॥ ১-১৪২-২২ (৬৪৪৩)
অস্ত্রবিদ্যানুরাগাচ্চ বিশিষ্টোঽভবদর্জুনঃ।
তুল্যেষ্বস্ত্রপ্রয়োগেষু লাঘবে সৌষ্টবেষু চ॥ ১-১৪২-২৩ (৬৪৪৪)
সর্বেষামেব শিষ্যাণাং বভূবাভ্যধিকোঽর্জুনঃ।
ঐন্দ্রিমপ্রতিমং দ্রোণ উপদেশেষ্বমন্যত॥ ১-১৪২-২৪ (৬৪৪৫)
এবং সর্বকুমারাণামিষ্বস্ত্রং প্রত্যপাদয়ৎ।
কমণ্ডলুং চ সর্বেষাং প্রায়চ্ছচ্চিরকারণাৎ॥ ১-১৪২-২৫ (৬৪৪৬)
পুত্রায় চ দদৌ কুম্ভমবিলম্বনকারণাৎ।
যাবত্তে নোপগচ্ছ্তি তাবদস্মৈ পরাং ক্রিয়াম্॥ ১-১৪২-২৬ (৬৪৪৭)
দ্রোণ আচষ্ট পুত্রায় কর্ম তজ্জিষ্ণুরৌহত।
ততঃ স বারুণাস্ত্রেণ পূরয়িৎবা কমণ্ডলুম্॥ ১-১৪২-২৭ (৬৪৪৮)
সমমাচার্যপুত্রেণ গুরুমভ্যেতি ফাল্গুনঃ।
আচার্যপুত্রাত্তস্মাত্তু বিশেষোপচয়েঽপৃথক্॥ ১-১৪২-২৮ (৬৪৪৯)
ন ব্যহীয়ত মেধাবী পার্থোঽপ্যস্ত্রবিদাং বরঃ।
অর্জুনঃ পরমং যত্নমাতিষ্ঠদ্গুরুপূজনে॥ ১-১৪২-২৯ (৬৪৫০)
অস্ত্রে চ পরমং যোগং প্রিয়ো দ্রোণস্য চাভবৎ।
তং দৃষ্ট্বা নিত্যমুদ্যুক্তমিষ্বস্ত্রং প্রতি ফাল্গুনম্॥ ১-১৪২-৩০ (৬৪৫১)
আহূয় বচনং দ্রোণো রহঃ সূদমভাষত।
অন্ধকারেঽর্জুনায়ান্নং ন দেয়ং তে কদাচন।
ন চাখ্যেয়মিদং চাপি মদ্বাক্যং বিজয়েৎবয়া॥ ১-১৪২-৩১ (৬৪৫২)
ততঃ কদাচিদ্ভুঞ্জানে প্রববৌ বায়ুরর্জুনে।
তেন তত্র প্রদীপঃ স দীপ্যমানো বিলোপিতঃ॥ ১-১৪২-৩২ (৬৪৫৩)
ভুক্ত এব তু কৌন্তেয়ো নাস্যাদন্যত্র বর্ততে।
হস্তস্তেজস্বিনস্তস্য অনুগ্রহণকারণাৎ॥ ১-১৪২-৩৩ (৬৪৫৪)
তদভ্যাসকৃতং মৎবা রাত্রাবপি স পাণ্ডবঃ।
যোগ্যাং চক্রে মহাবাহুর্ধনুষা পাণ্ডুনন্দনঃ॥ ১-১৪২-৩৪ (৬৪৫৫)
তস্য জ্যাতলনির্ঘোষং দ্রোণঃ শুশ্রাব ভারত।
উপেত্য চৈনমুত্থায় পরিষ্বজ্যেদমব্রবীৎ॥ ১-১৪২-৩৫ (৬৪৫৬)
দ্রোণ উবাচ। ১-১৪২-৩৬x (৮৪৪)
প্রয়তিষ্যে তথা কর্তুং যথা নান্যো ধনুর্ধরঃ।
ৎবৎসমো ভবিতা লোকে সত্যমেতদ্ব্রবীমি তে॥ ১-১৪২-৩৬ (৬৪৫৭)
বৈশম্পায়ন উবাচ। ১-১৪২-৩৭x (৮৪৫)
ততো দ্রোণোঽর্জুনং ভূয়ো হয়েষু চ গজেষু চ।
রথেষু ভূমাবপি চ রণশিক্ষামশিক্ষয়ৎ॥ ১-১৪২-৩৭ (৬৪৫৮)
গদায়ুদ্ধেঽসিচর্যায়াং তোমরপ্রাসশক্তিষু।
দ্রোণঃ সংকীর্ণয়ুদ্ধে চ শিক্ষয়ামাস কৌরবান্॥ ১-১৪২-৩৮ (৬৪৫৯)
তস্য তৎকৌশলং শ্রুৎবা ধনুর্বেদজিঘৃক্ষবঃ।
সজানো রাজপুত্রাশ্চ সমাজগ্মুঃ সহস্রশঃ॥ ১-১৪২-৩৯ (৬৪৬০)
`তান্সর্বাঞ্শিক্ষয়ামাস দ্রোণঃ শস্ত্রভৃতাং বরঃ।’
ততো নিষাদরাজস্য হিরণ্যধনুষঃ সুতঃ।
একলব্যো মহারাজ দ্রোণমভ্যাজগাম হ॥ ১-১৪২-৪০ (৬৪৬১)
ন স তং প্রতিজগ্রাহ নৈষাদিরিতি চিন্তয়ন্।
শিষ্যং ধনুষি ধর্মজ্ঞস্তেষামেবান্ববেক্ষয়া॥ ১-১৪২-৪১ (৬৪৬২)
`দ্রোণ উবাচ। ১-১৪২-৪২x (৮৪৬)
শিষ্যোঽসি মম নৈষাদে প্রয়োগে বলত্তরঃ।
নিবর্তস্ব গৃহানেব অনুজ্ঞাতোঽসি নিত্যশঃ॥ ১-১৪২-৪২ (৬৪৬৩)
বৈশম্পায়ন উবাচ।’ ১-১৪২-৪৩x (৮৪৭)
স তু দ্রোণস্য শিরসা পাদৌ গৃহ্য পরন্তপঃ।
অরণ্যমনুসংপ্রাপ্য কৃৎবা দ্রোণং মহীময়ম্॥ ১-১৪২-৪৩ (৬৪৬৪)
তস্মিন্নাচার্যবৃত্তিং চ পরমামাস্থিতস্তদা।
ইষ্বস্ত্রে যোগমাতস্থে পরং নিয়মমাস্থিতঃ॥ ১-১৪২-৪৪ (৬৪৬৫)
পরয়া শ্রদ্ধয়োপেতো যোগেন পরমেণ চ।
বিমোক্ষাদানসন্ধানে লঘুৎবং পরমাপ সঃ॥ ১-১৪২-৪৫ (৬৪৬৬)
`লাঘবং চাস্ত্রয়োগং চ নচিরাৎপ্রত্যপদ্যত।’
অথ দ্রোণাভ্যনুজ্ঞাতাঃ কদাচিৎকুরুপাণ্ডবাঃ।
রথৈর্বিনির্যযুঃ সর্বে মৃগয়ামরিমর্দনাঃ॥ ১-১৪২-৪৬ (৬৪৬৭)
তত্রোপকরণং গৃহ্য নরঃ কশ্চিদ্যদৃচ্ছয়া।
রাজন্ননুজগামৈকঃ শ্বানমাদায় পাণ্ডবান্॥ ১-১৪২-৪৭ (৬৪৬৮)
তেষাং বিচরতাং তত্র তত্তৎকর্মচিকীর্ষয়া।
শ্বাচরন্স পথা ক্রীডন্নৈষাদিং প্রতি জগ্মিবান্॥ ১-১৪২-৪৮ (৬৪৬৯)
স কৃষ্ণমলদিগ্ধাঙ্গং কৃষ্ণাজিনজটাঘরম্।
নৈষাদিং শ্বা সমালক্ষ্য ভষংস্তস্থৌ তদন্তিকে॥ ১-১৪২-৪৯ (৬৪৭০)
তদা তস্যাথ ভষতঃ শুনঃ সপ্ত শরান্মুখে।
লাঘবং দর্শন্নস্ত্রে মুমোচ যুগপদ্যথা॥ ১-১৪২-৫০ (৬৪৭১)
স তু শ্বা শরপূর্ণাস্যঃ পাণ্ডবানাজগাম হ।
তং দৃষ্ট্বা পাণ্ডবা বীরাঃ পরং বিস্ময়মাগতাঃ॥ ১-১৪২-৫১ (৬৪৭২)
লাঘবং শব্ধবেধিৎবং দৃষ্ট্বা তৎপরমং তদা।
প্রেক্ষ্য তং ব্রীডিতাশ্চাসন্প্রশশংসুশ্চ সর্বশঃ॥ ১-১৪২-৫২ (৬৪৭৩)
তং ততোঽন্বেষমাণাস্তে বনে বননিবাসিনম্।
দদৃশুঃ পাণ্ডবা রাজন্নস্যন্তমনিশং শরান্॥ ১-১৪২-৫৩ (৬৪৭৪)
ন চৈনমভ্যজানংস্তে তদা বিকৃতদর্শনম্।
তথৈনং পরিপপ্রচ্ছ্রুঃ কো ভবান্কস্য বেত্যুত॥ ১-১৪২-৫৪ (৬৪৭৫)
একলব্য উবাচ। ১-১৪২-৫৫x (৮৪৮)
নিষাদাধিপতের্বীরা হিরণ্যধনুষঃ সুতম্।
দ্রোণশিষ্যং চ মাং বিত্ত ধুর্বেদকৃতশ্রমম্॥ ১-১৪২-৫৫ (৬৪৭৬)
বৈশম্পায়ন উবাচ। ১-১৪২-৫৬x (৮৪৯)
তে তমাজ্ঞায় তত্ৎবেন পুনরাগম্য পাণ্ডবাঃ।
যথা বৃত্তং বনে সর্বং দ্রোণায়াচখ্যুরদ্ভুতম্॥ ১-১৪২-৫৬ (৬৪৭৭)
কৌন্তেয়স্ৎবর্জুনো রাজন্নেকলব্যমনুস্মরন্।
রহো দ্রোণং সমাসাদ্য প্রণয়াদিদমব্রবীৎ॥ ১-১৪২-৫৭ (৬৪৭৮)
নন্বহং পরিরভ্যৈকঃ প্রীতিপূর্বমিদং বচঃ।
ভবতোক্তো ন মে শিষ্যস্ৎবদ্বিশিষ্টো ভবিষ্যতি॥ ১-১৪২-৫৮ (৬৪৭৯)
অথ কস্মান্মদ্বিশিষ্টো লোকাদপি চ বীর্যবান্।
অন্যোঽস্তি ভবতঃ শিষ্যো নিষাদাধিপতেঃ সুতঃ। ১-১৪২-৫৯ (৬৪৮০)
বৈশম্পায়ন উবাচ। ১-১৪২-৬০x (৮৫০)
মুহূর্তমিব তং দ্রোণশ্চিন্তয়িৎবা বিনিশ্চয়ম্।
সব্যসাচিনমাদায় নৈষাদিং প্রতি জগ্মিবান্॥ ১-১৪২-৬০ (৬৪৮১)
দদর্শ মলদিগ্ধাঙ্গং জটিলং চীরবাসসম্।
একলব্যং ধনুষ্পাণিমস্যন্তমনিশং শরান্॥ ১-১৪২-৬১ (৬৪৮২)
একলব্যস্তু তং দৃষ্ট্বা দ্রোণমায়ান্তমন্তিকাৎ।
অভিগম্যোপসংগৃহ্য জগাম শিরসা মহীম্॥ ১-১৪২-৬২ (৬৪৮৩)
পূজয়িৎবা ততো দ্রোণং বিধিবৎস নিষাদজঃ।
নিবেদ্য শিষ্যমাত্মানং তস্থৌ প্রাঞ্জলিরগ্রতঃ॥ ১-১৪২-৬৩ (৬৪৮৪)
ততো দ্রোণোঽব্রবীদ্রাজন্নেকলব্যমিদং বচঃ।
যদি শিষ্যোঽসি মে বীর বেতনং দীয়তাং মম॥ ১-১৪২-৬৪ (৬৪৮৫)
একলব্যস্তু তচ্ছ্রুৎবা প্রীয়মাণোঽব্রবীদিদম্।
কিং প্রয়চ্ছামি ভগবন্নাজ্ঞাপয়তু মাং গুরুঃ॥ ১-১৪২-৬৫ (৬৪৮৬)
ন হি কিংচিদদেয়ং মে গুরবে ব্রহ্মবিত্তম। ১-১৪২-৬৬ (৬৪৮৭)
বৈশম্পায়ন উবাচ।
তমব্রবীত্ৎবয়াঙ্গুষ্ঠো দক্ষিণো দীয়তামিতি॥ ১-১৪২-৬৬x (৮৫১)
একলব্যস্তু তচ্ছ্রুৎবা বচো দ্রোণস্য দারুণম্।
প্রতিজ্ঞামাত্মনো রক্ষন্সত্যে চ নিয়তঃ সদা॥ ১-১৪২-৬৭ (৬৪৮৮)
তথৈব হৃষ্টবদনস্তথৈবাদীনমানসঃ।
ছিত্ৎবাঽবিচার্য তং প্রাদাদ্দ্রোণায়াঙ্গুষ্ঠমাত্মনঃ॥ ১-১৪২-৬৮ (৬৪৮৯)
ততঃ শরং তু নৈষাদিরঙ্গুলীভির্ব্যকর্ষত।
ন তথা চ স শীঘ্রোঽভূদ্যথা পূর্বং নরাধিপ॥ ১-১৪২-৬৯ (৬৪৯০)
ততোঽর্জুনঃ প্রীতমনা বভূব বিগতজ্বরঃ।
দ্রোণশ্চ সত্যবাগাসীন্নান্যোঽভিভবিতাঽর্জুনং॥ ১-১৪২-৭০ (৬৪৯১)
দ্রোণস্য তু তদা শিষ্যৌ গদায়োগ্যৌ বভূবতুঃ।
দুর্যোধনশ্চ ভীমশ্চ সদা সংরব্ধণানসৌ॥ ১-১৪২-৭১ (৬৪৯২)
অশ্বত্থামা রহস্যেষু সর্বেষ্বভ্যধিকোঽভবৎ।
তথাঽতিপুরুষানন্যান্ৎসারুকৌ যমজাবুভৌ॥ ১-১৪২-৭২ (৬৪৯৩)
যুধিষ্ঠিরো রথশ্রেষ্ঠঃ সর্বত্র তু ধনঞ্জয়ঃ।
প্রথিতঃ সাগরান্তায়াং রথয়ূথপয়ূথপঃ॥ ১-১৪২-৭৩ (৬৪৯৪)
বুদ্ধিয়োগবলোৎসাহঃ সর্বাস্ত্রেষু চ নিষ্ঠিতঃ।
অস্ত্রে গুর্বনুরাগে চ বিশিষ্টোঽভবদর্জুনঃ॥ ১-১৪২-৭৪ (৬৪৯৫)
তুল্যেষ্বস্ত্রোপদেশেষু সৌষ্ঠবেন চ বীর্যবান্।
একঃ সর্বকুমারাণাং বভূবাতিরথোঽর্জুনঃ॥ ১-১৪২-৭৫ (৬৪৯৬)
প্রাণাধিকং ভীমসেনং কৃতবিদ্যং ধনঞ্জয়ম্।
ধার্তরাষ্ট্রা দুরাত্মানো নামৃষ্যন্ত পরস্পরম্॥ ১-১৪২-৭৬ (৬৪৯৭)
তাংস্তু সর্বান্সমানীয় সর্ববিদ্যাস্ত্রশিক্ষিতান্।
দ্রোণঃ প্রহরণজ্ঞানে জিজ্ঞাসুঃ পুরুষর্ষভঃ॥ ১-১৪২-৭৭ (৬৪৯৮)
কৃত্রিমং ভাসমারোপ্য বৃক্ষাগ্রে শিল্পিভিঃ কৃতম্।
অবিজ্ঞাতং কুমারাণাং লক্ষ্যভূতমুপাদিশৎ॥ ১-১৪২-৭৮ (৬৪৯৯)
দ্রোণ উবাচ। ১-১৪২-৭৯x (৮৫২)
শীঘ্রং ভন্তঃ সর্বেঽপি ধনূংষ্যাদায় সর্বশঃ।
ভাসমেতং সমুদ্দিশ্য তিষ্ঠধ্বং সন্ধিতেষতঃ॥ ১-১৪২-৭৯ (৬৫০০)
মদ্বাক্যসমকালং তু শিরোঽস্য বিনিপাত্যতাম্।
একৈকশো নিয়োক্ষ্যামি তথা কুরুত পুত্রকাঃ॥ ১-১৪২-৮০ (৬৫০১)
বৈশম্পায়ন উবাচ। ১-১৪২-৮১x (৮৫৩)
ততো যুধিষ্ঠিরং পূর্বমুবাচাঙ্গিরসাং বরঃ।
সংধৎস্ব বামং দুর্ধর্ষ মদ্বাক্যান্তে বিমুঞ্চতম্॥ ১-১৪২-৮১ (৬৫০২)
ততো যুধিষ্ঠিরঃ পূর্বং ধনুর্গৃহ্য পরন্তপঃ।
তস্থৌ ভাসং সমুদ্দিশ্য গুরুবাক্যপ্রচোদিতঃ॥ ১-১৪২-৮২ (৬৫০৩)
ততো বিততধন্বানং দ্রোণস্তং কুরুনন্দনম্।
স মুহূর্তাদুবাচেদং বচনং ভরতর্ষভ॥ ১-১৪২-৮৩ (৬৫০৪)
পশ্যসি ৎবং দ্রুমাগ্রস্থং ভাসং নরবরাত্মজ।
পশ্যামীত্যেবমাচার্যং প্রত্যুবাচ যুধিষ্ঠিরঃ॥ ১-১৪২-৮৪ (৬৫০৫)
স মুহূর্তাদিব পুনর্দ্রোণস্তং প্রত্যভাষত।
অথ বৃক্ষমিমং মাং বা ভ্রাতৄন্বাঽপি প্রপশ্যসি॥ ১-১৪২-৮৫ (৬৫০৬)
তমুবাচ স কৌন্তেয়ঃ পশ্যাম্যেনং নবস্পতিম্।
ভন্তং চ তথা ভ্রাতৄন্ভাসং চেতি পুনঃপুনঃ॥ ১-১৪২-৮৬ (৬৫০৭)
তমুবাচাপসর্পেতি দ্রোণোঽপ্রীতমনা ইব।
নৈতচ্ছক্যং ৎবয়া বেদ্ধুং লক্ষ্যমিত্যেব কুৎসয়ন্॥ ১-১৪২-৮৭ (৬৫০৮)
ততো দুর্যোধনাদীংস্তান্ধার্তরাষ্ট্রান্মহায়শাঃ।
তেনৈব ক্রময়োগেন জিজ্ঞাসুঃ পর্যপৃচ্ছত॥ ১-১৪২-৮৮ (৬৫০৯)
অন্যাংশ্চ শিষ্যান্ভীমাদীন্রাজ্ঞশ্চৈবান্যদেশজান্।
যদা চ সর্বে তৎসর্বং পশ্যাম ইতি কুৎসিতাঃ॥ ॥ ১-১৪২-৮৯ (৬৫১০)

ইতি শ্রীমন্মহাভারতে আদিপর্বণি সংভবপর্বণি দ্বিচৎবারিংশদধিকশততমোঽধ্যায়ঃ॥ ১৪২ ॥

Mahabharata – Adi Parva – Chapter Footnotes

১-১৪২-১২ যৎপ্রদেয়ং মে ইতি পাঠান্তরম্॥ ১-১৪২-২২ দ্রোণমভ্যযাৎ দ্রোণতুল্যোঽভবৎ॥ ১-১৪২-২৭ ঔহত তর্কিতবান্॥ ১-১৪২-২৮ অপৃথক্ সহৈবাস্তে॥ ১-১৪২-২৯ অতো ন ব্যহীয়ত ন বিহীনোঽভূৎ॥ ১-১৪২-৩০ যোগমৈকাগ্র্যম্॥ ১-১৪২-৩৩ অনুগ্রহণমভ্যাসঃ॥ ১-১৪২-৩৪ যোগ্যামভ্যাসম্॥ ১-১৪২-৩৫ উত্থায়োপেত্যেতি ক্রমঃ॥ ১-১৪২-৪১ তেষামন্ববেক্ষয়া তেভ্যোঽধিকো মাভূদিতি বুদ্ধ্যা॥ ১-১৪২-৪৩ মহীময়ং মৃণ্ময়ম্॥ ১-১৪২-৪৪ ইষ্বস্ত্রে ইষুপ্রয়োগে যোগমৈকাগ্র্যম্॥ ১-১৪২-৪৫ লঘুৎবং শীঘ্রপ্রয়োক্তৃৎবম্॥ ১-১৪২-৬৪ বেতনং গুরুদক্ষিণারূপম্॥ ১-১৪২-৭০ নাধিকোঽন্যোঽর্জুনাদভূত ইতি পাঠান্তরম্॥ ১-১৪২-৭১ গদায়োগ্যৌ গদায়ুদ্ধেঽভ্যাসবন্তৌ॥ ১-১৪২-৭২ ৎসারুকৌ খঙ্গয়ুদ্ধে কুশলৌ॥ ১-১৪২-৭৯ ভাসং পক্ষিবিশেষম্॥ দ্বিচৎবারিংশদধিকশততমোঽধ্যায়ঃ॥ ১৪২ ॥