আদিপর্ব – অধ্যায় ১৩৬
॥ শ্রীঃ ॥
১.১৩৬. অধ্যায়ঃ ১৩৬
Mahabharata – Adi Parva – Chapter Topics
পাণ্ডোরস্থিসংস্কারাদ্যন্ত্যেষ্টিবিধিঃ॥ ১ ॥
Mahabharata – Adi Parva – Chapter Text
১-১৩৬-০ (৬০৯৫)
ধৃতরাষ্ট্র উবাচ। ১-১৩৬-০x (৮১৩)
পাণ্ডোর্বিদুর সর্বাণি প্রেতকার্যাণি কারয়।
রাজবদ্রাজসিংহস্য মাদ্র্যাশ্চৈব বিশেষতঃ॥ ১-১৩৬-১ (৬০৯৬)
পশূন্বাসাংসি রত্নানি ধনানি বিবিধানি চ।
পাণ্ডোঃ প্রয়চ্ছ মাদ্র্যাশ্চ যেভ্যো যাবচ্চ বাঞ্ছিতম্॥ ১-১৩৬-২ (৬০৯৭)
যথা চ কুন্তী সৎকারং কুর্যান্মাদ্র্যাস্তথা কুরু।
যথা ন বায়ুর্নাদিত্যঃ পশ্যেতাং তাং সুসংবৃতাম্॥ ১-১৩৬-৩ (৬০৯৮)
ন শোচ্যঃ পাণ্ডুরনঘঃ প্রশস্যঃ স নরাধিপঃ।
যস্য পঞ্চ সুতা বীরা জাতাঃ সুরসুতোপমাঃ॥ ১-১৩৬-৪ (৬০৯৯)
বৈশম্পায়ন উবাচ। ১-১৩৬-৫x (৮১৪)
বিদুরস্তং তথেত্যুক্ৎবা ভীষ্মেণ সহ ভারত।
পাণ্ডুং সংস্কারয়ামাস দেশে পরমপূজিতে॥ ১-১৩৬-৫ (৬১০০)
ততস্তু নগরাত্তূর্ণমাজ্যগন্ধপুরস্কৃতাঃ।
নির্হৃতাঃ পাবকা দীপ্তাঃ পাণ্ডো রাজন্পুরোহিতৈঃ॥ ১-১৩৬-৬ (৬১০১)
অথৈনামার্তবৈঃ পুষ্পৈর্গন্ধৈশ্চ বিবিধৈর্বরৈঃ।
শিবিকাং তামলঙ্কৃত্য বাসসাঽঽচ্ছাদ্য সর্বশঃ॥ ১-১৩৬-৭ (৬১০২)
তাং তথা শোভিতাং মাল্যৈর্বাসোভিশ্চ মহাধনৈঃ।
অমাত্যা জ্ঞাতয়শ্চৈনং সুহৃদশ্চোপতস্থিরে॥ ১-১৩৬-৮ (৬১০৩)
নৃসিংহং নরয়ুক্তেন পরমালঙ্কৃতেন তম্।
অবহন্ যানমুখ্যেন সহ মাদ্র্যা সুসংবৃতম্॥ ১-১৩৬-৯ (৬১০৪)
পাণ্ডুরেণাতপত্রেণ চামরব্যজনেন চ।
সর্ববাদিত্রনাদৈশ্চ সমলঞ্চক্রিরে ততঃ॥ ১-১৩৬-১০ (৬১০৫)
রত্নানি চাপ্যুপাদায় বহূনি শতশো নরাঃ।
প্রদদুঃ কাঙ্ক্ষমাণেভ্যঃ পাণ্ডোস্তস্যৌর্ধ্বদেহিকে॥ ১-১৩৬-১১ (৬১০৬)
অথ চ্ছত্রাণি শুভ্রাণি চামরাণি বৃহন্তি চ।
আজহ্রুঃ কৌরবস্যার্থে বাসাংসি রুচিরাণি চ॥ ১-১৩৬-১২ (৬১০৭)
যাজকৈঃ শুক্লবাসোভির্হূয়মানা হুতাশনাঃ।
অগচ্ছন্নগ্রতস্তস্য দীপ্যমানাঃ স্বলঙ্কৃতাঃ॥ ১-১৩৬-১৩ (৬১০৮)
ব্রাহ্মণাঃ ক্ষত্রিয়া বৈশ্যাঃ শূদ্রাশ্চৈব সহস্রশঃ।
রুদন্তঃ শোকসংতপ্তা অনুজগ্মুর্নরাধিপম্॥ ১-১৩৬-১৪ (৬১০৯)
অয়মস্মানপাহায় দুঃখে চাধায় শাশ্বতে।
কৃৎবা চাস্মাননাথাংশ্চ ক্ব যাস্যতি নরাধিপঃ॥ ১-১৩৬-১৫ (৬১১০)
ক্রোশন্তঃ পাণ্ডবাঃ সর্বে ভীষ্মো বিদুর এব চ।
`বাহ্লীকঃ সোমদত্তশ্চ তথা ভূরিশ্রবা নৃপঃ॥ ১-১৩৬-১৬ (৬১১১)
অন্যোন্যং বৈ সমাশ্লিষ্য অনুজগ্মুঃ সহস্রশঃ।’
রমণীয়ে বনোদ্দেশে গঙ্গাতীরে সমে শুভে॥ ১-১৩৬-১৭ (৬১১২)
ন্যাসয়ামাসুরথং তাং শিবিকাং সত্যবাদিনঃ।
সভার্যস্য নৃসিংহস্য পাণ্ডোরক্লিষ্টকর্মণঃ॥ ১-১৩৬-১৮ (৬১১৩)
ততস্তস্য শরীরং তু সর্বগন্ধাধিবাসিতম্।
শুচিকালীয়কাদিগ্ধং দিব্যচন্দনরূষিতম্॥ ১-১৩৬-১৯ (৬১১৪)
পর্যষিঞ্চঞ্জলেনাশু শাতকুম্ভময়ৈর্ঘটৈঃ।
চন্দনেন চ শুক্লেন সর্বতঃ সমলেপয়ন্॥ ১-১৩৬-২০ (৬১১৫)
কালাগুরুবিমিশ্রেণ তথা তুঙ্গরসেন চ।
অথৈনং দেশজৈঃ শুক্লৈর্বাসোভিঃ সময়োজয়ন্॥ ১-১৩৬-২১ (৬১১৬)
সংছন্নঃ স তু বাসোভির্জীবন্নিব নরাধিপঃ।
শুশুভে স নব্যাঘ্রো মহার্হশয়নোচিতঃ॥ ১-১৩৬-২২ (৬১১৭)
`হয়মেধাগ্নিনা সর্বে যাজকাঃ সপুরোহিতাঃ।
বেদোক্তেন বিধানেন ক্রিয়াংচক্রুঃ সমন্ত্রকম্॥’ ১-১৩৬-২৩ (৬১১৮)
যাজকৈরভ্যনুজ্ঞাতে প্রেতকর্মণ্যনিষ্ঠিতে।
ঘৃতাবসিক্তং রাজানং সহ মাদ্র্যা স্বলঙ্কৃতম্॥ ১-১৩৬-২৪ (৬১১৯)
তুঙ্গপদ্মকমিশ্রেণ চন্দনেন সুগন্ধিনা।
`সরলং দেবদারুং চ গুগ্গুলং লাক্ষয়া সহ॥ ১-১৩৬-২৫ (৬১২০)
হরিচন্দনকাষ্ঠৈশ্চ হরিবেরৈরুশীরকৈঃ।’
অন্যৈশ্চ বিবিধৈর্গন্ধৈর্বিধিনা সমদাহয়ন্॥ ১-১৩৬-২৬ (৬১২১)
ততস্তয়োঃ শরীরে দ্বে দৃষ্ট্বা মোহবশং গতা।
হাহা পুত্রেতি কৌসল্যা পপাত সহসা ভুবি॥ ১-১৩৬-২৭ (৬১২২)
তাং প্রেক্ষ্য পতিতামার্তাং পৌরজানপদো জনঃ।
রুরোদ দুঃখসংতপ্তো রাজভক্ত্যা কৃপাঽন্বিতঃ॥ ১-১৩৬-২৮ (৬১২৩)
কুন্ত্যাশ্চৈবার্তনাদেন সর্বাণি চ বিচুক্রুশুঃ।
মানুষৈঃ সহ ভূতানি তির্যগ্যোনিগতান্যপি॥ ১-১৩৬-২৯ (৬১২৪)
তথা ভীষ্মঃ শান্তনবো বিদুরশ্চ মহামতিঃ।
সর্বশঃ কৌরবাশ্চৈব প্রাণদন্ভৃশদুঃখিতাঃ॥ ১-১৩৬-৩০ (৬১২৫)
ততো ভীষ্মোঽথ বিদুরো রাজা চ সহ পাণ্ডবৈঃ।
উদকং চক্রিরে তস্য সর্বাশ্চ কুরুয়োষিতঃ॥ ১-১৩৬-৩১ (৬১২৬)
চুক্রুশুঃ পাণ্ডবাঃ সর্বে ভীষ্মঃ শান্তনবস্তথা।
বিদুরো জ্ঞাতয়শ্চৈব চক্রুশ্চাপ্যুদকক্রিয়াঃ॥ ১-১৩৬-৩২ (৬১২৭)
কৃতোদকাংস্তানাদায় পাণ্ডবাঞ্ছোককর্শিতান্।
সর্বাঃ প্রকৃতয়ো রাজঞ্শোচমানা ন্যবারয়ন্॥ ১-১৩৬-৩৩ (৬১২৮)
যথৈব পাণ্ডবা ভূমৌ সুষুপুঃ সহ বান্ধবৈঃ।
তথৈব নাগরা রাজঞ্শিশ্যিরে ব্রাহ্মণাদয়ঃ॥ ১-১৩৬-৩৪ (৬১২৯)
তদ্গতানন্দমস্বস্থমাকুমারমহৃষ্টবৎ।
বভূব পাণ্ডবৈঃ সার্ধং নগরং দ্বাদশ ক্ষপাঃ॥ ॥ ১-১৩৬-৩৫ (৬১৩০)
ইতি শ্রীমন্মহাভারতে আদিপর্বণি সংভবপর্বণি ষট্ত্রিংশদধিকশততমোঽধ্যায়ঃ॥ ১৩৬ ॥
Mahabharata – Adi Parva – Chapter Footnotes
১-১৩৬-১৯ কালীয়কাদিগ্ধং কৃষ্ণাগুরুলিপ্তম্॥ ১-১৩৬-২৫ তুঙ্গপদ্মকৌ গন্ধদ্রব্যবিশেষৌ॥ ষট্ত্রিংশদধিকশততমোঽধ্যায়ঃ॥ ১৩৬ ॥