আদিপর্ব – অধ্যায় ১২২
॥ শ্রীঃ ॥
১.১২২. অধ্যায়ঃ ১২২
Mahabharata – Adi Parva – Chapter Topics
পাণ্ডোর্মাদ্র্যা বিবাহঃ। দিগ্বিজয়শ্চ॥ ১ ॥
Mahabharata – Adi Parva – Chapter Text
১-১২২-০ (৫৩৬৮)
বৈশম্পায়ন উবাচ। ১-১২২-০x (৭৩২)
ততঃ শান্তনবো ভীষ্মো রাজ্ঞঃ পাণ্ডোর্যশস্বিনঃ।
বিবাহস্যাপরস্যার্থে চকার মতিমান্মতিম্॥ ১-১২২-১ (৫৩৬৯)
সোঽমাত্যৈঃ স্থবিরৈঃ সার্ধং ব্রাহ্মণৈশ্চ মহর্ষিভিঃ।
বলেন চতুরঙ্গেণ যয়ৌ মদ্রপতেঃ পুরম্॥ ১-১২২-২ (৫৩৭০)
তমাগতমভিশ্রুত্য ভীষ্মং বাহীকপুঙ্গবঃ।
প্রত্যুদ্গম্যার্চয়িৎবা চ পুরং প্রাবেশয়ন্নৃপঃ॥ ১-১২২-৩ (৫৩৭১)
দত্ৎবা তস্যাসনং শুভ্রং পাদ্যমর্ঘ্যং তথৈব চ।
মধুপর্কং চ মদ্রেশঃ পপ্রচ্ছাগমনেঽর্থিতাম্॥ ১-১২২-৪ (৫৩৭২)
তং ভীষ্মঃ প্রত্যুবাচেদং মদ্ররাজং কুরূদ্বহঃ।
আগতং মাং বিজানীহি কন্যার্থিনমরিন্দম॥ ১-১২২-৫ (৫৩৭৩)
শ্রূয়তে ভবতঃ সাধ্বী স্বসা মাদ্রী যশস্বিনী।
তামহং বরয়িষ্যামি পাণ্ডোরর্থে যশস্বিনীম্॥ ১-১২২-৬ (৫৩৭৪)
যুক্তরূপো হি সংবন্ধে ৎবং নো রাজন্বয়ং তব।
এতৎসংচিন্ত্য মদ্রেশ গৃহাণাস্মান্যথাবিধি॥ ১-১২২-৭ (৫৩৭৫)
তমেবংবাদিনং ভীষ্মং প্রত্যভাষত মদ্রপঃ।
ন হি মেঽন্যো বরস্ৎবত্তঃ শ্রেয়ানিতি মতির্মম॥ ১-১২২-৮ (৫৩৭৬)
পূর্বৈঃ প্রবর্তিতং কিংচিৎকুলেঽস্মিন্নৃপসত্তমৈঃ।
সাধু বা যদি বাঽসাধু তন্নাতিক্রান্তুমুৎসহে॥ ১-১২২-৯ (৫৩৭৭)
ব্যক্তং তদ্ভবতশ্চাপি বিদিতং নাত্র সংশয়ঃ।
ন চ যুক্তং তথা বক্তুং ভবান্দেহীতি সত্তম॥ ১-১২২-১০ (৫৩৭৮)
কুলধর্মঃ স নো বীর প্রমাণং পরমং চ তৎ।
তেন ৎবাং ন ব্রবীম্যেতদসংদিগ্ধং বচোঽরিহন্॥ ১-১২২-১১ (৫৩৭৯)
তং ভীষ্মঃ প্রত্যুবাচেদং মদ্ররাজং জনাধিপঃ।
ধর্ম এষ পরো রাজন্স্বয়মুক্তঃ স্বয়ংভুবা॥ ১-১২২-১২ (৫৩৮০)
নাত্র কশ্চন দোষোঽস্তি পূর্বৈর্বিধিরয়ং কৃতঃ।
বিদিতেয়ং চ তে শল্য মর্যাদা সাধুসংমতা॥ ১-১২২-১৩ (৫৩৮১)
ইত্যুক্ৎবা স মহাতেজাঃ শাতকুম্ভং কৃতাকৃতম্।
রত্নানি চ বিচিত্রাণি শল্যায়াদাৎসহস্রশঃ॥ ১-১২২-১৪ (৫৩৮২)
গজানশ্বান্রথাংশ্চৈব বাসাংস্যাভরণানি চ।
মণিমুক্তাপ্রবালং চ গাঙ্গেয়ো ব্যসৃজচ্ছুভম্॥ ১-১২২-১৫ (৫৩৮৩)
তৎপ্রগৃহ্য ধনং সর্বং শল্যঃ সংপ্রতীমানসঃ।
দদৌ তাং সমলঙ্কৃত্য স্বসারং কৌরবর্ষভে॥ ১-১২২-১৬ (৫৩৮৪)
স তাং মাদ্রীমুপাদায় ভীষ্মঃ সাগরগাসুতঃ।
আজগাম পুরীং ধীমান্প্রবিষ্টো গজসাহ্বয়ম্॥ ১-১২২-১৭ (৫৩৮৫)
তত ইষ্টেঽহনি প্রাপ্তে মুহূর্তে সাধুসংমতে।
`বিবাহং কারায়ামাস ভীষ্মঃ পাণ্ডোর্মহাত্মনঃ।’
জগ্রাহ বিধিবৎপাণিং মাদ্র্যাঃ পাণ্ডুর্নরাধিপঃ॥ ১-১২২-১৮ (৫৩৮৬)
ততো বিবাহে নির্বৃত্তে স রাজা কুরুনন্দনঃ।
স্থাপয়ামাস তাং ভার্যাং শুভে বেশ্মনি ভামিনীং॥ ১-১২২-১৯ (৫৩৮৭)
স তাভ্যাং ব্যচরৎসার্ধং ভার্যাভ্যাং রাজসত্তমঃ।
কুন্ত্যা মাদ্র্যা চ রাজেন্দ্রো যথাকামং যথাসুখম্॥ ১-১২২-২০ (৫৩৮৮)
ততঃ স কৌরবো রাজা বিহৃত্য ত্রিদশা নিশাঃ।
জিগীষয়া মহীং পাণ্ডুর্নিরক্রামৎপুরাৎপ্রভো॥ ১-১২২-২১ (৫৩৮৯)
স ভীষ্মপ্রমুখান্বৃদ্ধানভিবাদ্য প্রণম্য চ।
ধৃতরাষ্ট্রং চ কৌরব্যং তথান্যান্কুরুসত্তমান্।
আমন্ত্র্য প্রয়যৌ রাজা তৈশ্চৈবাপ্যনুমোজিতঃ॥ ১-১২২-২২ (৫৩৯০)
মঙ্গলাচারয়ুক্তাভিরাশীর্ভিরভিনন্দিতঃ।
গজবাজিরথৌঘেন বলেন মহতাঽগমৎ॥ ১-১২২-২৩ (৫৩৯১)
স রাজা দেবগর্ভাভো বিজিগীষুর্বসুন্ধরাম্।
হৃষ্টপুষ্টবলৈঃ প্রায়াৎপাণ্ডুঃ শত্রূননেকশঃ॥ ১-১২২-২৪ (৫৩৯২)
পূর্বমাগস্কৃতো গৎবা দশার্ণাঃ সমরে জিতাঃ।
পাণ্ডুনা নরসিংহেন কৌরবাণাং যশোভৃতা॥ ১-১২২-২৫ (৫৩৯৩)
ততঃ সেনামুপাদায় পাণ্ডুর্নানাবিধধ্বজাম্।
প্রভূতহস্ত্যশ্বয়ুতাং পদাতিরথসংকুলাম্॥ ১-১২২-২৬ (৫৩৯৪)
আগস্কারী মহীপানাং বহূনাং বলদর্পিতঃ।
গোপ্তা মগধরাষ্ট্রস্য দীর্ঘো রাজগৃহে হতঃ॥ ১-১২২-২৭ (৫৩৯৫)
ততঃ কোশং সমাদায় বাহনানি চ ভূরিশঃ।
পাণ্ডুনা মিথিলাং গৎবা বিদেহাঃ সমরে জিতাঃ॥ ১-১২২-২৮ (৫৩৯৬)
তথা কাশিষু সুহ্মেষু পুণ্ড্রেষু চ নরর্ষভ।
স্ববাহুবলবীর্যেণ কুরূণামকরোদ্যশঃ॥ ১-১২২-২৯ (৫৩৯৭)
তং শরৌঘমহাজ্বালং শস্ত্রার্চিষমরিন্দমম্।
পাণ্ডুপাবকমাসাদ্য ব্যবহ্যন্ত নরাধিপাঃ॥ ১-১২২-৩০ (৫৩৯৮)
তে সসেনাঃ সসেনেন বিধ্বংসিতবলা নৃপাঃ।
পাণ্ডুনা বশগাঃ কৃৎবা কুরুকর্মসু যোজিতাঃ॥ ১-১২২-৩১ (৫৩৯৯)
তেন তে নির্জিতাঃ সর্বে পৃথিব্যাং সর্বপার্থিবাঃ।
তমেকং মেনিরে শূরং দেবেষ্বিব পুরন্দরম্॥ ১-১২২-৩২ (৫৪০০)
তং কৃতাঞ্জলয়ঃ সর্বে প্রণতা বসুধাধিপাঃ।
উপাজগ্মুর্ধনং গৃহ্য রত্নানি বিবিধানি চ॥ ১-১২২-৩৩ (৫৪০১)
মণিমুক্তাপ্রবালং চ সুবর্ণং রজতং বহু।
গোরত্নান্যশ্বরত্নানি রথরত্নানি কুঞ্জরান্॥ ১-১২২-৩৪ (৫৪০২)
খরোষ্ট্রমহিষাংশ্চৈব যচ্চ কিংচিদজাবিকম্।
কম্লাজিনরত্নানি রাঙ্কবাস্তরণানি চ।
তৎসর্বং প্রতিজগ্রাহ রাজা নাগপুরাধিপঃ॥ ১-১২২-৩৫ (৫৪০৩)
তদাদায় যয়ৌ পাণ্ডুঃ পুনর্মদিতবাহনঃ।
হর্ষয়িষ্যন্স্বরাষ্ট্রাণি পুরং চ গজসাহ্বয়ম্॥ ১-১২২-৩৬ (৫৪০৪)
শান্তনো রাজসিংহস্য ভরতস্য চ ধীমতঃ।
প্রনষ্টঃ কীর্তিজঃ শব্দঃ পাণ্ডুনা পুনরাহৃতঃ॥ ১-১২২-৩৭ (৫৪০৫)
যে পুরা কুরুরাষ্ট্রাণি জহ্রুঃ কুরুধনানি চ।
তে নাগপুরসিংহেন পাণ্ডুনা করদীকৃতাঃ॥ ১-১২২-৩৮ (৫৪০৬)
ইত্যভাষন্ত রাজানো রাজামাত্যাশ্চ সঙ্গতাঃ।
প্রতীতমনসো হৃষ্টাঃ পৌরজানপদৈঃ সহ॥ ১-১২২-৩৯ (৫৪০৭)
প্রত্যুদ্যযুশ্চ তং প্রাপ্তং সর্বে ভীষ্মপুরোগমাঃ।
তে নদূরমিবাধ্বানং গৎবা নাগপুরালয়াঃ॥ ১-১২২-৪০ (৫৪০৮)
আবৃতং দদৃশুর্হৃষ্টা লোকং বহুবিধৈর্ধনৈঃ।
নানায়ানসমানীতৈ রত্নৈরুচ্চাবচৈস্তদা॥ ১-১২২-৪১ (৫৪০৯)
হস্ত্যশ্বরথরত্নৈশ্চ গোভিরুষ্ট্রৈস্তথাঽঽবিভিঃ।
নান্তং দদৃশুরাসাদ্য ভীষ্মেণ সহ কৌরবাঃ॥ ১-১২২-৪২ (৫৪১০)
সোঽভিবাদ্য পিতুঃ পাদৌ কৌসল্যানন্দবর্ধনঃ।
যথাঽর্হং মানয়ামাস পৌরজানপদানপি॥ ১-১২২-৪৩ (৫৪১১)
প্রমৃদ্য পররাষ্ট্রাণি কৃতার্থং পুনরাগতম্।
পুত্রমাশ্লিষ্য ভীষ্মস্তু হর্ষাদশ্রূণ্যবর্তয়ৎ॥ ১-১২২-৪৪ (৫৪১২)
স তূর্যশতশঙ্খানাং ভেরীণাং চ মহাস্বনৈঃ।
হর্ষয়ন্সর্বশঃ পৌরান্বিবেশ গজসাহ্বয়ম্॥ ॥ ১-১২২-৪৫ (৫৪১৩)
ইতি শ্রীমন্মহাভারতে আদিপর্বণি সংভবপর্বণি দ্বাবিংশত্যধিকশততমোঽধ্যায়ঃ॥ ১২২ ॥
Mahabharata – Adi Parva – Chapter Footnotes
১-১২২-৮ মে বরঃ মম জামাতা॥ ১-১২২-১৪ শাতকুম্ভং কাঞ্চনম্। কৃতাকৃতং ঘটিতমঘটিতং চ॥ ১-১২২-১৫ ব্যসৃদৎ প্রাদাৎ॥ ১-১২২-২১ ত্রিদশাঃ ত্রিংশৎ॥ ১-১২২-৪০ নদূরমিব অদূরমিব। জয়োৎসাহেন মার্গশ্রমাভাবাৎ॥ দ্বাবিংশত্যধিকশততমোঽধ্যায়ঃ॥ ১২২ ॥