আদিপর্ব – অধ্যায় ১২০
॥ শ্রীঃ ॥
১.১২০. অধ্যায়ঃ ১২০
Mahabharata – Adi Parva – Chapter Topics
পৃথায়া বাল্যচরিত্রকথনম্॥ ১ ॥ তস্যা দুর্বাসসো মন্ত্রপ্রাপ্তিঃ॥ ২ ॥ মন্ত্রপ্রভাবজিজ্ঞাসয়াঽঽহূতাৎসূর্যাৎকুন্ত্যাং কর্ণস্যোৎপত্তিঃ॥ ৩ ॥ লোকভয়াৎকুন্ত্যা যমুনায়াং বিসৃষ্টস্য রাধাভর্ত্রা স্বীকারো বসুষেণেতি নামকরমং চ॥ ৪ ॥ সংগ্রহেণ কর্ণচরিত্রকথনম্॥ ৫ ॥
Mahabharata – Adi Parva – Chapter Text
১-১২০-০ (৫৩০০)
বৈশম্পায়ন উবাচ। ১-১২০-০x (৭১৮)
শূরো নাম যদুশ্রেষ্ঠো বসুদেবপিতাঽভবৎ।
তস্য কন্যা পৃথা নাম রূপেণাপ্রতিমা ভুবি॥ ১-১২০-১ (৫৩০১)
পিতৃষ্বস্রীয়ায় স তামনপত্যায় ভারত।
অগ্র্যমগ্রে প্রতিজ্ঞায় স্বস্যাপত্যং স সত্যবাক্॥ ১-১২০-২ (৫৩০২)
অগ্রজামথ তাং কন্যাং শূরোঽনুগ্রহকাঙ্ক্ষিণে।
প্রদদৌ কুন্তিভোজায় সখা সখ্যে মহাত্মনে॥ ১-১২০-৩ (৫৩০৩)
নিয়ুক্তা সা পিতুর্গেহে ব্রাহ্মণাতিথিপূজনে।
উগ্রং পর্যচরত্তত্র ব্রাহ্মণং সংশিতব্রতম্॥ ১-১২০-৪ (৫৩০৪)
নিগূঢনিশ্চয়ং ধর্মে যং তং দুর্বাসসং বিদুঃ।
তমুগ্রং সংশিতাত্মানং সর্বয়ত্নৈরতোষয়ৎ॥ ১-১২০-৫ (৫৩০৫)
`দধ্যাজ্যকাদিভির্নিত্যং ব্যঞ্জনৈঃ প্রত্যহং শুভা।
সহস্রসঙ্খ্যৈর্যোগীন্দ্রমুপচারদনুত্তমা॥ ১-১২০-৬ (৫৩০৬)
দুর্বাসা বৎসরস্যান্তে দদৌ মন্ত্রমনুত্তমম্’।
যশস্বিন্যৈ পৃথায়ৈ তদাপদ্ধর্মান্ববেক্ষয়া।
অভিচারাভিসংয়ুক্তমব্রবীচ্চৈব তাং মুনিঃ॥ ১-১২০-৭ (৫৩০৭)
যং যং দেবং ৎবমেতেন মন্ত্রেণাবাহয়িষ্যসি।
তস্য তস্য প্রভাবেণ তব পুত্রো ভবিষ্যতি॥ ১-১২০-৮ (৫৩০৮)
তথোক্তা সা তু বিপ্রেণ কুন্তী কৌতূহলান্বিতা।
কন্যা সতী দেবমর্কমাজুহাব যশস্বিনী॥ ১-১২০-৯ (৫৩০৯)
ততো ঘনান্তরং কৃৎবা স্বমার্গং তপনস্তদা।
উপতস্থে স তাং কন্যাং পৃথাং পৃথুললোচনাম্॥ ১-১২০-১০ (৫৩১০)
সা দদর্শ তমায়ান্তং ভাস্করং লোকভাবনম্।
বিস্মিতা চানবদ্যাঙ্গী দৃষ্ট্বা তন্মহদদ্ভুতম্॥ ১-১২০-১১ (৫৩১১)
`সাব্রবীদ্ভগবন্কস্ৎবমাবির্ভূতো মমাগ্রতঃ। ১-১২০-১২ (৫৩১২)
আদিত্য উবাচ।
আহূতোপস্থিতং ভদ্রে ঋষিমন্ত্রেণ চোদিতম্।
বিদ্ধি মাং পুত্রলাভায় দেবমর্কং শুচিস্মিতে॥ ১-১২০-১২x (৭১৯)
পুত্রস্তে নির্মিতঃ সুভ্রু শৃণু মহাদৃক্ছুভাননে।
আদিত্যে কুণ্ডলে বিভ্রৎকবচং চৈব মামকম্॥ ১-১২০-১৩ (৫৩১৩)
শস্ত্রাস্ত্রাণামভেদ্যশ্চ ভবিষ্যতি শুচিস্মিতে।
নাস্য কিংচিদদেয়ং চ ব্রাহ্মণেভ্যো ভবিষ্যতি॥ ১-১২০-১৪ (৫৩১৪)
চোদ্যমানো ময়া চাপি ন ক্ষমং চিন্তয়িষ্যতি।
দাস্যত্যেব হি বিপ্রেভ্যো মানী চৈব ভবিষ্যতি॥ ১-১২০-১৫ (৫৩১৫)
বৈশম্পায়ন উবাচ। ১-১২০-১৬x (৭২০)
এবমুক্তা ততঃ কুন্তী গোপতিং প্রত্যুবাচ হ।
কন্যা পিতৃসা চাহং পুরুষার্থো ন চৈব মে॥’ ১-১২০-১৬ (৫৩১৬)
কশ্চিন্মে ব্রাহ্মণঃ প্রাদাদ্বরং বিদ্যাং চ শত্রুহন্।
তদ্বিজিজ্ঞাসয়াঽঽহ্বানং কৃতবত্যস্মি তে বিভো॥ ১-১২০-১৭ (৫৩১৭)
এতস্মিন্নপরাধে ৎবাং শিরসাঽহং প্রসাদয়ে।
যোষিতো হি সদা রক্ষ্যাস্ৎবপরাধেঽপি নিত্যশঃ॥ ১-১২০-১৮ (৫৩১৮)
সূর্য উবাচ। ১-১২০-১৯x (৭২১)
বেদাহং সর্বমেবৈতদ্যদ্দুর্বাসা বরং দদৌ।
সংত্যজ্য ভয়মেবেহ ক্রিয়তাং সঙ্গমো মম॥ ১-১২০-১৯ (৫৩১৯)
অমোঘং দর্শনং মহ্যমাহূতশ্চাস্মি তে শুভে।
বৃথাঽঽহ্বানেঽপি তে ভীরু দোষঃ স্যান্নাত্র সংশয়ঃ॥ ১-১২০-২০ (৫৩২০)
`যদ্যেবং মন্যসে ভীরু কিমাহ্বয়সি ভাস্করম্।
যদি মামবজানাসি ঋষিঃ স ন ভবিষ্যতি॥ ১-১২০-২১ (৫৩২১)
মন্ত্রদানেন যস্মাত্ৎবমবলেপেন দর্পিতা।
কুলং চ তেঽদ্য ধক্ষ্যামি ক্রোধদীপ্তেন চক্ষুষা’॥ ১-১২০-২২ (৫৩২২)
বৈশম্পায়ন উবাচ। ১-১২০-২৩x (৭২২)
এবমুক্তা বহুবিধং সান্ৎবপূর্বং বিবস্বতা।
সা তু নৈচ্ছদ্বরারোহা কন্যাহমিতি ভারত॥ ১-১২০-২৩ (৫৩২৩)
বন্ধুপক্ষভয়াদ্ভীতা লজ্জয়া চ যশস্বিনী।
তামর্কঃ পুনরেবেদব্রবীদ্ভরতর্ষভ॥ ১-১২০-২৪ (৫৩২৪)
মৎপ্রসাদান্ন তে রাজ্ঞি ভবিতা দোষ ইত্যুত॥ ১-১২০-২৫ (৫৩২৫)
`কুন্ত্যুবাচ। ১-১২০-২৬x (৭২৩)
প্রসীদ ভগবন্মহ্যমবলেপো হি নাস্তি মে।
ৎবয়ৈব পরিহার্যং স্যাৎকন্যাভাবস্য দূষণম্॥ ১-১২০-২৬ (৫৩২৬)
আদিত্য উবাচ। ১-১২০-২৭x (৭২৪)
ব্যপয়াতু ভয়ং তেঽদ্য কুমারং প্রসমীক্ষসে।
ময়া ৎবং চাপ্যনুজ্ঞাতা পুনঃ কন্যা ভবিষ্যসি॥ ১-১২০-২৭ (৫৩২৭)
বৈশম্পায়ন উবাচ। ১-১২০-২৮x (৭২৫)
এবমুক্তা ততঃ কুন্তী সংপ্রহৃষ্টতনূরুহা।
সঙ্গতাঽভূত্তদা সুভ্রূরাদিত্যেন মহাত্মনা॥ ১-১২০-২৮ (৫৩২৮)
প্রকাশকর্মা তপনঃ কন্যাগর্ভং দদৌ পুনঃ।’
তত্র বীরঃ সমভবৎসর্বশস্ত্রভৃতাং বরঃ॥ ১-১২০-২৯ (৫৩২৯)
আমুক্তকবচঃ শ্রীমান্দেবগর্ভঃ শ্রিয়ান্বিতঃ।
সহজং কবচং বিভ্রৎকুণ্ডলোদ্দ্যোতিতাননঃ॥ ১-১২০-৩০ (৫৩৩০)
অজায়ত সুতঃ কর্ণঃ সর্বলোকেষু বিশ্রুতঃ।
প্রাদাচ্চ তস্যৈ কন্যাৎবং পুনঃ স পরমদ্যুতিঃ॥ ১-১২০-৩১ (৫৩৩১)
দত্ৎবা চ তপতাং শ্রেষ্ঠো দিবমাচক্রমে ততঃ।
দৃষ্ট্বা কুমারং জাতং সা বার্ষ্ণেয়ী দীনমানসা॥ ১-১২০-৩২ (৫৩৩২)
একাগ্রং চিন্তয়ামাস কিং কৃৎবা সুকৃতং ভবেৎ।
গূহমানাপচারং সা বন্ধুপক্ষভয়াত্তদা॥ ১-১২০-৩৩ (৫৩৩৩)
মঞ্জূষাং রত্নসংপূর্ণাং কৃৎবা বালসমাশ্রিতাম্।
উৎসসর্জ কুমারং তং জলে কুন্তী মহাবলম্॥ ১-১২০-৩৪ (৫৩৩৪)
তমুৎসৃষ্টং জলে গর্ভং রাধাভর্তা মহায়শাঃ।
পুত্রৎবে কল্পয়ামাস সভার্যঃ সূতনন্দনঃ॥ ১-১২০-৩৫ (৫৩৩৫)
নামধেয়ং চ চক্রাতে তস্য বালস্য তাবুভৌ।
বসুনা সহ জাতোঽয়ং বসুষেণো ভবৎবিতি॥ ১-১২০-৩৬ (৫৩৩৬)
স বর্ধমানো বলবান্সর্বাস্ত্রেষূদ্যতোঽভবৎ।
আপৃষ্ঠতাপাদাদিত্যমুপাতিষ্ঠত বীর্যবান্॥ ১-১২০-৩৭ (৫৩৩৭)
তস্মিন্কালে তু জপতস্তস্য বীরস্য ধীমতঃ।
নাদেয়ং ব্রাহ্মণেষ্বাসীৎকিংচিদ্বসু মহীতলে॥ ১-১২০-৩৮ (৫৩৩৮)
`ততঃ কালে তু কস্মিংশ্চিৎস্বপ্নান্তে কর্ণমব্রবীৎ।
আদিত্যো ব্রাহ্মণো ভূৎবা শৃণু বীর বচো মম॥ ১-১২০-৩৯ (৫৩৩৯)
প্রভাতায়াং রজন্যাং ৎবামাগমিষ্যতি বাসবঃ।
ন তস্য ভিক্ষা দাতব্যা বিপ্ররূপী ভবিষ্যতি॥ ১-১২০-৪০ (৫৩৪০)
নিশ্চয়োঽস্যাপহর্তুং তে কবচং কুণ্ডলে তথা।
অতস্ৎবাং বোধয়াম্যেষ স্মর্তাসি বচনং মম॥ ১-১২০-৪১ (৫৩৪১)
কর্ণ উবাচ। ১-১২০-৪২x (৭২৬)
শক্রো মাং বিপ্ররূপেণ যদি বৈ যাচতে দ্বিজ।
কথং তস্মৈ ন দাস্যামি যথা চাস্ম্যববোধিতঃ॥ ১-১২০-৪২ (৫৩৪২)
বিপ্রাঃ পূজ্যাস্তু দেবানাং সততং প্রিয়মিচ্ছতাম্।
তং দেবদেবং জানন্বৈ ন শক্তোঽস্ম্যবমন্ত্রণে॥ ১-১২০-৪৩ (৫৩৪৩)
সূর্য উবাচ। ১-১২০-৪৪x (৭২৭)
যদ্যেবং শৃণু মে বীর বরং তে সোঽপি দাস্যতি।
শক্তিং ৎবমপি যাচেথাঃ সর্বশত্রুবিবাধিনীম্॥ ১-১২০-৪৪ (৫৩৪৪)
বৈশম্পায়ন উবাচ। ১-১২০-৪৫x (৭২৮)
এবমুক্ৎবা দ্বিজঃ স্বপ্নে তত্রৈবান্তরধীয়ত।
কর্ণঃ প্রবুদ্ধস্তং স্বপ্নং চিন্তয়ানোঽভবত্তদা॥ ১-১২০-৪৫ (৫৩৪৫)
তমিন্দ্রো ব্রাহ্মণো ভূৎবা পুত্রার্থং ভূতভাবনঃ।
কুণ্ডলে প্রার্থয়ামাস কবচং চ মহাদ্যুতিঃ॥ ১-১২০-৪৬ (৫৩৪৬)
উৎকৃত্যাবিমনাঃ স্বাঙ্গাৎকবচং রুধিরস্রবম্।
কর্ণৌ পার্শ্বে চ দ্বে ছিত্ৎবা প্রায়চ্ছৎস কৃতাঞ্জলিঃ॥ ১-১২০-৪৭ (৫৩৪৭)
প্রতিগৃহ্য তু দেবেশস্তুষ্টস্তেনাস্য কর্মণা।
অহো সাহসমিত্যাহ মনসা বাসবো হসন্॥ ১-১২০-৪৮ (৫৩৪৮)
দেবদানবয়ক্ষাণাং গন্ধর্বোরগরক্ষসাম্।
ন তং পশ্যামি যো হ্যেতৎকর্ম কর্তা ভবিষ্যতি॥ ১-১২০-৪৯ (৫৩৪৯)
প্রীতোঽস্মি কর্মণা তেন বরং ব্রূহি যদিচ্ছসি। ১-১২০-৫০ (৫৩৫০)
কর্ণ উবাচ।
ইচ্ছামি ভগবদ্দত্তাং শক্তিং শত্রুনিবর্হণীম্॥ ১-১২০-৫০x (৭২৯)
বৈশম্পায়ন উবাচ। ১-১২০-৫১x (৭৩০)
শক্তিং তস্মৈ দদৌ শক্রো বিস্ময়াদ্বাক্যমব্রবীৎ।
দেবদানবয়ক্ষাণাং গন্ধর্বোরগরক্ষসাম্॥ ১-১২০-৫১ (৫৩৫১)
যস্মৈ ক্ষেপ্স্যসি রুষ্টঃ সন্সোঽনয়া ন ভবিষ্যতি।
হৎবৈকং সমরে শত্রুং ততো মামাগমিষ্যতি।
ইত্যুক্ৎবান্তর্দধে শক্রো বরং দত্ৎবা তু তস্য বৈ॥ ১-১২০-৫২ (৫৩৫২)
প্রাঙ্নাম তস্য কথিতং বসুষেণ ইতি ক্ষিতৌ।
কর্ণো বৈকর্তনশ্চৈব কর্মণা তেন সোঽভবৎ॥ ॥ ১-১২০-৫৩ (৫৩৫৩)
ইতি শ্রীমন্মহাভারতে আদিপর্বণি সংভবপর্বণি বিংশত্যধিকশততমোঽধ্যায়ঃ॥ ১২০ ॥
Mahabharata – Adi Parva – Chapter Footnotes
১-১২০-২ অগ্র্যং প্রথমম্। অগ্রে জন্মতঃ পূর্বং প্রতিজ্ঞায় ময়া প্রথমমপত্যং তুভ্যং দেয়মিতি প্রতিশ্রুত্য॥ ১-১২০-৭ অভিচারো বশ্যাকর্ষণাদিদৃষ্টফলং তদ্যুক্তম্॥ ১-১২০-৩৬ বসুনা কবচকুণ্ডলাদিদ্রব্যেণ বদ্ধ ইতি বসুষেণঃ॥ ১-১২০-৩৭ আপৃষ্ঠতাপাৎ মধ্যাহ্নাৎপরত ইত্যর্থঃ॥ ১-১২০-৫৩ সহজকবচকর্তনাৎ কর্ণঃ বিশেষতঃ কর্তনেন বৈকর্তনঃ। স্বার্থে তদ্ধিতঃ॥ বিংশত্যধিকশততমোঽধ্যায়ঃ॥ ১২০ ॥