আদিপর্ব – অধ্যায় ১১৬

আদিপর্ব – অধ্যায় ১১৬

॥ শ্রীঃ ॥

১.১১৬. অধ্যায়ঃ ১১৬

Mahabharata – Adi Parva – Chapter Topics

মাণ্ডব্যোপাখ্যানম্॥ ১ ॥ রাজাজ্ঞয়া মাণ্ডব্যস্য শূলারোপণম্॥ ২ ॥

Mahabharata – Adi Parva – Chapter Text

১-১১৬-০ (৫১৯৯)
জনমেজয় উবাচ। ১-১১৬-০x (৭০৫)
কিং কৃতং কর্ম ধর্মেণ যেন শাপমুপেয়িবান্।
কস্য শাপাচ্চ ব্রহ্মর্ষেঃ শূদ্রয়োনাবজায়ত॥ ১-১১৬-১ (৫২০০)
বৈশম্পায়ন উবাচ। ১-১১৬-২x (৭০৬)
বভূব ব্রাহ্মণঃ কশ্চিন্মাণ্ডব্য ইতি বিশ্রুতঃ।
ধৃতিমান্সর্বধর্মজ্ঞঃ সত্যে তপসি চ স্থিতঃ॥ ১-১১৬-২ (৫২০১)
`স তীর্থয়াত্রাং বিচরন্নাজগাম যদৃচ্ছয়া।
সংনিকৃষ্টানি তীর্থানি গ্রামাণাং যানি কানি চ।
তত্রাশ্রমপদং কৃৎবা বসতি স্ম মহামুনিঃ॥’ ১-১১৬-৩ (৫২০২)
স আশ্রমপদদ্বারি বৃক্ষমূলে মহাতপাঃ।
ঊর্ধ্ববাহুর্মহায়োগী তস্থৌ মৌনব্রতান্বিতঃ॥ ১-১১৬-৪ (৫২০৩)
তস্য কালেন মহতা তস্মিংস্তপসি বর্ততঃ।
তমাশ্রমমনুপ্রাপ্তা দস্যবো লোপ্ত্রহারিণঃ॥ ১-১১৬-৫ (৫২০৪)
অনুসার্যমাণা বহুভী রক্ষিভির্ভরতর্ষভ।
`তামেব বসতিং জগ্মুস্তে গ্রামাল্লোপ্ত্রহারিণঃ॥ ১-১১৬-৬ (৫২০৫)
যস্মিন্নাবসথে শেতে স মুনিঃ সংশিতব্রতঃ।’
তে তস্যাবসথে লোপ্ত্রং দস্যবঃ কুরুসত্তম॥ ১-১১৬-৭ (৫২০৬)
নিধায় চ ভয়াল্লীনাস্তত্রৈবানাগতে বলে।
তেষু লীনেষ্বথো শীঘ্রং ততস্তদ্রক্ষিণাং বলম্॥ ১-১১৬-৮ (৫২০৭)
আজগাম ততোঽপশ্যংস্তমৃষিং তস্করানুগাঃ।
তমপৃচ্ছংস্ততো রাজংস্তথাবৃত্তং তপোধনম্॥ ১-১১৬-৯ (৫২০৮)
কতরেণ পথা যাতা দস্যবো দ্বিজসত্তম।
তেন গচ্ছামহে ব্রহ্মন্যথা শীঘ্রতরং বয়ম্॥ ১-১১৬-১০ (৫২০৯)
তথা তু রক্ষিমাং তেষাং ব্রুবতাং স তপোধনঃ।
ন কিংচিদ্বচনং রাজন্নব্রবীৎসাধ্বসাধু বা॥ ১-১১৬-১১ (৫২১০)
ততস্তে রাজপুরুষা বিচিন্বানাস্তমাশ্রমম্।
দদৃশুস্তত্র লীনাংস্তাংশ্চোরাংস্তদ্দ্রব্যমেব চ॥ ১-১১৬-১২ (৫২১১)
ততঃ শঙ্কা সমভবদ্রক্ষিণাং তং মুনিং প্রতি।
সংয়ম্যৈনং ততো রাজ্ঞে দস্যূংশ্চৈব ন্যবেদয়ন্॥ ১-১১৬-১৩ (৫২১২)
তং রাজা সহ তৈশ্চোরৈরন্বশাদ্বধ্যতামিতি।
স রক্ষিভিস্তৈরজ্ঞাতঃ শূলে প্রোতো মহাতপাঃ॥ ১-১১৬-১৪ (৫২১৩)
ততস্তে শূলমারোপ্য তং মুনিং রক্ষিণস্তদা।
প্রতিজগ্মুর্মহীপালং ধনান্যাদায় তান্যথ॥ ১-১১৬-১৫ (৫২১৪)
শূলস্থঃ স তু ধর্মাত্মা কালেন মহতা ততঃ।
নিরাহারোঽপি বিপ্রর্ষির্মরণং নাভ্যপদ্যত॥ ১-১১৬-১৬ (৫২১৫)
ধারয়ামাস চ প্রাণানৃষীংশ্চ সমুপানয়ৎ।
শূলাগ্রে তপ্যমানেন তপস্তেন মহাত্মনা॥ ১-১১৬-১৭ (৫২১৬)
সন্তাপং পরমং জগ্মুর্মুনয়স্তপসাঽন্বিতাঃ।
তে রাত্রৌ শকুনা ভূৎবা সন্নিপত্ত্য তু ভারত।
দর্শন্তো যথাশক্তি তমপৃচ্ছন্দ্বিজোত্তমম্॥ ১-১১৬-১৮ (৫২১৭)
শ্রোতুমিচ্ছামহে ব্রহ্মন্কিং পাপং কৃতবানসি।
যেনেহ সমনুপ্রাপ্তং শূলে দুঃখভয়ং মহৎ॥ ॥ ১-১১৬-১৯ (৫২১৮)

ইতি শ্রীমন্মহাভারতে আদিপর্বণি সংভবপর্বণি ষোডশাধিকশততমোঽধ্যায়ঃ॥ ১১৬ ॥

Mahabharata – Adi Parva – Chapter Footnotes

১-১১৬-১ কস্য কীদৃশস্য॥ ১-১১৬-৬ লোপ্ত্রং লুপ্যত ইতি ব্যুৎপত্ত্যা চোরাপহৃতং ধনম্॥ ১-১১৬-৮ বলে রাজসৈন্যে॥ ১-১১৬-১৩ সংয়ম্য চোরবন্নিগৃহ্য॥ ১-১১৬-১৪ প্রোতোঽর্পিতঃ॥ ১-১১৬-১৭ সমুপানয়াৎ স্বসমীপমিতি শেষঃ॥ ১-১১৬-১৮ দর্শয়ন্তঃ স্বানি রূপামি প্রকাশয়ন্তঃ॥ ষোডশাধিকশততমোঽধ্যায়ঃ॥ ১১৬ ॥