আদিপর্ব – অধ্যায় ১০৭
॥ শ্রীঃ ॥
১.১০৭. অধ্যায়ঃ ১০৭
Mahabharata – Adi Parva – Chapter Topics
শান্তনুভীষ্ময়োশ্চরিতম্॥ ১ ॥ শান্তনোঃ পুনর্গঙ্গাদর্শনং তয়া সহ সংবাদশ্চ॥ ২ ॥ গঙ্গাদত্তেন ভীষ্মেণ সহ শান্তনোঃ স্বপুরপ্রবেশঃ॥ ৩ ॥ ভীষ্মস্য যৌবরাজ্যেভিষেকঃ॥ ৪ ॥ শান্তনুভাবং জ্ঞাৎবা দাশাশয়ানুসারেণ প্রতিজ্ঞাপূর্বকং ভীষ্মেণ দাশকন্যানয়নম্॥ ৫ ॥ তুষ্টেন শান্তনুনা ভীষ্মায় স্বচ্ছন্দমরণবরদানম্॥ ৬ ॥
Mahabharata – Adi Parva – Chapter Text
১-১০৭-০ (৪৭০৪)
বৈশম্পায়ন উবাচ। ১-১০৭-০x (৬৫১)
স রাজা শান্তনুর্ধীমান্দেবরাজর্ষিসৎকৃতঃ।
ধর্মাত্মা সর্বলোকেষু সত্যবাগিতি বিশ্রুতঃ॥ ১-১০৭-১ (৪৭০৫)
শান্তনোঃ কীর্তয়িষ্যামি সর্বানেব গুণানহম্।
দমো দানং ক্ষমা বুদ্ধির্হ্রীর্ধৃতিস্তেজ উত্তমম্।
নিত্যান্যাসন্মহাসৎবে শান্তনৌ পুরুষর্ষভে॥ ১-১০৭-২ (৪৭০৬)
এবং স গুণসংপন্নো ধর্মার্থকুশলো নৃপঃ।
আসীদ্ভরতবংশস্য গোপ্তা সর্বজনস্য চ॥ ১-১০৭-৩ (৪৭০৭)
কম্বুগ্রীবঃ পৃথুব্যংসো মত্তবারণবিক্রমঃ।
অন্বিতঃ পরিপূর্ণার্থৈঃ সর্বৈর্নৃপতিলক্ষণৈঃ॥ ১-১০৭-৪ (৪৭০৮)
তস্য কীর্তিমতো বৃত্তমবেক্ষ্য সততং নরাঃ।
ধর্ম এব পরঃ কামাদর্থাচ্চেতি ব্যবস্থিতঃ॥ ১-১০৭-৫ (৪৭০৯)
এবমাসীন্মহাসৎবঃ শান্তনুর্ভরতর্ষভ।
ন চাস্য সদৃশঃ কশ্চিদ্ধর্মতঃ পার্থিবোঽভবৎ॥ ১-১০৭-৬ (৪৭১০)
বর্তমানং হি ধর্মেষু সর্বধর্মভৃতাং বরম্।
তং মহীপা মহীপালং রাজরাজ্যেঽভ্যষেচয়ন্॥ ১-১০৭-৭ (৪৭১১)
বীতশোকভয়াবাধাঃ সুখস্বপ্ননিবোধনাঃ।
পতিং ভারতগোপ্তারং সমপদ্যন্ত ভূমিপাঃ॥ ১-১০৭-৮ (৪৭১২)
তেন কীর্তিমতা শিষ্টাঃ শক্রপ্রতিমতেজসা।
যজ্ঞদানক্রিয়াশীলাঃ সমপদ্যন্ত ভূমিপাঃ॥ ১-১০৭-৯ (৪৭১৩)
শান্তনুপ্রমুখৈর্গুপ্তে লোকে নৃপতিভিস্তদা।
নিয়মাৎসর্ববর্ণানাং ধর্মোত্তরমবর্তত॥ ১-১০৭-১০ (৪৭১৪)
ব্রহ্ম পর্যচরৎক্ষত্রং বিশঃ ক্ষত্রমনুব্রতাঃ।
ব্রহ্মক্ষত্রানুরক্তাশ্চ শূদ্রাঃ পর্যচরন্বিশঃ॥ ১-১০৭-১১ (৪৭১৫)
স হাস্তিনপুরে রম্যে কুরূণাং পুটভেদনে।
বসন্সাগরপর্যন্তামন্বশাসদ্বসুন্ধরাম্॥ ১-১০৭-১২ (৪৭১৬)
স দেবরাজসদৃশো ধর্মজ্ঞঃ সত্যবাগৃজুঃ।
দানধর্মতপোয়োগাচ্ছ্রিয়া পরময়া যুতঃ॥ ১-১০৭-১৩ (৪৭১৭)
অরাগদ্বেষসংয়ুক্তঃ সোমবৎপ্রিয়দর্শনঃ॥
তেজসা সূর্যকল্পোঽভূদ্বায়ুবেগসমো জবে।
অন্তকপ্রতিমঃ কোপে ক্ষময়া পৃথিবীসমঃ॥ ১-১০৭-১৪ (৪৭১৮)
বধঃ পশুবরাহাণাং তথৈব মৃগপক্ষিণাম্।
শান্তনৌ পৃথিবীপালে নাবর্তত তথা নৃপ॥ ১-১০৭-১৫ (৪৭১৯)
ব্রহ্মধর্মোত্তরে রাজ্যে শান্তনুর্বিনয়াত্মবান্।
সমং শশাস ভূতানি কামরাগবিবর্জিতঃ॥ ১-১০৭-১৬ (৪৭২০)
`চকোরনেত্রস্তাম্রাস্যঃ সিংহর্ষভগতির্যুবা।
গুণৈরনুপমৈর্যুক্তঃ সমস্তৈরাভিগামিকৈঃ।
গম্ভীরঃ সৎবসংপন্নঃ পূর্ণচন্দ্রনিভাননঃ॥’ ১-১০৭-১৭ (৪৭২১)
দেবর্ষিপিতৃয়জ্ঞার্থমারভ্যন্ত তদা ক্রিয়াঃ।
ন চাধর্মেণ কেষাংচিৎপ্রাণিনামভবদ্বধঃ॥ ১-১০৭-১৮ (৪৭২২)
অসুখানামনাথানাং তির্যগ্যোনিষু বর্ততাম্।
স এব রাজা সর্বেষাং ভূতানামভবৎপিতা॥ ১-১০৭-১৯ (৪৭২৩)
তস্মিন্কুরুপতিশ্রেষ্ঠে রাজরাজেশ্বরে সতি।
শ্রিতা বাগভবৎসত্যং দানধর্মাশ্রিতং মনঃ॥ ১-১০৭-২০ (৪৭২৪)
`যজ্ঞার্থং পশবঃ সৃষ্টাঃ সংতানার্থং চ মৈথুনম্।’
স সমাঃ ষোডশাষ্টৌ চ চতস্রোঽষ্টৌ তথাঽপরাঃ।
রতিমপ্রাপ্নুবন্স্ত্রীষু বভূব বনগোচরঃ॥ ১-১০৭-২১ (৪৭২৫)
তথারূপস্তথাচারস্তথাবৃত্তস্তথাশ্রুতঃ।
গাঙ্গেয়স্তস্য পুত্রোঽভূন্নাম্না দেবব্রতো বসুঃ॥ ১-১০৭-২২ (৪৭২৬)
সর্বাস্ত্রেষু স নিষ্ণাতঃ পার্থিবেষ্বিতরেষু চ।
মহাবলো মহাসৎবো মহাবীর্যো মহারথঃ॥ ১-১০৭-২৩ (৪৭২৭)
স কদাচিন্মৃগং বিদ্ধ্বা গঙ্গামনুসরন্নদীম্।
ভাগীরথীমল্পজলাং শান্তনুর্দৃষ্টবান্নৃপঃ॥ ১-১০৭-২৪ (৪৭২৮)
তাং দৃষ্ট্বা চিন্তয়ামাস শান্তনুঃ পুরুষর্ষভঃ।
স্যন্দতে কিং ন্বিয়ং নাদ্য সরিচ্ছ্রেষ্ঠা যথা পুরা॥ ১-১০৭-২৫ (৪৭২৯)
ততো নিমিত্তমন্বিচ্ছন্দদর্শ স মহামনাঃ।
কুমারং রূপসংপন্নং বৃহন্তং চারুদর্শনম্॥ ১-১০৭-২৬ (৪৭৩০)
দিব্যমস্ত্রং বিকুর্বাণং যথা দেবং পুরন্দরম্।
কৃৎস্নাং গঙ্গাং সমাবৃত্য শরৈস্তীক্ষ্ণৈরবস্থিতম্॥ ১-১০৭-২৭ (৪৭৩১)
তাং শরৈরাচিতাং দৃষ্ট্বা নদীং গঙ্গাং তদন্তিকে।
অভবদ্বিস্মিতো রাজা দৃষ্ট্বা কর্মাতিমানুষম্॥ ১-১০৭-২৮ (৪৭৩২)
জাতমাত্রং পুরা দৃষ্টং তং পুত্রং শান্তনুস্তদা।
নোপলেভে স্মৃতিং ধীমানভিজ্ঞাতুং তমাত্মজম্॥ ১-১০৭-২৯ (৪৭৩৩)
স তু তং পিতরং দৃষ্ট্বা মোহয়ামাস মায়যা।
সংমোহ্য তু ততঃ ক্ষিপ্রং তত্রৈবান্তরধীয়ত॥ ১-১০৭-৩০ (৪৭৩৪)
তদদ্বুতং ততো দৃষ্ট্বা তত্র রাজা স শান্তনুঃ।
সঙ্কমানঃ সুতং গঙ্গামব্রবীদ্দর্শয়েতি হ॥ ১-১০৭-৩১ (৪৭৩৫)
দর্শয়ামাস তং গঙ্গা বিভ্রতী রূপমুত্তমম্।
গৃহীৎবা দক্ষিণে পাণৌ তং কুমারমলঙ্কৃতম্॥ ১-১০৭-৩২ (৪৭৩৬)
অলঙ্কৃতামাভরণৈর্বিরজোম্বরধারিণীম্।
দৃষ্টপূর্বামপি স তাং নাভ্যজানাৎস শান্তনুঃ॥ ১-১০৭-৩৩ (৪৭৩৭)
গঙ্গোবাচ। ১-১০৭-৩৪x (৬৫২)
যং পুত্রমষ্টমং রাজংস্ৎবং পুরা ময়্যবিন্দথাঃ।
স চায়ং পুরুষব্যাঘ্র সর্বাস্ত্রবিদনুত্তমঃ॥ ১-১০৭-৩৪ (৪৭৩৮)
গৃহাণেমং মহারাজ ময়া সংবর্ধিতং সুতম্।
আদায় পুরুষব্যাঘ্র নয়স্বৈনং গৃহং বিভো॥ ১-১০৭-৩৫ (৪৭৩৯)
বেদানধিজগে সাঙ্গান্বসিষ্ঠাদেষ বীর্যবান্।
কৃতাস্ত্রঃ পরমেষ্বাসো দেবরাজসমো যুধি॥ ১-১০৭-৩৬ (৪৭৪০)
সুরাণাং সংমতো নিত্যমসুরাণাং চ ভারত।
উশা বেদ যচ্ছাস্ত্রময়ং তদ্বেদ সর্বশঃ॥ ১-১০৭-৩৭ (৪৭৪১)
তথৈবাঙ্গিরসঃ পুত্রঃ সুরসুরনমস্কৃতঃ।
যদ্বেদ শাস্ত্রং তচ্চাপি কৃৎস্নমস্মিন্প্রতিষ্ঠিতম্॥ ১-১০৭-৩৮ (৪৭৪২)
তব পুত্রে মহাবাহৌ সাঙ্গোপাঙ্গং মহাত্মনি।
ঋষিঃ পরৈরনাধৃষ্যো জামদগ্ন্যঃ প্রতাপবান্॥ ১-১০৭-৩৯ (৪৭৪৩)
যদস্ত্রং বেদ রাভশ্চ তদেতস্মিন্প্রতিষ্ঠিতম্।
মহেষ্বাসমিমং রাজন্রাজধর্মার্থকোবিদম্॥ ১-১০৭-৪০ (৪৭৪৪)
ময়া দত্তং নিজং পুত্রং বীরং বীর গৃহং নয়। ১-১০৭-৪১ (৪৭৪৫)
বৈশম্পায়ন উবাচ।
`ইত্যুক্ৎবা সা মহাভাগা তত্রৈবান্তরধীয়ত।’
তয়ৈবং সমনুজ্ঞাতঃ পুত্রমাদায় শান্তনুঃ॥ ১-১০৭-৪১x (৬৫৩)
ভ্রাজমানং যথাঽদিত্যমায়যৌ স্বপুরং প্রতি।
পৌরবস্তু পুরীং গৎবা পুরন্দরপুরোপমাম্॥ ১-১০৭-৪২ (৪৭৪৬)
সর্বকামসমৃদ্ধার্থং মেনে সোত্মানমাত্মনা।
পৌরবেষু ততঃ পুত্রং রাজ্যার্থমভয়প্রদম্॥ ১-১০৭-৪৩ (৪৭৪৭)
গুণবন্তং মহাত্মানং যৌবরাজ্যেঽভ্যষেচয়ৎ।
পৌরবাঞ্শান্তনোঃ পুত্রঃ পিতরং চ মহায়শাঃ॥ ১-১০৭-৪৪ (৪৭৪৮)
রাষ্ট্রং চ রঞ্জয়ামাস বৃত্তেন ভরতর্ষভ।
স তথা সহ পুত্রেণ রমমাণো মহীপতিঃ॥ ১-১০৭-৪৫ (৪৭৪৯)
বর্তয়ামাস বর্ষাণি চৎবার্যমিতবিক্রমঃ।
স কদাচিদ্বনং যাতো যমুনামভিতো নদীম্॥ ১-১০৭-৪৬ (৪৭৫০)
মহীপতিরনির্দেশ্যমাজিঘ্রদ্গন্ধমুত্তমম্।
তস্য প্রভবমন্বিচ্ছন্বিচচার সমন্ততঃ॥ ১-১০৭-৪৭ (৪৭৫১)
স দদর্শ তদা কন্যাং দাশানাং দেবরূপিণীম্।
তামপৃচ্ছৎস দৃষ্ট্বৈব কন্যামসিতলোচনাম্॥ ১-১০৭-৪৮ (৪৭৫২)
কস্য ৎবমসি কা চাসি কিং চ ভীরু চিকীর্ষসি।
সাঽব্রবীদ্দাশকন্যাঽস্মি ধর্মার্থং বাহয়ে তরিম্॥ ১-১০৭-৪৯ (৪৭৫৩)
পিতুর্নিয়োগাদ্ভদ্রং তে দাশরাজ্ঞো মহাত্মনঃ।
রূপমাধুর্যগন্ধৈস্তাং সংয়ুক্তাং দেবরূপিণীম্॥ ১-১০৭-৫০ (৪৭৫৪)
সমীক্ষ্য রাজা দাশেয়ীং কাময়ামাস শান্তনুঃ।
স গৎবা পিতরং তস্যা বরয়ামাস তাং তদা॥ ১-১০৭-৫১ (৪৭৫৫)
পর্যপৃচ্ছত্ততস্তস্যাঃ পিতরং সোত্মকারণাৎ।
স চ তং প্রত্যুবাচেদং দাশরাজো মহীপতিম্॥ ১-১০৭-৫২ (৪৭৫৬)
জাতমাত্রৈব মে দেয়া বরায় বরবর্ণিনী।
হৃদি কামস্তু মে কশ্চিত্তং নিবোধ জনেশ্বর॥ ১-১০৭-৫৩ (৪৭৫৭)
যদীমাং ধর্মপত্নীং ৎবং মত্তঃ প্রার্থয়সেঽনঘ।
সত্যবাগসি সত্যেন সময়ং কুরু মে ততঃ॥ ১-১০৭-৫৪ (৪৭৫৮)
সময়েন প্রদদ্যাং তে কন্যামহমিমাং নৃপ।
ন হি মে ৎবৎসমঃ কশ্চিদ্বরো জাতু ভবিষ্যতি॥ ১-১০৭-৫৫ (৪৭৫৯)
শান্তনুরুবাচ। ১-১০৭-৫৬x (৬৫৪)
শ্রুৎবা তব বরং দাশ ব্যবস্যেয়মহং তব।
দাতব্যং চেৎপ্রদাস্যামি ন ৎবদেয়ং কথংচন॥ ১-১০৭-৫৬ (৪৭৬০)
দাশ উবাচ। ১-১০৭-৫৭x (৬৫৫)
অস্যাং জায়েত যঃ পুত্রঃ স রাজা পৃথিবীপতে।
ৎবদূর্ধ্বমভিষেক্তব্যো নান্যঃ কশ্চন পার্থিব॥ ১-১০৭-৫৭ (৪৭৬১)
বৈশম্পায়ন উবাচ। ১-১০৭-৫৮x (৬৫৬)
নাকাময়ত তং দাতুং বরং দাশায় শান্তনুঃ।
শরীরজেন তীব্রেণ দহ্যমানোঽপি ভারত॥ ১-১০৭-৫৮ (৪৭৬২)
স চিন্তয়ন্নেব তদা দাশকন্যাং মহীপতিঃ।
প্রত্যযাদ্ধাস্তিনপুরং কামোপহতচেতনঃ॥ ১-১০৭-৫৯ (৪৭৬৩)
ততঃ কদাচিচ্ছোচন্তং শান্তনুং ধ্যানমাস্থিতম্।
পুত্রো দেবব্রতোঽভ্যেত্য পিতরং বাক্যমব্রবীৎ॥ ১-১০৭-৬০ (৪৭৬৪)
সর্বতো ভবতঃ ক্ষেমং বিধেয়াঃ সর্বপার্থিবাঃ।
তৎকিমর্থমিহাভীক্ষ্ণং পরিশোচসি দুঃখিতঃ॥ ১-১০৭-৬১ (৪৭৬৫)
ধ্যায়ন্নিব চ মাং রাজন্নাভিভাষসি কিংচন।
ন চাশ্বেন বিনির্যাসি বিবর্ণো হরিণঃ কৃশঃ॥ ১-১০৭-৬২ (৪৭৬৬)
ব্যাধিমিচ্ছামি তে জ্ঞাতুং প্রতিকুর্যাং হি তত্র বৈ। ১-১০৭-৬৩ (৪৭৬৭)
`বৈশম্পায়ন উবাচ।
স তং কামমবাচ্যং বৈ দাশকন্যাং প্রতীদৃশম্॥ ১-১০৭-৬৩x (৬৫৭)
বিবর্তুং নাশকত্তস্মৈ পিতা পুত্রস্য শান্তনুঃ।’
এবমুক্তঃ স পুত্রেণ শান্তনুঃ প্রত্যভাষত॥ ১-১০৭-৬৪ (৪৭৬৮)
অসংশয়ং ধ্যানপরো যথা বৎস তথা শৃণু।
অপত্যং নস্ৎবমেবৈকঃ কুলে মহতি ভারত॥ ১-১০৭-৬৫ (৪৭৬৯)
শস্ত্রনিত্যশ্চ সততং পৌরুষে পর্যবস্থিতঃ।
অনিত্যতাং চ লোকানামনুশোচামি পুত্রক॥ ১-১০৭-৬৬ (৪৭৭০)
কথংচিত্তব গাঙ্গেয় বিপত্তৌ নাস্তি নঃ কুলম্।
অসংশয়ং ৎবমেবৈকঃ শতাদপি বরঃ সুতঃ॥ ১-১০৭-৬৭ (৪৭৭১)
ন চাপ্যহং বৃথা ভূয়ো দারান্কর্তুমিহোৎসহে।
সংতানস্যাবিনাশায় কাময়ে ভদ্রমস্তু তে॥ ১-১০৭-৬৮ (৪৭৭২)
অনপত্যতৈকপুত্রৎবমিত্যাহুর্ধর্মবাদিনঃ।
`চক্ষুরেকং চ পুত্রশ্চ অস্তি নাস্তি চ ভারত।
চক্ষুর্নাশে তনোর্নাশঃ পুত্রনাশে কুলক্ষয়ঃ॥’ ১-১০৭-৬৯ (৪৭৭৩)
অগ্নিহোত্রং ত্রয়ী বিদ্যা যজ্ঞাশ্চ সহদক্ষিণাঃ।
সর্বাণ্যেতান্যপত্যস্য কলাং নার্হন্তি ষোডশীম্॥ ১-১০৭-৭০ (৪৭৭৪)
এবমেতন্মনুষ্যেষু তচ্চ সর্বং প্রজাস্বিতি।
যদপত্যং মহাপ্রাজ্ঞ তত্র মে নাস্তি সংশয়ঃ॥ ১-১০৭-৭১ (৪৭৭৫)
`অপত্যেনানৃণো লোকে পিতৄণাং নাস্তি সংশয়ঃ।’
এষা ত্রয়ী পুরাণানাং দেবতানাং চ শাশ্বতী॥ ১-১০৭-৭২ (৪৭৭৬)
`অপত্যং কর্ম বিদ্যা চ ত্রীণি জ্যোতীংষি ভারত॥’ ১-১০৭-৭৩ (৪৭৭৭)
ৎবং চ শূরঃ সদাঽমর্ষী শস্ত্রনিত্যশ্চ ভারত।
নান্যত্র যুদ্ধাত্তস্মাত্তে নিধনং বিদ্যতে ক্বচিৎ॥ ১-১০৭-৭৪ (৪৭৭৮)
সোঽস্মি সংশয়মাপন্নস্ৎবয়ি শান্তে কথং ভবেৎ।
ইতি তে কারণং তাত দুঃখস্যোক্তমশেষতঃ॥ ১-১০৭-৭৫ (৪৭৭৯)
বৈশম্পায়ন উবাচ। ১-১০৭-৭৬x (৬৫৮)
ততস্তৎকারণং রাজ্ঞো জ্ঞাৎবা সর্বমশেষতঃ।
দেবব্রতো মহাবুদ্ধিঃ প্রজ্ঞয়া চান্বচিন্তয়ৎ॥ ১-১০৭-৭৬ (৪৭৮০)
অপত্যফলসংয়ুক্তমেতচ্ছ্রুৎবা পিতুর্বচঃ।
সূতং ভূয়োঽপি সংতপ্ত আহ্বয়ামাস বৈ পিতুঃ॥ ১-১০৭-৭৭ (৪৭৮১)
সূতস্তু কুরুমুখ্যস্য উপয়াতস্তদাজ্ঞয়া।
তমুবাচ মহাপ্রাজ্ঞো ভীষ্মো বৈ সারথিং পিতুঃ॥ ১-১০৭-৭৮ (৪৭৮২)
ৎবং সারথে পিতুর্মহ্যং সখাসি রথধূর্গতঃ।
অপি জানাসি যদি বৈ কস্যাং ভাবো নৃপস্য তু॥ ১-১০৭-৭৯ (৪৭৮৩)
তদাচক্ষ্ব ভবান্পৃষ্টঃ করিষ্যে ন তদন্যথা। ১-১০৭-৮০ (৪৭৮৪)
সূত উবাচ।
দাশকন্যা কুরুশ্রেষ্ঠ তত্র ভাবঃ পিতুর্গতঃ॥ ১-১০৭-৮০x (৬৫৯)
বৃতঃ স নরদেবেন তদা বচনমব্রবীৎ।
যোঽস্যাং পুমান্ভবেজ্জাতঃ স রাজা ৎবদনন্তরম্॥ ১-১০৭-৮১ (৪৭৮৫)
নাকাময়ত তং দাতুং পিতা তব বরং তদা।
স চাপি নিশ্চয়স্তস্য ন চ দদ্যাং ততোঽন্যথা॥ ১-১০৭-৮২ (৪৭৮৬)
এতত্তে কথিতং বীর কুরুষ্ব যদনন্তরম্। ১-১০৭-৮৩ (৪৭৮৭)
বৈশম্পায়ন উবাচ।
ততঃ স পিতুরাজ্ঞায় মতং সম্যগবেক্ষ্য চ।
জ্ঞাৎবা চ মানসং পুত্রঃ প্রয়যৌ যমুনাং প্রতি॥ ১-১০৭-৮৩x (৬৬০)
ক্ষত্রিয়ৈঃ সহ ধর্মাত্মা পুরাণৈর্ধর্মচারিভিঃ।
উচ্চৈশ্শ্রবসমাগম্য কন্যাং বব্রে পিতুঃ স্বয়ম্’॥ ১-১০৭-৮৪ (৪৭৮৮)
তং দাশঃ প্রতিজগ্রাহ বিধিবৎপ্রতিপূজ্য চ।
অব্রবীচ্চৈনমাসীনং রাজসংসদি ভারত॥ ১-১০৭-৮৫ (৪৭৮৯)
`রাজ্যশুল্কা প্রদাতব্যা কন্যেয়ং যাচতাং বর।
অপত্যং যদ্ভবেদস্যাঃ স রাজাঽস্তু পিতুঃ পরম্॥’ ১-১০৭-৮৬ (৪৭৯০)
ৎবমেবাত্র মহাবাহো শান্তনোর্বংশবর্ধনঃ।
পুত্রঃ শস্ত্রভৃতাং শ্রেষ্ঠঃ কিং নু বক্ষ্যামি তে বচঃ॥ ১-১০৭-৮৭ (৪৭৯১)
`কুমারিকায়াঃ শুল্কার্থং কিংচিদ্বক্ষ্যামি ভারত।’
কোহি সংবন্ধখং শ্লাঘ্যমীপ্সিতং যৌনমীদৃশম্।
অতিক্রামন্ন তপ্যেত সাক্ষাদপি শতক্রতুঃ॥ ১-১০৭-৮৮ (৪৭৯২)
অপত্যং চৈতদার্যস্য যো যুষ্মাকং সমো গুণৈঃ।
যস্য শুক্রাৎসত্যবতী সংভূতা বরবর্ণিনী॥ ১-১০৭-৮৯ (৪৭৯৩)
তেন মে বহুশস্তাত পিতা তে পরিকীর্তিতঃ।
অর্হঃ সত্যবতীং বোঢুং ধর্মজ্ঞঃ স নরাধিপঃ॥ ১-১০৭-৯০ (৪৭৯৪)
`ইয়ং সত্যবতী দেবী পিতরং তেঽব্রবীত্তথা।
অর্থিতশ্চাপিরাজর্ষিঃ প্রত্যাখ্যাতঃ পুরা ময়া’॥ ১-১০৭-৯১ (৪৭৯৫)
কন্যাপিতৃৎবাৎকিংচিত্তু বক্ষ্যামি ৎবাং নরাধিপ।
বলবৎসপত্নতামত্র দোষং পশ্যামি কেবলম্॥ ১-১০৭-৯২ (৪৭৯৬)
`ভূয়াংসং ৎবয়ি পশ্যামি তদ্দোষমপরাজিত।’
যস্য হি ৎবং সপত্নঃ স্যা গন্ধর্বস্যাসুরস্য বা॥ ১-১০৭-৯৩ (৪৭৯৭)
ন স জাতু চিরং জীবেত্ৎবয়ি ক্রুদ্ধে পরন্তপ।
এতাবানত্র দোষো হি নান্যঃ কশ্চন পার্থিব॥ ১-১০৭-৯৪ (৪৭৯৮)
এতজ্জানীহি ভদ্রং তে দানাদানে পরন্তপ॥ ১-১০৭-৯৫ (৪৭৯৯)
বৈশম্পায়ন উবাচ। ১-১০৭-৯৬x (৬৬১)
এবমুক্তস্তু গাঙ্গেয়স্তদ্যুক্তং প্রত্যভাষত।
শৃণ্বতাং ভূমিপালানাং পিতুরর্থায় ভারত॥ ১-১০৭-৯৬ (৪৮০০)
`ইদং বচনমাধৎস্ব নাস্তি বক্তাস্য মৎসমঃ।
অন্যো জাতো ন জনিতা ন চ কশ্চন সংপ্রতি’॥ ১-১০৭-৯৭ (৪৮০১)
এবমেতৎকরিষ্যামি যথা ৎবমনুভাষসে।
যোঽস্যাং জনিষ্যতে পুত্রঃ স নো রাজা ভবিষ্যতি॥ ১-১০৭-৯৮ (৪৮০২)
ইত্যুক্তঃ পুনরেব স্ম তং দাশঃ প্রত্যভাষত।
চিকীর্ষুর্দুষ্করং কর্ম রাজ্যার্থে ভরতর্ষভ॥ ১-১০৭-৯৯ (৪৮০৩)
ৎবমেব নাথঃ সংপ্রাপ্তঃ শান্তনোরমিতদ্যুতে।
কন্যায়াশ্চৈব ধর্মাত্মন্প্রভুর্দানায় চেশ্বরঃ॥ ১-১০৭-১০০ (৪৮০৪)
ইদং তু বচনং সৌম্য কার্যং চৈব নিবোধ মে।
কৌমারিকাণাং শীলেন বক্ষ্যাম্যহমরিন্দম॥ ১-১০৭-১০১ (৪৮০৫)
যত্ৎবয়া সত্যবত্যর্থে সত্যধর্মপরায়ণ।
রাজমধ্যে প্রতিজ্ঞাতমনুরূপং তবৈব তৎ॥ ১-১০৭-১০২ (৪৮০৬)
নান্যথা তন্মহাবাহো সংশয়োঽত্র ন কশ্চন।
তবাপত্যং ভবেদ্যত্তু তত্র নঃ সংশয়ো মহান্॥ ১-১০৭-১০৩ (৪৮০৭)
বৈশম্পায়ন উবাচ। ১-১০৭-১০৪x (৬৬২)
তস্যৈতন্মতমাজ্ঞায় সত্যধর্মপরায়ণঃ।
প্রত্যজানাত্তদা রাজন্পিতুঃ প্রিয়চিকীর্ষয়া॥ ১-১০৭-১০৪ (৪৮০৮)
গাঙ্গেয় উবাচ। ১-১০৭-১০৫x (৬৬৩)
`উচ্চৈশ্শ্রবঃ সমাধৎস্ব প্রতিজ্ঞাং জনসংসদি।
ঋষয়ো বাথ বা দেবা ভূতান্যন্তর্হিতানি চ॥ ১-১০৭-১০৫ (৪৮০৯)
যানি যানীহ শৃণ্বন্তু নাস্তি বক্তাস্য মৎসমঃ।’
দাশরাজ নিবোধেদং বচনং মে নৃপোত্তম॥ ১-১০৭-১০৬ (৪৮১০)
শৃণ্বতাং ভূমিপালানাং যদ্ব্রবীমি পিতুঃ কৃতে।
রাজ্যং তাবৎপূর্বমেব ময়া ত্যক্তং নরাধিপাঃ॥ ১-১০৭-১০৭ (৪৮১১)
অপত্যহেতোরপি চ করিষ্যেঽদ্য বিনিশ্চয়ম্।
অদ্যপ্রভৃতি মে দাশ ব্রহ্মচর্যং ভবিষ্যতি॥ ১-১০৭-১০৮ (৪৮১২)
অপুত্রস্যাপি মে লোকা ভবিষ্যন্ত্যক্ষয়া দিবি।
`ন হি জন্মপ্রভৃত্যুক্তং ময়া কিংচিদিহানৃতম্॥ ১-১০৭-১০৯ (৪৮১৩)
যাবৎপ্রাণা ধ্রিয়ন্তে বৈ মম দেহং সমাশ্রিতাঃ।
তাবন্ন জনয়িষ্যামি পিত্রে কন্যাং প্রয়চ্ছ মে॥ ১-১০৭-১১০ (৪৮১৪)
পরিত্যজাম্যহং রাজ্যং মৈথুনং চাপি সর্বশঃ।
ঊর্ধ্বরেতা ভবিষ্যামি দাশ সত্যং ব্রবীমি তে॥’ ১-১০৭-১১১ (৪৮১৫)
বৈশম্পায়ন উবাচ। ১-১০৭-১১২x (৬৬৪)
তস্য তদ্বচনং শ্রুৎবা সংপ্রহৃষ্টতনূরুহঃ।
দদানীত্যেব তং দাশো ধর্মাত্মা প্রত্যভাষত॥ ১-১০৭-১১২ (৪৮১৬)
ততোন্তরিক্ষেঽপ্সরসো দেবাঃ সর্ষিগণাস্তদা।
`তদ্দৃষ্টা দুষ্করং কর্ম প্রশশংসুশ্চ পার্থিবাঃ॥’ ১-১০৭-১১৩ (৪৮১৭)
অভ্যবর্ষন্ত কুসুমৈর্ভীষ্মোঽয়মিতি চাব্রুবন্।
ততঃ স পিতুরর্থায় তামুবাচ যশস্বিনীম্॥ ১-১০৭-১১৪ (৪৮১৮)
অধিরোহ রথং মাতর্গচ্ছাবঃ স্বগৃহানিতি।
এবমুক্ৎবা তু ভীষ্মস্তাং রথমারোপ্য ভামিনীং॥ ১-১০৭-১১৫ (৪৮১৯)
আগম্য হাস্তিনপুরং শান্তনোঃ সংন্যবেদয়ৎ।
তস্য তদ্দুষ্করং কর্ম প্রশশংসুর্নারাধিপাঃ॥ ১-১০৭-১১৬ (৪৮২০)
সমেতাশ্চ পৃথক্চৈব ভীষ্মোয়মিতি চাব্রুবন্।
তচ্ছ্রুৎবা দুষ্করং কর্ম কৃতং ভীষ্মেণ শান্তনুঃ॥ ১-১০৭-১১৭ (৪৮২১)
বভূব দুঃখিতো রাজা চিররাত্রায় ভারত।
স তেন কর্মণা সূনোঃ প্রীতস্তস্মৈ বরং দদৌ॥’ ১-১০৭-১১৮ (৪৮২২)
স্বচ্ছন্দমরণং তুষ্টো দদৌ তস্মৈ মহাত্মনে।
ন তে মৃত্যুঃ প্রভবিতা যাবজ্জীবিতুমিচ্ছসি॥ ১-১০৭-১১৯ (৪৮২৩)
ৎবত্তো হ্যনুজ্ঞাং সংপ্রাপ্য মৃত্যুঃ প্রভবিতাঽনঘ॥ ১-১০৭-১২০ (৪৮২৪)
ইতি শ্রীমন্মহাভারতে আদিপর্বণি সংভবপর্বণি সপ্তাধিকশততমোঽধ্যায়ঃ॥ ১০৭ ॥
Mahabharata – Adi Parva – Chapter Footnotes
১-১০৭-১২ পুটভেদনে পত্তনে॥ ১-১০৭-১৬ ব্রহ্মধর্মোত্তরে অহিংসাধর্মপ্রধানে॥ ১-১০৭-২০ বাক্ সত্যং শ্রিতাভবৎ॥ ১-১০৭-৩৬ অধিজগে অধীতবান্॥ ১-১০৭-৪৯ তরিং নাবম্॥ ১-১০৭-৫৬ ব্যবস্যেয়ং বিনিশ্চিনুয়ম্॥ ১-১০৭-৫৮ শরীরজেন কামেন॥ ১-১০৭-৬২ হরিণঃ পাণ্ডুগাত্রঃ॥ ১-১০৭-৭২ পুরাণানাং পুরাতনানাম্॥ ১-১০৭-৯৫ দানে বসুবচনং অদানে বলবৎসপত্নতা অত্র কারণমিতি শেষঃ॥ সপ্তোত্তরশততমোঽধ্যায়ঃ॥ ১০৭ ॥