আদিপর্ব – অধ্যায় ০১৭

আদিপর্ব – অধ্যায় ০১৭

॥ শ্রীঃ ॥

১.১৭. অধ্যায়ঃ ০১৭

Mahabharata – Adi Parva – Chapter Topics

অমৃতমথনবিষয়ে ভগবদাজ্ঞয়া দেবানাং বিচারঃ॥ ১ ॥

Mahabharata – Adi Parva – Chapter Text

১-১৭-০ (১১৬১)
সৌতিরুবাচ। ১-১৭-০x (৭৪)
এতস্মিন্নেব কালে তু ভগিন্যৌ তে তপোধন।
অপশ্যতাং সমায়ান্তমুচ্চৈঃ শ্রবসমন্তিকাৎ॥ ১-১৭-১ (১১৬২)
যং তু দেবগণাঃ সর্বে হৃষ্টরূপমপূজয়ন্।
মথ্যমানেঽমৃতে জাতমশ্বরত্নমনুত্তমম্॥ ১-১৭-২ (১১৬৩)
অমোঘবলমশ্বানামুত্তমং জবিনাং বরম্।
শ্রীমন্তমজরং দিব্যং সর্বলক্ষণপূজিতম্॥ ১-১৭-৩ (১১৬৪)
শৌনক উবাচ। ১-১৭-৪x (৭৫)
কথং তদমৃতং দেবৈর্মথিতং ক্ব চ শংস মে।
`কারণং চাত্র মথনে সংজাতমমৃতাৎপরম্॥’
যত্র জজ্ঞে মহাবীর্যঃ সোঽশ্বরাজো মহাদ্যুতিঃ॥ ১-১৭-৪ (১১৬৫)
সৌতিরুবাচ। ১-১৭-৫x (৭৬)
জ্বলন্তমচলং মেরুং তেজোরাশিমনুত্তমম্।
আক্ষিপন্তং প্রভাং ভানোঃ স্বশৃঙ্গৈঃ কাঞ্চনোজ্জ্বলৈঃ॥ ১-১৭-৫ (১১৬৬)
কনকাভরণং চিত্রং দেবগন্ধর্বসেবিতম্।
অপ্রমেয়মনাধৃষ্যমধর্মবহুলৈর্জনৈঃ॥ ১-১৭-৬ (১১৬৭)
ব্যালৈরাবারিতং ঘোরৈর্দিব্যৌষধিবিদীপিতম্।
নাকমাবৃত্য তিষ্ঠন্তমুচ্ছ্রয়েণ মহাগিরিম্॥ ১-১৭-৭ (১১৬৮)
অগম্যং মনসাপ্যন্যৈর্নদীবৃক্ষসমন্বিতম্।
নানাপতগসঙ্ঘৈশ্চ নাদিতং সুমনোহরৈঃ॥ ১-১৭-৮ (১১৬৯)
তস্য শৃঙ্গমুপারুহ্য বহুরত্নাচিতং শুভম্।
অনন্তকল্পমদ্বন্দ্বং সুরাঃ সর্বে মহৌজসঃ॥ ১-১৭-৯ (১১৭০)
তে মন্ত্রয়িতুমারব্ধাস্তত্রাসীনা দিবৌকসঃ।
অমৃতায় সমাগম্য তপোনিয়মসংয়ুতাঃ॥ ১-১৭-১০ (১১৭১)
তত্র নারায়ণো দেবো ব্রহ্মাণমিদমব্রবীৎ।
চিন্তয়ৎসু সুরেষ্বেবং মন্ত্রয়ৎসু চ সর্বশঃ॥ ১-১৭-১১ (১১৭২)
দেবৈরসুরসঙ্ঘৈশ্চ মথ্যতাং কলশোদধিঃ।
ভবিষ্যত্যমৃতং তত্র মথ্যমানে মহোদধৌ॥ ১-১৭-১২ (১১৭৩)
সর্বৌষধীঃ সমাবাপ্য সর্বরত্নানি চৈব হ।
মন্থধ্বয়ুদধিং দেবা বেৎস্যধ্বমমৃতং ততঃ॥ ॥ ১-১৭-১৩ (১১৭৪)

ইতি শ্রীমন্মহাভারতে আদিপর্বণি আস্তীকপর্বণি সপ্তদশোঽধ্যায়ঃ॥ ১৭ ॥

Mahabharata – Adi Parva – Chapter Footnotes

১-১৭-৯ অনন্তকল্পং অনন্তো বিষ্ণুরাকাশো বাত তত ঈষন্ন্যূনম্॥ ১-১৭-১৩ বেৎস্যধ্বং লপ্স্যধ্বম্॥ সপ্তদশোঽধ্যায়ঃ॥ ১৭ ॥