২.৩ গরুডপুরাণ (অধ্যায় ২১-৩০)

শ্রীগরুডমহাপুরাণম্-২১
গরুড উবাচ |
মুক্তিং যান্তি কথং প্রেতাস্তদহং প্রষ্টুমুৎসুকঃ |
যন্মুক্তৌ চ মনুষ্যাণাং ন পীডা জায়তে পুনঃ || ২, ২১. ১ ||
এতৈশ্চ লক্ষণৈর্দেব পীডোক্তা প্রেতজা ৎবয়া |
তেষাং কদা ভবেন্মুক্তিঃ প্রেতৎবং ন কথং ভবেৎ || ২, ২১. ২ ||
প্রেতৎবে হি প্রমাণং চ কতি বর্ষাণি সঙ্খ্যয়া |
চিরং প্রেতৎবমাপন্নঃ কথং মুক্তিমবাপ্নুয়াৎ || ২, ২১. ৩ ||
শ্রীকৃষ্ণ উবাচ |
মুক্তিং প্রায়ন্তি তে প্রেতাস্তদহং কথয়ামি তে |
যদৈব মনুজোঽবৈতি মম পীডা কৃতা ৎবিয়ম্ || ২, ২১. ৪ ||
পৃচ্ছার্থং হিতমন্বিচ্ছন্দৈ বজ্ঞে বিনিবদয়েৎ |
স্বপ্নে দৃষ্টঃ শুভো বৃক্ষঃ ফলিতশ্চূতচম্পকঃ || ২, ২১. ৫ ||
বিপ্রো বা বৃষভো দেবো ভ্রমতে তীর্থগো যদি |
এবং দৃষ্টো যদা স্বপ্নো মৃতঃ কোঽপিস্বগোত্রজঃ || ২, ২১. ৬ ||
স্বপ্নে সত্যং পরিজ্ঞায় দৃষ্টং প্রেতপ্রভাবতঃ |
অদ্ভুতানি প্রদৃশ্যন্তে প্রেতদোষাদ্বিনিশ্চিতম্ || ২, ২১. ৭ ||
তীর্থস্নানে মতির্যাবচ্চিত্তং ধর্মপরায়ণম্ |
ধর্মাপায়ং প্রকুরুতে প্রেতপীডা তদা ব্রজেৎ || ২, ২১. ৮ ||
তদা তত্র বিনাশায় চিত্তভঙ্গং করোতি সা |
শ্রেয়াংসি বহুবিঘ্নানি সম্ভবন্তি পদেপদে || ২, ২১. ৯ ||
অশ্রেয়সি প্রবৃত্তি চ প্রেরয়ন্তি পুনঃ পুনঃ |
উচ্চাটনং চ ক্রূরৎবং সর্বং প্রেতকৃতং খগ || ২, ২১. ১০ ||
সর্ববিঘ্নানি সন্ত্যজ্য মুক্ত্যুপায়ং করোতি যঃ |
তস্য কর্মফলং সাধু প্রেতবৃত্তিশ্চ শাশ্বতী || ২, ২১. ১১ ||
স ভবেত্তেন মুক্তস্তু দত্তং শ্রেয়স্করং পরম্ |
স্বয়ং তৃপ্যতি ভোঃ পক্ষিন্যস্যোদ্দেশেন দীয়তে || ২, ২১. ১২ ||
শৃণু সত্যমিদং তার্ক্ষ্য যদ্দদাতি ভুনক্তি সঃ |
আত্মানং শ্রেয়সা যুঞ্জ্যাৎপ্রেতস্তৃপ্তিং চিরং ব্রজেৎ || ২, ২১. ১৩ ||
তে তৃপ্তাঃ শুভমিচ্ছন্তি নিজবন্ধুষু সর্বদা |
অজ্ঞাতয়স্তু যে দুষ্টাঃ পীডয়ন্তি স্ববংশজান্ || ২, ২১. ১৪ ||
নিবারয়ন্তি তৃপ্তাস্তে জায়মানানুকম্পকাঃ |
পশ্চাত্তে মুক্তিমায়ন্তি কালে প্রাপ্তে স্বপুত্রতঃ |
সদা বন্ধুষু যচ্ছন্তি বৃদ্ধিমৃদ্ধিং খগাধিপ || ২, ২১. ১৫ ||
দর্শনাদ্ভাষণাদ্যস্তু চেষ্টাতঃ পীডনাদ্গতিম্ |
ন প্রাপয়তি মূঢাত্মা প্রেতশাপৈঃ স লিপ্যতে || ২, ২১. ১৬ ||
অপুত্রকোঽপশুশ্চৈব দরিদ্রো ব্যাধিতস্তথা |
বৃত্তিহীনশ্চ হীনশ্চ ভবেজ্জন্মনিজন্মনি || ২, ২১. ১৭ ||
এবং ব্রুবন্তি তে প্রেতাঃ পুনর্যাভ্যং সমাশ্রিতাঃ |
তত্রস্থানাং ভবেন্মুক্তিঃ স্বকালে কর্মসঙ্ক্ষয়ে || ২, ২১. ১৮ ||
গরুড উবাচ |
নাম গোত্রং ন দৃশ্যেত প্রতীতির্নৈব জায়তে |
কেচিদ্বদন্তি দৈবজ্ঞাঃ পীডাং প্রেতসমুদ্ভবাম্ || ২, ২১. ১৯ ||
ন স্বপ্নশ্চৈষ্টিতং নৈব দর্শনং ন কদাচন |
কিং কর্তব্যং সুরশ্রেষ্ঠ তত্র মে ব্রূহি নিশ্চিতম্ || ২, ২১. ২০ ||
শ্রীভগবানুবাচ |
সত্যং বাপ্যনৃতং বাপি বদন্তি ক্ষিতিদেবতাঃ |
তদা সঞ্চিন্ত্য হৃদয়ে সত্যমেতদ্দ্বিজেরিতম্ || ২, ২১. ২১ ||
ভাবভক্তিং পুরস্কৃত্য পিতৃভক্তিপরায়ণঃ |
কৃৎবা কৃষ্ণবলিং চৈব পুরশ্চরণ পূর্বকম্ || ২, ২১. ২২ ||
জপহোমৈস্তথা দানৈঃ প্রকুর্যাদ্দেহসোধনম্ |
কৃতেন তেন বিঘ্নানি বিনশ্যন্তি খগেশ্বর || ২, ২১. ২৩ ||
ভূতপ্রেতপিশাচৈর্বা স চেদন্যৈঃ প্রপীড্যতে |
পিত্রুদ্দেশেন বৈ কুর্যান্নারায়ণবলিং তদা |
বিমুক্তঃ সর্বপীডাভ্য ইতি সত্যং বচো মম || ২, ২১. ২৪ ||
পিতৃপীডা ভবেদ্যত্র কৃত্যৈরন্যৈর্ন মুচ্যতে |
তস্মাৎসর্বপ্রয়ত্নেন পিতৃভক্তিপরো ভবেৎ || ২, ২১. ২৫ ||
নবমে দশমে বর্ষে পিক্ষুদ্দেশেন বৈ পুমান্ |
গায়ত্ত্রীময়ুতং জপ্ত্বা দশাংশেন চ হোময়েৎ || ২, ২১. ২৬ ||
কৃৎবা কৃষ্ণবলিং পূর্বং বৃষোৎসর্গাদিকাঃ ক্রিয়াঃ |
সর্বোপদ্রবহীনস্তু সর্বসৌখ্যমবাপ্নুয়াৎ |
উত্তমং লোকমাপ্নোতি জ্ঞাতিপ্রাধান্যমেব চ || ২, ২১. ২৭ ||
পিতৃমা তৃসমং লোকে নাস্ত্যন্যদ্দৈবতং পরম্ |
তস্মাৎসর্বপ্রয়ত্নেন পূজয়েৎপিতরৌ সদা || ২, ২১. ২৮ ||
হিতানামুপদেষ্টা হি প্রত্যক্ষং দৈবতং পিতা |
অন্যা যা দেবতা লোকে ন দেহপ্রভবো হি তাঃ || ২, ২১. ২৯ ||
শরীরমেব জন্তূনাং স্বর্গমোক্ষৈকসাধনম্ |
দেহো দত্তো হি যেনৈবং কোঽন্যঃ পূজ্যতমস্ততঃ || ২, ২১. ৩০ ||
ইতি সঞ্চিন্ত্যহৃদয়ে পক্ষিন্যদ্যৎপ্রয়চ্ছতি |
তৎসর্বমাত্মনা ভুঙ্ক্তে দানং বেদবিদো বিদুঃ || ২, ২১. ৩১ ||
পুন্নামনরকাদ্যস্মাৎপিতরং ত্রায়তে সুতঃ |
তস্মাৎপুত্ত্র ইতি প্রোক্ত ইহ চাপি পরত্র চ || ২, ২১. ৩২ ||
অপমৃত্যুমৃতৌ স্যাতাং পিতরৌ কস্যচিৎখগ |
ব্রততীর্থাবিবাহাদিশ্রাদ্ধং সংবৎসরং ত্যজেৎ || ২, ২১. ৩৩ ||
স্বপ্নাধ্যায়মিমং যস্তু প্রেত লিঙ্গনিদর্শকম্ |
যঃ পঠেচ্ছৃণুয়াদ্বাপি প্রেতচিহ্নং ন পশ্যতি || ২, ২১. ৩৪ ||

ইতি শ্রীগারুডে মহাপুরাণে উত্তরখণ্ডে দ্বিতীয়াংশে ধর্মকাদৃপ্রেতকল্পে
শ্রীকৃষ্ণগরুডসংবাদে স্বপ্নাধ্যায়ো নামৈকবিংশোঽধ্যায়ঃ

শ্রীগরুডমহাপুরাণম্-২২
গরুড উবাচ |
সম্ভবন্তি কথং প্রেতাঃ কেন তেষাং গতির্ভবেৎ |
কীদৃক্তেষাং ভবেদ্রূপং ভোজনং কিং ভবেৎপ্রভো || ২, ২২. ১ ||
সুপ্রীতাস্তে কথং প্রেতাঃ ক্ব তিষ্ঠন্তি সুরেশ্বর |
প্রসন্নঃ কৃপয়া দেব প্রশ্রমেনং বদস্ব মে || ২, ২২. ২ ||
শ্রীভগবানুবাচ |
পাপকর্মরতা যে বৈ পূর্বকর্মবশানুগাঃ |
জায়ন্তে তে মৃতাঃ প্রেতাস্তাঞ্ছৃণুষ্ব বদাম্যহম্ || ২, ২২. ৩ ||
বাপীকূপতডাগাংশ্চ আরামং সুরমন্দিরম্ |
প্রপাং সদ্ম সুবৃক্ষাংশ্চ তথা ভোজনশালিকাঃ || ২, ২২. ৪ ||
পিতৃপৈতামহং ধর্মং কিক্রীণাতি স পাপভাক্ |
মৃতঃ প্রেতৎবমাপ্নোতি যাবদাভূতসম্প্লবম্ || ২, ২২. ৫ ||
গোচরং গ্রামসীমাং তডাগারামগহ্বরম্ |
কর্ষয়ন্তি চ যে লোভাৎপ্রেতাস্তে বৈ ভবন্তি হি || ২, ২২. ৬ ||
চণ্ডালাদুদকাৎসর্পাদ্ব্রাহ্মণাদ্বৈদ্যুতাগ্নিতঃ |
দংষ্ট্রিভ্যশ্চ পশুভ্যশ্চ মরণং পাপকর্মিণাম্ || ২, ২২. ৭ ||
উদ্বন্ধনমৃতা যে চ বিষশস্ত্রহতাশ্চ যে |
আত্মোপঘাতিনো যে চ বিষূচ্যাদিহতাস্তথা || ২, ২২. ৮ ||
মহারোগৈর্মৃতা যে চ পাপরোগৈশ্চ দস্যুভিঃ |
অসংস্কৃতপ্রমীতা যে বিহিতাচারবর্জিতাঃ || ২, ২২. ৯ ||
বৃষোৎসর্গাদিলুপ্তাশ্চলুপ্তমাসিকপিণ্ডকাঃ |
যস্যানয়তি শূদ্রোগ্নিং তৃণকাষ্ঠহবীংষি সঃ || ২, ২২. ১০ ||
পতনাৎপর্বতানাং চ ভিত্তিপাতেন যে মৃতাঃ |
রজস্বলাদিদোষৈশ্চ ন চ ভূমৌ মতাশ্চ যে || ২, ২২. ১১ ||
অন্তরিক্ষে মৃতা যে চ বিষ্ণুস্মরণবর্জিতাঃ |
সূতকৈঃ শ্বাদিসম্পর্কৈঃ প্রেতভাবা ইহ ক্ষিতৌ || ২, ২২. ১২ ||
এবমাদিভিরন্যৈশ্চ কুমৃত্যুবশগাশ্চ যে |
তে সর্বে প্রেতয়োনিস্থা বিচরন্তি মরুস্থলে || ২, ২২. ১৩ ||
মাতরং ভগিনীং ভার্যাং স্নুষাং দুহিতরং তথা |
অদৃষ্টদোষাং ত্যজতি স প্রেতো জায়তেধ্রুবম্ || ২, ২২. ১৪ ||
ভ্রাতৃধ্রুগ্ব্রহ্মহা গোঘ্নঃ সুরাপো গুরুতল্পগঃ |
হেমক্ষৌমহরস্তার্ক্ষ্য স বৈ প্রেতৎবমাপ্নুয়াৎ || ২, ২২. ১৫ ||
ন্যাসাপহর্তা মিত্রধ্রুক্পরদাররতস্তথা |
বিশ্বাসঘাতী ক্রূরস্তু স প্রেতো জায়তে ধ্রুবম্ || ২, ২২. ১৬ ||
কুলমার্গাংশ্চ সন্ত্যজ্য পরধর্মরতস্তথা |
বিদ্যাবৃত্তবিহীনশ্চ স প্রেতো জায়তেধ্রুবম্ || ২, ২২. ১৭ ||
অত্রৈবোদাহরন্তীমমিতিহাসং পুরাতনম্ |
যুধিষ্ঠিরস্য সংবাদং ভীষ্মেণ সহ সুব্রত |
তদহং কথয়িষ্যামি যচ্ছ্রুৎবা সৌখ্যমাপ্নুয়াৎ || ২, ২২. ১৮ ||
যুধিষ্ঠির উবাচ |
কেন কর্মবিপাকেন প্রেতৎবমুপজায়তে |
কেন বা মুচ্যতে কস্মাত্তন্মে ব্রূহি পিতামহ |
যচ্ছ্রুৎবা ন পুনর্মোহমেবং যাস্যা মি সুব্রত || ২, ২২. ১৯ ||
ভীষ্ম উবাচ |
যেনৈব জায়তে প্রেতো যেনৈব স বিমুচ্যতে |
প্রাপ্নোতি নরকং ঘোরং দুস্তরং দৈবতৈরপি || ২, ২২. ২০ ||
সততং শ্রবণাদ্যস্য পুণ্যশ্রবণকীর্তনাৎ |
মানবা বিপ্রমুচ্যন্তে আপন্নাঃ প্রেতয়োনিষু || ২, ২২. ২১ ||
শ্রূয়তে হি পুরা বৎস ব্রাহ্মণঃ শংসিতব্রতঃ |
নাম্না সন্তপ্তকঃ খ্যাত স্তপোর্ঽথে বনমাশ্রিতঃ || ২, ২২. ২২ ||
স্বাধ্যায়য়ুক্তো হোমেন যো (যা) গয়ুক্তো দয়ান্বিতঃ |
যজন্স সকলান্যজ্ঞান্যুক্ত্যা কালং চ বিক্ষিপন্ || ২, ২২. ২৩ ||
ব্রহামচর্যসমায়ুক্তো যুক্তস্তপসি মার্দবে |
পরলোকভয়োপেতঃ সত্যশৌচৈশ্চ নির্মলঃ || ২, ২২. ২৪ ||
যুক্তোঽহি গুরুবাক্যেন যুক্তশ্চাতিথিপূজনে |
আত্ময়োগে সদোদ্যুক্তঃ সর্বদ্বন্দ্ববিবর্জিতঃ || ২, ২২. ২৫ ||
যোগাভ্যাসে সদা যুক্তঃ সংসারবিজিগীষয়া |
এবংবৃত্তঃ সদাচারো মোক্ষকাঙ্ক্ষী জিতেন্দ্রিয়ঃ || ২, ২২. ২৬ ||
বহূন্যব্দানি বিজনে বনে তস্য গতানি বৈ |
তস্য বুদ্ধিস্ততো জাতা তীর্থানুগমনং প্রতি || ২, ২২. ২৭ ||
পুণ্যৈস্তীর্থজলৈরেব শোষয়িষ্যে কলেবরম্ |
স তীর্থেৎবরিতং স্নাৎবা তপস্বী ভাস্করোদয়ে |
কৃতজাপ্যনমস্কারো হ্যধ্বানং প্রত্যপদ্যত || ২, ২২. ২৮ ||
একস্মিন্দিবসে বিপ্রো মার্গভ্রষ্টো মহাতপাঃ |
দদর্শাধ্বনি গচ্ছন্স পঞ্চ প্রেতান্সুদারুণান্ || ২, ২২. ২৯ ||
অরণ্যে নির্জনে দেশে সঙ্কটে বৃক্ষবর্জিতে |
পঞ্চৈতান্বিকৃতাকারান্দৃষ্ট্বা বৈ ঘোরদর্শনান্ |
ঈষৎসন্ত্রস্তহৃদয়োঽতিষ্ঠদুন্মীল্য লোচনে || ২, ২২. ৩০ ||
অবলম্ব্য ততো ধৈর্যং ভয়মুৎসৃজ্য দূরতঃ |
পপ্রচ্ছ মধুরাভাষী কে যূয়ং বিকৃতাননাঃ || ২, ২২. ৩১ ||
কিঞ্চাশুভং কৃতং কর্ম যেন প্রাপ্তাঃ স্থ বৈকৃতম্ |
কথং বা চৈকতঃ কর্ম প্রস্থিতাঃ কুত্র নিশ্চিতম্ || ২, ২২. ৩২ ||
প্রেতরাজ উবাচ |
স্বৈঃ স্বৈস্তু কর্মভিঃ প্রাপ্তং প্রেতৎবং হি দ্বিজোত্তম |
পরদ্রোহরতাঃ সর্বে পাপমৃত্যুবশং গতাঃ || ২, ২২. ৩৩ ||
ক্ষুৎপিপাসার্দিতা নিত্যং প্রেতৎবং সমুপাগতাঃ |
হতবাক্যা হতশ্রীকা হত সঞ্জ্ঞা বিচেতসঃ || ২, ২২. ৩৪ ||
ন জানীমো দিশং তাত বিদিশং চাতিদুঃখিতাঃ |
ক্ব নু গচ্ছামহে মূঢাঃ পিশাচাঃ কর্মজা বয়ম্ || ২, ২২. ৩৫ ||
ন মাতা ন পিতাস্মাকং প্রেতৎবং কর্মভিঃ স্বকৈঃ |
প্রাপ্তাঃ স্ম সহসা জাতদুঃখোদ্বেগসমাকুলম্ || ২, ২২. ৩৬ ||
দর্শনেন চ তে ব্রহ্মন্মুদিতাপ্যায়িতা বয়ম্ |
মুহূর্তন্তিষ্ঠ বক্ষ্যামি বৃত্তান্তং সর্বমাদিতঃ || ২, ২২. ৩৭ ||
অহং পর্যুষিতো নাম এষ সূচীমুখস্তথা |
শীঘ্রগো রোঘ (হ) কশ্চৈব পঞ্চমো লেখকঃ স্মতৃতঃ || ২, ২২. ৩৮ ||
এবং নাম্না চ সর্বে বৈ সম্প্রাপ্তাঃ প্রেততাং বয়ম্ |
ব্রাহ্মণ উবাচ |
প্রেতানাং কর্মজাতানাং কথং বৈ নামসম্ভবঃ |
কিঞ্চিৎকারণমুদিশ্য যেন ব্রূয়াঃ স্বনামকান্ || ২, ২২. ৩৯ ||
প্রেতরাজ উবাচ |
ময়া স্বাদু সদা ভুক্তং দত্তং পর্যুষিতং দ্বিজ || ২, ২২. ৪০ ||
শীঘ্রং গচ্ছতি বিপ্রেণ যাচিতঃ ক্ষুধিতেন বৈ |
এতৎকারণমুদ্দিশ্য নাম পর্যুষিতং মম || ২, ২২. ৪১ ||
শীঘ্রং গচ্ছতি বিপ্রেণ যাচিতঃ ক্ষুধিতেন বৈ |
এতৎকারণমুদ্দিশ্য শীঘ্রগোঽযং দ্বিজোত্তম || ২, ২২. ৪২ ||
সূচিতা বহবোঽনেন বিপ্রা অন্নাধিকাঙ্ক্ষয়া |
এতৎকারণমুদ্দিশ্য এষ সূচিমুখঃ স্মৃতঃ || ২, ২২. ৪৩ ||
একাকী মিষ্টমশ্রাতি পোষ্যবর্গমৃতে সদা |
ব্রাহ্মণানামভাবেন রোধ (হ) কস্তেন চোচ্যতে || ২, ২২. ৪৪ ||
পুরায়ং মৌনমাস্থায় যাচিতো বিলিখেদ্ভুবম্ |
তেন কর্মবিপাকেন লেখকো নাম চোচ্যতে || ২, ২২. ৪৫ ||
প্রেতৎবং কর্মভাবেন প্রাপ্তং নামানি চ দ্বিজ |
মেষাননো লেখকোঽযং রোধ (হ) কঃ পর্বতাননঃ || ২, ২২. ৪৬ ||
শীঘ্রগঃ পুশুবক্ত্রশ্চ সূচকঃ সূচিবক্ত্রবান্ |
দুঃখিতা নিতরাং স্বমিন্পশ্য রূপবিপর্যয়ম্ || ২, ২২. ৪৭ ||
কৃৎবা মায়াময়ং রূপং বিচরামো মহীতলে |
সর্বে চ বিকৃতাকারা লম্বোষ্ঠা বিকৃতাননাঃ || ২, ২২. ৪৮ ||
বৃহচ্ছরীরিণো রৌদ্রা জাতাঃ স্বেনৈব কর্মণা |
এতত্তে সর্বমাখ্যাতং প্রেতৎবে কারণং ময়া || ২, ২২. ৪৯ ||
জ্ঞানিনোঽপি বয়ং সর্বে জাতাঃ স্ম তব দর্শনাৎ |
যত্র তে শ্রবণে শ্রদ্ধা তৎপৃচ্ছ কথয়ামি তে || ২, ২২. ৫০ ||
ব্রাহ্মণ উবাচ |
যে জীবা ভুবি জীবন্তি সর্বেঽপ্যাহারমূলকাঃ |
যুষ্মাকমপিচাহারং শ্রোতুমিচ্ছামি তত্ত্বতঃ || ২, ২২. ৫১ ||
প্রেতা ঊচুঃ |
যদি তে শ্রবণে শ্রদ্ধা আহারাণাং দ্বিজোত্তম |
অস্মাকং তু মহীভাগ শৃণুৎবং সুসমাহিতঃ || ২, ২২. ৫২ ||
ব্রাহ্মণ উবাচ |
কথয়ন্তু মহাপ্রেতা আহারং চ পৃথক্পৃথক্ |
ইত্যুক্তাং ব্রাহ্মণেনেমমূচুঃ প্রেতাঃ পৃথকপৃথক্ || ২, ২২. ৫৩ ||
প্রেতা ঊচুঃ |
শৃণু চাহারমস্মাকং সর্বসত্ত্ববিগর্হিতম্ |
যচ্ছ্রুৎবা গর্হসে ব্রহ্মন্ভূয়োভূয়শ্চ গর্হিতম্ || ২, ২২. ৫৪ ||
শ্লেষ্মমূত্রপুরীষোত্থং শরীরাণাং মলৈঃ সহ |
উচ্ছিষ্টৈশ্চৈব চান্যৈশ্চ প্রেতানাং ভোজনং ভবেৎ || ২, ২২. ৫৫ ||
গৃহাণি চাপ্যশৌচানি প্রকীর্ণোপস্করাণি চ |
মলিনানি প্রসূতানি প্রেতা ভুঞ্জন্তি তত্র বৈ || ২, ২২. ৫৬ ||
নাস্তি সত্যং গৃহে যত্র ন শৌচং ন চ সংযমঃ |
পতিতৈর্দস্যুভিঃ সঙ্গঃ প্রেতা ভুঞ্জন্তি তত্র বৈ || ২, ২২. ৫৭ ||
বলিমন্ত্রবিহীনানি হোমহীনানি যানি চ |
স্বাধ্যায় ব্রতহীনানি প্রেতা ভুঞ্জন্তি তত্র বৈ || ২, ২২. ৫৮ ||
ন লজ্জা ন চ মর্যাদা যদাত্র স্ত্রীজিতো গৃহী |
গুরবো যত্র পূজ্যা ন প্রেতা ভুঞ্জন্তি তত্র বৈ || ২, ২২. ৫৯ ||
যত্র লোভস্তথা ক্রোধো নিদ্রা শোকো ভয়ং মদঃ |
আলস্যং কলহো নিত্যং প্রেতা ভুঞ্জন্তি তত্র বৈ || ২, ২২. ৬০ ||
ভর্তৃহীনা চ যা নারী পরবীর্যং নিষেবতে |
বীজং মূত্রসমায়ুর্ক্ত প্রেতা ভুঞ্জন্তি তত্তু বৈ || ২, ২২. ৬১ ||
লজ্জা মে জায়তে তাত বদতো ভোজনং স্বকম্ |
যৎস্ত্রীরজো যোনিগতং প্রেতা ভুঞ্জন্তি তত্তু বৈ || ২, ২২. ৬২ ||
নির্বিণ্ণাঃ প্রেতভাবেন পৃচ্ছামি ৎবাং দৃঢব্রত |
যথা ন ভবিতা প্রেতস্তন্মে বদ তপোধন |
নিত্যং মৃত্যুর্বরং জন্তোঃ প্রেতৎবং মা ভবেৎক্বচিৎ || ২, ২২. ৬৩ ||
ব্রাহ্মণ উবাচ |
উপবাসপরো নিত্যং কৃচ্ছ্রচান্দ্রায়ণে রতঃ |
ব্রতৈশ্চ বিবিধৈঃ পূতো ন প্রেতো জায়তে নরঃ || ২, ২২. ৬৪ ||
একাদশ্যাং ব্রতং কুর্বঞ্জাগরেণ সমন্বিতম্ |
অপরৈঃ সুকৃতৈঃ পূতো ন প্রেতো ন প্রেতো জায়তে নরঃ || ২, ২২. ৬৫ ||
ইষ্ট্বা বৈ বাশ্বমেধাদীন্দদ্যাদ্দানানি যো নরঃ |
আরামোদ্যানবাপ্যাদেঃ প্রপায়াশ্চৈব কারকঃ || ২, ২২. ৬৬ ||
কুমারীং ব্রাহ্মণানাং তু বিবাহয়তি শক্তিতঃ |
বিদ্যাদোঽভয়দশ্চৈব ন প্রেতো জায়তে নরঃ || ২, ২২. ৬৭ ||
শূদ্রান্নেন তু ভুক্তেন জঠরস্থেন যো মৃতঃ |
দুর্মৃত্যুনা মৃতো যশ্চ স প্রেতো জায়তে নরঃ || ২, ২২. ৬৮ ||
অয়াজ্যয়াজকশ্চৈব যাজ্যানাং চ বিবর্জকঃ |
কারুভিশ্চ রতো নিত্যং স প্রেতো জায়তে নরঃ || ২, ২২. ৬৯ ||
কৃৎবা মদ্যপসম্পর্কং মদ্যপস্ত্রীনিষেবণম্ |
অজ্ঞানাদ্ভক্ষয়ন্মাংসং স প্রেতো জায়তে নরঃ || ২, ২২. ৭০ ||
দেবদ্রব্যং চ ব্রহ্মস্বং গুরুদ্রব্যং তথৈব চ |
কন্যাং দদাতি শুল্কেন স প্রেতো জায়তে নরঃ || ২, ২২. ৭১ ||
মাতরং ভগিনীং ভার্যাং স্নুষাং দুহিতরং তথাঃ |
অদৃষ্টদোষাস্ত্যজতি স প্রেতো জাদৃ || ২, ২২. ৭২ ||
ন্যাসাপহর্তা মিত্রধ্রুক্পরদাররতঃ সদা |
বিশ্বাসঘাতী কূটশ্চ স প্রেদৃ || ২, ২২. ৭৩ ||
ভ্রাতৃধ্রুগ্ব্রহ্মহা গোঘ্নঃ সুরাপো গুরুতল্পগঃ |
কুলমার্গং পরিত্যজ্য হ্যনৃতোক্তৌ সদা রতঃ |
হর্তা হেম্নশ্চ ভূমেশ্চ স প্রেদৃ || ২, ২২. ৭৪ ||
ভীষ্ম উবাচ |
এবং ব্রুবতি বৈ বিপ্রে আকাশে দুন্দুভিস্বনঃ |
অপতৎপুষ্পবর্ষং চ দেবর্মুক্তং দ্বিজোপরি || ২, ২২. ৭৫ ||
পঞ্চ দেববিমানানি প্রেতানামাগতানি বৈ |
স্বর্গং গতা বিমানৈস্তে দিব্যৈঃ সম্পৃচ্ছ্য তং মুনিম্ || ২, ২২. ৭৬ ||
জ্ঞানং বিপ্রস্য সম্ভাষাৎপুণ্যসঙ্কীর্তনেন চ |
প্রেতাঃ পাপবিনির্মুক্তাঃ পরং পদমবাপ্নুয়ুঃ || ২, ২২. ৭৭ ||
সূত উবাচ |
ইদমাখ্যানকং শ্রুৎবা কম্পিতোঽশ্বত্থপত্রবৎ |
মানুষাণাং হিতার্থায় গরুডঃ পৃষ্টবান্পুনঃ || ২, ২২. ৭৮ ||

ইতি শ্রীগারুডে মহাপুরাণে উত্তরখণ্ডে দ্বিতীয়াংশে ধর্মকাণ্ডে প্রেতকল্পে
ভীষ্ম যুধিষ্ঠিরসংবাদে প্রেতৎবোৎপত্তিতন্মুক্তিপেঞ্চপ্রেতোপাখ্যান
নিরূপণং নাম দ্বাবিংশোঽধ্যায়ঃ

শ্রীগরুডমহাপুরাণম্-২৩
গরুড উবাচ |
কিঙ্কিং কুর্বন্তি বৈ প্রেতাঃ পিশাচৎবেব্যবস্থিতাঃ |
বদন্তি বা কদাচিৎকিং তদ্বদস্ব সুরেশ্বর || ২, ২৩. ১ ||
শ্রীভগবানুবাচ |
তেষাং স্বরূপং বক্ষ্যামি চিহ্নং স্বপ্নং যথাতথম্ |
ক্ষুৎপিপাসার্দিতাস্তে বৈ প্রবিশেয়ুঃ স্ববেশ্মনি || ২, ২৩. ২ ||
প্রতিষ্ঠা বায়ুদেহেষু শয়ানাংস্তু স্ববংশজান্ |
তত্র যচ্ছন্তি লিঙ্গানি দর্শয়ন্তি খগেশ্বর || ২, ২৩. ৩ ||
স্বপুত্রস্বকলত্রাণি স্ববন্ধুন্তত্র গচ্ছতি |
হয়ো গজো বৃষো মর্ত্যোদৃশ্যতে বিকৃতাননঃ || ২, ২৩. ৪ ||
শয়ানং বিপরীতং তু আত্মানং চ বিপর্যয়ম্ |
উত্থিতঃ পশ্যতি যস্তু তদ্বিন্দ্যাৎপ্রেতনির্মিতম্ || ২, ২৩. ৫ ||
স্বপ্নে নরৌ হি নিগডৈর্বধ্যতে বহুধা যদি |
অন্নং চ যাচতে স্বপ্নে কুবেষঃ পূর্বজো মৃতঃ || ২, ২৩. ৬ ||
স্বপ্নে যো ভুজ্যমানস্য গৃহীৎবান্নং পলায়তে |
আত্মনস্তু পরো বাপি তৃষার্তস্তু জলং পিবেৎ || ২, ২৩. ৭ ||
বৃষভারোহণং স্বপ্নে বৃষভৈঃ সহ গচ্ছতি |
উৎপত্য গগনং যাতি তীর্থে যাতি ক্ষুধাতুরঃ || ২, ২৩. ৮ ||
স্ববাচা বদতে যস্তু গোবৃষদ্বিজাবাজিষু |
লিঙ্গে গজে তথা দেবে ভূতে প্রেতে নিশাচরে || ২, ২৩. ৯ ||
স্বপ্নমধ্যে তু পক্ষীন্দ্র প্রেতলিঙ্গান্যনেকধা |
স্বকলত্রং স্ববন্ধুং বা স্বসুতং স্বপতিং বিভুম্ |
বিদ্যমানং মৃতং পশ্যেৎপ্রেতদোষেণ নিশ্চিতম্ || ২, ২৩. ১০ ||
যাচতে যঃ পরং স্বপ্নে ক্ষুত্তৃড্ভ্যাং চ পরিপ্লুতঃ |
তীর্থে গৎবা দহেৎপিণ্ডান্প্রেতদৌষৈর্ন সংশয়ঃ || ২, ২৩. ১১ ||
নির্গচ্ছেদ্বা গৃহাদ্বাপি স্বপ্নে পুত্রস্তথা পশুঃ |
পিতা ভ্রাতা কলত্রং চ প্রেতদোষৈস্তু পশ্যতি || ২, ২৩. ১২ ||
চিহ্নান্যেতানি পক্ষীন্দ্র প্রায়শ্চিত্তং নিবেদয়েৎ |
কৃৎবা স্নানং গৃহে তীর্থে শ্রীবৃক্ষে তর্পণং জলৈঃ || ২, ২৩. ১৩ ||
কৃষ্ণধান্যানি পূজাং চ প্রদদ্যাদ্বেদপারগে |
হোমং কুর্যাদ্যথাশক্তি সম্পূর্ণং বাচয়েৎসুধীঃ || ২, ২৩. ১৪ ||
এতদ্ধি শ্রদ্ধয়া যস্তু প্রেতলিঙ্গনিদর্শনম্ |
পঠতে শৃণুতে বাপি প্রেতচিহ্নং বিনশ্যতি || ২, ২৩. ১৫ ||

ইতি শ্রীগারুডে মহাপুরাণে উত্তরখণ্ডে দ্বিতীয়াংশে ধর্মকাণ্ডে প্রেতকল্পে
শ্রীকৃষ্ণগরুডসংবাদে প্রেতকৃতিতদুক্তিতচ্চিহ্নতদ্বিমুক্ত্যুপায়নিরূপণং
নাম ত্রয়োবিংশোঽধ্যায়ঃ

শ্রীগরুডমহাপুরাণম্-২৪
গরুড উবাচ |
নাকালে ম্রিয়তে কশ্চিদিতি বেদানুশাসনম্ |
কস্মান্মৃত্যুমবাপ্নোতি রাজা বা শ্রোত্রিয়োপি বা || ২, ২৪. ১ ||
যদুক্তং ব্রাহ্মণা পূর্বমনৃতং তদ্ধি দৃশ্যতে |
বেদৈরুক্তং তু যদ্বাক্যং শতং জীবতি মানুষে || ২, ২৪. ২ ||
জীবন্তি মানুষে লোকে সর্বে বর্ণা দ্বিজাতয়ঃ |
অন্ত্যজাম্লেচ্ছজাশ্চৈব খণ্ডে ভারতসঞ্জ্ঞকে || ২, ২৪. ৩ ||
ন দৃশ্যতে কলৌ তচ্চ কস্মাদ্দেব সমাদিশ |
(আধানান্মৃত্যুমাপ্নোতি বালো বা স্থবিরো যুবা || ২, ২৪. ৪ ||
সধনো নির্ধনো বাপি সুকুমারঃ সুরূপবান্ |
অবিদ্বাংশ্চৈব বিদ্বাংশ্চ ব্রাহ্মণস্ত্বিতরো জনঃ || ২, ২৪. ৫ ||
তপোরতো যোগশীলো মহাজ্ঞানী চ যো নরঃ |
সর্বজ্ঞানরতঃ শ্রীমান্ধর্মাত্মাতুলবিক্রমঃ || ২, ২৪. ৬ || )
সর্বমেতদশষেণ জায়তে বসুধাতলে |
কস্মান্মৃত্যুমবাপ্নোতি রাজা বা শ্রোত্রিয়োঽপি বা || ২, ২৪. ৭ ||
শ্রীভগবানুবাচ |
সাধুসাধু মহাপ্রাজ্ঞ যস্ত্বং ভক্তোঽসি মে প্রিয়ঃ |
শ্রূয়তাং বচনং গুহ্যং নানাদেশবিনাশনম্ || ২, ২৪. ৮ ||
বিধাতৃবিহিতো মৃত্যুঃ শীঘ্রমাদায় গচ্ছতি |
ততো বক্ষ্যামি পক্ষীন্দ্র কাশ্যপেয় মহাদ্যুতে || ২, ২৪. ৯ ||
মানুষঃ শতজীবীতি পুরা বেদেন ভাষিতম্ |
বিকর্মণঃ প্রভাবেণ শীঘ্রং চাপি বিনশ্যতি || ২, ২৪. ১০ ||
বেদানভ্যসনেনৈব কুলাচারং ন সেবতে |
আলস্যাৎকর্মণাং ত্যাগো নিষিদ্ধেঽপ্যাদরঃ সদা || ২, ২৪. ১১ ||
যত্র তত্র গৃহেঽশ্রাতি পরক্ষেত্ররতস্তথা |
এতৈরন্যৈর্মহাদোষৈর্জায়তে চায়ুষঃ ক্ষয়ঃ || ২, ২৪. ১২ ||
অশ্রদ্দধানমশুচিং নাস্তিকং ত্যক্তমঙ্গলম্ |
পরদ্রোহানৃতরং ব্রাহ্মণং যত (ম) মন্দিরম্ || ২, ২৪. ১৩ ||
অরক্ষিতারং রাজানং নিত্যং ধর্মবিবর্জিতম্ |
ক্রূরং ব্যসনিনং মূর্খং বেদবাদবহিষ্কৃতম্ |
প্রজাপীডনকর্তারং রাজানং যমশাসনম্ || ২, ২৪. ১৪ ||
প্রাপয়ন্তি বশং মৃত্যোস্ততো যাতি চ যাতনাম্ |
স্বকর্মাণি পরিত্যজ্য মুখ্যবৃত্তানি যানি চ || ২, ২৪. ১৫ ||
পরকর্মরতো নিত্যং যমলোকং স গচ্ছতি |
শূদ্রঃ করোতিঃ যৎকিঞ্চিদ্বিজশুশ্রূষণং বিনা || ২, ২৪. ১৬ ||
উত্তমাধমমধ্যে বা যমলোকে স পচ্যতে |
স্নানং দানং জপো হোমো স্বাধ্যায়ো দবর্তাচ্চনম্ || ২, ২৪. ১৭ ||
যস্মিন্দিনে ন সেব্যন্তে স বৃথা দিবসো নৃণাম্ |
অনিত্যমধ্রুবং দেহমনাধারং রসোদ্ভবম্ || ২, ২৪. ১৮ ||
অন্নোদকময়ে দেহে গুণানেতান্বদাম্যহম্ |
যৎপ্রাতঃ সংস্কৃতং সায়ং নূনমন্নং বিনশ্যতি || ২, ২৪. ১৯ ||
তদীয়রসসম্পুষ্টকায়ে কা বত নিত্যতা |
গতং জ্ঞাৎবা তু পক্ষীন্দ্র বপুরর্ধং স্বকর্মভিঃ || ২, ২৪. ২০ ||
নরঃ পাপবিনাশায় কুর্বীত পরমৌষধম্ |
দেহঃ কিমন্নদাতুঃ স্বিন্নিষেক্তুর্মাতুরেব বা || ২, ২৪. ২১ ||
উভয়োর্বা প্রভোর্বাপি বালনোগ্নেঃ শুনোঽপি বা |
কস্তত্র পরমো যজ্ঞঃ কৃমিবিড্ভস্মসঞ্জ্ঞকে || ২, ২৪. ২২ ||
কর্তব্যঃ পরমো যত্নঃ পাতকস্য বিনাশনে |
অনেকভবসম্ভূতং পাতকং তু ত্রিধা কৃতম্ || ২, ২৪. ২৩ ||
যদা প্রাপ্নোতি মানুষ্যং তদা সর্বং তপত্যপি |
সর্বজন্মানি সংস্মৃত্য বিষাদী কৃতচেতনঃ || ২, ২৪. ২৪ ||
অবেক্ষ্য গর্ভবাসাংশ্চ কর্মজা গতয়স্তথা |
মানুষোদরবাসী চেত্তদা ভবতি পাতকী || ২, ২৪. ২৫ ||
অণ্ডজাদিষু ভূতেষু যত্রয়ত্র প্রসর্পতি |
আধয়ো ব্যাধয়ঃ ক্লেশা জরারূপবিপর্যয়ঃ || ২, ২৪. ২৬ ||
গর্ভবাসাদ্বিনির্মুক্তস্ত্বজ্ঞানতিমিরাবৃতঃ |
ন জানাতিঃ খগশ্রেষ্ঠ বালভাবং সমাশ্রিতঃ || ২, ২৪. ২৭ ||
যৌবনে তিমিরান্ধশ্চ যঃ পশ্যতি স মুক্তিভাক্ |
আধানান্মৃত্যুমাপ্নোতি বালো বা স্থবিরো যুবা || ২, ২৪. ২৮ ||
সধনো নির্ধনশ্চৈব সুকুমারঃ কুরূপবান্ |
অবিদ্বাংশ্চৈব বিদ্বাংশ্চ ব্রাহ্মণাস্ত্বিতরো জনঃ || ২, ২৪. ২৯ ||
তপোরতো যোগশীলো মহাজ্ঞানী চ যো নরঃ |
মহাদানরতঃ শ্রীমান্ধর্মাত্মাতুলবিক্রমঃ |
বিনা মানুপদেহং তু সুখং দুঃখং ন বিন্দতি || ২, ২৪. ৩০ ||
প্রাকৃতৈঃ কর্মপাশৈস্তু মৃত্যুমাপ্নোতি মানবঃ |
আধানাৎপঞ্চ বর্ষাণি স্বল্পপাপৈর্বিপচ্যতে || ২, ২৪. ৩১ ||
পঞ্চবর্ষাধিকো ভূৎবা মহাপাপৈর্বিপচ্যতে |
যোনিং পূরয়তে যস্মান্মৃতোঽপ্যায়াতি যাতি চ || ২, ২৪. ৩২ ||
মৃতো দানপ্রভাবেণ জীবন্মর্ত্যশ্চিরং ভুবি |
সূত উবাচ |
ইতি কৃষ্ণবচঃ শ্রুৎবা গরুডো বাক্যমব্রবীৎ || ২, ২৪. ৩৩ ||
গরুড উবাচ |
মৃতে বালে কথং কুর্যাৎপিণ্ডদানাদিকাঃ ক্রিয়াঃ |
গর্ভেষু চ বিপন্নানামাচূডাকরণাচ্ছিশোঃ || ২, ২৪. ৩৪ ||
কথং কিং কেন দাতব্যং মৃতান্তে কো বিধিঃ স্মৃতঃ |
গরুডোক্তমিতি শ্রুৎবা বিষ্ণুর্বাক্যমথাব্রবীৎ || ২, ২৪. ৩৫ ||
শ্রীবিষ্ণুরুবাচ |
যদি গর্ভো বিপদ্যতে স্ত্রবতে বাপি যোষিতঃ |
যাবন্মাসং স্থিতো গর্ভস্তাবদ্দিনমশৌচকম্ || ২, ২৪. ৩৬ ||
তস্য কিঞ্চিন্ন কর্তব্যমাত্মনঃ শ্রেয় ইচ্ছতা |
ততো জাতে বিপন্নে তু আ চূডাকরণাচ্ছিশোঃ || ২, ২৪. ৩৭ ||
দুগ্ধং ভোজ্যং তাশক্তি বালানাং চ প্রদীয়তে |
আ চূডাৎপঞ্চবর্ষে তু দেহদাহো বিধীয়তে || ২, ২৪. ৩৮ ||
দুগ্ধং তস্য প্রদেয়ং স্যাদ্বালানাং ভোজনং শুভম্ |
পঞ্চবর্ষাধিকে প্রেতে স্বজাতিবিহিতানি চ || ২, ২৪. ৩৯ ||
কুর্যাৎকর্মাণি সর্বাণি চোদকুম্ভাদি পায়সম্ |
দাতব্যং তু খগশ্রেষ্ঠ ঋণসম্বন্ধকস্তু সঃ || ২, ২৪. ৪০ ||
জাতস্য হি ধ্রুবো মৃত্যুর্ধ্রুবং জন্ম মৃতস্য চ |
কর্তব্যং পক্ষিশার্দূল পুনর্দেহক্ষয়ায় বৈ || ২, ২৪. ৪১ ||
তস্মৈ যদ্রোচতে দেয়মদত্ত্বা নির্ধনে কুলে |
স্বল্পায়ুর্নির্ধনো ভূৎবা রতিভক্তিবিবর্জিতঃ || ২, ২৪. ৪২ ||
পুনর্জন্মাপ্নুয়ান্মর্ত্যস্তস্মাদ্দেয়মৃতে শিশোঃ |
পুরাণে গীয়তে গাথা সর্বথা প্রতিভাতি মে || ২, ২৪. ৪৩ ||
মিষ্টান্নং ভোজনং দেয়ং দানে শক্তিস্তু দুর্লভা |
ভোজ্যে ভোজনশক্তিশ্চ রতিশক্তির্বরস্ত্রিয়ঃ || ২, ২৪. ৪৪ ||
বিভবে দানশক্তিশ্চ নাল্পস্য তপসঃ ফলম্ |
দানাদ্ভোগানবাপ্নোতি সৌখ্যং তীর্থস্য সেবনাৎ |
সুভাষণান্মৃতো যস্তু স বিদ্বান্ধর্মবিত্তমঃ || ২, ২৪. ৪৫ ||
অদত্তদানাচ্চ ভবেদ্দরিদ্রো দরিদ্রভাবাচ্চ করোতিপাপম্ |
পাপপ্রভাবান্নরকং প্রয়াতি পুনর্দরিদ্রঃ পুনরেব পাপী || ২, ২৪. ৪৬ ||

ইতি শ্রীগারুডে মহাপুরাণে উত্তরখণ্ডে দ্বিতীয়াংশাখ্যে ধর্মকাণ্ডে প্রেতকল্পে
শ্রীকৃষ্ণগরুডসংবাদেঽল্পায়ুর্মরণহে তুবালান্ত্যেষ্ট্যোর্নিরূপণং নাম
চতুর্বিশোঽধ্যায়ঃ

শ্রীগরুডমহাপুরাণম্-২৫
শ্রীবিষ্ণুরুবাচ |
অতঃ পরং প্রবক্ষ্যামি পুরুষস্ত্রী বিনির্ণয়ম্ |
জীবন্বাপি মৃতো বাপি পঞ্চবর্ষাধিকোঽপি বা || ২, ২৫. ১ ||
পূর্ণে তু পঞ্চমে বর্ষে পুমাংশ্চৈব প্রতিষ্ঠিতঃ |
সর্বৈন্দ্রিয়াণি জানাতি রূপারূপবিপর্যয়ৌ || ২, ২৫. ২ ||
পূর্বকর্মবিপাকেন প্রাণিনাং বধবন্ধনম্ |
বিপ্রাদীনন্ত্যজান্সর্বান্পাপং মারয়তি ধ্রুবম্ || ২, ২৫. ৩ ||
গর্ভে নষ্টে ক্রিয়া নাস্তি দুগ্ধং দেয়ং মৃতে শিশৌ |
পরং চ পায়সং ক্ষীরং দদ্যাদ্বলবিপত্তিতঃ || ২, ২৫. ৪ ||
একাদশাহং দ্বাদশাহং বৃষং বৃষবিধিং বিনা |
মহাদানবিহীনং চ কুমারে কৃত্যমাদিশেৎ || ২, ২৫. ৫ ||
কুমারাণাং চৈব বালানাং ভোজনং বস্ত্রবেষ্টনম্ |
বালে বা তরুণে বৃদ্ধে ঘটো ভবতি বৈ মৃতে || ২, ২৫. ৬ ||
ভূমৌ বিনিঃ ক্ষিপেদ্বালং দ্বিমাসোনং দ্বিবার্ষিকম্ |
ততঃ পরং খগশ্রেষ্ঠ দেহদাহো বিধোয়তে || ২, ২৫. ৭ ||
শিশুরা দন্তজননাদ্বালঃ স্যাদ্যাবদাশিখম্ |
কথ্যতে সর্বশাস্ত্রেষু কুমারো মৌঞ্জিবন্ধনাৎ || ২, ২৫. ৮ ||
শূদ্রাদীনাং কথং কুর্যাৎসংশয়ো মৌঞ্জিবর্জনাৎ |
গর্ভাচ্চ নবমং হিৎবা শিশুরামাসষোডশম্ || ২, ২৫. ৯ ||
বালশ্চাথ পরঞ্জ্ঞেয় আমাসসপ্তবিংশতি |
আ পঞ্চ বর্ষাৎকৌমারঃ পৌগণ্ডো নবহাংযনঃ || ২, ২৫. ১০ ||
কিশোরঃ ষোডশাব্দঃ স্যাত্ততো যৌবনমাদিশেৎ |
মৃতোঽপি পঞ্চমে বর্ষে অবৃতঃ সবৃতোঽপি বা || ২, ২৫. ১১ ||
পূর্বোক্তমেব কর্তব্যমীহতে দশপিণ্ডকম্ |
স্বল্পকর্মপ্রসঙ্গাচ্চ স্বল্পাদ্বিষয়বন্ধনাৎ || ২, ২৫. ১২ ||
স্বল্ষাদ্বপুষি বস্ত্রাচ্চ ক্রিয়াং স্বল্পামপীচ্ছতি |
যাবদুপচয়ো জন্তুর্যাবদ্বিষয়বেষ্টিতঃ || ২, ২৫. ১৩ ||
যদ্যদ্যস্যোপজীব্যং স্যাত্তত্তদ্দেয়মিহেচ্ছতি |
ব্রহ্মবীজোদ্ভবাঃ পুত্রা দেবর্ষোণাং চ বল্লভাঃ || ২, ২৫. ১৪ ||
যমেন যমদূতৈশ্চ শাস্যন্তে নিশ্চিতং খগ |
বালো বৃদ্ধো যুবা বাপি ঘটমিচ্ছন্তি দেহিনঃ || ২, ২৫. ১৫ ||
সুখং দুঃখং সদা বেত্তি দেহী বৈ সর্বগস্ত্বিহ |
পরিত্যজ্য তদাত্মানং জীর্ণাং ৎবচমিবোরগঃ || ২, ২৫. ১৬ ||
অঙ্গুষ্ঠমাত্রঃ পুরুষো বায়ুভৃতঃ ক্ষুধান্বিতঃ |
তস্মাদ্দেয়ানি দানানি মৃতে বালে সুনিশ্চিতম্ || ২, ২৫. ১৭ ||
জন্মতঃ পঞ্চ বর্ষাণি ভুঙ্ক্তে দত্তমসংস্কৃতম্ |
পঞ্চবর্ষাধিকে বালে বিপত্তির্যদি জায়তে || ২, ২৫. ১৮ ||
বৃষোৎসর্গাদিকং কর্ম সপিণ্ডীকরণং বিনা |
দ্বাদশে হনি সম্প্রাপ্তে কুর্যাচ্ছ্রাদ্ধানি ষোডশ || ২, ২৫. ১৯ ||
পায়সেন গুডেনাপি পিণ্ডান্দদ্যাদ্যথাক্রমম্ |
উদকুম্ভপ্রদানং চ পদ (উপ) দানানি যানি চ || ২, ২৫. ২০ ||
ভোজনানি দ্বিজে দদ্যান্মহাদানাদি শক্তিতঃ |
দীপদানাদি যৎকিঞ্চিৎপঞ্চবর্ষাধিকে সদা || ২, ২৫. ২১ ||
কর্তব্যং চ খগশ্রেষ্ঠ ব্রতাৎপ্রাক্প্রেততৃপ্তয়ে |
যদা নক্রিয়তে সর্বং মুদ্গলৎবং স গচ্ছতি || ২, ২৫. ২২ ||
ব্রতাৎপ্রাঙ্গেব দেয়ং তু ততঃ পিতৃগণস্য চ |
স্বাহাকারেণ বৈ কুর্যাদেকোদ্দিষ্টানি ষোডশ || ২, ২৫. ২৩ ||
ঋজুদর্ভৈস্তিলৈঃ শুক্লৈঃ প্রাচীনাবীতি নিশ্চিতম্ |
অপসব্যং চ কর্তব্যং কৃতে যান্তি পরাং গতিম্ || ২, ২৫. ২৪ ||
পুনশ্চিরায়ুষো ভূৎবা জায়ন্তে স্বকুলে ধ্রুবম্ |
সর্বসৌখ্যপ্রদঃ পুত্রঃ পিত্রোঃ প্রীতিবিবর্ধনঃ || ২, ২৫. ২৫ ||
আকাশমেকং হি যথা চন্দ্রাদিত্যৌ যথৈকতঃ |
ঘটাদিষু পৃথক্সর্বং পশ্য রূপং চ তৎসমম্ || ২, ২৫. ২৬ ||
আত্মা তথৈব সর্বেষু পুত্ত্রেষু বিচরেৎসদা |
যা যস্য প্রকৃতিঃ পূর্বং শুক্রশোণিতসঙ্গমে || ২, ২৫. ২৭ ||
সা (স) তেন ভাবয়োগেন পুত্ত্রাস্তৎকর্মকারিণঃ |
পিতৃরূপং সমাদায় কস্যচিজ্জায়তে সুতঃ || ২, ২৫. ২৮ ||
পিতৃতঃ কোঽপি রূপাঢ্যো গুণজ্ঞো দানতৎপরঃ |
সদৃশঃ কোঽপি লোকেঽস্মিন্ন ভূতো ন ভবিষ্যতি || ২, ২৫. ২৯ ||
অন্ধাদন্ধো ন ভবতি মূকান্মূকো ন জায়তে |
বধিরাদ্বধিরো নৈব বিদ্যাবান্বিদুষো ন হি |
অনুরূপা ন দৃশ্যন্তে মদীয়ং বচনং শৃণু || ২, ২৫. ৩০ ||
গরুড উবাচ |
ঔরসক্ষেত্রজাদ্যাশ্চ পুত্ত্রা দশবিধাঃ স্মৃতাঃ |
সঙ্গৃহীতঃ সুতো যস্তু দাসীপুত্ত্রশ্চ তেন কিম্ || ২, ২৫. ৩১ ||
কাঙ্কাং গতিমবাপ্নোতি জায়ো মৃত্যুবশং গতঃ |
ভবেন্ন দুহিতা যস্য ন দৌহিত্রো ন বা সুতঃ || ২, ২৫. ৩২ ||
শ্রাদ্ধং তস্য কথং কার্যং বিধিনা কেন তদ্ভবেৎ |
শ্রীভগবানুবাচ |
মুখং দৃষ্ট্বা তু পুত্রস্য মুচ্যতে পৈতৃকাদৃণাৎ || ২, ২৫. ৩৩ ||
পৌত্ত্রস্য দর্শনাজ্জন্তুর্মুচ্যতে চঃ ঋণত্রয়াৎ |
লোকানন্ত্যং দিবঃ প্রাপ্তিঃ পুত্ত্রপৌত্ত্র প্রপৌত্ত্রকৈঃ || ২, ২৫. ৩৪ ||
অন্যক্ষেত্রোদ্ভবাদ্যা যে ভুক্তিমাত্রপ্রদাঃ সুতাঃ |
কুর্বীত পার্বণং শ্রাদ্ধমারৈসো বিধিবৎসুতঃ || ২, ২৫. ৩৫ ||
কুর্বন্ত্যন্যে সুতাঃ শ্রাদ্ধমে কোদ্দিষ্টং ন পার্বণম্ |
ব্রাহ্মোঢাজস্তূন্নয়তি সঙ্গৃহীতস্ত্বধো নয়েৎ |
শ্রাদ্ধং সাংবৎসরং কুর্বঞ্জায়তে নরকায় বৈ || ২, ২৫. ৩৬ ||
সর্বদানানি দেয়ানি হ্যন্ন দানাদৃতে খগ |
সঙ্গৃহীতঃ সুতঃ কুর্যাদেকোদ্দিষ্টং ন পার্বণম্ || ২, ২৫. ৩৭ ||
প্রত্যব্দং পিতৃমাতৃভ্যাং শ্রাদ্ধং দত্ত্বা ন লিপ্যতে |
একোদ্দিষ্টং পরিত্যজ্য পার্বণং কুরুতে যদি || ২, ২৫. ৩৮ ||
আত্মানং চ পিৎৠংশ্চৈব স নয়েদ্যমমন্দিরম্ |
সঙ্গৃহীতস্তু যঃ কেচিদ্দাসীপুত্ত্রাদয়শ্চ যে || ২, ২৫. ৩৯ ||
তীর্থে কুর্যুঃ পিতৃশ্রাদ্ধং দানং (মাসং) দদ্যুর্দ্বিজন্মনে |
সঙ্গৃহীতসুতো ভূৎবা পাকং বা যঃ প্রয়চ্ছতি || ২, ২৫. ৪০ ||
বৃথা শ্রাদ্ধং বিজানীয়াচ্ছূদ্রান্নেন যথা দ্বিজঃ |
ন প্রীণয়তি তচ্ছ্রাদ্ধং পিতামহমুখান্পিৎৠন্ |
এবং জ্ঞাৎবা স্বগশ্রেষ্ঠ হীনজাতীন্সুতাংস্ত্যজেৎ || ২, ২৫. ৪১ ||
(ব্রাহ্মণ্যাং ব্রাহ্মণাজ্জাতশ্চাণ্ডালাদধমঃ স্মৃতঃ ) |
যস্তু প্রব্রজিতাজ্জাতো ব্রাহ্মণ্যাং শূদ্রতশ্চ যঃ || ২, ২৫. ৪২ ||
দ্বাবেতৌ বিদ্ধি চাণ্ডালৌ সগোত্রাদ্যস্তু জায়তে |
স্বর্যাতিবিহিতান্পুত্রঃ সমুৎপাদ্য খগেশ্বর || ২, ২৫. ৪৩ ||
তৈঃ সুবৃত্তৈঃ সুখং প্রাপ্যং কুবৃত্তৈর্নরকং ব্রজেৎ |
হীনজাতিসমুদ্ভূতৈঃ সুবৃত্তৈঃ সুখমেধতে || ২, ২৫. ৪৪ ||
কলিকলুষবিমুক্তঃ পূজিতঃ সিদ্ধসঙ্ঘৈরমরচমরমালাবীজ্যমানোঽপ্সরোভিঃ |
পিতৃশতমপি বন্ধূন্পুত্ত্রপৌত্ত্রপ্রপৌত্ত্রানপি নরকনিমগ্নানুদ্ধরেদেক এব || ২, ২৫. ৪৫ ||

ইতি শ্রীগারুডে মহাপুরাণে উত্তরখণ্ডে দ্বিতীয়াংশে ধমকাণ্ডে প্রেতকল্পে
শ্রীকৃষ্ণগরুডসবাদে মৃতবালান্ত্যেষ্টিভিন্নাভিন্নসুতকৃতান্ত্যেষ্ট্যোর্বর্ণনং
নাম পঞ্চবিংশোঽধ্যায়ঃ

শ্রীগরুডমাহপুরাণম্-২৬
গরুড উবাচ |
সত্যং ব্রূহি সুরশ্রেষ্ঠ কৃপাং কৃৎবা ময়ি প্রভো |
মৃতানাং চৈব জন্তূনাং কদা কুর্যাৎসপিণ্ডনম্ || ২, ২৬. ১ ||
সপিণ্ডৎবে কুতো যান্তি অসপিণ্ডে কুতো গতিঃ |
কেনৈব সহপিণ্ডৎবং স্ত্রীপুসোর্বক্তুমর্হসি || ২, ২৬. ২ ||
স্ত্রীপুমাংশৌ সহৈকৎবং পাপ্নুতঃ কথমুত্তমম্ |
জীবেদ্ভর্তরি নারীণাং সপিণ্ডীকরণং কুতঃ || ২, ২৬. ৩ ||
ভর্তৃলোকং কথং যান্তি স্বর্গলোকং সুরেশ্বর |
অগ্ন্যারোহে কথং শ্রাদ্ধং বৃষোৎসর্গঃ কথং ভবেৎ || ২, ২৬. ৪ ||
ঘটদানং কথং কার্যং সপিণ্ডীকরণে কৃতে |
কথয়স্ব প্রসাদেন হীতায় জগতাং প্রভো || ২, ২৬. ৫ ||
শ্রীভগবানুবাচ |
যথাবৎকথয়িষ্যামি সপিণ্ডীকরণং খগ |
বর্ষং যাবৎখগশ্রেষ্ঠ যদাচরতি মানবঃ || ২, ২৬. ৬ ||
সপিণ্ডনে ততো বৃত্তে পিতৃলোকং স গচ্ছতি |
তস্মাৎপুত্ত্রেণ কর্তব্যং সপিণ্ডীকরণং পিতুঃ || ২, ২৬. ৭ ||
সংবৎসরে তু সম্পূর্ণে কুর্যাৎপিণ্ড প্রবেশনম্ |
পিণ্ডপ্রবেশবিধনা তস্য নিত্যং মৃতাহ্নিকম্ || ২, ২৬. ৮ ||
নিশ্চিতং পক্ষিশার্দূল বর্ষান্তে পিণ্ডমেলনম্ |
সহপিণ্ডে কৃতে প্রেতস্ততো যাতি পরাং গতিম্ |
তন্নাম সম্পরিত্যজ্য ততঃ পিতৃগণো ভবেৎ || ২, ২৬. ৯ ||
ত্রিপক্ষে বাপি ষণ্মাসে মেলয়েৎপ্রপিতামহৈঃ |
জ্ঞাৎবা বৃদ্ধিবিবাহাদি স্বগোত্রবিহিতানি চ || ২, ২৬. ১০ ||
বিবাহং নৈব কুর্বীত মৃতে চ গৃহমেধিনি |
ভিক্ষুর্ভিক্ষাং ন গৃহ্ণাতি যাবৎকুর্যাৎসপিণ্ডনম্ || ২, ২৬. ১১ ||
স্বগোত্রেঽপ্যশুচিস্তাবদ্যাবৎপিণ্ডং ন মেলয়েৎ |
মেলনাৎপ্রেতশব্দস্তু নিবর্তেত খগেশ্বর || ২, ২৬. ১২ ||
আনন্ত্যাৎকুলধর্মাণাং পুংসাঞ্চৈবায়ুষঃ ক্ষয়াৎ |
অস্থিরৎবাচ্ছরীরস্য দ্বাদশাহঃ প্রশস্যতে || ২, ২৬. ১৩ ||
নিরগ্নিকঃ সাগ্নিকো বা দ্বাদশাহে সপিণ্ডয়েৎ || ২, ২৬. ১৪ ||
দ্বাদশাহে ত্রিপক্ষে বা ষণ্মাসে বৎসরেঽপি বা |
সপিণ্ডীকরণং প্রোক্তমৃষিভিস্তত্ত্বদর্শিভিঃ || ২, ২৬. ১৫ ||
সপুত্ত্রস্য ন কর্তব্যমেকোদ্দিষ্টং কদাচন |
সপিণ্ডীকরণাদূর্ধ্বং যত্রয়ত্র প্রদীয়তে || ২, ২৬. ১৬ ||
তত্রতত্র ত্রয়ং কার্যমন্যথা পিতৃঘাতকঃ |
ত্রিভিঃ কুর্যাদশক্তশ্চ পার্বণং মুনিনোদিতম্ || ২, ২৬. ১৭ ||
তদ্দিনে তদ্দিনে কুর্যাৎপিতামহমুখান্যতঃ |
অজ্ঞানাদ্দিনমাসানাং তস্মাৎপার্বণমিষ্যতে || ২, ২৬. ১৮ ||
অনুৎপন্নশরীরস্য ন দানং পিতৃভিঃ সহ |
এতৈঃ ষোডশভিঃ শ্রাদ্ধৈঃ প্রেতো মুক্তস্তু জায়তে || ২, ২৬. ১৯ ||
অপুত্ত্রস্য সপিণ্ডৎবং নৈব কুর্যাৎস্ত্রিয়োঽপি বা |
যাবজ্জীব চ সদ্ভত্র্যা ন কুর্যাৎসহপিণ্ডতাম্ || ২, ২৬. ২০ ||
ব্রাহ্মাদিষু বিবাহেষু যা বধূরিহ সংস্কৃতা |
ভর্তৃগোত্রেণ কর্তব্যাস্তস্যাঃ পিণ্ডোদকক্রিয়াঃ || ২, ২৬. ২১ ||
আসুরাদিবিবা হেষু যা ব্যূঢা কন্যকা ভবেৎ |
তস্যাস্তু পিতৃগোত্রেণ কুর্যাৎপিণ্ডোদকক্রিয়াঃ || ২, ২৬. ২২ ||
পিতুঃ পুত্ত্রেণ কর্তব্যং সপিণ্ডীকরণং সদা |
পুত্ত্রাভাবে তু পত্নী স্যাৎপত্ন্যভাবে সহোদরঃ || ২, ২৬. ২৩ ||
ভ্রাতা বা ভ্রাতৃপুত্ত্রো বা সপিণ্ডঃ শিষ্য এব বা |
সপিণ্ডনক্রিয়াং কৃৎবা কুর্যান্নান্দীমুখং ততঃ || ২, ২৬. ২৪ ||
জ্যেষ্ঠস্যৈব কনিষ্ঠেন ভ্রাতৃপুত্ত্রেণ ভার্যয়া |
সপিণ্ডীকরণং কার্যং পুত্রহীনে নরে খগ || ২, ২৬. ২৫ ||
ভ্রাৎৠণামেকজাতানামেকশ্চেৎপুত্রবান্ভবেৎ |
সর্বেতে তেন পুত্রেণ পুত্রিণো মনুরব্রবীৎ || ২, ২৬. ২৬ ||
সর্বেষাং পুত্রহীনানাং পত্নী কুর্যাৎসপিণ্ডনম্ |
ঋৎবিজা কারয়েদ্বাপি পুরোহিতমথাপি বা || ২, ২৬. ২৭ ||
কৃতচূডোপনীতশ্চ পিতুঃ শ্রাদ্ধং সমাচরেৎ |
উচ্চারয়েৎস্বধাকারং ন তু বেদাক্ষরাণ্যসৌ || ২, ২৬. ২৮ ||
ভর্ত্রাদিভিস্ত্রিভিঃ কার্যং সপিণ্ডীকরণং স্ত্রিয়াঃ |
পিতৃব্যভ্রাতৃপুত্রেণ সোদরেণ কনীয়সা || ২, ২৬. ২৯ ||
অর্বাক্সংবৎসরাৎসন্ধৌ পূর্ণে সংবৎসরেঽপি বা |
যে সপিণ্ডীকৃতাঃ প্রেতাস্তেষাং ন স্যাৎপৃথক্ক্রিয়া || ২, ২৬. ৩০ ||
সপিণ্ডনে কৃতে বৎস পৃথক্ত্বং তু বিগর্হিতম্ |
যস্তু কুর্যাৎপৃথক্পিণ্ডং পিতৃহা সোঽভিজায়তে || ২, ২৬. ৩১ ||
সপিণ্ডীকরণে বৃত্তে পৃথক্ত্বং নোপপদ্যতে |
পৃথক্পিণ্ডে কৃতে পশ্চাৎপুনঃ কুর্যাৎসপিণ্ডনম্ || ২, ২৬. ৩২ ||
সপিণ্ডীকরণং কৃৎবা একোদ্দিষ্টং করোতি যঃ |
আত্মানং চ তথা প্রেতং স নয়েদ্দমশাসনম্ || ২, ২৬. ৩৩ ||
বর্ষং যাবক্ত্রিয়া কার্যা নামগোত্রেণ ধীমতা |
ঘটাদি ভোজনং নিত্যং পদদানানি যানি চ |
সপিণ্ডীকরণে বৃত্তে একস্যৈব তু দাপয়েৎ || ২, ২৬. ৩৪ ||
অন্নং পানীয়সহিতং সঙ্খ্যাং কৃৎবাব্দিকস্য চ |
দাতব্যং ব্রাহ্মণে পক্ষিঞ্জলপূর্ণঘটাদিকম্ || ২, ২৬. ৩৫ ||
পিণ্ডান্তে তস্য সকলা বর্ষবৃত্তিঃ স্বশক্তিতঃ |
দিব্যদেহো বিমানস্থঃ সুখং যাতি যমালয়ম্ || ২, ২৬. ৩৬ ||
জীবমানে চ পিতরি ন হি পুত্ত্রে সপিণ্ডতা |
স্ত্রীণাং সপিণ্ডনং নাস্তি তথা ভর্তরি জীবতি || ২, ২৬. ৩৭ ||
হুতাশং যা সমারূঢা চতুর্থেঽহ্নি পতিব্রতা |
তস্যা ভর্তৃদিনে কার্যং বৃষোৎসর্গাদিকং চ যৎ || ২, ২৬. ৩৮ ||
পুত্ত্রিকা পতিগোত্রা স্যাদধস্তাৎপুত্রজন্মনঃ |
পুত্রোৎপত্তেঃ পরস্তাৎসা পিতৃগোত্রং ব্রজেৎপুনঃ || ২, ২৬. ৩৯ ||
পতিপত্ন্যোঃ সদৈকৎবং হুতাশং যাধিরোহতি |
পুত্রেণৈব পৃথক্ষ্রাদ্ধং ক্ষয়াখ্যে তস্য বাসরে || ২, ২৬. ৪০ ||
অপুত্ত্রৌ চেন্মৃতৌ স্যাতামেকচিত্যাং সমেঽহনি |
পৃথক্ষ্রাদ্ধানি কুর্বীত সাপিড্যং পতিনা সহ || ২, ২৬. ৪১ ||
পৃথক্পৃথক্চ পিণ্ডেন দম্পতী পতিনা সহ |
ন লিপ্যতে মহাদোষৈরেতৎসত্যং বচো মম || ২, ২৬. ৪২ ||
একচিত্যাং সমারূঢৌ দম্পতী নিধনং গতৌ |
একপাকং প্রকুর্বীত পিণ্ডান্দদ্যাৎপৃথক্পৃথক্ || ২, ২৬. ৪৩ ||
একাদশে বৃষোৎসর্গং প্রেতশ্রাদ্ধানি ষোডশ |
ঘটাদিপদদানানি মহাদানানি যানি চ |
বর্ষং যাবৎপৃথক্কুর্যাৎপ্রেতস্তৃপ্তিং ব্রজেচ্চিরম্ || ২, ২৬. ৪৪ ||
একগোত্রে মৃতানাং তু স্ত্রিয়া বা পুরুষস্য বা |
স্থণ্ডিলং চৈকতঃ কুর্যাদ্ধোমং কুর্যাৎপৃথক্পৃথক্ || ২, ২৬. ৪৫ ||
একাদশেঽহ্নি যচ্ছ্রাদ্ধং পৃথক্পিণ্ডাশ্চ ভোজনম্ |
পাকৈরেন পতিস্ত্রীণামন্যেষাং চ বিগর্হিতম্ || ২, ২৬. ৪৬ ||
একেনৈব তু পাকেন শ্রাদ্ধানি কুরুতে সুতঃ |
একং তু বিকিরং কুর্যাৎপিণ্ডান্দদ্যদ্বহূনপি |
তীর্থে চাপরপক্ষে বা চন্দ্রসূর্যগ্রহেঽপি বা || ২, ২৬. ৪৭ ||
নারী ভর্তারমাসাদ্য কুণপং দহতে যদা |
অগ্নির্দহতি গাত্রাণি আত্মানং নৈব পীডয়েৎ || ২, ২৬. ৪৮ ||
দহ্যতে ধ্মায়মানানাং ধাতূনাং হি যথা মলম্ |
তথা নারী দহেদ্দেহং হুতাশে হ্যমৃতোপমে || ২, ২৬. ৪৯ ||
দিব্যাদৌ দিব্যদেহস্তু শুদ্ধো ভবতি পূরুষঃ |
তপ্ততৈলেন লোহেন বহ্নিনা নৈব দহ্যতে || ২, ২৬. ৫০ ||
তথা সা পতিসংযুক্তা দহ্যতে ন কদাচন |
অন্তরাত্মা মৃতে তস্মিন্মৃতোঽপ্যেকৎবমাগতঃ || ২, ২৬. ৫১ ||
ভর্তৃসঙ্গং পরিত্যজ্য অন্যত্র ম্রিয়তে যদি |
ভর্তৃলোকং ন সা যাতি যাবদাভূতসম্প্লবম্ || ২, ২৬. ৫২ ||
লক্ষ্মীয়ুতান্পরিত্যজ্য মাতরং পিতরং তথা |
মৃতং পতিমনুব্রজ্য সা চিরং সুখমেধতে || ২, ২৬. ৫৩ ||
দিব্যবর্ষপ্রমাণেন তিস্রঃ কোট্যোর্ঽদ্ধকোটয়ঃ |
তাবৎকালং বসেৎস্বর্গে নক্ষত্রৈঃ সহ সর্বদা || ২, ২৬. ৫৪ ||
তদন্তে চরতে লোকে কুলে ভবতি ভোগিনাম্ |
সা হি লব্ধমহাপ্রীতির্ভর্ত্রা সহ পতিব্রতা || ২, ২৬. ৫৫ ||
এবং ন কুরুতে নারী ধর্মোঢা পতিসঙ্গমম্ |
জন্মজন্মনি দুঃখার্তাদুঃশীলাপ্রিয়বাদিনী || ২, ২৬. ৫৬ ||
বল্গুলী গৃহসোধা বা গোধা বা দ্বিমুখী ভবেৎ |
স্বভর্তারং পরিত্যজ্য পরপুংসোনুবর্তিনী || ২, ২৬. ৫৭ ||
তস্মাৎসর্বপ্রয়ত্নেন স্বপতিং স্ত্রী নিষেবতে |
মনসা কর্মণা বাচা মৃতং জীবন্তমেব বা || ২, ২৬. ৫৮ ||
জীবমানে মৃতে বাপি কিল্বিষং কুরুতে তু যা |
স চ বৈধব্যমাপ্নোতি জন্মজন্মনি দুর্ভগা || ২, ২৬. ৫৯ ||
যদ্দেবেভ্যো যৎপিতৃভ্যঃ শ্রদ্ধয়ৈব প্রদীয়তে |
তৎফলং ভর্তৃপূজাতঃ কুর্যাদ্ভর্ত্রর্চনং ততঃ || ২, ২৬. ৬০ ||
এবং কৃতে খগশ্রেষ্ঠ পিতৃলোকে চিরং বসেৎ |
যাবদাদিত্যচন্দ্রৌ চ তাবদ্দেবসমা দিবি || ২, ২৬. ৬১ ||
পুনশ্চিরায়ুষো ভূত্ত্বা জায়ন্তে বিপুলে কুলে |
পতিব্রতা যথা নারী ভর্তৃদুঃখং ন বিন্দতি || ২, ২৬. ৬২ ||
সর্বমেতদ্ধি কথিতং ময়া তব খগেশ্বর |
বিশেষং কথয়িষ্যামি মৃতস্যৈব সুখপ্রদম্ || ২, ২৬. ৬৩ ||
দ্বাদশাহে কৃতং সর্বং বর্ষং যাবৎসপিণ্ডনম্ |
পুনঃ কুর্যাৎসদা নিত্যং ঘটান্নং প্রতিমাসিকম্ || ২, ২৬. ৬৪ ||
কৃতস্য করণং নাস্তি প্রেতকার্যাদৃতে খগ |
যঃ করোতি নরঃ কশ্চিৎকৃৎপূর্বং বিনশ্যতি || ২, ২৬. ৬৫ ||
মৃতস্যৈব পুনঃ কুর্যাৎপ্রেতোঽক্ষয়্যমবাপ্নুয়াৎ |
প্রতিমাসং ঘটা দেয়া সোদনা জলপূরিতাঃ || ২, ২৬. ৬৬ ||
অর্বাক্চ বৃদ্ধেঃ করণাচ্চ তার্ক্ষ্য সপিণ্ডনং যঃ কুরুতে হি পুত্রঃ |
তথাপি মাসং প্রতিপিণ্ডমেকমন্নং চ কুম্ভং সজলং চ দদ্যাৎ || ২, ২৬. ৬৭ ||

ইতি শ্রীগারুডে মহাপুরাণে উত্তরখণ্ডেদ্বিতীয়াংশে ধর্মকাণ্ডে শ্রীকৃষ্ণগরুডসংবাদে
প্রেতকল্পে সপিণ্ডননিরূপণং নাম ষড্বিংশোঽধ্যায়ঃ

শ্রীগরুডমহাপুরাণম্-২৭
তার্ক্ষ্য উবাচ |
কথং প্রেতা বসন্ত্যত্র কীদৃগ্রূপা ভবন্তি তে |
মহাপ্রেতাঃ পিশাচাশ্চ কৈঃকৈঃ কর্মফলৈর্বিভো |
সর্বেষামনুকম্পার্থং ব্রূহি মে মধুসূদন || ২, ২৭. ১ ||
প্রেতৎবান্মুচ্যতে যেন দানেন চ শুভে ন চ |
তন্মে কথয় দেবেশ মম চেদিচ্ছসি প্রিয়ম্ || ২, ২৭. ২ ||
শ্রীকৃষ্ণ উবাচ |
সাধু পৃষ্টং ৎবয়া তার্ক্ষ্য মানুষাণাং হিতায় বৈ |
শৃণুচাবহিতো ভূৎবা যদ্বচ্মি প্রেতলক্ষণম্ || ২, ২৭. ৩ ||
গুহ্যদ্গুহ্যতরং হ্যেতন্নাখ্যেয়ং যস্য কস্যচিৎ |
ভক্তস্ত্বং হি মহাবাহো তেন তে কথয়াম্যহম্ || ২, ২৭. ৪ ||
পুরা ত্রেতায়ুগে তাত রাজাসীদ্বভ্রুবাহনঃ |
মহোদয়পুরে রম্যে ধর্মনিষ্ঠো মহাবলঃ || ২, ২৭. ৫ ||
যজ্বা দানপতিঃ শ্রীমান্ব্রহ্মণ্যঃ সাধুসমতঃ |
শীলাচারগুণোপেতো দয়াদাক্ষিণ্যসংযুতঃ || ২, ২৭. ৬ ||
প্রজাঃ পালয়তে নিত্যং পুত্রানিব মহাবলঃ |
ক্ষত্ত্রধর্মরতো নিত্যং স দণ্ড্যান্দণ্ডয়ন্নৃপঃ || ২, ২৭. ৭ ||
স কদাচিন্মহাবাহুঃ সসৈন্যোমৃগয়াং গতঃ |
বনং বিবেশ গহনং নানাবৃক্ষসমন্বিতম্ || ২, ২৭. ৮ ||
শার্দূলশতসঞ্জুষ্টং নানাপক্ষিনিনাদিতম্ |
বনমধ্যে তদা রাজা মৃগং দূরাদপশ্যত || ২, ২৭. ৯ ||
তেন বিদ্ধো মৃগোঽতীব বাণেন সুদৃঢেন চ |
বাণমাদায় তং তস্য স বনেঽদর্শনং যয়ৌ || ২, ২৭. ১০ ||
কক্ষে তচ্ছোণিতস্ত্রাবাৎস রাজানুজগাম তম্ |
ততো মৃগপ্রসঙ্গেন বনমন্যদ্বিবেশ সঃ || ২, ২৭. ১১ ||
ক্ষুৎক্ষামকণ্ঠো নৃপতিঃ শ্রমসন্তাপমূর্ছিতঃ |
জলস্থানং সমাসাদ্য সাশ্ব এবাবগাহত || ২, ২৭. ১২ ||
পীৎবা তদু দকং শীতং পদ্মগন্ধাধিবাসিতম্ |
তত উত্তীর্য সলিলাদ্বিমলাদ্বভ্রুবাহনঃ || ২, ২৭. ১৩ ||
ন্যগ্রোধবৃক্ষমাসাদ্য শীতচ্ছায়ং মনোহরম্ |
মহাবিটপিনং হৃদ্যং পক্ষিসঙ্ঘাতনাদিতম্ || ২, ২৭. ১৪ ||
বনস্য তস্য সর্বস্য কেতুভূতমিবোচ্ছ্রিতম্ |
তং মহাতরুমাসাদ্য নিষসাদ মহীপতিঃ || ২, ২৭. ১৫ ||
অথ প্রেতং দদর্শাসৌ ক্ষুত্তৃষ্ণাব্যাকুলেন্দ্রিয়ম্ |
উৎকচং মলিনং কুব্জং (রূক্ষং) নির্মাংসং ভীমদর্শনম্ || ২, ২৭. ১৬ ||
স্নায়ুবদ্ধাস্থিচরণং ধাবমানমিতস্ততঃ |
অন্যৈশ্চ বহুভিঃ প্রেতৈঃ সমন্তাৎপরিবারিতম্ || ২, ২৭. ১৭ ||
তং দৃষ্ট্বা বিকৃতং ঘোরং বিস্মিতো বভ্রুবাহনঃ |
প্রেতোঽপি দৃষ্ট্বা তাং ঘোরামটবীমাগতং নৃপম্ || ২, ২৭. ১৮ ||
তদা হৃষ্টমনা ভূৎবা তস্যান্তিকমুপাগতঃ |
অব্রবীৎস তদা তার্ক্ষ্য প্রেতরাজো নৃপং বচঃ || ২, ২৭. ১৯ ||
প্রেতভাবো ময়া ত্যক্তঃ প্রাপ্তোঽস্মি পরমাং গতিম্ |
ৎবৎসংযোগান্মহাবাহো নাস্তিধন্যতরো মম || ২, ২৭. ২০ ||
নৃপতিরুবাচ |
কৃষ্ণবর্ণঃ করালাস্যস্ত্বং প্রেত ইব লক্ষ্যসে |
কথয়স্ব মম প্রীত্যা যথৈবং চাসি তত্ত্বতঃ || ২, ২৭. ২১ ||
তথা পৃষ্টঃ স বৈ রাজ্ঞা প্রোবাচ সকলং স্বকম্ || ২, ২৭. ২২ ||
প্রেত উবাচ |
কথয়ামি নৃপশ্রেষ্ঠ সর্বমেবাদিতস্তব |
প্রেতৎবে কারণং শ্রুৎবা দয়াং কর্তুং মমার্হসি || ২, ২৭. ২৩ ||
বৈদিশং নাম নগরং সর্বসম্পৎসমন্বিতম্ |
নানাজনপদাকীর্ণং নানারত্নসমাকুলম্ |
নানাপুণ্যসমায়ুক্তং নানাবৃক্ষসমাকুলম্ || ২, ২৭. ২৪ ||
তত্রাহং ন্যবসং ভূয়ো দেবার্চনরতঃ সদা |
বৈশ্যো জাত্যা সুদেবোঽহং নাম্না বিদিতমস্তু তে || ২, ২৭. ২৫ ||
হব্যেন তর্পিতা দেবাঃ কব্যেন পিতরস্তথা |
বিবিধৈর্দানয়োগৈশ্চ বিপ্রাঃ সন্তর্পিতা ময়া || ২, ২৭. ২৬ ||
আবাহাশ্চ বিবাহাশ্চ ময়া বৈ সুনিবেশিতাঃ |
দীনানাথবিশিষ্টেভ্যো ময়া দত্তমনেকধা || ২, ২৭. ২৭ ||
তৎসর্বং বিফলং তাত মম দৈবাদুপাগতম্ |
যথা মে নিষ্ফলং জাতং সুকৃতং তদ্বদামি তে || ২, ২৭. ২৮ ||
ন মেঽস্তি সন্ততিস্তাত ন সুহৃন্ন চ বান্ধবঃ |
ন চ মিত্রং হি মে তাদৃগ্যঃ কুর্যাদৌর্ধ্বদৈহিকম্ || ২, ২৭. ২৯ ||
প্রেতৎবং সুস্থিরং তেন মম জাতং নৃপোত্তম |
একাদশং ত্রিপক্ষং চ ষাণ্মাসিকমথাব্দিকম্ |
প্রতিমাস্যানি চান্যানি এবং শ্রাদ্ধানি ষোডশ || ২, ২৭. ৩০ ||
যস্যৈতানি ন দীয়ন্তে প্রেতশ্রাদ্ধানি ভূপতে |
প্রেতৎবং সুস্থিরং তস্য দত্তৈঃ শ্রাদ্ধশতৈরপি || ২, ২৭. ৩১ ||
এবং জ্ঞাৎবা মহারাজ প্রেতৎবাদুদ্ধরস্ব মাম্ |
বর্ণানাং চাপি সর্বেষাং রাজা বন্ধুরিহোচ্যতে || ২, ২৭. ৩২ ||
তন্মাং তারয় রাজেন্দ্র মণিরত্নং দদামি তে |
যথা মম শুভাবাপ্তির্ভবেন্নৃপবরোত্তম || ২, ২৭. ৩৩ ||
তথা কার্যং মহাবাহো কৃপা যদি ময়ীষ্যতে |
আত্মনশ্চ কুরু ক্ষিপ্রং সর্বমেবৌর্ধ্বেদৈহিকম্ || ২, ২৭. ৩৪ ||
নৃপতিরুবাচ |
কথং প্রেতা ভবন্তীহ কৃতৈরপ্যৌর্ধ্বদৈহিকৈঃ |
পিশাচাশ্চ ভবন্তীহ কর্মভিঃ কৈশ্চ তদ্বদ || ২, ২৭. ৩৫ ||
প্রেত উবাচ |
দেবদ্রব্যং চ ব্রহ্মস্বং স্ত্রীবালধনসঞ্চয়ম্ |
যে হরন্তি নৃপশ্রেষ্ঠ প্রেতয়োনিং ব্রজন্তি তে || ২, ২৭. ৩৬ ||
তাপসীং চ সগোত্রাং চ অগম্যাং যে ভজন্তি হি |
ভবন্তি তে মহাপ্রেতা অম্বুজানি হরন্তি যে || ২, ২৭. ৩৭ ||
প্রবালবজ্রহর্তারো যে চ বস্ত্রাপহারকাঃ |
তথা হিরণ্যহর্তারঃ সংযুগেঽসন্মুখাগতাঃ || ২, ২৭. ৩৮ ||
কৃতঘ্না নাস্তিকা রৌদ্রাস্তথা সাহসিকা নরাঃ |
পঞ্চয়জ্ঞবিনির্মুক্তা মহাদানরতাশ্চ যে || ২, ২৭. ৩৯ ||
স্বামিদ্রোহকরা মিত্রব্রাহ্মদ্রোহকরাশ্চ যে |
তীর্থপাপকরা রাজঞ্জায়ন্তে প্রেতয়োনয়ঃ |
এবমাদ্যা মহারাজ জায়ন্তে প্রেতয়োনয়ঃ || ২, ২৭. ৪০ ||
রাজোবাচ |
কথং মুক্তা ভবন্তীহ প্রেতৎবাত্ত্বং চ তেঽপি চ |
কথং চাপি ময়া কার্যমৌর্ধ্বদৈহিকমাত্মনঃ |
বিধিনা কেন তৎকার্যং সর্বমেতদ্বদস্ব মে || ২, ২৭. ৪১ ||
প্রেত উবাচ |
শৃণু রাজেন্দ্র সঙ্ক্ষেপাদ্বিধিং নারায়ণাত্মকম্ |
সচ্ছাস্ত্রশ্রবণং বিষ্ণোঃ পূজা সজ্জনসঙ্গতিঃ || ২, ২৭. ৪২ ||
প্রেতয়োনিবিনাশায় ভবন্তীতি ময়া শ্রুতম্ |
অতো বক্ষ্যামি তে বিষ্ণুপূজাং প্রেতৎবনাশিনীম্ || ২, ২৭. ৪৩ ||
সুবর্ণদ্বয়মাহৃত্য মূর্তিং ভূপ প্রকল্পয়েৎ |
নারায়ণস্য দেবস্য সর্বাভরণভূষিতাম্ || ২, ২৭. ৪৪ ||
পীতবস্ত্রয়ুগাচ্ছন্নাং চন্দনাগুরুচর্চিতাম্ |
স্নাপয়েদ্বিবিধৈস্তোয়ৈরধিবাস্য যজেত্ততঃ || ২, ২৭. ৪৫ ||
পূর্বে তু শ্রীধরং দেবং দক্ষিণে মধুসূদনম্ |
পশ্চিমে বানমং দেবমুত্তরে চ গদাধরম্ || ২, ২৭. ৪৬ ||
মধ্যে পিতামহং পূজ্য তথা দেবং মহেশ্বরম্ |
পূজয়েচ্চ বিধানেন গন্ধপুষ্পাদিভিঃ পৃথক্ || ২, ২৭. ৪৭ ||
ততঃ প্রদক্ষিণীকৃত্য অগ্নৌ সন্তর্প্য দেবতাঃ |
ঘৃতেন দধ্না ক্ষীরেণ বিশ্বান্দেবাংস্তথা নৃপ || ২, ২৭. ৪৮ ||
ততঃ স্নাতো বিনীতাত্মা যজমানঃ সমাহিতঃ |
নারায়ণাগ্রে বিধিবৎস্বক্রিয়ামৌর্ধ্বদৈহিকীম্ || ২, ২৭. ৪৯ ||
আরভেত বিনীতাত্মা ক্রোধলোভবিবর্জিতঃ |
শ্রাদ্ধানি কুর্যাৎসর্বাণি বৃষস্যোৎসর্জনং তথা || ২, ২৭. ৫০ ||
ত্রয়োদশানাং বিপ্রাণাং বস্ত্রচ্ছত্রাণ্যুপানহৌ |
অঙ্গুলীয়কমুক্তানি ভাজনাসনভোজনৈঃ || ২, ২৭. ৫১ ||
সান্নাশ্চ সোদকা দেয়া ঘটাঃ প্রেতহিতায় বৈ |
শয়্যাদানমথো দত্ত্বা ঘটং প্রেতস্য নির্বপেৎ || ২, ২৭. ৫২ ||
নারায়ণেতি সন্নাম সম্পুটস্থং সমর্চয়েৎ |
এবং কৃৎবাথ বিধিবচ্ছুভাশুভফলং লভেৎ || ২, ২৭. ৫৩ ||
রাজোবাচ |
কথং প্রেতঘটং কুর্যাদ্দদ্যাৎকেন বিধানতঃ |
ব্রূহি সর্বানুকম্পার্থং ঘটং প্রেতবিমুক্তিদম্ || ২, ২৭. ৫৪ ||
প্রেত উবাচ |
সাধু পৃষ্টং মহারাজ কথয়ামি নিবোধ তে |
প্রেতৎবং ন ভবেদ্যেন দানেন সুদৃঢেন চ || ২, ২৭. ৫৫ ||
দানং প্রেতঘটং নাম সর্বাশুভবিনাশনম্ |
দুর্লভং সর্বলোকানাং দুর্গতিক্ষয়কারকম্ || ২, ২৭. ৫৬ ||
সন্তপ্তহাটকময়ং তু ঘটং বিধায় ব্রহ্মোশকেশবয়ুতং সহ লোকপালৈঃ |
ক্ষীরাজ্যপূর্ণবিবরং প্রণিপত্য ভক্ত্যা বিপ্রায় দেহি তব দানশতৈঃ কিমন্যৈঃ || ২, ২৭. ৫৭ ||
ব্রহ্মা মধ্যে তথা বিষ্ণুঃ শঙ্করঃ শঙ্করোঽব্যয়ঃ |
প্রাচ্যাদিষু চ তৎকণ্ঠে লোকপালান্ক্রমেণ তু || ২, ২৭. ৫৮ ||
সম্পূজ্য বিধিবদ্রাজন্ধূপৈঃ কুসুমচন্দনৈঃ |
ততো দুগ্ধাজ্যসহিতং ঘটং দেয়ং হিরণ্ময়ম্ || ২, ২৭. ৫৯ ||
সর্বদানাধিকঞ্চৈতন্মহাপাতকনাশনম্ |
কর্তব্যং শ্রদ্ধয়া রাজন্প্রেতৎববিনিবৃত্তয়ে || ২, ২৭. ৬০ ||
শ্রীভাগবানুবাচ |
এবং সঞ্জল্ষতস্তস্য প্রেতেন নিয়তাত্মনঃ |
সেনাজগামানুপদং হস্ত্যশ্বরথসঙ্কুলা || ২, ২৭. ৬১ ||
ততো বলে সমায়াতে দত্ত্বা রাজ্ঞে মহামণিম্ |
নমস্কৃত্য পুনঃ প্রার্থ্য প্রেতোঽদর্শনমীয়িবান্ || ২, ২৭. ৬২ ||
তস্মাদ্বনাদ্বিনিষ্ক্রম্য রাজাপি স্বপুরং যয়ৌ |
স্বপুরং স সমাসাদ্য সর্বং তৎপ্রেতভাষিতম্ || ২, ২৭. ৬৩ ||
চকার বিধিবৎপক্ষিন্নৌর্ধ্বদেহাদিকং বিধিম্ |
তস্য পুণ্যপ্রদানেন প্রেতো মুক্তো দিবং যয়ৌ || ২, ২৭. ৬৪ ||
শ্রাদ্ধেন পরদত্তেন গতঃ প্রেতোঽপি সদ্গতিম্ |
কিং পুনঃ পুত্রদত্তেন পিতা যাতীতি চাত্ভুতম্ || ২, ২৭. ৬৫ ||
ইতিহাসমিমং পুণ্যং শৃণোতি শ্রাবয়েচ্চ যঃ |
ন তৌ প্রেতৎবমায়াতঃ পাপাচারয়ুতাবপি || ২, ২৭. ৬৬ ||

ইতি শ্রীগারুডে মহাপুরাণে উত্তরখণ্ডে দ্বিতীয়াংশে ধর্মকাণ্ডে প্রেতকল্পে শ্রীকৃষ্ণগরুডসংবাদে
বভ্রুবাহনপ্রেতসংবাদে প্রেতৎবহেতুতন্নিবৃত্ত্যুপায়নিরূপণং নাম সপ্তবিংশোঽধ্যায়ঃ

শ্রীগরুডমহাপুরাণম্-২৮
গরুড উবাচ |
সর্বেপামনুকম্পার্থং ব্রূহি মে মধুসূদন |
প্রেতৎবান্মুচ্যতে যেন দানেন সুকৃতেন বা || ২, ২৮. ১ ||
শৃকৃষ্ণ উবাচ |
শৃণু দানং প্রবক্ষ্যামি সর্বাশু ভবিনাশনম্ |
সন্তপ্তহাটকময়ং ঘটকং বিধায় ব্রহ্মেশকেশবয়ুতং সহ লোকপালৈঃ |
ক্ষীরাজ্যপূর্ণবিবিরং প্রণিপত্য ভক্ত্যা বিপ্রায় দেহি তব দানশতৈঃ কিমন্যৈঃ || ২, ২৮. ২ ||
গরুড উবাচ |
কিমেৎকথিতং দেব বিস্তরেণ বদস্ব মে |
আমুষ্মিকীং ক্রীয়াং দেব উৎক্রান্তিসময়াদনু || ২, ২৮. ৩ ||
সংসারে সাধু মে নাথ ব্রূহি কৃত্যং জনার্দন |
যথা কার্যা নরৈঃ সম্যক্ক্রিয়া চৈবৌর্ধ্বদৈহিকী || ২, ২৮. ৪ ||
কথং প্রেতা মহাকায়া রৌদ্ররূপা ভয়ানকাঃ |
কম্ভবন্তি সুরশ্রেষ্ঠ কর্মভিঃ কৈঃ শুভাশুভৈঃ || ২, ২৮. ৫ ||
পিশাচাঃ সম্ভবন্তীহ কস্যেদং কর্মণঃ ফলম্ |
তন্মে কথয় দেবেশ অহমিচ্ছামি বেদিতুম্ || ২, ২৮. ৬ ||
ভূম্যাং প্রক্ষিপ্যতে কস্মাৎপঞ্চরত্নং কুতো মুখে |
অধস্তাচ্চ তিলা দর্ভাঃ পাদৌ যাম্যাং ব্যবস্থিতাঃ || ২, ২৮. ৭ ||
কিমর্থং মণ্ডলং ভূমৌ গোময়েনোপলিপ্যতে |
কিমর্থং স্মর্যতে বিষ্ণুঃ বিষ্ণুসূক্তঞ্চ পঠ্যতে || ২, ২৮. ৮ ||
কিমর্থং পুত্রপুত্রাশ্চ তস্য তিষ্ঠন্তি চাগ্রতঃ |
কিমর্থং দীপদানঞ্চ কিমর্থং বিষ্ণুপূজনম্ || ২, ২৮. ৯ ||
কিমর্থমাতুরো দানং দদাতি দ্বিজপুঙ্গবে |
বন্ধূন্মিত্রাণ্যমিত্রাংশ্চ ক্ষমাপয়তি তৎকথম্ || ২, ২৮. ১০ ||
তিলা লোহং হিরণ্যং চ কার্পাসং লবণং তথা |
সপ্তধান্যং ক্ষিতির্গাবো দীয়তে কেন হে তুনা || ২, ২৮. ১১ ||
কথং চ ম্রিয়তে জন্তুর্মৃতস্য চ কুতো গতিঃ |
অতিবাহশরীরং চ কথং বিশ্রমতে তদা || ২, ২৮. ১২ ||
শংব স্কন্ধে বহেৎপুত্রো বহ্নিদাতা চ পৌত্রকঃ |
কিমর্থং দেব দেবেশ আজ্যেনাভ্যঞ্জনং কুতঃ || ২, ২৮. ১৩ ||
যমসূক্তং কিমর্থং চ উদীচীং দিশমাহরেৎ |
পানীয়মেকবস্ত্রেণ সূর্যবিম্বনিরীক্ষণম্ || ২, ২৮. ১৪ ||
যবসর্ষপদূর্বাশ্চপাষাণে নিম্বচর্বণম্ |
বস্ত্রং নরশ্চ নারী চ বিদধ্যাদধরোত্তরম্ || ২, ২৮. ১৫ ||
অন্নাদ্যং গৃহমাগত্য ভোক্তব্যং গোত্রিভিঃ সহ |
নবকানি চ পিণ্ডানি কিমর্থং বিতরেৎসুতঃ || ২, ২৮. ১৬ ||
কিমর্থং চৎবরে দুগ্ধং পাত্রে পক্বে চ মৃন্ময়ে |
কাষ্ঠত্রয়ং গুণে বদ্ধ্বা কৃৎবা রাত্রৌ চতুষ্পথে || ২, ২৮. ১৭ ||
নিশায়াং দীয়তে দীপো যাবদব্দং দিনেদিনে |
দাহোদকং কিমর্থং চ সংবাদঃ স্বজনৈঃ সহ || ২, ২৮. ১৮ ||
ভগবন্নতিবাহস্য নবপিণ্ডৈস্তু কিং ভবেৎ |
কথং দেবপিতৃভ্যশ্চ বাহস্যাবাহনং কথম্ |
ইদং চ ক্রিয়তে দেব কস্মাৎপিণ্ডং প্রদাপয়েৎ || ২, ২৮. ১৯ ||
কিং তৎপ্রদীয়তে তস্য পিণ্ডদানাদনন্তরম্ |
অস্থিসঞ্চয়নং চৈব শয়্যাদানং কিমর্থকম্ || ২, ২৮. ২০ ||
দ্বিতীয়েঽহ্নি কুতঃ স্নানং চতুর্থে সাগ্নিকে দ্বিজে |
দশমে কিং মলস্নানং কার্যং সর্বজনৈঃ সহ || ২, ২৮. ২১ ||
কস্মাত্তৈলোদ্বর্তনং চ স্কন্ধবাহান্গৃহং নয়েৎ |
তৈঃ সমুদ্বর্তনং চাপি দদ্যুঃ স্থলজলাশ্রয়ে || ২, ২৮. ২২ ||
দেশমেঽহনি যঃ পিণ্ডস্তং দদ্যাদামিষেণ তু |
পিণ্ডং চৈকাদশে কস্মাদ্বৃষোৎসর্গঃ কথং ভবেৎ || ২, ২৮. ২৩ ||
শ্রাদ্ধানি ষোডশৈতানি অব্দং যাবৎকুতো বদ |
অন্নাদিচোদকেনৈব ষষ্ট্যধিকশতত্রয়ম্ || ২, ২৮. ২৪ ||
দিনেদিনে চ দাতব্যং ঘটান্নং প্রেততৃপ্তয়ে |
প্রাপ্তে কালে চ ম্রিয়তে অনিত্যো মানবঃ প্রভো || ২, ২৮. ২৫ ||
ছিদ্রং তু নৈব পশ্যামি কুতো জীবঃ স নির্গতঃ |
কুতো গচ্ছন্তি ভূতানি পৃথিব্যাপো মনস্তথা || ২, ২৮. ২৬ ||
তেজো বদস্ব মে নাথ বায়ুরাকাশমেব চ |
বায়বশ্চৈব পঞ্চৈতে কথং গচ্ছন্তি চাপ্তয়ে || ২, ২৮. ২৭ ||
লোভমোহাদয়ঃ পঞ্চ শরীরে চৈব তস্করাঃ |
তৃষ্ণা কামোঽপ্যহঙ্কারঃ কুতো যান্তি জনার্দন || ২, ২৮. ২৮ ||
পুণ্যং বাপ্যথ বাপুণ্যং যৎকিঞ্চিৎসুকৃতং তথা |
নষ্টে দেহে কুতো যান্তি দানানি বিবিধানি চ || ২, ২৮. ২৯ ||
সপিণ্ডনং কিমর্থং চ পূর্ণে সংবৎসরেঽপি বা |
প্রেতস্য মেলনং সার্ধং কৈঃ সমং তত্র কো বিধিঃ || ২, ২৮. ৩০ ||
যে দগ্ধা যে ৎবদগ্ধাশ্চ পতিতা যে নরাভুবি |
যানি চান্যানি ভূতানি তেষামন্তে ভবেচ্চ কিম্ || ২, ২৮. ৩১ ||
পাপিনো যে দুরাচারা মুদ্গলৎবং চ যে গতাঃ |
আত্মঘাতী ব্রহ্মহা চ স্তেয়ী বিশ্বাসঘাতকঃ || ২, ২৮. ৩২ ||
কপিলাং যঃ পিবেচ্ছূদ্রো যঃ পঠেদ্বৈদিকাক্ষরম্ |
ধারয়েদ্বা ব্রহ্মসূত্রং কা গতিস্তস্য মাধব || ২, ২৮. ৩৩ ||
বিপ্রস্য ব্রাহ্মণী ভার্যা সঙ্গৃহী তা যদা ভবেৎ |
তস্মাৎপাপাচ্চ ভীতোঽহং তন্মে বদ জগৎপতে |
সর্বমেতন্ময়া পৃষ্টো বদ লোকহিতায় বৈ || ২, ২৮. ৩৪ ||

ইতি শ্রীগারুডে মহাপুরাণে উত্তরখণ্ডে দ্বিতীয়াংশে ধর্মকাণ্ডে প্রেতকল্পে শ্রীকৃষ্ণগরুডসংবাদে
ঔর্ধ্বদহিককর্মকালক্রিয়মাণনানাদানাদিফলপ্রশ্রনিরূপণং নামাষ্টাবিংশোঽধ্যায়ঃ

শ্রীগরুডমহাপুরাণম্-২৯
শ্রীকৃষ্ণ উবাচ |
সাধু পৃষ্টং ৎবয়া ভদ্র মানুষাণাং হিতায় বৈ |
শৃণুষ্বাবহিতো ভূৎবা সর্বমেবৌর্ধ্বদৈহিকম্ || ২, ২৯. ১ ||
কম্যগ্বিভেদরহিতং শ্রুতিস্মৃতিসমুদ্ধৃতম্ |
যন্ন দৃষ্টং সুরৈঃ সেন্দ্রৈর্যোগিভির্যোগচিন্তকৈঃ || ২, ২৯. ২ ||
গুহ্যাদ্গুহ্যতরং বৎস নাখ্যাতং কস্যচিৎক্বচিৎ |
ভক্তস্ত্বং হি মহাভাগ সর্বং তে কথয়াম্যহম্ || ২, ২৯. ৩ ||
অপুত্রস্য গতির্নাস্তি স্বর্গো নৈব চ নৈব চ |
যেন কেনাপ্যুপায়েন কার্যং জন্ম সুতস্য চ || ২, ২৯. ৪ ||
তারয়েন্নরকাৎপুত্রো যদি মোক্ষো ন বিদ্যতে |
দাহঃ পুত্রেণ কর্তব্যো দেয়ঃ পৌত্রেণ পাবকঃ || ২, ২৯. ৫ ||
তিলৈর্দর্ভৈশ্চ ভূম্যাং বৈ কুটী ধাতুমতী ভবেৎ |
পঞ্চরত্নানি বক্ত্রে তু যেন জীবঃ প্ররোহতি || ২, ২৯. ৬ ||
লিপ্যাত্তু গোময়ৈর্ভূমিং তিলান্দর্ভাংশ্চ নিঃ ক্ষিপেৎ |
তস্যামেবাতুরো মুক্তঃ সর্বং দহতি পাতকম্ || ২, ২৯. ৭ ||
দর্ভমূলীনয়েৎস্বর্গং সংস্থিতং নাত্র সংশয়ঃ |
দর্ভাংস্তত্র হি যে ভূম্যাং তিলয়ুক্তান সংশয়ঃ || ২, ২৯. ৮ ||
সর্বত্র বসুধা পূতা যত্র লেপো ন বিদ্যতে |
যত্র লেপঃ স্থিতস্তত্র পুনর্লেপেন শুধ্যতি || ২, ২৯. ৯ ||
যাতুধানাঃ পিশাচাশ্চ রাক্ষসাঃ ক্রূরকর্মিণঃ |
অলিপ্তে আতুরং মুক্তং বিশন্ত্যেতে ন সংশয়ঃ || ২, ২৯. ১০ ||
নিত্যহোমং তথা শ্রাদ্ধং বিপ্রাণাং পাদশোধনম্ |
মণ্ডলেন বিনা ভূম্যাং কুর্বন্ত্যেতচ্চ নিষ্ফলম্ || ২, ২৯. ১১ ||
আতুরো মুচ্যতে নৈব মণ্ডলেন বিনা ভুবি |
ব্রহ্মা রুদ্রশ্চ বিষ্ণুশ্চ শ্রীর্হুতাশন এব চ |
মণ্ডলে চোপতিষ্ঠন্তস্তস্মাৎকুর্বীত মণ্ডলম্ || ২, ২৯. ১২ ||
অন্যথা ম্রিয়তে যস্তু বালো বৃদ্ধো যুবাপি বা |
যোন্যন্তরং স বৈ গচ্ছেৎক্রীডতে বায়ুনা সহ || ২, ২৯. ১৩ ||
মিশ্রিতং লোহতাম্রং তু তথৈব জন্ম জায়তে |
তস্মৈবং বায়ুভূতস্য ন শ্রাদ্ধং নোদক ক্রিয়া || ২, ২৯. ১৪ ||
মম স্বেদসমুদ্ভূতাস্তিলাস্তার্ক্ষ্য পবিত্রকাঃ |
অসুরা দানবা দৈত্যাস্তৃপ্যন্তি তিলদানতঃ || ২, ২৯. ১৫ ||
তিলাঃ শ্বেতাস্তিলাঃ কৃষ্ণাস্তিলা গোমূত্রসন্নিভাঃ |
তে মে দহন্তু পাষানি শরীরেণ কৃতানি চ || ২, ২৯. ১৬ ||
এক এব তিলদ্রোণো হেমদ্রোণতিলৈঃ সমঃ |
তর্পণে দানহোমে চ দত্তো ভবতি চাক্ষয়ঃ || ২, ২৯. ১৭ ||
দর্ভা মল্লোমসম্ভূতাস্তিলাঃ স্বেদসমুদ্ভবাঃ |
তৃপ্তাঃ স্যুর্দেবতা দানৈঃ শ্রাদ্ধেন পিতরস্তথা |
প্রয়োগবিধিনা ব্রহ্মা বিশ্বঞ্চাপ্যুপজীবনাৎ || ২, ২৯. ১৮ ||
সব্যয়জ্ঞোপবীতেন ব্রহ্মাদ্যাস্তৃপ্তিমান্পুয়ুঃ |
অপসব্যেন তৃপ্যন্তি পিতরো দিবিদেবতাঃ || ২, ২৯. ১৯ ||
অপসব্যাদিতো ব্রহ্মা দর্ভমধ্যে তু কেশবঃ |
দর্ভাগ্রে শঙ্করং বিদ্যাত্ত্রয়ো দেবাঃ কুশে স্থিতাঃ || ২, ২৯. ২০ ||
বিপ্রা মন্ত্রাঃ কুশা বহ্নিস্তুলসী চ খগেশ্বর |
নৈতে নির্মাল্যতাং যান্তি ক্রিয়মাণাঃ পুনঃ পুনঃ || ২, ২৯. ২১ ||
কুশাঃ পিণ্ডেষু নির্মাল্যাঃ ব্রাহ্মণাঃ প্রেতভোজনে |
মন্ত্রাঃ শূদ্রেষু পতিতাশ্চিতায়াশ্চ হুতাশনঃ || ২, ২৯. ২২ ||
তুলসী ব্রাহ্মণা গাবো বিষ্ণুরেকাদশী খগ |
পঞ্চ প্রবহণান্যেব ভবাব্ধৌ মজ্জতাং সতাম্ || ২, ২৯. ২৩ ||
বিষ্ণুরেকাদশী গীতা তুলসীবিপ্রধেনবঃ |
অপারে দুর্গসঙ্কারে ষট্পদী মুক্তিদায়িনী || ২, ২৯. ২৪ ||
তিলাঃ পবিত্রাস্ত্রিবিধা দর্ভাশ্চ তুলসীদালম্ |
নিবারয়ন্তি চৈতানি দুর্গতিং যান্তমাতুরম্ || ২, ২৯. ২৫ ||
হস্তাভ্যামুদ্ধৃতৈর্দর্ভৈস্তোয়েন প্রোক্ষয়েদ্ভুবম্ |
মৃত্যুকালে ক্ষিপেদ্দর্ভানাতুরস্য করদ্বয়ে || ২, ২৯. ২৬ ||
দর্ভেষু ক্ষিপ্যতে যোঽসৌ দভস্তু পরিবেষ্টিতঃ |
বিষ্ণুলোকং স বৈ যাতি মন্ত্রহীনোঽপি মানবঃ || ২, ২৯. ২৭ ||
দর্ভমূলীগতো ভূমৌ দর্ভপাণিস্তু যো মৃতঃ |
প্রায়শ্চিত্তবিশুদ্ধোঽসৌ সংসারেপারসাগরে || ২, ২৯. ২৮ ||
গোময়েনোপলিপ্তে তু দর্ভস্যাস্তরণে স্থিতঃ |
তত্র দত্তেন দানেন সর্বং পাপং ব্যপোহতি || ২, ২৯. ২৯ ||
লবণং তদ্রসং দিব্যং সর্বকামপ্রদং নৃণাম্ |
যস্মাদন্নরসাঃ সর্বে নোৎকটা লবণং বিনা || ২, ২৯. ৩০ ||
পিৎৠণাং চ প্রিয়ং ভব্যং তস্মাৎস্বর্গপ্রদং ভবেৎ |
বিষ্ণুদেহসমুদ্ভূতো যতোঽযং লবণো রসঃ || ২, ২৯. ৩১ ||
বিশেষাল্লবণং দানং তেন শংসন্তি যোগিনঃ |
ব্রাহ্মণ ক্ষত্ত্রিয়বিশাং স্ত্রীণাং শূদ্রজনস্য চ || ২, ২৯. ৩২ ||
আতুরাণাং যদা প্রাণাঃ প্রয়ান্তি বসুধাতলে |
লবণং তু তদা দেয়ং দ্বারস্যোদ্ধাটনং দিবঃ || ২, ২৯. ৩৩ ||

ইতি শ্রীগারুডে মহাপুরাণে উত্তরখণ্ডে দ্বিতীয়াংশে প্রেতকল্পে ধর্মকাণ্ডে
শ্রীকৃষ্ণগরুডসংবাদে ঔর্ধ্বদেহিককর্মণি
পুত্রদর্ভতিলতুলসীগোভূলেপতাম্রপাত্রদানা দীনামাবশ্যকৎবনিরূপণং নামৈকোনত্রিশোঽধ্যায়ঃ

শ্রীগরুডমহাপুরাণম্-৩০
শ্রীকৃষ্ণ উবাচ |
শৃণু তার্ক্ষ্য পরং গুহ্যং দানানাং দানমুত্তমম্ |
পরমং সর্বদানানাং পরং গোপ্যং দিবৌকসাম্ || ২, ৩০. ১ ||
দেয়মেকং মহাদানং কার্পাসং চোত্তমোত্তমম্ |
যেন দত্তেন প্রীয়ন্তে ভূর্ভুবঃ স্বরিতি ক্রমাৎ || ২, ৩০. ২ ||
ব্রহ্মাদ্যা দেবতাঃ সর্বাঃ কার্যাচ্চ প্রীতিমাপ্নুয়ুঃ |
দেয়মেতন্মহাদানং প্রেতোদ্ধরণহেতবে || ২, ৩০. ৩ ||
চিরং বসেদ্রুদ্রলোকে ততো রাজা ভবেদিহ |
রূপবান্সুভগো বাগ্মী শ্রীমানতুল বিক্রমঃ |
যমলোকং বিনির্জিত্য স্বর্গং তাক্ষ্য স গচ্ছতি || ২, ৩০. ৪ ||
গাং তিলাংশ্চ ক্ষিতং হেম যো দদাতি দ্বিজন্মনে |
তস্য জন্মার্জির্ত পাপং তৎক্ষণাদেবনশ্যতি || ২, ৩০. ৫ ||
তিলা গাবো মহাদানং মহাপাতকনাশনম্ |
তদ্দ্বয়ং দীয়তে বিপ্রে নান্যবর্ণে কদাচন || ২, ৩০. ৬ ||
কল্পিতং দীয়তে দানং তিলা গাবশ্চমেদিনী |
অন্যেষু নৈব বর্ণেষু পোষ্যবর্গে কদাচন || ২, ৩০. ৭ ||
পোষ্যবর্গে তথা স্ত্রীষু দানং দেয়মকল্পিতম্ |
আতুরে বোপরাগে চ দ্বয়ং দানং বিশিষ্যতে |
আতুরে দীয়তে দানং তৎকালে চোপতিষ্ঠতি || ২, ৩০. ৮ ||
জীবতস্তু পুনর্দত্তমুপতিষ্ঠত্যসংস্কৃতম্ |
সত্যংসত্যং পুনঃ সত্যং যদ্দত্তং বিকলেন্দ্রিয়ে || ২, ৩০. ৯ ||
যচ্চানু মোদতে পুত্রস্তচ্চ দানমনন্তকম্ |
অতো দদ্যাৎস পুত্রো বা যাবজ্জীবৎসসৌ চিরম্ |
অতিবাহস্তথা প্রেতো ভোগাংশ্চ লভতে যতঃ || ২, ৩০. ১০ ||
অস্বস্থা তুরকালে তু দেহপাতে ক্ষিতিস্থিতে |
দেহে তথাতিবাহস্য পরতঃ প্রীণনং ভবেৎ || ২, ৩০. ১১ ||
পঙ্গাবন্ধে চ কাণে চ হ্যর্ধোন্মীলিতলোচনে |
তিলেষু দর্ভান্সংস্তীর্য দানমুক্তং তদক্ষয়ম্ || ২, ৩০. ১২ ||
তিলা লৌহং হিরণ্যঞ্চ কার্পাসং লবণং তথা |
সপ্তধান্যং ক্ষিতির্গাব একৈকং পাবনং স্মৃতম্ || ২, ৩০. ১৩ ||
লোহদানাদ্যমস্তুষ্যেদ্ধর্ম রাজস্তিলার্পণাৎ |
লবণে দীয়মানে তু ন ভয়ং বিদ্যতে যমাৎ || ২, ৩০. ১৪ ||
কর্পাসস্য তু দানেন ন ভূতেভ্যো ভয়ং ভবেৎ |
তারয়ন্তি নরং গাবস্ত্রিবিধাশ্চৈব পাতকাৎ || ২, ৩০. ১৫ ||
হেমদানাৎসুখং স্বর্গে ভূমিদানান্নৃপো ভবেৎ |
হেমভূমিপ্রদানাচ্চ ন পীডা নরকে ভবেৎ || ২, ৩০. ১৬ ||
সর্বেঽপি যমদূতাশ্চ যমরূপা বিভীষণাঃ |
সর্বে তে বরদা যান্তি সপ্তধান্যেন প্রীণিতাঃ || ২, ৩০. ১৭ ||
বিষ্ণোঃ স্মরণমাত্রেণ প্রাপ্যতে পরমা গতিঃ |
এতত্তে সর্বমাখ্যাতং মর্ত্যৈর্যা গতিরাপ্যতে || ২, ৩০. ১৮ ||
তস্মাৎপুত্রং প্রশংসন্তি দদাতি পিতুরাজ্ঞয়া |
ভূমিষ্ঠং পিতরং দৃষ্ট্বা হ্যর্ধোন্মীলিতলোচনম্ || ২, ৩০. ১৯ ||
তস্মিন্কালে সুতো যস্তু সর্বদানানি দাপয়েৎ |
গয়াশ্রাদ্ধাদ্বিশিষ্যেত স পুত্রঃ কুলনন্দনঃ || ২, ৩০. ২০ ||
স্বস্থানাচ্চলিতশ্চাসৌ বিকলস্য পিতুস্তদা |
পুত্রৈর্যত্নেন কর্তব্যা পিতরং তারয়ন্তি তে || ২, ৩০. ২১ ||
কিং দত্তৈর্বহুভির্দানৈঃ পিতুরন্ত্যেষ্টিমাচরেৎ |
অশ্বমেধো মহায়জ্ঞঃ কলাং নার্হতি ষোডশীম্ || ২, ৩০. ২২ ||
ধর্মাত্মা স নু পুত্রো বৈদেবৈরপি সুপূজ্যতে |
দাপয়েদ্যস্তু দানানি হ্যাতুরং পিতরং ভুবি || ২, ৩০. ২৩ ||
লোহদানঞ্চ দাতব্যং ভূমিয়ুক্তেন পাণিনা |
যমং ভীমঞ্চ নাপ্নোতি ন গচ্ছেত্তস্য বেশ্মনি || ২, ৩০. ২৪ ||
কুঠারো মুসলো দণ্ডঃ খড্গশ্চ চ্ছুরিকা তথা |
এতানি যমহস্তেষু দৃশ্যানি পাপকর্মিণাম্ || ২, ৩০. ২৫ ||
তস্মাল্লোহস্য দানন্তু ব্রাহ্মণায়াতুরো দদেৎ |
যমায়ুধানাং সন্তুষ্ট্যৈ দানমেতদুদাহৃতম্ || ২, ৩০. ২৬ ||
গর্ভস্থাঃ শিশবো যে চ যুবানঃ স্থবিরাস্তথা |
এভির্দানবিশেষৈস্তু নির্দহেয়ুঃ স্বপাতকম্ || ২, ৩০. ২৭ ||
ছুরিণঃ শ্যামশবলৌ ষণ্ডামর্কা উদুম্বরাঃ |
শবলা শ্যামদূতা যে লোহদানেন প্রীণিতাঃ || ২, ৩০. ২৮ ||
পুত্রাঃ পৌত্রাস্তথা বন্ধুঃ সগোত্রাঃ সুহহৃদস্তথা |
দদতে নাতুরে দানং ব্রহ্মঘ্নৈস্তু সমা হি তে || ২, ৩০. ২৯ ||
পঞ্চৎবে ভূমিয়ুক্তস্য শৃণু তস্য চ যা গতিঃ |
অতিবাহঃ পুনঃ প্রেতোবর্ষোর্ধ্বং সুকৃতং লভেৎ || ২, ৩০. ৩০ ||
অগ্নিত্রয়ং ত্রয়ো লোকাস্ত্রয়ো বেদাস্ত্রয়োঽমরাঃ |
কালত্রয়ং ত্রিসন্ধ্যং চ ত্রয়ো বর্ণাস্ত্রিশক্তয়ঃ || ২, ৩০. ৩১ ||
পাদাদূর্ধ্বং কটিং যাবত্তাবদ্ব্রহ্যাধিতিষ্ঠতি |
গ্রীবাং যাবদ্ধরির্নাভেঃ শরীরে মনুজস্য চ || ২, ৩০. ৩২ ||
মস্তকে তিষ্ঠতীশানো ব্যক্তাব্যক্তো মহেশ্বরঃ |
একমূর্তেস্ত্রয়ো ভাগা ব্রহ্মা বিষ্ণুহেশ্বরাঃ || ২, ৩০. ৩৩ ||
অহং প্রাণঃ শরীরস্থো ভূতগ্রামচতুষ্টয়ে |
ধর্মাধর্মে মতিং দদ্যাৎসুখদুঃখে কৃতাকৃতে || ২, ৩০. ৩৪ ||
জন্তোর্বুদ্ধিং সমাস্থায় পূর্বমর্মাধিবাসিতাম্ |
অহমেব তথা জীবান্প্রেরয়ামি চ কর্মসু |
স্বর্গং চ নরকং মোক্ষং প্রয়ান্তি প্রাণিনো ধ্রুবম্ || ২, ৩০. ৩৫ ||
স্বর্গস্থং নরকস্থং বা শ্রাদ্ধে বাপ্যায়নং ভবেৎ |
তস্মাচ্ছ্রাদ্ধানি কুর্বীত ত্রিবিধানি বিচক্ষণঃ || ২, ৩০. ৩৬ ||
মৎস্যং কর্মং চ বারাহং নারসিংহঞ্চ বামনম্ |
রামং রামং চ কৃষ্ণং চ বুদ্ধং চৈব সকল্কিনম্ |
এতানি দশ নামানি স্মর্তব্যানি সদা বুধৈঃ || ২, ৩০. ৩৭ ||
স্বর্গং জীবাঃ সুখং যান্তি চ্যুতাঃ স্বর্গাচ্চ মানবাঃ |
লব্ধ্বা সুখং চ বিত্তং চ দয়াদাক্ষিণ্যসংযুতাঃ |
পুত্রপৌত্রৈর্ধনৈরাঢ্যা জীবেয়ুঃ শরদাং শতম্ || ২, ৩০. ৩৮ ||
আতুরে চ দদেদ্দানং বিষ্ণুপূজাঞ্চ কারয়েৎ |
অষ্টাক্ষরং তথা মন্ত্রং জপেদ্বা দ্বাদশাক্ষরম্ || ২, ৩০. ৩৯ ||
পূজয়েচ্ছুক্লপুষ্পৈশ্চ নৈবেদ্যৈর্ঘৃতপাচিতৈঃ |
তথা গন্ধৈশ্চ ধূপৈশ্চ শ্রুতিস্মৃতিমনূদিতৈঃ || ২, ৩০. ৪০ ||
বিষ্ণুর্মাতা পিতা বিষ্ণুর্বিষ্ণুঃ স্বজনবান্ধবাঃ |
যত্র বিষ্ণুং ন পশ্যামি তেন বাসেন কিং মম || ২, ৩০. ৪১ ||
জলে বিষ্ণুঃ স্থলে বিষ্ণুর্বিষ্ণুঃ পর্বতমস্তকে |
জ্বালামালাকুলে বিষ্ণুঃ সর্বং বিষ্ণুময়ং জগৎ || ২, ৩০. ৪২ ||
বয়মাপো বয়ং পৃথ্বী বয়ং দর্ভা বয়ং তিলাঃ |
বয়ং গাবো বয়ং রাজা বয়ং বায়ুর্বয়ং প্রজাঃ || ২, ৩০. ৪৩ ||
বয়ং হেম বয়ং ধান্যং বয়ং মধু বয়ং ঘৃতম্ |
বয়ং বিপ্রা বয়ং দেবা বয়ং শম্ভুশ্চ ভূর্ভুবঃ || ২, ৩০. ৪৪ ||
অহং দাতা অহং গ্রাহী অহং যজ্বা অহং ক্রতুঃ |
অহং হর্তা অহং ধর্মো অহং পৃথ্বী হ্যহং জলম্ || ২, ৩০. ৪৫ ||
ধর্মাধর্মে মতিং দদ্যাং কর্মভিস্তু শুভাশুভৈঃ |
যৎকর্ম ক্রিয়তে ক্বাপি পূর্বজন্মার্জিতং খগ || ২, ৩০. ৪৬ ||
ধর্মে মতিমহং দদ্যামধর্মেঽপ্যহমেব চ |
যাতনাং কুরুতে সোঽপি ধর্মে মুক্তিং দদাম্যহম্ || ২, ৩০. ৪৭ ||
মনুজানাং হিতা তার্ক্ষ্য অন্তে বৈতরণী স্মৃতা |
তয়াবমত্য পাপৌঘং বিষ্ণুলোকং স গচ্ছতি || ২, ৩০. ৪৮ ||
বালৎবে যচ্চ কৌমারে যচ্চ পরিণতৌ চ যৎ |
সর্বাবম্থাকৃতং পাপং যচ্চ জন্মান্তরেষ্বপি || ২, ৩০. ৪৯ ||
যন্নিশায়াং তথা প্রাতর্যন্মধ্যাহ্নাপরাহ্নয়োঃ |
সন্ধ্যয়োর্যৎকৃতং কর্ম কর্মণা মনসা গিরা || ২, ৩০. ৫০ ||
দত্ত্বা বরাং সকৃদপি কপিলাং সর্বকামিকাম্ |
উদ্ধরেদন্তকালে স আত্মানং পাপসঞ্চয়াৎ || ২, ৩০. ৫১ ||
গাবো মমাগ্রতঃ সন্তু পৃষ্ঠতঃ পার্শ্বতস্তথা |
গাবো মে হৃদয়ে সন্তু গবাং মধ্যে বসাম্যহম্ || ২, ৩০. ৫২ ||
যা লক্ষ্মীঃ সর্বভূতানাং যা চ দেবে ব্যবস্থিতা |
ধেনুরূপেণ সা দেবী মম পাপং ব্যপোহতু || ২, ৩০. ৫৩ ||

ইতি শ্রীগারুডে মহাপুরাণে উত্তরখণ্ডে দ্বিতীয়াংশে ধর্মকাণ্ডে প্রেতকল্পে
শ্রীকৃষ্ণগরুডসংবাদে নানাদাননিরূপণং নাম ত্রিংসোঽধ্যায়ঃ