১.২৩ গরুডপুরাণ (অধ্যায় ২২১-২৩০)

শ্রীগরুডমহাপুরাণম্-২২১
ব্রহামোবাচ |
ধর্মসারমহং বক্ষ্যে সঙ্ক্ষেপাচ্ছুণু শঙ্কর |
ভুক্তিমুক্তিপ্রদং সূক্ষ্মং সর্বপাপবিনাশনম্ || ১, ২২১. ১ ||
শ্রুতং ধর্মং বলং ধৈর্যং সুখমুৎসাহমেব চ |
শোকো হরতি বৈ নৄণাং তস্মাচ্ছোকং পরিত্যজেৎ || ১, ২২১. ২ ||
কর্মদারাঃ কর্মলোকাঃ কর্মসম্বন্ধিবান্ধবাঃ |
কর্মাণি প্রেরয়ন্তীহ পুরুষং সুখদুঃখয়োঃ || ১, ২২১. ৩ ||
দানমে পরো ধর্মো দানাৎসর্বমবাপ্যতে |
দানাঃৎস্বর্গশ্চ রাজ্যঞ্চ দদ্যাদ্দনং ততো নরঃ || ১, ২২১. ৪ ||
একতো দানমেবাহুঃ সমগ্রবরদক্ষিণম্ |
একতো ভয়ভীতস্য প্রাণিনঃ প্রাণরক্ষণম্ || ১, ২২১. ৫ ||
তপসা ব্রহ্মচর্যেণ যজ্ঞৈঃ স্নানেন বা পুনঃ |
ধর্মস্য নাশকা যে চ তে বৈ নিরয়গামিনঃ || ১, ২২১. ৬ ||
যে চ হোমজপস্নানদেবতার্চনতৎপরাঃ |
সত্যক্ষমাদয়ায়ুক্তাস্তে নরাঃ স্বর্গগামিনঃ || ১, ২২১. ৭ ||
ন দাতা সুখদুঃখানাং ন চ হর্তাস্তি কশ্চন |
ভুঞ্জতে স্বকৃতান্যেব দুঃখানি চ সুখানি চ || ১, ২২১. ৮ ||
ধর্মার্থং জীবিতং যেষাং দুর্গাণ্যতিতরন্তি তে |
সন্তুষ্টঃ কো ন শক্নোতি ফলমূলৈশ্চ বর্তিতুম্ || ১, ২২১. ৯ ||
সর্ব এব হি সৌখ্যেন সঙ্কটান্যবগাহতে |
ইদমেব হি লোভস্য কার্যং স্যা দতিদুষ্করম্ || ১, ২২১. ১০ ||
লোভাৎক্রোধঃ প্রভবতি লোভাদ্দ্রোহঃ প্রবর্ততে |
লোভান্মোহশ্চ মায়া চ মানো মৎসর এব চ || ১, ২২১. ১১ ||
রাগদ্বেষানৃতক্রোধলোমমোহমদোজ্ঝিতঃ |
যঃ স শান্তঃ পরং লোকং যাতি পাপবিবর্জিতঃ || ১, ২২১. ১২ ||
দেবতা মুনয়ো নাগা গন্ধর্বা গুহ্যকা হর |
ধার্মিকং পূজয়ন্তীহ ন ধনাঢ্যং ন কামিনম্ || ১, ২২১. ১৩ ||
অনন্তবলবীর্যেণ প্রজ্ঞয়া পৌরুষেণ বা |
অলভ্যং লভতে মর্ত্যস্তত্র কা পরিবেদনা || ১, ২২১. ১৪ ||
সর্বসত্ত্বদয়ালুৎবং সর্বেন্দ্রিয়বিনিগ্রহঃ |
সর্বত্রানিত্যবুদ্ধিৎবং শ্রেয়ঃ পরমিদং স্মৃতম্ || ১, ২২১. ১৫ ||
পশ্যন্নিবাগ্রতো মৃত্যুং যো ধর্মং নাচরেন্নরঃ |
অজাগলস্তনস্যেব তস্য জন্ম নিরর্থকম্ || ১, ২২১. ১৬ ||
ভ্রূণহা ব্রহ্মহা গোঘ্নঃ পিতৃহা গুরুতল্পগঃ |
ভূমিং সর্বগুণোপেতাং দত্ত্বা পাপৈঃ প্রমুচ্যতে || ১, ২২১. ১৭ ||
ন গোদানাৎপরং দানং কিঞ্চিদস্তীতি মে মতিঃ |
যা গৌর্ন্যায়ার্জিতা দত্তা কৃৎস্নং তারয়তে কুলম্ || ১, ২২১. ১৮ ||
নান্নদানাৎপরং দানং কিঞ্চিদস্তি বৃষধ্বজ ! |
অন্নেন ধার্যতে সর্বং চরাচরমিদং জগৎ || ১, ২২১. ১৯ ||
কন্যাদানং বৃষোৎসর্গস্তীর্থসেবা শ্রুতং তথা |
হস্ত্যশ্বরথদানানি মণিরত্নবসুন্ধরাঃ || ১, ২২১. ২০ ||
অন্নদানস্য সর্বাণি কলাং নার্হন্তি ষোডশীম্ |
অন্নাৎপ্রাণা বলং তেজশ্চান্নাদ্বীর্যং ধৃতিঃ স্মৃতিঃ || ১, ২২১. ২১ ||
কূপবাপীতডাগাদীনারামাংশ্চৈব কারয়েৎ |
ত্রিসপ্তকুলমুদ্ধৃত্য বিষ্ণুলোকে মহীয়তে || ১, ২২১. ২২ ||
সাধূনাং দর্শনং পুণ্যং তীর্থাদপি বিশিষ্যতে |
কালেন তীর্থং ফলতি সদ্যঃ সাধুসমাগমঃ || ১, ২২১. ২৩ ||
সত্যং দমস্তপঃ শৌচং সন্তোষশ্চ ক্ষমার্জবম্ |
জ্ঞানং শমো দয়া দানমেষ ধর্মঃ সনাতনঃ || ১, ২২১. ২৪ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
ধর্মসারকথনং নামৈকবিংশাধিকদ্বিশততমোঽধ্যায়ঃ

শ্রীগরুডমহাপুরাণম্-২২২
ব্রহ্মোবাচ |
প্রায়শ্চিত্তাদি বক্ষ্যেঽহং নরকৌঘবিমর্দনম্ |
মক্ষিকা বিপ্রুষো নারী ভুবি তোয়ং হুতাশনঃ |
মার্জারো নকুলশ্চৈব শুচীন্যেতানি নিত্যশঃ || ১, ২২২. ১ ||
যঃ শূদ্রোচ্ছিষ্টসংস্পৃষ্টং প্রমাদাদ্ভক্ষয়েদ্দ্বিজঃ |
অহোরাত্রোষিতো ভূৎবা পঞ্চগব্যেন শুধ্যতি || ১, ২২২. ২ ||
বিপ্রো বিপ্রেণ সংস্পৃষ্ট উচ্ছিষ্টেন কদাচন |
স্নানং জপ্যঞ্চ কর্তব্যং দিনস্যান্তে চ ভোজনম্ || ১, ২২২. ৩ ||
অন্নং সমক্ষিকাকেশং শুধ্যেদ্বান্তেন তৎক্ষণাৎ |
যশ্চ পাণিতলে ভুঙ্ক্তে অঙ্গুল্যা বাহুনা চ যঃ || ১, ২২২. ৪ ||
অহোরাত্রেণ শুধ্যেত পিবেদ্যদি ন বার্যুত |
পীতশেষন্তু যত্তোয়ং বামহস্তেন মদ্যবৎ || ১, ২২২. ৫ ||
চর্মমধ্যগতং তোয়মশুচি স্যান্ন তৎপিবেৎ |
অন্ত্যজাতিরবিজ্ঞাতো নিবসেদ্যস্য বেশ্মনি || ১, ২২২. ৬ ||
চান্দ্রায়ণং পরাকং বা দ্বিজাতীনাং বিশোধনম্ |
প্রাজাপত্যন্তু শূদ্রস্য পশ্চাজ্জ্ঞাতে তথাপরে || ১, ২২২. ৭ ||
যস্তত্র ভুঙ্ক্তে পক্বান্নং কৃচ্ছ্রার্ধং তস্য দাপয়েৎ |
তেষামপি চ যো ভুঙ্ক্তে কৃচ্ছ্রপাদো বিধীয়তে || ১, ২২২. ৮ ||
রজকানাঞ্চ শৈলূ ষবেণুচর্মোপজীবিনাম্ |
এতদন্নঞ্চ যো ভুঙ্ক্তে দ্বিজশ্চান্দ্রায়ণং চরেৎ || ১, ২২২. ৯ ||
চাণ্ডালকূপভাণ্ডেষু অজ্ঞানাচ্চেৎপিবেজ্জলম্ |
কুর্যাৎসান্তপনং বিপ্রস্তদর্ধঞ্চ বিশঃ স্মৃতম্ || ১, ২২২. ১০ ||
পাদং শূদ্রস্য দাতব্যমজ্ঞানাদন্ত্যবেশ্মনি |
প্রায়শ্চিত্তং ত্রিকৃচ্ছ্রং স্যাৎপরাকমন্ত্যজাগতৌ || ১, ২২২. ১১ ||
অন্ত্যজোচ্ছিষ্টভুক্চ্ছুধ্যেদ্দ্বিজশ্চান্দ্রায়ণেন চ |
চাণ্ডালন্নং যদা ভুঙ্ক্তে প্রমাদাদৈন্দবঞ্চরেৎ || ১, ২২২. ১২ ||
ক্ষত্ত্রজাতিঃ সান্তপনং ষড্দ্বিরাত্রং পরে তথা |
একবৃক্ষ তু চণ্ডালঃ প্রমাদাদ্ব্রাহ্মণো যদি |
ফলং ভক্ষয়তে তত্র অহোরাত্রেণ শুধ্যতি || ১, ২২২. ১৩ ||
ভুক্ত্বোপবিষ্টোঽনাচান্তশ্চণ্ডালং যদি সংস্পৃশেৎ |
গায়ত্ত্র্যষ্টসহস্রন্তু দ্রুপদাং বা শতং জপেৎ || ১, ২২২. ১৪ ||
চাণ্ডালশ্বপচৈর্বাপি বিণ্মূত্রে তু কৃতে দ্বিজাঃ |
প্রায়শ্চিত্তং ত্রিরাত্রং স্যাৎপরাকশ্চান্ত্যজাগতৌ || ১, ২২২. ১৫ ||
অকামতঃ স্ত্রিয়ো গৎবা পরাকস্তত্র সাধকঃ |
অন্ত্যজাতিপ্রসূতস্য প্রায়শ্চিত্তং ন বিদ্যতে || ১, ২২২. ১৬ ||
মদ্যাদিদুষ্টভাণ্ডেষু যাদপঃ পিবতি দ্বিজঃ |
কৃচ্ছ্রপাদেন শুধ্যেদ্বৈ পুনঃ সংস্কারকর্মণা || ১, ২২২. ১৭ ||
যে প্রত্যবসিতা বিপ্রা বজ্রাগ্নিপবনাদিষু |
অন্নপানাদি সঙ্গৃহ্য চিকীর্ষন্তি গৃহান্তরম্ || ১, ২২২. ১৮ ||
চারয়েত্ত্রীণি কৃচ্ছাণি ত্রীণি চান্দ্রায়ণানি বৈ |
জাতকর্মাদিসংস্কারং বসিষ্ঠো মুনিরব্রবীৎ || ১, ২২২. ১৯ ||
প্রাজাপত্যাদিভির্দ্রষ্টা স্ত্রী শুধ্যেত্তু দ্বিভোজনাৎ |
উচ্ছিষ্টোচ্ছিষ্টসংস্পৃষ্টংশুনা শূদ্রেণ বা দ্বিজঃ || ১, ২২২. ২০ ||
উপোষ্য রজনীমেকাং পঞ্চগব্যেন শুধ্যতি |
বর্ণবাহ্যেন সংস্পৃষ্টঃ পঞ্চরাত্রেণ বৈ তদা || ১, ২২২. ২১ ||
অদুষ্টাঃ সন্ততা ধারাঃ বাতোদ্ধূতাশ্চ রেণবঃ |
স্ত্রিয়ো বালাশ্চ বৃদ্ধাশ্চ ন দুষ্যন্তি কদাচন || ১, ২২২. ২২ ||
নিত্যমাস্যং শুচি স্ত্রীণাং শকুন্তৈঃ পাতিতং ফলম্ |
প্রস্ত্রবে চ শুচির্বৎসঃ শ্বা মৃগগ্রহণে শুচিঃ || ১, ২২২. ২৩ ||
উদকে চোদকস্থং তু স্থলেষু স্থলজং শুচি |
পাদৌ স্থাপ্যৌ চ তত্রৈব আচান্তঃ শুচিতামিয়াৎ || ১, ২২২. ২৪ ||
শুধ্যেত্তদ্ভস্মনা কাংস্যং সুরয়া যন্ন লিপ্যতে |
মূত্রেণ সুরয়া মিশ্রং তপনৈঃ খলু শুধ্যতি || ১, ২২২. ২৫ ||
গবাঘ্রাতানি কাংস্যানি শূদ্রোচ্ছিষ্টানি যানি চ |
কাকশ্বাপহতান্যেব শুধ্যন্তি দশ ভস্মনা || ১, ২২২. ২৬ ||
শূদ্রভাজনভোক্তা যঃ পঞ্চগব্যং ত্র্যুপোষিতঃ |
উচ্ছিষ্টং স্পৃশতে বিপ্রঃ শ্বসূদ্রশ্চাপরাধিকঃ || ১, ২২২. ২৭ ||
উপোষিতঃ পঞ্চগব্যাচ্ছুধ্যেৎস্পৃষ্ট্বা রজস্বলাম্ |
অনুদকেষু দেশেষু চোরব্যাঘ্রাকুলে পথি || ১, ২২২. ২৮ ||
কৃৎবা মূত্রপুরীষন্তু দ্রব্যহস্তো ন দুষ্যতি |
ভূমৌনিঃ ক্ষৈপ্য তদ্দ্রব্যং শৌচং কৃৎবা সমাহিতঃ || ১, ২২২. ২৯ ||
আরনালং দধি ক্ষীরং তক্রন্তু কৃসরঞ্চ যৎ |
শূদ্রাদপি চ তদ্গাহ্যং মাংসং মধু তথান্ত্যজাৎ || ১, ২২২. ৩০ ||
গৌডীং পৈষ্টীঞ্চ মাধ্বীকং বিপ্রাদির্যঃ সুরাং পিবেৎ |
সুরাং পিবন্দ্বিজঃ শুধ্যেদগ্নিবর্ণাং সুরাং পিবন্ || ১, ২২২. ৩১ ||
বিপ্রঃ পঞ্চশতং জপ্যং গায়ত্র্যাঃ ক্ষত্রিয়স্য চ শতং
বিপ্রশ্চ ভুক্ত্বান্নং পানপাত্রেণ সূতকে || ১, ২২২. ৩২ ||
শুচির্বিপ্রো দশাহেন ক্ষত্ত্রিয়ো দ্বাদশাহতঃ |
বৈশ্যঃ পঞ্চদশাহন শূদ্রো মাসেন শুধ্যতি || ১, ২২২. ৩৩ ||
রাজ্ঞাং যুদ্ধেষু যজ্ঞাদৌ দেশান্তরগতেষু চ |
বালে প্রেতে মাসিকে চ সদ্যঃ শৌচং বিধীয়তে || ১, ২২২. ৩৪ ||
অবিবাহা তথা কন্যা দ্বিজো মৌঞ্জীবিবর্জিতঃ |
জতদন্তশ্চ বালশ্চ কুমারী চ ত্রিবর্ষিকা || ১, ২২২. ৩৫ ||
তেষাং শুদ্ধিস্ত্রিরাত্রেণ গর্ভস্ত্রাবে ত্রিরাত্রিভিঃ |
সূতায়াং মাসতুল্যাশ্চ চতুর্থেঽহ্নি রজস্বলা || ১, ২২২. ৩৬ ||
দুর্ভিক্ষে রাষ্ট্রসম্পতে সূতকে মৃতকেপি বা |
নিয়মাশ্চ ন দুষ্যন্তি দানধর্মপরাস্তথা || ১, ২২২. ৩৭ ||
দক্ষিকালে বিবাহাদৌ দেবদ্বিজনিমন্ত্রিতে |
পূর্বসঙ্কল্পিতে বাপি নাশৌচং মৃতসূতকে || ১, ২২২. ৩৮ ||
প্রসূতপত্নীসংস্পর্শাদশুচিঃ স্যাত্তথা দ্বিজঃ |
অগ্নয়ো যত্র হূয়ন্তে বেদো বা যত্র পঠ্যতে || ১, ২২২. ৩৯ ||
সততং বৈশ্বদেবা দি ন তেষাং সূতকং ভবেৎ |
অশুদ্ধে চ গৃহে ভুক্তে ত্রিরাত্রাচ্ছুধ্যতি দ্বিজঃ || ১, ২২২. ৪০ ||
ব্রাহ্মণী ক্ষত্রিয়া বৈশ্যা শূদ্রা চৈব রজস্বলা |
অন্যোন্যস্পর্শনাত্তত্র ব্রাহ্মণী তু ত্রিরাত্রতঃ || ১, ২২২. ৪১ ||
দ্বিরাত্রতঃ ক্ষত্রিয়া চ শুদ্ধা বৈশ্যা হ্যুপোষিতা |
শূদ্রা স্নানেন শুধ্যেত্তু দ্রোণার্থং ন বিসর্জয়েৎ || ১, ২২২. ৪২ ||
কাকশ্বানোপনী তন্তু অন্নং বাহ্যন্তু তত্ত্যজেৎ |
সুবর্ণাদ্ভৈঃ সমভ্যুক্ষ্য হুতাশে চ প্রতাপয়েৎ || ১, ২২২. ৪৩ ||
কূপে চ পতিতান্দৃষ্ট্বা শ্বশৃগালৌ চ মর্কটম্ |
তৎকূপস্যোদকং পীৎবা শুধ্যেদ্বিপ্রস্ত্রিভির্দিনৈঃ |
ক্ষত্রিয়োঽহর্দ্বয়েনৈব বৈশ্যো বৈকাহতঃ পরম্ || ১, ২২২. ৪৪ ||
অস্থি চর্ম মলং বাপি মূষিকাং যদি কূপতঃ |
উদ্ধৃত্য চোদকং পঞ্চ গব্যাচ্ছুদ্ধ্যেত্তু শোধিতম্ || ১, ২২২. ৪৫ ||
তডাগে পুষ্করিণ্যাদৌ ভস্মাদিং পাতয়েত্তথা |
ষট্কুম্ভানপ উৎদ্ধৃয় পঞ্চগব্যেন শুধ্যতি || ১, ২২২. ৪৬ ||
স্ত্রীরজঃ পতিতং মধ্যে ত্রিংশৎকুম্ভান্সমুদ্ধরেৎ |
অগম্যাগমনং কৃৎবা মদ্যগোমাংসভক্ষণম্ || ১, ২২২. ৪৭ ||
শুধ্যে চ্চান্দ্রায়ণাদ্বিপ্রঃ প্রাজাপত্যেন ভূমিপঃ |
বৈশ্যঃ সান্তপনাচ্ছূদ্রঃ পঞ্চাহোভির্বিশুধ্যতি || ১, ২২২. ৪৮ ||
প্রায়শ্চিত্তে কৃতে দদ্যাদ্গবাং ব্রাহ্মণভোজনম্ |
ক্রীডায়াং শয়নীয়াদৌ নীলীবস্ত্রং ন দুষ্যতি || ১, ২২২. ৪৯ ||
নীলীবস্ত্রং ন স্পৃশেচ্চ নীলী চ নিরয়ং ব্রজেৎ |
ব্রহ্মঘ্নশ্চ সুরাপশ্চ স্তেয়ী চ গুরুতল্পগঃ || ১, ২২২. ৫০ ||
ঋক্ষং দৃষ্ট্বা বিশুধ্যন্তে তৎসংযোগী চ পঞ্চমঃ |
ততো ধেনুশতং দদ্যাদ্ব্রাহ্মণানান্তু ভোজনম্ || ১, ২২২. ৫১ ||
ব্রহ্মহা দ্বাদশাব্দানি কুটীং কৃৎবা বনে বসেৎ |
ন্যস্যেদাত্মানমগ্নৌ বা সুসমিদ্ধে সুরাপকঃ || ১, ২২২. ৫২ ||
স্তেয়ী সর্বং বেদবিদে ব্রাহ্মণায়োপপাদয়েৎ |
বৃষমেকং সহস্রং গাং দদ্যাচ্চ গুরুতল্পগঃ || ১, ২২২. ৫৩ ||
কৃতপাপশ্চরেদ্রোধে দ্বৌ পাদৌ বন্ধয়ন্পশোঃ |
সর্বকৃচ্ছ্রং নিপানেস্যাৎকান্তারে গৃহদাহতঃ || ১, ২২২. ৫৪ ||
কণ্ঠাভরণদোষেণ কৃচ্ছ্রপাদং মৃতে গবি |
অস্থিভঙ্গং গবাং কৃৎবা শৃঙ্গভঙ্গমথাপি বা || ১, ২২২. ৫৫ ||
ৎবগ্ভেদং পুচ্ছনাশে বা মাসার্ধং যাবকং পিবেৎ |
সর্বং হস্ত্যশ্বশস্ত্রাদ্যৈর্নিশ্চয়ং কৃচ্ছ্রমেব তু || ১, ২২২. ৫৬ ||
অজ্ঞানাৎপ্রাশ্য বিণ্মূত্রং সুরাসংস্পৃষ্টমেব চ |
পুনঃ সংস্কারমায়ান্তি ত্রয়ো বর্ণা দ্বিজাতয়ঃ || ১, ২২২. ৫৭ ||
বপনং মেখ্লা দণ্ডো ভৈক্ষ্যচর্যাব্রতানি চ |
নিবর্তন্তে দ্বিজাতীনাং পুনঃ সংস্কারকর্মণি || ১, ২২২. ৫৮ ||
আমমাংসং ঘৃতং ক্ষৌদ্রং স্নেহশ্চ কালসম্ভবাঃ |
অন্ত্যভাণ্ডস্থিতাঃ সর্বে নিষ্ক্রান্তাঃ শুচয়ঃ স্মৃতাঃ || ১, ২২২. ৫৯ ||
তৈলাদিঘৃতমাধ্বীকং পণ্যদ্রব্যং দ্রবস্তথা |
একভক্তং ক্রমান্নক্তং একৈকাহময়াচিতম্ |
উপবাসঃ পাদকৃচ্ছ্রং কৃচ্ছার্ধদ্বিগুণং হি যৎ || ১, ২২২. ৬০ ||
প্রাজাপত্যন্তু তৎস্যাচ্চ সর্বপাতকনাশনম্ |
কৃচ্ছ্রং সপ্তোপবাসৈশ্চ মহাসান্তপনং স্মৃতম্ || ১, ২২২. ৬১ ||
ত্র্যহমুষ্ণং পিবেচ্ছাপঃ ত্র্যহমুষ্ণং পয়ঃ পিবেৎ |
ত্র্যমুষ্ণং পিবেৎসর্পিস্তপ্তকৃচ্ছ্রমঘাপহম্ || ১, ২২২. ৬২ ||
দ্বাদশাহোপবাসেন পরাকঃ সর্বপাপহা |
একৈকং বর্ধয়েৎপিণ্ডং শুক্লে কৃষ্ণে চ হ্রাসয়েৎ || ১, ২২২. ৬৩ ||
পয়ঃ কাঞ্চনবর্ণায়াঃ শ্বেতবর্ণং চ গোময়ম্ |
গোমূত্রং তাম্রবর্ণায়া নীলবর্ণভবং ঘৃতম্ || ১, ২২২. ৬৪ ||
দধি স্যাৎকৃষ্ণবর্ণায়া দর্ভোদকসমায়ুতম্ |
গোমূত্রমাষকাণ্যষ্টৌ গোময়স্য চতুষ্টয়ম্ || ১, ২২২. ৬৫ ||
ক্ষীরস্য দ্বাদশ প্রোক্তা দধ্নস্তু দশ উচ্যতে |
ঘৃতস্য মাষকাঃ পঞ্চ পঞ্চগব্যং মলাপহম্ || ১, ২২২. ৬৬ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
প্রায়শ্চিতকথনং নাম দ্বাবিংশত্যধিকদ্বিশততমোঽধ্যায়ঃ

শ্রীগরুডমহাপুরাণম্-২২৩
ব্রহ্মোবাচ মুনিভিশ্চরিতা ধর্মা ভক্ত্যা ব্যাস ময়োদিতাঃ |
যৈর্বিষ্ণুস্তুষ্যতে চৈব সূর্যাদিপরিচারণাৎ || ১, ২২৩. ১ ||
তর্পণেন চ হোমেন সন্ধ্যায়া বন্দনেন চ |
প্রাপ্যতে ভগবান্বিষ্ণুর্ধর্মকামার্থমোক্ষদঃ || ১, ২২৩. ২ ||
ধর্মো হি ভগবান্বিষ্ণুঃ পূজী বিষ্ণোস্তু তর্পণম্ |
হোমঃ সন্ধ্যা তথা ধ্যানং ধারণা সকলং হরিঃ || ১, ২২৩. ৩ ||
সূচ উবাচ |
প্রলয়ং জগতো বক্ষ্যে তৎসর্বং শৃণু শৌনক |
চতুর্যুগসহস্রন্তু কল্পৈকাব্জদিনং স্মৃতম্ || ১, ২২৩. ৪ ||
কৃতত্রেতাদ্বাপরাদিয়ুগাবস্থা নিবোধমে |
কৃতে ধর্মশ্চতুষ্পাচ্চ সত্যং দানং তপো দয়া || ১, ২২৩. ৫ ||
ধর্মপাতা হরিশ্চেতি সন্তুষ্টা জ্ঞানিনো নরাঃ |
চতুর্বংষর্সহস্রাণি নরা জীবন্তি বৈ তদা || ১, ২২৩. ৬ ||
কৃতান্তে ক্ষত্ত্রিয়ৈর্বিপ্রা বিট্শূদ্রাশ্চ জিতা দ্বিজৈঃ |
শূরশ্চাতিবলো বিষ্ণূ রক্ষাংসি চ জঘান হ || ১, ২২৩. ৭ ||
ত্রেতায়ুগে ত্রিপাদ্ধর্মঃ সত্যদানদয়াত্মকঃ |
নরা যজ্ঞপরাস্তস্মিংস্তথা ক্ষত্রোদ্ভবং জগৎ || ১, ২২৩. ৮ ||
রক্তো হরির্নরৈঃ পূজ্যো নরা দশশতায়ুষঃ |
তত্র বিষ্ণুর্ভোমরথঃ ক্ষত্রিয়া রাক্ষসানহন্ || ১, ২২৩. ৯ ||
দ্বিপাদবিগ্রো ধর্মঃ পীতাঞ্চাচ্যুতে গতে |
চতুঃ শতায়ুষো লোকা দ্বিজক্ষত্রোদ্ভবাঃ প্রজাঃ || ১, ২২৩. ১০ ||
তত্র দৃষ্ট্বাল্পবুদ্ধীংশ্চ বিষ্ণুর্ব্যাসস্বরূপধৃক্ |
তদেকন্তু যজুর্বেদং? চতুর্ধা ব্যভজৎপুনঃ || ১, ২২৩. ১১ ||
শিষ্যানধ্যাপয়ামাস সমস্তাংস্তান্নিবোধ মে |
ঋগ্বেদমথ পৈলন্ত্সামবেদঞ্চ জৈমিনিম্ || ১, ২২৩. ১২ ||
অথর্বাণং সুমন্তুন্তু যজুর্বেদং মহামুনিম্ |
বৈশম্পায়নমঙ্গন্তু পুরাণং সূতমেব চ |
অষ্টাদশপুরাণানি যৈর্বেদ্যো হরিরেব হি || ১, ২২৩. ১৩ ||
সর্গশ্চ প্রতিসর্গশ্চ বংশো মন্বন্তরাণি চ |
বংশানুচরিতচ্চৈব পুরাণং পঞ্চলক্ষণম্ || ১, ২২৩. ১৪ ||
ব্রাহ্মং পাদ্মং বৈষ্ণবঞ্চ শৈবং ভাগবতন্তথা |
ভবিষ্যন্নারদীয়ঞ্চস্কান্দং লিঙ্গং বরাহকম্ || ১, ২২৩. ১৫ ||
মার্কণ্ডেয়ং তথাগ্নেয়ং ব্রহ্মবৈবর্তমেব চ |
কৌর্মং মাৎস্যং গারুডঞ্চ বায়বীয়মনন্তরম্ |
অষ্টাদশসমুদ্দিষ্টং ব্রহ্মাণ্ডমিতি সঞ্জ্ঞিতম্ || ১, ২২৩. ১৬ ||
অন্যান্যুপপুরাণানি মুনিভিঃ কথিতানি তু |
আদ্যং সনৎকুমারোক্তং নারসিংহমথাপরম্ || ১, ২২৩. ১৭ ||
তৃতীয়ং স্কান্দমুদ্দিষ্টং কুমারেণ তু ভাষিতম্ |
চতুর্থং শিবধর্মাখ্যং স্যান্নন্দীশ্বরভাষিতম্ || ১, ২২৩. ১৮ ||
দুর্বাসসোক্তমাশ্চর্যং নারদোক্তমতঃ পরম্ |
কাপিলং বামনঞ্চৈব তথৈবোশনসেরিতম্ || ১, ২২৩. ১৯ ||
ব্রহ্মাণ্ডং বারুণঞ্চাথ কালিকাহ্বয়মেব চ |
মাহেশ্বরং তথা সাম্বমেবং সর্বার্থসঞ্চয়ম্ |
পরাশরোক্তমপরং মারীচং ভার্গবাহ্বয়ম্ || ১, ২২৩. ২০ ||
পুরাণং ধর্মশাস্ত্রঞ্চ বেদাস্ত্বঙ্গানি যন্মুনে |
ন্যায়ঃ শৌনক মীমাংসা আয়ুর্বেদার্থশাস্ত্রকম্ |
গান্ধর্বশ্চ ধনুর্বেদো বিদ্যা হ্যষ্টাদশস্মৃতাঃ || ১, ২২৩. ২১ ||
দ্বাপরান্তেন চ হরির্গুরুভারমপাহরৎ |
একপাদস্থিতে ধর্মে কৃষ্ণৎবঞ্চাচ্যুতে গতে || ১, ২২৩. ২২ ||
জনাস্তদা দুরাচারা ভবিষ্যন্তি চ নির্দয়াঃ |
সত্ত্বং রজস্তম ইতি দৃশ্যন্তে পুরুষে গুণাঃ |
কালসঞ্চোদিতাস্তেঽপি পরিবর্তন্ত আত্মনি || ১, ২২৩. ২৩ ||
প্রভূতঞ্চ যদা সত্ত্বং মনো বুর্ধোন্দ্রিয়াণি চ |
তদা কৃতয়ুগং বিদ্যাজ্জ্ঞানে তপসি যদ্রতিঃ || ১, ২২৩. ২৪ ||
যদা কর্মসু কাম্যেষু শক্তির্যশসি দেহিনাম্ |
তদা ত্রেতা রজোভূতিরিতি জানীহিশৌনক || ১, ২২৩. ২৫ ||
যদা লোভস্ত্বসন্তোষো মানো দম্ভশ্চ মৎসরঃ |
কর্মণাঞ্চাপি কাম্যানাং দ্বাপরং তদ্রজস্তমঃ || ১, ২২৩. ২৬ ||
যদা সদানৃতং নন্দ্রা নিদ্রা হিংসাদিসাধনম্ |
শোকমোহৌ ভয়ং দৈন্যং স কলিস্তমসি স্মৃতঃ || ১, ২২৩. ২৭ ||
যস্মিঞ্জনাঃ কামিনঃ স্যুঃ শশ্বৎকটুকভাষিণঃ |
দস্যূৎকৃষ্টা জনপদাবেদাঃ পাষণ্ডদূষিতাঃ || ১, ২২৩. ২৮ ||
রাজানশ্চ প্রজাভিক্ষাঃ শিশ্রোদরপরাজিতাঃ |
অব্রতা বটচবোঽশৌচা ভিক্ষবশ্চ কুটুম্বিনঃ || ১, ২২৩. ২৯ ||
তপস্বিনোগ্রামবাসাঃ ন্যাসিনো হ্যর্থলোলুপাঃ |
হ্রস্বকায়া মহাহারাশ্চৌরাস্তে সাধবঃ স্মৃতাঃ || ১, ২২৩. ৩০ ||
ত্যক্ষ্যন্তি ভৃত্যাশ্চ পতিং তাপসস্ত্যক্ষ্যতি ব্রতম্ |
শূদ্রাঃ প্রতিগ্রহিষ্যন্তি বৈশ্যা ব্রতপরায়ণঃ || ১, ২২৩. ৩১ ||
উদ্বিগ্নাঃ সন্তি চ জনাঃ পিশাচসদৃশাঃ প্রজাঃ |
অন্যায়ভোজনেনাগ্নিদেবতাতিথিপূজনম্ || ১, ২২৩. ৩২ ||
করিষ্যেন্তি কলৌ প্রাপ্তে ন চ পিত্র্যোদকক্রিয়াম্ |
স্ত্রীপরাশ্চ জনাঃ সর্বে শূদ্রপ্রায়াশ্চ শৌনক || ১, ২২৩. ৩৩ ||
বহুপ্রজাল্পভাগ্যাশ্চ ভবিষ্যন্তি কলৌ স্ত্রিয়ঃ |
শিরঃ কণ্ডূয়নপরা আজ্ঞাং ভেৎস্যন্তি ভর্ত্সিতাঃ || ১, ২২৩. ৩৪ ||
বিষ্ণুং ন পূজয়িষ্যন্তি পাষণ্ডোপহতা জনাঃ |
কলের্দেষনিধের্বিপ্রা অস্তি হ্যেকো মহাগুণঃ || ১, ২২৩. ৩৫ ||
কীর্তনাদেব কৃষ্ণস্য মহাবন্ধং পরিত্যজেৎ |
কৃতে যদ্য্যায়তো বিষ্ণুং ত্রেতায়াং জপতঃ ফলম্ || ১, ২২৩. ৩৬ ||
দ্বাপরে পরিচর্যায়াং কলৌ তদ্ধরিকীর্তনাৎ |
তস্মাদ্ধ্যেয়ো হরির্নিত্যং গেয়ঃ পূজ্যশ্চ শৌনক || ১, ২২৩. ৩৭ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
যুগধর্মকথনং নাম ত্রয়োবিংশত্যধিকদ্বিশততমোঽধ্যায়ঃ

শ্রীগরুডমহাপুরাণম্-২২৪
সূত উবাচ |
চতুর্যুগসহস্রান্তে ব্রাহ্মো নৈমিত্তিকো লয়ঃ |
অনাবৃষ্টিশ্চ কল্পান্তে জায়তে শতবার্ষিকী || ১, ২২৪. ১ ||
উতিষ্ঠন্তি তদা রৌদ্রা দিবি সপ্ত দিবাকরাঃ |
তে তু পীৎবা জলং সর্বং শোষয়ন্তি জগত্ত্রয়ম্ || ১, ২২৪. ২ ||
ভূর্ভুবঃ স্বর্মহর্লোকং চরাচরং জনস্তথা |
বিষ্ণুশ্চ রুদ্রো ভূৎবাসৌ পাতালানি দহত্যধঃ || ১, ২২৪. ৩ ||
বিষ্ণুর্দহেত্ত্রিলোকঞ্চি মুখান্মেঘান্সৃজত্যলম্ |
বর্ষন্তে বৈ বর্ষশতং নানাবর্ণা মহাঘনাঃ || ১, ২২৪. ৪ ||
বিষ্ণুরূপঃশতং বাতি বর্ষাণাং বায়ুরূর্জিতঃ |
বিষ্ণুরে কার্ণবী ভূতে বর্ষে ব্রহ্মস্বরূপধৃক্ |
শেতেঽনন্তাসনে বিষ্ণুর্নষ্টে স্থাবরজঙ্গমে || ১, ২২৪. ৫ ||
সুপ্ত্বা বর্ষসহস্রং স জগদ্ভূয়োঽসৃজদ্ধরিঃ |
অথ প্রাকৃতিকং বক্ষ্যে প্রলয়ং শৃণু শৌনক || ১, ২২৪. ৬ ||
পূর্ণে সংবৎসরশতে সংহৃত্য সকলং জগৎ |
ব্রহ্মাণং ন্যস্য দেহে হি মুক্তো যোগবলৈর্হরিঃ || ১, ২২৪. ৭ ||
যে গতা ব্রহ্মণঃ স্থানং তেঽপি যান্তি পরং পদম্ |
অনাবৃষ্ট্যর্কসম্পন্না আসন্মেঘাস্তথা দ্বিজ |
শতং বর্ষাণি বর্ষদ্ভির্মেধৈরণ্ডং প্রপূর্যতে || ১, ২২৪. ৮ ||
অন্তর্গতেন তোয়েন ভিন্নমণ্ডং জগৎপতেঃ |
পূর্ণে ব্রহ্মায়ুষি গতে ভিদ্যতেঽম্ভসি লীয়তে || ১, ২২৪. ৯ ||
এবং সা জগদাধারা তোয়ে চোর্বো প্রলীয়তে |
আপস্তেজসি লীয়ন্তে তেজো বায়ৌ প্রলীয়তে || ১, ২২৪. ১০ ||
বায়ুঃ খে খঞ্চ ভূতাদৌ বিশতে চ তদা মহান্ |
মহান্প্রপদ্যতেঽব্যক্তং প্রকৃতিঃ পুরুষে পরে || ১, ২২৪. ১১ ||
শতবর্ষং হরিঃ শেতে সৃজত্যথ দিনগমে |
অব্যক্তাদিক্রমেণৈব ব্যক্তীভূতং চরাচরম্ || ১, ২২৪. ১২ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
নৈমিত্তিকপ্রলয়োনাম চতুর্বিংশত্যধিকদ্বিশততমোঽধ্যায়ঃ

শ্রীগরুডমহাপুরাণম্-২২৫
সূত উবাচ |
আধ্যাত্মিকাদিতাপাংস্ত্রীঞ্জ্ঞাৎব সংস্রাচক্রবিৎ |
উৎপন্নজ্ঞানবৈরাগ্যঃ প্রাপ্নোত্যাত্যন্তিকং লয়ম্ || ১, ২২৫. ১ ||
সংসারচক্রং বক্ষ্যেঽহমাদাবুৎক্রান্তিকালতঃ |
যদ্বিনা পুরুষার্থো ন লীনঃ স্যাৎপরমাত্মনি || ১, ২২৫. ২ ||
ঊর্ধ্ববাসী নরস্ত্যক্ত্বা দেহমন্যৎপ্রপদ্যতে |
নীয়তেদ্বাদশাহেন যমস্য যমপূরুষৈঃ || ১, ২২৫. ৩ ||
তত্র যদ্বান্ধবাস্তোয়ং প্রয়চ্ছন্তি তিলৈঃ সহ |
যচ্চ পিণ্ডং প্রয়চ্ছন্তি যমলোকে তদশ্নুতে || ১, ২২৫. ৪ ||
গতশ্চ নরকং পাপাৎস্বর্গং যাতি স্বপুণ্যতঃ |
পাপকৃদ্যাতি নরকং পুণ্যকৃদ্যাতি বৈ দিবম্ || ১, ২২৫. ৫ ||
স্বর্গাচ্চ নরকাত্ত্যক্তঃ স্ত্রীণাং গর্ভে ভবত্যপি |
নাভিভূতঞ্চ তস্যৈব যাতি বীজদ্বয়ং হি তৎ || ১, ২২৫. ৬ ||
কললং বুদ্ব্রুদময়ং ততঃ শোণিতমেব চ |
পেশ্যাঃ পলসমোঽণ্ডঃ স্যাদঙ্কুরং তত উচ্যতে || ১, ২২৫. ৭ ||
উপাঙ্গান্যঙ্গুলীনেত্রনাসাস্যশ্রবণানি চ |
আবহং যাতি চাঙ্গেভ্যস্তৎপরন্তু নখাদিকম্ || ১, ২২৫. ৮ ||
ৎবচো রোমাণি জায়ন্তে কেশাশ্চৈব ততঃ পরম্ |
নরশ্চাধোমুখঃ স্থিৎবা দশমে চ সঃ জায়তে || ১, ২২৫. ৯ ||
ততস্তু বৈষ্ণবী মায়া বৃণোত্যত্যন্তমোহিনী |
বালৎবং ৎবথ কৌমারং যৌবনং বৃদ্ধতামপি || ১, ২২৫. ১০ ||
ততশ্চ মরণং তত্তদ্ধর্মামাপ্নোতি মানবঃ |
এবং সংসারচক্রেঽস্মিন্ভ্রাম্যতে ঘটীয়ন্ত্রবৎ || ১, ২২৫. ১১ ||
নরকাৎপ্রতিমুক্তস্তু পাপয়োনিষু জায়তে |
পতিতাৎপ্রতিগৃহ্যাথ অধোয়োনিং ব্রজেদ্বুধঃ || ১, ২২৫. ১২ ||
নরকাৎপ্রতিমুক্তস্তু কৃমির্ভবতি যাচকঃ |
উপাধ্যায়ব্যলীকং তু কৃৎবা শ্বা ভবতি দ্বিজ || ১, ২২৫. ১৩ ||
তজ্জায়াং মনসা বাঞ্ছংস্তদ্দ্রব্যং বাপ্যসংশয়ম্ |
গর্দভোজায়তে জন্তুর্মিত্রস্যৈবাপমানকৃৎ || ১, ২২৫. ১৪ ||
পিতরৌ পীডয়িৎবা তু কচ্ছপৎবঞ্চ জায়তে |
ভুর্তুঃ পিণ্ডমুপাশ্বস্তো বঞ্জয়িৎবা তমেব যঃ || ১, ২২৫. ১৫ ||
সোঽপি মোহসমাপন্নো জায়তে বানরো মৃতঃ |
ন্যাসাপহর্তা নরকাদ্বিমুক্তো জায়তে কৃমিঃ || ১, ২২৫. ১৬ ||
অসূয়কশ্চ নরকান্মুক্তো ভবতি রাক্ষসঃ |
বিশ্বাসহর্তা চ নরো মীনয়োনৌ প্রজায়তে || ১, ২২৫. ১৭ ||
যবধান্যানি সংহৃত্য জায়তে মূষকো মৃতঃ |
পরদারাভিমর্শাত্তু বৃকো ঘোরোঽভিজায়তে || ১, ২২৫. ১৮ ||
ভ্রাতৃভার্যাপ্রসঙ্গেন কোকিলো জায়তে নরঃ |
গুর্বাদিভার্যাগমনাচ্ছূকরো জায়তে নরঃ || ১, ২২৫. ১৯ ||
যজ্ঞদানবিবাহানাং বিঘ্নকর্তা ভবেৎকৃমিঃ |
দেবতাপিতৃবিপ্রাণামদত্ত্বা যোঽন্নমশ্নুতে || ১, ২২৫. ২০ ||
প্রমুক্তো নরকাদ্বাপি বায়সঃ সন্প্রজায়তে |
জ্যেষ্ঠভ্রাত্রপমানাচ্চ ক্রৌঞ্চয়োনৌ প্রজায়তে || ১, ২২৫. ২১ ||
শূদ্রস্তু ব্রাহ্মণীং গৎবা কৃমিয়োনৌ প্রজায়তে |
তস্যামপত্যমুৎপাদ্য কাষ্ঠান্তঃ কটীকো ভবেৎ || ১, ২২৫. ২২ ||
কৃতঘ্নঃ কৃমিকঃ কীটঃ পতঙ্গো বৃশ্চিকস্তথা |
অশস্ত্রং পুরুষং হর্তা নরঃ সঞ্জায়তে খরঃ || ১, ২২৫. ২৩ ||
কৃমিঃ স্ত্রীবধকর্তা চ বালহন্তা চ জায়তে |
ভোজনঞ্চোরয়িৎবা তু মক্ষিকা জায়তে নরঃ || ১, ২২৫. ২৪ ||
হৃৎবাজ্যঞ্চৈব মার্জারস্তিলহৃচ্চৈব মূষকঃ |
ঘৃতং হৃৎবা চ নকুলঃ কাকো মদ্ভুরমামিষম্ || ১, ২২৫. ২৫ ||
মধু হৃৎবা নরো দংশ-পূপং হৃৎবা পিপীলিকঃ |
অপো হৃৎবা তু পাপাত্মা বায়সঃ সম্প্রজায়তে || ১, ২২৫. ২৬ ||
হৃতে কাষ্ঠে চ হারীতঃ কপোতো বা প্রজায়তে |
হৃৎবা তু কাঞ্চনং ভাণ্ডং কৃমিয়োনৌ প্রজায়তে || ১, ২২৫. ২৭ ||
কার্পাসিকে হৃতে ক্রৌঞ্চো বহ্রিহর্তা বকস্তথা |
ময়ূরো বর্ণকং হৃৎবা শাকপত্রঞ্চ জায়তে || ১, ২২৫. ২৮ ||
জীবঞ্জীবকতাং যাতি রক্তবস্ত্বপহৃন্নরঃ |
ছুছুন্দরিঃ শুভান্গন্ধাঞ্ছশং হৃৎবা শশো ভবেৎ || ১, ২২৫. ২৯ ||
ষণ্ডাঃ কলাপহরণে কাষ্ঠহৃত্তৃণকীটকঃ |
পুষ্পং হৃৎবা দরিদ্রস্তু পঙ্গুর্যাচকহৃন্নরঃ || ১, ২২৫. ৩০ ||
শাকহর্তা চ হারীতস্তোয়হর্তা চ চাতকঃ |
গৃহহৃন্নরকান্গৎবা রৌরবাদীন্সুদারুণান্ || ১, ২২৫. ৩১ ||
তৃণগুল্মলতাবল্লীৎবগ্ঘারী তরুতাং ব্রজেৎ |
এষ এব ক্রমো দৃষ্টো গোসুবর্ণাদিহারিণাম্ || ১, ২২৫. ৩২ ||
বিদ্যাপহারী মূকঃ স্যাদ্গৎবা চ নরকান্বহন্ |
অসমিদ্ধে হুতে চাগ্নৌ মন্দাগ্নিঃ খলু জায়তে || ১, ২২৫. ৩৩ ||
পরনিন্দা কৃতঘ্নৎবং পরসীমাভিঘাতনম্ |
নৈষ্ঠুর্যং নির্ঘৃণৎবঞ্চ পরদারোপসেবনম্ || ১, ২২৫. ৩৪ ||
পরস্বহরণাশৌচং দেবতানাং চ কুৎসনম্ |
নিকৃত্য বন্ধনং নৄণাং কার্পণ্যঞ্চ নৃণাং বধঃ |
উপলক্ষণাদ্বিজানীয়ান্মুক্তানাং নরকাদনু || ১, ২২৫. ৩৫ ||
দয়া ভূতেষু সংবাদঃ পরলোকং প্রতি ক্রিয়া |
সত্যং হিতার্থমুক্তিশ্চ বেদপ্রামাণ্যদর্শনম্ || ১, ২২৫. ৩৬ ||
গুরুদেবর্ষিসিদ্ধর্ষিসেবনং সাধুসংযমঃ |
সৎক্রিয়াষ্বসনং মৈত্রী স্বর্গস্য লক্ষণং বিদুঃ |
অষ্টাঙ্গয়োগবিজ্ঞানাৎপ্রাপ্নোত্যাত্যন্তিকং ফলম্ || ১, ২২৫. ৩৭ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
কর্মবিপাকাদিকথনং নাম পঞ্চবিংশত্যধিকদ্বিশততমোঽধ্যায়ঃ

শ্রীগরুডমহাপুরাণম্-২২৬
সূত উবাচ বক্ষ্যে সাঙ্গং মহায়োগং ভুক্তিমুক্তিকরং পরম্ |
সর্বপাপপ্রশমনং ভক্ত্যানুপঠিতং শৃণু || ১, ২২৬. ১ ||
মমেতি মূলং দুঃখস্য ন মমেতি নিবর্তনম্ |
দত্তাত্রেয়ো হ্যলর্কায় ইমমাহ মহামতিঃ || ১, ২২৬. ২ ||
অহমিত্যঙ্কুরোৎপন্নো মমেতি স্কন্ধবান্মহান্ |
গৃহক্ষেত্রাণি শাখাশ্চ যত্র দারাভিপল্লবঃ || ১, ২২৬. ৩ ||
ধনধান্যে মহাপত্রে পাপমূলোঽতিদুর্গমঃ |
বিধিবৎসুখশান্ত্যর্থং জাতোঽজ্ঞানমহাতরুঃ || ১, ২২৬. ৪ ||
ছিন্নো বিদ্যাকুঠারেণ তে গতা লয়মীশ্বরে |
প্রাপ্য ব্রহ্মরসং পীতং নীরজস্কমকণ্টকম্ || ১, ২২৬. ৫ ||
প্রাপ্নুবন্তি পরাঃ প্রাজ্ঞাঃ সুখনির্বৃতিমেব চ |
মূর্তেন্দ্রিয়লয়ং নূনং ন ৎবং রাজন্ন চাপ্যহম্ || ১, ২২৬. ৬ ||
ন তন্মাত্রাদিকং বাচা নৈবান্তঃ করণং তথা |
কং বা পশ্যসি রাজেন্দ্র প্রধানমিদমাবয়োঃ || ১, ২২৬. ৭ ||
মৃতঃ পরেঽহ্নি ক্ষেত্রজ্ঞঃ সঞ্জাতোঽযং গুণাত্মকঃ |
একৎবেঽপি পৃথগ্ভাবস্তথা ক্ষেত্রাত্মনো নৃপ || ১, ২২৬. ৮ ||
জ্ঞানপূর্ববিয়োগোঽসৌ জ্ঞানে নষ্টে চ যোগিনঃ |
সা মুক্তির্ব্রহ্মণা চৈক্য মনৈক্যং প্রাকৃতৈর্গুণৈঃ || ১, ২২৬. ৯ ||
তদ্গৃহং যত্র বসতি তদ্ভোজ্যং যেন জীবতি |
যন্মুক্তয়ে তদেবোক্তং জ্ঞানাজ্ঞানে ন চান্যথা || ১, ২২৬. ১০ ||
উপভোগেন পুণ্যানা মপুণ্যানাঞ্চ পার্থিব |
কর্তব্যানাঞ্চ নিত্যানাং ক্ষয়ন্ত্বকরণাত্তথা || ১, ২২৬. ১১ ||
অহিংসা সত্যমস্তেয়ং ব্রহ্মচর্যাপরিগ্রহৌ |
যমাঃ পঞ্চাথ নিয়মাঃ শৌচং দ্বিবিধমীরিতম্ || ১, ২২৬. ১২ ||
সন্তোষস্তপসা শান্তির্বাসুদেবার্চনং দমঃ |
আসন পদ্মকাদ্যুক্তং প্রাণায়ামো মরুজ্জয়ঃ || ১, ২২৬. ১৩ ||
প্রত্যেকং ত্রিবিধঃ সোঽপি পূরকুম্ভকরেচকৈঃ |
লঘুর্যো দশমাত্রস্তু দ্বিগুণঃ স তু মধ্যমঃ || ১, ২২৬. ১৪ ||
ত্রিগুণাভিস্তু মাত্রাভিরুত্তমঃ স উদাহৃতঃ |
জপধ্যানয়ুতৌ গর্ভো বিপরীতস্ত্বর্ভকঃ || ১, ২২৬. ১৫ ||
প্রথমে নজয়েৎস্বপ্নং মধ্যমেন চ বেপথুম্ |
বিপাকং হি তৃতীয়েন জাতান্দোষাস্ত্বনুক্রমাৎ || ১, ২২৬. ১৬ ||
আসনস্থন্তুয়ুঞ্জীত কৃৎবা চ প্রণবং হৃদী |
পার্ষ্ণিভ্যাং লিঙ্গবৃষণৌ স্পর্শন্নকাগ্রমানসঃ || ১, ২২৬. ১৭ ||
রজসা তমসো বৃত্তিং সত্ত্বেন রজসস্তথা |
নিরুধ্য নিশ্চলো ভূৎবা স্থিতো যুঞ্জীত যোগবিৎ || ১, ২২৬. ১৮ ||
ইন্দ্রিয়াণীন্দ্রিয়ার্থেভ্যঃ প্রাণাদীনম্ন এব চ |
নিগৃহ্য সমবায়েন প্রত্যাহার মুপক্রমেৎ || ১, ২২৬. ১৯ ||
প্রাণায়ামা দশাষ্টৌ চ ধারণা সা বিধীয়তে |
দ্বে ধারণে স্মৃতো যোগো যোগিভিস্তত্ত্বদর্শিভিঃ || ১, ২২৬. ২০ ||
প্রাঙ্নাড্যাং হৃদয়ে চাত্র তৃতীয়া চ তথোরসি |
কণ্ঠে মুখে না সিকাগ্রে নেত্রে ভ্রূমধ্যমূর্ধসু || ১, ২২৬. ২১ ||
কিঞ্চিত্তস্মাৎপরস্মিংশ্চ ধারণা দশধা স্মৃতা |
দশৈতা ধারণাঃ প্রাপ্য প্রাপ্নোত্যক্ষররূপতাম্ || ১, ২২৬. ২২ ||
যথাগ্নিরগ্নৌ সঙ্ক্ষিপ্তস্তথাত্মা পরমাত্মনি |
ব্রহ্মরূপং মহাপুণ্যমোমিত্যেকাক্ষরং জপেৎ || ১, ২২৬. ২৩ ||
অকারশ্চ তথোকারো মকারশ্চাক্ষরত্রয়ম্ |
এতাস্তিস্ত্রস্ততো মাত্রাঃ সত্ত্বরাজসতামসাঃ || ১, ২২৬. ২৪ ||
নির্গুণা যোগিগম্যাদ্যার্ধমাত্রা পরা স্থিতা |
গান্ধারীতি চ বিজ্ঞেয়া গান্ধারস্বরসংশ্রয়া |
ইত্যেতদক্ষরং ব্রহ্ম পরমোঙ্কারসঞ্জ্ঞিতম্ || ১, ২২৬. ২৫ ||
অহং ব্রহ্ম পরং জ্যোতিঃ স্থূলদেহবিবর্জিতম্ |
অহং ব্রহ্ম পরং জ্যোতির্জরামরণবর্জিতম্ || ১, ২২৬. ২৬ ||
অহং ব্রহ্ম পরং জ্যোতিঃ পৃথিব্যা মলবর্জিতম্ |
অহং ব্রহ্ম পরং জ্যোতির্বায়্বাকাশবিবর্জিতম্ || ১, ২২৬. ২৭ ||
অহং ব্রহ্ম পরং জ্যোতিঃ সূক্ষ্মদেহবিবর্জিতম্ |
অহং ব্রহ্মপরং জ্যোতিঃ স্থানাস্থানবিবর্জিতম্ || ১, ২২৬. ২৮ ||
অহং ব্রহ্ম পরং জ্যোতির্গন্ধমাত্রবিবর্জিতম্ |
অহং ব্রহ্ম পরং জ্যোতিঃ শ্রোত্রৎবক্পরিবর্জিতম্ || ১, ২২৬. ২৯ ||
অহং ব্রহ্ম পরং জ্যোতির্জিহ্বাঘ্রাণবিবর্জিতম্ |
অহং ব্রহ্ম পরং জ্যোতিঃ প্রাণাপানবিবর্জিতম্ || ১, ২২৬. ৩০ ||
অহং ব্রহ্ম পরং জ্যোতির্ব্যানোদানবিবর্জিতম্ |
অহং ব্রহ্ম পরং জ্যোতিরজ্ঞানপরিবর্জিতম্ || ১, ২২৬. ৩১ ||
অহং ব্রহ্ম পরং জ্যোতিস্তুরীয়ং পরমং পদম্ |
দেহেন্দ্রিয়মনোবুদ্ধিপ্রাণাহঙ্কারবর্জিতম্ || ১, ২২৬. ৩২ ||
নিত্যশুদ্ধবুদ্ধমুক্তমহামানন্দমদ্বয়ম্ |
অহং ব্রহ্ম পরং জ্যোতির্জ্ঞানরূপো বিমুক্তয়ে || ১, ২২৬. ৩৩ ||
সূত উবাচ |
ইত্যষ্টাঙ্গো ময়া যোগ উক্তঃ শৌনক মুক্তিদঃ |
নিত্যনৈমিত্তিকং গৎবা লয়ং প্রাকৃতবন্ধনাঃ || ১, ২২৬. ৩৪ ||
উৎপদ্যন্তে হি সংসারে নৈকং যাৎবা পরাত্মনাম্ |
বিমুচ্যতে বিমুক্তশ্চ জ্ঞানাদজ্ঞানমোহিতঃ || ১, ২২৬. ৩৫ ||
ততো নং ম্রিয়তে দুঃখী ন রোগী ন চ বন্ধবান্ |
ন পাপৈর্যুজ্যতে যোগী নরকে ন বিপচ্যতে || ১, ২২৬. ৩৬ ||
গর্ভবাসে স নো দুঃখী স স্যান্নারায়ণোঽব্যয়ঃ |
ভক্ত্যা ৎবনন্যয়া লভ্যো ভগবান্ভুক্তিমুক্তিদঃ || ১, ২২৬. ৩৭ ||
ধ্যানেন পূজয়া জপ্যৈঃ সম্যক্স্তোত্রৈর্যতব্রতৈঃ |
যজ্ঞৈর্দানৈশ্চিত্তশুদ্ধিস্তয়া জ্ঞানঞ্চ লভ্যতে || ১, ২২৬. ৩৮ ||
প্রণবাদিকমন্ত্রৈশ্চ জপ্যৈর্মুক্তিং গতা দ্বিজাঃ |
ইন্দ্রোঽপি পরমং স্থানং গন্ধর্বাপ্সরসো বরাঃ || ১, ২২৬. ৩৯ ||
প্রাপ্তা দেবাশ্চ দেবৎবং মুনিৎবং মুনয়ো গতাঃ |
গন্ধর্বৎবঞ্চ গন্ধর্বা রাজৎবঞ্চ নৃপাদয়ঃ || ১, ২২৬. ৪০ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
অষ্টাঙ্গয়োগকথনং নাম ষড্বিংশত্যধিকদ্বিশততমোঽধ্যায়ঃ

শ্রীগরুডমহাপুরাণম্-২২৭
সূত উবাচ |
বিষ্ণুভক্তিং প্রবক্ষ্যামি যয়া সর্বমবাপ্যতে |
যথা ভক্ত্যা হরিস্তুষ্যেত্তথা নান্যেন কেনচিৎ || ১, ২২৭. ১ ||
মহতঃ শ্রেয়সো মূলং প্রসবঃ পুণ্যসন্ততেঃ |
জীবিতস্য ফলং স্বাদু নিয়তং স্মরণং হরেঃ || ১, ২২৭. ২ ||
তস্মাৎসেবা বুধৈঃ প্রোক্তা ভক্তিসাধনভূয়সী |
তে ভক্তা লোকনাথস্য নামকর্মাদিকীর্তনে || ১, ২২৭. ৩ ||
মুঞ্চন্ত্যশ্রূণি সংহর্ষাদ্যে প্রহৃষ্টনূরুহাঃ |
জগদ্ধাতুর্মহেশস্য দিব্যাজ্ঞাচরণা বয়ম্ || ১, ২২৭. ৪ ||
ইহ নিত্যক্রিয়াঃ কুর্যুঃ স্নিগ্ধা যে বৈষ্ণবাস্তু তে |
ব্রহ্মাক্ষরং ন শৃণ্বন্বৈ তয়া ভগবতেরিতম্ || ১, ২২৭. ৫ ||
প্রণামপূর্বকং ভক্ত্যা যো বদেদ্বৈষ্ণবো হি সঃ |
তদ্ভক্তজনবাৎসল্যং পূজনং চানুমোদনম্ || ১, ২২৭. ৬ ||
তৎকথাশ্রবণে প্রীতিরশ্রুনেত্রাঙ্গবিক্রিয়াঃ |
যেন সর্বাত্মনা বিষ্ণৌ ভক্ত্যা ভাবো নিবেশিতঃ || ১, ২২৭. ৭ ||
বিপ্রেভ্যশ্চ কৃতাত্মৎবান্মহাভাগবতো হি সঃ |
বিশ্বোপকরণং নিত্যং তদর্থং সঙ্গবর্জনম্ |
স্বয়মভ্যর্চনঞ্চৈব যো বিষ্ণুঞ্চোপজীবতি || ১, ২২৭. ৮ ||
ভক্তিরষ্টবিধা হ্যেষা যস্মিন্ম্লেচ্ছোঽপি বর্ততে |
স বিপ্রেন্দ্রো মুনিঃ শ্রীমান্স যাতি পরমাং গতিম্ || ১, ২২৭. ৯ ||
তস্মৈ দেয়ং ততো গ্রাহ্যং স চ পূজ্যো যথা হরিঃ |
স্মৃতঃ সম্ভাষিতো বাপি পূজিতো বা দ্বিজোত্তমঃ |
পুনাতি ভগবদ্ভক্তশ্চণ্ডালোঽপি যদৃচ্ছয়া || ১, ২২৭. ১০ ||
দয়াং কুরু প্রপন্নায় তবাস্মীতি চ যো বদেৎ |
অভয়ং সর্বভূতেভ্যো দদ্যাদেতদ্ব্রতং হরেঃ || ১, ২২৭. ১১ ||
মন্ত্রজাপিসহস্রেভ্যঃ সর্ববেদান্তপারগঃ |
সর্ববেদান্তবিৎকোট্যাং বিষ্ণুভক্তো বিশিষ্যতে || ১, ২২৭. ১২ ||
একান্তিনঃ স্ববপুষা গচ্ছন্তি পরমং পদম্ |
একান্তেন সমো বিষ্ণুস্তস্মাদেষাং পরায়ণঃ || ১, ২২৭. ১৩ ||
যস্মাদেকান্তিনঃ প্রোক্তাস্তদ্ভাগবতচেতসঃ |
প্রিয়াণামপি সর্বেষাং দেবদেবস্য সুপ্রিয়ঃ || ১, ২২৭. ১৪ ||
আপৎস্বপি সদা ভস্য ভক্তিরব্যভিচারিণা |
যা প্রীতিরধিকা বিষ্ণোর্বিষয়েষ্বনপায়িনী || ১, ২২৭. ১৫ ||
বিষ্ণুং সংস্মরতঃ সা মে হৃদয়ান্নোপসর্পতি |
দৃঢভক্তোঽপি বেদাদিসর্বশাস্ত্রার্থপারগঃ || ১, ২২৭. ১৬ ||
যো ন সর্বেশ্বরে ভক্তস্তং বিদ্যাৎপুরুষাধমম্ |
নাধীতবেদশাস্ত্রোঽপি ন কৃতোঽধ্বরসম্ভবঃ |
যো ভক্তিং বহতে বিষ্ণৌ তেন সর্বং কৃতং ভবেৎ || ১, ২২৭. ১৭ ||
যজ্বানঃ ক্রতুমুখ্যানাং বেদানাং পারগা অপি |
ন তাং যান্তি গতিং ভক্তা যাং যান্তি মুনিসত্তমাঃ || ১, ২২৭. ১৮ ||
যঃ কশ্চিদ্বৈষ্ণবো লোকে মিথ্যাচারোঽপ্যনাশ্রমী |
পুনাতি সকলাংল্লোকান্সহস্রাংশুরিবোদিতঃ || ১, ২২৭. ১৯ ||
যে নৃশংসা দুরাত্মানঃ পাপাচররতাস্তথা |
তেঽপি যান্তি পরং স্থানং নারায়ণপরায়ণাঃ || ১, ২২৭. ২০ ||
দৃঢা জনার্দনে ভক্তির্যদৈবাব্যভিচারিণী |
তদা কিয়ৎস্বর্গসুখং সৈব নির্বাণহেতুকা || ১, ২২৭. ২১ ||
ভ্রাম্যতাং তত্র সংসারে নরাণাং কুর্মদুর্গমে |
হস্তাবলম্বনে হ্যেকং যেন তুষ্যেজ্জনার্দনঃ |
ন শৃণোতি গুণান্দিব্যান্দেবদেবস্য চক্রিণঃ |
স মরো বধিরো জ্ঞেয়ঃ সর্বধর্মবহিষ্কৃতঃ || ১, ২২৭. ২২ ||
নাম্নি সঙ্কীর্তিতে বিষ্ণোর্যস্য পুংসো ন জায়তে |
শরীরং পুলকোদ্ভাসি তদ্ভবেৎকুণপোপমম্ || ১, ২২৭. ২৩ ||
যস্মিন্ভক্তির্দ্বিজশ্রেষ্ঠ মুক্তিরপ্যচিরাদ্ভবেৎ |
নিবিষ্টমনসাং পুংসাং সর্বথা বৃজিনক্ষয়ঃ || ১, ২২৭. ২৪ ||
স্বপুরুষমভিবীক্ষ্য পাশহস্তং বদতি যমঃ কিল তস্য কর্ণমূলে |
পরিহর মধুসূদনপ্রাপন্নন্প্রভুরহমন্যনৃণাং ন বৈষ্ণবানাম্ || ১, ২২৭. ২৫ ||
অপি চেৎসুদুরাচারো ভজতে মামনন্যভাক্ |
সাধুরেব স মন্তব্যঃ সম্যগব্যবসিতো হি সঃ || ১, ২২৭. ২৬ ||
ক্ষিপ্রং ভবতি ধর্মাত্মা শশ্বচ্ছান্তিং স গচ্ছতি |
বিপ্রেন্দ্র প্রতিজানীহি বিষ্ণুভক্তো ন নশ্যতি || ১, ২২৭. ২৭ ||
ধর্মার্থকামঃ কিং তস্য মুক্তিস্তস্য করে স্থিতা |
সমস্তজগতাং মূলং যস্য ভক্তিঃ স্থিরা হরৌ || ১, ২২৭. ২৮ ||
দৈবী হ্যেষা গুণময়ী হরের্মায়া দুরত্যয়া |
তমেব যে প্রপদ্যন্তে মায়ামেতাং তরন্তি তে || ১, ২২৭. ২৯ ||
কিং যজ্ঞারাধনে পুংসা শিষ্যতে হরিমেধসাম্ |
ভক্ত্যৈবারাধ্যতে বিষ্ণুর্নান্যত্তত্রোপকারকম্ || ১, ২২৭. ৩০ ||
ন দানৈর্বিবিধৈর্দত্তৈঃ পুষ্পৈর্নৈবানুলেপনৈঃ |
তোষমেতি মহাত্মাসৌ যথা ভক্ত্যা জনার্দনঃ || ১, ২২৭. ৩১ ||
সংসারবিষবৃক্ষস্য দ্বে ফলে হ্যমৃতোপমে |
কদাচিৎকেশবে ভক্তিস্তদ্ভক্তৈর্বা সমাগমঃ || ১, ২২৭. ৩২ ||
পত্রেষু পুষ্পেষু ফলেষু তোয়েষ্বকষ্টলভ্যেষু সদৈব সৎসু |
ভক্ত্যৈকলভ্যে পুরুষে পুরাণে মুক্ত্যৈকলাভে ক্রিয়তে প্রয়ত্নঃ || ১, ২২৭. ৩৩ ||
আস্ফোটয়ন্তি পিতরঃ প্রনৃত্যন্তি পিতামাহঃ |
বৈষ্ণবোস্মৎকুলে জাতঃ স নঃ সন্তারয়িষ্যতি || ১, ২২৭. ৩৪ ||
অজ্ঞানিনঃ সুখরে সমধিক্ষিপন্তো যৎপাপিনোঽপি শিশুপালসুয়োধনাদ্যাঃ |
মুক্তিং গতাঃ স্মরণমাত্রবিধূতপাপাঃ কঃ সংশয়ঃ পরমভক্তিমতাং জনানাম্ || ১, ২২৭. ৩৫ ||
শরমং তং প্রপন্না যে ধ্যানয়োগবিবর্জিতাঃ |
তেঽপি মৃত্যুমতিক্রম্য যান্তি তদ্বৈষ্ণবং পদম্ || ১, ২২৭. ৩৬ ||
ভবোদ্ভবক্লেশশতৈর্হতস্তথা পরিভ্রমন্নিন্দ্রিয়রন্ধ্রকৈর্হয়ৈঃ |
নিয়ম্যতাং মাধব ! মে মনোহয়স্ত্বদঙ্ঘ্রিশঙ্কৌ দৃঢভক্তিবন্ধনে || ১, ২২৭. ৩৭ ||
বিষ্ণুরেব পরং ব্রহ্ম ত্রিভেদমিহ পঠ্যতে |
বেদসিদ্ধান্তমার্গেষু তন্ন জানন্তি মোহিতাঃ || ১, ২২৭. ৩৮ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
ভগবদ্ভক্তিবিবরণং নাম সপ্তবিংশত্যধিকদ্বিশততমোঽধ্যায়ঃ

শ্রীগরুডমহাপুরাণম্-২২৮
সূতৌবাচ |
মুক্তিহেতুমনাদ্যন্তমজমব্যয়মক্ষয়ম্ |
যো নমেৎসর্বলোকস্য নমস্যো জায়তে নরঃ || ১, ২২৮. ১ ||
বিষ্ণুমানন্দমদ্বৈতং বিজ্ঞানং সর্বগং প্রভুম্ |
প্রণমামি সদা ভক্ত্যা চেতসা হৃদয়ালয়ম্ || ১, ২২৮. ২ ||
যোঽন্তস্তিষ্ঠন্নশেষস্য পশ্যতীশঃ শুভাশুভম্ |
তং সর্বসাক্ষিণং বিষ্ণুং নমস্যে পরমেশ্বরম্ || ১, ২২৮. ৩ ||
শক্তেনাপি নমস্কারঃ প্রয়ুক্তশ্চক্রপাণয়ে |
সংসারতৃণবর্গাণামুদ্বেজনকরো হি সঃ || ১, ২২৮. ৪ ||
কৃষ্ণে স্ফুরজ্জলধরোদরচারুকৃষ্ণে লোকাধিকারপুরুষে পরমপ্রমেয়ে |
একো হি ভাবগুণমাত্রদৃঢপ্রণামঃ সদ্যঃ শ্বপাকমপি সাধয়িতুং সশক্তঃ || ১, ২২৮. ৫ ||
প্রণম্য দণ্ডবদ্ভূমৌ নমস্কারেণ যোর্ঽচয়েৎ |
স যাং গতিমবাপ্নোতি ন তাং ক্রতুশতৈরপি || ১, ২২৮. ৬ ||
দুর্গসংসারকান্তারাকূপারেঽপি প্রধাবতাম্ |
একঃ কৃষ্ণে নমস্কারো মুক্ত্যা তাংস্তারয়িষ্যতি || ১, ২২৮. ৭ ||
আসীনো বা শয়ানো বাতিষ্ঠন্বা যত্র তত্র বা |
নমো নারায়ণায়েতি মন্ত্রৈকশরণো ভবেৎ || ১, ২২৮. ৮ ||
নারায়ণেতি শব্দোঽস্তি বাগস্তি বশবর্তিনী |
তথাপি নরকে মূঢাঃ পতন্তীতি কিমদ্ভুতম্ || ১, ২২৮. ৯ ||
চতুর্মুখো বা যদি কোটিবক্ত্রো ভবেন্নরঃ কোপি বিশুদ্ধচেতাঃ |
স বৈ গুণানাময়ুতৈকদেশং বদেন্ন বা দেববরস্য বিষ্ণোঃ || ১, ২২৮. ১০ ||
ব্যাসাদ্যা মুনয়ঃ সর্বে স্তুবন্তো মধুসূদনম্ |
মতিক্ষয়ান্নিবর্তন্তে ন গোবিন্দগুণক্ষয়াৎ || ১, ২২৮. ১১ ||
অবশেনাপি যন্নাম্নি কীর্তিতে সর্বপাতকৈঃ |
পুমান্বিমুচ্যতে সদ্যঃ সিংহত্রস্তো মৃগা যথা |
বদ্ধঃ পরিকরস্তেন মোক্ষায় গমনং প্রতি || ১, ২২৮. ১২ ||
স্বপ্নেঽপি নাম স্পৃশতোঽপি পুংসঃ ক্ষয়ং করোত্যক্ষয়পাপরাশিম্ |
প্রত্যক্ষতঃ কিং পুনরত্র পুংসা প্রকীর্তিতে নাম্নি জনার্দনস্য || ১, ২২৮. ১৩ ||
নমঃ কৃষ্ণাচ্যুতানন্তবাসুদেবেত্যুদীরিতম্ |
যৈর্ভাবভাবিতৈর্বিপ্রন তে যমপুরং যয়ুঃ || ১, ২২৮. ১৪ ||
ক্ষয়ো ভবেদ্যথা বহ্নেস্তমসো ভাস্করোদয়ে |
তথৈব কলুষৌঘস্য নামসঙ্কীর্তনাদ্ধরেঃ || ১, ২২৮. ১৫ ||
ক্ব নাকপৃষ্ঠগমনং পুনরায়াতি ন ক্ষয়ম্ |
গচ্ছতাং দূরমধ্বানং কৃষ্ণমূর্ছিতচেতসাম্ || ১, ২২৮. ১৬ ||
পাথেয়ং পুণ্ডরীকাক্ষনামসঙ্কীর্তনং হরেঃ |
সংসারসর্পসন্দষ্টবিষচেষ্টৈকভেষজম্ |
কৃষ্ণেতি বৈষ্ণবং ক্ষান্তং জপ্ত্বা মুক্তো ভবেন্নরঃ || ১, ২২৮. ১৭ ||
ধ্যায়ন্কৃতে জপেন্মন্ত্রৈস্ত্রেতায়াং দ্বাপরের্ঽচয়ন্ |
যদাপ্নোতি তদাপ্নোতি তদাপ্নোতি কলৌ সংস্মৃত্যকেশবম্ || ১, ২২৮. ১৮ ||
জিহ্বাগ্রে বর্ততে যস্য হরিরিত্যক্ষরদ্বয়ম্ |
সংসারসাগরং তীর্ত্বা স গচ্ছেদ্বৈষ্ণবং পদম্ || ১, ২২৮. ১৯ ||
বিজ্ঞাতদুষ্কৃতিসহস্রসমাবৃতোঽপিশ্রেয়ঃ পরন্তু পরিশুদ্ধিম ভীপ্সমানঃ |
স্পপ্নান্তরে ন হি পুনশ্চ ভবং স পশ্যেন্নারায়ণস্তুতিকথাপরমো মনুষ্যঃ || ১, ২২৮. ২০ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
বিষ্ণুভক্তিবিবরণং নামাষ্টাবিংশত্যুত্তরদ্বিশততমোঽধ্যায়ঃ

শ্রীগরুডমহাপুরাণম্-২২৯
সূত উবাচ |
অশেষলোকনাথস্য সারমারাধনং হরেঃ |
দদ্যাতু পুরুষসূক্তেণ যঃ পুষ্পাণ্যপ এব চ || ১, ২২৯. ১ ||
অর্চিতং স্যাজ্জগদিদং তেন সর্বং চরাচরম্ |
যো ন পূজয়তে বিষ্ণুং তং বিদ্যাদ্ব্রহ্মঘাতকম্ || ১, ২২৯. ২ ||
যতঃ প্রবৃত্তির্ভূতানাং যেন সর্বমিদং ততম্ |
তং যো ন ধ্যায়তে বিষ্ণুং স বিষ্ঠায়াং ক্রিমির্ভবেৎ || ১, ২২৯. ৩ ||
নরকে পচ্যমানস্তু যমেন পরিভাষিতঃ |
কিন্ত্বয়া নার্চিতো দেবঃ কেশবঃ ক্লেশনাশনঃ || ১, ২২৯. ৪ ||
উদকেনাপ্যভাবেন দ্রব্যাণামর্চিতঃ প্রভুঃ |
যো দদাতি স্বকং লোকং স ৎবয়া কিং ন চার্চিতঃ || ১, ২২৯. ৫ ||
ন তৎকরোতি সা মাতা ন পিতা নাপি বান্ধবঃ |
যৎকরোতি হৃষীকেশঃ সন্তুষ্টঃ শ্রদ্ধয়ার্চিতঃ || ১, ২২৯. ৬ ||
বর্ণাশ্রমাচারবতা পুরুষেণ পরঃ পুমান্ |
বিষ্ণুরারাধ্যতে পন্থা নান্যস্তত্তোষকারকঃ || ১, ২২৯. ৭ ||
ন দানৈর্বিবিধৈর্দত্তৈর্ন পুষ্পৈর্নানুলেপনৈঃ |
তোষমেতি মহাত্মাসৌ যথা ভক্ত্যা জনার্দনঃ || ১, ২২৯. ৮ ||
সম্পদৈশ্বর্যমাহাত্ম্যৈঃ সন্তত্যা ন চ কর্মণা |
বিমুক্তৈশ্চৈকতা লভ্যা মূলমারাধনং হরেঃ || ১, ২২৯. ৯ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
বিষ্ণুপূজানিরূপণং নামৈকোনত্রিশদুত্তরদ্বিশততমোঽধ্যায়ঃ

শ্রীগরুডমহাপুরাণম্-২৩০
সূত উবাচ |
আলোক্য সর্বশাস্ত্রাণি বিচার্য চ পুনঃ পুনঃ |
ইদমেকং সুনিষ্পন্নং ধ্যেয়ো নারায়ণঃ সদা || ১, ২৩০. ১ ||
কিং তস্য দানৈঃ কিন্তীর্থৈঃ কিং তপোভিঃ কিমধ্বরৈঃ |
যো নিত্যং ধ্যায়তে দেবং নারায়ণমনন্যধীঃ || ১, ২৩০. ২ ||
ষষ্টিস্তীর্থসহস্রাণি ষষ্টিস্তীর্থশতানি চ |
নারায়ণপ্রণামস্য কলাং নার্হন্তি ষোডশীম্ || ১, ২৩০. ৩ ||
প্রয়শ্চিত্তান্যশেষাণি তপঃ কর্মাণি যানি বৈ |
বিদ্ধি তেষামশেষাণাং কৃষ্ণানুস্মরণং পরম্ || ১, ২৩০. ৪ ||
কৃতপাপেঽনুরক্তিশ্চ যস্য পুংসঃ প্রজায়তে |
প্রায়শ্চিত্তন্তু তস্যৈকং হরেঃ সংস্মরণং পরম্ || ১, ২৩০. ৫ ||
মুহূর্তমপি যো ধ্যায়েন্নারায়ণমতন্দ্রিতঃ |
সোঽপি স্বর্গতিমাপ্নোতি কিং পুনস্তৎপরায়ণঃ || ১, ২৩০. ৬ ||
জাগ্রৎস্বপ্নসুষুপ্তেষু যোগস্থস্য চ যোগিনঃ |
যা কাচিন্মনসো বৃত্তিঃ সা ভবত্যচ্যুতাশ্রয়াৎ || ১, ২৩০. ৭ ||
উত্তিষ্ঠন্নিপতন্বিষ্ণুং প্রলপন্বিবিশংস্তথা |
ভুঞ্জঞ্জাগ্রচ্চ গোবিন্দং মাধবং যশ্চ সংস্মরেৎ || ১, ২৩০. ৮ ||
স্বেস্বে কর্মণ্যভিরতঃ কুর্যাচ্চিত্তং জনার্দনে |
এষা শাস্ত্রানুসারোক্তিঃ কিমন্যৈর্বহুভাষিতৈঃ || ১, ২৩০. ৯ ||
ধ্যানমেব পরো ধর্মো ধ্যানমেব পরং তপঃ |
ধ্যানমেব পরং শৌচং তস্মাদ্ধ্যানপরো ভবেৎ || ১, ২৩০. ১০ ||
নাস্তি বিষ্ণোঃ পরং ধ্থেয়ং তপো নানশনাৎপরম্ |
তস্মাৎপ্রধানমত্রোক্তং বাসুদেবস্য চিন্তনম্ || ১, ২৩০. ১১ ||
যদ্দুর্লভং পরং প্রাপ্যং মনসো যন্ন গোচরম্ |
তদপ্যপ্রার্থিতং ধ্যাতো দদাতি মধুসূদনঃ || ১, ২৩০. ১২ ||
প্রমাদাৎকুর্বতাং কর্ম প্রচ্যবেতাধ্বরেষু যৎ |
স্মরণাদেব তদ্বিষ্ণোঃ সম্পূর্ণং স্যাদিতি শ্রুতিঃ || ১, ২৩০. ১৩ ||
ধ্যানেন সদৃশো নাস্তি শোধনং পাপকর্মণাম্ |
আগামিদেহহেতূনাং দাহকো যোগপাবকঃ || ১, ২৩০. ১৪ ||
বিনিষ্পন্নসমাধিস্তু মুক্তিমত্রৈব জন্মনি |
প্রাপ্নোতি যোগী যোগাগ্নিদগ্ধকর্মা চ যোঽচিরাৎ || ১, ২৩০. ১৫ ||
যথাগ্নিরুদ্যতশিখঃ কক্ষং দহতি বানিলঃ |
তথা চিত্তস্থিতে বিষ্ণৌ যোগিনা সর্বকিল্বিষম্ || ১, ২৩০. ১৬ ||
যথাগ্নিয়োগাৎকনকমমলং সম্প্রজায়তে |
সম্প্লুষ্টো বাসুদেবেন মনুষ্যাণাং সদা মলঃ || ১, ২৩০. ১৭ ||
গঙ্গাস্নানসহস্রেষু পুষ্করস্নানকোটিষু |
যৎপাপং নিলয়য়াতি স্মৃতে নশ্যতি তদ্ধরৌ || ১, ২৩০. ১৮ ||
প্রাণায়ামসহস্নৈস্তু যৎপাপং নশ্যতি ধ্রুবম্ |
ক্ষণমাত্রেণ তৎপাপং হরের্ধ্যানাৎপ্রণশ্যতি || ১, ২৩০. ১৯ ||
কলিপ্রভাবাদ্দুষ্টোক্তিঃ পাষণ্ডানাং তথোক্তয়ঃ |
ন ক্রামেন্মানসং তস্য যস্য চেতসি কেশবঃ || ১, ২৩০. ২০ ||
সা তিথিস্তদহোরাত্রং স যোগঃ স চ চন্দ্রমাঃ |
লগ্নং তদেব বিখ্যাতং যত্র সংস্মর্যতে হরিঃ || ১, ২৩০. ২১ ||
সা হানিস্তন্মহচ্ছিদ্রং সা চার্থজডমূকতা |
চন্মুহূর্তং ক্ষণো বাপি বাসুদেবো ন চিন্ত্যতে || ১, ২৩০. ২২ ||
কলৌ কৃত যুগং তস্য কলিস্তস্য কৃতে যুগে |
হৃদি নো যস্য গোবিন্দো যস্য চেতসি নাচ্যুতঃ || ১, ২৩০. ২৩ ||
যস্যাগ্রতস্তথা পৃষ্ঠে গচ্ছতস্তিষ্ঠতোঽপি বা |
গোবিন্দে নিয়তং চেতঃ কৃতকৃত্যঃ সদৈব সঃ || ১, ২৩০. ২৪ ||
বাসুদেবে মনো যস্য জপহোমার্চনাদিষু |
তস্যান্তরায়ো মৈত্রেয় বেবেন্দ্রৎবাদিকং ফলম্ || ১, ২৩০. ২৫ ||
অসন্ত্যজ্য চ গার্হস্থয়ং স তপ্ত্বা চ মহত্তপঃ |
ছিনত্তি পৌরুষীং মায়াং কেশবার্পিতমানসঃ || ১, ২৩০. ২৬ ||
ক্ষমাং কুর্বন্তি ক্রুদ্ধেষু দয়াং মূর্খেষু মানবাঃ |
মুদঞ্চ ধর্মশীলেষু গোবিন্দে হৃদয়স্থিতে || ১, ২৩০. ২৭ ||
ধ্যায়েন্নারায়ণং দেবং স্নানদানাদিকর্মসু |
প্রায়শ্চিতেতেষু সর্বেষু দুষ্কৃতেষু বিশেষতঃ || ১, ২৩০. ২৮ ||
লাভস্তেষাং জয়স্তেষাং কুতস্তেষাং পরাভবঃ |
যেষামিন্দীবরশ্যামো হৃদয়স্থো জনার্দনঃ || ১, ২৩০. ২৯ ||
কীটপক্ষিগণানাঞ্চ হরৌ সংন্যস্তচেতসাম্ |
ঊর্ধ্বা হ্যেব গতিশ্চাস্তি কিং পুনর্জ্ঞানিনাং নৃণাম্ || ১, ২৩০. ৩০ ||
বাসুদেবতরুচ্ছায়া নাতিশীতাতিতাপদা |
নরকদ্বারশমনী সা কিমর্থং ন সেব্যতে || ১, ২৩০. ৩১ ||
ন চ দুর্বাসসঃ শাপো রাজ্যঞ্চাপি শচীপতেঃ |
হন্তুং সমর্থং হি সখে হৃৎকৃতে মধুসূদনে || ১, ২৩০. ৩২ ||
বদতস্তিষ্ঠতোঽন্যদ্বা স্বেচ্ছয়া কর্ম কুর্বতঃ |
নাপয়াতি যদা চিন্তা সিদ্ধাং মন্যেত ধারণাম্ || ১, ২৩০. ৩৩ ||
ধ্যেয়ঃ সদা সবিতৃমণ্ডলমধ্যবর্তো নারায়ণঃ সরসিজাসনসন্নিবিষ্টঃ |
কেয়ূরবান্মকরকুণ্ডলবান্কিরীটী হারী হিরণ্ময়বপুর্ধৃতশঙ্খচক্রঃ || ১, ২৩০. ৩৪ ||
ন হি ধ্যানেন সদৃশং পবিত্রমিহ বিদ্যতে |
শ্বপচান্নানি ভুঞ্জানো পাপী নৈবাত্র লিপ্যতে || ১, ২৩০. ৩৫ ||
সদা চিত্তং সমাসক্তং জন্তোর্বিষয়গোচরে |
যদি নারায়ণেঽপ্যেবং কো ন মুচ্যেত বন্ধনাৎ || ১, ২৩০. ৩৬ ||
সূত উবাচ |
বিষ্ণুভক্তির্যস্য চিত্তে কং বা জীবো নমেৎসদা |
স তারয়তি চাত্মানং তদৈব দুরিতার্ণবাৎ || ১, ২৩০. ৩৭ ||
তঞ্জ্ঞানং যত্র গোবিন্দঃ সা কথা যত্র কাশবঃ |
তৎকর্ম যত্তদর্থায় কিমন্যৈর্বহুভাষিতৈঃ || ১, ২৩০. ৩৮ ||
সা জিহ্বা যা হরিং স্তৌতি তচ্চিত্তং যত্তদর্পিতম্ |
তাবেব কেবলৌ শ্লাঘ্যৌ যৌ তৎপূজাকরৌ করৌ || ১, ২৩০. ৩৯ ||
প্রণামমীশস্য শিরঃ ফলং বিদুস্তদর্চনং পাণিফলং দিবৌকসঃ |
মনঃ ফলং তদ্গুণকর্মচিন্তনং বচস্তু গোবিন্দগুণস্তুতিঃ ফলম্ || ১, ২৩০. ৪০ ||
মেরুমন্দরমাত্রোঽপি রাশিঃ পাপস্য কর্মণঃ |
কেশবস্মরণাদেব তস্য সর্বং বিনশ্যতি || ১, ২৩০. ৪১ ||
যৎকিঞ্চিৎকুরুতে কর্ম পুরুষঃ সাধ্বসাধু বা |
সর্বং নারায়ণে ন্যস্য কুর্বন্নপি ন লিম্পতি || ১, ২৩০. ৪২ ||
তৃণাদিচতুরাস্যান্তং ভূতগ্রামং চতুর্বিধম্ |
চরাচরং জগৎসর্বং প্রসুপ্তং মায়য়া তব || ১, ২৩০. ৪৩ ||
যস্মিন্ন্যস্তমতির্ন যাতি নরকং স্বর্গোঽপি যচ্চিন্তনে বিঘ্নো
যত্র নবা বিশেৎকথমপি ব্রাহ্মোঽপিলোকোঽল্পকঃ |
মুক্তিঞ্চেতসি সংস্থিতো জডধিয়াং পুংসাং দদাত্যব্যয়ঃ কিঞ্চিত্রং
যদয়ং প্রয়াতি বিলয়ং তত্রাচ্যুতে কীর্তিতে || ১, ২৩০. ৪৪ ||
অগ্নিকার্যং জপঃ স্নানং বিষ্ণোর্ধ্যানঞ্চ পূজনম্ |
গন্তুং দুঃখোদধেঃ কুর্যুর্যে চ তত্র নরন্তি তে || ১, ২৩০. ৪৫ ||
রাষ্ট্রস্য শরণং রাজা পিতরো বালকস্য চ |
ধর্মশ্চ সর্বমর্ত্যানাং সর্বস্য শরণং হরিঃ || ১, ২৩০. ৪৬ ||
যে নমন্তি জগদ্যোনিং বাসুদেবং সনাতনম্ |
ন যেভ্যো বিদ্যতে তীর্থমধিকং মুনিসত্তম্ || ১, ২৩০. ৪৭ ||
অনর্ঘরত্নপূজাঞ্চ কুর্যাৎস্বাধ্যায়মেব চ |
তমেবোদ্দিশ্য গোবিন্দং ধ্যায়ন্নিত্যমতন্দ্রিতঃ || ১, ২৩০. ৪৮ ||
শূদ্রং বা ভগবদ্ভক্তং নিষাদং শ্বপচং তথা |
দ্বিজজাতি সমমন্যো ন যাতি নরকং নরঃ || ১, ২৩০. ৪৯ ||
আদরেণ সদা স্তৌতি ধনবন্তং ধনেচ্ছয়া |
তথা বিশ্বস্য কর্তারং কো ন মুচ্যেত বন্ধনাৎ || ১, ২৩০. ৫০ ||
যথা প্রাপ্তবনো বহ্নির্দহত্যার্দ্রমপীন্ধনম্ |
তথাবিধঃ স্থিতো বিষ্ণুর্যোগিনাং সর্বকিল্বিষম্ || ১, ২৩০. ৫১ ||
আদীপ্তং পর্বতং যদ্বন্নাশ্রয়ন্তি মৃগাদয়ঃ |
তদ্বৎপাপনি সর্বাণি যোগাভ্যাসরতং নরম্ || ১, ২৩০. ৫২ ||
যস্য যাবাংশ্চ বিশ্বাসস্তস্য সিদ্ধিস্তু তাবতী |
এতবানেব কৃষ্ণস্য প্রভাবঃ পরিমীয়তে || ১, ২৩০. ৫৩ ||
বিদ্বেষাদপি গোবিন্দং দমঘোষাত্মজঃ স্মরন্ |
শিশুপালো গতস্তত্ত্বং কিং পুনস্তৎপরায়ণঃ || ১, ২৩০. ৫৪ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
বিষ্ণুমহাত্ম্যবর্ণনং নাম ত্রিংশদুত্তরদ্বিশততমোঽধ্যায়ঃ