১.১৯ গরুডপুরাণ (অধ্যায় ১৮১-১৯০)

শ্রীগরুডমহাপুরাণম্-১৮১
হরিরুবাচ |
তাম্বূলঞ্চ ঘৃতং ক্ষৌদ্রং লবণং তাম্রভাজনে |
তথা পয়ঃ সমায়ুক্তং চক্ষুঃ শূলহরং পরম্ || ১, ১৮১. ১ ||
হরীতকী বচা কুষ্ঠং ব্যোষং হিঙ্গু মনঃ শিলা |
কাসে শ্বাসে চ হিক্কায়াং লিহ্যাৎক্ষৌদ্রং ঘৃপ্লুতম্ || ১, ১৮১. ২ ||
পিপ্পলীত্রিফলাচূর্ণং মধুনা লেহয়েন্নরঃ |
নশ্যতে পীনসঃ কাসঃ শ্বাসশ্চ বলবত্তরঃ || ১, ১৮১. ৩ ||
সমূলচিত্রকং ভস্মপিপ্পলীচূর্ণকং লিহেৎ |
শ্বাসং কাসঞ্চ হিক্কাঞ্চ মধুমিশ্রং বৃষধ্বজ ! || ১, ১৮১. ৪ ||
নীলোৎপলং শর্করা চ মধুকং পদ্মকং সমম্ |
তণ্ডুলোদকসমিশ্রং প্রশমেদ্রক্তবিক্রিয়াঃ || ১, ১৮১. ৫ ||
শুণ্ঠী চ শর্করা চৈব তথা ক্ষৌদ্রেণ সংযুতা |
কোকিলস্বর এব স্যাদ্গুটিকা ভুক্তিমাত্রতঃ || ১, ১৮১. ৬ ||
হরিতালং শঙ্খচূর্ণং কদলীদলভস্মনা |
এতদ্দ্রব্যেণ চোদ্বর্ত্য লোমশাতনমুত্তমম্ || ১, ১৮১. ৭ ||
লবণং হরিতালঞ্চ তুম্বিন্যাশ্চ ফলানি চ |
লাক্ষারসসমায়ুক্তং লোমশাতনমুত্তম্ || ১, ১৮১. ৮ ||
সুধা চ হরিতালঞ্চ শঙ্খভস্ম মনঃ শিলা |
সৈন্ধবেন সহৈকত্র ছাগমূত্রেণ পেষয়েৎ || ১, ১৮১. ৯ ||
তৎক্ষণোদ্বর্তনাদেব লোমশাতনমুত্তমম্ |
শঙ্খমামলকং পত্রং ধাতক্যাঃ কুসুমানি চ || ১, ১৮১. ১০ ||
পিষ্ট্বা তৎপয়সা সার্ধং সপ্তাহং ধারয়েন্মুখে |
স্নিগ্ধাঃ শ্বেতাশ্চ দন্তাশ্চ ভবন্তি বিমলপ্রভাঃ || ১, ১৮১. ১১ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
একাশীত্যধিকশততমোঽধ্যায়ঃ

শ্রীগরুডমহাপুরাণম্-১৮২
হরিরুবাচ |
শরদ্গ্রীষ্মবসন্তেষু প্রায়শো দধি গর্হিতম্ |
হেমন্তে শিশিরে চৈব বর্ষাসু দধি শস্যতে || ১, ১৮২. ১ ||
ভুক্তে তু শর্করা পীতা নবনীতেন বুদ্ধিকৃৎ |
গুডস্য তু পুরাণস্য পলমেকন্তু ভক্ষয়েৎ |
স্ত্রীসহস্রঞ্চ সঙ্গচ্ছেৎপুমান্বলয়ুতো হর ! || ১, ১৮২. ২ ||
কুষ্ঠং সঞ্চূর্ণিতং কৃৎবা ঘৃতমাক্ষিকসংযুতম্ |
ভক্ষয়েৎস্বপ্নবেলায়াং বলীপলিতনাশনম্ || ১, ১৮২. ৩ ||
অতসীমাষগোধূমচূর্ণং কৃৎবা তু পিপ্পলী |
ঘৃতেন লেপয়েদ্গত্রমোভিঃ সার্ধং বিচক্ষণঃ |
কন্দর্পসদৃশো মর্ত্যো নিত্যং ভবতি শঙ্কর ! || ১, ১৮২. ৪ ||
যবাস্তিলাশ্বগন্ধা চ মুশলী সরলা গুডম্ |
এভিশ্চ রচিতাং জগ্ধ্বা তরুণো বলবান্ভবেৎ || ১, ১৮২. ৫ ||
হিঙ্গু সৌবর্চলং শুণ্ঠীং পীৎবা তু ক্বথিতোদকৈঃ |
পরিণামাখ্যশূলঞ্চ অজীর্ণঞ্চৈব নশ্যতি || ১, ১৮২. ৬ ||
ধাতকীং সোমরাজীঞ্চ ক্ষীরেণ সহ পেষয়েৎ |
দুর্বলশ্চ ভবেৎস্থূলো নাত্র কার্যা বিচারণা || ১, ১৮২. ৭ ||
শর্করামধুসংযুক্তং নবনীতং বলী লিহেৎ |
ক্ষীরাশী চ ক্ষয়ী পুষ্টিং মেধাঞ্চৈবাতুলাং ব্রজেৎ || ১, ১৮২. ৮ ||
কুলীরচূর্ণং সক্ষীরং পীতঞ্চ ক্ষয়রেগনুৎ |
ভল্লাতকং বিডঙ্গঞ্চ যবক্ষারঞ্চ সৈন্ধবম্ || ১, ১৮২. ৯ ||
মনঃ শিলা শঙ্খচূর্ণং তৈলপক্বং তথৈব চ |
লোমানি শাতয়ত্যেব নাত্র কার্যা বিচারণা || ১, ১৮২. ১০ ||
মালূরস্য রসং গৃহ্য জলৌকাং তত্র পেষয়েৎ |
হস্তৌ সংলেপয়েত্তেন ৎবগ্নিস্তম্ভনমুত্তমম্ || ১, ১৮২. ১১ ||
শাল্মলীরসমাদায় খরমূত্রে নিধায় তম্ |
অগ্নয়াদৌ বিক্ষিপেত্তেন হ্যগ্নিস্তম্ভনমুত্তমম্ || ১, ১৮২. ১২ ||
বায়স্যা উদরং গৃহ্য মণ্ডূকবসয়া সহ |
গুটিকাং কারয়েত্তেন ততোঽগ্নৌ সঙ্ক্ষৈপেৎসুধীঃ |
এবমেতৎপ্রয়োগেণ হ্যগ্নিস্তম্ভনমুত্তমম্ || ১, ১৮২. ১৩ ||
মুণ্ডীৎবক্চ বচা মুস্তং মরিচং তগরং তথা |
চর্বিৎবা চ ৎবিমং সদ্যো জিহ্বয়া জ্বলনং লিহেৎ || ১, ১৮২. ১৪ ||
গোরোচনাং ভৃঙ্গরাজং চূর্ণোকৃত্যঘৃতং সমম্ |
দিব্যাম্ভসঃ স্তম্ভনং স্যান্মন্ত্রেণানেন বৈ তথা |
ওঁ অগ্নিস্তম্ভনং কুরু কুরু || ১, ১৮২. ১৫ ||
ওঁ নমো ভগবতে জলং স্তম্ভয় সং সং সং কেক কেকঃ চরচর |
জলস্তম্ভনমন্ত্রোঽযং জলং স্তম্ভয়তে শিব ! || ১, ১৮২. ১৬ ||
গৃধ্রাস্থিঞ্চ গবাস্থিঞ্চ তথা নির্মাল্যমেব চ |
অরের্যো নিখনেদ্দ্বারে পঞ্চৎবমু পয়াতি সঃ || ১, ১৮২. ১৭ ||
পঞ্চরক্তানি পুষ্পাণি পৃথগ্জাত্যা সমালভেৎ |
কুঙ্কুমেন সমায়ুক্তমাত্মরক্তসমন্বিতম্ || ১, ১৮২. ১৮ ||
পুষ্পেণ তু সমং পিষ্ট্বা রোচনায়াঃ পলৈকতঃ |
স্ত্রিয়া পুংসা কৃতো রুদ্র ! তিলকোঽযং বশীকরঃ || ১, ১৮২. ১৯ ||
ব্রহ্মদণ্ডী তু পুষ্যেণ ভক্ষ্যে পানে বশীকরঃ |
যষ্টি মধু পলৈকেন পক্বমুষ্ণোদকং পিবেৎ || ১, ১৮২. ২০ ||
বিষ্টম্ভিকাঞ্চ হৃচ্ছূলং হরত্যেব মহেশ্বর ! |
ওঁ হ্রূং জঃ |
মন্ত্রোঽযং হরতে রুদ্র ! সর্ববৃশ্চিকজং বিষম্ || ১, ১৮২. ২১ ||
পিপ্পলী নবনীতঞ্চ শৃঙ্গবেরং চ সৈন্ধবম্ |
মরিচং দধি কুষ্ঠঞ্চ নস্যে পানে বিষং হরেৎ || ১, ১৮২. ২২ ||
ত্রিফলার্দ্রককুষ্ঠং চ চন্দনং ঘৃতসংযুতম্ |
এতৎপানাচ্চ লেপাচ্চ বিষনাশো ভবেচ্ছিব ! || ১, ১৮২. ২৩ ||
পারাবতস্য চাক্ষীণি হরিতালং মনঃ শিলা |
এতদ্যোগাদ্বিষং হন্তি বৈনতেয় ইবোরগান্ || ১, ১৮২. ২৪ ||
সৈন্ধবং ত্র্যূষণং চৈব দধিমধ্বাজ্যসংযুতম্ |
বৃশ্চিকস্য বিষং হন্তি লেপোঽযং বৃষভধ্বজ ! || ১, ১৮২. ২৫ ||
ব্রহ্মদণ্ডীতিলান্ক্বাথ্য চূর্ণং ত্রিকটুকং পিবেৎ |
নাশয়েদ্রুদ্র ! গুল্মানি নিরুদ্ধং রক্তমেব চ || ১, ১৮২. ২৬ ||
পীৎবা ক্ষীরং ক্ষৌদ্রয়ুতং নাশয়েদসৃজঃ স্ত্রুতিম্ |
আটরূপকমূলেন ভগং নাভিং চ লেপয়েৎ |
সুখং প্রসূয়তে নারী নাত্র কার্যা বিচারণা || ১, ১৮২. ২৭ ||
শর্করাং মধুসংযুক্তাং পীৎবা তণ্ডুলবারিণা |
রক্তাতিসারশমনং ভবতীতি বৃষধ্বজ ! || ১, ১৮২. ২৮ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
দ্ব্যাশীত্যধিকশততমোঽধ্যায়ঃ

শ্রীগরুডমহাপুরাণম্-১৮৩
হরিরুবাচ |
মরিচং শৃঙ্গবেরং চ কুটজৎবচমেব চ |
পানাচ্চ গ্রহণী নশ্যেচ্ছশাঙ্কাঙ্কিতশেখর ! || ১, ১৮৩. ১ ||
পিপ্পলী পিপ্পলীমূলং মরিচং তগরং বচা |
দেবদারুরসং পাঠাং ক্ষীরেণ সহ পেষয়েৎ || ১, ১৮৩. ২ ||
অনেনৈব প্রয়োগেণ হ্যতিসারো বিনশ্যতি |
মরীচতিলপুষ্পাভ্যা মঞ্জনং কামলাপহম্ || ১, ১৮৩. ৩ ||
হরীতকী সমগুডা মধুনা সহ যোজিতা |
বিরেচনকরী রুদ্র ! ভবতীতি ন সংশয়ঃ || ১, ১৮৩. ৪ ||
ত্রিফলা চিত্রকং চিত্রং তথা কটুকরোহিণী |
উরুস্তম্ভহরং হ্যেতদুত্তমন্তু বিরেচনম্ || ১, ১৮৩. ৫ ||
হরীতকী শৃঙ্গবেরং দেবদারু চ চন্দনম্ |
ক্বাথয়েচ্ছাগদুগ্ধেন অপামার্গস্য মূলকম্ |
ঊরুস্তম্ভং জয়ন্ত্যা বা সপ্তরাত্রেণ নাশয়েৎ || ১, ১৮৩. ৬ ||
অনন্তাশৃঙ্গবেরস্য সূক্ষ্মচূর্ণানি কারয়েৎ |
গুগ্গুলং গুডতুল্যং চ গুটিকামুপয়ুজ্যচ |
বায়ুঃ স্নায়ুগতং চৈব অগ্নিমান্দ্যং চ নাশয়েৎ || ১, ১৮৩. ৭ ||
সঙ্খপুষ্পীন্তু পুষ্পেণ সমুদ্ধৃত্য সপত্রিকাম্ |
সমূলাং ছাগদুগ্ধেন অপস্মারহরং পিবেৎ || ১, ১৮৩. ৮ ||
অশ্বগন্ধাভয়ে চৈব উদকেন সমং পিবেৎ |
রক্তপিত্তং বিনশ্যেত্তু নাত্র কার্যা বিচারণা || ১, ১৮৩. ৯ ||
হরীতকীকুষ্ঠচূর্ণং কৃৎবা আস্যং চ পূরয়েৎ |
শীতং পীৎবাথ পানীয়ং সর্বচ্ছর্দিনিবারণম্ || ১, ১৮৩. ১০ ||
গডূচীপদ্মকারিষ্টধান্যাকং রক্তচংন্দনম্ |
পিত্তশ্লেষ্মজ্বরচ্ছর্দিদাহতৃষ্ণাঘ্নমগ্নিকৃৎ |
ওঁ হুং নম ইতি || ১, ১৮৩. ১১ ||
শ্রোত্রে বদ্ধ্বা শঙ্খপুষ্পীং জ্বরং মন্ত্রেণ বৈ হরেৎ |
ওঁ জম্ভিনী স্তম্ভিনী মোহয় সর্বব্যাধীন্মে বজ্রেণ ঠঃ ঠঃ
সর্বব্যাধীন্মে বজ্রেণ ফটিতি || ১, ১৮৩. ১২ ||
পুষ্পমষ্টশতং জপ্ত্বা হস্তে দত্ত্বা নখং স্পৃশেৎ |
চাতুর্থিকো জ্বরো রুদ্র অন্যে চৈব জ্বরাস্তথা || ১, ১৮৩. ১৩ ||
জ্ম্বূফলং হরিদ্রা চ সর্পস্যৈব তু কঞ্চুকম্ |
সর্বজ্বরাণাং ধূপোঽযং হরশ্চাতুর্থিকস্য চ || ১, ১৮৩. ১৪ ||
করবীরং ভৃঙ্গপত্রং লবণং কুষ্ঠকর্কটে |
চতুর্গুণেন মূত্রেণ পচেত্তৈলং হরেচ্চ তৎ |
পামাং বিচর্চিকাং কুষ্ঠমভ্যঙ্গাদ্ধি ব্রণানি বৈ || ১, ১৮৩. ১৫ ||
পিপ্পলীমধুপানাচ্চ তথা মধুরভোজনাৎ |
প্লীহা বিনশ্যতে রুদ্র তথা সূরণসেবনাৎ || ১, ১৮৩. ১৬ ||
পিপ্পলীঞ্চ হরিদ্রাঞ্চ গোমূত্রেণ সমন্বিতাম্ |
প্রক্ষিপেচ্চ গুদদ্বারে অর্শাংসি বিনিবারয়েৎ || ১, ১৮৩. ১৭ ||
অজাদুগ্ধমার্দ্রকঞ্চ পীতং প্লীহাদিনাশনম্ |
সৈন্ধবঞ্চ বিডঙ্গানি সোমরাজী তু সর্ষপাঃ || ১, ১৮৩. ১৮ ||
রজনী দ্বে বিষঞ্চৈব গোমূত্রেণৈব পেষয়েৎ |
কুষ্ঠনাশশ্চ তল্লেপান্নিম্বপত্রাদিনা তথা || ১, ১৮৩. ১৯ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
ত্র্যশীত্যধিকশততমোঽধ্যায়ঃ

শ্রীগরুডমহাপুরাণম্-১৮৪
হরিরুবাচ |
রজনীকদলীক্ষারলেপঃ সিধ্মবিনাশনঃ |
কুষ্ঠস্য ভাগমেকন্তু পথ্যাভাগদ্বয়ং তথা |
উষ্ণোদকেন সম্পীয় কটিশূলবিনাশনম্ || ১, ১৮৪. ১ ||
অভয়া নবনীতঞ্চ শর্করাপিপ্পলীয়ুতম্ |
পানাদর্শোহরং স্যাচ্চ নাত্র কার্যা বিচারণা || ১, ১৮৪. ২ ||
আটরূষকপত্রেণ ঘৃতং মৃদ্বগ্নিনা পচেৎ |
চূর্ণং কৃৎবা তু লেপোঽযং অর্শরোগহরঃ পরঃ || ১, ১৮৪. ৩ ||
গুগ্গুলুত্রিফলায়ুক্তং পীৎবা নশ্যেদ্ভগন্দরম্ |
অজাজীশৃঙ্গবেরঞ্চ দথা মণ্ডং বিপাচয়েৎ || ১, ১৮৪. ৪ ||
লবণেন তু সংযুক্তং মূত্রকৃচ্ছ্রবিনাশনম্ |
যবক্ষারং শর্করা চ মূত্রকৃচ্ছ্রবিনাশকৃৎ || ১, ১৮৪. ৫ ||
চিতাগ্নিঃ খঞ্জরীটস্য বিষ্ঠা ফেনো হয়স্য চ |
সৌভাঞ্জনং বাসনেত্রং নর এতৈস্তু ধূপিতঃ |
অদৃশ্যস্ত্রিদশৈঃ সর্বৈঃ কিং পুনর্মানবৈঃ শিব || ১, ১৮৪. ৬ ||
তিলতৈলং যবান্দগ্ধ্বা মষীং কৃৎবা তু লেপয়েৎ |
তেনৈব সহ তৈলেন অগ্নিদগ্ধঃ সুখী ভবেৎ || ১, ১৮৪. ৭ ||
লজ্জালোঃ শরপুঙ্খায়া লেপঃ সাজ্যোঽগ্নিনাশনঃ |
ওঁ নমো ভগবতে ঠ ঠ ছিন্ধি ছিন্ধি জ্বলনং প্রজ্বলিতং
নাশয় নাশয় হুং ফট্ || ১, ১৮৪. ৮ ||
করে বদ্ধং তু নির্গুণ্ড্যা মূলং জ্বরহরং দ্রুতম্ |
মূলঞ্চ শ্বেতগুঞ্জায়াঃ কৃৎবা তৎসপ্তখণ্ডকম্ || ১, ১৮৪. ৯ ||
হস্তে বধ্বা নাশয়েচ্চ অর্শাংস্যেব ন সংশয়ঃ |
বিষ্ণুক্রান্তাজমূত্রেণ চৌরব্যাঘ্নাদিরক্ষণম্ || ১, ১৮৪. ১০ ||
ব্রহ্মদণ্ড্যাস্তু মূলানি সর্বকর্মাণি কারয়েৎ |
ত্রিফলায়াস্তু চূর্ণং হি সাজ্যং কুষ্ঠবিনাশনম্ || ১, ১৮৪. ১১ ||
আজ্যং পুনর্নবাবিল্বৈঃ পিপ্পলীভি সাধিতম্ |
হরেদ্ধক্কাং শ্বাসকাসৌ পীতং স্ত্রীণাঞ্চ গর্ভকৃৎ || ১, ১৮৪. ১২ ||
ভক্ষয়েদ্বা নরীবীজং পয়সাজ্যেন পাচিতম্ |
ঘৃতশর্করয়া যুক্তং শুক্রঃ স্যাদক্ষয়স্ততঃ || ১, ১৮৪. ১৩ ||
বিডঙ্গং মধুকং পাঠাং মাংসীং সর্জরসং তথা |
রহিদ্রাং ত্রিফলাঞ্চৈব মপামার্গং মনঃ শিলাম্ || ১, ১৮৪. ১৪ ||
উদুম্বরং ধাতকীঞ্চ তিলতৈলেন পষেয়েৎ |
যোনিং লিঙ্গং চ ম্রক্ষেত স্ত্রীপুসোঃ স্যাৎপ্রিয়ং মিথঃ || ১, ১৮৪. ১৫ ||
নমস্তে ঈশবরদায় আকর্ষিণি বিকর্ষিণি মুগ্ধে স্বাহা ইতি |
যোনিলঙ্গস্য তৈলেন শঙ্কর ম্লক্ষণাত্ততঃ || ১, ১৮৪. ১৬ ||
পুনর্নবামৃতা দূর্বা কনকঞ্চৈন্দ্রবারুণী |
বীজে নৈষাং জাতিকায়া রসেন রসমর্দনম্ || ১, ১৮৪. ১৭ ||
মূষায় মধ্যগং কৃৎবা রসং মারণমীরিতম্ |
মধ্বাজ্যসহিতং দুগ্ধং বলীপলিতনাশনম্ || ১, ১৮৪. ১৮ ||
মধ্বাজ্যং গুডতাম্রঞ্চ কারবেল্লরসস্তথা |
দহনাচ্চ ভবেদ্রৌপ্যং সুবর্ণকরণং শৃণু || ১, ১৮৪. ১৯ ||
পীতং ধরত্তূপুষ্পঞ্চ সীসকঞ্চ পলং মতম্ |
লাঙ্গলিকায়াঃ শাখা চ স্বর্ণঞ্চ দহনাদ্ভবেৎ || ১, ১৮৪. ২০ ||
ধত্তূরবীজতৈলেন দীপপ্রজ্বলনাদ্ধর |
সমাধাবুপবিষ্টন্তু গগনস্থো ন পশ্যতি || ১, ১৮৪. ২১ ||
বৃষস্য মৃন্ময়স্যৈব যুক্তো ভেকো নিগৃহ্যতে |
শঙ্করাবয়বৈর্যুক্তো ধূপং ঘ্রাৎবা চ গর্জতি |
বিস্ময়ং কুরুতে চৈব বৃষবন্নাত্র সংশয়ঃ || ১, ১৮৪. ২২ ||
রাত্রৌ চ সার্ষপং তৈলং কীটং খদ্যো তনামকম্ |
তাভ্যাং দীপঃ প্রজ্বলিতো বাগ্মিজ্বালকলাপবৎ || ১, ১৮৪. ২৩ ||
চূর্ণং ছুচ্ছুন্দরীধং দগ্ধ্বা রুদ্র প্রলেপয়েৎ |
তপ্যতে তক্ষণাদ্দগ্ধো যদি সম্যক্প্রলেপয়েৎ |
চন্দনেন ভবেন্মোক্ষঃ পানাল্লেপাৎসুখী ভবেৎ || ১, ১৮৪. ২৪ ||
কুঞ্জরস্য মদাক্তস্য স্বয়ং নেত্রে শিববাঞ্জয়েৎ |
যুদ্ধে বিজয়তে সোঽপি মহাশূরশ্চ জায়তে || ১, ১৮৪. ২৫ ||
দন্তং ডুণ্ডুভসর্পস্য মুখে সঙ্গৃহ্য বৈ ক্ষিপেৎ |
তিষ্ঠতে চ জলান্তস্তু নির্বিকল্পং স্থলে যথা || ১, ১৮৪. ২৬ ||
কুম্ভীরনেত্রদংষ্ট্রাশ্চ অস্থীনি রুধিরং তথা |
বসাতৈলসমায়ুক্তমেকত্র তন্নিয়োজয়েৎ |
আত্মানং ম্লক্ষয়েত্তেন জলে তিষ্ঠেদ্দিনত্রয়ম্ || ১, ১৮৪. ২৭ ||
কুম্ভীরকস্য নেত্রাণি হৃদয়ং কচ্ছপস্য চ |
মূষিকস্য বসাস্থীনি শিশুমারবসা তথা |
এতান্যেকত্র সংলেপাজ্জলে তিষ্ঠেদ্যথা গৃহে || ১, ১৮৪. ২৮ ||
লোহচূর্ণং তক্রপীতং পাণ্ডুরোগহরং ভবেৎ |
তণ্ডুলীয় কগোক্ষূরমূলং পীতং পয়োন্বিতম্ || ১, ১৮৪. ২৯ ||
কমলাদিহরম্পিতং মুখরোগহরং তথা |
জাতীমূলং তক্রপীতং কোলমূলং ৎবজীর্ণনুৎ || ১, ১৮৪. ৩০ ||
সতক্রং কুশমলং বা মর্কটী মূলমেব বা |
কাঞ্জিকেন চ বাকুচ্যা মূলং বৈ দন্তরোগনুৎ || ১, ১৮৪. ৩১ ||
তথেন্দ্রবারুণীমূলং বারিপীতং বিষাদিহৃৎ |
সুরভিকামূলপা নাদ্বা তন্নাশো ভবেচ্ছিব || ১, ১৮৪. ৩২ ||
শিরোরোগহরং লেপাদ্গুঞ্জাচূর্ণং সকাঞ্জিকম্ |
বলা চাতিবলা যষ্টী শর্করা মধুসংযুতা || ১, ১৮৪. ৩৩ ||
বন্ধ্যাগর্ভকরী পীতা নাত্র কার্যা বিচারণা |
শ্বেতাপরাজিতামূলং পিপ্পলীশুণ্ঠিকায়ুতম্ || ১, ১৮৪. ৩৪ ||
পরিপিষ্টং শিরোলেপাচ্ছিরঃ শূলবিনাশনম্ |
নির্গুণ্ডিকাশিখাং পীৎবা গণ্ডমালাং বিনাশয়েৎ || ১, ১৮৪. ৩৫ ||
কেতকীপত্রজং ক্ষারং গুডেন সহ ভক্ষয়েৎ |
তক্রেণ শরপুঙ্খাং বা পীৎবা প্লীহাং বিনাশয়েৎ || ১, ১৮৪. ৩৬ ||
মাতুলঙ্গস্য নির্যাসং গুডাজ্যেন সমন্বিতম্ |
বাতপিত্তজশূলানি হন্তি বৈ পানয়োগতঃ |
শুণ্ঠী সৌবর্চলং হিঙ্গু পীতং হৃদয়রোগনুৎ || ১, ১৮৪. ৩৭ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
বৈদ্যশাস্ত্রে চতুরশীত্যধিকশততমোঽধ্যায়ঃ

শ্রীগরুডমহাপুরাণম্-১৮৫
হরিরুবাচ |
আং গণপতয়ে ইতি অয়ং গণপতের্ন্মন্ত্রো ধনবিদ্যাপ্রদায়কঃ || ১, ১৮৫. ১ ||
ইমমষ্টসহস্রঞ্চ জপ্ত্বা বদ্ধ্বা শিখাং ততঃ |
ব্যবহারে জয়ঃ স্যাচ্চ শতং জাপান্নৃণাং প্রিয়ঃ || ১, ১৮৫. ২ ||
তিলানাং তু ঘৃতাক্তানাং কৃষ্ণানাং রুদ্র হোময়েৎ |
অষ্টোত্তরসহস্রন্তু রাজা বশ্যস্ত্রিভির্দিনৈঃ || ১, ১৮৫. ৩ ||
অষ্টম্যাঞ্চ চতুর্দশ্যামুপোষ্যাভ্যর্চ্য বিঘ্নরাট্ |
তিলাক্ষতানাং জুহুয়াদষ্টোত্তরসহস্রকম্ |
অপাজিতঃ স্যাদ্যুদ্ধে চ সর্বে তঞ্চ সিষেবিরে || ১, ১৮৫. ৪ ||
জপ্ত্বা চাষ্টসহস্রন্তু ততশ্চাষ্টশতেন হি |
শিখাং বদ্ধ্বা রাজকুলে ব্যবহারে জয়ো ভবেৎ || ১, ১৮৫. ৫ ||
হ্রীঙ্কারং সবিসর্গঞ্চ প্রাতঃ কালে নরস্তু যঃ |
স্ত্রীণাং ললাটে বিন্যস্য বশতাং নয়তি ধ্রুবম্ || ১, ১৮৫. ৬ ||
সুসমাহিতচিত্তেন বিন্যস্য প্রমদালয়ে |
সোৎকামাং কামিনীং কুর্যান্নাত্র কার্যা বিচারণা || ১, ১৮৫. ৭ ||
জুহুয়াদয়ুতং যস্তু শুচিঃ প্রয়তমানসঃ |
দৃষ্টিমাত্রে সদা তস্য বশ্যমায়ান্তি যোষিতঃ || ১, ১৮৫. ৮ ||
মনঃ শিলাপত্রকঞ্চ সগোরোচনকুঙ্কুমম্ |
কৃত এভিশ্চ তিলকে বশ্যমায়ান্তি যোষিতঃ || ১, ১৮৫. ৯ ||
ভৃঙ্গরাট্সহদেবা চ বচা শ্বেতাপরাজিতা |
তেনৈব তিলকং কৃৎবা ত্রৈলোক্যং বশতাং নয়েৎ || ১, ১৮৫. ১০ ||
গোরোচনা মীনপিত্তমাভ্যাঞ্চ কৃতবর্তিকঃ |
যঃ পুমাংস্তিলকং কুর্যাদ্বামহস্তকনিষ্ঠয়া |
স করোতি বশে সর্বং ত্রৈলোক্যং নাত্র সংশয়ঃ || ১, ১৮৫. ১১ ||
গোরোচনা মহাদেব ! ধাতুশোণিতভাবিতা |
এতৈর্বৈতিলকং কৃৎবা সা নরং যং নিরীক্ষতে |
তৎক্ষণাত্তং বশে কুর্যা ন্নাত্র কার্যা বিচারণা || ১, ১৮৫. ১২ ||
নাগেশ্বরঞ্চ শৈলেয়ং ৎবক্পত্রঞ্চ হরীতকী |
চন্দনং কুষ্ঠসূক্ষ্মৈলারক্তশালিসমন্বিতা || ১, ১৮৫. ১৩ ||
এতৈর্ধূপো বশকরঃ স্মরবাণৈঃ স্মারার্দনঃ |
রতিকালে মহাদেব পার্বতীপ্রিয় শঙ্কর || ১, ১৮৫. ১৪ ||
নিজশুক্রং গৃহী ৎবা তু বামহস্তেন যঃ পুমান্ |
কামিনীচরণং বামং লিম্পেৎস স্যাৎস্ত্রিয়াঃ প্রিয়ঃ || ১, ১৮৫. ১৫ ||
সৈন্ধবঞ্চ মহাদেব পারাবতমলং মধু |
এভির্লিপ্তে তু লিঙ্গে বৈ কামিনীবশকৃদ্ভবেৎ || ১, ১৮৫. ১৬ ||
পুষ্পাণি পঞ্চরক্তানি গৃহীৎবা যানি কানি চ |
তত্তুল্যঞ্চ প্রিয়ঙ্গুঞ্চ পেষয়েদেকয়োগতঃ |
অনেন লিপ্তলিঙ্গস্য কামিনীবশতামিয়াৎ || ১, ১৮৫. ১৭ ||
হয়গন্ধা চ মঞ্জিষ্ঠা মালতীকুসুমানি চ |
শ্বেতসষর্প এতৈশ্চ লিপ্তলিঙ্গঃ স্ত্রিয়াঃ প্রিয়ঃ || ১, ১৮৫. ১৮ ||
মূলন্তু কাকজঙ্ঘায়া দুগ্ধপীতন্তু শোষনুৎ |
অশ্বগন্ধানাগবলাগুডমাষনিষেবিণঃ |
রূপং ভবেদ্যথা তদ্বন্নবয়ৌবনচারিণাম্ || ১, ১৮৫. ১৯ ||
লৌহচূর্ণসমায়ুক্তং ত্রিফলাচূর্ণমেব বা |
মধুনা সেবিতং রুদ্র পরিণামাখ্যশূলনুৎ || ১, ১৮৫. ২০ ||
ক্বথিতোদকপানন্তু শম্বূকক্ষারকং তথা |
মৃগশৃঙ্গং হ্যগ্নিদগ্ধং গব্যাজ্যেন সমন্বিতম্ |
পীত হৃৎপৃষ্ঠশূলানাং ভবেন্নাশকরং শিব || ১, ১৮৫. ২১ ||
হিঙ্গু সৌবর্চলং শুণ্ঠী বৃষধ্বজ মহৌষধম্? |
এভিস্তু ক্বথিতং বারি পীতং বৈ সর্বশূলনুৎ || ১, ১৮৫. ২২ ||
অপামার্গস্য বৈ মূলং সামুদ্রলবণান্বিতম্ |
আস্বাদি তমজীর্ণস্য শূলস্য স্যাদ্বিমর্দনম্ || ১, ১৮৫. ২৩ ||
বটরোহাঙ্কুরো রুদ্র তণ্ডুলোদকঘর্ষিতঃ |
পীতঃ সতক্রোঽতীসারং ক্ষয়ং নয়তি শঙ্কর || ১, ১৮৫. ২৪ ||
অঙ্কোটমূলং কর্ষার্ধং পিষ্টং তণ্ডুলবারিণা |
সর্বাতীসারগ্রহণীং পীতং হরতি ভূতপ || ১, ১৮৫. ২৫ ||
মরীচশুণ্ঠিকুটজৎবক্চূর্ণঞ্চ গুডান্বিতম্ |
ক্রমাত্তদ্দ্বিগুণং পীতং গ্রহণীব্যাধিনাশনম্ || ১, ১৮৫. ২৬ ||
শ্বেতাপরাজিতামূলং হরিদ্রাসিক্থতণ্ডুলাঃ |
অপামার্গত্রিকটুকমেষাঞ্চ বটিকা শিব |
বিষূচিকামহাব্যাধিং হরত্যেব ন সংশয়ঃ || ১, ১৮৫. ২৭ ||
ত্রিফলাগুরু ভূতেশ শিলাজতু হরীতকী |
একৈকমেষাং চূর্ণন্তু মধুনা চ বিমিশ্রিতম্ |
পীতং সর্বঞ্চ মেহন্তু ক্ষয়ং নয়তি শঙ্কর || ১, ১৮৫. ২৮ ||
অর্কক্ষীরপ্রস্থমেকং তিলতৈলং তথৈব চ |
মনঃ শিলামরীচানাং সিন্দূরস্য পলং পলম্ || ১, ১৮৫. ২৯ ||
চূর্ণং কৃৎবা তাম্রপাত্রে ৎবাতপৈঃ শোষয়েত্ততঃ |
পীতং স্নুহীগতং দুগ্ধং সৈন্ধবং শূলনুদ্ভবেৎ || ১, ১৮৫. ৩০ ||
ত্রিকটুত্রিফলানক্তং তিলতৈলং তথৈব চ |
মনঃ শিলা নিম্বপত্রং জাতীপুষ্পমজাপয়ঃ || ১, ১৮৫. ৩১ ||
তন্মূত্রং সঙ্খনাভিশ্চ চন্দনং ঘর্ষয়েত্ততঃ |
এভিশ্চ বর্তিকাং কৃৎবা ৎবক্ষিণী চাঞ্জয়েত্ততঃ || ১, ১৮৫. ৩২ ||
নশ্যতে পটলং কাচং পুষ্পঞ্চ তিমিরাদিকম্ |
বিভীতকস্য বৈ চূর্ণং সমধু শ্বাসনাশনম্ || ১, ১৮৫. ৩৩ ||
পিপ্পলীত্রিফলাচূর্ণং মধুসৈন্ধবসংযুতম্ |
সর্বরোগজ্বরশ্বাসশোষপীনসহৃদ্ভবেৎ || ১, ১৮৫. ৩৪ ||
দেবদারোশ্চ বৈ চূর্ণং অজামত্রেণ ভাবয়েৎ |
একবিংশতিবারংবৈৎবক্ষিণী তেন চাঞ্জয়েৎ |
রাত্র্যন্ধতা পটলতা নশ্যেন্নির্লোমতা তথা || ১, ১৮৫. ৩৫ ||
পিপ্পলীকেতকং রুদ্র হরিদ্রামলকং বচা |
সর্বাক্ষিরোগা নশ্যেয়ুঃ সক্ষীরাদঞ্জনাত্ততঃ || ১, ১৮৫. ৩৬ ||
কাকজঙ্ঘাশিগ্রুমূলে মুখেন বিধৃতে শিব |
চর্বিৎবা দন্তকীটানাং বিনাশো হি ভবেদ্ধর || ১, ১৮৫. ৩৭ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
মন্ত্রতন্ত্রবৈদ্যপ্রয়োদৃপঞ্চাশীত্যধিশততমোঽধ্যায়ঃ

শ্রীগরুডমহাপুরাণম্-১৮৬
হরিরুবাচ |
পীতঃ সারো গুডূচ্যাশ্চ মধুনা চ প্রমেহনুৎ |
পীতং গোহালিকামূলং তিলদধ্যাজ্যসংযুতম্ || ১, ১৮৬. ১ ||
নিরুদ্ধমূত্রং ক্বথিতং নিবর্তয়তি শঙ্কর |
তথা হিক্কাং হরেৎপীতং সৌবর্চলয়ুতঞ্চ বৈ || ১, ১৮৬. ২ ||
গোরক্ষকর্কটীমূলং পিষ্টং শীতোদকেন চ |
পীতং দিনত্রয়েণৈব নাশয়েদ্রুদ্র শর্করাম্ || ১, ১৮৬. ৩ ||
পিষ্ট্বা বৈ মালতীমূলং গ্রীষ্মকালে সমাহিতম্ |
সাধিতং ছাগদুগ্ধেন পতিং শর্কস্যান্বিতম্ |
হরেন্মূত্রনিরোধঞ্চ হরেদ্বৈ পাণ্ডুশর্করাম্ || ১, ১৮৬. ৪ ||
দ্বিজয়ষ্ট্যাশ্চ বৈ মূলং পিষ্টং তণ্ডুলবারিণা |
গণ্ডমালাং হরেল্লেপাদসাধ্যং গলগণ্ডকম্ || ১, ১৮৬. ৫ ||
রসাঞ্জনং হরীতক্যাশ্চূর্ণং তেনৈব গুণ্ঠনাৎ |
নাশয়েৎপুরুষো ব্যাধীন্নাত্র কার্যা বিচারণা || ১, ১৮৬. ৬ ||
করবীরমূললেপাদ্বৈ লেপাৎপূগফলস্য চ |
পুংব্যাধির্নশ্যতে রুদ্র যোগমন্যং বদাম্যহম্ || ১, ১৮৬. ৭ ||
দন্তীমূলং হরিদ্রা চ চিত্রকং তস্য লেপনাৎ |
ভগন্দরবিনাশঃ স্যাদন্যং যোগং বদাম্যহম্ |
জলৌকাজগ্ধরক্তঞ্চ ভগন্দরমুমাপতে || ১, ১৮৬. ৮ ||
ত্রিফলাজলঘৃষ্টঞ্চ মার্জারাস্থি বিলেপিতম্ |
ততো ন প্রস্ত্রবেদ্রক্তং নাত্র কার্যা বিচারণা || ১, ১৮৬. ৯ ||
হরিদ্রানেকবারঞ্চ স্নুহীক্ষীরেণ ভাবিতা |
বটিকার্ঽশোবিনাশায় তল্লেপাদ্বৃষভধ্বজ |
ঘোষাফলং সৈন্ধবঞ্চ পিষ্ট্বা চার্শোহরং পরম্ || ১, ১৮৬. ১০ ||
গব্যাজ্যং সাধিতং পীতং পলাশক্ষারবারিণা |
ত্রিগুণেন ত্রিকটুকং অর্শাংসি ক্ষপয়েচ্ছিব || ১, ১৮৬. ১১ ||
বিল্বস্য চ ফলং দগ্ধং রক্তার্শঃ প্রবিনাশনম্ |
জগ্ধবা কৃষ্ণতিলানেব নবনীতয়ুতানপি || ১, ১৮৬. ১২ ||
শুণ্ঠীচূর্ণং যবক্ষারয়ুক্তং তুল্যগুডান্বিতম্ |
অগ্নিবৃদ্ধিং করোত্যেব প্রত্যূষে বৃষভধ্বজ || ১, ১৮৬. ১৩ ||
শুণ্ঠ্যা চ ক্বথিতং বারি পীতং চাগ্নিং করোতি বৈ |
হরীতকীং সৈন্ধবঞ্চ চিত্রকং রুদ্র পিপ্পলী || ১, ১৮৬. ১৪ ||
চূর্ণমুষ্ণোদকেনৈষাং পীতং চাতিক্ষুধাকরম্ |
সাজ্যং সূকরমাংসং বৈ পীতং চাতিক্ষুধাকরম্ || ১, ১৮৬. ১৫ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
ষডশীত্যধিকশততমোঽধ্যায়ঃ

শ্রীগরুডমহাপুরাণম্-১৮৭
হরিরুবাচ |
হস্তিকর্ণপলাশস্য পত্রাণি? চূর্ণয়েদ্ধর |
সর্বরোগবিনির্মুক্তং চূর্ণং পলশতং শিব || ১, ১৮৭. ১ ||
সক্ষীরং ভক্ষীতং কুর্যাৎসপ্তাহেন বৃষধ্বজ |
নরং শ্রুতিধরং রুদ্র মৃগেন্দ্রগতিবিক্রমম্ || ১, ১৮৭. ২ ||
পদ্মরাগপ্রতীকাশংযুক্তং দশশতায়ুষা |
ষোডশাব্দাকৃতিং রুদ্র সততং দুগ্ধভোজনাৎ || ১, ১৮৭. ৩ ||
মধুসর্পিঃসমায়ুক্তং দুগ্ধমায়ুষ্করং ভবেৎ |
তজ্জগ্ধং মধুনা সার্ধং দশবর্ষ সহস্রিণম্ || ১, ১৮৭. ৪ ||
কুর্যান্নরং শ্রুতিধরং প্রমদাজনবল্লভম্ |
দধ্না নিত্যং ভক্ষিতন্তু বজ্রদেহকরং ভবেৎ || ১, ১৮৭. ৫ ||
কেশরাজিসমায়ুক্তং নরং বর্ষসহস্রিণম্ |
তচ্চ কাঞ্জিকসংযুক্তং নরং কুর্যাচ্চ ভক্ষিতম্ || ১, ১৮৭. ৬ ||
শতবর্ষং দিব্যদেহং বলীপলিতবর্জিতম্ |
জগ্ধং ত্রিফলয়া ক্ষৌদ্রং চক্ষুষ্মন্তং করোতি বৈ || ১, ১৮৭. ৭ ||
অন্ধঃ পশ্যেত্তু চূর্ণস্য সাজ্যস্যৈব তু ভক্ষণাৎ |
মহিষীক্ষীরসংযুক্তস্তল্লেপঃ কৃষ্ণকেশকৃৎ || ১, ১৮৭. ৮ ||
খল্বাটস্য চ বৈ কেশা ভবন্তি বৃষভধ্বজ |
তৈলয়ুক্তেন চূর্ণেন বলীপলিতনাশনম্ || ১, ১৮৭. ৯ ||
তদুদ্বর্তনমাত্রেণ সর্বরাগঃ প্রমুচ্যতে |
সচ্ছাগক্ষীরচূর্ণেন দৃষ্টিঃ স্যান্মাসতোঽঞ্জনাৎ || ১, ১৮৭. ১০ ||
পলাশস্য চ বীজানি শ্রাবণে বিতুষাণি চ |
গৃহীৎবা নবনীতেন তেষাং চূর্ণং চ ভক্ষয়েৎ || ১, ১৮৭. ১১ ||
কর্ষার্ধমেকং সেবেত নৎবা নিত্যং হরিং প্রভুম্ |
পুরাণষষ্টিধান্যস্য পথ্যমম্বু পিবন্হর |
জীবেদ্বর্ষসহস্রাণি বলীপলিতবর্জিতঃ || ১, ১৮৭. ১২ ||
ভৃঙ্গরাজস্য বৈ মূলং পুষ্যর্ক্ষে তু সমাহৃতম্ |
বিধায় তস্য চূর্ণং বৈ সসৌবীরঞ্চ ভক্ষয়েতং || ১, ১৮৭. ১৩ ||
মাসমাত্রপ্রয়োগেণ বলীপলিতবর্জিতঃ |
শতানি পঞ্চ জীবেচ্চ নরো নাগবলো ভবেৎ |
ভবেচ্ছ্রুতিধরো রুদ্র পুষ্যর্ক্ষে চৈব ভক্ষণাৎ || ১, ১৮৭. ১৪ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
আয়ুষ্করয়োগোদৃসপ্তাশীত্যধিকশততমোঽধ্যায়ঃ

শ্রীগরুডমহাপুরাণম্-১৮৮
হরিরুবাচ |
নির্ব্রণঃ স্যাৎপূয়ংহীনো প্রহারো ঘৃপূরিতঃ |
অপামার্গস্য বৈ মূলং হস্তাভ্যাঞ্চ বিমর্দিতম্ |
তদ্রসেন প্রহারস্য রক্তস্ত্রাবো ন পূরণাৎ || ১, ১৮৮. ১ ||
রুদ্র লাঙ্গলিকামূলং চেক্ষুদর্ভস্তথৈব চ |
তেন ব্রণমুখং লিপ্তং শল্যং নিঃ স রতি ব্রণাৎ |
চিরকালপ্রবিষ্টোঽপি তেন মার্গেণ শঙ্কর || ১, ১৮৮. ২ ||
বালমূলং মেষশৃঙ্গীমূলং বা বারিঘর্ষিতম্ |
তেন লিপ্তং চিরং জাতং ব্রণং নাড্যাঃ প্রশাম্যতি || ১, ১৮৮. ৩ ||
জগ্ধং মাহিষপধ্না চ যুক্তং কোদ্রবভক্তকম্ |
হিঙ্গুমূলস্য বৈ চূর্ণং দত্তং নাডীব্রণাপহম্ || ১, ১৮৮. ৪ ||
ব্রহ্ময়ষ্টিফলং পিষ্টং বারিণা তেনলেপিতম্ |
তেন ঘৃষ্টং রক্তদোষঃ প্রণশ্যতি ন সংশয়ঃ || ১, ১৮৮. ৫ ||
যবভস্ম বিডঙ্গঞ্চ গন্ধপাষাণমেব চ |
শুণ্ঠিরেষাঞ্চৈব চূর্ণং ভ্বিতং রুধিরেণবৈ || ১, ১৮৮. ৬ ||
কৃকলাসস্য তল্লিপ্তং বিদ্রধিং নাশয়েচ্ছিব |
সৌভাঞ্জনস্য বীজানি ৎবতসীমসিনা সহ || ১, ১৮৮. ৭ ||
সৌরসর্ষপয়ুক্তানি সর্বাণ্যেতানি শঙ্কর |
পিষ্টান্যনম্লতক্রেণ গ্রন্থিকং নাশয়েদ্ধি বৈ || ১, ১৮৮. ৮ ||
শ্বেতাপরাজিতামূলং পিষ্টং তণ্ডুলবারিণা |
তেন নস্যপ্রদানাৎস্যাদ্ভূতবৃন্দস্য বিদ্রবঃ || ১, ১৮৮. ৯ ||
অগস্ত্যপুষ্পনস্যং বৈ সমরীচং তু শূলহৃৎ |
ভুজঙ্গচর্ম বৈ হিঙ্গু নিম্বপত্রং তথা যবাঃ |
গৌরসর্ষম এভিঃ স্যাল্লেপো ভূতহরঃ শিব || ১, ১৮৮. ১০ ||
গোরোচনা মরীচানি পিপ্পলী সৈন্ধবং মধু |
অঞ্জনং কৃতমেভিঃ স্যাদ্গ্রহভূতহরং শিব || ১, ১৮৮. ১১ ||
গুগ্গুলূলূকপুচ্ছাভ্যাং ধূপো গ্রহহরো ভবেৎ |
চাতুর্থিকজ্বরৈর্মুক্তো কৃষ্ণবস্ত্রাবগুণ্ঠিতঃ || ১, ১৮৮. ১২ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
ব্রণাচি দৃমাষ্টাশীত্যধিকশততমোঽধ্যায়ঃ

শ্রীগরুডমহাপুরাণম্-১৮৯
হরিরুবাচ |
শ্বেতাপরাজিতাপুষ্পরসেনাক্ষ্ণোশ্চ পূরণে |
পটলং নাশমায়াতি নাত্র কার্যা বিচারণা || ১, ১৮৯. ১ ||
মূলং গোক্ষুরকস্যৈব চর্বিৎবা নীললোহিত |
দন্তকীটব্যথা নশ্যেৎসুরাসুরবিমর্দন্ || ১, ১৮৯. ২ ||
নারী পুষ্পাদিনে পীৎবা গোক্ষীরেণোপবাসতঃ |
শ্বেতার্কস্য তু বৈ মূলং তস্যাস্তদ্গুল্মশূলনুৎ || ১, ১৮৯. ৩ ||
শ্বেতার্কপুষ্পং বিধিনা গৃহীতং পূর্বমন্ত্রিতম্ |
ঋতুশুদ্ধা চ ললনা কটৌ বদ্ধ্বা প্রসূয়তে || ১, ১৮৯. ৪ ||
হস্তবদ্ধং পলাশস্য অপামার্গস্য বা হর |
মূলং সর্বজ্বরহরং ভূতপ্রেতাদিনুদ্ভবেৎ || ১, ১৮৯. ৫ ||
পীতং বৃশ্চিকমূলঞ্চ প্রাতঃ পর্যুষিতাম্বুনা |
সার্ধং বিনাশয়েদ্দাহজ্বরঞ্চ পরমেশ্বর || ১, ১৮৯. ৬ ||
শিখায়াঞ্চৈব তদ্বদ্ধং ভবেদৈকাহিকাহিনুৎ |
পীতং পর্যুষিতাদ্ভিশ্চ ভবেৎসর্ববিষাপহৃৎ || ১, ১৮৯. ৭ ||
যস্য লজ্জালুকামূলং দীয়তে চ স্বরেতসা |
সার্ধং স বৈরং সংযাতি পুমান্স্ত্রী বা ন সংশয়ঃ || ১, ১৮৯. ৮ ||
পিষ্ট্বা গব্যঘৃতেনৈব পাঠামূলং পিবেত্তু যঃ |
সর্বং বিষং বিনশ্যেচ্চ নাত্র কার্যা বিচারণা || ১, ১৮৯. ৯ ||
মূলং পর্যুষিতোদেন শিরীষস্য যথা তথা |
রক্তচিত্রকমূলস্য রসস্য ভরণাদ্ধর |
কর্ণয়োঃ কামলাব্যাধিনাশঃ স্যান্নাত্র সংশয়ঃ || ১, ১৮৯. ১০ ||
শ্বেতকোকিলাক্ষমূলং ছাগীক্ষীরেণ সংযুতম্ |
ত্রিসপ্তাহেন বৈ পীতং ক্ষয়রোগং ক্ষয়ং নয়েৎ || ১, ১৮৯. ১১ ||
নারিকেলস্য বৈ পুষ্পং ছাগক্ষীরেণ সংযুতম্ |
পিবেচ্চ ত্রিবিধস্তস্য রক্তবাতো বিনশ্যতি || ১, ১৮৯. ১২ ||
কুর্যাৎসুদর্শনামূলং মাল্যেন সুসমাহৃতম্ |
কণ্ঠবদ্ধ ত্র্যাহিকাদিগ্রহভূতবিনাশনম্ || ১, ১৮৯. ১৩ ||
পুষ্পং ধবলগুঞ্জায়া গৃহীতং মূলমেব চ |
মুখে তু নিহিতং রুদ্র হরেন্নানাবিষং বহু || ১, ১৮৯. ১৪ ||
হস্তে বদ্ধং কাণ্ডয়ুক্তং কণ্ঠে বদ্ধং গ্রহাদিহৃৎ |
কৃষ্ণায়ান্তু চতুর্দশ্যাং কটিবদ্ধং সমাহৃতম্ |
সিংহাদিশ্বাপদাদ্ভীতিং হরেচ্চ নীললোহিত || ১, ১৮৯. ১৫ ||
বিষ্ণুক্রান্তামূলমীশ কর্ণবদ্ধন্তু ধারয়েৎ |
পট্টসূত্রেণ ভূতেশ মকরাদিভয়ং ন বৈ || ১, ১৮৯. ১৬ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
একোননবত্যধিকশততমোঽধ্যায়ঃ

শ্রীগরুডমহাপুরাণম্-১৯০
হরিরুবাচ |
অপরাজিতায়া মূলঞ্চ গোমূত্রেণ সমন্বিতম্ |
পীতঞ্চাশু হরত্যেব গণ্ডমালাং ন সংশয়ঃ || ১, ১৯০. ১ ||
অথেন্দ্রবারুণীমূলং বিধিনা পীতমীশ্বর |
জিঙ্গিণ্যৈরণ্ডকং রুদ্র শূকশিম্ব্যা সমন্বিতম্ |
শীতোদকঞ্চ তত্র্যস্তং বাহুগ্রীবাব্যথাং হরেৎ || ১, ১৯০. ২ ||
মাহিষং নবনীতঞ্চ অশ্বগন্ধা চ পিপ্পলী |
বচা কুষ্ঠদ্বয়ং লেপো লিঙ্গস্রোতস্তনার্তিহৃৎ || ১, ১৯০. ৩ ||
কুষ্ঠনাগবলাচূর্ণং নবনীতসমন্বিতম্ |
তল্লেপো যুবতীনাঞ্চ কুর্যাদ্বৃত্তোজকৌ শুভৌ || ১, ১৯০. ৪ ||
ইন্দ্রবারুণিকামূলং যস্য নাম্না সুদূরতঃ |
নিঃ ক্ষিপ্যতে সমুৎপাট্য তস্য প্লীহা বিনশ্যতি || ১, ১৯০. ৫ ||
পুনর্নবায়াঃ শুক্লায়া মূলং তণ্ডুলবারিণা |
পীতং বিদ্রধিনুৎস্যাচ্চ নাত্র কার্যা বিচারণা || ১, ১৯০. ৬ ||
কদলীদলক্ষারন্তু পানীয়েন প্রসাধিতম্ |
তস্যাদনাদ্বিনশ্যন্তি উদরব্যাধয়োঽখিলাঃ || ১, ১৯০. ৭ ||
কদল্যা মূলমাদায় গুডাজ্যেন সমন্বিতম্ |
অগ্নিনা সাধিতং জগ্ধমুদরস্থক্রিমীন্হরেৎ || ১, ১৯০. ৮ ||
নিত্যং নিম্বদলানাঞ্চ চূর্ণমামলকস্য চ |
প্রত্যূষে ভক্ষয়েচ্চৈব তস্য কুষ্ঠং বিনশ্যতি || ১, ১৯০. ৯ ||
হরীতকীবিডঙ্গঞ্চ হরিদ্রা সিতসর্ষপাঃ |
সোমরাজস্য মূলানি করঞ্জস্য চ রৌন্ধবম্ |
গোমূত্রপিষ্টান্যেতানি কুষ্ঠরোগহরাণি বৈ || ১, ১৯০. ১০ ||
একশ্চ ত্রিফলাভাগস্তথা ভাগদ্বয়ং শিবা |
সোমরাজস্য বীজানাং জগ্ধং পথ্যেন দদ্রুনুৎ || ১, ১৯০. ১১ ||
অম্লতক্রং সগোমূত্রং ক্বথিতং লবণান্বিতম্ |
কাংস্যঘৃষ্টং খরং লেপাৎকুষ্ঠদদ্রুবিনাশনম্ || ১, ১৯০. ১২ ||
হরিদ্রা হরিতালশ্চ দূর্বাগোমূত্রসৈন্ধবম্ |
অয়ং লেপো হন্তি দদ্রুং পামানং চ গরং তথা || ১, ১৯০. ১৩ ||
সোম রাজস্য বীজানি নবনীতয়ুতানি চ |
মধুনাস্বাদিতানি স্যুঃ শুক্লকুষ্ঠহরাণি বৈ |
তক্রান্নপানতো রুদ্র নাত্র কার্যা বিচারণা || ১, ১৯০. ১৪ ||
শ্বেতাপরা জিতামূলং বর্তিতং চাস্য বারিণা |
তল্লেপো রুদ্র মাসেন শুক্লকুষ্ঠবিনাশনঃ || ১, ১৯০. ১৫ ||
মাহিষং নবনীতঞ্চ সিন্দূরং সমরীচকম্ |
পামা বিলেপনান্নশ্যেদ্দুর্নামা বৃষভধ্বজ || ১, ১৯০. ১৬ ||
বিশুষ্কগাম্ভারীমূলং পক্বং ক্ষীরেণ সংযুতম্ |
ভক্ষিতং শুক্লপিত্তস্য বিনাশকরমীশ্বর || ১, ১৯০. ১৭ ||
মূলকস্য তু বীজানি হ্যপা মার্গরসেন বৈ |
পিষ্টানি তেন লেপেন সিধ্মকং রুদ্র নশ্যতি || ১, ১৯০. ১৮ ||
কদলীক্ষারসংযুক্তহরিদ্রা সিধ্মকাপহা |
রম্ভাপামার্গয়োঃ ক্ষার এরণ্ডেন বিমিশ্রিতঃ |
তদভ্যঙ্গান্মহাদেব ! সদ্যঃ সিধ্ম বিনশ্যতি || ১, ১৯০. ১৯ ||
কূষ্মাণ্ডনালক্ষারশ্চ সগোমূত্রশ্চ তত্ত্বতঃ |
জলপিষ্টা হরিদ্রা চ সিদ্ধা মন্দানলেনহি || ১, ১৯০. ২০ ||
মাহিষেণ পুরীষেণ বেষ্টিতা বৃষভধ্বজ |
অস্যা উদ্বর্তনং কুর্যাদঙ্গসৌষ্ঠবমীশ্বর || ১, ১৯০. ২১ ||
তিলসর্ষপসংযুক্তং হরিদ্রাদ্বয়কুষ্ঠকম্ |
তেনোদ্বর্তিতদেহঃ স্যাদ্দুর্গন্ধঃ সুরভিঃ পুমান্ || ১, ১৯০. ২২ ||
মনোহরশ্চানুদিনং দূর্বাণাং কাকজঙ্ঘায়া |
অর্জুনস্য তু পুষ্পাণি জম্বূপত্রয়ুতানি চ |
সলোধ্রাণি চ তল্লেপো দেহদুর্গন্ধতাং হরেৎ || ১, ১৯০. ২৩ ||
যুক্তং লোধ্রভবৈর্নোরৈশ্চূর্ণন্তু কনকস্য চ |
তেনোদ্বর্তিতদেহস্য ন স্যাদ্গ্রীষ্মপ্রবাধিকা || ১, ১৯০. ২৪ ||
দুগ্ধেনোষসি সেকশ্চ ঘর্মদোষশ্চ নশ্যতি |
কাকজঙ্ঘোদ্বর্তনন্তু হ্যঙ্গরাগকরং ভবেৎ || ১, ১৯০. ২৫ ||
মধুয়ষ্টী শর্করা চ বাসকস্য রসো মধু |
এতৎপীতং রক্তপিত্তকামলাপাণ্ডুরোগনুৎ || ১, ১৯০. ২৬ ||
রক্তপিত্তং হরেৎপীতো বাসকস্য রসো মধু |
প্রাতঃ কালে তোয়পানাৎপীনসং দারুণং হরেৎ || ১, ১৯০. ২৭ ||
বিভীতকস্য বৈ চূর্ণং পিপ্পল্যাঃ সৈন্ধবস্য চ |
পীতং সকাঞ্জিকং হন্তি স্বরভেদং মহেশ্বর || ১, ১৯০. ২৮ ||
চূর্ণমামলকং সেব্যং পীতং গব্যপয়োঽন্বিতম্ |
মনঃ শিলা বলামূলং কোলপণ চ গুগ্গুলুঃ || ১, ১৯০. ২৯ ||
জাতিপত্রং কোলপত্রং তথা চৈব মনঃ শিলা |
এভিশ্চৈব কৃতা বর্তির্বদর্যগ্নৌ মহেশ্বর |
ধূমপানং কাসহরং নাত্র কার্যা বিচারণা || ১, ১৯০. ৩০ ||
ত্রিফলাপিপ্পলীচূর্ণং ভক্ষিতং মধুনায়ুতম্ |
ভোজনাদৌ হি সমধু পিপাসাজ্ব(ৎব) রিতং হরেৎ || ১, ১৯০. ৩১ ||
বিল্বমূলঞ্চ সমধুগুডূচীক্বথিতং জলম্ |
পীতং হরেচ্চ ত্রিবধং ছর্দিং নৈবাত্রসংশয়ঃ |
পীতা দূর্বা ছর্দিনুৎস্যাৎপিষ্টাতণ্ডুলবারিণা || ১, ১৯০. ৩২ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
নবত্যধিকশততমোঽধ্যায়ঃ