১.১১ গরুডপুরাণ (অধ্যায় ১০১-১১০)

শ্রীগরুডমহাপুরাণম্-১০১
যাজ্ঞবল্ক্য উবাচ |
শ্রীকামঃ শান্তিকামো বা গ্রহদৃষ্ট্যভিচারবান্ |
গ্রহয়ঞ্জ্ঞং সমং কুর্যাদ্গহাশ্চৈতে বুধৈঃ স্মৃতাঃ || ১, ১০১. ১ ||
সূর্যঃ সোমো মঙ্গলশ্চ বুধশ্চৈব বৃহস্পতিঃ |
শুক্রঃ শনৈশ্চরো রাহুঃ কেতুর্গ্রহগণাঃ স্মৃতাঃ || ১, ১০১. ২ ||
তাম্রকাৎস্ফাটিকাদ্রক্তচন্দনাৎস্বর্ণকাদুভৌ |
রজতাদয়সঃ সীসাৎকাংস্যাদ্বর্ণান্নিবোধত || ১, ১০১. ৩ ||
রক্তঃ শুক্লস্তথা রক্তঃ পীতঃ পীতঃ সিতোসিতঃ |
কৃষ্ণঃ কৃষ্ণঃ ক্রমাদ্বর্ণা দ্রব্যাণি মুনয়স্ততঃ || ১, ১০১. ৪ ||
স্থাপয়েদ্গহবর্ণানি হোমার্থং প্রলিখেৎপটে |
স্নাপয়েদ্ধোময়েচ্চৈব গ্রহদ্রব্যৈর্বিধানতঃ |
সুবর্ণানি প্রদেয়ানি বাসাংসি সুসুমানি চ || ১, ১০১. ৫ ||
গন্ধাশ্চ বলয়শ্চৈব ধূপো দেয়শ্চগুগ্গুলুঃ |
কর্তব্যাস্তত্র মন্ত্রৈশ্চ চরবঃ প্রতিদৈবতম্ || ১, ১০১. ৬ ||
আকৃষ্ণেন ইমন্দেবা অগ্নির্মূর্ধাদিবঃ ককুৎ |
উব্দুধ্যস্বেতি জুহুয়াদেভিরেব যথাক্রমম্ || ১, ১০১. ৭ ||
বৃহস্পতেপরিদীয়েতি সর্বে অন্নাৎপরিসুতম্ |
শন্নোদেবী কয়ানশ্চ কেতুঙ্ক্রণ্বন্নিতি ক্রমাৎ || ১, ১০১. ৮ ||
অর্কঃ পলাশঃ খদিরস্ত্বপামার্গোঽথ পিপ্পলঃ |
ঔদুম্বরঃ শমী দূর্বা কুশাশ্চ সমিধঃ ক্রমাৎ || ১, ১০১. ৯ ||
হোতব্যা মধুসর্পির্ভ্যাং দধ্না চৈব সমন্বিতঃ |
গুডৌদনং পায়সং চ হবিষ্যং ক্ষীরষাষ্টিকম্ || ১, ১০১. ১০ ||
দধ্যোদনং হবিঃ পূপান্মাংসং চিত্রান্নমেব চ |
দদ্যাদ্গহক্রমাদেতান্গ্রহেভ্যো ভাজনং ততঃ || ১, ১০১. ১১ ||
ধেনুঃ শঙ্খস্তথানড্বান্হেম বাসো হয়স্তথা |
কৃষ্ণা গৌরায়সং ছাগ এতা বৈ দক্ষিণাঃ ক্রমাৎ |
গ্রহাঃ পূজ্যাঃ সদা যস্মাদ্রজ্যাদি প্রাপ্যতে ফলম্ || ১, ১০১. ১২ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
যাজ্ঞবল্ক্যোক্তগ্রহশান্তিনিরূপণং নামৈকোত্তরশততমোঽধ্যায়ঃ

শ্রীগরুডমহাপুরাণম্-১০২
যাজ্ঞবল্ক্য উবাচ |
বানপ্রস্থাশ্রমং বক্ষ্যে তচ্ছৃণ্বন্তু মহর্ষয়ঃ |
পুত্রেষু ভার্যাং নিঃ ক্ষিপ্য বনং গচ্ছেৎসহৈব বা || ১, ১০২. ১ ||
বানপ্রস্থো ব্রহ্মচারী সাগ্নিঃ সোপাসনঃ ক্ষমী |
অফালকৃষ্টেনাগ্নীংশ্চ পিতৃদেবাতিথীংস্তথা || ১, ১০২. ২ ||
ভৃত্যাংস্তু তর্পয়েচ্ছ্মশ্রুজটালোমভৃদাত্মবান্ |
দান্তস্ত্রিষবণস্নায়ী নিবৃত্তশ্চ প্রতিগ্রহাৎ || ১, ১০২. ৩ ||
স্বাধ্যায়বান্ধ্যানশীলঃ সর্বভূতহিত রতঃ (তিঃ) |
অহ্নো মাসস্য মধ্যে বা কুর্যাদ্বার্থপরিগ্রহম্ || ১, ১০২. ৪ ||
কৃতং ত্যজেদাশ্বয়ুজে যুঞ্জেৎকালং ব্রতাদিনা |
পক্ষে মাসে থবাশ্নীয়াদ্দন্তোলূখলিকো ভবেৎ || ১, ১০২. ৫ ||
চান্দ্রায়ণী স্বপেদ্ভূমৌ কর্ম কুর্যাৎফলাদিনা |
গ্রীষ্মে পঞ্চাগ্নিমধ্যস্থো বর্ষাসু স্থণ্ডিলেশয়ঃ || ১, ১০২. ৬ ||
আর্দ্রবাসাস্তু হেমন্তে যোগাভ্যাসাদ্দিনং নয়েৎ |
যঃ কণ্টকৈর্বিতুদতি চন্দনৈর্যশ্চ লিম্পতি |
অক্রুদ্ধঃ পরিতুষ্টশ্চ সমস্তস্য চ তস্য চ || ১, ১০২. ৭ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
যাজ্ঞবল্ক্যোক্তবানপ্রস্থধর্মনিরূপণং নাম দ্ব্যুত্তরশততমোঽধ্যায়ঃ

শ্রীগরুডমহাপুরাণম্-১০৩
যাজ্ঞবল্ক্য উবাচ |
ভিক্ষোর্ধর্মং প্রবক্ষ্যামিতং নিবোধত সত্তমাঃ |
বনাদ্গৃহাদ্বা কৃৎবেষ্টিং সর্ববেদসদক্ষিণাম্ || ১, ১০৩. ১ ||
প্রাজাপত্যন্তদন্তেঽপি অগ্নিমারোপ্য চাত্মনি |
সর্বভূতহিতঃ শান্তস্ত্রিদণ্ডী সকমণ্ডলুঃ || ১, ১০৩. ২ ||
সর্বারামং পরিব্রজ্য ভিক্ষার্থো গ্রামমাশ্রয়েৎ |
অপ্রমত্তশ্চরেদ্ভৈক্ষ্যং সায়াহ্নে নাভিলক্ষিতঃ || ১, ১০৩. ৩ ||
রোহিতে ভিক্ষুকৈর্গ্রামে যাত্রামাত্র মলোলুপঃ |
ভবেৎপরমহংসো বা একদণ্ডী যমাদিতঃ || ১, ১০৩. ৪ ||
সিদ্ধয়োগস্ত্যজন্দেহমমৃতৎবমিহাপ্নুয়াৎ |
দাতাতিথিপ্রিয়ো জ্ঞানী গৃহী শ্রাদ্ধেঽপিমুচ্যতে || ১, ১০৩. ৫ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
যাজ্ঞবল্ক্যোক্তবানপ্রস্থসন্ন্যাসধর্মনিরূপণং নাম ত্র্যুত্তরশততমোঽধ্যায়ঃ

শ্রাগরুডমহাপুরাণম্-১০৪
যাজ্ঞবল্ক্য উবাচ |
নরকাৎপতাকোদ্ভূতাৎক্ষয়াৎপাপস্য কমণঃ |
ব্রহ্মহা শ্বা খরোষ্ট্রঃ স্যাদ্ভেকো যকঃ সুরাপ্যপি || ১, ১০৪. ১ ||
স্বর্ণচোরঃ কৃমিঃ কীটঃ তৃণাদির্গুরুতল্পগঃ |
ক্ষয়রোগী শ্যাবদন্তঃ কুনখী শিপিবিষ্টকঃ || ১, ১০৪. ২ ||
ব্রহ্মহত্যাক্রমাৎস্যুশ্চ তৎসর্বং বা শিশের্ভবেৎ |
অন্নহর্তা ময়াবী স্যান্মূকো বাগপহারকঃ || ১, ১০৪. ৩ ||
ধান্যহার্যতিরিক্তাঙ্গঃ পিশুনঃ পূতিনাসিকঃ |
তৈলাহারী তৈলপায়ী পূতিবক্ত্রস্তু সূচকঃ || ১, ১০৪. ৪ ||
ব্রহ্মস্বং কন্যকাং ক্রীৎবা বনে রক্ষো ভবেদ্বৃষঃ |
রত্নহৃদ্ধীনজাতঃ স্যাৎপত্রশাকহরঃ শিখী || ১, ১০৪. ৫ ||
গুচ্ছং চুচুন্দরী হৃৎবা ধান্যহৃন্মূষকো ভবেৎ |
ফলং কপিঃ পশূন্হৃৎবা ৎবজা কাকঃ পয়স্তথা || ১, ১০৪. ৬ ||
মাংসং গৃধ্রঃ পটং শ্বিত্রী চীরী লবণহারকঃ |
যথাকর্ম ফলং প্রাপ্য তির্যক্ত্বং কালপর্যয়াৎ || ১, ১০৪. ৭ ||
জায়ন্তে লক্ষণভ্রষ্টা দরিদ্রাঃ পুরুষাধমাঃ |
ততো নিষ্কলুষীভূতা কুলে মহতি যোগিনঃ || ১, ১০৪. ৮ ||
জায়ন্তে লক্ষণোপেতা ধনধান্যসমন্বিতাঃ || ১, ১০৪. ৯ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
যাজ্ঞবল্ক্যোক্তকর্মবিপাকনিরূপণং নাম চতুরুত্তরশততমোঽধ্যায়ঃ

শ্রীগরুডমহাপুরাণম্-১০৫
বিহিতস্যাননুষ্ঠানান্নিন্দিতস্য চ সেবনাৎ |
অনিগ্রহাচ্চেন্দ্রিয়াণাং নরঃ পতনমৃচ্ছতি || ১, ১০৫. ১ ||
তস্মাদ্যত্নেন কর্তব্যং প্রায়শ্চিত্তং বিশুদ্ধয়ে |
এবমস্যান্তরাত্মা চ লোকশ্চৈব প্রসদিতি || ১, ১০৫. ২ ||
লোকঃ প্রসীদেদাত্মৈবং প্রায়শ্চিত্তৈরঘক্ষয়ঃ |
প্রায়শ্চিত্তমকুর্বাণাঃ পশ্চাত্তাপবিবর্জিতাঃ || ১, ১০৫. ৩ ||
নরকান্যান্তি পাপা বৈ মহারৌরবরৌরবান্ |
তামিস্ত্রং লোহশঙ্কুং চ পূতিগন্ধসমাকুলম্ || ১, ১০৫. ৪ ||
হংসাভং লোহিতোদং চ সঞ্জীবননদীপথম্ |
মহানিলয়কাকোলমন্ধতামিস্ত্রবাপনম্ || ১, ১০৫. ৫ ||
অবীচিং কুম্ভীপাকং চ যান্তি পাপা হ্যপুণ্যতঃ |
ব্রহ্মহা মদ্যপঃ স্তেয়ী সংযোগী গুরুতল্পগঃ || ১, ১০৫. ৬ ||
গুরুনিন্দা বেদনিন্দা ব্রহ্মহত্যাসমে হ্যুভে |
নিষিদ্ধভক্ষণং জিহ্মক্রিয়াচরণমেব চ || ১, ১০৫. ৭ ||
রজস্বলামুখাস্বাদঃ সুরাপানসমানি তু |
অশ্বরত্নাদিহরণং সুবর্ণস্তেয়সমিতম্ || ১, ১০৫. ৮ ||
সখিভার্যাকুমারীষু স্বয়োনিষ্বন্ত্যজাসু চ |
সগোত্রাসু তথা স্ত্রীষু গুরুতল্পসমং স্মৃতম্ || ১, ১০৫. ৯ ||
পিতুঃ স্বসারং মাতুশ্চ মাতুলানীং স্নুষাম পি |
মাতুঃ সপত্নীং ভগিনীমাচার্যতনয়াং তথা || ১, ১০৫. ১০ ||
আচার্যপত্নীং স্বসুতাং গচ্ছংস্তু গুরুতল্পগঃ |
ছিত্ত্বা লিঙ্গং বধস্তস্য সকামায়াঃ স্ত্রিয়াস্তথা || ১, ১০৫. ১১ ||
গোবধো ব্রাত্যতাস্তেয়মৃণানাং চ পরিক্রিয়া |
অনাহিতাগ্নিতাপণ্যবিক্রয়ঃ পরিবেদনম্ || ১, ১০৫. ১২ ||
ভৃত্যাচাধ্যয়নাদানং ভৃতকাধ্যা পনন্তথা |
পারদার্যং পারিবিত্ত্যং বার্ধুষ্যং লবণক্রিয়া || ১, ১০৫. ১৩ ||
সচ্ছূদ্রবিট্ক্ষত্ত্রবন্ধোর্নিন্দিতার্থোপজীবিতা |
নাস্তিক্যং ব্রতলোপশ্চ শূল্যং গোশ্বেব বিক্রয়ঃ || ১, ১০৫. ১৪ ||
পিতৃমাতৃসুহৃত্ত্যাগস্তডাগারামবিক্রয়ঃ |
কন্যায়াদূষণ চৈব পরিবিন্দকয়াজনম্ || ১, ১০৫. ১৫ ||
কন্যাপ্রদানং তস্যৈব কৌটিল্যং ব্রতলোপনম্ |
আত্মনোর্ঽথে ক্রিয়ারম্ভো মদ্যপস্ত্রীনিষেবণম্ || ১, ১০৫. ১৬ ||
স্বাধ্যায়াগ্নিসুতত্যাগো বান্ধবত্যাগ এব চ |
অসচ্ছাস্ত্রাভিগমনং ভার্যাত্মপরিবি ক্রয়ঃ || ১, ১০৫. ১৭ ||
উপপাপানি চোক্তানি প্রায়শ্চিত্তং নিবোধত |
শিরঃ কপালধ্বজবান্ভিক্ষাশী কর্ম বেদয়ন্ || ১, ১০৫. ১৮ ||
ব্রহ্মহা দ্বাদশ সমা মিতভুক্ষুদ্ধিমাপ্নুয়াৎ |
লোমভ্যঃ স্বাহেতি চ বা লোমপ্রভৃতি বৈ তনুম্ || ১, ১০৫. ১৯ ||
মজ্জান্তাং জুহুয়াদ্বাপি স্বস্বমন্ত্রৈর্যথাক্রমম্ |
শুদ্ধিঃ স্যাদ্ব্রাহ্মণত্রাণাৎকৃৎবৈবং শুদ্ধিরেব চ || ১, ১০৫. ২০ ||
নিরাতঙ্কং দ্বিজং গাং চ ব্রাহ্মণার্থে হতোঽপি বা |
অরণ্যে নিয়তো জুপ্ত্বা ত্রিঃ কৃৎবো বেদসংহিতাম্ || ১, ১০৫. ২১ ||
সরস্বতীং বা সংসেব্যং ধনং পাত্রে সমর্পয়েৎ |
যাগস্থক্ষত্ত্রবিড্ঘাৎচরেদ্ব্রহ্মহণো ব্রতম্ || ১, ১০৫. ২২ ||
গর্ভহা বা যথাবর্ণং তথাত্রেয়ীনিষূ (সূ) দনম্ |
চরেদ্ব্রতমহৎবাপি ঘাতনার্থমুপাগতঃ || ১, ১০৫. ২৩ ||
দ্বিগুণং সবনস্থে তু ব্রাহ্মণে ব্রতমাচরেৎ |
সুরাম্বুঘৃতগোমূত্রং পীৎবা শুদ্ধিঃ সুরাপিণঃ || ১, ১০৫. ২৪ ||
অগ্নিবর্ণং ঘৃতং বাপি চীরবাস জটী ভবেৎ |
ব্রতং ব্রহ্মহণঃ কুর্যাৎপুনঃ সংস্কারমর্হতি || ১, ১০৫. ২৫ ||
রেতেবিণ্মূত্রপানাচ্চ সুরাপা ব্রাহ্মণী তথা |
পতিলোকপরিভ্রষ্টা গৃধ্রী স্যাৎসূকরী শুনী || ১, ১০৫. ২৬ ||
স্বর্ণহারী দ্বিজো রাজ্ঞে দত্ত্বা তু মুসলং তথা |
কর্মণঃ খ্যাপনং কৃৎবা হতস্তেন ভবেচ্ছুচিঃ || ১, ১০৫. ২৭ ||
আত্মতুল্যং সুবর্ণং বা দত্ত্বা শুদ্ধিমিয়াদ্দ্বিজঃ |
শয়নে সার্ধমায়স্যা যোষিতা নিভৃতং স্বপেৎ || ১, ১০৫. ২৮ ||
উচ্ছেদ্য লিঙ্গং বৃষণং নৈরৃত্যামুৎসৃজোদ্দিশি |
প্রাজাপত্যং চরেৎকৃচ্ছ্রং সমা বা গুরুতল্পগঃ || ১, ১০৫. ২৯ ||
চান্দ্রায়ণং বা ত্রীন্মাসনভ্যসেদ্বেদসংহিতাম্ |
পঞ্চগব্যং পিবেদ্গোঘ্নো মাসমাসীত সংযতঃ || ১, ১০৫. ৩০ ||
গোষ্ঠেশয়ো গোঽনুগামী গোপ্রদানেন শুধ্যতি |
উপপাতকশুদ্ধিঃ স্যাচ্চান্দ্রায়ণব্রতেন চ || ১, ১০৫. ৩১ ||
পয়সা বাপি মাসেন পরাকেণাপি বা পুনঃ |
ঋষভৈকং সহস্রং গা দদ্যাৎক্ষত্ত্রবধে পুমান্ || ১, ১০৫. ৩২ ||
ব্রহ্মহত্যাব্রতং বাপি বৎসরত্রিতয়ং চরেৎ |
বৈশ্যহাব্দং চ (ব্দাংশ্চ) রেদেতদ্দদ্যাদ্বৈকশতং গবাম্ || ১, ১০৫. ৩৩ ||
ষণ্মাসাচ্ছূদ্রহা চৈতদ্দদ্যাদ্বা ধেনবো দশ |
অপ্রদুষ্টাং স্ত্রিয়ং হৎবা শূদ্রহত্যাব্রতং চরেৎ || ১, ১০৫. ৩৪ ||
মার্জারগোধানকুলপশুমণ্ডূকঘাতনাৎ |
পিবেৎক্ষীরং ত্র্যহং পাপী কৃচ্ছ্রং বাপ্যধিকং চরেৎ || ১, ১০৫. ৩৫ ||
গজে নীলান্বৃষান্পঞ্চ শুকে বৎসং দ্বিহায়নম্ |
খরাজমেষেষু বৃষো দেয়ঃ ক্রৌঞ্চে ত্রিহায়ণঃ || ১, ১০৫. ৩৬ ||
বৃক্ষগুল্মলতাবীরুচ্ছেদনে জপ্যমৃক্ষতম্ |
অবকীর্ণো ভবেদ্গত্ত্বা ব্রহ্মচারী চ যোষিতম্ || ১, ১০৫. ৩৭ ||
গর্দভং পশুমালভ্য নৈরৃতং চ বিশুধ্যতি |
মধুমাংসাশনে কার্যং কৃচ্ছ্রং শেষব্রতানি চ || ১, ১০৫. ৩৮ ||
কৃচ্ছ্রত্রয়ং গুরুঃ কুর্যান্ম্রিয়েৎপ্রহিতো যদি |
প্রতিকূলং গুরোঃ কৃৎবা প্রসাদ্যৈব বিশুধ্যতি || ১, ১০৫. ৩৯ ||
রিপূন্ধান্যপ্রদানাদ্যৈঃ স্নেহাদ্যৈর্বাপ্যুপক্রমেৎ |
ক্রিয়মাণোপকারে চ মৃতে বিপ্রে ন পাতকম্ || ১, ১০৫. ৪০ ||
মহাপাপোপপাপাভ্যাং যোভিশস্তো মৃষা পরম্ |
অব্ভক্ষো মাসমাসীত স জাপী নিয়তন্দ্রিয়ঃ || ১, ১০৫. ৪১ ||
অনিয়ুক্তো ভ্রাতৃভার্যাং গচ্ছংশ্চান্দ্রায়ণং চরেৎ |
ত্রিরাত্রান্তে ঘৃতং প্রাশ্য গৎবোদক্যাং শুচির্ভবেৎ || ১, ১০৫. ৪২ ||
গোষ্ঠে বসন্ব্রহ্মচারী মাসমেকং পয়োব্রতী |
গায়ত্ত্রীজপ্যনিরতো মুচ্যতেঽসৎপ্রতিগ্রহাৎ || ১, ১০৫. ৪৩ ||
ত্রিঃ কৃচ্ছ্রমাচরেদ্ব্রাত্যয়াজকোঽপি চরন্নপি |
বেদপ্লাবী যবাশ্যব্দং ত্যক্ত্বা চ শরণাগতান্ || ১, ১০৫. ৪৪ ||
প্রাণায়ামত্রয়ং কুর্যাৎখরয়ানোষ্ট্রয়ানগঃ |
নগ্নঃ স্নাৎবা চ সুপ্ত্বা চ গৎবা চৈব দিবা স্ত্রিয়ম্ || ১, ১০৫. ৪৫ ||
গুরুন্ত্বং কৃত্য হুঙ্কৃত্য বিপ্রং নির্জিত্য বাদ তঃ |
প্রসাদ্য তং চ মুনয়স্ততো হ্যুপবসেদ্দিনম্ || ১, ১০৫. ৪৬ ||
বিপ্রে দণ্ডোদ্যমে কৃচ্ছ্রমতিকৃচ্ছ্রং নিপাতনে |
দেশং কালং বয়ঃ শক্তিং পাপং চাবেক্ষ্য যত্নতঃ || ১, ১০৫. ৪৭ ||
প্রায়শ্চিতং প্রকল্প্যং স্যাদ্যত্র যোক্তা তু নিষ্কৃতিঃ |
গর্ভত্যাগো ভর্তৃনিন্দা স্ত্রীণাং পতনকারণম্ || ১, ১০৫. ৪৮ ||
এষ গ্রহান্তিকে দোষঃ তস্মাত্তাং দূতরস্ত্যজেৎ |
বিখ্যাতদোষঃ কুর্বীত গুরোরনুমতং ব্রতম্ || ১, ১০৫. ৪৯ ||
অসংবিখ্যাতদোষস্তু রহস্যং ব্রতমাচরেৎ |
ত্রিরাত্রোপোষণো জপ্ত্বা ব্রহ্মহা ৎবঘমর্ষণম্ || ১, ১০৫. ৫০ ||
অন্তর্জলে বিশুদ্ধে চ দত্ত্বা গাং চ পয়স্বিনীম্ |
লোমভ্যঃ স্বাহেতি ঋচা দিবসং মারুতাশনঃ || ১, ১০৫. ৫১ ||
জলে জপ্ত্বা তু জুহুয়াচ্চাৎবারিংশদ্ঘৃতাহুতীঃ |
ত্রিরাত্রোপোষণো হুৎবা কূষ্মাণ্ডীভির্ঘৃতং শুচিঃ || ১, ১০৫. ৫২ ||
সুরাপঃ স্বর্ণহারী চ রুদ্রজাপী জলে স্থিতঃ |
সহস্রশীর্ষাজপ্যেন মুচ্যতে গুরুতল্পগঃ || ১, ১০৫. ৫৩ ||
প্রাণায়ামশতং কুর্যাৎসর্বপাপাপনুক্ত্যে |
ওঙ্কারাভিয়ুতং সোমসলিলপ্রশনাচ্ছুচিঃ || ১, ১০৫. ৫৪ ||
কৃৎবোপবাসং রেতোবিণ্মূত্রাণাং প্রাশনেদ্বিজঃ |
অজ্ঞানকৃতপাপস্য নাশঃ সন্ধ্যাত্রয়ে কৃতে || ১, ১০৫. ৫৫ ||
রুদ্রৈকাদশজপ্যাদ্ধি পাপনাশো ভবেদ্দ্বিজৈঃ |
বেদাভ্যাসরতং শান্তং পঞ্চয়জ্ঞক্রিয়াপরম্ || ১, ১০৫. ৫৬ ||
ন স্পৃশন্তি হা পাপানি চাশু স্মৃৎবা হ্যপোহিতঃ |
জপ্ত্বা সহস্রগায়ত্ত্রীং শুচির্ব্রহ্মহণাদৃতে || ১, ১০৫. ৫৭ ||
ব্রহ্মচর্যং দয়া ক্ষান্তির্ধ্যানং সত্যমকল্কতা |
অহিংসা স্তেয়মাধুর্যে দমশ্চৈতে যমাঃ স্মৃতাঃ || ১, ১০৫. ৫৮ ||
স্নানমৌনোপবাসোজ্যাস্বাধ্যায়োপস্থনিগ্রহঃ |
তপোঽক্রোধো গুরোর্ভক্তিঃ শৌচং চ নিয়মাঃ স্মৃতাঃ || ১, ১০৫. ৫৯ ||
পঞ্চগব্যং তু গোক্ষীরং দধিমূত্রশকৃদ্ঘৃতম্ |
জগ্ধ্বা পরেহ্ন্যুপবসেৎকৃচ্ছ্রং সান্তপনং চরেৎ || ১, ১০৫. ৬০ ||
পৃথক্সান্তপনৈর্দ্রব্যৈঃ ষডহঃ সোপবাসকঃ |
সপ্তাহেন তু কৃচ্ছ্রোঽযং মহাসান্তপনঃ স্মৃতঃ || ১, ১০৫. ৬১ ||
পর্ণোদুম্বররাজীববীল্বপত্রকুশোদকৈঃ |
প্রত্যেকং প্রত্যহাভ্যস্তৈঃ পর্ণ কৃচ্ছ্র উদাহৃতঃ || ১, ১০৫. ৬২ ||
তপ্তক্ষীরঘৃতাম্বূনামেকৈকং প্রত্যহং পিবেৎ |
একরাত্রোপবাসশ্চ তপ্তকৃচ্ছ্রশ্চ পাবনঃ || ১, ১০৫. ৬৩ ||
একভক্তেন নক্তেন তথৈবায়াচিতেন চ |
উপবাসেন চকন পাদকৃচ্ছ্র উদাহৃতঃ || ১, ১০৫. ৬৪ ||
যথা কথঞ্চিত্ত্রিগুণঃ প্রজাপত্যোঽযমুচ্যতে |
অয়মেবাতিকৃচ্ছ্রঃ স্যাৎপাণিপূর্ণাম্বুভোজনাৎ || ১, ১০৫. ৬৫ ||
কৃচ্ছ্রাতিকৃচ্ছ্রং পয়সা দিবসানেকবিংশতিম্ |
দ্বাদশাহোপবাসৈশ্চ পরাকঃ সমুদাহৃতঃ || ১, ১০৫. ৬৬ ||
পিণ্যাকাচামতক্রাম্বুসক্তূনাং প্রতিবাসরম্ |
একৈকমুপবাসশ্চ কৃচ্ছ্রঃ সৌম্যোঽযমুচ্যতে || ১, ১০৫. ৬৭ ||
এষাং ত্রিরাত্রমভ্যাসাদেকৈকং স্যাদ্যথাক্রমাৎ |
তুলাপুরুষ ইত্যেষ জ্ঞেয়ঃ পঞ্চদশাহিকঃ || ১, ১০৫. ৬৮ ||
তিথিপিণ্ডাংশ্চরেদ্বৃদ্ধ্যা শুক্লে শিখ্যণ্ডসমিতান্ |
একৈকং হ্রাসয়েৎকৃষ্ণে পিণ্ডং চান্দ্রায়ণং চরেৎ || ১, ১০৫. ৬৯ ||
যথাকথঞ্চিৎপিণ্ডানাং চৎবারিংশচ্ছতদ্বয়ম্ |
মাসেনৈবোপভুঞ্জীত চান্দ্রায়ণমথাপরম্ || ১, ১০৫. ৭০ ||
কৃৎবা ত্রিষবণং স্নানং পিণ্ডং চান্দ্রায়ণং চরেৎ |
পবিত্রাণি জপেৎপিণ্ডান্গায়ত্ত্র্যা চাভিমন্ত্রয়েৎ || ১, ১০৫. ৭১ ||
অনাদিষ্টেষু পাপেষু শুদ্ধিশ্চান্দ্রায়ণেন তু |
ধর্মার্থো যশ্চরেদেতচ্চন্দ্রস্যৈতি সলোকতাম্ || ১, ১০৫. ৭২ ||
কৃচ্ছ্রকৃদ্ধর্মকামস্তু মহতীং শ্রিয়মশ্নুতে || ১, ১০৫. ৭৩ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
যাজ্ঞবল্ক্যোক্তপ্রায়শ্চিত্তবিবেকো নাম পঞ্চোত্তরশততমোঽধ্যায়ঃ

শ্রীগরুডমহাপুরাণম্-১০৬
যাজ্ঞবল্ক্য উবাচ |
প্রেতা (ত) শৌচং প্রবক্ষ্যামি তচ্ছৃণুধ্বং যতব্রতাঃ |
ঊনদ্বিবর্ষং নিখনেন্ন কুর্যাদু দকং ততঃ || ১, ১০৬. ১ ||
আ শ্মশানাদনুব্রজ্য ইতরৈর্জ্ঞাতিভির্যুতঃ |
যমসূক্তং তথা জপ্যং জপদ্ভির্লৌকিকাগ্নিনা || ১, ১০৬. ২ ||
স দগ্ধব্য উপেতশ্চৈদাহিতাগ্ন্যাবৃতার্থবৎ |
সপ্তমাদ্দশমাদ্বাপি জ্ঞাতয়োঽভ্যুপয়ান্ত্যপঃ || ১, ১০৬. ৩ ||
অপনঃ শোশুচদঘমনেন পিতৃদিঙ্মুখাঃ |
এবং মাতামহাচার্যপত্নীনাং চোদকক্রিয়াঃ || ১, ১০৬. ৪ ||
কামোদকাঃ পুত্রসখিস্বস্ত্রীয়শ্বশুরর্ত্বিজঃ |
নামগোত্রেণ হ্যুদকং সকৃৎসিঞ্চন্তি বাগ্যতাঃ || ১, ১০৬. ৫ ||
পাষণ্ডপতিতানাং তু ন কুর্যুরুদকক্রিয়াঃ |
নব্রহ্মচারিণো ব্রাত্যা যোষিতঃ কামগাস্তথা || ১, ১০৬. ৬ ||
সুরাপ্যস্ত্বাত্মঘাতিন্যো নাশৌচোদকভাজনাঃ |
ততো ন রোদিতব্যং হি ৎবনিত্যা জীবসং স্থিতিঃ || ১, ১০৬. ৭ ||
ক্রিয়া কার্যা যথাশক্তি ততো গচ্ছেদ্গৃহান্প্রতি |
বিদশ্য নিম্বপত্রাণি নিয়তা দ্বারি বেশ্মনঃ || ১, ১০৬. ৮ ||
আচম্যাথাগ্নিমুদকং গোময়ং গৌরসর্ষপান্ |
প্রবিশেয়ুঃ সমালভ্য কৃৎবাশ্মনি পদং শনৈঃ || ১, ১০৬. ৯ ||
প্রবেশনাদিকং কর্ম প্রেতসংস্পর্শনাদপি |
ঈক্ষতাং তৎক্ষণাচ্ছুদ্ধিঃ পরেষাং স্নানসংযমাৎ || ১, ১০৬. ১০ ||
ক্রীতলব্ধাশনা ভূমৌ স্বপেয়ুস্তে পৃথক্পৃথক্ |
পিণ্ডয়জ্ঞকৃতা দেয়ং প্রেতায়ান্নং দিনত্রয়ম্ || ১, ১০৬. ১১ ||
জলমেকাহমাকাশে স্থাপ্যং ক্ষীরং তু মৃন্ময়ে |
বৈতানোপাসনাঃ কার্যাঃ ক্রিয়াশ্চ শ্রুতিচোদিতাঃ || ১, ১০৬. ১২ ||
আদন্তজন্মনঃ সদ্যঃ আচূডং নৈশিকী স্মৃতা |
ত্রিরাত্রমা ব্রতাদেশাদ্দশরাত্রমতঃ পরম্ || ১, ১০৬. ১৩ ||
ত্রিরাত্রং দশরাত্রং বা শাবমাশৌচমুচ্যতে |
ঊনদ্বিবর্ষ উভয়োঃ সূতকং মাতুরেব হি || ১, ১০৬. ১৪ ||
অন্তরা জন্মমরণে শেষাহোভির্বিশুধ্যতি |
দশ দ্বাদশ বর্ণানাং তথা পঞ্চদশৈব চ || ১, ১০৬. ১৫ ||
ত্রিংশদ্দিনানি চ তথা ভবতি প্রেতসূতকম্ |
অহস্ত্বদত্তকন্যাসু বালেষু চ বিশোধনম্ || ১, ১০৬. ১৬ ||
গুর্বন্তেবাস্যনূচানমাতুলশ্রোত্রিয়েষু চ |
অনৌরসেষু পুত্রেষু ভার্যাস্বন্যগতাসু চ || ১, ১০৬. ১৭ ||
নিবাসরাজনি তথা তদহঃ শুদ্ধিকার(ণ) ম্ |
হতানাং নৃপগোবিপ্রৈরন্বক্ষং চাত্মঘাতিনাম্ || ১, ১০৬. ১৮ ||
বিষাদ্যৈশ্চ হতানাং চ নাশৌচং পৃথিবীপতেঃ |
সত্রিব্রতিব্রহ্মচারিদাতৃব্রহ্মবিদাং তথা || ১, ১০৬. ১৯ ||
দানে বিবাহে যজ্ঞে চ সঙ্গ্রামে দেশবিপ্লবে |
আপদ্যপি চ কষ্টায়াং সদ্যঃ শৌচং বিধীয়তে || ১, ১০৬. ২০ ||
কালোঽগ্নিঃ কর্মমৃদ্বায়ুর্মনো জ্ঞানং তপো জপঃ (লম্) |
পশ্চাত্তাষো নিরাহারঃ সর্বেষাং শুদ্ধিহেতবঃ || ১, ১০৬. ২১ ||
অকার্যকারিণাং দানং বেগো নদ্যাস্তু শুদ্ধিকৃৎ |
ক্ষাত্ত্রেণ কর্মণা জীবেদ্বিশাং বাপ্যাপদি দ্বিজঃ || ১, ১০৬. ২২ ||
ফলসোমক্ষৌমবীরুদ্দধি ক্ষীরং ঘৃতং জলম্ |
তিলোদনরসক্ষারমধু লাক্ষা শৃতং হবিঃ || ১, ১০৬. ২৩ ||
বস্ত্রোপলাসবং পুষ্পং শাকমৃচ্চর্মপাদুকম্ |

এণৎবচং চ কৌশেয়ং লবণং মাসমেব চ || ১, ১০৬. ২৪ ||
পিণ্যাকমূলগন্ধাংশ্চ বৈশ্যবৃত্তো ন বিক্রয়েৎ |
ধর্মার্থং বিক্রয়ং নেয়াস্তিলা ধান্যেন তৎসমাঃ || ১, ১০৬. ২৫ ||
লবণাদি ন বিক্রীয়াত্তথা চাপদ্গতো দ্বিজঃ |
হীনাদ্বিপ্রো বিগৃহ্ণংশ্চ লিপ্যতে নার্কবদ্দ্বিজঃ || ১, ১০৬. ২৬ ||
কুর্যাৎকৃষ্যাদিকং তদ্বদবিক্রেয়া হয়াস্তথা |
বুভুক্ষিতস্ত্র্যং স্থিৎবা দৃষ্ট্বা বৃত্তিবিবর্জিতম্ |
রাজা ধর্ম্যাং প্রকুর্বীত বৃত্তিং বিপ্রাদিকস্য চ || ১, ১০৬. ২৭ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
যাজ্ঞবল্ক্যোক্তাশৌচাপদ্বৃত্ত্যোর্নিরূপণং নাম পডুত্তরশততমোঽধ্যায়ঃ

শ্রীগরুডমহাপুরাণম্-১০৭
সূত উবাচ |
পরাশরোঽব্রবীদ্ব্যাসং ধর্মং বর্ণাশ্রমাদিকম্ |
কল্পেকল্পে ক্ষয়োৎপত্ত্যা ক্ষীয়ন্তে নু প্রজাদয়ঃ || ১, ১০৭. ১ ||
শ্রুতিঃ স্মৃতিঃ সদাচরো যঃ কশ্চিদ্বে দকর্তৃকঃ |
বেদাঃ স্মৃতা ব্রাহ্মণাদৌ ধর্মা মন্বাদিভিঃ সদা || ১, ১০৭. ২ ||
দানং কলিয়ুগে ধর্মঃ কর্তারং চ কলৌ ত্যজেৎ |
পাপকৃত্যং তু তত্রৈব শাপং ফলতি বর্ষতঃ || ১, ১০৭. ৩ ||
আচারাৎপ্রাপ্নুয়াৎসর্বং ষট্কর্মাণি দিনেদিনে |
সন্ধ্যা স্নানং জপো হোমো দেবাতিথ্যাদিপূজনম্ || ১, ১০৭. ৪ ||
অপূর্বঃ সুব্রতী বিপ্রো হ্যপূর্বা যতয়স্তদা |
ক্ষত্ত্রিয়ঃ পরসৈন্যানি জিৎবা পৃথ্বীং প্রপালয়েৎ || ১, ১০৭. ৫ ||
বণিক্কৃষ্যাদি বৈশ্যে স্যাদ্দ্বিজভক্তিশ্চ শূদ্রকে |
অভক্ষ্যভক্ষণাচ্চৌর্যাদগম্যা গমনাৎপতেৎ || ১, ১০৭. ৬ ||
কৃষিং কুর্বন্দ্বিজঃ শ্রান্তং বলীবর্দং ন বাহয়েৎ |
দিনার্ধং স্নানয়োগাদিকারী বিপ্রাংশ্চ ভোজয়েৎ || ১, ১০৭. ৭ ||
নির্বপেৎপঞ্চ যজ্ঞানি ক্রূরে নিন্দাং চ কারয়েৎ |
তিলাজ্যং ন বিক্রীণিত সূনায়জ্ঞমঘান্বিতঃ || ১, ১০৭. ৮ ||
রাজ্ঞো দত্ত্বা তু ষড্ভাগং দেবতানাং চ বিংশতিম্ |
ত্রয়স্ত্রিংশচ্চ বিপ্রাণাং কৃষিকর্তা ন লিপ্যতে || ১, ১০৭. ৯ ||
কর্ষকাঃ ক্ষত্ত্রবিট্ছূদ্রাঃ খলেঽদত্ত্বা তু চৌরকঃ |
দিনত্রয়েণ শুধ্যেত ব্রাহ্মণঃ প্রেতসূতকে || ১, ১০৭. ১০ ||
ক্ষত্ত্রো দশাহাদ্বৈশ্যাস্তু দ্বাদশাহান্মাসি শূদ্রকঃ |
যাতি বিপ্রো দশাহাত্তু ক্ষত্ত্রো দ্বাদশকাদ্দিনাৎ || ১, ১০৭. ১১ ||
পঞ্চদশাহাদ্বৈশ্যস্তু শূদ্রো মাসেন শুধ্যতি |
একপিণ্ডাস্তু দায়াদাঃ পৃথগ্দ্বারনিকেতনাঃ || ১, ১০৭. ১২ ||
জন্মনা চ বিপত্তৌ চ ভবেত্তেষাং চ সূতকম্ |
চতুর্থে দশরাত্রং স্যাৎষণ্ণিশাঃ পুংসি পঞ্চমে || ১, ১০৭. ১৩ ||
ষষ্ঠে চতুর হাচ্ছুদ্ধিঃ সপ্তমে চ দিনত্রয়ম্ |
দেশান্তরে মৃতে বালে সদ্যঃ শুদ্ধির্যতো মৃতে || ১, ১০৭. ১৪ ||
অজাতদন্তা যে বালা যে চ গর্ভাদ্বিনিঃ সৃতাঃ |
ন তেষামগ্নিসংস্কারো ন পিণ্ডং নোদকক্রিয়া || ১, ১০৭. ১৫ ||
যদি গর্ভো বিপদ্যত স্ত্রবতে বাপি যোষিতঃ |
যাবন্মাসং স্থিতো গর্ভস্তাবদ্দিনানি সূতকম্ || ১, ১০৭. ১৬ ||
আনামকরণাৎসদ্য আচূডান্তাদহর্নিশম্ |
আব্রতাত্তু ত্রিরাত্রেণ তদূর্ধ্বন্দশভির্দিনৈঃ || ১, ১০৭. ১৭ ||
আচতুর্থাদ্ভবেৎস্ত্রবঃ পাতঃ পঞ্চমষষ্ঠয়োঃ |
ব্রহ্মচর্যা দগ্নিহোত্রান্নাশুদ্ধিঃ সঙ্গবর্জনাৎ || ১, ১০৭. ১৮ ||
শিল্পিনঃ কারবো বৈদ্যা দাসীদাসাশ্চ ভৃত্যকাঃ |
অগ্নিমাঞ্ছ্রোত্রিয়ো রাজা সদ্যঃ শৌচাঃ প্রকীর্তিতাঃ || ১, ১০৭. ১৯ ||
দশাহাচ্ছুধ্যতে মাতা স্নানাৎসূতে পিতা শুচিঃ |
সঙ্গাৎসূতৌ সূতকং স্যাদুপস্পৃশ্য পিতা শুচিঃ || ১, ১০৭. ২০ ||
বিবাহোৎসবয়জ্ঞেষু অন্তরা মৃতসূতকে |
পূর্বসঙ্কল্পিতাদন্যবর্জনং চ বিধীয়তে || ১, ১০৭. ২১ ||
মৃতেন শুধ্যতে সূতিঃ মৃতবজ্জাতকং জনৌ |
গোগ্রহাদৌ বিপন্নানামেকরাত্রং তু সূতকম্ || ১, ১০৭. ২২ ||
অনাথপ্রেতবহনাৎপ্রাণায়ামেন শুধ্যতি |
প্রেতশূদ্রস্য বহনান্ত্রিরাত্রমশুচির্ভবেৎ || ১, ১০৭. ২৩ ||
আত্মঘাতিবিষোদ্বন্ধকৃমিদষ্টে ন সংস্কৃতিঃ |
গোহতং কৃমিদষ্টং চ স্পৃষ্ট্বা কৃচ্ছ্রেণ শুধ্যতি || ১, ১০৭. ২৪ ||
অদুষ্টাপতিতং ভার্যা যৌবনে যা পরিত্যজেৎ |
সপ্তজন্ম ভবেৎস্ত্রীৎবং বৈধব্যং চ পুনঃ পুনঃ || ১, ১০৭. ২৫ ||
বালহত্যা ৎবগমনাদৃতৌ চ স্ত্রী তু সূকরি |
অগম্যা ব্রতকারিণ্যো ভ্রষ্টপানোদকক্রিয়াঃ || ১, ১০৭. ২৬ ||
ঔরসঃ ক্ষেত্রজঃ পুত্রঃ পিতৃজৌ পিণ্ডদৌ পিতুঃ |
পরিবিত্তেস্তু কৃচ্ছ্রং স্যাৎকন্যায়াঃ কৃচ্ছ্রমেব চ || ১, ১০৭. ২৭ ||
অতিকৃচ্ছ্রং চরেদ্দাতা হোতা চান্দ্রায়ণঞ্চরেৎ |
কুব্জবামনষণ্ডেষু গদ্গদেষু জডেষু চ || ১, ১০৭. ২৮ ||
জাত্যন্ধবধিরে মূকে ন দোষঃ পরিবেদনে |
নষ্টে মৃতে প্রব্রজিতে ক্লীবে বা পতিতে পতৌ || ১, ১০৭. ২৯ ||
পঞ্চস্বাপৎসু নারীণাং পতিরন্যো বিধীয়তে |
ভর্ত্রা সহমৃতা নারী রোমাব্দানি বসেদ্দিবি || ১, ১০৭. ৩০ ||
শ্বাদিদষ্টস্তু গায়ত্ত্র্যা জপাচ্ছুদ্ধো ভবেন্নরঃ |
দাহ্যো লোকাগ্নিনা বিপ্রশ্চাণ্ডালাদ্যৈর্হতোঽগ্নিমান্ || ১, ১০৭. ৩১ ||
ক্ষীরৈঃ প্রক্ষাল্য তস্যাস্থি স্বাগ্নিনা মন্ত্রতো দহেৎ |
প্রবাসে তু মৃতে ভূয়ঃ কৃৎবা কুশময়ং দহেৎ || ১, ১০৭. ৩২ ||
কৃষ্ণাজিনে সমাস্তীর্য ষট্শতানি পলাশজান্ |
শমীং শিশ্রে বিনিঃ ক্ষিপ্য অরণিং বৃষণে ক্ষিপেৎ || ১, ১০৭. ৩৩ ||
কণ্ডং দক্ষিণহস্তে তু বামহস্তে তথোপভৃৎ |
পার্শ্বে তূলূখলং দদ্যাৎপৃষ্ঠে তু মুসলং দদেৎ || ১, ১০৭. ৩৪ ||
উরে নিঃ ক্ষিপ্য দৃষদং তণ্ডুলাজ্যতিলান্মুখে |
শ্রোত্র চ প্রোক্ষণীং দাদ্যদাজ্যস্থালীং চ চক্ষুষোঃ || ১, ১০৭. ৩৫ ||
কর্ণে নেত্রে মুখে ঘ্রাণে হিরণ্যশকলান্ক্ষিপেৎ |
অগ্নিহোত্রোপকরণাদ্ব্রহ্মলোকগতির্ভবেৎ || ১, ১০৭. ৩৬ ||
অসৌ স্বর্গায় লোকায় স্বাহেত্যাজ্যাহুতিঃ সকৃৎ |
হংসসারসক্রৌঞ্চানাং চক্রবাকং চ কুক্রুটম্ || ১, ১০৭. ৩৭ ||
ময়রমেষঘাতী চ অহোরাত্রেণ শুধ্যতি |
পক্ষিণঃ সকলান্হৎবা অহোরাত্রেণ শুধ্যতি || ১, ১০৭. ৩৮ ||
সর্বাংশ্চতুষ্পদান্হৎবা অহোরাত্রো ষিতো জপেৎ |
শূদ্রং হৎবা চরেৎকৃচ্ছ্রমতিকৃচ্ছ্রং তু বৈশ্যহা |
ক্ষত্ত্রং চান্দ্রায়ণং বিপ্রং দ্বাবিংশাত্রিংশমাহরে (বহে) ৎ || ১, ১০৭. ৩৯ ||

ইতি শ্রীগারুডে মহাপুরাণে পূর্বখণ্ডে প্রথমাংশাক্যে আচারকাণ্ডে
পরাশরোক্তধর্মনিরূপণং নাম সপ্তোত্তরশততমোঽধ্যায়ঃ

শ্রীগরুডমহাপুরাণম্-১০৮
সূত উবাচ |
নীতিসারং প্রবক্ষ্যামি অর্থশাস্ত্রাদিসংশ্রিতম্ |
রাজাদিভ্যো হিতং পুণ্যমায়ুঃ স্বর্গাদিদায়কম্ || ১, ১০৮. ১ ||
সদ্ভিঃ সঙ্গং প্রকুর্বীত সিদ্ধিকামঃ সদা নরঃ |
নাসদ্ভিরিহলোকায় পরলোকায় বা হিতম্ || ১, ১০৮. ২ ||
বর্জয়েৎক্ষুদ্রসংবাদমদুষ্টস্য তু দর্শনম্ |
বিরোধং সহ মিত্রেণ সম্প্রীতিং শত্রুসেবিনা || ১, ১০৮. ৩ ||
মূর্খশিষ্যোপদেশেন দুষ্টস্ত্রীভরণেন চ |
দুষ্টানাং সম্প্রয়োগেণ পণ্ডিতোঽপ্যবসীদতি || ১, ১০৮. ৪ ||
ব্রাহ্মণং বালিশং ক্ষত্ত্রময়োদ্ধারং বিশং জডম্ |
শূদ্রমক্ষরসংযুক্তং দূরতঃ পরিবর্জয়েৎ || ১, ১০৮. ৫ ||
কালেন রিপুণাসন্ধিঃ কালে মিত্রেণ বিগ্রহঃ |
কার্যকারণমাশ্রিত্য কালং ক্ষিপতি পণ্ডিতঃ || ১, ১০৮. ৬ ||
কালঃ পচতি ভূতানি কালঃ সংহরতে প্রজাঃ |
কালঃ সুপ্তেষু জাগর্তি কালো হি দুরতিক্রমঃ || ১, ১০৮. ৭ ||
কালেষু হরতে বীর্যং কালে গর্ভে চ বর্ততে |
কালো জনয়তে সৃষ্টিং পুনঃ কালোঽপি সংহরেৎ || ১, ১০৮. ৮ ||
কালঃ সূক্ষ্মগতির্নিত্যং দ্বিবিধশ্চেহ ভাব্যতে |
স্থূলসঙ্গ্রহচারেণ সূক্ষ্মচারান্তরেণ চ || ১, ১০৮. ৯ ||
নীতিসারং সুরেন্দ্রায় ইমমূচ বৃহস্পতিঃ |
সর্বজ্ঞো যেন চেন্দ্রোঽভূদ্দৈত্যান্হৎবাপ্নুয়াদ্দিবম্ || ১, ১০৮. ১০ ||
রাজর্ষিব্রাহ্মণৈঃ কার্যং দেববিপ্রাদিপূজনম্ |
অশ্বমেধেন যষ্টব্যং মহাপাতকনাশনম্ || ১, ১০৮. ১১ ||
উত্তমৈঃ সহ সাঙ্গত্যং পণ্ডিতৈঃ সহ সৎকথাম্ |
অলুব্ধৈঃ সহ মিত্রৎবং কুর্বাণো নাবসীদতি || ১, ১০৮. ১২ ||
পরীবাদং পরার্থং চ পরিহাসং পরস্ত্রিয়ম্ |
পরবেশ্মনি বাসং চ ন কুর্বীত কদাচন || ১, ১০৮. ১৩ ||
পরোঽপি হিতবাবন্ধুর্বন্ধুরপ্যহিতঃ পরঃ |
অহিতো দেহজো ব্যাধির্হিতমারণ্যমৌষধম্ || ১, ১০৮. ১৪ ||
স বন্ধুর্যো হিতে যুক্তঃ স পিতা যস্তু পোষকঃ |
তন্মিত্রং যত্র বিশ্বাসঃ স দেশো যত্র জীব্যতে || ১, ১০৮. ১৫ ||
স ভৃত্যো যো বিধেয়স্তু তদ্বীজং যৎপ্ররোহতি |
সা ভার্যা যা প্রিয়ং ব্রূতে স পুত্রো যস্তু জীবতি || ১, ১০৮. ১৬ ||
স জীবতি গুণা যস্য ধর্মো যস্য স জীবতি |
গুণধর্মবিহীনো যো নিষ্ফল তস্য জীবনম্ || ১, ১০৮. ১৭ ||
সা ভার্যা যা গৃহে দক্ষা সা ভার্যায়া প্রিয়ংবদা |
সা ভার্যা যা পতিপ্রাণা সা ভার্যা যা পতিব্রতা || ১, ১০৮. ১৮ ||
নিত্য স্নাতা সুগন্ধা চ নিত্যং চ প্রিয়বাদিনী |
অল্পভুক্তাল্পভাষী চ সততং মঙ্গলৈর্যুতা || ১, ১০৮. ১৯ ||
সততং ধর্মবহুলা সততং চ পতিপ্রিয়া |
সততং প্রিয়বক্রী চ সততং ৎবৃতুকামিনী || ১, ১০৮. ২০ ||
এতদাদিক্রিয়ায়ুক্তা সর্বসৌ ভাগ্যবর্ধিনী |
যস্যেদৃশী ভবেদ্ভায়্যা স দেবেন্দ্রোন মানুষঃ || ১, ১০৮. ২১ ||
যস্য ভার্যা বিরূপাক্ষী কশ্মলা কলহপ্রিয়া |
উত্তরোত্তরবাদা স্যা সা জরা ন জরা জরা || ১, ১০৮. ২২ ||
যস্য ভার্যা শ্রিতান্যঞ্চ পরবেশ্মাভিকাঙ্ক্ষিণী |
কুক্রিয়া ত্যক্তলজ্জা চ সা জরা ন জরা জরা || ১, ১০৮. ২৩ ||
যস্য ভার্যা গুণজ্ঞা চ ভর্তারমনুগামিনী |
অল্পাল্পেন তু সন্তুষ্টা সা প্রিয়া ন প্রিয়া প্রিয়া || ১, ১০৮. ২৪ ||
দুষ্টা ভার্যা শঠং মিত্রং ভৃত্যশ্চোত্তরদায়কঃ |
সসর্পে চ গৃহে বাসোমৃত্যুরেব ন সংশয়ঃ || ১, ১০৮. ২৫ ||
ত্যজ দুর্জনসংসর্গং ভজ সাধুসমাগমম্ |
কুরু পুণ্যমহোরাত্র স্মর নিত্যমনিত্যতাম্ || ১, ১০৮. ২৬ ||
ব্যালীকণ্ঠপ্রদেশাহ্যপি চ ফণভৃদ্ভাষণা যা চ রৌদ্রী যা
কৃষ্ণা ব্যাকুলাগী রুধিরনয়নসংব্যাকুলা ব্যাঘ্রকল্পা |
ক্রোধে যৈবোগ্রবক্ত্রা স্ফুরদনলশিখা কাকজিহ্বা করালা সেব্যা ন
স্ত্রী বিদগ্ধা পরপুরগমনা ভ্রান্তচিত্তা বিরাক্ত || ১, ১০৮. ২৭ ||
সক্তিঃ সুতোকে সুকৃতং কৃতঘ্নে শতিং চ বহ্নৌ (সীতাপহৌ হ্যতপয়ৈব) ? হৈমে |
উৎপদ্যতে দৈববশাৎকদাচিদ্বেশ্যাসু রাগো ন ভবেৎকদাচিৎ || ১, ১০৮. ২৮ ||
ভুজঙ্গমে বেশ্মনি দৃষ্টিদৃষ্টে ব্যাধৌ চিকিৎসাবিনিবর্তিতে চ |
দেহে চ বাল্যাদিবয়োঽন্বিতে চ কালা বৃতোঽসৌ লভতে ধৃতিং কঃ || ১, ১০৮. ২৯ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
বৃহস্পতিপ্রোক্তনীতিসারনিরূপণং নামাষ্টোত্তরশততমোঽধ্যায়ঃ

শ্রীগরুডমহাপুরাণম্-১০৯
সূত উবাচ |
আপদর্থে ধনং রক্ষেদ্দারান্রক্ষেদ্ধনৈরপি |
আত্মানং সততং রক্ষেদ্দারৈরপি ধনৈরপি || ১, ১০৯. ১ ||
ত্যজেদকং কুলস্যার্থে গ্রামস্যার্থে কুলং ত্যজেৎ |
গ্রামং জনপদস্যার্থে আত্মার্থে পৃথিবীং ত্যজেৎ || ১, ১০৯. ২ ||
বরং হি নরকে বাসো ন তু দুশ্চরিতে গৃহে |
নরকাৎক্ষীয়তে পাপ কুগৃহান্ন নিবর্ততে || ১, ১০৯. ৩ ||
চলত্যেকেন পাদেন তিষ্ঠত্যেকেন বুদ্ধিমান্ |
ন পরীক্ষ্য পরং স্থানং পূর্বমায়তনং ত্যজেৎ || ১, ১০৯. ৪ ||
ত্যজেদ্দেশমসদ্বৃত্তং বাসং সোপদ্রবং ত্যজেৎ |
ত্যজেৎকৃপণরাজানং মিত্রং মায়াময়ং ত্যজেৎ || ১, ১০৯. ৫ ||
অর্থেন কিং কৃপণহস্তগতেন কেন জ্ঞানেন কিং বহুশঠাগ্রহসঙ্কুলেন |
রূপেণ কিং গুণপরাক্রমবর্জিতেন মিত্রেণ কিং ব্যসনকালপরাঙ্মুখেন || ১, ১০৯. ৬ ||
অদৃষ্টপূর্বা বহবঃ সহায়াঃ সর্বে পদস্থস্য ভবন্তি মিত্রাঃ |
অর্থৈর্বিহীনস্য পদচ্যুতস্য ভবত্যকালে স্বজনোঽপি শত্রুঃ || ১, ১০৯. ৭ ||
আপৎসু মিত্রং জানী যাদ্রণে শূরং রহঃ শুচিম্ |
মার্যা চ বিভবে ক্ষীণে দুর্ভিক্ষে চ প্রিয়াতিথিম্ || ১, ১০৯. ৮ ||
বৃক্ষং ক্ষীণফলং ত্যজন্তি বিহগাঃ শুষ্কং সরঃ সারসানির্দ্রব্যং
পুরুষং ত্যজন্তি গণিকা ভ্রষ্টং নৃপং মন্ত্রিণঃ |
পুষ্পং পর্যুষিতং ত্যজন্তি মধুপাঃ দর্গ্ধ বনান্তং মৃগাঃ সর্বঃ
কার্যবশাজ্জনো হি রমতে কস্যাস্তি কো বল্লভঃ || ১, ১০৯. ৯ ||
লুব্ধমর্থপ্রদানেন শ্লাধ্যমঞ্জলিকর্মণা |
মূর্খং ছন্দানুবৃত্ত্যা চ যাথাতথ্যেন পণ্ডিতম্ || ১, ১০৯. ১০ ||
সদ্ভাবেন হি তুষ্যন্তি দেবাঃ সৎপুরুষা দ্বিজাঃ |
ইতরেঃ খাদ্যপানেন মানদানেন পণ্ডিতাঃ || ১, ১০৯. ১১ ||
উত্তমং প্রণিপাতেন শঠং ভেদেন যোজয়েৎ |
নীচং স্বল্পপ্রদানেন সমং তুল্যপরাক্রমৈঃ || ১, ১০৯. ১২ ||
যস্যয়স্য হি যো ভাবস্তস্যতস্য হিতং বদন্ |
অনুপ্রবিশ্য মেধাবী ক্ষিপ্রমাত্মবশং নয়েৎ || ১, ১০৯. ১৩ ||
নদীনাং চ নখীনাং চ শৃঙ্গিণাং শস্ত্রপাণিনাম্ |
বিশ্বাসো নৈব গন্তব্যঃ স্ত্রিষু রাজকুলেষু চ || ১, ১০৯. ১৪ ||
অর্থনাশং মনস্তাপং গৃহে দুশ্চরিতানি চ |
বঞ্চনং চাপ মানং চ মতিমান্ন প্রিকাশয়েৎ || ১, ১০৯. ১৫ ||
হীনদুর্জনসংসর্গ অত্যন্তবিরহাদরঃ |
স্নেহোঽন্যগেহবাসশ্চ নারীসচ্ছীলনাশনম্ || ১, ১০৯. ১৬ ||
কস্য দোষঃ কুলে নাস্তি ব্যাধিনা কো পীডিতঃ |
কেন ন ব্যসনং প্রাপ্তং শ্রিয়ঃ কস্য নিরন্তরাঃ || ১, ১০৯. ১৭ ||
কোর্ঽথং প্রাপ্য ন গর্বিতো ভুবি নরঃ কস্যাপদোনাগতাঃ স্ত্রীভিঃ কস্য
ন খণ্ডিতং ভুবি মনঃ কো নাম রাজ্ঞাং প্রিয়ঃ |
কঃ কালস্য ন গোচরান্তরগতঃ কোর্ঽথো গতো গৌরবং কো বা
দুর্জনবাগুরানিপতিতঃ ক্ষেমেণ যাতঃ পুমান্ || ১, ১০৯. ১৮ ||
সুহৃৎস্বজনবন্ধুর্ন বুদ্ধির্যস্য ন চাত্মনি |
যস্মিন্কর্মণি সিদ্ধেঽপি ন দৃশ্যেত ফলোদয়ঃ |
বিপত্তৌ চ মহদ্দুঃখং তদ্বুধঃ কথমাচরেৎ || ১, ১০৯. ১৯ ||
যস্মিন্দেশে ন সমানং ন প্রীতির্ন চ বান্ধবাঃ |
ন চ বিদ্যাগমঃ কশ্চিত্তং দেশং পরিবর্জয়েৎ || ১, ১০৯. ২০ ||
ধনস্য যস্য রাজতো ভয়ং ন চাস্তি চৌরতঃ |
মৃতং চ যন্ন মুচ্যতে সমর্জয়স্ব তদ্ধনম্ || ১, ১০৯. ২১ ||
যদর্জিতং প্রাণহরৈঃ পরিশ্রমৈর্মৃতস্য তং বৈ বিভজন্তিরিক্থিনঃ |
কৃতং চ যদ্দুষ্কৃতমর্থলিপ্সয়া তদেব দোষোপহতস্য যৌতুকম্ || ১, ১০৯. ২২ ||
সঞ্চিতং নিহিতং দ্রব্যং পরামৃশ্যং মুহুর্মুহুঃ |
আখোরিব কদর্যস্য ধনং দুঃখায় কেবলম্ || ১, ১০৯. ২৩ ||
নগ্না ব্যসনিনো রূক্ষাঃ কপালাঙ্কিতপাণয়ঃ |
দর্শয়ন্তীহ লোকস্য অদাতুঃ ফলমীদৃশম্ || ১, ১০৯. ২৪ ||
শিক্ষয়ন্তি চ যাচন্তে দেহীতি কৃপণা জনাঃ |
অবস্থেয়মদানস্য মা ভূদেবং ভবানপি || ১, ১০৯. ২৫ ||
সঞ্চিতং ক্রতুশতৈর্ন যুজ্যতে যাচিতং গুণবতে ন দীয়তে |
তৎকদর্যপরিরক্ষিতং ধনং চোরপার্থিবগৃহে প্রয়ুজ্যতে || ১, ১০৯. ২৬ ||
ন দেবেভ্যো ন বিপ্রোভ্যো বন্ধুভ্যো নৈব চাত্মনে |
কদর্যস্য ধনং যাতি ৎবগ্নিতস্কররাজসু || ১, ১০৯. ২৭ ||
অতিক্লেশেন যেঽপ্যর্থা ধর্মস্যাতিক্রমেণ চ |
অরের্বা প্রণিপাতেন মা ভূতস্তে কদাচন || ১, ১০৯. ২৮ ||
বিদ্যাঘাতো হ্যনভ্যাসঃ স্ত্রীণাং ঘাতঃ কুচৈলতা |
ব্যাধীনাং ভোজনং জীর্ণং শত্রোর্ঘাতঃ প্রপঞ্চতা || ১, ১০৯. ২৯ ||
তস্করস্য বধো দণ্ডঃ কুমিত্রস্যাল্পভাষণম্ |
পৃথক্ষয়্যা তু নারীণাং ব্রাহ্মণস্যানিমন্ত্রণম্ || ১, ১০৯. ৩০ ||
দুর্জনাঃ শিল্পিনো দাসা দুষ্টাশ্চ পটহাঃ স্ত্রিয়ঃ |
তাডিতা মার্দবং যান্তি ন তে সৎকারভাজনম্ || ১, ১০৯. ৩১ ||
জানীয়াৎপ্রেষণে ভৃত্যান্বান্ধবান্ব্যসনাগমে |
মিত্রমাপদি কালে চ ভার্যাঞ্চ বিভবক্ষয়ে || ১, ১০৯. ৩২ ||
স্ত্রীণাং দ্বিগুণ আহারঃ প্রজ্ঞা চৈব চতুর্গুণা |
ষড্গুণো ব্যবসায়শ্চ কামশ্চাষ্টগুণঃ স্মৃতঃ || ১, ১০৯. ৩৩ ||
ন স্বপ্নেন জয়েন্নিদ্রাং ন কামেন স্ত্রিয়ং জয়েৎ |
ন চেন্ধনৈর্জয়েদ্বহ্নিং ন মদ্যেন তৃষাং জয়েৎ || ১, ১০৯. ৩৪ ||
সমাংসৈর্ভোজনৈঃ স্নিগ্ধৈর্মদ্যৈর্গন্ধবিলেপনৈঃ |
বস্ত্রৈর্মনোরমৈর্মাল্যৈঃ কামঃ স্ত্রীষু বিজৃম্ভতে || ১, ১০৯. ৩৫ ||
ব্রহ্মচর্যেঽপি বক্তব্যং প্রাপ্তং মন্মথচেষ্টিতম্ |
হৃদ্যং হি পুরুষং দৃষ্ট্বা যোনিঃ প্রক্লিদ্যতে স্ত্রিয়াঃ || ১, ১০৯. ৩৬ ||
সুবেষং পুরুষং দৃষ্ট্বা ভ্রাতরং যদি বা সুতম্ |
যোনিঃ ক্লিদ্যতি নারীণাং সত্যংসত্যং হি শৌনক ! || ১, ১০৯. ৩৭ ||
নদ্যশ্চ নার্যশ্চ সমস্বভাবাঃ স্বতন্ত্রভাবে গমনাদিকেচ |
তোয়ৈশ্চ দোষৈশ্চ নিপাতয়ন্তি নদ্যো হি কূলানি কুলা নি নার্যঃ || ১, ১০৯. ৩৮ ||
নদী পাতয়তে কূলং নারী পাতয়তে কুলম্ |
নারীণাঞ্চ নদীনাং চ স্বচ্ছন্দা ললিতা গতিঃ || ১, ১০৯. ৩৯ ||
নাগ্নিস্তৃপ্যতি কাষ্ঠানাং নাপগানাং মহোদধিঃ |
নান্তকঃ সর্বভূতানাং ন পুংসাং বামলোচনাঃ || ১, ১০৯. ৪০ ||
ন তৃপ্তিরস্তি শিষ্টানামিষ্টানাং প্রিয়বাদিনাম্ |
সুখানাঞ্চ সুতানাঞ্চ জীবিতস্য বরস্য চ || ১, ১০৯. ৪১ ||
রাজা ন তপ্তো ধনসঞ্চয়েন ন সাগরস্তৃপ্তিমগাজ্জলেন |
ন পণ্ডিতস্তৃপ্যতি ভাষিতেন তৃপ্তং ন চক্ষুর্নৃপদর্শনেন || ১, ১০৯. ৪২ ||
স্বকর্ম ধর্মার্জিতজীবিতানাং শাস্ত্রেষু দারেষু সদা রতানাম্ |
জিতেন্দ্রিয়াণামতিথিপ্রিয়াণাং গৃহেঽপি মোক্ষঃ পুরুষোত্তমানাম্ || ১, ১০৯. ৪৩ ||
মনোঽনুকূলাঃ প্রমদারূপবত্যঃ স্বলঙ্কৃতাঃ |
বসঃ প্রাসাদপৃষ্ঠেষু স্বর্গঃ স্যাচ্ছুভকর্মণঃ || ১, ১০৯. ৪৪ ||
ন দানেন ন মানেন নার্জবেন ন সবয়া |
ন শস্ত্রেণ ন শাস্ত্রেণ সর্বথা বিষমা স্ত্রিয়ঃ || ১, ১০৯. ৪৫ ||
শনৈর্বিদ্যা শনৈর্থাঃ শনৈঃ পর্বতমারুহেৎ |
শনৈঃ কামং চ ধর্মং চ পঞ্চৈতানি শনৈঃ শনৈঃ || ১, ১০৯. ৪৬ ||
শাশ্বতং দেবপূজাদি বিপ্রদানং চ শাশ্বতম্ |
শাশ্বতং সগুণা বিদ্যা সুহৃন্মিত্রং চ শাশ্বতম্ || ১, ১০৯. ৪৭ ||
যে বালভাবান্ন পঠন্তি বিদ্যাং যে যৌবনস্থা হ্যধনাত্মদারাঃ |
তে শোচনীয়া ইহ জীবলোকে মনুষ্যরূপেণ মৃগাশ্চরন্তি || ১, ১০৯. ৪৮ ||
পঠনে ভোজনে চিত্তং ন কুর্যাচ্ছাস্ত্রসেবকঃ |
সুদূরমপি বিদ্যার্থো ব্রজেদ্গরুডবেগবান্ || ১, ১০৯. ৪৯ ||
যে বালভাবে ন পঠন্তি বিদ্যাং কামাতুরা যৌবননষ্টবিত্তাঃ |
তে বৃদ্ধবাবে পরিভূয়মানাঃ সন্দহ্যমানাঃ শিশিরে যথাব্জম্ || ১, ১০৯. ৫০ ||
তর্কেঽপ্রতিষ্ঠা শ্রুতয়ো বিভিন্নাঃ নাসাবৃষির্যস্য মতং ন ভিন্নম্ |
ধর্মস্য তত্ত্বং নিহিতং গুহায়াং মহাজনো যেন গতঃ স পন্থাঃ || ১, ১০৯. ৫১ ||
আকারৈরিঙ্গিতৈর্গত্যা চেষ্টয়া ভাষিতেন চ |
নেত্রবক্রবিকারাভ্যাং লক্ষ্যতেঽন্তর্গতং মনঃ || ১, ১০৯. ৫২ ||
অনুক্তমপ্যূহতি পণ্ডিতো জনঃ পরেঙ্গিতজ্ঞানফলা হি বুদ্ধয়ঃ |
উদীরিতোর্থঃ পশুনাপি গৃহ্যতে হয়াশ্চ নাগাশ্চ বহন্তি দর্শিতম্ || ১, ১০৯. ৫৩ ||
অর্থাদ্ভ্রষ্টস্তীর্থয়াত্রাং তু গচ্ছেৎসত্যাদ্ভ্রষ্টো রৌরবং বৈ ব্রজেচ্চ |
যোগাদ্ভ্রষ্টঃ সত্যঘৃতিঞ্চ গচ্ছেদ্রাজ্যাদ্ভ্রষ্টো মৃগয়ায়াং ব্রজেচ্চ || ১, ১০৯. ৫৪ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
বৃহদৃ নীতিসারে নবোত্তরশততমোঽধ্যায়ঃ

শ্রীগরুডমহাপুরাণম্-১১০
সূত উবাচ |
যোধ্রুবাণি পরিত্যজ্য হ্যধুবাণি নিষেবতে |
ধ্রুবাণি তস্য নশ্যন্তি হ্যধ্রুবং নষ্টমেব চ || ১, ১১০. ১ ||
বাগ্যন্ত্রহীনস্য নরস্য বিদ্যা শস্ত্রং যথা কাপুরুষস্য হস্তে |
ন তুষ্টিমুৎপাদয়তে শরীরে হ্যন্ধস্য দারা ইব দর্শনীয়াঃ || ১, ১১০. ২ ||
ভোজ্যে ভোজনশক্তিশ্চ রতিশক্তির্বরস্ত্রিয়ঃ |
বিভবে দানশক্তিশ্চ নাল্পস্য তপসঃ ফলম্ || ১, ১১০. ৩ ||
অগ্নিহোত্রফলা বেদাঃ শীলবৃত্তিফলং শুভম্ |
রতিপুত্রফলা দারা দত্তভুক্তফলং ধনম্ || ১, ১১০. ৪ ||
বরয়েৎকুলজাং প্রাজ্ঞো বিরূপামপি কন্যকাম্ |
সুরূপাং সুনিতম্বাঞ্চ নাকুলীনাং কদাচন || ১, ১১০. ৫ ||
অর্থেনাপি হি কিং তেন যস্যানর্থে তু সঙ্গতিঃ |
কো হি নাম শিখাজাতং পন্নগস্য মণিং হরেৎ || ১, ১১০. ৬ ||
হবির্দুষ্টকুলদ্বাহ্যং বালাদপি সুভাষিতম্ |
অমেধ্যাৎকাঞ্চনং গ্রাহ্যং স্ত্রীরত্নং দুষ্কুলাদপি || ১, ১১০. ৭ ||
বিষাদপ্যমৃতং গ্রাহ্যমমেধ্যাদপি কাঞ্চনম্ |
নীচাদপ্যুত্তমাং বিদ্যাং স্ত্রীরত্নং দুষ্কুলাদপি || ১, ১১০. ৮ ||
ন রাজ্ঞা সহ মিত্রৎবং ন সর্পো নির্বিষঃ ক্রচিৎ |
ন কুলং নির্মলং তত্র স্ত্রীজনো যত্র জায়তে || ১, ১১০. ৯ ||
কুলে নিয়োজয়েদ্ভক্তং পুত্রং বিদ্যাসু যোজয়েৎ |
ব্যসনে যোজয়েচ্ছত্রুমিষ্টং ধর্মে নিয়োজ্যেৎ || ১, ১১০. ১০ ||
স্থানেষ্বেব প্রয়োক্তাব্যা ভৃত্যাশ্চাভরণানি চ |
ন হি চূডামণিঃ পাদে শোভতে বৈ কদাচন || ১, ১১০. ১১ ||
চূডামণিঃ সমুদ্রোঽগ্নির্ঘণ্টা চাখণ্ডমম্বরম্ |
অথবা পৃথিবীপালো মূর্ধ্নি পাদে প্রমাদতঃ || ১, ১১০. ১২ ||
কুসুমস্তবকস্যেব দ্বে গতী তু মনস্বিনঃ |
মূর্ধ্নি বা সর্বলোকানাং শীর্ষতঃ পতিতো বনে || ১, ১১০. ১৩ ||
কনকভূষণসঙ্গ্রহণোচিতো যদি মণিস্ত্রপুণি প্রতিবধ্যতে |
ন চ বিরৌতি ন চাপি স শোভতে ভবতি যোজয়িতুর্বচনীয়তা || ১, ১১০. ১৪ ||
বাজিবারণলৌহানাং কাষ্ঠপাষাণবাসসাম্ |
নারীপুরুষতোয়ানামন্তরং মহদন্তরম্ || ১, ১১০. ১৫ ||
কদর্থিতস্যাপি হি ধৈর্যবৃত্তের্ন শক্যতে সর্বগুণপ্রমাথঃ |
অধঃ খলেনাপি কৃতস্য বহ্নের্নাধঃ শিখা যাতি কদাচিদেব || ১, ১১০. ১৬ ||
ন সদশ্বঃ কশাঘাতং সিংহো ন গজগর্জিতম্ |
বীরো বা পরনির্দিষ্টং ন সহেদ্ভীমনিঃ স্বনম্ || ১, ১১০. ১৭ ||
যদি বিভববিহীনঃ প্রচ্যুতো বাশু দৈবান্ন তু খলজনসেবাং কাঙ্ক্ষয়েন্নৈব নীচাম্ |
ন তৃণমদনকার্যে সুক্ষুধার্তোঽত্তি সিংহঃ পিবতি রুধিরমুষ্ণং
প্রায়শঃ কুঞ্চরাণাম্ || ১, ১১০. ১৮ ||
সকৃদ্দুষ্টঞ্চ যো মিত্রং পুনঃ সন্ধাতুমিচ্ছতি |
স মৃত্যুমেব গৃহ্ণীয়াদ্গর্ভমশ্বতরী যথা || ১, ১১০. ১৯ ||
শত্রোরপত্যানি প্রিয়ংবদানি নোপেক্ষিতব্যানি বুধৈর্মনুষ্যৈঃ |
তান্যেব কালেষু বিপৎকরাণি বিষস্য পাত্রাণ্যপি দারুণানি || ১, ১১০. ২০ ||
উপকারগৃহীতেন শত্রুণা শত্রুমুদ্ধরেৎ |
পাদলগ্নং করস্থেন কণ্টকেনৈব কণ্টকম্ || ১, ১১০. ২১ ||
অপকারপরান্নিত্যং চিন্ত যেন্ন কদাচন |
স্বয়মেব পতিষ্যন্তি কূলজাতা ইব দ্রুমাঃ || ১, ১১০. ২২ ||
অনর্থা হ্যর্থরূষাশ্চ অর্থাশ্চানর্থরূপিণঃ |
ভবন্তি তে বিনাশায় দৈবায়ত্তস্য বৈ সদা || ১, ১১০. ২৩ ||
কার্যকালোচিতাপাপা মতিঃ সঞ্জায়তে হি বৈ |
সানুকূলে তু দৈবে শং পুংসঃ সর্বত্র জায়তে || ১, ১১০. ২৪ ||
ধনপ্রয়োগকার্যেষুঃ তথা বিদ্যা গমেষু চ |
আহারে ব্যবহারে চ ত্যক্তলজ্জঃ সদা ভবেৎ || ১, ১১০. ২৫ ||
ধনিনঃ শ্রোত্রিয়ো রাজা নদী বৈদ্যস্তু পঞ্চমঃ |
পঞ্চ যত্র ন বিদ্যন্তে ন কুর্যাত্তত্রত্র সংস্থিতিম্ || ১, ১১০. ২৬ ||
লোকয়াত্রা ভয়ং লজ্জা দাক্ষিণ্যং দানশীলতা |
পঞ্চ যত্র ন বিদ্যন্তে ন তত্র দিবসং বসেৎ || ১, ১১০. ২৭ ||
কালবিচ্ছোত্রিয়ো রাজা নদী সাধুশ্চ পঞ্চমঃ |
এতে যত্র ন বিদ্যন্তে তত্র বাসং ন কারয়েৎ || ১, ১১০. ২৮ ||
নৈকত্র পরিনিষ্ঠাস্তি জ্ঞানস্য কিল শৌনক |
সর্বঃ সর্বং ন জানাতি সর্বজ্ঞো নাস্তি কুত্রচিৎ || ১, ১১০. ২৯ ||
ন সর্ববিৎকশ্চিদিহাস্তি লোকে নাত্যন্তমূর্খো ভুবি চাপি কশ্চিৎ |
জ্ঞানেন নীচোত্তমমধ্যমেন যোঽযং বিজানাতি স তেন বিদ্বান্ || ১, ১১০. ৩০ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
বৃহদৃ নীতিসারে দশোত্তরশততমোঽধ্যায়ঃ