১.০৮ গরুডপুরাণ (অধ্যায় ৭১-৮০)

শ্রীগরুডমহাপুরাণম্-৭১
সূত উবাচ |
দানবাধিপতেঃ পিত্তমাদায় ভুজগাধিপঃ |
দ্বিধা কুর্বন্নিব ব্যোম সৎবরং বাসুকির্যয়ৌ || ১, ৭১. ১ ||
স তদা স্বশিরোরত্নপ্রভাদীপ্তে নভোঽম্বুধৌ |
রাজতঃ সমহানেকঃ খণ্ডসেতুরিবাবভৌ || ১, ৭১. ২ ||
ততঃ পক্ষনিপাতেন সংহরন্নিব রোদসী |
গরুত্মান্পন্নগেন্দ্রস্য প্রহর্তুমুপচক্রমে || ১, ৭১. ৩ ||
সহসৈব মুমোচ তৎফণীন্দ্রঃ সুরসাভ্যক্ততুরুষ্ক (রষ্ক) পাদপায়াম্ |
কলিকাঘনগন্ধবাসিতা যাং বরমাণিক্যগিরেরুপত্যকায়াম্ || ১, ৭১. ৪ ||
তস্য প্রপাতসমনন্তরকালমেব তদ্বদ্বরালয়মতীত্য রমাসমীপে |
স্থানং ক্ষিতেরুপপয়োনিধিতীরলেখংযাং বরমাণিক্যগিরেরুপত্যকায়াম্ || ১, ৭১. ৫ ||
তত্রৈব কিঞ্চিৎপততস্তু পিত্তাদুপেত্য জগ্রাহ ততো গরুত্মান্ |
মূর্ছাপরীতঃ সহসৈব ঘোণারন্ধ্রদ্বয়েন প্রমুমোচ সর্বম্ || ১, ৭১. ৬ ||
তত্রাকঠোরশুককণ্ঠশিরীষপুষ্পখদ্যোতপৃষ্ঠচরশাদ্বলশৈবলানাম্ |
কল্হারশষ্পকভুজঙ্গভুজাঞ্চ পত্রপ্রাপ্তৎবিষো মরকতাঃ শুভদা ভবন্তি || ১, ৭১. ৭ ||
তদ্যত্র ভোগীন্দ্রভুজাভিয়ুক্তং পপাত পিত্তং দিতিজাধিপস্য |
তস্যাকরস্যাতিতরাং স দেশো দুঃখোপলভ্যশ্চ গুণৈশ্চ যুক্তঃ || ১, ৭১. ৮ ||
তস্মিন্মরকতস্থানে যৎকিঞ্চিদুপজায়তে |
তৎসর্বং বিষরোগাণাং প্রশমায় প্রকীর্ত্যতে || ১, ৭১. ৯ ||
সর্বমন্ত্রৌ ষধিগণৈর্যন্ন শক্যং চিকিৎসিতুম্ |
মহাহিদংষ্ট্রাপ্রভবং বিষং তত্তেন শাম্যতি || ১, ৭১. ১০ ||
অন্যদপ্যাকরে তত্র যদ্দোষৈরুপবর্জিতম্ |
জায়তে তৎপবিত্রাণামুত্তমং পরিকীর্তিতম্ || ১, ৭১. ১১ ||
অত্যন্তহরিতবর্ণং কোমলমর্চির্বিভেদজটিলং চ |
কাঞ্চনচূর্ণস্যান্তঃ পূর্ণমিব লক্ষ্যতে যচ্চ || ১, ৭১. ১২ ||
যুক্তং সংস্থানগুণৈঃ সমরাগং গৌরবেণ ন বিহীনম্ |
সবিতুঃ করসংস্পর্শাচ্ছুরয়তি সর্বাশ্রমং দীপ্ত্যা || ১, ৭১. ১৩ ||
হিৎবা চ হরিতভাবং যস্যান্তর্বিনিহিতা ভবেদ্দীপ্তিঃ |
অচিরপ্রভাপ্রভাহতনবশাদ্বলসন্নিভা ভাতি || ১, ৭১. ১৪ ||
যচ্চ মনসঃ প্রসাদং বিদধাতি নিরীক্ষ্যমতিমাত্রম্ |
নন্মরকতং মহাগণমিতি রত্নবিদাং মনোবৃত্তিঃ || ১, ৭১. ১৫ ||
বর্ণস্যাতি বিভুৎবাদ্যস্যান্তঃ স্বচ্ছকিরণপরিধানম্ |
সান্দ্রস্নিগ্ধবিশুদ্ধং কোমলবর্হিপ্রভাদিসমকান্তি || ১, ৭১. ১৬ ||
বর্ণোজ্জ্বলয়া কান্ত্যা সান্দ্রাকারো বিভাসয়া ভাতি |
তদপি গুণবৎসঞ্জ্ঞামাপ্নোতি হি যাদৃশী পূর্বম্ || ১, ৭১. ১৭ ||
শবলকঠোরমলিনং রূক্ষং পাষাণকর্করোপেতম্ |
দিগ্ধং শিলাজতুনা মরকতমেবংবিধং বিগুণম্ || ১, ৭১. ১৮ ||
যৎসন্ধিশোষিতং রত্নমন্যন্মরকতাদ্ভবেৎ |
শ্রেয়স্কামৈর্ন তদ্ধার্যং ক্রেতব্যং বা কতঞ্চন || ১, ৭১. ১৯ ||
ভল্লাতকী পুত্রিকা চ তদ্বর্ণসময়োগতঃ |
মণের্মরকতস্যৈতে লক্ষণীয়া বিজাতয়ঃ || ১, ৭১. ২০ ||
ক্ষৌমেণ বাসসা মৃষ্টা দীপ্তিং ত্যজতি পুত্রিকা |
লাঘবেনৈব কাচস্য শক্যা কর্তুং বিভাবনা || ১, ৭১. ২১ ||
কস্যচিদনেকরূপৈর্মরকতমনুগচ্ছতোঽপি গুণবর্ণৈঃ |
ভল্লাতকস্যস্বনাত্তু বৈষম্যমুপৈতি বর্ণস্য || ১, ৭১. ২২ ||
বজ্রাণি মুক্তাঃ সন্ত্যন্যে যে চ কেচিদ্দ্বিজাতয়ঃ |
তেষাং নাপ্রতিবদ্ধানাং ভা ভবত্যূর্ধ্বগামিনী || ১, ৭১. ২৩ ||
ঋজুৎবাচ্চৈব কেষাঞ্চিৎকথঞ্চিদুপজায়তে |
তির্যগালোচ্যমানানাং সদ্যশ্চৈব প্রণশ্যতি || ১, ৭১. ২৪ ||
স্নানাচমনজপ্যেষু রক্ষামন্ত্রক্রিয়াবিধৌ |
দদদ্ভির্গোহিরণ্যানি কুর্বদ্ভিঃ সাধনানি চ || ১, ৭১. ২৫ ||
দৈবপিত্র্যাতিথেয়েষু গুরুসম্পূজনেষু চ |
বাধ্যমানেষু বিবিধৈর্দেষজাতৈর্বিষোদ্ভবৈঃ || ১, ৭১. ২৬ ||
দৌষৈর্হেনং গুণৈর্যুক্তং কাঞ্চনপ্রতিয়োজিতম্ |
সঙ্গ্রামে বিচরদ্ভিশ্চ ধার্যং মরকতং বুধৈঃ || ১, ৭১. ২৭ ||
তুলয়া পদ্মরাগস্য যন্মূল্যমুপজায়তে |
লভতেঽভ্যধিকং তস্মাদ্গুণৈর্মরকতং যুতম্ || ১, ৭১. ২৮ ||
তথা চ পদ্মরাগাণাং দোষৈর্মূল্যং প্রহীয়তে |
ততোঽস্যাপ্যধিকা হানির্দেষৈর্মরকতে ভবেৎ || ১, ৭১. ২৯ ||

ইতি শ্রীগারুডে মহাপুরাণে পুর্বখণ্ডে প্রথমাংশাখ্যে আচারকাণ্ডে
মরকতপরীক্ষণং নামৈকসপ্ততিতমোঽধ্যায়ঃ

শ্রীগরুডমহাপুরাণম্-৭২
সূত উবাচ |
তত্রৈব সিংহলবধূকরপল্লবাগ্রব্যালূনবাললবলীকুসুমপ্রবালে |
দেশে পপাত দিতিজস্য নিতান্তকান্তং প্রোৎফুল্লনীরজসমদ্যুতি নেত্রয়ুগ্মম্ || ১, ৭২. ১ ||
তৎপ্রত্যয়াদুভয়শোভনবীচিভাসা বিস্তারিণী জলনিধেরুপকচ্ছভূমিঃ |
প্রোদ্ভিন্নকেতকবনপ্রতিবদ্ধলেখাসান্দ্রেন্দ্রনীলমণিরত্নবতী বিভাতি || ১, ৭২. ২ ||
তত্রাসিতাব্জহলভৃদ্বসনাসিভৃঙ্গশার্ঙ্গায়ুধাঙ্গহরকণ্ঠকষায়পুষ্পৈঃ |
শুষ্কেতরৈশ্চ কুসুমৈর্গিরিকর্ণিকায়াস্তস্মাদ্ভবন্তি মণয়ঃ সদৃশাবভাসঃ || ১, ৭২. ৩ ||
অন্যে প্রসন্নপয়সঃ পয়সাং নিধাতুরম্বুৎবিষঃ শিখিগণপ্রতিমাস্তথান্যে |
নীলীরসপ্রভববুদ্বুদভাশ্চ কেচিৎকেচিত্তথা সমদকোকিলকণ্ঠভাসঃ || ১, ৭২. ৪ ||
একপ্রকারা বিস্পষ্টবর্ণশোভাবভাসিনঃ |
জায়ন্তে মণয়স্তস্মিন্নিন্দ্রনীলা মহাগুণাঃ || ১, ৭২. ৫ ||
মৃৎপাষাণশিলারন্ধ্রকর্করাত্রাসসংযুতাঃ |
অভ্রিকাপটলচ্ছায়াবর্ণদোষৈশ্চ দূষিতাঃ || ১, ৭২. ৬ ||
তত এব হি জায়ন্তে মণয়স্তত্র ভূরয়ঃ |
সাস্ত্রসম্বোধিতধিয়স্তান্প্রশংসন্তি সূরয়ঃ || ১, ৭২. ৭ ||
ধার্যমাণস্য যে দৃষ্টা পদ্মরাগমণের্গুণাঃ |
ধারণাদিন্দ্রনীলস্য তানেবাপ্নোতি মানবঃ || ১, ৭২. ৮ ||
যথা চ পদ্মরাগাণাং জাতকত্রিতয়ং ভবেৎ |
ইন্দ্র নীলেষ্বপি তথা দ্রষ্টব্যমবিশেষতঃ || ১, ৭২. ৯ ||
পরীক্ষাপ্রত্যয়ৈর্যৈশ্চ পদ্মরাগঃ পরীক্ষ্যতে |
ত এব প্রত্যয়া দৃষ্টা ইন্দ্রনীলমণেরপি || ১, ৭২. ১০ ||
যাবন্তং চ ক্রমেদগ্নিং পদ্মরাগোপয়োগতঃ |
ইন্দ্রনীলমণিস্তস্মাৎক্রমেত সুমহত্তরম্ || ১, ৭২. ১১ ||
তথাপি ন পরীক্ষার্থং গুণানামভি (তি) বৃদ্ধয়ে |
মণিরগ্নৌ সমাধেয়ঃ কথঞ্চিদপি কশ্চন || ১, ৭২. ১২ ||
অগ্নিমাত্রাপরিজ্ঞানে দাহদোষৈশ্চ দূপিতঃ |
সোঽনর্থায় ভবেদ্ভর্তুঃ কর্তুঃ কারয়িতুস্তথা || ১, ৭২. ১৩ ||
কাচোৎপলকরবীরস্ফটিকাদ্যা ইহ বুধৈঃ সবৈদূর্যাঃ |
কথিতা বিজাতয় ইমে সদৃশা মণিনেন্দ্রনীলেন || ১, ৭২. ১৪ ||
গুরুভাবকঠিনভাবাবেতেষাং নিত্যমেব বিজ্ঞেয়ৌ |
কাচাদ্যথাবদুত্তরবিবর্ধমানৌ বিশেষেণ || ১, ৭২. ১৫ ||
ইন্দ্রনীলো যথা কশ্চিদ্বিভর্ত্যাতাম্রবর্ণতাম্ |
রক্ষণয়ৌ তথা তাম্রৌ করবীরোৎপলাবুভৌ || ১, ৭২. ১৬ ||
যস্য মধ্যগতা ভাতি নীলস্যেন্দ্রায়ুধপ্রভা |
তমিন্দ্রনীলমিত্যাহুর্মহার্হং ভুবি দুর্লভম্ || ১, ৭২. ১৭ ||
যস্য বর্ণস্য ভূয়স্ত্বাৎক্ষীরে শতগুণে স্থিতঃ |
নীলতাং তন্নয়েৎসর্বং মহানীলঃ স উচ্যতে || ১, ৭২. ১৮ ||
যৎপদ্মরাগস্য মহাগুণস্য মূল্যং ভবেন্মাষসমুন্মিতস্য |
তদিন্দ্রনীলস্য মহাগুণস্য সুবর্ণ সঙ্খ্যাতু লিতস্য মূল্যম্ || ১, ৭২. ১৯ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
ইন্দ্রনীলপরীক্ষণং নাম দ্বিসপ্ততিতমোঽধ্যায়ঃ

শ্রীগরুডমহাপুরাণম্-৭৩
সূত উবাচ |
বৈদূর্যপুষ্পরাগাণাং কর্কেতে ভীষ্মকে বদে |
পরীক্ষাং ব্রহ্মণা প্রোক্তাং ব্যাসেন কথিতাং দ্বিজা || ১, ৭৩. ১ ||
কল্পান্তকালক্ষুবিতাম্বুরাশের্নির্হ্রাদকল্পাদ্দিতিজস্য নাদাৎ |
বৈদূর্যমুৎপন্নমনেকবর্ণং শোভাভিরামদ্যুতিবর্ণবীজম্ || ১, ৭৩. ২ ||
অবিদূরে বিদূরস্য গিরেরুত্তুঙ্গরোধসঃ |
কামভূতিকসীমানমনু তস্যাকরোভবৎ || ১, ৭৩. ৩ ||
তস্য নাদসমুত্থৎবাদাকরঃ সুমহাগুণঃ |
অভূদুত্তরীতো লোকে লোকত্রয়বিভূষণঃ || ১, ৭৩. ৪ ||
তস্যৈব দানবপতের্নিনদানুরূপাঃ প্রবৃট্পয়োদবরদর্শিত চারুরূপাঃ |
বৈদূর্যরত্নমণয়ো বিবিধাবভাসস্তস্মাৎস্ফুলিঙ্গনিবহা ইব সম্বভূবুঃ || ১, ৭৩. ৫ ||
পদ্মরাগমুপাদায় মণিবর্ণা হি যে ক্ষিতৌ |
সর্বাংস্তান্বর্ণশোভাভির্বৈদূর্যমনুগচ্ছতি || ১, ৭৩. ৬ ||
তেষাং প্রধানং শিখিকণ্ঠনীলং যদ্বা ভবেদ্বেণুদলপ্রকাশম্ |
চাষাগ্রপক্ষপ্রতিমশ্রিয়ো যে ন তে প্রশস্তা মণিশাস্ত্রবিদ্ভিঃ || ১, ৭৩. ৭ ||
গুণবান্বৈদূর্যমণির্যোজয়তি স্বামিনং পরম্ভা (ভো) গ্যৈঃ |
দোষৈর্যুক্তো দোষৈস্তস্মাদ্যত্নাৎপরীক্ষেত || ১, ৭৩. ৮ ||
গিরিকাচশিশুপালৌ কাচ স্ফটিকাশ্চ ধূমনির্ভিন্নাঃ |
বৈদূর্যমণেরেতে বিজাতয়ঃ সন্নিভাঃ সন্তি || ১, ৭৩. ৯ ||
লিখ্যাভাবাৎকাচং লঘুভাবাচ্ছৈসুপালকং বিদ্যাৎ |
গিরিকাচসদীপ্তিৎবাৎস্ফটিকং বর্ণোজ্জ্বলৎবেন || ১, ৭৩. ১০ ||
যদিন্দ্রনীলস্য মহাগুণস্য সুবর্ণসঙ্খ্যাকলিতস্য মূল্যম্ |
তদেব বৈদূর্যমণেঃ প্রদিষ্টং পলদ্বয়োন্মাপি তগৌরবস্য || ১, ৭৩. ১১ ||
জাত্যস্য সর্বেঽপি মণেস্তু যাদৃগ্বিজাতয়ঃ সন্তি সমানবর্ণাঃ |
তথাপি নানাকরণানুমেয়ভেদপ্রকারঃ পরমঃ প্রদিষ্টঃ || ১, ৭৩. ১২ ||
সুখোপলক্ষ্যশ্চ সদা বিচার্যো হ্যয়ং প্রভেদো বিদুষা নরেণ |
স্নেহপ্রভেদো লঘুতা মৃদুৎবং বিজাতিলিঙ্গং খলু সার্বজন্যম্ || ১, ৭৩. ১৩ ||
কুশলাকুশলৈঃ প্রপূর্যমাণাঃ প্রতিবদ্ধাঃ প্রতিসৎক্রিয়াপ্রয়োগৈঃ |
গুণদোষসমুদ্ভবং লভন্তে মণয়োর্ঽথোন্তরমূল্যমেব ভিন্নাঃ || ১, ৭৩. ১৪ ||
ক্রমশঃ সমতীতবর্তমানাঃ প্রতিবদ্ধা মণিবন্ধকেন যত্নাৎ |
যদি নাম ভবন্তি দোষহীনা মণয়ঃ ষড্গুণমাপ্নুবন্তি মূল্যম্ || ১, ৭৩. ১৫ ||
আকরান্সমতীতানামুদধেস্তীরসন্নিধৌ |
মূল্যমেতন্মণীনাং তু ন সর্বত্র মহীতলে || ১, ৭৩. ১৬ ||
সুবর্ণো মনুনা যস্তু প্রোক্তঃ ষোডশমাষকঃ |
তস্য সপ্ততিমো ভাগঃ সঞ্জ্ঞারূপং করিষ্যতি || ১, ৭৩. ১৭ ||
শাণশ্চতুর্মাষমানো মাষকঃ পঞ্চকৃষ্ণলঃ |
পলস্য দশমো ভাগো ধরণঃ পরিকীর্তিতঃ || ১, ৭৩. ১৮ ||
ইত্থং মণিবিধিঃ প্রোক্তো রত্নানাং মূল্যনিশ্চয়ে || ১, ৭৩. ১৯ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
বৈদূর্যপরীক্ষণং নাম ত্রিসপ্ততিতমোঽধ্যায়ঃ

শ্রীগরুডমহাপুরাণম্-৭৪
সূত উবাচ |
পতিতায়া হিমাদ্রৌ তু ৎবচস্তস্য সুরদ্বিষঃ |
প্রাদুর্ভবন্তি তাভ্যস্তু পুষ্প (ষ্য) রাগা মহাগুণাঃ || ১, ৭৪. ১ ||
আপীতপাণ্ডুরুচিরঃ পাষাণঃ পদ্মরাগসঞ্জ্ঞস্তু |
কৌকণ্টকনামা স্যাৎস এব যদি লোহিতাপীতঃ || ১, ৭৪. ২ ||
আলোহিতস্তু পীতঃ স্বচ্ছঃ কাষায়কঃ স একোক্তঃ |
আনীলশুক্লবর্ণঃ স্নিগ্ধঃ সোমাল(ন) কঃ সগুণঃ || ১, ৭৪. ৩ ||
অত্যন্তলোহিতো যঃ স এব খলু পদ্মরাগসঞ্জ্ঞঃ স্যাৎ |
অপি চেন্দ্রনীলসঞ্জ্ঞঃ স এব কথিতঃ সুনীলঃ সন্ || ১, ৭৪. ৪ ||
মূল্যং বৈদূর্যমণেরিব গাদিতং হ্যস্য রত্নসারবিদা |
ধারণফলং চ তদ্বৎকিং তু স্ত্রীণাং সুতপ্রদো ভবতি || ১, ৭৪. ৫ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
পুষ্পরাগপরীক্ষণং নাম চতুঃ সপ্ততিতমোঽধ্যায়ঃ

শ্রীগরুডমহাপুরাণম্-৭৫
সূত উবাচ |
বায়ুর্নখান্দৈত্যপতের্গৃহীৎবা চিক্ষেপ সৎপদ্মবনেষু হৃষ্টঃ |
ততঃ প্রসূতং পবনোপপন্নং কর্কেতনং পূজয়তমং পৃথিব্যাম্ || ১, ৭৫. ১ ||
বর্ণেন তদ্রুধিরসোমমধুপ্রকাশমাতাম্রপীতদহনোজ্জ্বলিতং বিভাতি |
নীলং পুনঃ খলু সিতং পরুষং বিভিন্নং ব্যাধ্যাদিদোষকরণেন চ তদ্বিভাতি || ১, ৭৫. ২ ||
স্নিগ্ধা বিশুদ্ধাঃ সমরাগিণশ্চ আপীতবর্ণা গুরবো বিচিত্রাঃ |
ত্রাসব্রণব্যালবিবর্জিতাশ্চ কর্কেতনাস্তে পরমং পবিত্রাঃ || ১, ৭৫. ৩ ||
পত্রেণ কাঞ্চনময়েন তু বেষ্টয়িৎবা তপ্তং যদা হুতবহে ভবতি প্রকাশম্ |
রোগপ্রণাশনকরং কলিনাশনং তদায়ুষ্করং কুলকরং চ সুখপ্রদং চ || ১, ৭৫. ৪ ||
এবংবিধং বহুগুণং মণিমাবহন্তি কর্কেতনং শুভলঙ্কৃতয়ে নরা যে |
তে পূজিতা বহুধনা বহুবান্ধবাশ্চ নিত্যোজ্জ্বলাঃ প্রমুদিতা অপিতে ভবন্তি || ১, ৭৫. ৫ ||
একেঽপনহ্য বিকৃতাকুলনীলভাসঃ প্রম্লানরাগলুলিতাঃ কলুষা বিরূপাঃ |
তেজোঽতিদীপ্তি কুলপুষ্টিবিহীনবর্ণাঃ কর্কেতনস্য সদৃশং বপুরুদ্বহন্তি || ১, ৭৫. ৬ ||
কর্কেতনং যদি পরীক্ষিতবর্ণরূপং প্রত্যগ্রভাস্বরদিবাকরসুপ্রকাশম্ |
তস্যোত্তমস্য মণি শাস্ত্রবিদাং মহিম্না তুল্যং তু মূল্যমুদিতং তুলিতস্য কার্যম্ || ১, ৭৫. ৭ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
কর্কেতনপরীক্ষণং নাম পঞ্চসপ্ততিতমোঽধ্যায়ঃ

শ্রীগরুডমহাপুরাণম্-৭৬
সূত উবাচ |
হিমবত্যুত্তরদেশে বীর্যং পতিতং সুরদ্বিষস্তস্য |
সম্প্রাপ্তমুত্তমানামাকরতাং ভীষ্মরত্নানাম্ || ১, ৭৬. ১ ||
শুক্লাঃ শঙ্খাব্জনিভাঃ স্যোনাকসন্নিভা প্রভাবন্তঃ |
প্রভবন্তি ততস্তরুণা বজ্রনিভা ভীষ্মপাষাণাঃ || ১, ৭৬. ২ ||
হেমাদিপ্রতিবদ্ধাঃ শুদ্ধমপি শ্রদ্ধয়া বিধত্তে যঃ |
ভীষ্মমণিং গ্রীবাদিষু সুসম্পদং স সর্বদা লভতে || ১, ৭৬. ৩ ||
নিরীক্ষ্য পলায়ন্তে যং তমরণ্যনিবাসিনঃ সমীপঽপি |
দ্বীপিবৃকশরভকুঞ্জরসিংহব্যাঘ্রাদয়ো হিংস্ত্রাঃ || ১, ৭৬. ৪ ||
তসোয়ৎকলতষ্টতরোর্ভবতি ভয়ং ন চাস্তীশমুপহসন্তি |
ভীষ্মমণির্গুণয়ুক্তো সম্যক্প্রাপ্তাঙ্গুলীকলত্রৎবঃ || ১, ৭৬. ৫ ||
পিৎৠতর্পণে পিৎৠণাং তৃপ্তির্বহুবার্ষিকী ভবতি |
শাম্যন্ত্যদ্ভুতান্যপি সর্পাণ্ডজাখুবৃশ্চিকবিষাণি |
সলিলাগ্নিবৈরিতস্করভয়ানি ভীমানি নশ্যন্তি || ১, ৭৬. ৬ ||
শৈবলবলাহকাভং পুরুষং পীতপ্রভং প্রভাহীনম্ |
মলিনদ্যুতি চ বিবর্ণং দূরাৎপরিবর্জয়েৎপ্রাজ্ঞঃ || ১, ৭৬. ৭ ||
মূল্যং প্রকল্প্যমেষাং বিবুধবরৈর্দৈশকালবিজ্ঞানাৎ |
দূরে ভূতানাং বহু কিঞ্চিন্নিকটপ্রসূতানাম্ || ১, ৭৬. ৮ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
বৈদূর্যপরীক্ষণং নাম ষট্সপ্ততিতমোঽধ্যায়ঃ

শ্রীগরুডমহাপুরাণম্-৭৭
সূত উবাচ |
পুণ্যেষু পর্বতবরেষু চ নিম্নগাসু স্থানান্তরেষু চ তথোত্তরদেশগৎবাৎ |
সংস্থাপিতাঃ স্বনখবাহুগতেঃ প্রকাশং সম্পূজ্য দানবপতিং প্রথিতে প্রদেশে || ১, ৭৭. ১ ||
দাশার্ণবাগদর (ব) মেকলকালগাদৌ গুঞ্জাঞ্জনক্ষৌদ্রমৃণালবর্ণাঃ |
গন্ধর্ববহ্নিকদলীসদৃশাবভাসা এতে প্রশস্তাঃ পুলকাঃ প্রসূতাঃ || ১, ৭৭. ২ ||
শঙ্খাব্জভৃঙ্গার্কবিচিত্রভঙ্গা সূত্রৈরুর্(ব্য) পেতাঃ পরমাঃ পবিত্রাঃ |
মঙ্গল্যয়ুক্তা বহুভক্তিচিত্রা বৃদ্ধিপ্রদাস্তে পুলকা ভবন্তি || ১, ৭৭. ৩ ||
কাকা (ক.) শ্বরাসভসৃগালবৃকোগ্ররূপৈর্গৃধ্রৈঃ সমাংসরুধিরার্দ্রমুখৈরুপেতাঃ |
মৃত্যুপ্রদাশ্চ বিদুষা পরিবর্জনীয়া মূল্যং পলস্য কথিতং চ শতানি পঞ্চ || ১, ৭৭. ৪ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
পুলকপরীক্ষণং নাম সপ্তসপ্ততিতমোঽধ্যায়ঃ

শ্রীগরুডমহাপুরাণম্-৭৮
সূত উবাচ |
হুতভুগ্রূপমাদায় দানবস্য যথেপ্সিতম্ |
নর্মদায়াং নিচিক্ষেপ কিঞ্চিদ্ধীনাদিভূমিষু || ১, ৭৮. ১ ||
তত্রেন্দ্রগোপকলিতং শুকবক্রবর্ণং সংস্থানতঃ প্রকটপীলুসমানমাত্রম্ |
নানাপ্রকারবিহিতং রুধিরাক্ষ(খ্য) রত্নমুদ্ধৃত্য তস্য খলু সর্বসমানমেব || ১, ৭৮. ২ ||
মধ্যেন্দুপাণ্ডুরমতীব বিশুদ্ধবর্ণং তচ্চেন্দ্রনীলসদৃশং পটলং তুলে স্যাৎ |
সৈশ্বর্যভৃত্যজননং কথিতং তদৈব পক্রঞ্চ তৎকিল ভবেৎসুরবজ্রবর্ণম্ || ১, ৭৮. ৩ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
রুধিরাক্ষরত্নপরীক্ষণং নামাষ্টসপ্ততিতমোঽধ্যায়ঃ

শ্রীগরুডমহাপুরাণম্-৭৯
সূত উবাচ |
কাবেরবিন্ধ্যয়বনচীননেপালভূমিষু |
লাঙ্গলী ব্যকিরন্মেদো দানবস্য প্রয়ত্নতঃ || ১, ৭৯. ১ ||
আকাশশুদ্ধং তৈলাখ্যমুৎপন্নং স্ফটিকং ততঃ |
মৃণালশঙ্খধবলং কিঞ্চিদ্বর্ণান্তরন্বিতম্ || ১, ৭৯. ২ ||
ন ত্তুল্যং হি রত্নানামথবা পাপনাশনম্ |
সংস্কৃতং শিল্পিনা সদ্যো মূল্যং কিঞ্চিল্লভেত্ততঃ (দা) || ১, ৭৯. ৩ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
স্ফটিকপরীক্ষণং নামৈকোনাশীতিতমোঽধ্যায়ঃ

শ্রীগরুডমহাপুরাণম্-৮০
সূত উবাচ |
আদায় শেষস্তস্যান্ত্রং বলস্য কেলাদিষু |
চিক্ষেপ তত্র জায়ন্তে বিদ্রুমাঃ সুভহাগুণাঃ || ১, ৮০. ১ ||
তত্র প্রধানং শশলোহিতাভং গুঞ্জাজপাপুষ্পনিভং প্রদিষ্টম্ |
সুনীলকং দেবকরোমকঞ্চ স্থানানি তেষু প্রভবং সুরাগম্ || ১, ৮০. ২ ||
অন্যত্র জাতং চ ন তৎপ্রধানং মূল্যং ভবেচ্ছিল্পিবিশেষয়োগাৎ |
প্রসন্নং কোমলং স্নিগ্ধং সুরাগং বিদ্রুমং হি তৎ || ১, ৮০. ৩ ||
ধনধান্যকরং লোকে বিষার্তিভয়নাশনম্ |
পরীক্ষা পুলকস্যোক্তা রুধিরাক্ষস্য বৈ মণেঃ |
স্ফটিকস্য বিদ্রুমস্য রত্নজ্ঞানায় শৌনক ! || ১, ৮০. ৪ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
বিদ্রুমপরীক্ষণং নামাশীতিতমোঽধ্যায়ঃ