১.০১ গরুডপুরাণ (অধ্যায় ১-১০)

|| গরুডপুরাণ ||

শ্রীগণাধিপতয়ে নমঃ |
সরস্বত্যৈনমঃ |
অথ শ্রীগরুডমহাপুরাণং প্রারভ্যতে |
তত্রাদৌ কর্মকাণ্ডাখ্যঃ পূর্বখণ্ডঃ প্রারভ্যতে |

ওঁ নারায়ণং নমস্কৃত্য নরং চৈব নরোত্তমম্ |
দেবীং সরস্বতীং চৈব ততো জয়মুদীরয়েৎ || মংগলাচরণম্ . ১ ||
ওঁ অজমজরমনন্তং জ্ঞানরূপং মহান্তং শিবমমলমনাদিং ভূতদেহাদিহীনম্ |
সকলকরণহীনং সর্বভূতস্থিতং তং হরিমমলমমায়ং সর্বগং বন্দ একম্ || ১, ১. ১ ||
নমস্যামি হরিং রুদ্রং ব্রহ্মাণং চ গণাধিপম্ |
দেবীং সরস্বতীং চৈব মনোবাক্কর্মভিঃ সদা || ১, ১. ২ ||
সূতং পৌরাণিকং শান্তং সর্বশাস্ত্রবিশারদম্ |
বিষ্ণুভক্তং মহাত্মানং নৈমিশারণ্যমাগতম্ || ১, ১. ৩ ||
তীর্থয়াত্রাপ্রসঙ্গেন উপবিষ্টং শুভাসনে |
ধ্যায়ন্তং বিষ্ণুমনঘং তমভ্যর্চ্যাস্তুবন্কবিম্ || ১, ১. ৪ ||
শৌনকাদ্যা মহাভাগা নৈমিষীয়াস্তপোধনাঃ |
মুনয়ো রবিসঙ্কাশাঃ শান্তা যজ্ঞ পরায়ণাঃ || ১, ১. ৫ ||
ঋষয় ঊচুঃ |
সূত ! জানাসি সর্বং ৎবং পৃচ্ছামস্ত্বামতো বয়ম্ |
দেবতানাং হি কো দেব ঈশ্বরঃ পূজ্য এব কঃ || ১, ১. ৬ ||
কো ধ্যেয়ঃ কো জগৎস্রষ্টা জগৎপাত্তি চ হন্তি কঃ |
কস্মাৎপ্রবর্ততে ধর্মো দুষ্টহন্তা চ কঃ স্মৃতঃ || ১, ১. ৭ ||
তস্য দেবস্য কিং রূপং জগৎসর্গঃ কথং মতঃ |
কৈর্ব্রতৈঃ স তু তুষ্টঃ স্যাৎকেন যোগেন বাপ্যতে || ১, ১. ৮ ||
অবতারাশ্চ কে তস্য কথং বংশাদিসম্ভবঃ |
বর্ণাশ্রমাদিধর্মাণাং কঃ পাতা কঃ প্রবর্তকঃ || ১, ১. ৯ ||
এতৎসর্বং তথান্যচ্চ ব্রূহি সূত ! মহামতে ! |
নারায়ণকথাঃ সর্বাঃ কথয়াস্মাকমুত্তমাঃ || ১, ১. ১০ ||
সূত উবাচ |
পুরাণং গারুডং বক্ষ্যে সারং বিষ্ণুকথা শ্রয়ম্ |
গরুডোক্তং কশ্যপায় পুরা ব্যাসাচ্ছ্রুতং ময়া || ১, ১. ১১ ||
একো নারায়ণো দেবো দেবানামীশ্বরেশ্বরঃ |
পরমাত্মা পরং ব্রহ্ম জন্মাদ্যস্য যতো ভবেৎ || ১, ১. ১২ ||
জগতো রক্ষণার্থায় বাসুদেবোঽজরোঽমরঃ |
স কুমারাদিরূপেণ অবতারান্করোত্যজঃ || ১, ১. ১৩ ||
হরিঃ স প্রথমং দেবঃ কৌমারং সর্গমাস্থিতঃ |
চচার দুশ্চরং ব্রহ্মন্ব্রহ্মচর্যমখণ্ডিতম্ || ১, ১. ১৪ ||
দ্বিতীয়ং তু ভবায়াস্য রসাতলগতাং মহীম্ |
উদ্ধরিষ্যন্নুপাদত্তে যজ্ঞেশঃ সৌকরং বপুঃ || ১, ১. ১৫ ||
তৃতীয়মৃষিসর্গং তু দেবর্ষিৎবমুপেত্য সঃ |
তন্ত্রং সাৎবতমাচষ্টে নৈষ্কর্ম্যং কর্মণাং যতঃ || ১, ১. ১৬ ||
নরনারায়ণো ভূৎবা তুর্যে তেপে তপো হরিঃ |
ধর্মসং রক্ষণার্থায় পূজিতঃ স সুরাসুরৈঃ || ১, ১. ১৭ ||
পঞ্চমঃ কপিলো নাম সিদ্ধেশঃ কালবিপ্লুতম্ |
প্রোবাচ সূরয়ে সাঙ্খ্যং তত্ত্বগ্রামবি নির্ণয়ম্ || ১, ১. ১৮ ||
ষষ্ঠমত্রেরপত্যৎবং দত্তঃ প্রাপ্তোঽনসূয়য়া |
আন্বীক্ষিকীমলর্কায় প্রহ্লাদাদিভ্য ঊচিবান্ || ১, ১. ১৯ ||
ততঃ সপ্ত আকূত্যাং রুচের্যজ্ঞোঽভ্যজায়ত |
সুত্রামাদ্যৈঃ সুরগণৈর্যষ্ট্বা স্বায়ম্ভুবান্তরে || ১, ১. ২০ ||
অষ্টমে মেরুদেব্যাং তু নাভের্জাত উরুক্রমঃ |
দর্শয়ন্বর্ত্ম নারীণাং সর্বাশ্রমনমস্কৃতম্ || ১, ১. ২১ ||
ঋষিভির্যাচিতো ভেজে নবমং পার্থিবং বপুঃ |
দুগ্ধৈর্মহৌষধৈর্বিপ্রাস্তেন সঞ্জীবিতাঃ প্রজাঃ || ১, ১. ২২ ||
রূপং স জগৃহে মাৎস্যং চাক্ষুষান্তরসম্প্লবে |
নাব্যারোপ্য মহীময়্যামপাদ্বৈবস্বতং মনুম্ || ১, ১. ২৩ ||
সুরাসুরাণামুদধিং মথ্নতাং মন্দরাচলম্ |
দধ্রে কমঠরূপেণ পৃষ্ঠ একাদশে বিভুঃ || ১, ১. ২৪ ||
ধান্বন্তরং দ্বাদশমং ত্রয়োদশমমেব চ |
আপ্যায়ৎসুরানন্যান্মোহিন্যা মোহয়ংস্ত্রিয়া || ১, ১. ২৫ ||
চতুর্দশং নারসিংহং চৈত্য (বৈর) দৈত্যেন্দ্রমূর্জিতম্ |
দদার করজৈরুগ্রৈরেরকাং কটকুদ্যথা || ১, ১. ২৬ ||
পঞ্চদশং বামনকো ভূৎবাগাদধ্বরং বলেঃ |
পাদ ত্রয়ং যাচমানঃ প্রত্যাদিৎসুস্ত্রিবিষ্টপম্ || ১, ১. ২৭ ||
অবতারে ষোডশমে পশ্যন্ব্রহ্মদ্রুহো নৃপান্ |
ত্রিঃ সপ্তকৃৎবঃ কুপিতো নিঃ ক্ষত্ত্রামকরোন্মহীম্ || ১, ১. ২৮ ||
ততঃ সপ্তদশে জাতঃ সত্যবত্যাং পরাশরাৎ |
চক্রে বেদতরোঃ শাখাং দৃষ্ট্বা পুংসোঽল্পমেধসঃ || ১, ১. ২৯ ||
নরদেবৎবমাপন্নঃ সুরকার্যচিকীর্ষয়া |
সমুদ্রনিগ্রহাদীনি চক্রে কার্যাণ্যতঃ পরম্ || ১, ১. ৩০ ||
একোনবিংশে বিংশতিমে বৃষ্ণিষু প্রাপ্য জন্মনী |
রামকৃষ্ণাবিতি ভুবো ভগবানহরদ্ভরম্ || ১, ১. ৩১ ||
ততঃ কলেস্তু সন্ধ্যান্তে সমোহায় সুরদ্বিষাম্ |
বুদ্ধো নাম্রা জিনসুতঃ কীকটেষু ভবিষ্যতি || ১, ১. ৩২ ||
অথ সোঽষ্টমসন্ধ্যায়াং নষ্টপ্রায়েষু রাঞ্জসু |
ভবিতা বিষ্ণুয়শসো নাম্না কল্কী জগৎপতিঃ || ১, ১. ৩৩ ||
অবতারা হ্যসঙ্খ্যেয়া হরেঃ সত্ত্বনিধের্দ্বিজাঃ |
মনুবেদবিদো হ্যাদ্যাঃ সর্বে বিষ্ণুকলাঃ স্মৃতাঃ || ১, ১. ৩৪ ||
তস্মাৎসর্গাদয়ো জাতাঃ সম্পূজ্যাশ্চ ব্রতাদিনা |
পুরাণং গারুডং ব্যাসঃ পুরাসৌ মেঽব্রবীদিদম্ || ১, ১. ৩৫ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে কর্মকাণ্ডে
এতৎপুরাণপ্রবৃত্তিহেতুনিরূপণং নাম প্রথমোঽধ্যায়ঃ

শ্রীগরুডমহাপুরাণম্-২
ঋষয় ঊচুঃ |
কথং ব্যাসেন কথিতং পুরাণং গারুডং তব |
এতৎসর্বং সমাখ্যাহি পরং বিষ্ণুকথাশ্রয়ম্ || ১, ২. ১ ||
সূত উবাচ |
অহং হি মুনিভিঃ সার্ধং গতো বদরিকাশ্রমম্ |
তত্র দৃষ্টো ময়া ব্যাসো ধ্যায়মানঃ পরেশ্বরম্ || ১, ২. ২ ||
তং প্রণম্যোপবিষ্টোঽহং পৃষ্টবান্হি মুনীশ্বরম্ |
সূত উবাচ |
ব্যাস ব্রূহি হরে রূপং জগৎসর্গাদিকং ততঃ || ১, ২. ৩ ||
মন্যে ধ্যায়সি তং যস্মাত্তস্মাজ্জানাসি তং বিভুম্ |
এবং পৃষ্টো যথা প্রাহ তথা বিপ্রা? নিবোধত || ১, ২. ৪ ||
ব্যাস উবাচ |
শৃণু সূত ! প্রবক্ষ্যামি পুরাণং গারুডং তব |
সহ নারদদক্ষাদ্যৈর্ব্রহ্মা মামুক্তবান্যথা || ১, ২. ৫ ||
সূত উবাচ |
দক্ষনারদমুখ্যৈস্তু যুক্তং ৎবাং কথমুক্তবান্ |
ব্রহ্মা শ্রীগারুডং পুণ্যং পুরাণং সারবাচকম্ || ১, ২. ৬ ||
ব্যাস উবাচ |
অহং হি নারদো দক্ষো ভৃগ্বাদ্যাঃ প্রণিপত্য তম্ |
সারং ব্রূহীতি পপ্রচ্ছুর্ব্রহ্মাণং ব্রহ্মলোকগম্ || ১, ২. ৭ ||
ব্রহ্মোবাচ |
পুরাণং গারুডং সারং রুদ্রং চ মাং যথা |
সুরৈঃ সহাব্রবীদ্বিষ্ণুস্তথাহং ব্যাস বচ্মিতে || ১, ২. ৮ ||
ব্যাস উবাচ |
কথং রুদ্রং সুরৈঃ সার্ধমব্রবীদ্বৈ হরিঃ পুরা |
পুরাণং গারুডং সারং ব্রূহি ব্রহ্মন্মহার্থকম্ || ১, ২. ৯ ||
ব্রহ্মোবাচ |
অহং গতোঽদ্রিং কৈলাসমিন্দ্রাদ্যৈর্দৈবতৈঃ সহ |
তত্র দৃষ্টো ময়া রুদ্রো ধ্যায়মানঃ পরং পদম্ || ১, ২. ১০ ||
পৃষ্টো নমস্কৃতঃ কিং ৎবং দেবং ধ্যায়সি শঙ্কর? |
ৎবত্তো নান্যং পরং দেবং জানামি ব্রূহি মাং ততঃ || ১, ২. ১১ ||
সারাৎসারতরং তত্ত্বং শ্রোতুকামঃ সুরৈঃ সহ |
রুদ্রৌবাচ |
অহং ধ্যায়ামি তং বিষ্ণুং পরমাত্মানমীশ্বরম্ || ১, ২. ১২ ||
সর্বদং সর্বগং সর্বং সর্বপ্রাণিহৃদিস্থিতম্ |
ভস্মোদ্ধূলিতদেহস্তু জটামণ্ডলমণ্ডিতঃ || ১, ২. ১৩ ||
বিষ্ণোরারাধনার্থং মে ব্রতচর্যা পিতামহ |
তমেব গৎবা পৃচ্ছামঃ সারং যং চিন্তয়াম্যহম্ || ১, ২. ১৪ ||
বিষ্ণুং জিষ্ণুং পদ্মনাভং হরিং দেহবিবর্জিতম্ |
শুচিং শুচিষদং হংসং তৎপদং পরমেশ্বরম্ || ১, ২. ১৫ ||
যুক্তা সর্বাত্মনাত্মানং তং দেবং চিন্তয়াম্যহম্ |
যস্মিন্বিশ্বানি ভূতানি তিষ্ঠন্তি চ বিশন্তি চ || ১, ২. ১৬ ||
গুণভূতানি ভূতেশে সূত্রে মণিগণা ইব |
সহস্রাক্ষং সহস্রাঙ্ঘ্রিং সহস্রোরুং বরাননম্ || ১, ২. ১৭ ||
অণীয়সামণীয়াংসং স্থবিষ্ঠং চ স্থবীয়সাম্ |
গরীয়সাং গরিষ্ঠং চ শ্রেষ্ঠং চ শ্রেয়সামপি || ১, ২. ১৮ ||
যং বাক্যেষ্বনুবাক্যেষু নিষৎসূপনিষৎসু চ |
গৃণন্তি সত্যকর্মাণং সত্যং সত্যেষু সামসু || ১, ২. ১৯ ||
পুরাণ পুরুষঃ প্রোক্তো ব্রহ্মা প্রোক্তো দ্বিজাতিষু |
ক্ষয়ে সঙ্কর্ষণঃ প্রোক্তস্তমুপাস্যমুপাস্মহে || ১, ২. ২০ ||
যস্মিংল্লোকাঃ স্ফুরন্তীমে জলে শকুনয়ো যথা |
ঋতমেকাক্ষরং ব্রহ্ম যত্তৎসদসতঃ পরম্ || ১, ২. ২১ ||
অর্চয়ন্তি চ যং দেবা যক্ষরাক্ষসপন্নগাঃ |
যস্যাগ্নিরাস্যং দ্যৌর্মূর্ধা খং নাভিশ্চরণৌ ক্ষিতিঃ || ১, ২. ২২ ||
চন্দ্রাদিত্যৌ চ নয়নে তং দেবং চিন্তয়াম্যহম্ |
যস্য ত্রিলোকী জঠরে মস্য কাষ্ঠাশ্চ বাহবঃ || ১, ২. ২৩ ||
যস্যোচ্ছ্বাসশ্চ পবনঃ তং দেবং চিন্তয়াম্যহম্ |
যস্য কেশেষু জীমূতা নদ্যঃ সর্বাঙ্গসন্ধিষু || ১, ২. ২৪ ||
কুক্ষৌ সমুদ্রাশ্চৎবারস্তং দেবং চিন্তয়াম্যহম্ |
পরঃ কালাৎপরো যজ্ঞাৎপরঃ সদসতশ্চয়ঃ || ১, ২. ২৫ ||
অনাদিরাদি র্বিশ্বস্য তং দেবং চিন্তয়াম্যহম্ |
মনসশ্চন্দ্রমা যস্য চক্ষুষোশ্চ দিবাকরঃ || ১, ২. ২৬ ||
মুখাদগ্নিশ্চ সঞ্জজ্ঞে তং দেবং চিন্তয়াম্যহম্ |
পদ্য্ভাং যস্য ক্ষিতির্জাতা শ্রোত্রাভ্যাং চ তথা দিশঃ || ১, ২. ২৭ ||
মূর্ধভাগাদ্দিবং যস্য তং দেবং চিন্তয়াম্যহম্ |
সর্গশ্চ প্রতিসর্গশ্চ বংশো মন্বন্তরাণি চ || ১, ২. ২৮ ||
বংশানুচরিতং যস্মাত্তং দেবং চিন্তয়াম্যহম্ |
যং ধ্যায়াম্যহমেতস্মাদূজামঃ সারমীক্ষিতুম্ || ১, ২. ২৯ ||
ব্রহ্মোবাচ |
ইত্যুক্তোঽহং পুরা রুদ্রঃ শ্বেতদ্বীপনিবাসিনম্ |
স্তুৎবা প্রণম্য তং বিষ্ণুং শ্রোতুকাম স্থিতঃ সুরৈঃ || ১, ২. ৩০ ||
অস্মাকং মধ্যতো রুদ্র উবাচ পরমেশ্বরম্ |
সারান্ত্সারতরং বিষ্ণুং পৃষ্টবাংস্তং প্রণম্য বৈ || ১, ২. ৩১ ||
ব্রহ্মোবাচ |
যথা পপ্রচ্ছ মাং ব্যাস স্তথাসৌ ভগবান্ভবঃ |
পপ্রচ্ছ বিষ্ণুং দেবাদ্যৈঃ শৃণ্বতামমরৈঃ সহ || ১, ২. ৩২ ||
রুদ্র উবাচ |
হরে কথয় দেবেশ ! দেবদেবঃ ক ঈশ্বরঃ |
কো ধ্যেয়ঃ কশ্চ বৈ পূজ্যঃ কৈর্ব্রতৈ স্তুষ্যতে পরঃ || ১, ২. ৩৩ ||
কৈর্ধর্মৈঃ কৈশ্চ নিয়মৈঃ কয়া বা ধর্মপূজয়া |
কেনাচারেণ তুষ্টঃ স্যাৎকিং তদ্রূপং চ তস্য বৈ || ১, ২. ৩৪ ||
কস্মাদ্দেবাজ্জগজ্জাতং জগৎপালয়তে চকঃ |
কীদৃশৈরবতারৈশ্চ কস্মিন্যাতি লয়ং জগৎ || ১, ২. ৩৫ ||
সর্গশ্চ প্রতিসর্গশ্চ বংশো মন্বন্তরাণি চ |
কস্মাদ্দেবাৎপ্রবর্তন্তে কস্মিমন্নেতৎপ্রতিষ্ঠিতম্ || ১, ২. ৩৬ ||
এতৎসর্বং হরে ! ব্রূহি যচ্চান্যদপি কিঞ্চন |
পরমেশ্বরমাহাত্ম্যং যুক্তয়োগাদিকং তথা || ১, ২. ৩৭ ||
তথাষ্টাদশ বিদ্যাশ্চ হরী রুদ্রং ততোঽব্রবীৎ |
হরিরুবাচ |
শৃণু রুদ্র ! প্রবক্ষ্যামি ব্রহ্মণা চ সুরৈঃ সহ || ১, ২. ৩৮ ||
অহং হি দেবো দেবানাং সর্বলোকেশ্বরেশ্বরঃ |
অহং ধ্যেয়শ্চ পূজ্যশ্চ স্তুত্যোহং স্ততিভিঃ সুরৈঃ || ১, ২. ৩৯ ||
অহং হি পূজিতো রুদ্র ! দদামি পরমাং গতিম্ |
নিয়মৈশ্চ ব্রতৈস্তুষ্ট আচারেণ চ মানবৈঃ || ১, ২. ৪০ ||
জগৎস্থিতেরহং বীজং জগৎকর্তা ৎবহং শিব ! |
দুষ্টনিগ্রহকর্তা হি ধর্মগোপ্তা ৎবহং হর ! || ১, ২. ৪১ ||
অবতারৈশ্চ মৎস্যাদ্যৈঃ পালয়াম্যখিলং জগৎ |
অহং মন্ত্রাশ্চ মন্ত্রার্থঃ পূজাধ্যানপরো হ্যহম্ || ১, ২. ৪২ ||
স্বর্গাদীনাং চ কর্তাহং স্বর্গাদীন্যহমেব চ |
যোগী যোগোহমেবাদ্যঃ পুরাণান্যহমেবচ || ১, ২. ৪৩ ||
জ্ঞাতা শ্রোতা তথা মন্তা বক্তা বক্তব্যমেব চ |
সর্বঃ সর্বাত্মকো দেবো ভুক্তিমুক্তিকরঃ পরঃ || ১, ২. ৪৪ ||
ধ্যানং পূজোপহারোঽহং মণ্ডলান্যহমেব চ |
ইতিহাসান্যহং রুদ্র ! সর্ববেদা হ্যহং শিব ! || ১, ২. ৪৫ ||
সর্বজ্ঞানান্যহং শম্ভো ! ব্রহ্মাত্মাহমহং শিব ! |
অহং ব্রহ্মা সর্বলোকঃ সর্বদেবাত্মকো হ্যহম্ || ১, ২. ৪৬ ||
অহং সাক্ষাৎসদাচারো ধর্মোঽহং বৈষ্ণবো হ্যহম্ |
বর্ণাশ্রমাস্তথা চাহং তদ্ধর্মোঽহং পুরাতনঃ || ১, ২. ৪৭ ||
যমোঽহং নিয়মো রুদ্র ! ব্রতানি বিবিধানি চ |
অহং সূর্যস্তথা চন্দ্রো মঙ্গলাদীন্যহং তথা || ১, ২. ৪৮ ||
পুরা মাং গরুডঃ পক্ষী তপসারাধয়দ্ভুবি |
তুষ্ট ঊচে বরং ব্রূহি মত্তো বব্রে বরং স তু || ১, ২. ৪৯ ||
গরুড উবাচ |
মম মাতা চ বিনতা নাগৈর্দাসীকৃতা হরে |
যথাহং দেব তাঞ্জিৎবা চামৃতং হ্যানয়ামি তৎ || ১, ২. ৫০ ||
দাস্যাদ্বিমোক্ষয়িষ্যামি যথাহং বাহনস্তব |
মহাবলো মহাবীর্যঃ সর্বজ্ঞো নাগদারণঃ || ১, ২. ৫১ ||
পুরাণসংহিতাকর্তা যথাহং স্যাং তথা কুরুং |
বিষ্ণুরুবাচ |
যথা ৎবয়োক্তং গরুড তথা সর্বং ভবিষ্যতি || ১, ২. ৫২ ||
নাগদাস্যান্মাতরং ৎবং বিনতাং মোক্ষয়িষ্যসি |
দেবাদীন্সকলাঞ্জিৎবা চামৃতং হ্যানয়িষ্যসি || ১, ২. ৫৩ ||
মহাবলো বাহনস্ত্বং ভবিষ্যসি বিষার্দনঃ |
পুরাণং মৎপ্রসাদাচ্চ মম মাহাত্ম্যবাচকম্ || ১, ২. ৫৪ ||
যদুক্তং মৎস্বরূপং চ তব চাবির্ভবিষ্যতি |
গারুডং তব নাম্না তল্লোকে খ্যাতিং গমিষ্যতি || ১, ২. ৫৫ ||
যথাহং দেবদেবানাং শ্রীঃ খ্যাতো বিনতাসুত |
তথা খ্যাতিং পুরাণেষু গারুডং গারুডৈষ্যতি || ১, ২. ৫৬ ||
যথাহং কীর্তনীয়োঽথ তথা ৎবং গরুডাত্মনা |
মাং ধ্যাৎবা পক্ষিমুখ্যেদং পুরাণং গদ গারুডম্ || ১, ২. ৫৭ ||
ইত্যুক্তো গরুডো রুদ্র ! কশ্যপায়াহ পৃচ্ছতে |
কশ্যপো গারুডং শ্রুৎবা বৃক্ষং দগ্ধমজীবয়ৎ || ১, ২. ৫৮ ||
স্বয়ং চান্যমনা ভূৎবা বিদ্যয়ান্যান্য জীবয়ৎ |
যক্ষি ওংুংস্বাহাজাপী বিদ্যয়ং গারুডী পরা |
গরুডোক্তং গারুডং হি শৃণু রুদ্র ! মদাত্মকম্ || ১, ২. ৫৯ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
শ্রীগরুডমহাপুরাণোৎপত্তিনিরূপণং নাম দ্বিতীয়োঽধ্যায়ঃ

শ্রীগরুডমহাপুরাণম্-৩
সূত উবাচ |
ইতি রুদ্রাব্জজো বিষ্ণোঃ শুশ্রাব ব্রহ্মণো মুনিঃ |
ব্যাসো ব্যাসাদহং বক্ষ্যেহং তে শৌনক নৈমিষে || ১, ৩. ১ ||
মুনীনাং শৃণ্বতাং মধ্যে সর্গাদ্যং দেবপূজনম্ |
তীর্থং ভুবনকোশং চ মন্বন্তরমিহোচ্যতে || ১, ৩. ২ ||
বর্ণাশ্রমাদিধর্মাশ্চ দানরাজাদিধর্মকাঃ |
ব্যবহারো ব্রতং বংশা বৈদ্যকং সনিদানকম্ || ১, ৩. ৩ ||
অঙ্গানি প্রলয়ো ধর্মকামার্থজ্ঞানমুত্তমম্ |
সপ্রপঞ্চং নিষ্প্রপঞ্চং কৃতং বিষ্ণোর্নিগদ্যতে || ১, ৩. ৪ ||
পুরাণে গারুডে সর্বং গরুডো ভগবানথ |
বাসুদেবপ্রসাদেন সামর্থ্যাতিশয়ৈর্যুতঃ || ১, ৩. ৫ ||
ভুৎবা হরের্বাহনং চ সর্গাদীনাং চ কারণম্ |
দেবান্বিজিত্য গরুডো হ্যমৃতাহরণং তথা || ১, ৩. ৬ ||
চক্রে ক্ষুধা হৃতং যস্য ব্রহ্মাণ্ডমুদরে হরেঃ |
যং দৃষ্ট্বা স্মৃতমাত্রেণ নাগান্দীনাং চ সঙ্ক্ষয়ঃ || ১, ৩. ৭ ||
কশ্যপো গারুডাদ্বৃক্ষং দগ্ধং চাজীবয়দ্যতঃ |
গরুডঃ স হরিস্তেন প্রোক্তং শ্রীকশ্যপায় চ || ১, ৩. ৮ ||
তচ্ছ্রীমদ্রারুডং পুণ্যং সর্বদং পঠতস্তব |
বক্ষ্যে ব্যাসং নমস্কৃত্য শৃণু শৌনক তদ্যথা || ১, ৩. ৯ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
বিষয়নিরূপণং নাম তৃতীয়োঽধ্যায়ঃ

শ্রীগরুডমহাপুরাণম্-৪
রুদ্র উবাচ |
সর্গশ্চ প্রতিসর্গশ্চ বংশো মন্বন্তরাণি চ |
বংশানুচরিতং চৈব এতদ্ব্রূহি জনার্দন || ১, ৪. ১ ||
হরিরুবাচ |
শৃণু রুদ্র প্রবক্ষ্যামি সর্গাদীন্পাপনাশনাম্ |
সর্গস্থিতিলয়ান্তাং তাং বিষ্ণোঃ ক্রীডাং পুরাতনীম্ || ১, ৪. ২ ||
নরনারায়ণো দেবো বাসুদেবো নিরঞ্জনঃ |
পরমাত্মা পরং ব্রহ্ম জগজ্জনিলয়াদিকৃৎ || ১, ৪. ৩ ||
তদেতৎসর্বমেবৈতব্দ্যক্তাব্যক্তস্বরূপবৎ |
তথা পুরুষরূপেণ কালরূপেণ চ স্থিতম্ || ১, ৪. ৪ ||
ব্যক্তং বিষ্ণুস্তথাব্যক্তং পুরুষঃ কাল এব চ |
ক্রীডতো বালকস্যেব চেষ্টাস্তস্য নিশাময় || ১, ৪. ৫ ||
অনাদিনিধনো ধাতা ৎবনন্তঃ পুরুষোত্তমঃ |
তস্মাদ্ভবতি চাব্যক্তং তস্মাদাত্মাপি জায়তে || ১, ৪. ৬ ||
তস্মাহুদ্ধির্মনস্তস্মাত্ততঃ খং পবন স্ততঃ |
তস্মাত্তেজস্ততস্ত্বাপস্ততো ভূমিস্ততোঽভবৎ || ১, ৪. ৭ ||
অণ্ডো হিরণ্ময়ো রুদ্র তস্যান্তঃ স্বয়মেব হি |
শরীরগ্রহণং পূর্বং সৃষ্ট্যর্থং কুরুতে প্রভুঃ || ১, ৪. ৮ ||
ব্রহ্মা চতুর্মুখো ভূৎবা রজোমাত্রাধিকঃ সদা |
শরীরগ্রহণং কৃৎবাসৃজদেতচ্চরাচরম্ || ১, ৪. ৯ ||
অণ্ডস্যান্তর্জগৎসর্বং সদেবাসুরমানুষম্ |
স্রষ্টা সৃজতি চাত্মানং বিষ্ণুঃ পাল্যং চ পাতি চ || ১, ৪. ১০ ||
অপসংহ্রিয়তে চান্তে সংহর্তা চ স্বয়ং হর |
ব্রহ্মা ভূৎবাসৃজদ্বিষ্ণুর্জগৎপাতি হরিঃ স্বয়ম্ || ১, ৪. ১১ ||
রুদ্ররূপী চ কল্পান্তে জগৎসংহরতেঽখিলম্ |
ব্রহ্মা তু সৃষ্টিকালেঽস্মিঞ্জমধ্যগতাং মহীম্ || ১, ৪. ১২ ||
দংষ্টূয়োদ্ধরতি জ্ঞাৎবা বারহীমাস্থিতস্তনূম্ |
দেবাদিসর্গান্বক্ষ্যেঽহং সঙ্ক্ষেপাচ্ছৃণু শঙ্কর ! || ১, ৪. ১৩ ||
(১) প্রথমো মহতঃ সর্গো বিরূপো ব্রহ্মণস্তু সঃ |
(২) নন্মাত্রাণাং দ্বিতীয়স্তু ভূতসর্গো হি স স্মৃতঃ || ১, ৪. ১৪ ||
(৩) বৈকারিকস্তৃতীয়স্তু সর্গস্ত্বৈন্দ্রিয়কঃ স্মৃতঃ |
ইত্যেষ প্রাকৃতঃ সর্গঃ সম্ভূতো বুদ্ধিপূর্বকঃ || ১, ৪. ১৫ ||
(৪) মুখ্যসর্গশ্চতুর্থস্তু মুখ্যা বৈ স্থাবরাঃ স্মৃতাঃ |
(৫) তির্যক্স্রোতাস্তু যঃ প্রোক্তস্তির্যগ্যোন্যঃ স উচ্যতে || ১, ৪. ১৬ ||
(৬) তদূর্ধ্বস্তোতসাং ষষ্ঠো দেবসর্গস্তু স স্মৃতঃ |
(৭) ততোর্ঽবাক্স্রোতসাং সর্গঃ সপ্তমঃ স তু মা নুষঃ || ১, ৪. ১৭ ||
(৮) অষ্টমোঽনুগ্রহঃ সর্গঃ সাত্ত্বিকস্তামসস্তু সঃ |
পঞ্চৈতে বৈকৃতাঃ সর্গাঃ প্রাকৃতাস্তু ত্রয়ঃ স্মৃতাঃ || ১, ৪. ১৮ ||
প্রাকৃতো বৈকৃতশ্চাপি (৯) কৌমারো নবমঃ স্মৃতঃ |
স্থাবরান্তাঃ সুরাদ্যাস্তু প্রজা রুদ্র ! চতুর্বিধাঃ || ১, ৪. ১৯ ||
ব্রহ্মণঃ কুর্বতঃ সৃষ্টিং জজ্ঞিরে মানসাঃ সুতাঃ |
ততো দেবাসুরপিৎৠন্মানুষাংশ্চ চতুষ্টয়ম্ || ১, ৪. ২০ ||
সিসৃক্ষুরম্ভাংস্যেতানি স্বমাত্মানময়ূয়ুজৎ |
ব্যক্তাত্মনস্তমোমাত্রাদুদ্রিক্তাস্তৎপ্রজাপতেঃ || ১, ৪. ২১ ||
সিসৃক্ষের্জঘনাৎপূর্বমসুরা জজ্ঞিরে ততঃ |
উৎসসর্জ ততস্তাং তু তমোমাত্রাত্মিকাং তনূম্ || ১, ৪. ২২ ||
তমোমাত্রা তনুস্ত্যক্তা শঙ্করাভূদ্বিভাবরী |
যক্ষোপক্ষাংসি তদ্দেহে প্রীতিমাপুস্ততঃ সুরাঃ || ১, ৪. ২৩ ||
সত্ত্বোদ্রিক্তাস্তু মুখতঃ সম্ভূতা ব্রহ্মণো হর ! |
সত্ত্বপ্রায়া তনুস্তেন সন্ত্যক্তা সাপ্যভূদ্দিনম্ || ১, ৪. ২৪ ||
ততো হি বলিনো রাত্রাবসুরা দেবতা দিবা |
সত্ত্বমাত্রাং তনুং গৃহ্য পিতরশ্চ ততোঽভবন্ || ১, ৪. ২৫ ||
সা চোৎসৃষ্টাভবৎসন্ধ্যা দিননক্তান্তরস্থিতিঃ |
রজোমাত্রাং তনুং গৃহ্য মনুষ্যাস্ত্বভবংস্ততঃ || ১, ৪. ২৬ ||
সা ত্যক্তা চাভবজ্জ্যোৎস্না প্রাক্সন্ধ্যা যাভিধীয়তে |
জ্যোৎস্না রাত্র্যহনী সন্ধ্যা শরীরাণি তু তস্য বৈ || ১, ৪. ২৭ ||
রজোমাত্রাং তনু গৃহ্য ক্ষুদভূৎকোপ এব চ |
ক্ষুত্তৃট্ক্ষামা অমৃগ্ভক্ষা রাক্ষসা রক্ষণাচ্চ যে || ১, ৪. ২৮ ||
যক্ষাখ্যা জক্ষণাজ্জ্ঞেয়াঃ সর্পা বৈ কেশসর্পণাৎ |
জাতাঃ কোপেন ভূতাস্তে গন্ধর্বা জজ্ঞিরে ততঃ || ১, ৪. ২৯ ||
গায়ন্তো জজ্ঞিরে বাচং গন্ধর্বাপ্সরসশ্চ যে |
স্বর্গং দ্যৌর্বক্ষসশ্চক্রে সুখতোঽজাঃ স মুষ্টবান্ || ১, ৪. ৩০ ||
সৃষ্টবানুদরাদ্রাশ্চ পার্শ্বাভ্যাং চ প্রজাপতিঃ |
পদ্য্ভাং চৈবান্ত্যমাতঙ্গান্মহিষোষ্ট্রাবিকাংস্তথা || ১, ৪. ৩১ ||
ওপধ্যঃ ফলমূলিন্যো রোমভ্যস্তস্য জজ্ঞিরে |
গৌরজঃ পুরুষো মেধ্যো হ্যশ্বাশ্বতরগর্দভাঃ || ১, ৪. ৩২ ||
এতান্গ্রাম্যান্পশূন্প্রাহুরারণ্যাংশ্চ নিবোধ মে |
শ্বাপদং দ্বিখুরং হস্তিবানরাঃ পক্ষিপঞ্চমাঃ || ১, ৪. ৩৩ ||
ঔদকাঃ পশবঃ ষষ্ঠাঃ সপ্তমাশ্চ সরীসৃপাঃ |
পূর্বাদিভ্যো মুখেভ্যস্তু ঋগ্বেদাদ্যাঃ প্রজজ্ঞিরে || ১, ৪. ৩৪ ||
আস্যাদ্বৈ ব্রাহ্মণা জাতা বাহুভ্যাং ক্ষত্ত্রিয়াঃ স্মৃতাঃ |
ঊরুভ্যাং তু বিশঃ সৃষ্টাঃ শূদ্রঃ পদ্য্ভাম জায়ত || ১, ৪. ৩৫ ||
ব্রহ্মলোকো ব্রাহ্মণানাং শাক্রঃ ক্ষত্ত্রিয়জন্মনাম্ |
মারুতং চ বিশাং স্থানং গান্ধর্বং শূদ্রজন্মনাম্ || ১, ৪. ৩৬ ||
ব্রহ্মচারিব্রতস্থানাং ব্রহ্মলোকঃ প্রজায়তে |
প্রাজাপত্যং গৃহস্থানাং যথাবিহিতকারিণাম্ || ১, ৪. ৩৭ ||
স্থানং সপ্তঋষীণাং চ তথৈব বনবাসিনাম্ |
যতীনামক্ষয়ং স্থানং যদৃচ্ছাগামিনাং সদা || ১, ৪. ৩৮ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
সৃষ্টিবর্ণনং নাম চতুর্থোঽধ্যায়ঃ

শ্রীগরুডমহাপুরাণম্-৫
ইরিরুবাচ |
কৃৎবেহামুত্রসংস্থানং প্রজাসর্গং তু মানসম্ |
অথামৃজৎপ্রজাকর্ত্ৠন্ভানসাংস্তনয়ান্প্রভুঃ || ১, ৫. ১ ||
ধর্মং রুদ্রং মনুং চৈব সনকং চ সনাতনম্ |
ভৃগুং সনৎকুমারং চ রুচিং শ্রদ্ধাং তথৈব চ || ১, ৫. ২ ||
মরীচিমত্র্যঙ্গিরসৌ পুলস্ত্যং পুলহং ক্রতুম্ |
বসিষ্ঠং নারদং চৈব পিৎৠন্বর্হিষদস্তথা || ১, ৫. ৩ ||
অগ্নিষ্বাত্তাংশ্চ কব্যাদানাজ্যপাংশ্চ সুকালিনঃ |
উপহূতাংস্তথা দীপ্যাং (প্রা) স্ত্রীংশ্চ মূর্তিবিবর্জিতান্ || ১, ৫. ৪ ||
চতুরো মূর্তিয়ুক্তাংশ্চ অঙ্গুষ্ঠাদ্দক্ষমীশ্বরম্ |
বামাং গুষ্ঠাত্তস্য ভার্যামসৃজৎপদ্মসম্ভবঃ || ১, ৫. ৫ ||
তস্যাং তু জনয়ামাস দক্ষো দুহিতরঃ শুভাঃ |
দদৌ তা ব্রহ্মপুত্রেভ্যঃ সতীং রুদ্রায় দত্তবান্ || ১, ৫. ৬ ||
রুদ্র পুত্রা বভূবুর্হি অসঙ্খ্যাতা মহাবলাঃ |
ভৃগবে চ দদৌ খ্যাতিং রূপেণাপ্রতিমাং শুভাম্ || ১, ৫. ৭ ||
ভৃগোর্ধাতাবিধাতারৌ জনয়ামাস সা শুভা |
শ্রিয়ং চ জনয়ামাস পত্নী নারায়ণস্য যা || ১, ৫. ৮ ||
তস্যাং বৈ জনয়ামাস বলোন্মাদৌ হরিঃ স্বয়ম্ |
আয়তির্নিয়তিশ্চৈব মনোঃ কন্যে মহাত্মনঃ || ১, ৫. ৯ ||
ধাতাবিধাত্রোস্তে ভার্যে তয়োর্জাতৌ সুতাবুভৌ |
প্রাণশ্চৈব মৃকণ্ডুশ্চ মার্কণ্ডেয়ো মৃকণ্ডুতঃ || ১, ৫. ১০ ||
পত্নি মরীচেঃ সম্ভূতিঃ পৌর্ণমাসমসূয়ত |
বিরজাঃ সর্বগশ্চৈব তস্য পুত্রৌ মহাত্মনঃ || ১, ৫. ১১ ||
স্মৃতেশ্চাংঙ্গিরসঃ পুত্রাঃ প্রসূতাঃ কন্যকাস্তথা |
সিনীবালী কুহূশ্চৈব রাকা চানুমতিস্তথা || ১, ৫. ১২ ||
অনসূয়া তথৈবাত্রের্জজ্ঞে পুত্রানকল্মষান্ |
সোমং দুর্বাসসং চৈব দত্তাত্রেয়ং চ যোগিনম্ || ১, ৫. ১৩ ||
প্রীত্যাং পুলস্ত্যভার্যায়াং দত্তোলিস্তৎসুতোঽভবৎ |
কর্মশশ্চার্থবীরশ্চ সহিষ্ণুশ্চ সুতত্রয়ম্ || ১, ৫. ১৪ ||
ক্ষমা তু সুষুবে ভার্যা পুলহস্য প্রিজাপতেঃ |
ক্রতোশ্চ সুমতির্ভার্যা বালখিল্যানসূয়ত || ১, ৫. ১৫ ||
ষষ্টির্যানি সহস্রাণি ঋষীণামূর্ধরেতসাম্ |
অঙ্গুষ্ঠপর্বমাত্রাণাং জ্বলদ্ভাস্করবর্চসাম্ || ১, ৫. ১৬ ||
ঊর্জায়াং তু বসিষ্টস্য সপ্তাজায়ন্ত বৈ সুতাঃ |
রজোগাত্রোর্ধবাহুশ্চ শরণশ্চানঘস্তথা || ১, ৫. ১৭ ||
সুতপাঃ শুক্র ইত্যেতে সর্বে সপ্তর্ষয়োঽমলাঃ |
স্বাহাং প্রাদাৎস দক্ষোঽপি শশরীরায় বহ্নয়ে || ১, ৫. ১৮ ||
তস্মাৎস্বাহা সুতাংল্লেভে ত্রীনুদারৌজসো হর ! |
ফাবকং পবমানং চ শুচিং চাপি জলাশিনঃ || ১, ৫. ১৯ ||
পিতৃভ্যশ্চ স্বধা জজ্ঞে মেনাং বৈতরণীং তথা |
তে উভে ব্রহ্মবাদিন্যৌ মেনায়াং তু হিমাচলঃ || ১, ৫. ২০ ||
মৈনাকং জনয়ামাস গৌরীং পূর্বং তু যা সতী |
ততো ব্রহ্মাত্মসম্ভূতং পূর্বং স্বায়ম্ভুবং প্রভুঃ || ১, ৫. ২১ ||
আত্মানমেব কৃতবান্প্রজাপাল্যং মনুং হর ! |
শতরূপাং চ তাং নারীং তপোনিহতকল্মষাম্ || ১, ৫. ২২ ||
স্বায়ম্ভুবো মনুর্দেবঃ পত্নিৎবে জগৃহে বিভুঃ |
তস্মাচ্চ পুরুষাদ্দেবী শতরূপা ব্যজায়ত || ১, ৫. ২৩ ||
প্রিয়ব্রতোত্তানপাদৌ প্রসূত্যাকূতিসঞ্জ্ঞেতে |
দেবহূতিং মনুস্তাসু আকূতিং রুচয়ে দদৌ || ১, ৫. ২৪ ||
প্রসূতিং চৈব দক্ষায় দবহূতিং চ কর্দমে |
রুচের্যজ্ঞো দক্ষিণাভূদ্দক্ষিণায়াং চ যজ্ঞতঃ || ১, ৫. ২৫ ||
অভবন্দ্বাদশ সুতা যামা নাম মহাবলাঃ |
চতুর্বোশতিকন্যাশ্চ সৃষ্টবান্দক্ষ উত্তমাঃ || ১, ৫. ২৬ ||
শ্রদ্ধা চলা ধৃতিস্তুষ্টিঃ পুষ্টির্মেধা ক্রিয়া তথা |
বুদ্ধির্লজ্জা বপুঃ শান্তিরৃদ্ধিঃ কীর্তিস্ত্নয়োদশী || ১, ৫. ২৭ ||
পত্ন্যর্থং প্রতিজগ্রাহ ধর্মো দাক্ষায়ণীপ্রভুঃ |
খ্যতিঃ সত্যথ সম্ভূতিঃ স্মৃতিঃ প্রীতিঃ ক্ষমা তথা || ১, ৫. ২৮ ||
সন্নতিশ্চানসূয়া চ ঊর্জা স্বাহা স্বধা তথা |
ভৃঘুর্ভবো মরীচিশ্চ তথা চৈবাঙ্গিরা মুনিঃ || ১, ৫. ২৯ ||
পুলস্ত্যঃ পুলহশ্চৈব ক্রতুশ্চর্ষিবরস্তথা |
আত্রির্বসিষ্ঠো বহ্নিশ্চ পিতরশ্চ যথাক্রমম্ || ১, ৫. ৩০ ||
খ্যাত্যাদ্যা জগৃহুঃ কন্যা মুনয়ো মুনিসত্তমাঃ |
শ্রদ্ধা কামং চলা দর্পং নিয়মং ধৃতিরাত্মজম্ || ১, ৫. ৩১ ||
সন্তোষং চ তথা তুষ্টির্লোভং পুষ্টিরসূয়ত |
মেধা শ্রুতং ক্রিয়া দণ্ডং লয়ং বিনয়মেব চ || ১, ৫. ৩২ ||
বোধং বুদ্ধিস্তথা লজ্জা বিনয়ং বপুরাত্মজম্ |
ব্যবসায়ং প্রজজ্ঞে বৈ ক্ষেমং শান্তিরসূয়ত || ১, ৫. ৩৩ ||
সুখমৃদ্ধির্যশঃ কীর্তিরিত্যেতে ধর্মসূনবঃ |
কামস্য চ রতির্ভার্যা তৎপুত্রো হর্ষ উচ্যতে || ১, ৫. ৩৪ ||
ঈজে কদাচিদ্যজ্ঞেন হয়মেধেন দক্ষকঃ |
তস্য জামাতরঃ সর্বে যজ্ঞং জগ্মুর্নিমন্ত্রিতাঃ || ১, ৫. ৩৫ ||
ভার্যভিঃ সহিতাঃ সর্বে রুদ্রং দেবীং সতীং বিনা |
অনাহূতা সতী প্রাপ্তা দক্ষেণৈবাবমানিতা || ১, ৫. ৩৬ ||
ত্যক্তা দেহং পুনর্জাতা মেনায়াং তু হিমালয়াৎ |
শম্ভোর্ভার্যাভবদ্রৌরী তস্যাং জজ্ঞে বিনায়কঃ || ১, ৫. ৩৭ ||
কুমারশ্চৈব ভৃঙ্গীশঃ ক্রুদ্ধো রুদ্রঃ প্রতাপবান্ |
বিধ্বংস্য যজ্ঞং দক্ষং তু তং শশাপ পিনাকধৃক্ |
ধ্রুবস্যান্বয়সম্ভূতো মনুষ্যস্ত্বং ভবিষ্যসি || ১, ৫. ৩৮ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
প্রজাকর্ত্রাদিসৃষ্টির্নাম পঞ্চমোঽধ্যায়ঃ

শ্রীগরুডমহাপুরাণম্-৬
হরিরুবাচ |
উত্তানপাদাদভবৎসুরুচ্যামুত্তমঃ সুতঃ |
সুনীত্যাং তু ধ্রুবঃ পুত্রঃ স লেভে স্থানমুত্তমম্ || ১, ৬. ১ ||
মুনিপ্রসাদাদারাধ্য দেবদেবং জনার্দনম্ |
ধ্রুবস্য তনয়ঃ শ্লিষ্টির্মহাবলপরাক্রমঃ || ১, ৬. ২ ||
তস্য প্রাচীনবর্হিস্তু পুত্রস্তস্যাপ্যুদারধীঃ |
দিবঞ্জয়স্তস্য সুতস্তস্য পুত্রো রিপুঃ স্মৃতঃ || ১, ৬. ৩ ||
রিপোঃ পুত্রস্তথা শ্রীমাংশ্চাক্ষুষঃ কীর্তিতো মনুঃ |
রুরুস্তস্য সুতঃ শ্রীমানঙ্গস্তস্যাপি চাত্মজঃ || ১, ৬. ৪ ||
অঙ্গস্য বেণঃ পুত্রস্তু নাস্তিকো ধর্মবর্জিতঃ |
অধর্মকারী বেণ(ন) শ্চ মুনিভিশ্চ কুশৈর্হতঃ || ১, ৬. ৫ ||
ঊরুং মমন্থুঃ পুত্রার্থে ততোঽস্য তনয়োঽভবৎ |
হ্রস্বোঽতিমাত্রঃ কৃষ্ণাঙ্গো নিষীদেতি ততোঽব্রুবন্ || ১, ৬. ৬ ||
নিষাদস্তেন বৈ জাতো বিন্ধ্যশৈলনিবাসকঃ |
ততোঽস্য দক্ষিণং পাণিং মমন্থুঃ সহসা দ্বিজাঃ || ১, ৬. ৭ ||
তস্মাত্তস্য সুতো জাতো বিষ্ণোর্মানসরূপধৃক্ |
পুথুরিত্যেবনামা স বেণপুত্রো দিবং যয়ৌ || ১, ৬. ৮ ||
দুদোহ পৃথিবীং রাজা প্রজানাং জীবনায় হি |
অন্তর্ধানঃ পৃথোঃ পুত্রো তহবির্ধানস্তদাত্মজঃ || ১, ৬. ৯ ||
প্রাচীনবহর্স্তেৎপুত্রঃ পৃথিব্যামেকরাড্বভৌ |
উপয়েমে সমুদ্রস্য লবণস্য স বৈ সুতাম্ || ১, ৬. ১০ ||
তস্মাৎসুষাব সামুদ্রী দশ প্রাচীনবর্হিষঃ |
সর্বে প্রাচেতসা নাম ধনুর্বেদস্য পারগাঃ || ১, ৬. ১১ ||
অপৃথগধর্মচরণাস্তেঽতপ্যন্ত মহত্তপঃ |
দশবর্ষসহস্রাণি সমুদ্রসলিলেশয়াঃ || ১, ৬. ১২ ||
প্রজাপতিৎবং সম্প্রাপ্য ভার্যা তেষাং চ মারিষ |
অভবদ্ধবশাপেন তস্যাং দক্ষোঽভবত্ততঃ || ১, ৬. ১৩ ||
অসৃজন্মনসা দক্ষঃ প্রজাঃ পূর্বং চতুর্বোধাঃ |
নাবর্ধন্ত চ তাস্তস্য অপধ্যাতা হরেণ তু || ১, ৬. ১৪ ||
মৈথুনেন ততঃ সৃষ্টিং কর্তুমৈচ্ছৎপ্রজাপতিঃ |
অসিক্রীমাবহদ্ভার্যাং বীরণস্য প্রজাপতেঃ || ১, ৬. ১৫ ||
তস্য পুত্রসহস্রং তু বৈরণ্যাং সমপদ্যত |
নারদোক্তা ভুবশ্চান্তং গতা জ্ঞাতুং চ নাগতাঃ || ১, ৬. ১৬ ||
দক্ষপুত্রসহস্রং চ তেষু নষ্টেষু সৃষ্টবান্ |
শবলাশ্বাস্তেঽপি গতা ভ্রাৎৠণাং পদবীং হর ! || ১, ৬. ১৭ ||
দক্ষঃ ক্রুদ্ধঃ শশাপাথ নারদং জন্ম চাপ্স্যসি |
নারদো হ্যভবৎপুত্রঃ কশ্যপস্য মুনেঃ পুনঃ || ১, ৬. ১৮ ||
যজ্ঞে ধ্বস্তেঽথ দক্ষোঽপি শশাপ্রোগ্রং মহেশ্বরম্ |
স্তুৎবাৎবামুপচারৈশ্চ পূজয়িষ্যন্তি শঙ্কর || ১, ৬. ১৯ ||
জন্মান্তরেঽপি বৈরেণ তে বিনশ্যন্তি শঙ্কর ! |
তস্মাদ্বৈরং ন কর্তব্যং কদাচিদপি কেনচিৎ |
অসিক্ন্যাং (মহিষ্যাং) জনয়ামাস দক্ষো দুহিতরো হ্যথ || ১, ৬. ২০ ||
ষষ্টিং কন্যা রূপয়ুতা দ্বে চৈবাঙ্গিরসে দদৌ |
দ্বে প্রাদাৎস কৃশাশ্বায় দশ ধর্মায় চাপ্যথ || ১, ৬. ২১ ||
চতুর্দশ কশ্যপায় অষ্টাবিংশাতিমিন্দবে |
প্রদদৌ বহুপুত্রায় সুপ্রভাং ভামিনীং তথা || ১, ৬. ২২ ||
মনোরমাং ভানুমতীং বিশালাং বহুদামথ |
দক্ষঃ প্রাদান্মহাদেব ! চতস্রোঽরিষ্টনেময়ে (নে) || ১, ৬. ২৩ ||
স কৃশাশ্বায় চ প্রাদাৎসুপ্রজাং চ তথা জয়াম্ |
অরুন্ধতী বসুর্যার্(জা) মী লম্বা ভানুর্মরুদ্বতী || ১, ৬. ২৪ ||
সঙ্কল্পা চ মুহূর্তা চ সাধ্যা বিশ্বা চ তা দশ |
ধর্মপত্ন্যঃ সমাখ্যাতাঃ কশ্যপস্য বদাম্যহম্ || ১, ৬. ২৫ ||
অদিতির্দিতির্দনুঃ কালা হ্যনায়ুঃ সিংহিকা মুনিঃ |
কদ্রূঃ সাধ্যা হরা ক্রোধা বিনতা সুরভিঃ খগা || ১, ৬. ২৬ ||
বিশ্বেদেবাস্তু বিশ্বায়াঃ সাধ্যা সাধ্যান্ব্যজায়ত |
মরুৎবত্যাং মরুৎবন্তো বসোস্তু বসবস্তথা || ১, ৬. ২৭ ||
ভানোস্তু ভানবো রুদ্র ! মুহূর্তাচ্চ মুহূর্তজাঃ |
লম্বায়াশ্চৈব ঘোষোঽথ নাগবীথিস্তু যা (জা) মিতঃ || ১, ৬. ২৮ ||
পৃথিবীবিষয়ং সর্বমরুৎবত্যাং ব্যজায়ত |
সঙ্কল্পায়াস্তু সর্বাত্মা জজ্ঞে সঙ্কল্প এব হি || ১, ৬. ২৯ ||
আপো ধ্রুবশ্চ সোমশ্চ ধরশ্চৈবানিলোঽনলঃ |
প্রত্যূষশ্চ প্রভাসশ্চ বসবো নামভিঃ স্মৃতাঃ || ১, ৬. ৩০ ||
আপস্য পুত্রো বেতুণ্ডিঃ (ণ্ডঃ) শ্রমঃ শ্রান্তো ধ্বনিস্তথা |
ধ্রুবস্য পুত্রো ভগবান্কালো লোকপ্রকালনঃ || ১, ৬. ৩১ ||
সোমস্য ভগবান্বর্চা বর্চস্বী যেন জায়তে |
ধরস্য পুত্রো দ্রুহিণো হুতহব্যবহস্তথা || ১, ৬. ৩২ ||
মনোহরায়াং শিশিরঃ প্রাণোঽথ রমণস্তথা |
অনিলস্য শিবা ভার্যা তস্যাঃ পুত্রঃ পুলোমজঃ || ১, ৬. ৩৩ ||
অবিজ্ঞাতগতিশ্চৈব দ্বৌ পুত্রাবনিলস্য তু |
অগ্নিপুত্রঃ কুমারস্তু শরস্তম্বে ব্যজায়ৎ || ১, ৬. ৩৪ ||
তস্য শাখো বিশাখশ্চ নৈগমেয়শ্চ পৃষ্টজঃ |
অপত্যং কৃত্তিকানাং তু কার্তিকেয় ইতি স্মৃতঃ || ১, ৬. ৩৫ ||
প্রত্যুষস্য বিদুঃ পুত্রমৃষিং নাম্না তু দেবলম্ |
বিশ্বকর্মা প্রভাসস্য বিখ্যাতো দেববর্ধকিঃ || ১, ৬. ৩৬ ||
অজৈকপাদহির্বুধ্ন্যস্ত্বষ্টা রুদ্রশ্চ বীর্যবান্ |
ৎবষ্টুশ্চাপ্যাত্মজঃ পুত্রো বিশ্বরূপো মহাতপাঃ || ১, ৬. ৩৭ ||
হরশ্চ বহুরূপশ্চ ত্র্যম্বকশ্চাপরাজিতঃ |
বৃষাকপিশ্চ শম্ভুশ্চ কপর্দে রৈবতস্তথা || ১, ৬. ৩৮ ||
মৃগব্যাধশ্চ শর্বশ্চ কপালী চ মহামুনে ! |
একাদশৈতে কথিতা রুদ্রাস্ত্রিভুবনেশ্বরাঃ || ১, ৬. ৩৯ ||
অদিত্যাং কশ্যপাচ্চৈব সূর্যা দ্বাদশ জজ্ঞিরে |
বিষ্ণুঃ শক্রোর্ঽয্যমা ধাতা ৎবষ্টা পূষা তথৈব চ || ১, ৬. ৪০ ||
বিবস্বান্সবিতা চৈব মিত্রো বরুণ এব চ |
অশুমাংশ্চ ভগশ্চৈব আদিত্যা দ্বাদশ স্মৃতাঃ || ১, ৬. ৪১ ||
সপ্তবিংশতিঃ সোমস্য পত্ন্যো নক্ষত্রসঞ্জ্ঞিতাঃ |
হিরণ্যকশিপুর্দিত্যাং হিরণ্যাক্ষোঽভবত্তদা || ১, ৬. ৪২ ||
সিংহিকা চাভবৎকন্যা বিপ্রচিত্তিপরিগ্রহা |
হিরণ্যকশিপোঃ পুত্রাশ্চৎবারঃ পৃথুলৌজসঃ || ১, ৬. ৪৩ ||
অনুহ্রাদশ্চ হ্রাদশ্চ প্রহ্রাদশ্চৈব বীর্যবান্ |
সংহ্রাদশ্চাবমস্তেষাং প্রহ্রাদো বিষ্ণুতৎপরঃ || ১, ৬. ৪৪ ||
সংহ্রাদপুত্র আয়ুষ্মাঞ্ছিবির্বাষ্কল এব চ |
বিরোচনশ্চ প্রাহ্রাদির্বলির্জজ্ঞে বিরোচনাৎ || ১, ৬. ৪৫ ||
বলেঃ পুত্রশতং ৎবাসীদ্বাণজ্যেষ্ঠং বৃষধ্বজ ! |
হিরণ্যাক্ষসুতাশ্চাসন্সর্ব এব মহাবলাঃ || ১, ৬. ৪৬ ||
উৎকুরঃ শকুনিশ্চৈব ভূতসন্তাপনস্তথা |
মহানাগো মহাবাহুঃ কালনাভস্তথাপরঃ || ১, ৬. ৪৭ ||
অভবন্দনুপুত্রাশ্চ দ্বিমূর্ধা শঙ্করস্তথা |
অয়োমুখঃ শঙ্কুশিরাঃ কপিলঃ শম্বরস্তথা || ১, ৬. ৪৮ ||
একচক্রো মহাবাহুস্তারকশ্চ মহাবলঃ |
স্বর্ভানুর্বৃষপর্বা চ পুলোমা চ মহাসুরঃ || ১, ৬. ৪৯ ||
এতে দনোঃ সুতাঃ খ্যাতা বিপ্রচিত্তিশ্চ বীর্যবান্ |
স্বর্ভানোঃ সুপ্রভা কন্যা শর্মিষ্ঠা বার্ষপর্বণী || ১, ৬. ৫০ ||
উপদানবী হয়শিরাঃ প্রখ্যাতা বরকন্যকাঃ |
বৈশ্বানরসুতে চোভে পুলোমা কালকা তথা || ১, ৬. ৫১ ||
উভে তে তু মহাভাগে মারীচেস্তু পরিগ্রহঃ |
তাভ্যাং পুত্রসহস্রাণি ষষ্টির্দানবসত্তমাঃ || ১, ৬. ৫২ ||
পৌলোমাঃ কালকঞ্জাশ্চ মারীচতনয়াঃ স্মৃতাঃ |
সিংহিকায়াং সমুৎপন্না বিপ্রচিত্তিসুতাস্তথা || ১, ৬. ৫৩ ||
ব্যংশঃ শল্যশ্চ বলবান্নভশ্চৈব মহাবলঃ |
বাতাপির্নমুচিশ্চৈব ইল্বলঃ খসৃমাংস্তথা || ১, ৬. ৫৪ ||
অঞ্জ (ন্ত) কো নরকশ্চৈব কাল নাভস্তথৈব চ |
নিবাতকবচা দৈত্যাঃ প্রহ্রাদস্য কুলেঽভবন্ || ১, ৬. ৫৫ ||
ষট্সুতাশ্চ মহাসত্ত্বাস্তাম্রায়াঃ পরিকীর্তিতাঃ |
শুকী শ্যেনী চ ভাসী চ সুগ্রীবী শুচিগৃধ্রিকে || ১, ৬. ৫৬ ||
শুকী শুকানজনয়দুলূকী প্রত্যলূককান্ |
শ্যেনী শ্যেনাংস্তথা ভাসী ভাসান্গৃধ্রাংশ্চ গৃধ্র্যপি || ১, ৬. ৫৭ ||
শুক্যৌদকান্পক্ষিগণান্সুগ্রীবী তু ব্যজায়ত |
(অশ্বানুষ্টান্গর্দভাংশ্চ তাম্রাবংশঃ প্রকীর্তিতঃ || ১, ৬. ৫৮ || )
বিনতায়াস্তু পুত্রৌ দ্বৌ বিখ্যাতৌ গরুডারুণৌ |
সুরসায়াঃ সহস্রং তু সর্পাণামমিতৌজসাম্ || ১, ৬. ৫৯ ||
কাদ্রবেয়াশ্চ ফণিনঃ সহস্রমমিতৌজসঃ |
তেষা প্রাধানা ভূতেশ ! শেষবাসুকিতক্ষকাঃ || ১, ৬. ৬০ ||
শঙ্খঃ শ্বেতো মহাপদ্মঃ (শঙ্খঃ) কম্বলাশ্বতরৌ তথা |
এলাপত্রস্তথা নাগঃ কর্কোটকধনঞ্জয়ৌ || ১, ৬. ৬১ ||
গণং ক্রোধবশং বিদ্ধি তে চ সর্বে চ দংষ্ট্রিণঃ |
ক্রোধা তু জনয়ামাস পিশাচাংশ্চ মহাবলান্ || ১, ৬. ৬২ ||
গাস্তু বৈ জনয়ামাস সুরভির্মহিষাংস্তথা |
ইরা বৃক্ষলতাবল্লীস্তৃণজাতীশ্চ সর্বশঃ || ১, ৬. ৬৩ ||
খগা চ যক্ষরক্ষাংসি মুনিরপ্সরসস্তথা |
অরিষ্টা তু মহাসত্ত্বান্গন্ধর্বান্সমজীজনৎ || ১, ৬. ৬৪ ||
দেবা একোনপঞ্চাশন্মরুতো হ্যভবন্নিতি |
একজ্যো তিশ্চ দ্বির্জ্যোতিচতুর্জ্যোতিস্তথৈব চ || ১, ৬. ৬৫ ||
একশুক্রো দ্বিশুক্রশ্চ ত্রিশুক্রশ্চ মহাবলঃ |
ঈদৃক্সদৃক্তথান্যাদৃক্ততঃ প্রতিসদৃক্তথা || ১, ৬. ৬৬ ||
মিতশ্চ সমিতশ্চৈব সুমিতশ্চ মহাবলঃ |
ঋতজিৎসত্যজিচ্চৈব সুষেণঃ সেনজিত্তথা || ১, ৬. ৬৭ ||
অতিমিত্রোঽপ্যমিত্রশ্চ দূরমিত্রোঽজিতস্তথা |
ঋতশ্চ ঋতধর্মা চ বিহর্তা বরুণো (চমসো) ধ্রুবঃ || ১, ৬. ৬৮ ||
বিধারণশ্চ দুর্মেধা অয়মেকগণঃ স্মৃতঃ |
ঈদৃশশ্চ সদৃক্ষশ্চ এতাদৃক্ষো মিতাশনঃ || ১, ৬. ৬৯ ||
এতেনঃ প্রসদৃক্ষশ্চ সুরতশ্চ মহাতপাঃ |
হেতুমান্প্রসবস্তদ্বৎসুরভশ্চ মহায়শাঃ || ১, ৬. ৭০ ||
নাদিরুগ্রো ধ্বনির্ভাসো বিমুক্তো বিক্ষিপঃ সহঃ |
দ্যুতির্বসুরনাধৃষ্যো লাভ কামো জয়ী বিরাট্ || ১, ৬. ৭১ ||
উদ্বেষণো গণো নাম বায়ুস্কন্ধে তু সপ্তমে |
এতৎসর্বং হরে রূপং রাজানো দানবাঃ সুরাঃ || ১, ৬. ৭২ ||
সূর্যাদি পরিবারেণ মন্বাদ্যা ঈজিরে হরিম্ || ১, ৬. ৭৩ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
উত্তানপাদবংশাদিবর্ণনং নাম ষষ্ঠোঽধ্যায়ঃ

শ্রীগরুডমহাপুরাণম্-৭
রুদ্র উবাচ |
সূর্যাদিপূজনং ব্রূহি কৃতং স্বায়ম্ভুবাদিভিঃ |
ভুক্তিমুক্তিপ্রদং সারং ব্যাস ! সঙ্ক্ষেপতঃ পরম্ || ১, ৭. ১ ||
হরিরুবাচ |
সূর্যাদিপূজাং বক্ষ্যামি ধর্মকামাদিকারিকাম্ || ১, ৭. ২ ||
ওঁ সূর্যাসনায় নমঃ |
ওঁ নমঃ সূর্যমূর্তয়ে |
ওঁ হ্রাং হ্রীং সঃ সূর্যায় নমঃ |
ওঁ সোমায় নমঃ |
ওঁ মঙ্গলায় নমঃ |
ওঁ বুধায় নমঃ
ওঁ বৃহস্পতয়ে নমঃ |
ওঁ শুক্রায় নমঃ |
ওঁ শনৈশ্চরায় নমঃ |
ওঁ রাহবে নমঃ |
ওঁ কেতবে নমঃ |
ওঁ তেজশ্চণ্ডায় নমঃ || ১, ৭. ৩ ||
আসনাবাহনং পাদ্যমর্ঘ্যমাচমনং তথা |
স্নানং বস্ত্রোপবীতঞ্চ গন্ধপুষ্পং চ ধূপকম্ || ১, ৭. ৪ ||
দীপকং চ নস্কারং প্রদক্ষিণবিসর্জনে |
সূর্যাদীনাং সদা কুর্যাদিতি মন্ত্রৈর্বৃষধ্বজ ! || ১, ৭. ৫ ||
ওঁ হ্রাংশিবায় নমঃ |
ওঁ হ্রাং শিবমূর্তয়ে শিবায় নমঃ |
ওঁ হ্রাং হৃদয়ায় নমঃ |
ওঁ হ্রীং শিরসে স্বাহা |
ওঁ হ্রূং শিখায়ৈ বষট্ |
ওঁ হ্রৈ কবচায় হুং |
ওঁ হ্রৌং নেত্রত্রয়ায় বৌষট্ |
ওঁ হ্রঃ অস্ত্রায় নমঃ |
ওঁ হ্রাং সদ্যোজাতয় নমঃ |
ওঁ হ্রীং বামদেবায় নমঃ |
ওঁ হ্রূং অঘোরায় নমঃ |
ওঁ হ্রৈং তৎপুরুষায় নমঃ |
ওঁ হ্রৌং ঈশানায় নমঃ |
ওঁ হ্রীং গৌর্যৈ নমঃ |
ওঁ হ্রৌং গুরুভ্যো নমঃ |
ওঁ হ্রৌং ইন্দ্রায় নমঃ |
ওঁ হ্রৌং চণ্ডায় নমঃ |
ওঁ হ্রাং অঘোরায় নমঃ |
ওঁ বাসুদেবাসনায় নমঃ |
ওঁ বাসুদবমূর্তয়ে নমঃ |
ওঁ অং ওঁ নমো ভগবতে বাসুদেবায় নমঃ |
ওঁ আং ওঁ নমো ভগবতে সঙ্কর্ষণায় নমঃ |
ওঁ অং ওঁ নমো ভগবতে প্রদ্যুম্নায় নমঃ |
ওঁ অঃ ওঁ নমো ভগবতে অনিরুদ্ধায় নমঃ |
ওঁ নারায়ণায় নমঃ |
ওঁ তৎসব্দ্রহ্যণে নমঃ |
ওঁ হ্রাং বিষ্ণবে নমঃ |
ওঁ ক্ষৌং নমো ভগবতে নরসিংহায় নমঃ |
ওঁ ভূঃ ওঁ নমো ভগবতে বরাহায় নমঃ |
ওঁ কং টং পং শং বৈনতেয়ায় নমঃ |
ওঁ জং খং রং সুদর্শ নায় নমঃ |
ওঁ খং ঠং ফং ষং গদৈয়ৌ নমঃ |
ওঁ বং লং মং ক্ষং পাঞ্চজন্যায় নমঃ |
ওঁ ঘং ঢং ভং হং শ্রিয়ৈ নমঃ |
ওঁ গং ডং বং সং পুষ্ট্যৈ নমঃ |
ওঁ ধং ষং বং সং বনমালায়ৈ নমঃ |
ওঁ সং দং লং শ্রীবৎসায় নমঃ |
ওঁ ঠং চং ভং যং কৌস্তুভায় নমঃ |
ওঁ গুরুভ্যো নমঃ |
ওঁ ইন্দ্রাদিদিক্পালেভ্যো নমঃ |
ওঁ বিষ্বক্সেনায় নমঃ || ১, ৭. ৬ ||
আসনাদীন্হরেরতৈর্মন্ত্রৈর্মন্ত্রৈর্দদ্যাদ্বৃষধ্বজ ! |
বিষ্ণুশক্ত্যাঃ সরস্বত্যাঃ পূজাং শৃণু শুভপ্রদাম্ || ১, ৭. ৭ ||
ওঁ হ্রীং সরস্বত্যৈ নমঃ |
ওঁ হ্রাং হৃদয়ায় নমঃ |
ওঁ হ্রীং শিরসে নমঃ |
ওঁ হ্রূং শিখায়ৈ নমঃ |
ওঁ হ্রৈং কবচায় নমঃ |
ওঁ হ্রৌং নেত্রত্রয়ায় নমঃ |
ওঁ হ্রঃ অস্ত্রায় নমঃ || ১, ৭. ৮ ||
শ্রদ্ধা ঋদ্ধিঃ কলা মেধা তুষ্টিঃ পুষ্টিঃ প্রভা মতিঃ |
ওঁ হ্রীঙ্কারাদ্যা নমোঽন্তাশ্চ সরস্বত্যাশ্চ শক্তয়ঃ || ১, ৭. ৯ ||
ক্ষেত্রপালায় নমঃ |
ওঁ গুরুভ্যো নমঃ |
ওঁ পরমগুরুভ্যো নমঃ || ১, ৭. ১০ ||
পদ্মস্থায়াঃ সরস্বত্যা আসনাদ্যং প্রকল্পয়েৎ |
সূর্যাদীনাং স্বকৈর্প্রন্ত্রৈঃ পবিত্রারোহণং তথা || ১, ৭. ১১ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
সূর্যাদীনাং সরস্বত্যাশ্চ পূজনং নাম সপ্তমোঽধ্যায়ঃ

শ্রীগরুডমহাপুরাণম্-৮
হরিরুবাচ |
ভূমিষ্ঠে মণ্ডপে স্নাৎবা মণ্ডলে বিষ্ণুমর্চয়েৎ |
পঞ্চরঙ্গিকচূর্ণেন বজ্রনাভং তু মণ্ডলম্ || ১, ৮. ১ ||
ষোডশৈঃ কোষ্ঠকৈস্তত্র সম্মিতং রুদ্র? কারয়েৎ |
চতুর্থপঞ্চকোণেষু সূত্রপাতং তু কারয়েৎ || ১, ৮. ২ ||
কোণসূত্রাদুভয়তঃ কোণা যে তত্র সংস্থিতাঃ |
তেষু চৈব প্রকুর্বীত সূত্রপাতং বিচক্ষণঃ || ১, ৮. ৩ ||
তদনন্তরকোণেষু এবমেব হি কারয়েৎ |
প্রথমা নাভিরুদ্দিষ্টা মধ্যে রেখাপ্রসঙ্গমে || ১, ৮. ৪ ||
অন্তরেষু চ সর্বেষু অষ্টৌ চৈব তুনাভয়ঃ |
পূর্বমধ্যমনাভি ভ্যামথং সূত্রং তু ভ্রাময়েৎ || ১, ৮. ৫ ||
অন্তরা স দ্বিজশ্রেষ্ঠঃ পাদোনং ভ্রাময়েদ্ধর ! |
অনেন নাভিসূত্রস্য কর্ণিকাং ভ্রাময়েচ্ছিব ! || ১, ৮. ৬ ||
কর্ণিকায়া দ্বিভাগেন কেসরাণি বিচক্ষণঃ |
তদগ্রেণ সদা বিদ্বান্দলান্যেব সমালিখেৎ || ১, ৮. ৭ ||
সর্বেষু নাভিক্ষেত্রষু মানেনানেন সুব্রত ! |
পদ্মানি তানি কুর্বীত দেশিকঃ পর মার্থবিৎ || ১, ৮. ৮ ||
আদিসূত্রবিভাগেন দ্বারাণি পরিকল্পয়েৎ |
দ্বারশোভাং তথা তত্র তদর্ধেন তু কল্পয়েৎ || ১, ৮. ৯ ||
কর্ণিকাং পীতবর্ণেন সিতরক্তাদিকেসরৈঃ |
অন্তরং নীলবর্ণেন দলানি অসিতেন চ || ১, ৮. ১০ ||
কৃষ্ণবর্ণেন রজসা চতুরশ্রং প্রপূরয়েৎ |
দ্বারাণি শুক্লবর্ণেন রেখাঃ পঞ্চ চ মণ্ডলে || ১, ৮. ১১ ||
সিতা রক্তা তথা পীতা কৃষ্ণা চৈব যথাক্রমম্ |
কৃৎবৈব মণ্ডলঞ্চাদৌ ন্যাসং কৃৎবার্চয়েদ্ধরিম্ || ১, ৮. ১২ ||
হৃন্মধ্যে তু ন্যসেদ্বিষ্ণুং কণ্ঠে সঙ্কর্ষণং তথা |
প্রদ্যুম্নং শিরসি ন্যস্য শিখায়ামনিরুদ্ধকম্ || ১, ৮. ১৩ ||
ব্রহ্মাণং সর্বগাত্রেষু করয়োঃ শ্রীধরং তথা |
অহং বিষ্ণুরিতি ধ্যাৎবা কর্ণিকায়াং ন্যসেদ্ধরিম্ || ১, ৮. ১৪ ||
ন্যসেৎসঙ্কর্ষণং পূর্বে প্রদ্যুম্নং চৈব দক্ষিণে |
অনিরুদ্ধং পশ্চিমে চ ব্রিহ্মাণং চোত্তরে ন্যসেৎ || ১, ৮. ১৫ ||
শ্রীধরং রুদ্রকোণেষু ইন্দ্রাদীন্দিক্ষু বিন্যসেৎ |
ততোঽভ্যর্চ্য চ গন্ধাদ্যৈঃ প্রাপ্নুয়াৎপরমং পদম্ || ১, ৮. ১৬ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
বিষ্ণুপূজোপয়োগিবজ্রনাভমণ্ডলনিরূপণং নামাষ্টমোঽধ্যায়ঃ

শ্রীগরুডমহাপুরাণম্-৯
হরিরুবাচ |
সময়ে (যা) দীক্ষিতঃ শিষ্যো বদ্ধনেত্রস্তু বাসসা |
অষ্টাহুতিশতং তস্য মূলমন্ত্রেণ হোময়েৎ || ১, ৯. ১ ||
দ্বিগুণং পুত্রকে হোমং ত্রিগুণং সাধকে মতম্ |
নির্বাণদেশিকে রুদ্র ! চতুর্গুণমুদাহৃতম্ || ১, ৯. ২ ||
গুরুবিষ্ণুদ্বিজস্ত্রীণাং হন্তা বধ্যস্ত্ব(শ্চ) দীক্ষিতৈঃ |
অথ দীক্ষাং প্রবক্ষ্যামি ধর্মাধর্মক্ষয়ঙ্করীম্ || ১, ৯. ৩ ||
উপবেশ্য বহিঃ শিষ্যান্ধারণং তেষু কারয়েৎ |
বায়ব্যা কলয়া রুদ্র শোষ্যমাণান্বিচিন্তয়েৎ || ১, ৯. ৪ ||
আগ্রেয়্যা দহ্যমানাংশ্চ প্লাবিতানম্ভসা পুনঃ |
তেজস্তেজাসি তং জীবমেকীকৃত্য সমাক্ষিপেৎ || ১, ৯. ৫ ||
প্রাণবং চিন্তয়েব্দ্যোম্নি শরীরেঽন্যত্তু কারণম্ |
একৈকং যো জয়েত্তত্র ক্ষেত্রজ্ঞং দেহকারণাৎ || ১, ৯. ৬ ||
উৎপাদ্য যোজয়েৎপশ্চাদেকৈকং বৃষভধ্বজ |
মণ্ডলাদিষ্বশক্তস্তু কল্পয়িৎবার্ঽচয়েদ্ধরিম্ || ১, ৯. ৭ ||
চতুর্দ্বারং ভবেত্তচ্চ ব্রহ্মতীর্থাদনুক্রমাৎ |
হস্তং পদ্মং সমাখ্যাতং পত্রাণ্যঙ্গুলয়ঃ স্মৃতাঃ || ১, ৯. ৮ ||
কর্ণিকা তলহস্তন্তু নখান্যস্য তু কেসরাঃ |
তত্রার্চয়েদ্ধরিং ধ্যাৎবা সূর্যন্দ্বগ্নয়ন্তরেব চ || ১, ৯. ৯ ||
তং হস্তং পাতয়েন্মূর্ধ্নি শিষ্যস্য তু সমাহিতঃ |
হস্তে বিষ্ণুঃ স্থিতো যস্মাদ্বিষ্ণুহস্তস্ততস্ত্বয়ম্ |
নশ্যন্তি স্পর্শনাত্তস্য পাতকান্যখিলানি চ || ১, ৯. ১০ ||
গুরুঃ শিষ্যং সমভ্যর্চ্য নেত্রে বদ্ধে তু বাসসা |
দেবস্য প্রমুখং কৃৎবা পুষ্পমেবার্পয়েত্ততঃ |
পুষ্পং নিপতিতং যত্র মূর্ধ্নো দেবস্য শার্ঙ্গিণঃ || ১, ৯. ১১ ||
তন্নাম কারয়েত্তস্য স্ত্রীণাং নামাঙ্কিতং স্বয়ম্ |
শূদ্রাণাং দাসসংযুক্তং কারয়েত্তু বিচক্ষণঃ || ১, ৯. ১২ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
বিষ্ণুদীক্ষানিদৃ নাম নবমোঽধ্যায়ঃ

শ্রীগরুডমহাপুরাণম্-১০
হরিরুবাচ |
র্ শ্যাদিপূজাং প্রবর্শ্যামি স্থণ্ডিলাদিষু সিদ্ধয়ে |
শ্রীং হ্রীং মহালক্ষ্ম্যৈ নমঃ |
শ্রাং শ্রীং শ্রূং শ্রৈং শ্রৌং শ্রঃ ক্রমাদ্ধৃদয়ং চ শিরঃ শিখাম্ |
কবচং নেত্রমস্ত্রং চ আসনং মূর্তিমর্চয়েৎ || ১, ১০. ১ ||
মণ্ডলে পদ্মগর্ভে চ চতুর্দ্বারি রজোঽন্বিতে |
চতুঃ ষষ্ট্যন্তমষ্টাদি খাক্ষে খাক্ষ্যাদি মণ্ডলম্ || ১, ১০. ২ ||
খাক্ষীন্দুসূর্যগং সর্বং খাদিবেদেন্দুবর্তনাৎ |
লক্ষ্মীমঙ্গানি চৈকস্মিন্কোণে দুর্গাং গণং গুরুম্ || ১, ১০. ৩ ||
ক্ষেত্রপালমথাগ্ন্যাদৌ হোমাঞ্জুহাব কামভাক্ |
ওঁ ঘং টং ডং হং শ্রীমহালক্ষ্ম্যৈ নমঃ || ১, ১০. ৪ ||
অনেন পূজয়েল্লক্ষ্মীং পূর্বোক্তপরিবারকৈঃ |
ওঁ সৈং সরস্বত্যৈ নমঃ |
ওঁ হ্রীং সৈং সরস্বত্যৈ নমঃ || ১, ১০. ৫ ||
ওঁ হ্রীং বদবদবাগ্বাদিনিস্বাহা ওঁ হ্রীং সরস্বত্যৈ নমঃ || ১, ১০. ৬ ||

ইতি শ্রীগারুডে মহাপুরাণে পূর্বখণ্ডে প্রথমাংশাখ্যে আচারকাণ্ডে
লক্ষ্ম্যর্চননিরূপণং নাম দশমোঽধ্যায়ঃ