৩.৩ ব্রহ্মাণ্ডমহাপুরাণং – উত্তরভাগ (অধ্যায় ২১-৩০)

আকর্ণ্য ললিতাদেব্যা যাত্রানিগমনিস্বনম্ |
মহান্তং ক্ষোভমায়াতা ভণ্ডাসুরপুরালয়াঃ || ৩. ২১. ১||
যত্র চাস্তি দুরাশস্য ভণ্ডদৈত্যস্য দুর্ধিয়ঃ |
মহেন্দ্রপর্বতোপান্তে মহার্ণবতটে পুরম্ || ৩. ২১. ২||
তত্তু শূন্যকনাম্নৈব বিখ্যাতং ভুবনত্রয়ে |
বিষঙ্গাগ্রজদৈত্যস্য সদাবাসঃ কিলাভবৎ || ৩. ২১. ৩||
তস্মিন্নেব পুরে তস্য শতয়োজনবিস্তরে |
বিত্রেসুর সুরাঃ সর্বে শ্রীদেব্যাগমসংভ্রমাৎ || ৩. ২১. ৪||
শতয়োজনবিস্তীর্ণং তৎসর্বং পুরমাসুরম্ |
ধূমৈরিবাবৃতমভূদুৎপাতজনিতৈর্মুহুঃ || ৩. ২১. ৫||
অকাল এব নির্ভিন্না ভিত্তয়ো দৈত্যপত্তনে |
ধূর্ণমানা পতন্তি স্ম মহোল্কা গগনস্থলাৎ || ৩. ২১. ৬||
উৎপাতানাং প্রাথমিকো ভূকংপঃ পর্যবর্তত |
মহী জজ্বাল সকলা তত্র শূন্যকপত্তনে || ৩. ২১. ৭||
অকাল এব হৃৎকংপং ভেজুর্দৈত্যপুরৌকসঃ |
ধ্বজাগ্রবর্তিনঃ কঙ্কগৃধ্রাশ্চৈব বকাঃ খগাঃ || ৩. ২১. ৮||
আদিত্যমণ্ডলে দৃষ্ট্বাদৃষ্ট্বা চক্রন্দুরুচ্চকৈঃ |
ক্রব্যাদা বহবস্তত্র লোচনৈর্নাবলোকিতাঃ || ৩. ২১. ৯||
মুহুরাকাশবাণীভিঃ পরুষাভির্বভাষিরে |
সর্বতো দিক্ষুদৃশ্যন্তে কেতবস্তু মলীমসাঃ || ৩. ২১. ১০||
ধূমায়মানাঃ প্রক্ষোভজনকা দৈত্যরক্ষসাম্ |
দৈত্যস্ত্রীণাং চ বিভ্রষ্টা অকালে ভূষণস্রজঃ || ৩. ২১. ১১||
হাহেতি দূরং ক্রন্দন্ত্যঃ পর্যশ্রু সমরোদিষুঃ |
দপণানাং বর্মণাং চ ধ্বজানাং খড্গসংপদাম্ || ৩. ২১. ১২||
মণীনামংবরাণাং চ মালিন্যমভবন্মুহুঃ |
সৌধেষু চন্দ্রশালাসু কেলিবেশ্মসু সর্বতঃ || ৩. ২১. ১৩||
অট্টালকেষু গোষ্ঠেষু বিপণেষু সভাসু চ |
চতুষ্কিকাস্বলিঙ্গেষু প্রগ্রীবেষু বলেষু চ || ৩. ২১. ১৪||
সর্বতোভদ্রবাসেষু নন্দ্যাবর্তেষু বেশ্মসু |
বিচ্ছন্দকেষু সংক্ষুব্ধেষ্ববরোধনপালিষু |
স্বস্তিকেষু চ সর্বেষু গর্ভাগারপুটেষু চ || ৩. ২১. ১৫||
গোপুরেষু কপাটেষু বলভীনাং চ সীমসু |
বাতায়নেষু কক্ষ্যাসু ধিষ্ণ্যেষু চ খলেষু চ || ৩. ২১. ১৬||
সর্বত্র দৈত্য নগরবাসিভির্জনমণ্ডলৈঃ |
অশ্রূয়ন্ত মহাঘোষাঃ পরুষা ভূতভাষিতাঃ || ৩. ২১. ১৭||
শিথিলী সবতো জাতা ঘোরপর্ণা ভয়ানকা |
করটৈঃ কটুকালাপৈর্বলোকি দিবাকরঃ |
আরাবিষু করোটীনাং কোটয়শ্চাপতন্ভুবি || ৩. ২১. ১৮||
অপতন্বেদিমধ্যেষু বিন্দবঃ শোণিতাংভসাম্ |
কেশৌঘকাশ্চ নিষ্পেতুঃ সর্বতো ধূমধূসরাঃ || ৩. ২১. ১৯||
ভৌমান্তরিক্ষদিব্যানামুৎপাতানামিতি ব্রজম্ |
অবলোক্য ভৃশং ত্রস্তাঃ সর্বে নগরবাসিনঃ |
নিবেদয়ামাসুরমী ভণ্ডায় প্রথিতৌজসে || ৩. ২১. ২০||
স চ ভণ্ডঃ প্রচণ্ডোত্থৈস্তৈরুৎপাতকদংবকৈঃ |
অসংজাতধৃতিভ্রংশো মন্ত্র স্থানমুপাগমৎ || ৩. ২১. ২১||
মেরোরিব বপুর্ভেদং বহুরত্নবিচিত্রিতম্ |
অধ্যাসামাস দৈত্যেন্দ্রঃ সিংহাসনমনুত্তমম্ || ৩. ২১. ২২||
স্ফুরন্মুকুটলগ্নানাং রত্নানাং কিরণৈর্ঘনৈঃ |
দীপয়ন্নখিলাশান্তানদ্যুতদ্দানবেশ্বরঃ || ৩. ২১. ২৩||
একয়োজনবিস্তারে মহত্যাস্থানমণ্ডপে |
তুঙ্গসিংহাসনস্থং তং সিষেবাতে তদানুজৈ || ৩. ২১. ২৪||
বিশুক্রশ্চ বিষঙ্গশ্চ মহাবলপরাক্রমৌ |
ত্রৈলোক্যকণ্টকীভূতভুজদণ্ডভয়ঙ্করৌ || ৩. ২১. ২৫||
অগ্রজস্য সদৈবাজ্ঞামবিলঙ্ঘ্য মুহুর্মুহুঃ |
ত্রৈলোক্যবিজয়ে লব্ধং বর্ধয়ন্তৌ মহদ্যশঃ || ৩. ২১. ২৬||
ন তেন শিরসা তস্য মৃদূনন্তৌ পাদপীঠিকাম্ |
কৃতাং জরিপ্রণামৌ চ সমুপাবিশতা ভুবি || ৩. ২১. ২৭||
অথাস্থানে স্থিতে তস্মিন্নমরদ্বেষিণাং বরে |
সর্বে সামন্তদৈত্যেন্দ্রাস্তং দ্রষ্টুং সমুপাগতাঃ || ৩. ২১. ২৮||
তেষামে কৈকসৈন্যানাং গণনা ন হি বিদ্যতে |
স্বংস্বং নাম সমুচ্চার্য প্রণেমুর্ভণ্ডকেশ্বরম্ || ৩. ২১. ২৯||
ম চ তানসুরান্সর্বানতিধীরকনীনকৈঃ |
সংভাবয়ন্সমালোকৈঃ কিয়ন্তং চিৎক্ষণং স্থিতঃ || ৩. ২১. ৩০||
অবোচত বিশুক্রস্তমগ্রজং দানবেশ্বরম্ |
মথ্যমানমহাসিংধুসমানার্গলনিস্বনঃ || ৩. ২১. ৩১||
দেবৎবদীয়দোর্দ্দণ্ডবিধ্বস্তবলবিক্রমাঃ |
পাপিনঃ পামরাচারা দুরাত্মানঃ সুরাধমাঃ || ৩. ২১. ৩২||
শরণ্যমন্যতঃ ক্বাপি নাপ্নুবন্তো বিষাদিনঃ |
জ্বলজ্জ্বালাকুলে বহ্নৌ পতিৎবা নাশমাগতাঃ || ৩. ২১. ৩৩||
তস্মাদ্দেবাৎসমুৎপন্না কাচিৎস্ত্রী বলগর্বিতা |
স্বয়মেব কিলাস্রাক্ষুস্তাং দেবা বাসবাদয়ঃ || ৩. ২১. ৩৪||
তৈঃ পুনঃ প্রবলোৎসাহৈঃ প্রোৎসাহিতপরাক্রমাঃ |
বহুস্ত্রীপরিবারাশ্চ বিবিধায়ুধমণ্ডিতাঃ || ৩. ২১. ৩৫||
অস্মাঞ্জেতুং কিলায়ান্তি হা কষ্টং বিধিবৈশসম্ |
অবলানাং সমূহস্ছেদ্বলিনোঽস্মান্বিজেষ্যতে || ৩. ২১. ৩৬||
তর্হি পল্লবভঙ্গেন পাষাণস্য বিদারণম্ |
ঊহ্যমানমিদং হন্তুং পরিহাসায় কল্প্যতে || ৩. ২১. ৩৭||
বিডংবনা ন কিমসৌ লজ্জাকরমিদং ন কিম্ |
অস্মৎসৈনিকনাসীরভটেভ্যোঽপি ভবেদ্ভয়ম্ || ৩. ২১. ৩৮||
কাতরৎবং সমাপন্নাঃ শক্রাদ্যাস্ত্রিদিবৌকসঃ |
ব্রহ্মাদয়শ্চ নির্বিণ্ণবিগ্রহা মদ্বলায়ুধৈঃ || ৩. ২১. ৩৯||
বিষ্ণোশ্চ কা কথৈবাস্তে বিত্রস্তঃ স মহেশ্বরঃ |
অন্যেষামিহ কা বার্তা দিক্পালাস্তে পলায়িতাঃ || ৩. ২১. ৪০||
অস্মাকমিষুভিস্তীক্ষ্ণৈরদৃশ্যৈরঙ্গপাতিভিঃ |
সর্বত্র বিদ্ধবর্মাণো দুর্মদা বিবুধাঃ কৃতাঃ || ৩. ২১. ৪১||
তাদৃশানামপি মহাপরাক্রমভুজোষ্মণাম্ |
অস্মাকংবিজয়ায়াদ্য স্ত্রী কাচিদভিধাবতি || ৩. ২১. ৪২||
যদ্যপি স্ত্রী তথাপ্যেষা নাবমান্যা কদাচন |
অল্পোঽপি রিপুরাত্মজ্ঞৈর্নাবমান্যো জিগীষুভিঃ || ৩. ২১. ৪৩||
তস্মাত্তদুৎসারণার্থং প্রেষণীয়াস্তু কিঙ্করাঃ |
সকচগ্রহমাকৃষ্য সানেতব্যা মদোদ্ধতা || ৩. ২১. ৪৪||
দেব ৎবদীয় শুদ্ধান্তর্বর্তিনীনাং মৃগীদৃশাম্ |
চিরেণ চেটিকাভাবং সা দুষ্টা সংশ্রয়িষ্যতি || ৩. ২১. ৪৫||
একৈকস্মাদ্ভটাদস্মাৎসৈন্যেষু পরিপন্থিনঃ |
শঙ্কতে খলু বিত্রস্তং ত্রৈলোক্যং সচরাচরম্ || ৩. ২১. ৪৬||
অন্যদ্দেবস্য চিত্তং তু প্রমাণমিতি দানব |
নিবেদ্য ভণ্ডদৈত্যস্য ক্রোধং তস্য ব্যবীবৃধৎ || ৩. ২১. ৪৭||
বিষঙ্গস্তু মহাসত্ত্বো বিচারজ্ঞো বিচক্ষণঃ |
ইদমাহ মহাদৈত্যমগ্রজন্মানমুদ্ধতম্ || ৩. ২১. ৪৮||
দেব ৎবমেব জানাসি সর্বং কার্যমরিন্দম |
ন তু তে ক্বাপি বক্তব্যং নীতিবর্ত্মনি বর্ততে || ৩. ২১. ৪৯||
সর্বং বিচার্য কর্তব্যং বিচারঃ পরমা গতিঃ |
অবিচারেণ চেৎকর্ম সমূলমবকৃন্ততি || ৩. ২১. ৫০||
পরস্য কটকে চারাঃ প্রেষণীয়াঃ প্রয়ত্নতঃ |
তেষাং বলাবলং জ্ঞেয়ং জয়সংসিদ্ধিমিচ্ছতা || ৩. ২১. ৫১||
চারচক্ষুর্দৃঢপ্রজ্ঞঃ সদাশঙ্কিতমানসঃ |
অশঙ্কিতাকারবাংশ্চ গুপ্তমন্ত্রঃ স্বমন্ত্রিষু || ৩. ২১. ৫২||
ষডুপায়ান্প্রয়ুঞ্জানঃ সর্বত্রা ভ্যর্হিতে পদে |
বিজয়ং লভতে রাজা জাল্মো মক্ষু বিনশ্যতি || ৩. ২১. ৫৩||
অবিমৃশ্যৈব যঃ কশ্চিদারম্ভঃ স বিনাশকৃৎ |
বিমৃশ্য তু কৃতং কর্ম বিশেষাজ্জয়দায়কম্ || ৩. ২১. ৫৪||
তির্যগিত্যপি নারীতি ক্ষুদ্রা চেত্যপি রাজভিঃ |
নাবজ্ঞা বৈরিণাং কার্যা শক্তেঃ সর্বত্র সম্ভবঃ || ৩. ২১. ৫৫||
স্তংভোৎপন্নেন কেনাপি নরতির্যগ্বপুর্ভৃতা |
ভূতেন সর্বভূতানাং হিরণ্যকশিপুর্হতঃ || ৩. ২১. ৫৬||
পুরা হি চণ্ডিকা নাম নারী ময়াবিজৃংভিণী |
নিশুম্ভশুংভৌ মহিষং ব্যাপাদিতবতী রণে || ৩. ২১. ৫৭||
তৎপ্রসংগেন বহবস্তয়া দৈত্যা বিনাশিতাঃ |
অতো বদামিনাবজ্ঞা স্ত্রীমাত্রে ক্রিয়তাং ক্বচিৎ || ৩. ২১. ৫৮||
শক্তিরেব হি সর্বত্র কারণং বিজয়শ্রিয়ঃ |
শক্তেরাধারতাং প্রপ্তৈঃ স্ত্রীপুংলিঙ্গৈর্ন নো ভয়ম্ || ৩. ২১. ৫৯||
শক্তিস্তু সর্বতো ভাতি সংসারস্য স্বভাবতঃ |
তর্হি তস্যা দুরাশায়াঃ প্রবৃত্তির্জ্ঞায়তাং ৎবয়া || ৩. ২১. ৬০||
কেয়ং কস্মাৎসমুৎপন্না কিমাচারা কিমাশ্রয়া |
কিংবলা কিংসহায়া বা দেব তৎপ্রবিচার্যতাম্ || ৩. ২১. ৬১||
ইত্যুক্তঃ স বিষঙ্গেণ কো বিচারো মহৌজসাম্ |
অস্মদ্বলে মহাসত্ত্বা অক্ষৌহিণ্যধিপাঃ শতম্ || ৩. ২১. ৬২||
পাতুং ক্ষমাস্তে জলধীনলং দগ্ধুং ত্রিবিষ্টপম্ |
অরে পাপসমাচার কিংবৃথা শঙ্কসে স্ত্রিয়ঃ || ৩. ২১. ৬৩||
তৎসর্বং হি ময়া পূর্বং চারদ্বারাবলোকিতম্ |
অগ্রে সমুদিতা কাচিল্ললিতানামধারিণী || ৩. ২১. ৬৪||
যথার্থনামবত্যেষা পুষ্পবৎপেশলাকৃতিঃ |
ন স্ত্ত্বং ন চ বীর্যং বা ন সংগ্রামেষু বা গতিঃ || ৩. ২১. ৬৫||
সা চাবিচারনিবহা কিন্তু মায়াপরায়ণা |
তৎসত্ত্বেনাবিদ্যমানং স্ত্রীকদম্বকমাত্মনঃ || ৩. ২১. ৬৬||
উৎপাদিতবতী কিং তে ন চৈবং তু বিচেষ্টতে |
অথ বা ভব দুক্তেন ন্যায়েনাস্তু মহদ্বলম্ || ৩. ২১. ৬৭||
ত্রৈলোক্যোল্লঙ্ঘিমহিমা ভণ্ডঃ কেন বিজীয়তে || ৩. ২১. ৬৮||
ইদানীমপি মদ্বাহুবলসংমর্দমূর্চ্ছিতাঃ |
শ্বসিতুং চাপি পটবো ন কদাচন নাকিনঃ || ৩. ২১. ৬৯||
কেচিৎপাতালগর্ভেষু কেচিদম্বুধিবারিষু |
কেচিদ্দিগন্তকোণেষু কেচিৎকুঞ্জেষুভূভৃতাম্ || ৩. ২১. ৭০||
বিলীনা ভৃশবিত্রস্তাস্ত্যক্তদারসুতশ্রিয়ঃ |
ভ্রষ্টাধিকারাঃ পশবশ্ছন্নবেষাশ্চরন্তি তে || ৩. ২১. ৭১||
এতাদৃশং ন জানাতি মম বাহুপরাক্রমম্ |
অবলা ন চিরোৎপন্না তেনৈষা দর্পমশ্নুতে || ৩. ২১. ৭২||
ন জানন্তি স্ত্রিয়ো মূঢা বৃথা কল্পিতসাহসাঃ |
বিনাশমনুধাবন্তি কার্যাকার্যবিমোহিতাঃ || ৩. ২১. ৭৩||
অথ বা তাং পুরস্কৃত্য যদ্যাগচ্ছন্তি নাকিনঃ |
যথা মহোরগাঃ সিদ্ধাঃ সাধ্যা বা যুদ্ধদুর্মদাঃ || ৩. ২১. ৭৪||
ব্রহ্মা বা পদ্মনাভো বা রুদ্রো বাপি সুরাধিপঃ |
অন্যে বা হরিতাং নাথাস্তান্সংপেষ্টুমহং পটুঃ || ৩. ২১. ৭৫||
অথ বা মম সেনাসু সেনান্যো রণদুর্মদাঃ |
পক্বকর্করিকাপেষমবপেক্ষ্যতি বৈরিণঃ || ৩. ২১. ৭৬||
কুটিলাক্ষঃ কুরণ্ডশ্চ করঙ্কঃ কালবাশিতঃ |
বজ্রদন্তো বজ্রমুখো বজ্রলোমা বলাহকঃ || ৩. ২১. ৭৭||
সূচীমুখঃ ফলমুখো বিকটো বিকটাননঃ |
করালাক্ষঃ কর্কটকো মদনো দীর্ঘজিহ্বকঃ || ৩. ২১. ৭৮||
হুংবকো হলমুল্লুঞ্চঃ কর্কশঃ কল্কিবাহনঃ |
পুল্কসঃ পুণ্ড৩কেতুশ্চ চণ্ডবাহুশ্চ কুক্কুরঃ || ৩. ২১. ৭৯||
জংবুকাক্ষো জৃংভণশ্চ তীক্ষ্মশৃঙ্গস্ত্রিকণ্টক |
চতুর্গুপ্তশ্চতুর্বাহুশ্চকারাক্ষশ্চতুঃশিরাঃ || ৩. ২১. ৮০||
বজ্রঘোষশ্চোর্ধ্বকেশো মহামায়ামহাহনুঃ |
মখশত্রুর্মখাস্কন্দী সিংহঘোষঃ শিরালকঃ || ৩. ২১. ৮১||
অন্ধকঃ সিংধুনেত্রশ্চ কূপকঃ কূপলোচনঃ |
গুহাক্ষো গণ্ডগল্লশ্চ চণ্ডধর্মো যমান্তকঃ || ৩. ২১. ৮২||
লডুনঃ পট্টসেনশ্চ পুরজিৎপূর্বমারকঃ |
স্বর্গশত্রুঃ স্বর্গবলো দুর্গাখ্যঃ স্বর্গকণ্টকঃ || ৩. ২১. ৮৩||
অতিমায়ো বৃহন্মায় উপমায় উলূকজিৎ |
পুরুষেণো বিষেণশ্চ কুন্তিষেণঃ পরূষকঃ || ৩. ২১. ৮৪||
মলকশ্চ কশূরশ্চ মঙ্গলো দ্রঘণস্তথা |
কোল্লাটঃ কুজিলাশ্বশ্চ দাসেরো বভ্রুবাহনঃ || ৩. ২১. ৮৫||
দৃষ্টহাসো দৃষ্টকেতুঃ পরিক্ষেপ্তাপকঞ্চুকঃ |
মহামহো মহাদংষ্ট্রো দুর্গতিঃ স্বর্গমেজয়ঃ || ৩. ২১. ৮৬||
ষট্কেতুঃ ষড্বসুশ্চৈব ষড্দন্ত ষট্প্রিয়স্তথা |
দুঃশঠো দুর্বিনীতশ্চ ছিন্নকর্ণশ্চ মূষকঃ || ৩. ২১. ৮৭||
অদৃহাসী মহাশী চ মহাশীর্ষো মদোৎকটঃ |
কুম্ভোৎকচঃ কুম্ভনাসঃ কুম্ভগ্রীবো ঘটোদরঃ || ৩. ২১. ৮৮||
অশ্বমেঢ্রো মহাণ্ডশ্চ কুম্ভাণ্ডঃ পূতিনাসিকঃ |
পূতিদন্তঃ পূতিচক্ষুঃ পূত্যাস্যঃ পূতিমেহনঃ || ৩. ২১. ৮৯||
ইত্যেবমাদয়ঃ শূরা হিরণ্যকশিপোঃ সমাঃ |
হিরণ্যাক্ষ সমাশ্চৈব মম পুত্রা মহাবলাঃ || ৩. ২১. ৯০||
একৈকস্য সুতাস্তেষু জাতাঃ শুরাঃ পরঃশতম্ |
সেনান্যো মে মদোদুবৃত্তা মম পুত্রৈরনুদ্রুতাঃ || ৩. ২১. ৯১||
নাশয়িষ্যন্তি সমরে প্রোদ্ধতানমরাধমান্ |
যে কেচিৎকুপিতা যুদ্ধে সহস্রাক্ষৌহিণী বরাঃ |
ভস্মশেষা ভবেয়ুস্তৈ হা হন্ত কিমুতাবলা || ৩. ২১. ৯২||
মায়াবিলাসাঃ সর্বেঽপি তস্যাঃ সমরসীমনি |
মহামায়াবিনোদাশ্চ কুপ্যুস্তে ভস্মসাদ্বলম্ || ৩. ২১. ৯৩||
তদ্বৃথা শঙ্কয়া খিন্নং মা তে ভবতু মানসম্ |
ইত্যক্ত্বা ভণ্ডদৈত্যেন্দ্রঃ সমুত্থায় নৃপাসনাৎ || ৩. ২১. ৯৪||
উবাচ নিজসেনান্যং কুটিলাক্ষং মহাবলম্ |
উত্তিষ্ঠ রে বলং সর্বং সংনাহয় সমন্ততঃ || ৩. ২১. ৯৫||
শূন্যকস্য সমন্তাচ্চ দ্বারেষু বলমর্পয় |
দুর্গাণি সংগৃহাণ ৎবং কুরুক্ষেপণিকাশতম্ || ৩. ২১. ৯৬||
দুষ্টাভিচারাঃ কর্তব্যা মেত্রিভিশ্চ পুরোহিতৈঃ |
সজ্জীকুরু ৎবং শস্ত্রাণি যুদ্ধমেতদুপস্থিতম্ || ৩. ২১. ৯৭||
সেনাপতিষু যং কেচিদগ্রে প্রস্থাপয়াধুনা |
অনেকবলসংঘাতসহিতং ঘোরদর্শনম্ || ৩. ২১. ৯৮||
তেন সংগ্রামসময়ে সন্নিপত্য বিনির্জিতম্ |
কেশেষ্বাকৃষ্য তাং মূঢাং দেবসত্ত্বে ন দর্পিতাম্ || ৩. ২১. ৯৯||
ইত্যাভাষ্য চমূনাথং সহস্রত্রিতয়াধিপম্ |
কুটিলাক্ষং মহাসত্ত্বং স্বয়ং চান্তঃ পুরং যয়ৌ || ৩. ২১. ১০০||
অথাপতন্ত্যাঃ শ্রীদেব্যা যাত্রানিঃ সাণনিঃস্বনাঃ |
অশ্রূয়ন্ত চ দৈত্যেন্দ্রৈরতিকর্ণজ্বরাবহাঃ || ৩. ২১. ১০১||
ইতি শ্রীব্রহ্মাণ্ডমহাপুরাণে উত্তরভাগে হয়গ্রীবাগস্ত্যসংবাদে ললিতোপাখ্যানে ভণ্ডাসুরাহঙ্কারো নামৈকবিংশোঽধ্যায়ঃ

অথ শ্রীললিতাসেনানিস্সাণপ্রতিনিস্বনঃ |
উচ্চচালসুরেন্দ্রাণাং যোদ্ধতো দুন্দুভিধ্বনিঃ || ৩. ২২. ১||
তেন মর্দিতদিক্কেন ক্ষুভ্যদ্গর্ভপয়োধিনা |
বধিরীকৃতলোকেন চকম্পে জগতাং ত্রয়ী || ৩. ২২. ২||
মর্দয়ন্ককুভাং বৃন্দং ভিন্দন্ভূধরকন্দরাঃ |
পুপ্রোথে গগনাভোগে দৈত্য নিঃসাণনিস্বনঃ || ৩. ২২. ৩||
মহানরহরিক্রুদ্ধহুঙ্কারোদ্ধতিমদ্ধ্বনিঃ |
বিরসং বিররাসোচ্চৈর্বিবুধদ্বেষিঝল্লরী || ৩. ২২. ৪||
ততঃ কিলকিলারাবমুখরা দৈত্যকোটয়ঃ |
সমনহ্যন্ত সংক্রুদ্ধাঃ প্রতি তাং পরমেশ্বরীম্ || ৩. ২২. ৫||
কশ্চিদ্রত্নবিচিত্রেণ বর্মণাচ্ছন্নবিগ্রহঃ |
চকাশে জঙ্গম ইব প্রোত্তুঙ্গো রোহণাচলঃ || ৩. ২২. ৬||
কালরাত্রিমিবোদগ্রাং শস্ত্রকারেণ গোপিতাম্ |
অধুনীত ভটঃ কশ্চিদতিধৌতাং কৃপাণিকাম্ || ৩. ২২. ৭||
উল্লা সয়ন্করাগ্রেণ কুন্তপল্লবমেকতঃ |
আরূঢতুরগো বীথ্যাং চারিভেদং চকার হ || ৩. ২২. ৮||
কেচিদারুরুহুর্যোধা মাতঙ্গাংস্তুঙ্গবর্ষ্মণঃ |
উৎপাত বাতসংপাতপ্রেরিতানিব পর্বতান্ || ৩. ২২. ৯||
পট্টিশৈর্মুদ্গরৈশ্চৈব ভিদুরৈর্ভিণ্ডিপালকৈঃ |
দ্রুহণৈশ্চ ভুশুণ্ডীভিঃ কুঠারৈর্মুসলৈরপি || ৩. ২২. ১০||
গদাভিশ্চ শতঘ্নীভিস্ত্রিশিখৈর্বিশিখৈরপি |
অর্ধচক্রৈর্মহাচক্রৈর্বক্রাঙ্গৈরুরগাননৈঃ || ৩. ২২. ১১||
ফণিশীর্ষপ্রভেদৈশ্চ ধনুর্ভিঃ শার্ঙ্গধন্বিভিঃ |
দণ্ডৈঃ ক্ষেপণিকাশস্ত্রৈর্বজ্রবাণৈর্দৃষদ্বরৈঃ || ৩. ২২. ১২||
যবমধ্যৈর্মুষ্টিমধ্যৈর্বললৈঃ খণ্ডলৈরপি |
কটারৈঃ কোণমধ্যৈশ্চ ফণিদন্তৈঃ পরঃশতৈঃ || ৩. ২২. ১৩||
পাশায়ুধৈঃ পাশতুণ্ডৈঃ কাকতুণ্ডৈঃ সহস্রশঃ |
এবমাদিভিরত্যুগ্রৈরায়ুধৈর্জীবহারিভিঃ || ৩. ২২. ১৪||
পরিকল্পিতহস্তাগ্রা বর্মিতা দৈত্যকোটয়ঃ |
অশ্বারোহা গজারোহা গর্দভারোহিণঃ পরে || ৩. ২২. ১৫||
উষ্ট্রারোহা বৃকারোহা শুনকারোহিণঃ পরে |
কাকাদিরোহিণো গৃধ্রারোহাঃ কঙ্কাদিরোহিণঃ || ৩. ২২. ১৬||
ব্যাঘ্রাদিরোহিণশ্চান্যে পরে সিংহাদিরোহিণঃ |
শরভারোহিণশ্চান্যে ভেরুণ্ডারোহিণঃ পরে || ৩. ২২. ১৭||
সূকরারোহিণো ব্যালারূঢাঃ প্রেতাদিরোহিণঃ |
এবং নানাবিধৈর্বাহবাহিনো ললিতাং প্রতি || ৩. ২২. ১৮||
প্রচেলুঃ প্রবলক্রোধসংমূর্চ্ছিতনিজাশয়াঃ |
কুটিলং সৈন্যভর্ত্তারং দুর্মদং নাম দানবম্ |
দশাক্ষৌহিণিকায়ুক্তং প্রাহিণোল্ললিতাং প্রতি || ৩. ২২. ১৯||
দিধক্ষুভিরিবাশেষং বিশ্বং সহ বলোৎকটৈঃ |
ভটৈর্যুক্তঃ স সেনানী ললিতাভিমুখে যয়ৌ || ৩. ২২. ২০||
ভিন্দন্পটহসংরাবৈশ্চতুর্দশ জগন্তি সঃ |
অট্টহাসান্বিতন্বানো দুর্মদস্তন্মুখো যয়ৌ || ৩. ২২. ২১||
অথ ভণ্ডাসুরাজ্ঞপ্তঃ কুটিলাক্ষো মহাবলঃ |
শূন্যকস্য পুরদ্বারে প্রচীনে সমকল্পয়ৎ |
রক্ষণার্থং দশাক্ষৌ হিণ্যুপেতং তালজঙ্ঘকম্ || ৩. ২২. ২২||
অবাচীনে পুরদ্বারে দশাক্ষৌহিণিকায়ুতম্ |
নাম্না তালভুজং দৈত্যং রক্ষণার্থমকল্পয়ৎ || ৩. ২২. ২৩||
প্রতীচীনে পুরদ্বারে দশাক্ষৌহিণিকায়ুতম্ |
তালগ্রীবং নাম দৈত্যং রক্ষার্থং সমকল্পয়ৎ || ৩. ২২. ২৪||
উত্তরে তু পুরদ্বারে তালকেতুং মহা বলম্ |
আদিদেশ স রক্ষার্থং দশাক্ষৌহিণিকায়ুতম্ || ৩. ২২. ২৫||
পুরস্য সালবলয়ে কপিশীর্ষকবেশ্মসু |
মণ্ডলাকারতো বস্তুন্দশাক্ষৌহিণিমাদিশৎ || ৩. ২২. ২৬||
এবং পঞ্চাশতা কৃৎবাক্ষৌহিণ্যা পুররক্ষণম্ |
শূন্যকস্য পুরস্যৈব তদ্বৃত্তং স্বামিনেঽবদৎ || ৩. ২২. ২৭||
কুটিলাক্ষ উবাচ
দেব ৎবদাজ্ঞয়া দত্তং সৈন্যং নগররক্ষণে |
দুর্মদঃ প্রেষিতঃ পূর্বং দুষ্টাং তাং ললিতাং প্রতি || ৩. ২২. ২৮||
অস্মৎকিঙ্কর মাত্রেণ সুনিরাশা হি সাবলা |
তথাপি রাজ্ঞামাচারঃ কর্ত্তব্যং পুররক্ষণম্ || ৩. ২২. ২৯||
ইত্যুক্ত্বা ভণ্ডদৈত্যেন্দ্রং কুবিলাক্ষোঽতিগর্বিতঃ |
স্বসৈন্যং সজ্জয়ামাস সেনাপতিভিরন্বিতঃ || ৩. ২২. ৩০||
দূতস্তু প্রেষিতঃ পূর্বং কুটিলাক্ষেণ দানবঃ |
স ধ্বনন্ধ্বজিনীয়ুক্তো ললিতাসৈন্য মাবৃণোৎ || ৩. ২২. ৩১||
কৃৎবা কিলকিলারাবং ভটাস্তত্র সহস্রশঃ |
দোধূয়মানৈরসিভির্নিপেতুঃ শক্তিসৈনিকৈঃ || ৩. ২২. ৩২||
তাশ্চ শক্ত্য উদ্দণ্ডাঃ স্ফুরিতাট্টহসস্বনাঃ |
দেদীপ্যমানশস্ত্রাভাঃ সময়ুধ্যন্ত দানবৈঃ || ৩. ২২. ৩৩||
শক্তীনাং দানবানাং চ সংশোভিতজগত্ত্রয়ঃ |
সমবর্তত সংগ্রামো ধূলিগ্রামততাম্বরঃ || ৩. ২২. ৩৪||
রথবংশেষু মূর্চ্ছন্ত্যঃ করিকণ্ঠৈঃ প্রপঞ্চিতাঃ |
অশ্বনিঃশ্বাসবিক্ষিপ্তা ধূলয়ঃ রবং প্রপেদিরে || ৩. ২২. ৩৫||
তমাপতন্তমালোক্য দশাক্ষৌহিণিকাবৃতম্ |
সংপৎসরস্বতী ক্রোধাদভিদুদ্রাব সংগরে || ৩. ২২. ৩৬||
সম্পৎকরীসমানাভিঃ শক্তিভিঃ সমধিষ্ঠিতাঃ |
অশ্বাশ্চ দন্তিনো মত্তা ব্যমর্দন্দানত্রীং চমুম্ || ৩. ২২. ৩৭||
অন্যোন্যতুমুলে যুদ্ধে জাতে কিলিকিলারবে |
ধূলীষু ধূয়মানাসু তাড্যমানাসু ভেরিষু || ৩. ২২. ৩৮||
ইতস্ততঃ প্রববৃধে রক্তসিন্ধুর্মহীয়সী |
শক্তিভিঃ পাত্যমানানাং দানবানাং সহস্রশঃ || ৩. ২২. ৩৯||
ধ্বজানি লুঠিতান্যাসন্বিলূনানি শিলীমুখৈঃ |
বিস্রস্ততত্তচ্ছিহ্নানি সমং ছত্রকদম্বকৈঃ || ৩. ২২. ৪০||
রক্তারুণায়াং যুদ্ধোর্ব্যাং পতিতৈশ্ছত্রমণ্ডলৈঃ |
আলংবি তুলনা সংধ্যারক্তাভ্রহিমরোচিষা || ৩. ২২. ৪১||
জ্বালাকপালঃ কল্পাগ্নিরিব চারুপয়োনিধৌ |
দৈত্যসৈন্যানি নিবহাঃ শক্তীনাং পর্যবারয়ন্ || ৩. ২২. ৪২||
শক্তিচ্ছন্দোজ্জ্বলচ্ছস্ত্রধারানিষ্কৃত্তকন্ধরাঃ |
দানবানাং রণতলে নিপেতুর্মুণ্ডরাশয়ঃ || ৩. ২২. ৪৩||
দষ্টৌষ্ঠৈর্ভ্রুকুটীক্রূরৈঃ ক্রোধসংরক্তলোচনৈঃ |
মুণ্ডৈরখণ্ডমভবৎসংগ্রামধরণীতলম্ || ৩. ২২. ৪৪||
এবং প্রবৃত্তে সময়ে জগচ্চক্রভয়ঙ্করে |
শক্তয়ো ভৃশসংক্রুদ্ধা দৈত্যসেনামমর্দয়ন্ || ৩. ২২. ৪৫||
ইতস্ততঃ শক্তিশস্ত্রৈস্তাডিতা মূর্চ্ছিতা ইতি |
বিনেশুর্দানবাস্তত্র সংপদ্দেবীবলাহতাঃ || ৩. ২২. ৪৬||
অথ ভগ্নং সমাশ্বাস্য নিজং বলমরিন্দমঃ |
উষ্ট্রমারুহ্য সহসা দুর্মদোঽভ্যদ্রবচ্চমুম্ || ৩. ২২. ৪৭||
দীর্ঘগ্রীবঃ সমুন্নদ্ধঃ পৃষ্ঠে নিষ্ঠুরতোদনঃ |
অধিষ্ঠিতো দুর্মদেন বাহনোষ্ট্রশ্চচাল হ || ৩. ২২. ৪৮||
তমুষ্ট্রবাহনং দুষ্টমন্বীয়ুঃ ক্রুদ্ধচেতসঃ |
দানাবনশ্বসৎসর্বান্ভীতাঞ্ছক্তিয়ুয়ুৎসয়া || ৩. ২২. ৪৯||
অবাকিরদ্দিশো ভল্লৈরুল্লসৎফলশালিভিঃ |
সংপৎকরীচমূচক্রং বনং বার্ভিরিবাংবুদঃ || ৩. ২২. ৫০||
তেন দুঃসহসত্ত্বেন তাডিতা বহুভিঃ শরৈঃ |
স্তংভিতেবাভবৎসেনা সংপৎকর্যাঃ ক্ষণং রণে || ৩. ২২. ৫১||
অথ ক্রোধারুণং চক্ষুর্দধানা সংপদংবিকা |
রণকোলাহলগজমারূঢায়ুধ্যতামুনা || ৩. ২২. ৫২||
আলোলকঙ্কণক্বাণরমণীয়তরঃ করঃ |
তস্যাশ্চাকৃষ্য কোদণ্ডমৌর্বীমাকর্ণমাহবে || ৩. ২২. ৫৩||
লঘুহস্ততয়াপশ্যন্নাকৃষ্টন্ন চ মোক্ষণম্ |
দদৃশে ঘনুষশ্চক্রং কেবলং শরধারণে || ৩. ২২. ৫৪||
আশ্বর্কাবরসংপর্কস্ফুটপ্রতিফলৎফলাঃ |
শরাঃ সম্পৎকরীচাপচ্যুতাঃ সমদহন্নরীন্ || ৩. ২২. ৫৫||
দুর্মদস্যাথ তস্যাশ্চ সমভূদ্যুদ্ধমুদ্ধতম্ |
অভূদন্যোন্যসংঘট্টাদ্বিস্ফুলিঙ্গশিলীমুখৈঃ || ৩. ২২. ৫৬||
প্রথমং প্রসৃতৈর্বাণৈঃ সম্পদ্দেবীসুরদ্বিষোঃ |
অন্ধকারঃ সমভবত্তিরস্কুর্বন্নহস্করম্ || ৩. ২২. ৫৭||
তদন্তরে চ বাণানামতিসংঘট্টয়োনয়ঃ |
বিষ্ফুলিঙ্গা বিদধিরে দধিরে ভ্রমচাতুরীম্ || ৩. ২২. ৫৮||
তয়াধিরূঢঃ সংশ্রোণ্যারণকোলাহলঃ করী |
পরাক্রমং বহুবিধং দর্শয়ামাস সংগরে || ৩. ২২. ৫৯||
করেণ কতিচিদ্দৈত্যান্পাদঘাতেন কাংশ্চন |
উদগ্রদন্তমুসলঘাতৈরন্যাংশ্চ দানবান্ || ৩. ২২. ৬০||
বালকাণ্ডহতৈরন্যান্ফেৎকারৈরপরান্রিপূন্ |
গাত্রব্যামর্দ্দনৈরন্যান্নখঘাতৈস্তথাপরান্ || ৩. ২২. ৬১||
পৃথুমানাভিঘাতেন কাংশ্চিদ্দৈত্যন্ব্যমর্দয়ৎ |
চতুরং চরিতং চক্রে সংপদ্দেবীমতঙ্গজঃ || ৩. ২২. ৬২||
সুদুর্মদঃ ক্রুধা রক্তো দৃঢেনৈকেন পত্রিণা |
সংপৎকরীমুকুটগং মণিমেকমপাহরৎ || ৩. ২২. ৬৩||
অথ ক্রোধারুণদৃশা তয়া মুক্তৈঃ শিলীমুখৈঃ |
বিক্ষতো বক্ষসি ক্ষিপ্রং দুর্মদো জীবিতং জহৌ || ৩. ২২. ৬৪||
ততঃ কিলকিলা রাবং কৃৎবা শক্তিচমূবরৈঃ |
তৎসৈনিকবরাস্ত্বন্যে নিহতা দানবোত্তমাঃ || ৩. ২২. ৬৫||
হতাবশিষ্টা দৈত্যাস্তু শক্তিবাণৈঃ খিলীকৃতাঃ |
পলায়িতা রণক্ষোণ্যাঃ শূন্যকং পুরমাশ্রয়ন্ || ৩. ২২. ৬৬||
তদ্বৃত্তান্তমথাকর্ণ্য সংক্রুদ্ধো দানবেশ্বরঃ || ৩. ২২. ৬৭||
প্রচণ্ডেন প্রভাবেণ দীপ্যমান ইবাত্মনি |
স পস্পর্শ নিয়ুদ্ধায় খড্গমুগ্রবিলোচনঃ |
কুটিলাক্ষং নিকটগং বভাষে পৃতনাপতিম্ || ৩. ২২. ৬৮||
কথং সা দুষ্টবনিতা দুর্মদং বলশালিনম্ |
নিপাতিতবতী যুদ্ধে কষ্ট এব বিধেঃ ক্রমঃ || ৩. ২২. ৬৯||
ন সুরেষু ন যক্ষেষু নোরগেন্দ্রেষু যদ্বলম্ |
অভূৎপ্রতিহতং সোঽপি দুর্মদোঽবলয়া হতঃ || ৩. ২২. ৭০||
তাং দুষ্টবনিতাং জেতুমাক্রষ্টুং চ কচং হঠাৎ |
সেনাপতিং কুরণ্ডাখ্যং প্রেষয়াহবদুর্মদম্ || ৩. ২২. ৭১||
এতি সংপ্রোষিতস্তেন কুটিলাক্ষো মহাপলম্ |
কুরণ্ডং চণ্ডদোর্দ্দণ্ডমাজুহাব প্রভোঃ পুরঃ || ৩. ২২. ৭২||
স কুরণ্ডঃ সমাগত্য প্রণাম স্বামিনেঽদিশৎ |
উবাচ কুটিলাক্ষস্তং গচ্ছ সজ্জয় সৈনিকান্ || ৩. ২২. ৭৩||
মায়ায়াং চতুরোঽসি ৎবং চিত্রয়ুদ্ধবিশারদ |
কূটয়ুদ্ধে চ নিপুণস্তাং স্ত্রিয়ং পরিমর্দয় || ৩. ২২. ৭৪||
ইতি স্বামিপুরস্তেন কুটিলাক্ষেণ দেশিতঃ |
নির্জগাম পুরাত্তূর্ণং কুরণ্ডশ্চণ্ডবিক্রমঃ || ৩. ২২. ৭৫||
বিংশত্যক্ষৌহিণীভিশ্চ সমন্তাৎপরিবারিতঃ |
মর্দয়ন্স মহীগোলং হস্তিবাজিপদাতিভিঃ |
দুর্মদস্যাগ্রজশ্চণ্ডঃ কুরণ্ডঃ সমরং যয়ৌ || ৩. ২২. ৭৬||
দূলীভিস্তুমুলীকুর্বন্দিগন্তং ধীরমানসঃ |
শোকরোষগ্রহগ্রস্তো জবনাশ্বগতো যয়ৌ || ৩. ২২. ৭৭||
শার্ঙ্গং ধনুঃ সমাদায় ঘোরটঙ্কারমুৎস্বনম্ |
ববর্ষ শরধারভিঃ সংপৎকর্যা মহাচমূম্ || ৩. ২২. ৭৮||
পাপে মদনুজং হৎবা দুর্মদং যুদ্ধদুর্মদম্ |
বৃথা বহসি বিক্রান্তিলবলেশং মহামদম্ || ৩. ২২. ৭৯||
ইদানীং চৈব ভবতীমেতৈর্নারাচমণ্ডলৈঃ |
অন্তকস্য পুরীমত্র প্রাপয়িষ্যামি পশ্য মাম্ || ৩. ২২. ৮০||
অতিহৃদ্যমতিস্বাদু ৎবদ্বপুর্বিলনির্গতম্ |
অপূর্বমঙ্গনারক্তং পিবন্তু রণপূতনাঃ || ৩. ২২. ৮১||
মমানুজবধোত্থস্য প্রত্যবায়স্য তৎফলম্ |
অধুনা ভোক্ষ্যসে দুষ্টে পশ্য মে ভুজয়োর্বলম্ || ৩. ২২. ৮২||
ইতি সংতর্জয়ন্সংপৎকরীং করিবরস্থিতাম্ |
সৈন্যং প্রোৎসাহয়ামাস শক্তিসেনাবিমর্দনে || ৩. ২২. ৮৩||
অথ তাং পৃতনাং চণ্ডী কুরণ্ডস্য মহৌজসঃ |
বিমর্দয়িতুমুদ্যুক্তা স্বসৈন্যং প্রোদসীসহৎ || ৩. ২২. ৮৪||
অপুর্বাহবসংজাতকৌতুকাথ জগাদ তাম্ |
অশ্বরূঢা সমাগত্য সস্নেহার্দ্রমিদং বচঃ || ৩. ২২. ৮৫||
সখি সংপৎকরি প্রীত্যা মম বাণী নিশম্যতম্ |
অস্য যুদ্ধমিদং দেহি মম কর্তুং গুণোত্তরম্ || ৩. ২২. ৮৬||
ক্ষণং সহস্ব সমরে ময়ৈবৈষ নিয়োৎস্যতে |
যাচিতাসি সখিৎবেন নাত্র সংশয়মাচর || ৩. ২২. ৮৭||
ইতি তস্যা বচঃ শ্রুৎবা সংপদ্দেব্যা শুচিস্মিতা |
নিবর্তয়ামাস চমূঙ্কুরুণ্ডাভিমুখোত্থিতাম্ || ৩. ২২. ৮৮||
অথ বালার্কবর্ণাভিঃ শক্তিভিঃ সমধিষ্ঠিতাঃ |
তরঙ্গা ইব সৈন্যাব্ধেস্তুরঙ্গা বাতরংহসঃ || ৩. ২২. ৮৯||
খরৈঃ খুরপুটৈঃ ক্ষোণীমুল্লিখন্তো মুহুর্মুহুঃ |
পেতুরেকপ্রবাহেণ কুরণ্ডস্য চমূমুখে || ৩. ২২. ৯০||
বল্গাবিভাগকৃত্যেষু সংবর্তনবিবর্তনে |
ঘতিভেদেষু চারেষু পঞ্চধা খুরপাতনে || ৩. ২২. ৯১||
প্রোৎসাহনে চ সংজ্ঞাভিঃ করপাদাগ্রয়োনিভিঃ |
চতুরাভিস্তুরঙ্গস্য হৃদয়জ্ঞাভিরাহবে || ৩. ২২. ৯২||
অশ্বারূঢাংবিকাসৈন্যশক্তিভিঃ সহ দানবাঃ |
প্রোৎসাহিতাঃ কুরণ্ডেন সময়ুধ্যন্ত দুর্মদাঃ || ৩. ২২. ৯৩||
এবং প্রবৃত্তে সমরে শক্তীনাং চ সুরদ্বিষাম্ |
অপরাজিতনামানং হয়মারুহ্য বেগিনম্ |
অভ্যদ্রবদ্দুরাচারমশ্বারূঢাঃ কুরণ্ডকম্ || ৩. ২২. ৯৪||
প্রচলদ্বেণিসুভগা শরচ্চন্দ্রকলোজ্জ্বলা |
সংধ্যানুরক্তশীতাংশুমণ্ডলীসুংদরাননা || ৩. ২২. ৯৫||
স্ময়মানেব সমরে গৃহীতমণিকার্মুকা |
অবাকিরচ্ছরাসারৈঃ কুরণ্ডং তুরগাননা || ৩. ২২. ৯৬||
তুরগারূঢয়োৎক্ষিপ্তাঃ সমাক্রামন্দিগন্তরান্ |
দিশো দশ ব্যানশিরে রুক্মপুঙ্খাঃ শিলীমুখাঃ || ৩. ২২. ৯৭||
দুর্মদস্যাগ্রজঃ ক্রুদ্ধঃ কুরণ্ডশ্চণ্ডবিক্রমঃ |
বিশিখৈঃ শার্ঙ্গনিষ্ঠ্যূতৈরশ্বারূঢা মবাকিরৎ || ৩. ২২. ৯৮||
চণ্ডৈঃ খুরপুটৈঃ সৈন্যং খণ্ডয়ন্নতিবেগতঃ |
অশ্বারূঢাতুরঙ্গোঽপি মর্দয়ামাস দানবান্ || ৩. ২২. ৯৯||
তস্যা হেষারবাদ্দূরমুৎপাতাংবুধিনিঃস্বনঃ |
অমূর্চ্ছয়ন্ননেকানি তস্যানীতানি বৈরিণঃ || ৩. ২২. ১০০||
ইতস্ততঃ প্রচলিতৈর্দৈত্যচক্রে হয়াসনা |
নিজং পাশায়ুধং দিব্যং মুমোচ জ্বলিতাকৃতি || ৩. ২২. ১০১||
তস্মাৎপাশাৎকোটিশোঽন্যে পাশা ভুজগভীষণাঃ |
সমস্তমপি তৎসৈন্যং বদ্ধ্বাবদ্ধ্বা ব্যমূর্ছয়ন্ || ৩. ২২. ১০২||
থ সৈনিকবন্ধেন ক্রুদ্ধঃ স চ কুরণ্ডকঃ |
সরেণৈকেন চিচ্ছেদ তস্যা মণিধনুর্গুণম্ || ৩. ২২. ১০৩||
ছিন্নমৌর্বি ধনুস্ত্যক্ত্বা ভৃশঙ্ক্রুদ্ধা হয়াসনা |
অঙ্কুশং পাতয়ামাস তস্য বক্ষসি দুর্মতেঃ || ৩. ২২. ১০৪||
তেনাঙ্কুশেন জ্বলতা পীতজীবিতশোণিতঃ |
কুরণ্ডো ন্যপতদ্ভূমৌ বজ্ররুগ্ণ ইব দ্রুমঃ || ৩. ২২. ১০৫||
তদঙ্কুশবিনিষ্ঠ্যূতাঃ পুতনাঃ কাশ্চিদুদ্ভটাঃ |
তৎসৈন্যং পাশনিষ্যন্দং ভক্ষয়িৎবা ক্ষয়ং গতাঃ || ৩. ২২. ১০৬||
ইত্থং কুরুণ্ডে নিহতে বিংশত্যক্ষৌহিণীপতৌ |
হতাবশিষ্টাস্তে দৈত্যাঃ প্রপলায়ন্ত বৈ দ্রুতম্ || ৩. ২২. ১০৭||
কুরণ্ডং সানুজং যুদ্ধে শক্তিসৈন্যৈর্নিপাতিতম্ |
শ্রুৎবা শূন্যকনাথোঽপি নিশশ্বাস ভুজঙ্গবৎ || ৩. ২২. ১০৮||
ইতি শ্রীব্রহ্মাণ্ডমহাপুরাণে উত্তরভাগে হয়গ্রীবাগস্ত্যসংবাদে ললিতোপাখ্যানে দুর্মদকুরণ্ডবধো নাম দ্বাবিংশোঽধ্যায়ঃ

অথাশ্বরূঢয়া ক্ষিপ্তে কুরণ্ডে ভণ্ডদানবঃ |
কুটিলাক্ষমিদং প্রোচে পুনরেব যুয়ুৎসয়া || ৩. ২৩. ১||
স্বপ্নেঽপি যন্ন সংভাব্যং যন্ন শ্রুতমিতঃ পুরা |
যচ্চ নো শঙ্কিতং চিত্তে তদেতৎকষ্টমাগতম্ || ৩. ২৩. ২||
কুরণ্ডদুর্মদৌ সত্ত্বশালিনৌ ভ্রাতরৌ হিতৌ |
দুষ্টদাস্যাঃ প্রভাবোঽযং মায়াবিন্যা মহত্তরঃ || ৩. ২৩. ৩||
ইতঃ পরং করঙ্কাদীন্পঞ্চসেনাধিনায়কান্ |
শতমক্ষৌহিণীনাং চ প্রস্থাপয় রণাঙ্গণে || ৩. ২৩. ৪||
তে যুদ্ধদুর্মদাঃ শূরাঃ সংগ্রামেষু তনুত্যজঃ |
সর্বথৈব বিজেষ্যন্তে দুর্বিদগ্ধবিলাসিনীম্ || ৩. ২৩. ৫||
ইতি ভণ্ডবচঃ শ্রুৎবা ভৃশং চৎবরয়ান্বিতঃ |
কুটিলাক্ষঃ করঙ্কাদীনাজুহাব চমূপতীন্ || ৩. ২৩. ৬||
তে স্বামিনং নমস্কৃত্য কুটিলাক্ষেণ দেশিতাঃ |
অগ্নৌ প্রবিষ্ণব ইব ক্রোধান্ধা নির্যয়ুঃ পুরাৎ || ৩. ২৩. ৭||
তেষাং প্রয়াণনিঃসাণরণিতং ভৃশদুঃসহম্ |
আকর্ণ্য দিগ্গজাস্তূর্ণং শীর্ণকর্ণা জুঘূর্ণিরে || ৩. ২৩. ৮||
শতমক্ষৌহিণীনাং চ প্রাচলৎকেতুমালকম্ |
উত্তরঙ্গতুরঙ্গাদি বভৌ মত্তমতঙ্গজম্ || ৩. ২৩. ৯||
হ্রেষমাণহয়াকীর্ণং ক্রন্দদ্ভটকুলোদ্ভবম্ |
বৃংহমাণগজং গর্জদ্রথয়ক্রং চচাল তৎ || ৩. ২৩. ১০||
চক্রনেমিহতক্ষোণীরেণুক্ষপিতরোচিষা |
বভূবে তুহিনাসারচ্ছন্নেনেব বিবস্বতা || ৩. ২৩. ১১||
ধূলীময়মিবাশেষমভবদ্বিশ্বমণ্ডলম্ |
ক্বচিচ্ছব্দময়ং চৈব নিঃসাণকঠিনস্বনৈঃ || ৩. ২৩. ১২||
উদ্ভূতৈর্ধূলিকাজালৈরাক্রান্তা দৈত্যসৈনিকাঃ |
ইয়ত্তয়াতঃ সেনায়াঃ সংখ্যাপি পরিভাবিতা || ৩. ২৩. ১৩||
ধ্বজা বহুবিধাকারা মীনব্যালাদিচিত্রিতাঃ |
প্রচেলুর্ধূলিকাজালে মৎস্যা ইব মহোদধৌ || ৩. ২৩. ১৪||
তানাপতত আলোক্য ললিতাসৈনিকং প্রতি |
বিত্রেসুরমরাঃ সর্বে শক্তীনাং ভঙ্গশঙ্কয়া || ৩. ২৩. ১৫||
তে করঙ্কমুখাঃ পঞ্চ সেনাপতয় উদ্ধতাঃ |
সর্পিণীং নাম সমরে মায়াং চক্রুর্মহীয়সীম্ || ৩. ২৩. ১৬||
তৈঃ সমুৎপতিতা দুষ্টা সর্পিণী রমশাংবরী |
ধূম্রবর্ণা চ ধূম্রোষ্ঠী ধূম্রবর্মপয়োধরা || ৩. ২৩. ১৭||
মহোদধিরিবাত্যন্তং গংভীরকুহরোদরী |
পুরশ্চচাল শক্তীনান্ত্রাসয়ন্তী মনো রণে || ৩. ২৩. ১৮||
কদ্রূরিবাপরা দুষ্টা বহুসর্পবিভূষণা |
সর্পাণামুদ্ভবস্থানং মায়াময়শরীরিণাম্ || ৩. ২৩. ১৯||
সেনাপতীনাং নাসীরে বেল্লয়ন্তীমহীতলে |
বেল্লিতং বহুধা চক্রে ঘোরারাববিরাবিণী || ৩. ২৩. ২০||
তথৈব মায়য়া পূর্বং তেঽসুরেদ্রা ব্যজীজয়ন্ |
করঙ্কাদ্যা দুরাত্মানঃ পঞ্চপঞ্চত্ত্বকামুকাঃ || ৩. ২৩. ২১||
অথ প্রববৃতে যুদ্ধং শক্তীনামমরদ্রুহাম্ |
অন্যোন্যবীরভাষাভিঃ প্রোৎসাহিতঘনক্রুধাম্ || ৩. ২৩. ২২||
অত্যন্তসংকুলতয়া ন বিজ্ঞাতপরস্পরাঃ |
শক্তয়ো দানবশ্চৈব প্রজহুঃ শস্ত্রপাণয়ঃ || ৩. ২৩. ২৩||
অন্যোন্যশস্ত্রসংঘট্টসমুত্থিতহুতাশনে |
প্রবৃত্তবিশিখস্রোতঃপ্রচ্ছন্নহরিদন্তরে || ৩. ২৩. ২৪||
বহুরক্তনদীপূরহ্রিয়মাণমতঙ্গজে |
মাংসকর্দমনির্মগ্ননিষ্পন্দরথমণ্ডলে || ৩. ২৩. ২৫||
বিকীর্ণকেশশৈবালবিলসদ্রক্তনির্ঝরে |
অতিনিষ্ঠুরবিধ্বংসি সিংহনাদভয়ঙ্করে || ৩. ২৩. ২৬||
রজোঽন্ধকারতু মুলে রাক্ষসীতৃপ্তিদায়িনি |
শস্ত্রীশরণিবিচ্ছিন্নদৈত্যকণ্ঠোত্থিতাসৃজি || ৩. ২৩. ২৭||
প্রবৃত্তে ঘোরসংগ্রামে শক্তীনাং চ সুরদ্বিষাম্ |
অথস্ববলমাদায় পঞ্চভিঃ প্রেরিতা সতী |
সর্পিণী বহুধা সর্পান্বিসসর্জ শরীরতঃ || ৩. ২৩. ২৮||
তক্ষকর্কেটকসমা বাসুকিপ্রমুখৎবিষঃ |
নানাবিধবপুর্বর্ণা নানাদৃষ্টিভয়ঙ্করাঃ || ৩. ২৩. ২৯||
নানাবিধবিষজ্বালানির্দগ্ধভুবনত্রয়াঃ |
দারদং বৎসনাভং চ কালকূটমথাপরম্ || ৩. ২৩. ৩০||
সৌরাষ্ট্রং চ বিষং ঘোরং ব্রহ্মপুত্রমথাপরম্ |
প্রতিপন্নং শৌক্লিকেয়মন্যান্যপি বিষাণি চ || ৩. ২৩. ৩১||
ব্যালৈঃ স্বকীয়বদনৈর্বিলোলরসনাদ্বয়ৈঃ |
বিকিরন্তঃ শক্তিসৈন্যে বিসম্রুঃ সর্পিণীতনোঃ || ৩. ২৩. ৩২||
ধূম্রবর্ণা দ্বিবদনা সর্পা অতিভয়ঙ্করাঃ |
সর্পিণ্যা নয়নদ্বন্দ্বা দুত্থিতাঃ ক্রোধদীপিতাঃ || ৩. ২৩. ৩৩||
পীতবর্ণাস্ত্রিফণকা দংষ্ট্রাভির্বিকটাননাঃ |
সর্পিণ্যাঃ কর্ণকুহরাদুত্থিতাঃ সর্পকোটয়ঃ || ৩. ২৩. ৩৪||
অগ্রেপুচ্ছে চ বদনং ধারয়ন্তঃ ফণান্বিতম্ |
আস্যাদা নীলবপুষঃ সর্পিণ্যাঃ ফণিনোঽভবন্ || ৩. ২৩. ৩৫||
অন্যৈশ্চ বলবর্ণাশ্চ চতুর্বক্ত্রাশ্চতুষ্পদাঃ |
নাসিকাবিবরাত্তস্যা উদ্গতা উগ্ররোচিষঃ || ৩. ২৩. ৩৬||
লংবমানমহাচর্মাবৃত্তস্থূলপয়োধরাৎ |
নাভিকুণ্ডাচ্চ বহবো রক্তবর্ণা ভয়ানকাঃ || ৩. ২৩. ৩৭||
হলাহলং বহন্তশ্চ প্রোত্থিতাঃ পন্নগাধিপাঃ |
বিদশন্তঃ শক্তিসেনাং দহন্তো বিষবহ্নিভিঃ || ৩. ২৩. ৩৮||
বধ্নন্তো ভোগপাশৈশ্চ নিঘ্নন্তঃ ফণমণ্ডলৈঃ |
অত্যন্তমাকুলাং চক্রুর্ললিতেশীচমূমমী || ৩. ২৩. ৩৯||
খণ্ড্যমানা অপি মুহুঃ শক্তীনাং শস্ত্রকোটিভিঃ || ৩. ২৩. ৪০||
উপর্যুপরি বর্ধন্তে সপিণ্ডপ্রবিসর্পিণঃ |
নশ্যন্তি বহবঃ সর্পা জায়ন্তে চাপরে পুনঃ || ৩. ২৩. ৪১||
একস্য নাশসময়ে বহবোঽন্যে সমুত্থিতাঃ |
মূলভূতা যতো দুষ্টা সর্পিণী ন বিনশ্যতি || ৩. ২৩. ৪২||
অতস্তৎকৃতসর্পাণাং নাশে সর্পান্তরোদ্ভবঃ |
ততশ্চশক্তিসৈন্যানাং শরীরাণি বিষানলৈঃ || ৩. ২৩. ৪৩||
দহ্যমানানি দুঃখেন বিপ্লুতান্যভবন্রণে |
কিঙ্কর্তব্যবিমূঢেষু শক্তিচক্রেষু ভোগিভিঃ || ৩. ২৩. ৪৪||
পরাক্রমং বহুবিধং চক্রুস্তে পঞ্চ দানবাঃ |
করীন্দ্রী গর্দভশতৈর্যুক্তং স্যন্দনমাস্থিতঃ || ৩. ২৩. ৪৫||
চক্রেণ তীক্ষ্ণধারেণ শক্তিসেনামমর্দয়ৎ |
বজ্রদন্তাভিধশ্চান্যো ভণ্ডদৈত্যচমূপতিঃ || ৩. ২৩. ৪৬||
বজ্রবাণাভিঘাতেন হোষ্ট্রতো হি রণং ব্যধাৎ |
অথ বজ্রমুখশ্চৈব চক্রিবন্তং মহত্তরম্ || ৩. ২৩. ৪৭||
আরুহ্য কুন্তধারাভিঃ শক্তিচক্রমমর্দয়ৎ |
বজ্রদন্তাভিধানোঽন্যশ্চমূনামধিপো বলী || ৩. ২৩. ৪৮||
গৃধ্রয়ুগ্মরথারূঢঃ প্রজহার শিলীমুখৈঃ |
তৈঃ সেনাপতিভির্দুষ্টৈঃ প্রোৎসাহিতমথাহবে || ৩. ২৩. ৪৯||
শতমক্ষৌহিণীনাং চ নিপপাতৈকহেলয়া |
সর্পিণী চ দুরাচারা বহুমায়াপরিগ্রহা || ৩. ২৩. ৫০||
ক্ষণেক্ষণে কোটিসংখ্যান্বিসসর্জ ফণাধরান্ |
তথা বিকলিতং সৈন্যমবলোক্য রুষাকুলা || ৩. ২৩. ৫১||
নকুলী গরুডারূঢা সা পপাত রণাজিরে |
প্রতপ্তকনকপ্রখ্যা ললিতাতালুসম্ভবা || ৩. ২৩. ৫২||
সমস্তবাঙ্ময়াকারা দন্তৈর্বজ্রময়ৈর্যুতা |
সর্পিণ্যভিমুখং তত্র বিসসর্জ নিজং বলম্ || ৩. ২৩. ৫৩||
তয়াধিষ্ঠিততুঙ্গাংসঃ পক্ষবিক্ষিপ্তভূধরঃ |
গরুডঃ প্রাচলদ্যুদ্ধে সুমেরুরিব জঙ্গমঃ || ৩. ২৩. ৫৪||
সর্পিণীমায়য়া জাতান্সর্পান্দৃষ্ট্বা ভয়ানকান্ |
ক্রোধরক্তেক্ষণং ব্যাত্তং নকুলী বিদধে মুখম্ || ৩. ২৩. ৫৫||
অথ শ্রীনকুলীদেব্যা দ্বাত্রিংশদ্দন্তকোটয়ঃ |
দ্বাত্রিংশৎকোটয়ো জাতা নকুলাঃ কনকপ্রভাঃ || ৩. ২৩. ৫৬||
ইতস্ততঃ খণ্ডয়ন্তঃ সর্পিণীসর্পমণ্ডলম্ |
নিজদংষ্ট্রাবিমর্দেন নাশয়ন্তশ্চ তদ্বিষম্ |
ব্যভ্রমন্সমরে ঘোরে বিষঘ্নাঃ স্বর্ণবভ্রবঃ || ৩. ২৩. ৫৭||
উৎকর্ণাঃ ক্রোধ সম্পর্কাদ্ধূনিতাশেষলোমকাঃ |
উৎফুল্লা নকুলা ব্যাত্তবদনা ব্যদশন্নহীন্ || ৩. ২৩. ৫৮||
একৈকমায়াসর্পস্য বভ্রুরেকৈক উদ্গতঃ |
তীক্ষ্ণদন্তনিপাতেন খণ্ডয়ামাস বিগ্রহম্ || ৩. ২৩. ৫৯||
ভোগিভোগসৃতৈ রক্তৈঃ সৃক্কিণী শোণতাং গতে |
লিহন্তো নকুলা জিহ্বাপল্লবৈঃ পুপ্লুবুর্মৃধে || ৩. ২৩. ৬০||
নকুলৈর্দশ্যমানানামত্যন্তচটুলং বপুঃ |
মুহুঃ কুণ্ডলিতৈর্ভোগৈঃ পন্নগানাং ব্যচেষ্টত || ৩. ২৩. ৬১||
নকুলাবলিদষ্টানাং নষ্টাসূনাং ফণাভৃতাম্ |
ফণাভরসমুৎকীর্ণা মণয়ো ব্যরুচন্রণে || ৩. ২৩. ৬২||
নকুলাঘাতসংশীর্ণফণাচক্রৈর্বিনির্গতৈঃ |
ফণয়স্তন্মহাদ্রোহবহ্বিজ্বালা ইবাবভুঃ || ৩. ২৩. ৬৩||
এবংপ্রকারতো বভ্রুমণ্ডলৈরবখণ্ডিতে |
মায়াময়ে সর্পজালে সর্পিণী কোপমাদধে || ৩. ২৩. ৬৪||
তয়া সহ মহদ্যুদ্ধং কৃৎবা সা নকুলেশ্বরী |
গারুডাস্ত্রমতিক্রূরং সমাধত্ত শিলীমুখে || ৩. ২৩. ৬৫||
তদ্গারুডাস্ত্রমুদ্দামজ্বালাদীপিতদিঙ্মুখম্ |
প্রবিশ্য সর্পিণীদেহং সর্পমায়াং ব্যশোষয়ৎ || ৩. ২৩. ৬৬||
মায়াশক্তোর্বিনাশেন সর্পিণী বিলয়ং গতা |
ক্রোধং চ তদ্বিনাশেন প্রাপ্তাঃ পঞ্চ চমূবরাঃ || ৩. ২৩. ৬৭||
যদ্বলেন সুরান্সর্বান্সেনান্যস্তেঽবমেনিরে |
সা সর্পিণী কথাশেষং নীতা নকুলবীর্যতঃ || ৩. ২৩. ৬৮||
অতঃস্ববলনাশেন ভৃশং ক্রুদ্ধাশ্চমূচরাঃ |
একোদ্যমেন শস্ত্রৌঘৈর্নকুলীং তামবাকিরন্ || ৩. ২৩. ৬৯||
একৈব সা তার্ক্ষ্যরথা পঞ্চভিঃ পৃতনেশ্বরী |
লঘুহস্ততয়া যুদ্ধে চক্রে বৈ শস্ত্রবর্ষিণী || ৩. ২৩. ৭০||
পট্টিশৈর্মুসলৈশ্চৈব ভিন্দিপালৈঃ সহস্রশঃ |
বজ্রসারময়ৈর্দন্তৈর্ব্যদশন্মর্ম সীমসু || ৩. ২৩. ৭১||
ততো হাহারুতং ঘোরং কুর্বাণা দৈত্যকিঙ্করাঃ |
উদগ্রদংশনকুলৈর্নকুলৈরাকুলীকৃতাঃ || ৩. ২৩. ৭২||
উৎপত্য গগনাৎকেচিদ্ঘোরচীৎকার কারিণঃ |
দেশন্তস্তদ্দ্বিষাং সৈন্য সকুলাঃ প্রজ্বলক্রুধঃ || ৩. ২৩. ৭৩||
কর্ণেষু দষ্ট্বা নাসায়ামন্যে দষ্টাঃ শিরস্তটে |
পৃষ্ঠতো প্যদশন্কেচিদা গত্য ব্যাকৃতক্রিয়াঃ || ৩. ২৩. ৭৪||
বিকলাশ্ছিন্নবর্মাণো ভয়বিস্রস্তশস্ত্রিকাঃ |
নকুলৈরভিভূতাস্তে ন্যপতন্নমরদ্রুহঃ || ৩. ২৩. ৭৫||
কেচিৎপ্রবিশ্যনকুলা ব্যাত্তান্যাস্যানি বৈরিণাম্ |
ভোগিভোগানি বাকৃষ্য ব্যদশন্রসনাতলম্ || ৩. ২৩. ৭৬||
অন্যে কর্ণেষু নকুলাঃ প্রাবিশন্দেববৈরিণাম্ |
সূক্ষ্মরূপা বিশন্তিস্ম নানারন্ধ্রাণি বভ্রবঃ || ৩. ২৩. ৭৭||
ইতি তৈরভিভূতানি নকুলৈরবলোকয়ন্ |
নিজসৈন্যানি দীনানি করঙ্কঃ কোপমাস্থিতঃ || ৩. ২৩. ৭৮||
অন্যেঽপি চ চমূনাথা লঘুহস্তা মহাবলাঃ || ৩. ২৩. ৭৯||
প্রতিবভ্রু শরস্তোমান্ববৃষুর্বারিদা ইব |
দৈত্যসৈন্যপতিপ্রৌঢ কোদডোত্থাঃ শিলীমুখাঃ |
বভ্রূণাং দন্তকোটীষু কঠোরঘট্টনং ব্যধুঃ || ৩. ২৩. ৮০||
চমূপতিশখ্যূহৈরাহতেভ্যঃ পরঃশতৈঃ |
বভ্রূণাং বজ্রদতেভ্যো নিশ্চক্রাম হুতাশনঃ |
পঞ্চাপি তে চমূনাথবিসৃষ্টৈরেকহেলয়া || ৩. ২৩. ৮১||
স্ফুরৎফলৈঃ শরকুলৈর্বভ্রুসেনাং ব্যমর্দয়ৎ |
ইতস্ততশ্চমূনাথবিক্ষিপ্তশরকোটিভিঃ |
বিশীর্ণগাত্রা নকুলা নকুলীং পর্যবারয়ন্ || ৩. ২৩. ৮২||
অথ সা নকুলী বাণী বাঙ্ময়স্যৈকনায়িকা |
নকুলানাং পরাবৃত্ত্যা মহান্তং রোষমাশ্রিতা || ৩. ২৩. ৮৩||
অক্ষীণনকুলং নাম মহাস্ত্রং সর্বতোমুখম্ |
বহ্নিজ্বালাপরীতাগ্রং সংদধে শার্ঙ্গধন্বনি || ৩. ২৩. ৮৪||
তদস্ত্রতো বিনিষ্ঠ্যূতা নকুলাঃ কোটিসংখ্যাকাঃ |
বজ্রাঙ্গা বজ্রলোমানো বজ্রদংষ্ট্রা মহাজবা || ৩. ২৩. ৮৫||
বজ্রসারাশ্চ নিবিডা বজ্রজাল ভয়ঙ্করা |
বজ্রাকারৈর্নশৈস্তূর্ণ দারয়ন্তো মহীতলম্ || ৩. ২৩. ৮৬||
বজ্ররত্নপ্রকাশেন লোচনেনাপি শোভিতাঃ |
বজ্রসংপাতসদৃশা নাসাচীৎকার কারিণঃ || ৩. ২৩. ৮৭||
মর্দয়ন্তি সুরারাতিসৈন্যং দশনকোটিভিঃ |
পরাক্রমং বহুবিধং তেনিরে তে নিরেনসঃ || ৩. ২৩. ৮৮||
এবং নকুলকোটীভির্ বজ্রঘোরৈর্মহাবলৈঃ |
বিনষ্টাঃ প্রত্যবয়বং বিনেশুর্দানবাধমাঃ || ৩. ২৩. ৮৯||
এবং বজ্রময়ৈর্বভুমণ্ডলৈঃ শণ্ডিতে বলে || ৩. ২৩. ৯০||
শতাক্ষৌহিণিকে সংখ্যে তে স্বমাত্রাবশেষিতাঃ |
অতিত্রাসেন রোষেণ গৃহীতাশ্চ চমূবরাঃ |
সংগ্রামমধিকং তেনুঃ সমাকৃষ্টশরাসনাঃ || ৩. ২৩. ৯১||
তৈঃ সমং বহুধা যুদ্ধং তন্বানা নকুলেশ্বরী |
পট্টিশেন করঙ্কস্য চিচ্ছেদ কঠিনং শিরঃ || ৩. ২৩. ৯২||
কাকবাশিতসুখ্যানাং চতুর্ণামপি বৈরিণাম্ |
উৎপত্যোৎপত্য তার্ক্ষ্যেণ ব্যলুনাদসিনা শিরঃ || ৩. ২৩. ৯৩||
তাদৃশং লাঘবং দৃষ্ট্বা নকুল্যা শ্যামলাংবিকা || ৩. ২৩. ৯৪||
বহু মেনে মহাসত্ত্বাং দুষ্টাসুরবিনাশিনীম্ |
নিজাঙ্গদেবতত্ত্বং চ তস্যৈ শ্যামাংবিকা দদৌ || ৩. ২৩. ৯৫||
লোকোত্তরে গুণে দৃষ্টে কস্য ন প্রীতিসংভবঃ |
হতশিষ্টা ভীতভীতা নকুলীশরণং গতাঃ || ৩. ২৩. ৯৬||
সাপি তান্বীক্ষ্য কৃপয়া মা ভৈষ্টেতি বিহস্য চ |
ভবদ্রাজ্ঞে রণোদন্তমশেষং চ নিবোধত || ৩. ২৩. ৯৭||
তয়ৈবং প্রেষিতাঃ শীঘ্রং তদালোক্য রণক্ষিতিম্ |
মুদিতাস্তে পুনর্ভীত্যা শূন্যকায়াং পলায়িতাঃ || ৩. ২৩. ৯৮||
তদুদন্তং ততঃ শ্রুৎবা ভণ্ডশ্চণ্ডো রুষাভবৎ || ৩. ২৩. ৯৯||
ইতি ব্রহ্মাণ্ডমহাপুরাণে উত্তরভাগে ললিতোপাখ্যানে করঙ্কাদিপঞ্চসেনাপতিবধো নাম ত্রয়োবিংশোঽধ্যায়ঃ

হতেষু তেষু রোষান্ধো নিশ্বসঞ্ছূন্যকেশ্বরঃ |
কুজলাশমিতি প্রোচে যুয়ুৎসাব্যাকুলাশয়ঃ || ৩. ২৪. ১||
ভদ্র সেনাপতেঽস্মাকমভদ্রং সমুপাগতম্ |
করঙ্কাদ্যশ্চমূনাথাঃ কন্দলদ্ভুজবিক্রমাঃ || ৩. ২৪. ২||
সর্পিণীমায়য়া সর্বগীর্বাণমদভঞ্জনাঃ |
পাপীয়স্যা তয়া গূঢমায়য়া বিনিপাতিতাঃ || ৩. ২৪. ৩||
বলাহকপ্রভৃতয়ঃ সপ্ত যে সৈনিকাধিপাঃ |
তানুদগ্রভুজাসত্ত্বান্প্রাহিণু প্রধনং প্রতি || ৩. ২৪. ৪||
ত্রিশতং চাক্ষৌহিণীনাং প্রস্থাপয় সহৈব তৈঃ |
তে মর্দয়িৎবা ললিতাসৈন্যং মায়াপরায়ণাঃ || ৩. ২৪. ৫||
অয়ে বিজয়মাহার্য সংপ্রাপ্স্যন্তি মমান্তিকম্ |
কীকসগর্ভসংজাতাস্তে প্রচণ্ডপরাক্রমাঃ || ৩. ২৪. ৬||
বলাহকমুখাঃ সপ্ত ভ্রাতরো জয়িনঃ সদা |
তেষামবশ্যং বিজয়ো ভবিষ্যতি রণাঙ্গণে || ৩. ২৪. ৭||
ইতি ভণ্ডাসুরেণোক্তঃ কুটিলাক্ষঃ সমাহ্বয়ৎ |
বলাহকমুখান্সপ্ত সেনানাথান্মদোৎকটান্ || ৩. ২৪. ৮||
বলাহকঃ প্রথমতস্তস্মা ৎসূচীমুখোঽপরঃ |
অন্যঃ ফালমুখশ্চৈব বিকর্ণো বিকটাননঃ || ৩. ২৪. ৯||
করালায়ুঃ করটকঃ সপ্তৈতে বীর্যশালিনঃ |
ভণ্ডাসুরং নমস্কৃত্য যুদ্ধকৌতূহলোল্বণাঃ || ৩. ২৪. ১০||
কীকসাসূনবঃ সর্বে ভ্রাতরোঽন্যোন্যমাবৃতাঃ |
অন্যোন্যসুসহায়াশ্চ নির্জগমুর্নগরান্তরাৎ || ৩. ২৪. ১১||
ত্রিশাতাক্ষৌহিণীসেনাসেনান্যোঽন্বগমংস্তদা |
উল্লিখন্তি কেতুজালৈরংবরে ঘনমণ্ডলম্ || ৩. ২৪. ১২||
ঘোরসংগ্রামিণীপাদা ঘাতৈর্মর্দিতভূতলা |
পিবন্তি ধূলিকাজালৈরশেষানপি সাগরান্ || ৩. ২৪. ১৩||
ভেরীনিঃ সাণতংপোট্টপণবানকনিস্বনৈঃ |
নভোগুণময়ং বিশ্বমাদধানাঃ পদেপদে || ৩. ২৪. ১৪||
ত্রিশতাক্ষৌহিণীসেনাং তাং গৃহীৎবা মদেদ্ধতাঃ |
প্রবেষ্টুমিব বিশ্বস্মিন্কৈকসেয়াঃ প্রতস্থিরে || ৩. ২৪. ১৫||
ধৃতরোষারুণাঃ সূর্যমণ্ডলো দ্দীপ্তকঙ্কটাঃ |
উদ্দীপ্তশস্ত্রভরণাশ্চেলুর্দ্দীপ্তোর্ধ্বকেশিনঃ || ৩. ২৪. ১৬||
সপ্ত লোকান্প্রমথিতুং প্রোষিতাঃ পূর্বমুদ্ধতাঃ |
ভণ্ডাসুরেণ মহতা জগদ্বিজয়কারিণা || ৩. ২৪. ১৭||
সপ্তলোকবিমর্দেন তেন দৃষ্ট্বা মহাবলাঃ |
প্রোষিতা ললিতাসৈন্যং জেতুকামেন দুর্ধিয়া || ৩. ২৪. ১৮||
তে পতন্তো রণতলমুচ্চলচ্ছত্রপাণয়ঃ |
শক্তিসেনামভিমুখং সক্রোধমভিদুদ্রুবুঃ || ৩. ২৪. ১৯||
মুহুঃ কিলকিলারাবৈর্ঘোষয়ন্তো দিশো দশ |
দেব্যাস্তু সৈনিকং যত্র তত্র তে জগমুরুদ্ধতাঃ || ৩. ২৪. ২০||
সৈন্যং চ ললিতাদেব্যাঃ সন্নদ্ধং শাস্ত্রভীষণম্ |
অভ্যমিত্রীণমভবদ্বদ্ধভ্রুকুটিনিষ্ঠুরম্ || ৩. ২৪. ২১||
পাশিন্যো মুসলিন্যশ্চ চক্রিণ্যশ্চাপরা মুনে |
মুদ্গরিণ্যঃ পট্টিশিন্যঃ কোদণ্ডিন্যস্তথাপরাঃ || ৩. ২৪. ২২||
অনেকাঃশক্তয়স্তীব্রা ললিতাসৈন্যসংগতাঃ |
পিবন্ত্য ইব দৈত্যাব্ধিং সান্নিপেতুঃ সহস্রশঃ || ৩. ২৪. ২৩||
আয়াতায়াত হে দুষ্টাঃ পাপিন্যো বনিতাধমাঃ |
মায়াপরিগ্রহৈর্দূরং মোহয়ন্ত্যো জডাশয়ান্ || ৩. ২৪. ২৪||
নেষ্যামো ভবতীরদ্য প্রেতনাথনিকেতনম্ |
শ্বসদ্ভুজগসংকাশৈর্বাণৈর ত্যন্তভীষণৈঃ |
ইতি শক্তীর্ভর্ত্সয়ন্তো দানবাশ্চক্রুরাহবম্ || ৩. ২৪. ২৫||
কাচিচ্চিচ্ছেদ দৈত্যেন্দ্রং কণ্ঠে পট্টিশপাতনাৎ |
তদ্গলোদ্গলিতো রক্তপূর ঊর্ধ্বমুখোঽভবৎ || ৩. ২৪. ২৬||
তত্র লগ্না বহুতরা গৃধ্রা মণ্ডলতাং গতাঃ |
তৈরেব প্রেতনাথস্য চ্ছত্রচ্ছবিরুদঞ্চিতা || ৩. ২৪. ২৭||
কাচিচ্ছক্তিঃ মুরারাতিং মুক্তশক্ত্যায়ুধং রণে |
লূনতচ্ছক্তিনৈকেন বাণেন ব্যলুনীত চ || ৩. ২৪. ২৮||
একা তু গজমারূঢা কস্যচিদ্দৈত্যদুর্মতেঃ |
উরঃস্থলে স্বকরিণা বপ্রাঘাতমশিক্ষয়ৎ || ৩. ২৪. ২৯||
কাচিৎপ্রতিভটারূঢং দন্তিনং কুংভসীমনি |
খড্গেন সহসা হৎবা গজস্য স্বপ্রিয়ং ব্যধাৎ || ৩. ২৪. ৩০||
করমুক্তেন চক্রেণ কস্যচিদ্দেববৈরিণঃ |
ধনুর্দণ্ডং দ্বিধা কৃৎবা স্বভ্রুবোঃ প্রতিমাং তনেৎ || ৩. ২৪. ৩১||
শক্তিরন্যা শরৈঃ শাতৈঃ শাতয়িৎবা বিরোধিনঃ |
কৃপাণপদ্মা রোমাল্যাং স্বকীয়ায়াং মুদং ব্যধাৎ || ৩. ২৪. ৩২||
কাচিন্মুদ্গরপাতেন চূর্ণয়িৎবা বিরোধিনঃ |
রথ্যক্রনিতংবস্য স্বস্য তেনাতনোন্মুদম্ || ৩. ২৪. ৩৩||
রথকূবরমুগ্রেণ কস্যচিদ্দানবপ্রভোঃ |
খড্গেন ছিন্দতী স্বস্য প্রিয়মুব্যাস্ততান হ || ৩. ২৪. ৩৪||
অভ্যন্তরং শক্তিসেনা দৈত্যানাং প্রবিবেশ হ |
প্রবিবেশ চ দৈত্যানাং সেনা শক্তিবলান্তরম্ || ৩. ২৪. ৩৫||
নীরক্ষীরবদত্যন্তাশ্লেষং শক্তিসুরদ্বিষাম্ |
সংকুলাকারতাং প্রাপ্তো যুদ্ধকালেঽভবত্তদা || ৩. ২৪. ৩৬||
শক্তীনাং খড্গপাতেন লূনশুণ্ডারদদ্বয়াঃ |
দৈত্যানাং করিণো মত্তা মহাক্রোডা ইবাভবন্ || ৩. ২৪. ৩৭||
এবং প্রবৃত্তে সমরে বীরাণাং চ ভয়ঙ্করে |
অশক্যে স্মর্তুমপ্যন্তং কাতরৎববতাং নৃণাম্ |
ভীষণানাং ভীষণে চ শস্ত্রব্যাপারদুর্গমে || ৩. ২৪. ৩৮||
বলাহকো মহাগৃধ্রং বজ্রতীক্ষ্ণমুখাদিকম্ |
কালদণ্ডোপমং জঙ্ঘাকাণ্ডে চণ্ডপরাক্রমম্ || ৩. ২৪. ৩৯||
সংহারগুপ্তনামানং পূর্বমগ্রে সমুত্থিতম্ |
ধূমবদ্ধূসরাকারং পক্ষক্ষেপভয়ঙ্করম্ || ৩. ২৪. ৪০||
আরুহ্য বিবিধংযুদ্ধং কৃতবান্যুদ্ধদুর্মদঃ |
পক্ষৌ বিতত্য ক্রোশার্ধং স স্থিতো ভীমনিঃস্বনৈঃ |
অঙ্গারকুণ্ডবচ্চঞ্চুং বিদার্যাভক্ষয়চ্চমূম্ || ৩. ২৪. ৪১||
সংহারগুপ্তং স মহাগৃধ্রঃ ক্রূরবিলোচনঃ |
বলাহকমুবাহোচ্চৈরাকৃষ্টধনুষং রণে || ৩. ২৪. ৪২||
বলাহকো বপুর্ধুন্বন্গৃধ্রপৃষ্ঠকৃতস্থিতিঃ |
সপক্ষকূটশৈলস্থো বলাহক ইবাভবৎ || ৩. ২৪. ৪৩||
সূচীমুখশ্চ দৈত্যেন্দ্রঃ সূচীনিষ্ঠুরপক্ষতিম্ |
কাকবাহনমারুহ্য কঠিনং সমরং ব্যধাৎ || ৩. ২৪. ৪৪||
মত্তঃ পর্বতশৃঙ্গাভশ্চঞ্চূদণ্ডং সমুদ্বহন্ |
কালদণ্ডপ্রমাণেন জঙ্ঘাকাণ্ডেন ভীষণঃ || ৩. ২৪. ৪৫||
পুষ্কলাবর্তকসমা জংবালসদৃশদ্যতিঃ |
ক্রোশমাত্রায়তৌ পক্ষাবুভাবপি সমুদ্বহন্ || ৩. ২৪. ৪৬||
সূচীমুখাধিষ্ঠিতোঽসৌ করটঃ কটুবাসিতঃ |
মর্দয়ঞ্চঞ্চুঘাতেন শক্তীনাং মণ্ডলং মহৎ || ৩. ২৪. ৪৭||
অথো ফলমুখঃ ফালং গৃহীৎবা নিজমায়ুধম্ |
কঙ্কমারুহ্য সমরে চকাশে গিরিসন্নিভম্ || ৩. ২৪. ৪৮||
বিকর্ণাখ্যশ্চ দৈত্যেন্দ্রশ্চমূভর্তা মহাবলঃ |
ভেরুণ্ডপতনারূঢঃ প্রচণ্ডয়ুদ্ধমাতনোৎ || ৩. ২৪. ৪৯||
বিকটানননামানং বিলসৎপট্টিশায়ুধম্ |
উবাহ সমরে চণ্ডঃ কুক্কুটোঽতিভয়ঙ্করঃ || ৩. ২৪. ৫০||
গর্জন্কণ্ঠস্থরোমাণি হর্ষয়ঞ্জ্বলদীক্ষণঃ |
পশ্যন্পুরঃ শক্তিসৈন্যং চচাল চরণায়ুধঃ || ৩. ২৪. ৫১||
করালাক্ষশ্চ ভূভর্তা ষষ্ঠোঽত্যন্তগরিষ্ঠদঃ |
বজ্রনিষ্ঠুরঘোষশ্চ প্রাচলৎপ্রেতবাহনঃ || ৩. ২৪. ৫২||
শ্মশানমন্ত্রশূরেণতেন সংসাধিতঃ পুরা |
প্রেতো ভূতসমাবিষ্টস্তমুবাহ রণাজিরে || ৩. ২৪. ৫৩||
অবাঙ্মুখো দীর্ঘবাহুঃ প্রসারিতপদদ্বয়ঃ |
প্রোতো বাহনতাং প্রাপ্তঃকরালাক্ষমথাবহৎ || ৩. ২৪. ৫৪||
অন্যঃ করটকো নাম দৈত্যসেনাশিখামণিঃ |
সর্দয়ামাস শক্তীনাং সৈন্যং বেতালবাহনঃ || ৩. ২৪. ৫৫||
যোজনায়তমূর্তিঃ সন্বেতালঃ ক্রূরলোচনঃ |
শ্মশানভূমৌ বেতালো মন্ত্রেণানেন সাধিতঃ || ৩. ২৪. ৫৬||
মর্দয়ামাস পৃতনাং শক্তীনাং তেন দেশিতঃ |
তস্য বেতালবর্যস্য বর্তমানোংসসীমনি |
বহুধায়ুধ্যত তদা শক্তিভিঃ সহ দানবঃ || ৩. ২৪. ৫৭||
এবমেতে খলাত্মানঃ সপ্ত সপ্তার্ণবোপমাঃ |
শক্তীনাং সৈনিকং তত্র ব্যাকুলীচক্রুরুদ্ধতাঃ || ৩. ২৪. ৫৮||
তে সপ্ত পূর্বং তপসা সবিতারমতোষয়ন্ |
তেন দত্তো বরস্তেষাং তপস্তুষ্টেন ভাস্বতা || ৩. ২৪. ৫৯||
কৈকসেয়া মহাভাগা ভবতাং তপসাধুনা |
পরিতুষ্টোঽস্মি ভদ্রং বো ভবন্তো বৃণতাং বরম্ || ৩. ২৪. ৬০||
ইত্যুক্তে দিননাথেন কৈকসেয়াস্তপঃ কৃশাঃ |
প্রার্থয়ামাসুরত্যর্থং দুর্দান্তং বরমীদৃশম্ || ৩. ২৪. ৬১||
রণেষু সন্নিধাতব্যমস্মাকং নেত্রকুক্ষিষু |
ভবতা ঘোরতেজোভির্দহতা প্রতিরোধিনঃ || ৩. ২৪. ৬২||
ৎবয়া যদা সন্নিহিতং তপনাস্মাকমক্ষিষু |
তদাক্ষিবিষয়ঃ সর্বো নিশ্চেষ্টো ভবতাৎপ্রভো || ৩. ২৪. ৬৩||
ৎবৎসান্নিধ্যসমিদ্ধেন নেত্রেণাস্মাকমীক্ষিতাঃ |
স্তব্ধশস্ত্রা ভবিষ্যন্তি প্রতিরোধকসৈনিকাঃ || ৩. ২৪. ৬৪||
ততঃ স্তব্ধেষু শস্ত্রেষু বীক্ষণাদেব নঃ প্রভো |
নিশ্চেষ্টা রিপবোঽস্মাভির্হন্তব্যাঃ সুকরৎবতঃ || ৩. ২৪. ৬৫||
ইতি পূর্বং বরঃ প্রাপ্তঃ কৈকসেয়ৌর্দিবাকরাৎ |
বরদানেন তে তত্র যুদ্ধে চেরুর্মধোদ্ধতাঃ || ৩. ২৪. ৬৬||
অথ সূর্যসমাবিষ্টনেত্রৈস্তেস্তু নিরীক্ষিতাঃ |
শক্তয়ঃ স্তব্ধশস্ত্রৌঘা বিফলোৎসা হতাং গতাঃ || ৩. ২৪. ৬৭||
কীকসাতনয়ৈস্তৈস্তু সপ্তভিঃ সত্ত্বশালিভিঃ |
বিষ্টংভিতাস্ত্রশস্ত্রাণাং শক্তীনাং নোদ্যমোঽভবৎ || ৩. ২৪. ৬৮||
উদ্যমে ক্রিয়ভাণেঽপি শস্ত্রস্তম্ভেন ভূয়সা |
অভিভূতাঃ সনিশ্বাসং শক্তয়ো জোষমাসত || ৩. ২৪. ৬৯||
অথ তে বাসরং প্রাপ্য নানাপ্রহরণোদ্যতাঃ |
ব্যমর্দয়ঞ্ছক্তিসৈন্যং দৈত্যাঃ স্বস্বামিদেশিতাঃ || ৩. ২৪. ৭০||
শক্তয়স্তাস্তু সৈন্যেন নির্ব্যাপারা নিরায়ুধাঃ |
অক্ষুভ্যন্ত শরৈস্তেষাং বজ্রকঙ্কটভোদিভিঃ || ৩. ২৪. ৭১||
শক্তয়ো দৈত্যশস্ত্রৌধৈর্বিদ্ধগাত্রাঃ সৃতামৃজঃ |
সুপল্লবা রণে রেজুঃ কঙ্কোললতিকা ইব || ৩. ২৪. ৭২||
হাহাকারং বিতন্বত্যঃ প্রপন্না ললিতেশ্বরীম্ |
চুক্রুশুঃ শক্তয়ঃ সর্বাস্তৈঃ স্তংভিতনিজায়ুধাঃ || ৩. ২৪. ৭৩||
অথ দেব্যাজ্ঞয়া দণ্ডনাথা প্রত্যঙ্গরক্ষিণী |
তিরস্করণিকা দেবী সমুত্তস্থৌ রণাজিরে || ৩. ২৪. ৭৪||
তমোলিপ্তাহ্বয়ং নাম বিমানং সর্বতোমুখম্ |
মহামায়া সমারুহ্য শক্তীনামভয়ং ব্যধাৎ || ৩. ২৪. ৭৫||
তমালশ্যামলাকারা শ্যামকঞ্চুকধারিণী |
শ্যামচ্ছায়ে তমোলিপ্তে শ্যাময়ুক্ততুরঙ্গমে || ৩. ২৪. ৭৬||
বাসন্তী মোহনাভিখ্যং ধনুরাদায় সস্বনম্ |
সিংহনাদং বিনদ্যেষূনবর্ষৎসর্পসন্নিভান্ || ৩. ২৪. ৭৭||
কৃষ্ণরূপভুজঙ্গ ভানধোমুসলসংনিভান্ |
মোহনাস্ত্রবিনিষ্ঠ্যূতান্বাণান্দৈত্যা ন সেহিরে || ৩. ২৪. ৭৮||
ইতস্ততো মর্দ্যমানা মহামায়াশিলীমুখৈঃ |
প্রকোপং পরমং প্রাপ্তা বলাহকমুখাঃ খলাঃ || ৩. ২৪. ৭৯||
অথো তিরস্করণ্যংবা দণ্ডনাথানিদেশতঃ |
অন্ধাভিধং মহাস্ত্রং সা মুমোচ দ্বিষতাং গণে || ৩. ২৪. ৮০||
বলাহকাদ্যাস্তে সপ্ত দিননাথবরোদ্ধতাঃ |
অন্ধাস্ত্রেণ নিজং নেত্রং দধিরে চ্ছাদিতং যথা || ৩. ২৪. ৮১||
তিরস্করণিকাদেব্যা মহামোহনধন্বনঃ |
উদ্গতেনান্ধবাণেন চক্ষুস্তেষাং ব্যধীয়ত || ৩. ২৪. ৮২||
অন্ধীকৃতাশ্চ তে সপ্ত ন তু প্রৈক্ষন্ত কিঞ্চন |
তদ্বীক্ষণস্য বিরহাচ্ছস্ত্রস্তম্ভঃ ক্ষয়ং গতঃ || ৩. ২৪. ৮৩||
পুনঃ সসিংহনাদং তাঃ প্রোদ্যতায়ুধপাণয়ঃ |
চক্রুঃ সমরসন্নাহং দৈত্যানাং প্রজিঘাংসয়া || ৩. ২৪. ৮৪||
তিরস্করণিকাং দেবীমগ্রে কৃৎবা মহাবলাম্ |
সদুপায়প্রসঙ্গেন ভৃশং তুষ্টা রণং ব্যধুঃ || ৩. ২৪. ৮৫||
সাধুসাধু মহাভাগে তিরস্করণিকাংবিকে |
স্থানে কৃততিরস্কারা দ্বিপামেষাং দুরাত্মনাম্ || ৩. ২৪. ৮৬||
ৎবং হি দুর্জননেত্রাণাং তিরস্কারমহৌষধী |
ৎবয়া বদ্ধদৃশানেন দৈত্যচক্রেণ ভূয়তে || ৩. ২৪. ৮৭||
দেবকার্যমিদং দেবি ৎবয়া সম্যগনুষ্টিতম্ |
অস্মাদৃশামজয়্যেষু যদেষু ব্যসনং কৃতম্ || ৩. ২৪. ৮৮||
তত্ত্বয়ৈব দুরাচারানেতান্সপ্ত মহাসুরান্ |
নিহতাংল্ললিতা শ্রুৎবা সন্তোষং পরমাপ্স্যতি || ৩. ২৪. ৮৯||
এবং ৎবয়া বিরচিতে দণ্ডিনীপ্রীতি মাপ্স্যতি |
মন্ত্রিণ্যপি মহাভাগায়াস্যত্যেব পরাং মুদম্ || ৩. ২৪. ৯০||
তস্মাত্ত্বমেব সপ্তৈতান্নিগৃহণ রণাজিরে |
এষাং সৈন্যং তু নিখিলং নাশয়াম উদায়ুধাঃ || ৩. ২৪. ৯১||
ইত্যুক্ত্বা প্রেরিতা তাভিঃ শক্তিভিয়ুর্দ্ধকৌতুকান্ |
তমোলিপ্তেন যানেন বলাহকবলং যয়ৌ || ৩. ২৪. ৯২||
তামায়ান্তীং সমাবেক্ষ্য তে সপ্তাথ সুরাধমাঃ |
পুনরেব চ সাবিত্রং বরং সস্মরুরঞ্জসা || ৩. ২৪. ৯৩||
প্রবিষ্টমপি সাবিত্রং নাশকং তন্নিরোধনে |
তিরস্কৃতং তু নেত্রস্থং তিরস্করণিতেজসা || ৩. ২৪. ৯৪||
বরদানাস্ত্ররোষান্ধং মহাবলপরাক্রমম্ |
অস্ত্রেণ চ রুষা চান্ধং বলাহকমহাসুরম্ |
আকৃষ্য কেশেষ্বসিনা চকর্তান্তর্ধিদেবতা || ৩. ২৪. ৯৫||
তস্য বাহনগৃধ্রস্য লুনানা পত্রিণা শিরঃ |
সূচীমুখস্যাভিমুখং তিরস্করণিকা ব্রজৎ || ৩. ২৪. ৯৬||
তস্য পট্টিশপাতেন বিলূয় কঠিনং শিরঃ |
অন্যেষামপি পঞ্চানাং পঞ্চৎবমকরোচ্ছনৈঃ || ৩. ২৪. ৯৭||
তৈঃ সপ্তদৈত্যমুণ্ডৈশ্চগ্রথিতান্যোন্যকেশকৈঃ |
হারদাম গলে কৃৎবা ননাদান্তর্ধিদেবতা || ৩. ২৪. ৯৮||
সমস্তমপি তৎসৈন্যং শক্তয়ঃ ক্রোধসূর্চ্ছিতাঃ |
হৎবা তদ্রক্তসলিলৈর্বহ্বীঃ প্রাবাহয়ন্নদীঃ || ৩. ২৪. ৯৯||
তত্রাশ্চর্যমভূদ্ভূরি মাহামায়াংবিকাকৃতম্ |
বলাহকাদিসেনান্যাং দৃষ্টিরোধনবৈভবাৎ || ৩. ২৪. ১০০||
হতশিষ্টাঃ কতিপয়া বহুবিত্রাসসঙ্কুলাঃ |
শরণং জগ্মুরত্যার্ত্তাঃ ক্রন্দন্তং শূন্যকেশ্বরম্ || ৩. ২৪. ১০১||
দণ্ডিনীং চ মহামায়াং প্রশংসন্তি মুহুর্মুহুঃ |
প্রসাদমপরং চক্ষুস্তস্যা আদায়পিপ্রিয়ুঃ || ৩. ২৪. ১০২||
সাধুসাধ্বিতি তত্রস্থাঃ শক্তয়ঃ কম্পমৌলয়ঃ |
তিরস্করণিকাং দেবীমশ্লাঘন্ত পদেপদে || ৩. ২৪. ১০৩||
ইতি শ্রীব্রহ্মাণ্ডমহাপুরাণে উত্তরভাগে হয়গ্রীবাগস্ত্যসংবাদে ললিতোপাখ্যানে বলাহকাদিসপ্তসেনাপতিবধো নাম চতুর্বিংশোঽধ্যায়ঃ

ততঃ শ্রুৎবা বধং তেষাং তপোবলবতামপি |
ন্যশ্বসৎকৃষ্ণসর্পেন্দ্র ইব ভণ্ডো মহাসুরঃ || ৩. ২৫. ১||
একান্তে মন্ত্রয়ামাস স আহূয় মহোদরৌ |
ভণ্ডঃ প্রচণ্ডশৈণ্ডীর্যঃ কাঙ্ক্ষমাণো রণে জয়ম্ || ৩. ২৫. ২||
যুবরাজোঽপি সক্রোধো বিষঙ্গেণ যবীয়সা |
ভণ্ডাসুরং নমস্কৃত্য মন্ত্রস্থানমুপাগমৎ || ৩. ২৫. ৩||
অত্যাপ্তৈর্মন্ত্রিভির্যুক্তঃ কুটিলাক্ষপুরঃসরৈঃ |
ললিতাবিজয়ে মন্ত্রং চকার ক্বথিতাশ্যঃ || ৩. ২৫. ৪||
ভণ্ড উবাচ
অহো বত কুলভ্রংশঃ সমায়াতঃ সুরদ্বিষাম্ |
উপেক্ষামধুনা কর্তুং প্রবৃত্তো বলবান্বিধিঃ || ৩. ২৫. ৫||
মদ্ভৃত্যনামমাত্রেণ বিদ্রবন্তি দিবৌকসঃ |
তাদৃশানামিহাস্মাকমাগতোঽযং বিপর্যয়ঃ || ৩. ২৫. ৬||
করোতি বলিনং ক্লীবং ধনিনং ধনবর্জিতম্ |
দীর্ঘায়ুষমনায়ুষ্কং দুর্ধাতা ভবিতব্যতা || ৩. ২৫. ৭||
ক্ব সত্ত্বমস্মদ্বাহুনাং ক্বেয়ং দুর্ল্ললিতা বধূঃ |
অকাণ্ড এব বিধিনা কৃতোঽযং নিষ্ঠুরো বিধিঃ || ৩. ২৫. ৮||
সর্পিণীমায়য়োদগ্রাস্তংযা দুর্ঘটশৌর্যয়া |
অধিসংগ্রামভূচক্রে সেনান্যো বিনিপাতিতাঃ || ৩. ২৫. ৯||
এবমুদ্দামদর্পাঢ্যা বনিতা কাপি মায়িনী |
যদি সংপ্রহরত্যস্মান্ধিগ্বলং নো ভুজার্জিতম্ || ৩. ২৫. ১০||
ইমং প্রসংগং বক্তুং চ জিহ্বা জিহ্বেতি মামকী |
বনিতা কিমু মৎসৈন্যং মর্দ যিষ্যতি দুর্মদা || ৩. ২৫. ১১||
তদত্র মূলচ্ছেদায় তস্যা যত্নো বিধীয়তাম্ |
ময়া চারমুখাজ্জ্ঞাতা তস্যা বৃত্তির্মহাবলা || ৩. ২৫. ১২||
সর্বেষামপি সৈন্যানাং পশ্চাদেবাবতিষ্ঠতে |
অগ্রতশ্চলিতং সৈন্যং হয়হস্তিরথাদিকম্ || ৩. ২৫. ১৩||
অস্মিন্নেব হ্যবসরে পার্ষ্ণিগ্রাহো বিধীয়তাম্ |
পার্ষ্ণিগ্রহমিমং কর্তুং বিষঙ্গশ্চতুরো ভবেৎ || ৩. ২৫. ১৪||
তেন প্রৌঢমদোন্মতা বহুসংগ্রামদুর্মদাঃ |
দশ পঞ্চ চ সেনান্যঃ সহ যান্তু যুয়ুৎসয়া || ৩. ২৫. ১৫||
পৃষ্ঠতঃ পরিবারাস্তু ন তথা সংতি তে পুনঃ |
অল্পৈস্তু রক্ষিতা বৈ স্যাত্তেনৈবাসৌ সুনিগ্রহা || ৩. ২৫. ১৬||
অতস্ত্বং বহুসন্নাহমাবিধায় মদোৎকটঃ |
বিষঙ্গ গুপ্তরূপেণ পার্ষ্ণিগ্রাহং সমাচর || ৩. ২৫. ১৭||
অল্পীয়সী ৎবয়া সার্দ্ধং সেনা গচ্ছতু বিক্রমাৎ |
সজ্জাশ্চ লন্তু সেনান্যো দিক্পালবিজয়োদ্ধতাঃ || ৩. ২৫. ১৮||
অক্ষৌহিণ্যশ্চ সেনানাং দশ পঞ্চ চলন্তু তে |
ৎবং গুপ্তবেষস্তাং দুষ্টাং সন্নিপত্য দৃঢং জহি || ৩. ২৫. ১৯||
সৈব নিঃশেষশক্তীনাং মূলভূতা মহীয়সী |
তস্যাঃ সমূলনাশেন শক্তিবৃন্দং বিনশ্যতি || ৩. ২৫. ২০||
কন্দচ্ছেদে সরোজিন্যা দলজালমিবাংভসি |
সর্বেষামেব পশ্চাদ্যো রথশ্চলতি ভাসুরঃ || ৩. ২৫. ২১||
দশয়োজনসংপন্ননিজদেহসমুচ্ছ্রয়ঃ |
মহামুক্তাতপত্রেণ সর্বোদ্ধ্ব পরিশোভিতঃ || ৩. ২৫. ২২||
বহন্মুহর্বীজ্যমানং চামরাণাং চতুষ্টয়ম্ |
উত্তঙ্গকেতুসংঘাতলিখিতাংবুদমণ্ডলঃ || ৩. ২৫. ২৩||
তস্মিন্রথে সমায়াতি সা দৃষ্টা হরিণেক্ষণা |
নিবৃতং সংনিপত্য ৎবং চিহ্নেনানেন লক্ষিতাম্ || ৩. ২৫. ২৪||
তাং বিজিত্য দুরাচারাং কেশেষ্বা কৃষ্য মর্দয় |
পুরতশ্চলিতে সৈন্যে সত্ত্বশালিনি সা বধূঃ || ৩. ২৫. ২৫||
স্ত্রীমাত্ররক্ষা ভবতো বশমেষ্যতি সত্ত্বরম্ |
ভবৎসহায়ভূতায়াং সেনেন্দ্রাণামিহাভিধা || ৩. ২৫. ২৬||
শৃণু যৈর্ভবতো যুদ্ধে সাহ্যকার্যমতন্দ্রিতৈঃ |
আদ্যো মদনকো নাম দীর্ঘজিহ্বো দ্বিতীয়কঃ || ৩. ২৫. ২৭||
হুবকো হুলুমুলুশ্চ কক্লসঃ কক্লিবাহনঃ |
থুক্লসঃ পুণ্ড্রকেতুশ্চ চণ্ডবাহুশ্চ কুক্কুরঃ || ৩. ২৫. ২৮||
জংবুকাক্ষো জংভনশ্চ তীক্ষ্ণশৃঙ্গস্ত্রিকণ্টকঃ |
চন্দ্রগুপ্তশ্চ পঞ্চৈতে দশ চোক্তাশ্চমূবরাঃ || ৩. ২৫. ২৯||
একৈকাক্ষৌহিণীয়ুক্তাঃ প্রত্যেকং ভবতা সহ |
আগমিষ্যন্তি সেনান্যো দমনাদ্যা মহাবলাঃ || ৩. ২৫. ৩০||
পরস্য কটকং নৈব যথা জানাতি তে গতিম্ |
তথা গুপ্তসমাচারঃ পার্ষ্ণিগ্রাহং সমাচর || ৩. ২৫. ৩১||
অস্মিন্কার্যে সুমহতাং প্রৌঢিমানং সমুদ্বহন্ |
নিষঙ্গ ৎবং হি তভসে জয়সিদ্ধিমনুত্তমাম্ || ৩. ২৫. ৩২||
ইতি মন্ত্রিতমন্ত্রোঽযং দুর্মন্ত্রী ভণ্ডদানবঃ |
বিষঙ্গং প্রেষয়ামাস রক্ষিতং সৈন্যপালকৈঃ || ৩. ২৫. ৩৩||
অথ শ্রীললিতাদেব্যাঃ পার্ষ্ণিগ্রাহকৃতোদ্যমে |
যুবরাজানুজে দৈত্যে সূর্যোঽস্তগিরিমায়য়ৌ || ৩. ২৫. ৩৪||
প্রথমে যুদ্ধদিবসে ব্যতীতে লোকভীষণে |
অন্ধকারঃ সমভবত্তস্য বাহ্যচিকীর্ষয়া || ৩. ২৫. ৩৫||
মহিষস্কন্ধধূম্রাভং বনক্রোডবপুর্দ্দুতি |
নীলকণ্ঠনিভচ্ছায়ং নিবিডং পপ্রথে তমঃ || ৩. ২৫. ৩৬||
কুঞ্জেষু পিণ্ডিতমিব প্রধাবদিব সংধিষু |
উজ্জিহানমিব ক্ষোণীবিবরেভ্যঃ সহস্রশঃ || ৩. ২৫. ৩৭||
নির্গচ্ছদিব শৈলানাং ভূরি কন্দরমন্দিরাৎ |
ক্বচিদ্দীপপ্রভাজালে কৃতকাতরচেষ্টিতম্ || ৩. ২৫. ৩৮||
দত্তাবলংবনমিব স্ত্রীণাং কর্ণোৎপলৎবিষি |
একীভূতমিব প্রৌঢদিঙ্নাগমিব কজ্জলে |
আবদ্ধমৈত্রকমিব স্ফুরচ্ছাদ্বলমণ্ডলে || ৩. ২৫. ৩৯||
কৃতপ্রিয়াশ্লেষমিব স্ফুরন্তীষ্বসিয়ষ্টিষু |
গুপ্তপ্রবিষ্টমিব চ শ্যামাসু বনপঙ্ক্তিষু || ৩. ২৫. ৪০||
ক্রমেণ বহুলীভূতং প্রসসার মহত্তমঃ |
ত্রিয়ামাবামনয়না নীলকঞ্চুকরোচিষা || ৩. ২৫. ৪১||
তিমিরেণাবৃতং বিশ্বং ন কিঞ্চিৎপ্রত্যপদ্যত |
অসুরাণাং প্রদুষ্টানাং রাত্রিরেব বলাবহা || ৩. ২৫. ৪২||
তেষাং মায়াবিলাসোঽযং তস্যামেব হি বর্ধতে |
অথ প্রচলিতং সৈন্যং বিষঙ্গেণ মহৌজসা || ৩. ২৫. ৪৩||
ধৌতখড্গলতাচ্ছায়াবর্ধিষ্ণু তিমিরচ্ছটম্ |
দমনাদ্যাশ্চ সেনান্যঃ শ্মামকঙ্কটধারিণঃ || ৩. ২৫. ৪৪||
শ্যামোষ্ণীষধরাঃ শ্যামবর্ণসর্বপরিচ্ছদাঃ |
একৎবমিব সংপ্রাপ্তাস্তিমিরেণাতিভূয়সা || ৩. ২৫. ৪৫||
বিষঙ্গমনুসংচেলুঃ কৃতাগ্রজনমস্কৃতিম্ |
কূটেন যুদ্ধকৃত্যেন বিজিগীষুর্মহেশ্বরীম্ || ৩. ২৫. ৪৬||
মেঘডংবরকং নাম দধে বক্ষসি কঙ্কটম্ |
যথা তস্য নিশায়ুদ্ধানুরূপো বেষসংগ্রহঃ || ৩. ২৫. ৪৭||
তথা কৃতবতী সেনা শ্যামলং কঞ্চুকাদিকম্ |
ন চ দুন্দুভিনিস্বানো ন চ মর্দ্দলগর্জিতম্ || ৩. ২৫. ৪৮||
পণবানকভেরীণাং ন চ ঘোষবিজৃংভণম্ |
গুপ্তাচারাঃ প্রচলিতাস্তিমিরেণ সমাবৃতাঃ || ৩. ২৫. ৪৯||
পরৈরদৃশ্যগতয়ো বিষ্কোশীকৃতরিষ্টয়ঃ |
পশ্চিমাভিমুখং যান্তি ললিতায়াঃ পতাকিনীম্ || ৩. ২৫. ৫০||
আবৃতোত্তরমার্গেণ পূর্বভাগমশিশ্রিয়ন্ |
নিশ্বাসমপি সস্বানমকুর্বন্তঃ পদেপদে || ৩. ২৫. ৫১||
সাবধানাঃ প্রচলিতাঃ পার্ষ্ণিগ্রাহায় দানবাঃ |
ভূয়ঃ পুরস্য দিগ্ভাগং গৎবা মন্দপরাক্রমাঃ || ৩. ২৫. ৫২||
ললিতাসৈন্যমেব স্বান্সূচয়ন্তঃ প্রপৃচ্ছতঃ |
আগত্য নিভৃতং পৃষ্ঠে কবচচ্ছন্নবিগ্রহাঃ || ৩. ২৫. ৫৩||
চক্ররাজরথং তুঙ্গং মেরুমন্দরসংনিভম্ |
অপশ্যন্নতিদীপ্তাভিঃ শক্তিভিঃ পরিবারিতম্ || ৩. ২৫. ৫৪||
তত্র মুক্তাতপত্রস্য বর্ত্তমানামধঃস্থলে |
সহস্রাদিত্যসংকাশাং পশ্চিমাভিমুখীং স্থিতাম্ || ৩. ২৫. ৫৫||
কামেশ্বর্যাদিনিত্যাভিঃ স্বসমানসমৃদ্ধিভিঃ |
নর্মালাপবিনোদেন সেব্যমানাং রথোত্তমে || ৩. ২৫. ৫৬||
তাং তথাভূতবৃত্তান্তাম তাদৃশরণোদ্যমাম্ |
পুরোগতং মহৎসৈন্যং বীক্ষমাণ সকৌতুকম্ || ৩. ২৫. ৫৭||
মন্বানশ্চ হি তামেব বিষঙ্গঃ সুদুরাশয়ঃ |
পৃষ্ঠবংশে রথেন্দ্রস্য ঘট্টয়ামাস সৈনিকৈঃ || ৩. ২৫. ৫৮||
তত্রাণি মাদিশক্তীনাং পরিবারবরূথিনী |
মহাকলকলং চক্রুরণিমাদ্যাঃ পরঃশতম্ || ৩. ২৫. ৫৯||
পট্টিশৈর্দ্রুঘণৈশ্চৈব ভিন্দিপালৈর্ভুশুণ্ডিভিঃ |
কঠোরবজ্রনির্ধাতনিষ্ঠুরৈঃ শক্তিমণ্ডলৈঃ || ৩. ২৫. ৬০||
মর্দয়ন্তো মহাসত্ত্বাঃ সমরং বহুমেনিরে |
আকস্মিকরণোৎসাহবিপর্যাবিষ্টবিগ্রহম্ || ৩. ২৫. ৬১||
অকাণ্ডক্ষুভিতং চাসীদ্রথস্থং শক্তিমণ্ডলম্ |
বিপাটৈঃ পাটয়ামাসুরদৃশ্যৈরন্ধকারিণঃ || ৩. ২৫. ৬২||
ততশ্চক্ররথেন্দ্রস্য নবমে পর্বণি স্থিতাঃ |
অদৃশ্যমানশস্ত্রাণামদৃশ্যনিজবর্মণাম্ || ৩. ২৫. ৬৩||
তিমিরচ্ছন্নরূপাণাং দানবানাং শিলীমুখৈঃ |
ইতস্ততো বহু ক্লিষ্টং ছন্নবর্মিতমর্মবৎ || ৩. ২৫. ৬৪||
শক্তীনাং মণ্ডলং তেনে ক্রন্দনং ললিতাং প্রতি |
পূর্বানুক্রম তস্তত্র সংপ্রাপ্তং সুমহদ্ভয়ম্ || ৩. ২৫. ৬৫||
কর্ণাকর্ণিকয়াকর্ণ্য ললিতা কোপমাদধে |
এতস্মিন্নন্তরে ভণ্ডশ্চণ্ডদুর্মত্রিপণ্ডিতঃ || ৩. ২৫. ৬৬||
দশাক্ষৌহিণিকায়ুক্তং কুটিলাক্ষং মহৌজসম্ |
ললিতাসৈন্যনাশায় যুদ্ধায় প্রজিঘায় সঃ || ৩. ২৫. ৬৭||
যথা পশ্চাৎকলকলং শ্রুৎবাগ্রেবর্তিনী চমূঃ |
নাগচ্ছতি তথা চক্রে কুটিলাক্ষো মহারণম্ || ৩. ২৫. ৬৮||
এবং চোভয়তো যুদ্ধং পশ্চাদগ্রে তথাভবৎ |
অত্যন্ততুমুলং চাসীচ্ছক্তীনাং সৈনিকে মহৎ || ৩. ২৫. ৬৯||
নক্তসত্ত্বাশ্চ দৈত্যেন্দ্রাস্তিমিরেণ সমাবৃতাঃ |
ইতস্ততঃ শিথিলতাং কণ্টকে নিন্যুরুদ্ধতাঃ || ৩. ২৫. ৭০||
নিষঙ্গেণ দুরাশেন ধমনাদ্যৈশ্চমূবরৈঃ |
চমূভিশ্চ প্রণহিতা ন্যপতঞ্ছত্রুকোটয়ঃ || ৩. ২৫. ৭১||
তাভির্দৈত্যাস্ত্রমালাভিশ্চক্ররাজরথো বৃতঃ |
বকাবলীনিবিডতঃ শৈলরাজ ইবাবভৌ || ৩. ২৫. ৭২||
আক্রান্তপর্বণাধস্তাদ্বিষঙ্গেণ দুরাত্মনা |
মুক্ত একঃ শরোদেব্যাস্তালবৃন্তমচূর্ণয়ৎ || ৩. ২৫. ৭৩||
অথ তেনাব্যাহিতেন সংভ্রান্তে শক্তিমণ্ডলে |
কামেশ্বরীমুখা নিত্যা মহান্তং ক্রোধমায়য়ুঃ || ৩. ২৫. ৭৪||
ঈষদ্ভৃকুটিসংসক্তং শ্রীদেব্যা বদনাংবুজম্ |
অবলোক্য ভৃশোদ্বিগ্না নিত্যা দধুরতিশ্রমম্ || ৩. ২৫. ৭৫||
নিত্যা কালস্বরূপিণ্যঃ প্রত্যেকং তিথিবিগ্রহাঃ |
ক্রোধমুদ্বীক্ষ্য সম্নাজ্ঞ্যা যুদ্ধায় দধুরুদ্যমম্ || ৩. ২৫. ৭৬||
প্রণিপত্য চ তাং দেবীং মহারাজ্ঞীং মহোদয়াম্ |
ঊচুর্বাচমকাণ্ডোত্থাং যুদ্ধকৌতুকগদ্গদাম্ || ৩. ২৫. ৭৭||
তিথিনিত্যা উচুঃ |
দেবদেবী মহারাজ্ঞী তবাগ্রে ব্রেক্ষিতাং চমূম্ |
দণ্ডিনীমন্ত্রনাথাদিমহাশক্ত্যাভপালিতাম্ || ৩. ২৫. ৭৮||
ধর্ষিতু কাতরা দুষ্টা মায়াচ্ছদ্মপরায়ণাঃ |
পার্ষ্ণিগ্রাহেণ যুদ্ধেন বাধন্তে রথপুঙ্গবম্ || ৩. ২৫. ৭৯||
তস্মাত্তিমিরসংছন্নমূর্তীনাং বিবুধদ্রুহাম্ |
শময়ামো বয়ং দর্পং ক্ষণমাত্রং বিলোকয় || ৩. ২৫. ৮০||
যা বহ্নিবাসিনী নিত্যা যা জ্বালামালিনী পরা |
তাভ্যাং প্রদীপিতে যুদ্ধে দ্রষ্টুং শক্তাঃ সুরদ্বিষঃ || ৩. ২৫. ৮১||
প্রশময়্য মহাদর্পং পার্ষ্ণিগ্রাহপ্রবর্তিনাম্ |
সহসৈবাগমিষ্যামঃ সেবিতুং শ্রীপদাংবুজম্ |
আজ্ঞাং দেহি মহারাজ্ঞি মর্দনার্থং দুরাত্মনাম্ || ৩. ২৫. ৮২||
ইত্যুক্তে সতি নিত্যাভিস্তথাস্ত্বিতি জগাদ সা |
অথ কামেশ্বরী নিত্যা প্রণম্য ললিতেশ্বরীম্ |
তয়া সংপ্রেষিতা তাভিঃ কুণ্ডলীকৃত কার্মুকা || ৩. ২৫. ৮৩||
সা হন্তুং তান্দুরাচারান্কূটয়ুদ্ধকৃতক্ষণান্ |
বালারুণমিব ক্রোধারুণং বক্ত্রং বিতন্বতী || ৩. ২৫. ৮৪||
রে রে তিষ্ঠত পাপিষ্ঠা মায়ানিষ্ঠাশ্ছিনদ্মি বঃ |
অন্ধকারমনুপ্রাপ্য কূটয়ুদ্ধপরায়ণাঃ || ৩. ২৫. ৮৫||
ইতি তান্ভর্ত্সয়ন্তী সা তূণীরোৎখাতসায়কাৎ |
পর্বাবরোহণং চক্রে ক্রোধেন প্রস্খলদ্গতিঃ || ৩. ২৫. ৮৬||
সজ্জকার্মুকহস্তাশ্চ ভগমালাপুরঃসরাঃ |
অন্যাশ্চ চরিতা নিত্যাঃ কৃত পর্বাবরোহণাঃ || ৩. ২৫. ৮৭||
জ্বালামালিনি নিত্যা চ যা নিত্যা বহ্নিবাসিনী |
সজ্জে যুদ্ধে স্বতেজোভিঃ সমদীপয়তাং রণে || ৩. ২৫. ৮৮||
অথ তে দুষ্টদনুজাঃ প্রদীপ্তে যুদ্ধমণ্ডলে |
প্রকাশবপুষস্তত্র মরান্তং ক্রোধমায়য়ুঃ || ৩. ২৫. ৮৯||
কামেশ্বর্যাদিকা নিত্যাস্তাঃ পঞ্চদশ সায়ুধাঃ |
সসিংহনাদাস্তান্দৈত্যানমৃদ্নন্নেব হেলয়া || ৩. ২৫. ৯০||
মহাকলকলস্তত্র সমভূদ্যুদ্ধসীমনি |
মন্দরক্ষোভিতাংভোদিবেল্লৎকল্লোলমণ্ডলঃ || ৩. ২৫. ৯১||
তাশ্চ নিত্যাবলৎক্বাণকঙ্কণৈর্যুধি পাণিভিঃ |
আকৃষ্য প্রামকোদণ্ডাস্তেনিরে যুদ্ধমুদ্ধতম্ || ৩. ২৫. ৯২||
যামত্রিতয়পর্যন্তমেবং যুদ্ধমবর্ত্তত |
নিত্যানাং নিশিতৈর্বাণৈরক্ষৌহিণ্যশ্চ সংহৃতাঃ || ৩. ২৫. ৯৩||
জঘান দমনং দুষ্টং কামেশী প্রথমং শরৈঃ |
দীর্ঘজিহ্বং চমূনাথং ভগমালা ব্যদারৎ || ৩. ২৫. ৯৪||
নিত্যক্লিন্না চ ভেরুণ্ডা হুম্বেকং হুলুমল্লকম্ |
কক্লসং বহ্নিবাসা চ নিজঘান শরৈঃ শতৈঃ || ৩. ২৫. ৯৫||
মহাবজ্রেশ্বরী বাণৈরভিনৎকেকিবাহনম্ |
পুক্লসং শিবদূতী চ প্রাহিণোদ্যমসাদনম্ || ৩. ২৫. ৯৬||
পুণ্ড্রকেতুং ভুজোদ্দণ্ডং ৎবরিতা সমদারয়ৎ |
কুলসুন্দরিকা নিত্যা চণ্ডবাহুং চ কুক্কুরম্ || ৩. ২৫. ৯৭||
অথ নিলপতাকা চ বিজয়া চ জয়োদ্ধতে |
জংবুকাক্ষং জৃংভণং চ ব্যতন্বাতাং রণে বলিম্ |
সর্বমঙ্গলিকা নিত্যা তীক্ষ্ণশৃঙ্গমখণ্ডয়ৎ |
জ্বালামালিনিকা নিত্যা জঘানোগ্রং ত্রিকর্ণকম্ || ৩. ২৫. ৯৮||
চন্দ্রগুপ্তং চ দুঃশীলং চিত্রং চিত্রা ব্যদারৎ |
সেনানাথেষু সর্বেষু নিহতেষু দুরাত্মসু || ৩. ২৫. ৯৯||
বিষঙ্গঃ পরমঃ কুদ্ধশ্চচাল পুরতো বলী |
অথ যামাবশেষায়াং যামিন্যাং ঘটিকাদ্বয়ম্ || ৩. ২৫. ১০০||
নিত্যাভিঃ সহ সংগ্রামং বিধায় স দুরাশয়ঃ |
অশক্যৎবং সমুদ্দিশ্য চক্রাম প্রপলায়িতুম্ || ৩. ২৫. ১০১||
কামেশ্বরীকরাকৃষ্টচাপোত্থৌর্নিশিতৈঃ শরৈঃ |
ভিন্নবর্মা দৃঢতরং বিষঙ্গো বিহ্বলাশয়ঃ |
হতাবশিষ্টৈর্যোধৈশ্চ সার্ধমেব পলায়িতঃ || ৩. ২৫. ১০২||
তাভির্ন নিহতো দুষ্টো যস্মাদ্বধ্যঃ স দানবঃ |
দণ্ডনাথাশরেণৈব কালদণ্ডসমৎবিষা || ৩. ২৫. ১০৩||
তস্মিন্পলায়িতে দুষ্টে বিষঙ্গে ভণ্ডসোদরে |
সা বিভাতা চ রজনী প্রসন্নাশ্চাভবন্দিশঃ || ৩. ২৫. ১০৪||
পলায়িতং রণেবীরমনুসর্ত্তুমনৌচিতী |
ইতি তাঃ সমরান্নিত্যাস্তস্মিন্কালে ব্যরংসিষুঃ || ৩. ২৫. ১০৫||
দৈত্যশস্ত্রব্রণস্যন্দিশোণিতপ্লুতবিগ্রহাঃ |
নিত্যাঃ শ্রীললিতাং দেবীং প্রণিপেতুর্জয়োদ্ধতাঃ || ৩. ২৫. ১০৬||
ইত্থং রাত্রৌ মহদ্যুদ্ধং তত্র জাতং ভয়ঙ্করম্ |
নিত্যানাং রূপজালং চ শস্ত্রক্ষতমলোকয়ৎ || ৩. ২৫. ১০৭||
শ্রুৎবোদন্তং মহারাজ্ঞী কৃপাপাঙ্গেন সৈক্ষত |
তদালোকনমাত্রেণ ব্রণো নির্ব্রণতামগাৎ || ৩. ২৫. ১০৮||
নিত্যানাং বিক্রমৈশ্চাপি ললিতা প্রীতিমাসদৎ || ৩. ২৫. ১০৯||
ইতি শ্রীব্রহ্মাণ্ডমহাপুরাণে উত্তরভাগে হয়গ্রীবাগস্ত্যসংবাদে ললিতোপাখ্যানে বিষঙ্গপলায়নং নাম পঞ্চবিংশোঽধ্যায়

প্রথময়ুদ্ধদিবসঃ |
দশাক্ষৌহিণিকায়ুক্তঃ কুটিলাক্ষোঽপি বীর্যবান্ |
দণ্ডনাথাশরৈস্তীক্ষ্ণৈ রণে ভগ্নঃ পলায়িতঃ |
দশাক্ষৌহিণিকং সৈন্যং তয়া রাত্রৌ বিনাশিতম্ || ৩. ২৬. ১||
ইমং বৃত্তান্তমাকর্ণ্য ভণ্ডঃ ক্ষোভমথায়য়ৌ |
রাত্রৌ কপটসংগ্রামং দুষ্টানাং নির্জরদ্রুহাম্ |
মন্ত্রিণী দণ্ডনাথা চ শ্রুৎবা নির্বেদমাপতুঃ || ৩. ২৬. ২||
অহো বত মহৎকষ্টং দৈত্যৈর্দেব্যাঃ সমাগতম্ |
উত্তানবুদ্ধিভির্দূরমস্মাভিশ্চলিতং পুরঃ || ৩. ২৬. ৩||
মহাচক্ররথেন্দ্রস্য ন জাতং রক্ষণং বলৈঃ |
এতং ৎববসরং প্রাপ্য রাত্রৌ দুষ্টৈঃ পরাকৃতম্ || ৩. ২৬. ৪||
কো বৃত্তান্তোঽভবত্তত্র স্বামিন্যা কিং রণঃ কৃতঃ |
অন্যা বা শক্তয়স্তত্র চক্রুর্যুদ্ধং মহাসুরৈঃ || ৩. ২৬. ৫||
বিম্রষ্টব্যমিদং কার্যং প্রবৃত্তিস্তত্র কীদৃশী |
মহাদেব্যাশ্চ হৃদয়ে কঃ প্রসংগঃ প্রবর্ততে || ৩. ২৬. ৬||
ইতি শঙ্কাকুলাস্তত্র দণ্ডনাথাপুরোগমাঃ |
মন্ত্রিণীং পুরতঃ কৃৎবা প্রচেলুর্ললিতাং প্রতি || ৩. ২৬. ৭||
শক্তিচক্রচমূনাথাঃ সর্বাস্তাঃ পূজিতা দ্রুতম্ |
ব্যতীতায়াং বিভাবর্যাং রথেন্দ্রং পর্যবারয়ন্ || ৩. ২৬. ৮||
অবরুহ্য স্বয়ানাভ্যাং মন্ত্রিণীদণ্ডনায়িকে |
অধস্তাৎসৈন্যমাবেশ্য তদারুরুহতূ রথম্ || ৩. ২৬. ৯||
ক্রমেণ নব পর্বাণি ব্যতীত্য ৎবরিতক্রমৈঃ |
তত্তৎসর্বগতৈঃ শক্তিচক্রৈঃ সম্যঙ্ নিবেদিতৈঃ || ৩. ২৬. ১০||
অভজেতাং মহারাজ্ঞীং মন্ত্রিণীদণ্ডনায়িকে |
তে ব্যজিজ্ঞপতাং দেব্যা অষ্টাঙ্গস্পৃষ্টভূতলে || ৩. ২৬. ১১||
মহাপ্রমাদঃ সমভূদিতি নঃ শ্রুতমংবিকে |
কূটয়ুদ্ধপ্রকারেণ দৈত্যৈরপকৃতং খলৈঃ || ৩. ২৬. ১২||
স দুরাত্মা দুরাচারঃ প্রকাশসমারাত্ত্রসন্ |
কুহকব্যবহারেণ জয়সিদ্ধিং তু কাক্ষতি || ৩. ২৬. ১৩||
দৈবান্নঃ স্বামিনীগাত্রে দুষ্টানামমরদ্রুহাম্ |
শরাদিকপরামর্শো ন জাতস্তেন জীবতি || ৩. ২৬. ১৪||
একাবলংবনং কৃৎবা মহারাজ্ঞি ভবৎপদম্ |
বয়ং সর্বা হি জীবামঃ সাধয়ামঃ সমীহিতম্ || ৩. ২৬. ১৫||
অতোঽস্মাভিঃ প্রকর্তব্যং শ্রীমত্যঙ্গস্য রক্ষণম্ |
মায়াবিনশ্চ দৈত্যেন্দ্রাস্তত্র মন্ত্রো বিধীয়তাম্ || ৩. ২৬. ১৬||
আপৎকালেষু জেতব্যা ভণ্ডাদ্যা দানবাধমাঃ |
কূটয়ুদ্ধং ন কুর্বন্তি ন বিশন্তি চমূমিমাম্ || ৩. ২৬. ১৭||
তথা মহেন্দ্রশৈলস্য কার্যং দক্ষিণদেশতঃ |
শিবিরং বহুবিস্তারং যোজনানাং শতাবধি || ৩. ২৬. ১৮||
বহ্লিপ্রাকারবলয়ং রক্ষণার্থং বিধীয়তাম্ |
অস্মৎসেনানিবেশস্য দ্বিষাং দর্পশমায় চ || ৩. ২৬. ১৯||
শতয়োজনমাত্রস্তু মধ্যতেশঃ প্রকল্প্যতাম্ |
বহ্নিপ্রাকারাচক্রস্য দ্বারন্দক্ষিণতো ভবেৎ || ৩. ২৬. ২০||
যতো দক্ষিণদেশস্থং শূন্যকং বিদ্বিষাং পুরম্ |
দ্বারে চ বহবঃ কল্প্যাঃ পরিবারা উদায়ুধাঃ || ৩. ২৬. ২১||
নির্গচ্ছতাং প্রবিশতাং জনানামুপরোধকাঃ |
অনালস্যা অনিদ্রাশ্চ বিধেয়াঃ সততোদ্যতাঃ || ৩. ২৬. ২২||
এবং চ সতি দুষ্টানাং কূটয়ুদ্ধং চিকীর্ষিতম্ |
অবেলাসু চ সংধ্যাসু মধ্যরাত্রিষু চ দ্বিষাম্ |
অশক্যমেব ভবতি প্রৌঢমাক্রমণং হঠাৎ || ৩. ২৬. ২৩||
নো চেদ্দুরাশয়া দৈত্যা বহুমায়াপরিগ্রহাঃ |
পশ্যতোহরবৎসর্বং বিলুঠন্তি মহদ্বলম্ || ৩. ২৬. ২৪||
মন্ত্রিণ্যা দণ্ডনাথায়া ইতি শ্রুৎবা বচস্তদা |
শুচিদন্তরুচা মুক্তা বহন্তী ললিতাব্রবীৎ || ৩. ২৬. ২৫||
ভবতীনাময়ং মন্ত্রশ্চারুবুদ্ধ্যা বিচারিতঃ |
অয়ং কুশলধীমার্গোনীতিরেষা সনাতনী || ৩. ২৬. ২৬||
স্বচক্রস্য পুরো রক্ষাং বিধায় দৃঢসাধনৈঃ |
পরচক্রাক্রমঃ কার্যো জিগীষদ্ভির্মহাজনৈঃ || ৩. ২৬. ২৭||
ইত্যুক্ত্বা মন্ত্রিণীদণ্ডনাথে সা ললিতেশ্বরী |
জ্বালামালিনিকাং নিত্যামাহূয়েদমুবাচ হ || ৩. ২৬. ২৮||
বৎসে ৎবং বহ্নিরূপাসি জ্বালামালাময়াকৃতিঃ |
ৎবয়া বিধীয়তাং রক্ষা বলস্যাস্য মহীয়সঃ || ৩. ২৬. ২৯||
শতয়োজনবিস্তারং পরিবৃত্য মহীতলম্ |
ত্রিংশদ্যোজনমুন্নদ্ধং জ্বালাকারৎবমাব্রজ || ৩. ২৬. ৩০||
দ্বারয়োজনমাত্রং তু মুক্ত্বান্যত্র জ্বলত্তনুঃ |
বহ্নিজ্বালাৎবমাপন্না সংরক্ষ সকলং বলম্ || ৩. ২৬. ৩১||
ইত্যুক্ত্বা মন্ত্রিণীদণ্ডনাথে সা ললিতেশ্বরী |
মহেন্দ্রোত্তরভূভাগং চলিতুং চক্র উদ্যমম্ || ৩. ২৬. ৩২||
সা চ নিত্যানিত্যময়ী জ্বলজ্জ্বা লাময়াকৃতিঃ |
চতুর্দশীতিথিময়ী তথেতি প্রণনাম তাম্ || ৩. ২৬. ৩৩||
তয়ৈব পূর্বনির্দিষ্টং মহেন্দ্রোত্তরভূতলম্ |
কুণ্ডলীকৃত্য জজ্বালশালরূপেণ সা পুনঃ || ৩. ২৬. ৩৪||
নভোবলয়জংবালজ্বালামালাময়াকৃতিঃ |
বভাসে দণ্ডনাথায়া মন্ত্রিনাথচমূরপি || ৩. ২৬. ৩৫||
অন্যা সামপি শক্তীনাং মহতীনাং মহদ্বলম্ |
বিশঙ্কটোদরং সালং প্রবিবেশ গতক্লমা || ৩. ২৬. ৩৬||
রাজচক্ররথেন্দ্রং তু মধ্যে সংস্থাপ্য দণ্ডিনী |
বামপক্ষে রথং স্বীয়ং দক্ষিণে শ্যামলারথম্ || ৩. ২৬. ৩৭||
পশ্চাদ্ভাগে সম্পদেশীং পুরস্তাশ্চ হয়াসনাম্ |
এবং সংবেশ্য পরিতশ্চক্ররাজরথস্য চ || ৩. ২৬. ৩৮||
দ্বারে নিবেশয়ামাস বিংশত্যক্ষৌহিণীয়ুতাম্ |
জ্বলদ্দণ্ডায়ুধোদগ্রাং স্তম্ভিনীং নাম দেবতাম্ || ৩. ২৬. ৩৯||
যা দেবী দণ্ডনাথায়া বিঘ্নদেবীতি বিশ্রুতা |
এবং সুরক্ষিতং কৃৎবা শিবিরং যোত্রিণী তথা |
পূষণ্যুদিতভূয়িষ্ঠে পুনর্যুদ্ধমুপাশ্রয়ৎ || ৩. ২৬. ৪০||
কৃৎবা কিলকিলারাবং ততঃ শক্তিমহাচমূঃ |
অগ্নিপ্রাকারকদ্বারান্নির্জগাম্ মহারবা || ৩. ২৬. ৪১||
ইত্থং সুরক্ষিতং শ্রুৎবা ললিতাশিবিরোদরম্ |
ভূয়ঃ সংজ্বরমাপন্নঃ প্রচণ্ডো ভণ্ডদানবঃ || ৩. ২৬. ৪২||
মন্ত্রয়িৎবা পুনস্তত্র কুটিলাক্ষপুরোগমৈঃ |
বিষঙ্গেণ বিশুক্রেণাসমমাত্মসুতৈরপি || ৩. ২৬. ৪৩||
একৌঘস্য প্রসারেণ যুদ্ধং কর্তুং মহাবলঃ |
চতুর্বাহুমুখান্পুত্রাংশ্চতুর্জলধিসন্নিভান্ || ৩. ২৬. ৪৪||
চতুরান্যুদ্ধকৃত্যেষু সমাহূয় স দানবঃ |
প্রেষয়ামাস যুদ্ধায় ভণ্ডশ্চণ্ডক্রুধা জ্বলন্ || ৩. ২৬. ৪৫||
ত্রিংশৎসংখ্যাশ্চ তৎপুত্রা মহাকায়া মহাবলাঃ |
তেষাং নামানি বক্ষ্যামি সমাকর্ণয় কুম্ভজ || ৩. ২৬. ৪৬||
চতুর্বাহুশ্চকোরাক্ষস্তৃতীয়স্তু চতুঃ শিরাঃ |
বজ্রঘোষশ্চোর্ধ্বকেশো মহাকায়ো মহাহনুঃ || ৩. ২৬. ৪৭||
মখশত্রুর্মখস্কন্দীসিংহঘোষঃ সিরালকঃ |
লডুনঃ পট্টসেনশ্চ পুরাজিৎপূর্বমারকঃ || ৩. ২৬. ৪৮||
স্বর্গশত্রুঃ স্বর্গবলো দুর্গাখ্যঃ স্বর্গকণ্টকঃ |
অতিমায়ো বৃহন্মায় উপমায়শ্চ বীর্যবান্ || ৩. ২৬. ৪৯||
ইত্যেতে দুর্মদাঃ পুত্রা ভণ্ডদৈত্যস্য দুর্দ্ধিয়ঃ |
পিতুঃ সদৃশদোর্বীর্যাঃ পিতুঃ সদৃশবিগ্রহাঃ || ৩. ২৬. ৫০||
আগত্য ভণ্ডচরণাবভ্যবন্দত ভক্তিতঃ |
তানুদ্বীক্ষ্য প্রসন্নাভ্যাং লোচনাভ্যাং স দানবঃ |
সগৌরবমিদং বাক্যং বভাষে কুলঘাতকঃ || ৩. ২৬. ৫১||
ভো ভো মদীয়াস্তনয়া ভবতাং কঃ সমো ভুবি |
ভবতামেব সত্যেন জিতং বিশ্বং ময়া পুরা || ৩. ২৬. ৫২||
শক্রস্যা গ্নের্যমস্যাপি নিরৃতেঃ পাশিনস্তথা |
কচেষু কর্ষণং কোপাৎকৃতং যুষ্মাভিরাহবে || ৩. ২৬. ৫৩||
অস্ত্রাণ্যপি চ শস্ত্রাণি জানীথ নিখিলান্যপি |
জাগ্রৎস্বেব হী যুষ্মাসু কুলভ্রংশোঽযমাগতঃ || ৩. ২৬. ৫৪||
মায়াবিনী দুললিতা কাচিৎস্ত্রী যুদ্ধদুর্মদা |
বহুভিঃ স্বসমানাভিঃ স্ত্রীভির্যুক্তা হিনস্তি নঃ || ৩. ২৬. ৫৫||
তদেনাং সমরেঽবশ্যমাত্মবশ্যাং বিধাস্যথ |
জীবগ্রাহং চ সা গ্রাহ্যা ভবদ্ভির্জ্বলদায়ুধৈঃ || ৩. ২৬. ৫৬||
অপ্রমেয়প্রকোপান্ধান্যুষ্মানেকাং স্ত্রিয়ং প্রতি |
সম্প্রেষণমনৌচিত্যং তথাপ্যেষ বিধেঃ ক্রমঃ || ৩. ২৬. ৫৭||
ইমমেকং সহধ্বং চ শৌর্যকীতিবিপর্যয়ম্ |
ইত্যুক্ত্বা ভণ্ডদৈত্যেন্দ্রস্তান্প্রহৈষীদ্রণং প্রতি |
দ্বিশতং চাক্ষৌহিণীনাং তৎসহায়তয়াহিনোৎ || ৩. ২৬. ৫৮||
দ্বিশত্যক্ষৌহিণীসেনা মুখ্যস্য তিলকায়িতা |
বদ্ধভ্রুকুটয়ঃ শস্ত্রপাণয়ো নির্যয়ুর্গৃহাৎ || ৩. ২৬. ৫৯||
নির্গমে ভণ্ডপুত্রাণাং ভূঃ প্রকম্পমলম্বত |
উৎপাতা বিবিধা জাতা বিত্রস্তং চাভবজ্জগৎ || ৩. ২৬. ৬০||
তান্কুমারান্মহাসত্ত্বাংল্লাজবর্ষৈরবাকিরন্ |
বিথীষু যানৈশ্চলিতান্পৌরবৃদ্ধপুরন্ধ্রয়ঃ || ৩. ২৬. ৬১||
বন্দিনো মাগধাশ্চৈব কুমারাণাং স্তুতিং ব্যধুঃ |
মঙ্গলারার্তিকং চক্রুর্দ্বারেদ্বারে পুরাঙ্গনাঃ || ৩. ২৬. ৬২||
ভিদ্যমানেব বসুধা কৃষ্যমাণমিবাবরম্ |
আসীত্তেষাং বিনির্যাণে ঘূর্ণমান ইবার্ণবঃ || ৩. ২৬. ৬৩||
দ্বিশত্যক্ষৌহিণীসেনাং গৃহীৎবা ভণ্ডসূনবঃ |
ক্রোধোদ্যদ্ভ্রুকুটীক্রূরবদনা নির্যয়ুঃ পুরাৎ || ৩. ২৬. ৬৪||
শক্তিসৈন্যানি সর্বাণি ভক্ষয়ামঃ ক্ষণাদ্রণে |
তেষামায়ুধচক্রাণি চূর্ণয়ামঃ শিতৈশরৈঃ || ৩. ২৬. ৬৫||
অগ্নিপ্রাকারবলয়ং শময়ামশ্চ রংহসা |
দুর্বিদগ্ধাং তাং ললিতাং বন্দীকুর্মশ্চ সর্বরম্ || ৩. ২৬. ৬৬||
ইত্যন্যোন্যং প্রবল্গন্তো বীরভাষণঘোষণৈঃ |
আসেদুরগ্নিপ্রাকারসমীপং ভণ্ডসূনবঃ || ৩. ২৬. ৬৭||
যৌবনেন মদেনান্ধা ভূয়সা রুদ্ধদৃষ্টয়ঃ |
ভ্রুকুটীকুটিলাশ্চক্রুঃ সিংহনাদংমহাত্তরম্ || ৩. ২৬. ৬৮||
বিদীর্ণমিব তেনাসীদ্ব্রহ্মাণ্ড চণ্ডিমস্পৃশা |
উৎপাতবারিদোৎসৃষ্টঘোরনির্ঘাতরংহসা || ৩. ২৬. ৬৯||
এতস্যাননুভূতস্য মহাশব্দস্য ডম্বরঃ |
ক্ষোভয়ামাস শক্তীনাং শ্রবাংসি চ মনাংসি চ || ৩. ২৬. ৭০||
আগত্য তে কলকলং চক্রুঃসার্ধং স্বসৈনিকৈঃ |
বিবিধায়ুধসম্পাতমূর্চ্ছদ্বৈমানিকচ্ছটম্ || ৩. ২৬. ৭১||
চতুর্বাহুমখান্ভূৎবা ভণ্ডদৈত্যকুমারকান্ |
আগতান্যুদ্ধকৃত্যায় বালা কৌতূহলং দধে || ৩. ২৬. ৭২||
কুমারী ললিতাদেব্যাস্তস্যা নিকটবাসিনী |
সমস্তশক্তিচক্রাণাং পূজ্য বিক্রমশালিনী || ৩. ২৬. ৭৩||
ললিতাসদৃশাকারা কুমারী কোপমাদধে |
যা সদা নববর্ষেব সর্ববিদ্যামহাখনিঃ || ৩. ২৬. ৭৪||
বালারুণতনুঃ শ্রোণীশোণবর্ণবপুর্লতা |
মহারাজ্ঞী পাদপীঠে নিত্যমাহিতসংনিধিঃ || ৩. ২৬. ৭৫||
তস্যা বহিশ্চরাঃ প্রাণা যা চতুর্থং বিলোচনম্ |
তানাগতান্ভণ্ডসুতান্সংহরিষ্যামি সৎবরম্ || ৩. ২৬. ৭৬||
ইতি নিশ্চিত্য বালাংবা মহারাজ্ঞ্যৈ ব্যজিজ্ঞপৎ |
মাতর্ভণ্ডমহাদৈত্যসূনবো যোদ্ধুমাগতাঃ || ৩. ২৬. ৭৭||
তৈঃ সমং যোদ্ধুমিচ্ছামি কুমারিৎবাৎসকৌতুকা |
সফুরন্তাবিব মে বাহূ যুদ্ধকণ্ডূয়য়ানয়া || ৩. ২৬. ৭৮||
ক্রীডা মমৈষা হন্তব্যা ন ভবত্যা নিবারণৈঃ |
অহং হি বালিকা নিত্যং ক্রীডনেষ্বনুরাগিণী || ৩. ২৬. ৭৯||
ক্ষণং রণক্রীডয়া চ প্রীতিং যাস্যামি চৈতসা |
ইতি বিজ্ঞাপিতা দেবী প্রত্যুবাচ কুমারিকাম্ || ৩. ২৬. ৮০||
বৎসে ৎবমতিমৃদ্বঙ্গী নববর্ষা নবক্রমা |
নবীনয়ুদ্ধশিক্ষা চ কুমারী ৎবং মমৈকিকা || ৩. ২৬. ৮১||
ৎবাং বিনা ক্ষণমাত্রং মে ন নিশ্বাসঃ প্রবর্ততে |
মমোচ্ছ্বসিতমেবাসি ন ৎবং যাহি মহাহবম্ || ৩. ২৬. ৮২||
দণ্ডিনী মন্ত্রিণী চৈব শক্তয়োঽন্যাশ্চ কোটিশঃ |
সংত্যেব সমরে কর্তুং বৎসে ৎবং কিং প্রমাদ্যসি || ৩. ২৬. ৮৩||
ইতি শ্রীললিতাদেব্যা নিরুদ্ধাপি কুমারিকা |
কৌমারকৌতুকাবিষ্টা পুনর্যুদ্ধময়াচত || ৩. ২৬. ৮৪||
সুদৃঢং নিশ্চয়ং দৃষ্ট্বা তস্যাঃ শ্রীললিতাংবিকা |
অনুজ্ঞাং কৃতবত্যেব গাঢমাশ্লিষ্য বাহুভিঃ || ৩. ২৬. ৮৫||
স্বকীয়কবচাদেকমাচ্ছিদ্য কবচং দদৌ |
স্বায়ুধেভ্যশ্চায়ুধানি বিতীর্যবিসসর্জ তাম্ || ৩. ২৬. ৮৬||
কর্ণীরথং মহারাজ্ঞ্যা চাপদণ্ডাৎসমুদ্ধৃতম্ |
হংসয়ুগ্যশতৈর্যুক্তমারুরোহ কুমারিকা || ৩. ২৬. ৮৭||
তস্যাং রণে প্রবৃত্তায়াং সর্বপর্বস্থদেবতাঃ |
বদ্ধাঞ্জলিপুটা নেমুঃ প্রধৃতাসিপরংপরাঃ || ৩. ২৬. ৮৮||
তাভিঃ প্রণম্যমানা সা চক্ররাজরথোত্তমাৎ |
অবরুহ্য তলে সৈন্যং বর্তমানমগাহত || ৩. ২৬. ৮৯||
তামায়ান্তীমথো দৃষ্ট্বা কুমারীং কোপপাটলাম্ |
মন্ত্রিণীদণ্ডনাথে চ সভয়ে বাচমূচতুঃ || ৩. ২৬. ৯০||
কিং ভর্তৃদারিকে যুদ্ধে ব্যবসায়ঃ কৃতস্ত্বয়া |
অকাণ্ডে কিং মহারাজ্ঞ্যা প্রেষিতাসি রণং প্রতি || ৩. ২৬. ৯১||
তদেতদুচিতংনৈব বর্তমানেঽপি সৈনিকে |
ৎবং মূর্তং জীবিতমসি শ্রীদেব্যা বালিকে যতঃ || ৩. ২৬. ৯২||
নিবর্তস্ব রণোৎসাহাৎপ্রণামস্তে বিধীয়তে |
ইতি তাভ্যাং প্রার্থিতাপি প্রাচলদ্দৃঢনিশ্চয়া || ৩. ২৬. ৯৩||
অত্যন্তং বিস্ময়াবিষ্টে মন্ত্রিণীদণ্ডনায়িকে |
সহৈব তস্যা রক্ষার্থং চেলতুঃ পার্শ্বয়োর্দ্বয়োঃ || ৩. ২৬. ৯৪||
অথাগ্নিবরণদ্বারা তাভ্যামনুগতা সতী |
প্রভূতসেনায়ুক্তাভ্যাং নির্জগাম কুমারিকা || ৩. ২৬. ৯৫||
সনাথশক্তিসেনানাং সর্বাসামনুগৃহ্ণতী |
প্রণামাঞ্জলিজালানি কর্ণীরথকৃতাসনা || ৩. ২৬. ৯৬||
ভণ্ডস্য তনয়ান্দুষ্টানভ্যদ্রবদরিন্দমা |
তস্যাঃ প্রাদেশিকং সৈন্যং কুমার্যা ন হি বিদ্যতে || ৩. ২৬. ৯৭||
সর্বং হি ললিতাসৈন্যং তৎসৈন্যং সমজায়ত |
ততঃ প্রববৃতে যুদ্ধমত্যুদ্ধতাপরাক্রমম্ || ৩. ২৬. ৯৮||
ববর্ষ শরজালানি দৈত্যেন্দ্রেষু কুমারিকা |
ভণ্ডাসুরকুমারৈস্তৈর্মহারাজ্ঞীকুমারিকা |
যদ্যুদ্ধমতনোত্তত্তু স্পৃহণীয়ং সুরাসুরৈঃ || ৩. ২৬. ৯৯||
অত্যন্তবিস্মিতা দৈত্যকুমারা নববর্ষিণীম্ |
কর্মীরথস্থামালোক্য কিরন্তীংশরমণ্ডলম্ || ৩. ২৬. ১০০||
ক্ষণেক্ষণে বালিকয়া ক্রিয়মাণং মহারণম্ |
ব্যজিজ্ঞপন্মহারাজ্ঞ্যৈ ভ্রমন্ত্যঃ পরিচারিকাঃ || ৩. ২৬. ১০১||
মন্ত্রিণীদণ্ডনাথে চ ন তাং বিজহতূ রণে |
প্রেক্ষকৎব মনুপ্রাপ্তে তৃষ্ণীমেব বভূবতুঃ || ৩. ২৬. ১০২||
সর্বেষাং দৈত্যপুত্রাণামেকরূপা কুমারিকা |
প্রত্যেকভিন্না দদৃশে বিংবমালেব ভাস্বতঃ || ৩. ২৬. ১০৩||
সায়কৈরগ্নিচূডালৈস্তেষাং মর্মাণি ভিন্দতী |
রক্তোৎপলমিব ক্রোধসংরক্তং বিভ্রতী মুখম্ || ৩. ২৬. ১০৪||
আশ্চর্যং ব্রুবতো ব্যোম্নি পশ্যতাং ত্রিদিবৌকসাম্ |
সাধুবাদৈর্বহুবিধৈর্মত্রিণীদণ্ডনাথয়োঃ || ৩. ২৬. ১০৫||
অর্চ্যমানা রণং চক্রে লঘুহস্তা কুমারিকা |
দ্বিতীয়ং যুদ্ধদিবসং সমস্তমপি সা রণে || ৩. ২৬. ১০৬||
প্রকাশয়ামাস বলং ললিতাদুহিতা নিজম্ |
অস্ত্রপ্রত্যস্ত্রমোক্ষেণ তান্সর্বানপি ভিন্দতী || ৩. ২৬. ১০৭||
নারায়ণাস্ত্রমোক্ষেণ মহরাজ্ঞীকুমারিকা |
দ্বিশত্যক্ষৌহিণীসৈন্যং ভস্মসাদকরোৎক্ষণাৎ || ৩. ২৬. ১০৮||
অক্ষৌহিণীনাং ক্ষয়তঃ ক্ষণাৎকোপমুপাগতাঃ |
আকৃষ্টগুরুধন্বানস্তেঽপতন্নেকহেলয়া || ৩. ২৬. ১০৯||
ততঃ কলকলে জাতে শক্তীনাং চ দিবৌকসাম্ |
যুগপত্ত্রিংশতো বাণানসৃজৎসা কুমারিকা || ৩. ২৬. ১১০||
হস্তলাঘবমাশ্রিত্য মুক্তৈশ্চন্দ্রার্ধসায়কৈঃ |
ত্রিংশতা ত্রিংশতো ভণ্ডপুত্রাণা সাহতং শিরঃ || ৩. ২৬. ১১১||
ইতি ভণ্ডস্য পুত্রেষু প্রাপ্তেষু যমসাদনম্ |
অত্যন্তবিস্ময়াবিষ্টা ববৃষুঃ পুষ্পমভ্রগাঃ || ৩. ২৬. ১১২||
সা চ পুত্রী মহারাজ্ঞ্যাঃ বিধ্বস্তাসুরমৈনিকা |
মন্ত্রিণীদণ্ডনাথাভ্যামালিঙ্গ্যত ভৃশং মুদা || ৩. ২৬. ১১৩||
তস্যাঃ পরাক্রমোন্মেষৈর্নৃত্যন্ত্যোজয়দায়িভিঃ |
শক্তয়স্তুমুলং চক্রুঃ সাধুবাদৈর্জগত্ত্রয়ম্ || ৩. ২৬. ১১৪||
সর্বাশ্চ শক্তিসেনান্যো দণ্ডনাথাপুরঃসরাঃ |
তদাশ্চর্যং মহারাজ্ঞ্যৈ নিবেদয়িতুমুদ্গতাঃ || ৩. ২৬. ১১৫||
তাভির্নিবেদ্যমানানি সা দেবী ললিতাংবিকা |
পুত্রীভুজাবদানানি শ্রুৎবা প্রীতিং সমায়য়ৌ || ৩. ২৬. ১১৬||
সমস্তমপি তচ্চক্রং শক্তীনাং তৎপরাক্রমৈঃ |
অদৃষ্টপূর্বৈর্দেবেষু বিস্ময়স্য বশং গতম্ || ৩. ২৬. ১১৭||
ইতি শ্রীব্রহ্মাণ্ডে মহাপুরাণে উত্তরভাগে হয়গ্রীবাগস্ত্যসংবাদে ললিতোপাখ্যানে ভণ্ডপুত্রবধো নাম ষড্বিংশোঽধ্যায়ঃ

অথ নষ্টেষু পুত্রেষু শোকানলপরিপ্লুতঃ |
বিললাপ স দৈত্যেন্দ্রো মৎবা জাতং কুলক্ষয়ম্ || ৩. ২৭. ১||
হা পুত্রা হা গুণোদারা হা মদেকপরায়ণাঃ |
হা মন্নেত্রসুধাপূরা হা মৎকুলবিবর্ধনাঃ || ৩. ২৭. ২||
হা সমস্তসুরশ্রেষ্ঠমদভঞ্জনতৎপরাঃ |
হা সমস্তসুরস্ত্রীণামন্তর্মোহনমন্মথাঃ || ৩. ২৭. ৩||
দিশত প্রীতিবাচং মে মমাঙ্কে বল্গতাধুনা |
কিমিদানীমিমং তাতমবমুচ্য সুখং গতাঃ || ৩. ২৭. ৪||
যুষ্মান্বিনা ন শোভন্তে মম রাজ্যানি পুত্রকাঃ |
রিক্তানি মম গেহানি রিক্তা রাজসভাপি মে || ৩. ২৭. ৫||
কথমেবং বিনিঃশেষং হতায়ূয়ং দুরাশয়াঃ |
অপ্রধৃষ্যভুজাসত্ত্বান্ভবতো মৎকুলাঙ্কুরান্ |
কথমেকপদে দুষ্টা বনিতা সংগরেঽবধীৎ || ৩. ২৭. ৬||
মম নষ্টানি সৌখ্যানি মম নষ্টাঃ কুলস্ত্রিয়ঃ |
ইতঃ পরং কুলে ক্ষীণে সাহসানি সুখানি চ || ৩. ২৭. ৭||
ভবতঃ সুকৃতৈর্লব্ধ্বা মম পূর্বজনুঃকৃতৈঃ |
নাশোঽযং ভবতামদ্য জাতো নষ্টস্ততোঽস্ম্যহম্ || ৩. ২৭. ৮||
হা হতোঽস্মি বিপন্নোঽস্মি মন্দভাগ্যোঽস্মি পুত্রকাঃ |
ইতি শোকাৎস পর্যস্যন্প্রলপন্মুক্তমূর্ধজঃ |
মূর্চ্ছয়া লুপ্তহৃদয়ো নিষ্পপাত নুপাসনাৎ || ৩. ২৭. ৯||
বিশুক্রশ্চ বিষঙ্গশ্চ কুটিলাক্ষশ্চ সংসদি |
ভণ্ডমাশ্বাসয়ামাসুর্দৈবস্য কুটিলক্রমৈঃ || ৩. ২৭. ১০||
বিশুক্র উবাচ
দেবকি প্রাকৃত ইব প্রাপ্তঃ শোকস্য বশ্যতাম্ |
লপসি ৎবে প্রতি সুতান্প্রাপ্তমৃত্যূন্মহাহবে || ৩. ২৭. ১১||
ধর্মবান্বিহিতঃ পন্থা বীরাণামেষ শাশ্বতঃ |
অশোচ্যমাহবে মৃত্যুং প্রাপ্নুবন্তি যদর্হিতম্ || ৩. ২৭. ১২||
এতদেব বিনাশায় শল্যবদ্বাধতে মনঃ |
যৎস্ত্রী সমাগত্য হঠান্নি হন্তি সুভটান্রণে || ৩. ২৭. ১৩||
ইত্যুক্তে তেন দৈত্যেন পুত্রশোকো ব্যমুচ্যত |
ভণ্ডেন চণ্ডকালাগ্নিসদৃশঃ ক্রোধ আদধে || ৩. ২৭. ১৪||
স কোশাৎক্ষিপ্রমুদ্ধৃত্য খড্গমুগ্রং যমোপমম্ |
বিস্ফারিতাক্ষিয়ুগলো ভৃশং জজ্বাল তেজসা || ৩. ২৭. ১৫||
ইদানীমেব তাং দুষ্টাং খড্গেনানেন খণ্ডশঃ |
শকলীকৃত্য সমরে শ্রমং প্রাপ্স্যামি বন্ধুভিঃ || ৩. ২৭. ১৬||
ইতি রোষস্খলদ্বর্ণঃ শ্বসন্নিব ভুজঙ্গমঃ |
খড্গং বিধুন্বন্নুত্থায় প্রচচালা তিমত্তবৎ || ৩. ২৭. ১৭||
তং নিরুধ্য চ সংভ্রান্তাঃ সর্বে দানবপুঙ্গবাঃ |
বাচমূচুরতিক্রোধাজ্জ্বলন্তো ললিতাং প্রতি || ৩. ২৭. ১৮||
ন তদর্থে ৎবয়া কার্যঃ স্বামিন্সংভ্রম ঈদৃশঃ |
অস্মাভিঃ স্ববলৈর্যুক্তৈ রণোৎসাহো বিধীয়তে || ৩. ২৭. ১৯||
ভবদাজ্ঞালবং প্রাপ্য সমস্তভুবনং হঠাৎ |
বিমর্দ্দয়িতুমীশাঃ স্মঃ কিমু তাং মুগ্ধভামিনীম্ || ৩. ২৭. ২০||
কিং চূষয়ামঃ সপ্তাব্ধীন্ক্ষোদয়ামোঽথ বা গিরীন্ |
অধরোত্তরমেবৈতত্ত্রৈলোক্যং করবাম বা || ৩. ২৭. ২১||
ছিনদাম সুরান্সর্বান্ভিনদাম তদালয়ান্ |
পিন্ষাম হরিৎপালানাজ্ঞাং দেহি মহামতে || ৩. ২৭. ২২||
ইত্যুদীরিত মাকর্ণ্য মহাহঙ্কারগর্বিতম্ |
উবাচ বচনং ক্রুদ্ধঃ প্রতিঘারুণলোচনঃ || ৩. ২৭. ২৩||
বিশুক্র ভবতা গৎবা মায়ান্তার্হিতবর্ষ্মণা |
জয়বিঘ্নং মহায়ন্ত্রং কর্ত্তব্যং কটকে দ্বিষাম্ || ৩. ২৭. ২৪||
ইতি তস্য বচঃ শ্রুৎবা বিশুক্রো রোষরূষিতঃ |
মায়াতিরোহিতবপুর্জগাম ললিতাবলম্ || ৩. ২৭. ২৫||
তস্মিন্প্রয়াতুমুদ্যুক্তে সুর্যোঽস্তং সমুপাগতঃ |
পর্যস্তকিরণস্তোমপাটলীকৃতদিঙ্মুখঃ || ৩. ২৭. ২৬||
অনুরাগবতী সংধ্যা প্রয়ান্তং ভানুমালিনম্ |
অনুবব্রাজ পাতালকুঞ্জে রন্তুমিবোৎসুকা || ৩. ২৭. ২৭||
বেগাৎপ্রপততো ভানোর্দেহসংগাৎসমুত্থিতাঃ |
চরমাব্ধেরিব পয়ঃকণাস্তারা বিরেজিরে || ৩. ২৭. ২৮||
অথাসসাদ বহুলং তমঃ কজ্জলমেচকম্ |
সার্থং কর্ত্তুমিবোদ্যুক্তং সবর্ণস্যাসিদুর্ধিয়া || ৩. ২৭. ২৯||
মায়ারথং সমারূঢো গূঢশর্বরসংবৃতঃ |
অদৃশ্যবপুরাপেদে ললিতাকটকং খলঃ || ৩. ২৭. ৩০||
তত্র গৎবা জ্বলজ্জ্বালং বহ্নিপ্রাকারমণ্ডলম্ |
শতয়োজনবিস্তারামালোকয়ৎ দুর্মতিঃ || ৩. ২৭. ৩১||
পরিতো বিভ্রমঞ্শালমবকাশমবাপ্নুবন্ |
দক্ষিণং দ্বারমাসাদ্য নিদধ্যৌ ক্ষণমুদ্ধতঃ || ৩. ২৭. ৩২||
তত্রাপশ্যন্মহাসত্ত্বাস্সাবধানা ধৃতায়ুধাঃ |
আরূঢয়ানাঃ সনদ্ধবর্মাণো দ্বারদেশতঃ || ৩. ২৭. ৩৩||
স্তংভিনীপ্রমুখাঃ শক্তীর্বিশত্যক্ষৌহিণীয়ুতাঃ |
সর্বদা দ্বাররক্ষার্থং নির্দিষ্টা দণ্ডনাথয়া || ৩. ২৭. ৩৪||
বিলোক্য বিস্ময়াবিষ্টো বিচার্য চ চিরং তদা |
শালস্য বহিরেবাসৌ স্থিৎবা যন্ত্রং সমাতনোৎ || ৩. ২৭. ৩৫||
গব্যূতিমাত্রকায়ামে তৎসমানপ্রবিস্তরে |
শিলাপট্টে সুমহতি প্রালিখদ্যন্ত্রমুত্তমম্ || ৩. ২৭. ৩৬||
অষ্টদিক্ষ্বষ্টশূলেন সংহারাক্ষরমৌলিনা |
অষ্টভির্দৈবতৈশ্চৈব যুক্তং যন্ত্রং সমালিখৎ || ৩. ২৭. ৩৭||
অলসা কৃপণা দীনা নিতন্দ্রাচ প্রমীলিকা |
ক্লীবা চ নিরহঙ্কারা চেত্যষ্টৌ দেবতাঃ স্মৃতাঃ || ৩. ২৭. ৩৮||
দেবতাষ্টকমেতশ্চ শূলাষ্টকপুটোপরি |
নিয়োজ্য লিখিতং যন্ত্রং মায়াবী সমমন্ত্রয়ৎ || ৩. ২৭. ৩৯||
পূজাং বিধায় মন্ত্রস্য বলিভিশ্ছাগলাদিভিঃ |
তদ্যন্ত্রং চারিকটকে প্রাক্ষিপৎসমরেঽসুরঃ || ৩. ২৭. ৪০||
পাকারস্য বহির্ভাগে বর্তিনা তেন দুর্ধিয়া |
ক্ষিপ্তমুল্লঙ্ঘ্য চ রণে পপাত কটকান্তরে || ৩. ২৭. ৪১||
তদ্যন্ত্রস্য বিকারেণ কটকস্থাস্তুশক্তয়ঃ |
বিমুক্তশস্ত্রসংন্যাসমাস্থিতা দীনমানসাঃ || ৩. ২৭. ৪২||
কিং হতৈরসুরৈঃ কার্যং শস্ত্রাশস্ত্রিক্রমৈরলম্ |
জয়সিদ্ধফলং কিং বা প্রাণিহিংসা চ পাপদা || ৩. ২৭. ৪৩||
অমরাণাং কৃতে কোঽযং কিমস্মাকং ভবিষ্যতি |
বৃথা কলকলং কৃৎবা ন ফলং যুদ্ধকর্মণা || ৩. ২৭. ৪৪||
কা স্বামিনী মহারাজ্ঞী কা বাসৌ দণ্ডনায়িকা |
কা বা সা মন্ত্রিণী শ্যামা ভৃত্যৎবং নোঽথ কীদৃশম্ || ৩. ২৭. ৪৫||
ইহ সর্বাভিরস্মাভির্ভৃত্যভূতাভিরেকিকা |
বনিতা স্বামিনীকৃত্যে কিং ফলং মোক্ষ্যতে পরম্ || ৩. ২৭. ৪৬||
পরেষাং মর্মভিদুরৈরায়ুধৈর্ন প্রয়োজনম্ |
যুদ্ধং শাম্যতু চাস্মাকং দেহশস্ত্রক্ষতিপ্রদম্ || ৩. ২৭. ৪৭||
যুদ্ধে চ মরণং ভাবি বৃথা স্যুর্জীবিতানি নঃ |
যুদ্ধে মৃত্যুর্ভবেদেব ইতি তত্র প্রমৈব কা || ৩. ২৭. ৪৮||
উৎসাহেন ফলং নাস্তি নিদ্রৈবৈকা সুখাবহা |
আলস্যসদৃশং নাস্তি চিত্তবিশ্রান্তিদায়কম্ || ৩. ২৭. ৪৯||
এতাদৃশীশ্চ নো জ্ঞাৎবা সা রাজ্ঞী কিং করিষ্যতি |
তস্যা রাজ্ঞীৎবমপি নঃ সমবায়েন কল্পিতম্ || ৩. ২৭. ৫০||
এবং চোপেক্ষিতাস্মাভিঃ সা বিনষ্টবলা ভবেৎ |
নষ্ট সত্ত্বা চ সা রাজ্ঞী কান্নঃ শিক্ষাং করিষ্যতি || ৩. ২৭. ৫১||
এবমেব রণারংভং বিমুচ্য বিধুতায়ুধাঃ |
শক্তয়ো নিদ্রয়া দ্বারে ঘূর্ণমানা ইবাভবন্ || ৩. ২৭. ৫২||
সর্বত্র মান্দ্যং কার্যেষু মহদালস্যমাগতম্ |
শিথিলং চাভবৎসর্বং শক্তীনাং কটকং মহৎ || ৩. ২৭. ৫৩||
জয়বিঘ্নং মহায়ন্ত্রমিতি কৃৎবা স দানবঃ || ৩. ২৭. ৫৪||
নির্বিদ্য তৎপ্রভাবেণ কটকং প্রমিমন্থিষুঃ |
দ্বিতীয়য়ুদ্ধদিবসস্যার্ধরাত্রে গতে সতি || ৩. ২৭. ৫৫||
নিস্মৃত্য নগরাদ্ভূয়স্ত্রিংশদক্ষৌহিণীবৃতঃ |
আজগাম পুনর্দৈত্যো বিশুক্রঃ কটকং দ্বিষাম্ || ৩. ২৭. ৫৬||
অশ্রূয়ন্ত ততস্তস্য রণনিঃসাণনিস্বনাঃ |
তথাপি তা নিরুদ্যোগাঃ শক্তয়ঃ কটকেঽভবন্ || ৩. ২৭. ৫৭||
তদা মহানুভাবৎবাদ্বিকারৈর্বিঘ্নয়ন্ত্রজৈঃ |
অস্পৃষ্টে মন্ত্রিণীদণ্ডনাথে চিন্তামবা পতুঃ || ৩. ২৭. ৫৮||
অহো বত মহৎকষ্টমিদমাপতিতং ভয়ম্ |
কস্য বাথ বিকারেণ সৈনিকা নির্গতোদ্যমাঃ || ৩. ২৭. ৫৯||
নিরস্তায়ুধসংরংভা নিদ্রাতন্দ্রাবিঘূর্ণিতাঃ |
ন মানয়ন্তি বাক্যানি রার্চয়ন্তি মহেশ্বরীম্ |
ঔদাসীন্যং বিতন্বন্তি শক্তয়ো নিস্পৃহা ইমাঃ || ৩. ২৭. ৬০||
ইতি তে মন্ত্রিণীদণ্ডনাথে চিন্তাপরায়ণে |
চক্রস্যন্দনমারূঢে মহারাজ্ঞীং সমূচতুঃ || ৩. ২৭. ৬১||
মন্ত্রিণ্যুবাচ
দেবি সক্য বিকারোঽযং শক্তয়ো বিগতোদ্যমাঃ |
ন শৃণ্বন্তি মহারাজ্ঞি তবাজ্ঞাং বিশ্বপালিতাম্ || ৩. ২৭. ৬২||
অন্যোন্যং চ বিরক্তাস্তাঃ পরাচ্যঃ সর্বকর্মসু |
নিদ্রাতন্দ্রামুকুলিতা দুর্বাক্যানি বিতন্বতে || ৩. ২৭. ৬৩||
কা দণ্ডিনী মন্ত্রিণী কা মহারাজ্ঞীতি কা পুনঃ |
যুদ্ধং চ কীদৃশমিতি ক্ষেপং ভূরি বিতন্বতে || ৩. ২৭. ৬৪||
অস্মিন্নেবান্তরে শত্রুরাগচ্ছতি মহাবলঃ |
উদ্দণ্ডভেরীনিস্বানৈর্বিভিন্দন্নিব রোদসী || ৩. ২৭. ৬৫||
অত্র যৎপ্রাপ্তরূপং তন্মহারাজ্ঞি প্রপদ্যতাম্ |
ইত্যুক্ত্বা সহ দণ্ডিন্যা মন্ত্রিণী প্রণতিং ব্যধাৎ || ৩. ২৭. ৬৬||
ততঃ সা ললিতা দেবী কামেশ্বরমুখং প্রতি |
দত্তদৃষ্টডিঃ সমহসদতিরক্তরদাবলিঃ || ৩. ২৭. ৬৭||
তস্যাঃ স্মিতপ্রভাপুঞ্জে কুঞ্জরাকৃতিমান্মুখে |
কটক্রোডগলদ্দানঃ কশ্চিদেব ব্যজৃংভত || ৩. ২৭. ৬৮||
জপাপটলপাটল্যো বালচন্দ্রবপুর্ধরঃ |
বীজপূরগদামিক্ষুচাপং শূলং সুদর্শনম্ || ৩. ২৭. ৬৯||
অব্জপাশোৎপলব্রীহিমঞ্জরীবরদাং কুশান্ |
রত্নকুংভং চ দশভিঃ স্বকৈর্হস্তৈঃ সমুদ্বহন্ || ৩. ২৭. ৭০||
তুন্দিলশ্চন্দ্রচূডালো মন্দ্রবৃংহিতনিস্বনঃ |
সিদ্ধিলক্ষ্মীসমাশ্লিষ্টঃ প্রণনাম মহেশ্বরীম্ || ৩. ২৭. ৭১||
তয়া কৃতাশীঃ স মহান্গণনাথো গজাননঃ |
জয়বিঘ্নমহায়ন্ত্রংভেত্তুং বেগাদ্বিনির্যয়ৌ || ৩. ২৭. ৭২||
অন্তরেবহি শালস্য ভ্রমদ্দন্তাবলাননঃ |
নিভৃতং কুত্রচিল্লগ্নং জয়বিঘ্নং ব্যলোকয়ৎ || ৩. ২৭. ৭৩||
স দেবো ঘোরনির্ঘাতৈর্দুঃসহৈর্দন্তপাতনৈঃ |
ক্ষণাচ্চূর্মীকরোতি স্ম জয়বিঘ্নমহাশিলাম্ || ৩. ২৭. ৭৪||
তত্র স্থিতাভির্দুষ্টাভির্দেবতাভিঃ সহৈব সঃ |
পরাগশেষতাং নীৎবা তদ্যন্ত্রং প্রক্ষিপদ্দিবি || ৩. ২৭. ৭৫||
ততঃ কিলকিলারাবং কৃৎবাঽলস্যবিবর্জিতাঃ |
উদ্যতাঃ সমরং কর্তুং শক্তয়ঃ শস্ত্রপাণয়ঃ || ৩. ২৭. ৭৬||
স দেতিবদনঃ কণ্ঠকলিতাকুণ্ঠনিস্বনঃ |
জয়য়ন্ত্রং হি তৎসৃষ্টং তথা রাত্রৌ ব্যনাশয়ৎ || ৩. ২৭. ৭৭||
ইমং বৃত্তান্তমাকর্ণ্য ভণ্ডঃ স ক্ষোভমায়য়ৌ |
সসর্জয় বহূনাত্মরূপান্দন্তাবলাননান্ || ৩. ২৭. ৭৮||
তে কটক্রোডবিগলন্মদসৌরভচঞ্চলৈঃ |
চঞ্চরীককুলৈরগ্রে গীয়মানমহোদয়াঃ || ৩. ২৭. ৭৯||
স্ফুরদ্দাডিমকিঞ্জল্কবিক্ষেপকররোচিষঃ |
সদা রত্নাকরানেকহেলয়া পাতুমুদ্যতাঃ || ৩. ২৭. ৮০||
আমোদপ্রমুখা ঋদ্ধিমুখ্যশক্তিনিষেবিতাঃ |
আমোদশ্চ প্রমোদশ্চ মুমুখো দুর্মুখস্তথা || ৩. ২৭. ৮১||
অরিঘ্নো বিঘ্নকর্ত্তা চ ষডেতে বিঘ্ননায়কাঃ |
তে সপ্তকোটিসংখ্যানাং হেরংবাণামধীশ্বরাঃ || ৩. ২৭. ৮২||
তে পুরশ্চলিতাস্তস্য মহাগণপতে রণে |
অগ্নিপ্রাকারবলয়াদ্বিনির্গত্য গজাননাঃ || ৩. ২৭. ৮৩||
ক্রোধহুঙ্কারতুমুলাঃ প্রত্য পদ্যন্ত দানবান্ |
পুনঃ প্রচণ্ডফূৎকারবধিরীকৃতবিষ্টপাঃ || ৩. ২৭. ৮৪||
পপাত দৈত্যসৈন্যেষু গণচক্রচমূগণঃ |
অচ্ছিদন্নিশিতৈর্বাণৈর্গণনাথঃ স দানবান্ || ৩. ২৭. ৮৫||
গণনাথেন তস্যাভূদ্বিশুক্রস্য মহৌজসঃ |
যুদ্ধমুদ্ধতহুঙ্কারভিন্নকার্মুকনিঃস্বনম্ || ৩. ২৭. ৮৬||
ভ্রুকুটী কুটিলে চক্রে দষ্টোষ্ঠমতিপাটলম্ |
বিশুক্রো যুধি বিভ্রাণঃ সময়ুধ্যত তেন সঃ || ৩. ২৭. ৮৭||
শস্ত্রাঘট্টননিস্বানৈর্ হুংকারৈশ্চ সুরদ্বিষাম্ |
দৈত্যসপ্তিখুরক্রীডৎকুদ্দালীকূটনিস্বনৈঃ || ৩. ২৭. ৮৮||
ফেৎকারৈশ্চ গচেন্দ্রাণাং ভয়েনাক্রন্দনৈরপি |
হেষয়া চ হয়শ্রেণ্যা রথচক্রস্বনৈরপি || ৩. ২৭. ৮৯||
ধনুষাং গুণনিস্স্বানৈশ্চক্রচীৎকরণৈরপি || ৩. ২৭. ৯০||
শরসাৎকারঘোষৈশ্চ বীরভাষাকদংবকৈঃ |
অট্টহাসৈর্মহেন্দ্রাণাং সিংহনাদৈশ্চভূরিশঃ || ৩. ২৭. ৯১||
ক্ষুভ্যদ্দিগন্তরং তত্র ববৃধে যুদ্ধমুদ্ধতম্ |
ত্রিংশদক্ষৌহিণী সেনা বিশুক্রস্য দুরাত্মনঃ || ৩. ২৭. ৯২||
প্রত্যেকং যোধয়া মাসুর্গণনাথা মহারথাঃ |
দন্তৈর্মর্ম বিভিন্দন্তো বিষ্টংযতশ্চ শুণ্ডয়া || ৩. ২৭. ৯৩||
ক্রোধয়ন্তঃ কর্ণতালৈঃ পুষ্কলাবর্ত্তকোপমৈঃ |
নাসাশ্বাসৈশ্চ পরুষৈর্বিক্ষিপন্তঃ পতাকিনীম্ || ৩. ২৭. ৯৪||
উরোভির্মর্দয়ন্তশ্চ শৈলবপ্রসমপ্রভৈঃ |
পিংষন্তশ্চ পদাঘাতৈঃ পীনৈর্ঘ্নন্তস্তথোদরৈঃ || ৩. ২৭. ৯৫||
বিভিন্দন্তশ্চ শূলেন কৃত্তন্তশ্চক্রপাতনৈঃ |
শঙ্খস্বনেন মহতা ত্রাসয়ন্তো বরূথিনীম্ || ৩. ২৭. ৯৬||
গণনাথমুখোদ্ভূতা গজবক্রাঃ সহস্রশঃ |
ধূলীশেষং সমস্তং তৎসৈন্যং চক্রুর্মহোদ্যতাঃ || ৩. ২৭. ৯৭||
অথ ক্রোধসমাবিষ্টো নিজসৈন্যপুরোগমঃ |
প্রেষয়ামাস দেবস্য গজাসুর মসৌ পুনঃ || ৩. ২৭. ৯৮||
প্রচণ্ডসিংহনাদেন গজদৈত্যেন দুর্ধিয়া |
সপ্তাক্ষৌহিণিয়ুক্তেন যুয়ুধে স গণেশ্বরঃ || ৩. ২৭. ৯৯||
হীয়মানং সমালোক্য গজাসুরভুজাবলম্ |
বর্ধমানং চ তদ্বীর্যং বিশুক্রঃ প্রপলায়িতঃ || ৩. ২৭. ১০০||
স এক এব বীরেদ্রঃ প্রচলন্নাখুবাহনঃ |
সপ্তাক্ষৌহিণিকায়ুক্তং গজাসুরমমর্দয়ৎ || ৩. ২৭. ১০১||
গজাসুরে চ নিহতে বিশুক্রে প্রপলায়িতে |
ললিতান্তিকমাপেদে মহাগমপতির্মৃধাৎ || ৩. ২৭. ১০২||
কালরাত্রিশ্চ দৈত্যানাং সা রাত্রির্বিরতিং গতা |
ললিতা চাতি মুদিতা বভূবাস্য পরাক্রমৈঃ || ৩. ২৭. ১০৩||
বিততার মহারাজ্ঞীপ্রীয়মাণা গণেশিতুঃ |
সর্বদৈবতপূজায়াঃ পূর্বপূজ্যৎবমুত্তমম্ || ৩. ২৭. ১০৪||
ইতি শ্রীব্রহ্মাণ্ডপুরাণে উত্তরভাগে হয়গ্রীবাগস্ত্যসংবাদে ললিতোপাখ্যানে গণনাথপরাক্রমো নাম সপ্তবিংশোঽধ্যায়ঃ

রণেভগ্নং মহাদৈত্যং ভণ্ডদৈত্যঃ সহোদরম্ |
সেনানাং কদনং শ্রুৎবা সন্তপ্তো বহুচিন্তয়া || ৩. ২৮. ১||
উভাবপি সমেতৌ তৌ যুক্তৌ সর্বৈশ্চসৈনিকৈঃ |
প্রেষয়ামাস যুদ্ধায় ভণ্ডদৈত্যঃ সহোদরৌ || ৩. ২৮. ২||
তাবুভৌ পরমক্রুদ্ধৌ ভণ্ডদৈত্যেন দেশিতৌ |
বিষঙ্গশ্চ বিশুক্রশ্চ মহোদ্যম মবাপনুঃ || ৩. ২৮. ৩||
কনিষ্ঠসহিতং তত্র যুবরাজং মহাবলম্ |
বিশুক্রমনুবব্রাজ সেনা ত্রৈলোক্যকম্পিনী || ৩. ২৮. ৪||
অক্ষৌহিণীচতুঃশত্যা সেনানামাবৃতশ্চ সঃ |
যুবরাজঃ প্রববৃধে প্রতাপেন মহীয়সা || ৩. ২৮. ৫||
উলূকজিৎপ্রভৃতয়ো ভাগিনেয়া দশোদ্ধতাঃ |
ভণ্ডস্য চ ভগিন্যান্তু ধূমিন্যাং জাতয়োনয়ঃ || ৩. ২৮. ৬||
কৃতাস্ত্রশিক্ষা ভণ্ডেন মাতুলেন মহীয়সা |
বিক্রমেণ বলন্তস্তে সেনানাথাঃ প্রতস্থিরে || ৩. ২৮. ৭||
প্রোদ্গতৈশ্চাপনির্ঘোষৈর্ঘোষয়ন্তো দিশো দশ |
দ্বয়োর্মাতুলয়োঃ প্রীতিং ভাগিনেয়া বিতেনিরে || ৩. ২৮. ৮||
আরূঢয়ানাঃ প্রত্যেকগাঢাহঙ্কারশালিনঃ |
আকৃষ্টগুরুধন্বানো বিশুক্রমনুবব্রজুঃ || ৩. ২৮. ৯||
যৌবরাজ্যপ্রভাচিহ্নচ্ছত্রচামরশোভিতঃ |
আরূঢবারণঃ প্রাপ বিশুক্রো যুদ্ধমেদিনীম্ || ৩. ২৮. ১০||
ততঃ কলকলারাবকারিণ্যা সেনয়া বৃতঃ |
বিশুক্রঃ পটু দধ্বান সিংহনাদং ভয়ঙ্করম্ || ৩. ২৮. ১১||
তৎক্ষোভাৎক্ষুভিতস্বান্তাঃ শক্তয়ঃ সংভ্রমোদ্ধতাঃ |
অগ্নিপ্রাকারবলয়ান্নির্জগমুর্বদ্ধপঙ্কয়ঃ || ৩. ২৮. ১২||
তডিন্ময়মিবাকাশং কুর্বন্ত্যঃ স্বস্বরোচিষা |
রক্তাম্বুজাবৃতমিব ব্যোমচক্রং রণোন্মুখাঃ || ৩. ২৮. ১৩||
অথ ভণ্ডকনীয়াংসাবাগতৌ যুদ্ধদুর্মদৌ |
নিশম্য যুগপদ্যোদ্ধং মন্ত্রিণীদণ্ডনায়কে || ৩. ২৮. ১৪||
কিরিচকং জ্ঞেয়চক্রমারূঢে রথশেখরম্ |
ধৃতাতপত্রবলয়ে চামরাভ্যাং চ বীজিতে || ৩. ২৮. ১৫||
অপ্সরোভিঃ প্রনৃত্তাভির্গীয়মানমহোদয়ে |
নির্জগমতূ রণং কর্তুমুভাভ্যাং ললিতাজ্ঞয়া || ৩. ২৮. ১৬||
শ্রীচক্ররথরাজস্য রক্ষণার্থং নিবেশিতে |
শতাক্ষৌহিণিকাং সেনাং বর্জয়িৎবাস্ত্রভীষণম্ || ৩. ২৮. ১৭||
অন্যৎসর্বং চমুজালং নির্জগাম রণোন্মুখী |
পুরতঃ প্রাচলদ্দণ্ডনাথা রথনিষেদুষী || ৩. ২৮. ১৮||
একয়ৈব করাঙ্গুল্যা ঘূর্ণয়ন্তী হলায়ুধম্ |
মুসলং চান্যহস্তেন ভ্রাময়ন্তী মুহুর্মুহুঃ || ৩. ২৮. ১৯||
তরলেন্দুকলাচূডাস্ফুরৎপোত্রমুখাম্বুজা |
পুরঃ প্রহর্ত্রী সমরে সর্বদা বিক্রমোদ্ধতা |
অস্যা অনুপ্রচলিতা গেয়চক্ররথস্থিতা || ৩. ২৮. ২০||
ধনুষো ধ্বনিনা বিশ্বং পূরয়ন্তী মহোদ্ধতা |
বেণীকৃতকচন্যস্তবিলসচ্চন্দ্রপল্লবা || ৩. ২৮. ২১||
স্ফুরত্ত্রিতয়নেত্রেণ সিন্দূরতিলকৎবিষা |
পাণিনা পদ্মরম্যেণ মণিকঙ্কণচারুণা || ৩. ২৮. ২২||
তূণীরমুখতঃ কৃষ্টং ভ্রাময়ন্তী শিলীমুখম্ |
জয় বর্ধস্ববর্ধস্বেত্যতিহর্ষসমাকুলে || ৩. ২৮. ২৩||
নৃত্যদ্ভির্দিব্যমুনিভির্বর্দ্ধিতাশীর্বচোঽমৃতৈঃ |
গেয়চক্ররথেন্দ্রস্য চক্রনেমিবিঘট্টনৈঃ || ৩. ২৮. ২৪||
দারয়ন্তী ক্ষিতিতলং দৈত্যানাং হৃদয়ৈঃ সহ |
লোকাতিশায়িতা বিশ্বমনোমোহনকারিণা |
গীতিবন্ধেনামরীভির্বহ্বীভির্গীতবৈভবা || ৩. ২৮. ২৫||
অক্ষৌহিণীসহস্রাণামষ্টকং সমরোদ্ধতম্ |
কর্ষতী কল্পবিশ্লেষনির্মর্যাদাব্ধিসংনিভম্ || ৩. ২৮. ২৬||
তস্যাঃ শক্তিচমূচক্রে কাশ্চিৎকনকরোচিষঃ |
কাশ্চিদ্দাডিমসংকাশাঃ কাশ্চিজ্জীমূতরোচিষঃ || ৩. ২৮. ২৭||
অন্যাঃ সিংদূররুচয়ঃ পরাঃ পাটলপাটলাঃ |
কাচাদ্রিকাম্বরাঃ কাশ্চিৎপরাঃ শ্যামলকোমলাঃ || ৩. ২৮. ২৮||
অন্যাস্তু হীরকপ্রখ্যাঃ পরা গারুত্মতোপমাঃ |
বিরুদ্ধৈঃ পঞ্চভির্বাণৈর্মিশ্রিতৈঃ শতকোটিভিঃ || ৩. ২৮. ২৯||
ব্যঞ্জয়ন্ত্যো দেহরুচং কতিচিদ্বিবিধায়ুধাঃ |
অসংখ্যাঃ শক্তয়শ্চেলুর্দণ্ডিন্যাস্সৈনিকে তথা || ৩. ২৮. ৩০||
তথৈব সৈন্যসন্নাহো মন্ত্রিণ্যাঃ কুম্ভসম্ভব |
যথা ভূষণবেষাদি যথা প্রভাবলক্ষণম্ || ৩. ২৮. ৩১||
যথা সদ্গুণশালিৎবং যথা চাশ্রিতলক্ষণম্ |
যথা দৈত্যৌঘসংহারো যথা সর্বৈশ্চ পূজিতা || ৩. ২৮. ৩২||
যথা শক্তির্মহারাজ্ঞ্যা দেডিন্যশ্চ তথাখিলম্ |
বিশেষস্তু পরং তস্যাঃ সাচিব্যে তৎকরে স্থিতম্ |
মহারাজ্ঞীবিতীর্ণং তদাজ্ঞামুদ্রাঙ্গুলীয়কম্ || ৩. ২৮. ৩৩||
ইত্থং প্রচলিতে সৈন্যে মন্ত্রিণীদণ্ডনাথয়োঃ |
তদ্ভারভঙ্গুরা ভূমির্দেলালীলামলংবত || ৩. ২৮. ৩৪||
ততঃ প্রববৃতে যুদ্ধং তুমুলং রোমহর্ষণম্ |
উদ্ধূতধূলিজংবালীভূতসপ্তার্ণবীজলম্ || ৩. ২৮. ৩৫||
হয়স্থৈর্হয়সাদিন্যো রথস্থৈ রথসংস্থিতাঃ |
আধোরণৈর্হস্তিপকাঃ খড্গৈঃ পদ্গাশ্চ সঙ্গতাঃ || ৩. ২৮. ৩৬||
দণ্ডনাথাবিষঙ্গেণ সময়ুধ্যন্ত সঙ্গরে |
বিশুক্রেণ সমং শ্যামা বিকৃষ্টমণিকার্মুকা || ৩. ২৮. ৩৭||
অশ্বরূঢা চকারোচ্চৈঃ সহোলূকজিতা রণম্ |
সম্পদীশাচ জগ্রাহ পুরুষেণ যুয়ুৎসয়া || ৩. ২৮. ৩৮||
বিষেণ নকুলী দেবী সমাহ্বাস্ত যুয়ুৎসয়া |
কুন্তিষেণেন সমরং মহামায়া তদাকরোৎ || ৩. ২৮. ৩৯||
মলদেন সমং চক্রে যুদ্ধমুন্মত্তভৈরবী |
লঘুশ্যামা চকারোচ্চৈঃ কুশূরেণ সমং রণম্ || ৩. ২৮. ৪০||
স্বপ্নেশী মঙ্গলাখ্যেন দৈত্যেন্দ্রেণ রণংব্যধাৎ |
বাগ্বাদিনী তু জঘটে দ্রুঘণেন সমং রণে || ৩. ২৮. ৪১||
কোলাটেন চ দুষ্টেন চণ্ডকাল্যকরোদ্রণম্ |
অক্ষৌহিণীভির্দৈত্যানাং শতাক্ষৌহিণিকাস্তথা |
মহান্তং সমরে চক্রুরন্যোন্যং ক্রোধমূর্ছিতাঃ || ৩. ২৮. ৪২||
প্রবর্তমানে সমরে বিশুক্রো দুষ্টদানবঃ |
বর্ধমানাং শক্তিচমূং হীয়মানাং নিজাং চমূম্ || ৩. ২৮. ৪৩||
অবলোক্য রুষাবিষ্টঃ স কৃষ্টগুরুকার্মুকঃ |
শক্তিসৈন্যে সমস্তেঽপি তৃষাস্ত্রং প্রমুমোচ হ || ৩. ২৮. ৪৪||
তেন দাবানলজ্বালাদীপ্তেন মথিতং বলম্ |
তৃতীয়ে যুদ্ধদিবসে যামমাত্রং গতে রবৌ |
বিশুক্রমুক্ততর্ষাস্ত্রব্যাকুলাঃ শক্তয়োঽবন্ || ৩. ২৮. ৪৫||
ক্ষোভয়ন্নিন্দ্রিয়গ্রামং তালুমূলং বিশোষয়ন্ |
রূক্ষয়ন্কর্ণকুহরমঙ্গদৌর্বল্যমাহবন্ || ৩. ২৮. ৪৬||
পাতয়ন্পৃথিবীপৃষ্ঠে দেহং বিস্রংসিতায়ুধম্ |
আবির্বভূব শক্তীনামতিতীব্রস্তৃষাজ্বরঃ || ৩. ২৮. ৪৭||
যুদ্ধেষ্বনুদ্যমকৃতা সর্বোৎসাহবিরোধিনা |
তর্ষেণ তেন ক্বথিতং শক্তিসৈন্যং বিলোক্যসা |
মন্ত্রিণী সহ পোত্রিণ্যা ভৃশং চিন্তামবাপ হ || ৩. ২৮. ৪৮||
উবাচ তাং দণ্ডনাথামত্যাহিতবিশঙ্কিনীম্ |
রথস্থিতা রথগতা তৎপ্রতী কারকর্মণে |
সখি পোত্রিণি দুষ্টস্য তর্ষাস্ত্রমিদমাগতম্ || ৩. ২৮. ৪৯||
শিথিলীকুরুতে সৈন্যমস্মাকং হা বিধেঃ ক্রমঃ |
বিশুষ্কতালুমূলানাং বিভ্রষ্টায়ুধতেজসাম্ |
শক্তীনাং মণ্ডলেনাত্র সমরে সমুপেক্ষিতম্ || ৩. ২৮. ৫০||
ন কাপি কুরুতে যুদ্ধং ন ধারয়তি চায়ুধম্ |
বিশুষ্কতালুমূলৎবা দ্বক্তুমপ্যালি ন ক্ষমাঃ || ৩. ২৮. ৫১||
ঈদৃশীন্নো গতিং শ্রুৎবা কিং বক্ষ্যতি মহেশ্বরী |
কৃতা চাপকৃতির্দৈত্যৈরুপায়ঃ প্রবিচিন্ত্যতাম্ || ৩. ২৮. ৫২||
সর্বত্র দ্ব্যষ্টসাহস্রাক্ষৌহিণ্যমত্র পোত্রিণি |
একাপি শক্তির্নৈবাস্তি যা তর্ষেণ ন পীডিতা || ৩. ২৮. ৫৩||
অত্রৈবাবসরে দৃষ্ট্বা মুক্তশস্ত্রাং পতাকিনীম্ |
রন্ধ্রপ্রহারিণো হন্ত বাণৈর্নিঘ্নন্তি দানবাঃ || ৩. ২৮. ৫৪||
অত্রোপায়স্ত্বয়া কার্যো ময়া চ সমরোদ্যমে |
ৎবদীয়রথপর্বস্থো যোঽস্তি শীতমহার্ণবঃ || ৩. ২৮. ৫৫||
তমাদিশ সমস্তানাং শক্তীনাং তর্ষনুত্তয়ে |
নাল্পৈঃ পানীয়পানাদ্যৈরেতাসাং তর্ষসংক্ষয়ঃ || ৩. ২৮. ৫৬||
স এব মদিরাসিংধুঃ শক্ত্যৌঘং তর্পয়িষ্যতি |
তমাদিশ মহাত্মানং সমরোৎসাহকারিণম্ |
সর্বতর্ষপ্রশমনং মহাবলবিবর্ধনম্ || ৩. ২৮. ৫৭||
ইত্যুক্তে দণ্ডনাথা সা সদুপায়েন হর্ষিতা |
আজুহাব সুধাসিংধুমাজ্ঞাং চক্রেশ্বরী রণে || ৩. ২৮. ৫৮||
স মদালসরক্তাক্ষো হেমাভঃ স্রগ্বিভূষিতঃ || ৩. ২৮. ৫৯||
প্রণম্য দণ্ডনাথাং তাং তদাজ্ঞাপরিপারকঃ || ৩. ২৮. ৬০||
আত্মানং বহুধা কৃৎবা তরুণাদিত্যপাটলম্ |
ক্বচিত্তাপিচ্ছবচ্ছ্যামং ক্বচিচ্চ ধবলদ্যুতিম্ || ৩. ২৮. ৬১||
কোটিশো মধুরাধারা করিহস্তসমাকৃতীঃ |
ববর্ষ সিংধুরাজোঽযং বায়ুনা বহুলীকৃতঃ || ৩. ২৮. ৬২||
পুষ্কলাবর্তকাদ্যৈস্তু কলপক্ষয়বলাহকৈঃ |
নিষিচ্যমানো মধ্যেঽব্ধিঃ শক্তিসৈন্যে পপাত হ || ৩. ২৮. ৬৩||
যদ্গন্ধাঘ্রামমাত্রেণ মৃত উত্তিষ্ঠতে স্ফুটম্ |
দুর্বলঃ প্রবলশ্চ স্যাত্তদ্ববর্ষ সুরাংবুধিঃ || ৩. ২৮. ৬৪||
পরার্দ্ধসংখ্যাতীতাস্তা মধুধারাপরংপরাঃ |
প্রপিবন্ত্যঃ পিপাসার্তৈর্মুখৈঃ শক্তয় উত্থিতাঃ || ৩. ২৮. ৬৫||
যথা সা মদিরাসিংধুবৃষ্টির্দৈত্যেষু নো পতেৎ |
তথা সৈন্যস্য পরিতো মহাপ্রাকারমণ্ডলম্ || ৩. ২৮. ৬৬||
লঘুহস্ততয়া মুক্তৈঃ শরজাতৈঃ সহস্রশঃ |
চকার বিস্ময়করী কদংববনবাসিনী || ৩. ২৮. ৬৭||
কর্মণা তেন সর্বেঽপি বিস্মিতা মরুতোঽভবন্ |
অথ তাঃ শক্তয়ো ভূরি পিবন্তি স্ম রণান্তরে || ৩. ২৮. ৬৮||
বিবিধা মদিরাধারা বলোৎসাহবিবর্ধনীঃ |
যস্যা যস্যা মনঃপ্রীতী রুচিঃ স্বাদো যথায়থা || ৩. ২৮. ৬৯||
তৃতীয়ে যুদ্ধদিবসে প্রহরদ্বিতয়াবধি |
সংততং মধ্যধারাভিঃ প্রববর্ষ সুরাংবুধিঃ || ৩. ২৮. ৭০||
গৌডী পৈষ্টী চ মাধ্বী চ বরা কাদংবরী তথা |
হৈতালী লাঙ্গলেয়া চ তালজাতাস্তথা সুরাঃ || ৩. ২৮. ৭১||
কল্পবৃক্ষোদ্ভবা দিব্যা নানাদেশসমুদ্ভবাঃ |
সুস্বাদুসৌরভাদ্যাশ্চ শুভগন্ধসুখপ্রদাঃ || ৩. ২৮. ৭২||
বকুলপ্রসবামোদা ধ্বনন্ত্যো বুদ্বুদোজ্জ্বলাঃ |
কটুকাশ্চ কষায়াশ্চ মধুরাস্তিক্ততাস্পৃশঃ || ৩. ২৮. ৭৩||
বহুবর্মসমাবিষ্টাশ্ছেদিনীঃ পিচ্ছলাস্তথা |
ঈষদম্লাশ্চ কট্বম্লা মধুরাম্লাস্তথা পরাঃ || ৩. ২৮. ৭৪||
শস্ত্রক্ষতরুগাহন্ত্রী চাস্থিসংধানদায়িনী |
রণভ্রমহরা শীতা লঘ্ব্যস্তদ্বৎকবোষ্ঠকাঃ || ৩. ২৮. ৭৫||
সংতাপহারিণীশ্চৈব বারুণীস্তা জয়প্রদাঃ |
নানাবিধাঃ সুরাধারা ববর্ষ মদিরার্ণবঃ || ৩. ২৮. ৭৬||
অবিচ্ছিন্নং যামমাত্রমেকৈকা তত্র যোগিনী |
ঐরাবতকর প্রখ্যাং সুরাধারাং মুদা পপৌ || ৩. ২৮. ৭৭||
উত্তানং বদনং কৃৎবা বিলোলরসনাশ্চলম্ |
শক্তয়ঃ প্রপপুঃ সীধু মুদা মীলিতলোচনাঃ || ৩. ২৮. ৭৮||
ইত্থং বহুবিধং মাধ্বীধারাপাতৈঃ সুধাংবুধিঃ |
আগতস্তর্পয়িৎবা তু দিব্যরূপং সমাস্থিতঃ || ৩. ২৮. ৭৯||
পুনর্গৎবা দণ্ডনাথাং প্রণম্য স সুরাংবুধিঃ |
স্নিগ্ধগংভীরঘোষেণ বাক্যং চেদমুবাচ তাম্ || ৩. ২৮. ৮০||
দেবি পশ্য মহারাজ্ঞি দণ্ডমণ্ডলনায়িকে |
ময়া সংতর্পিতা মুগ্ধরূপা শক্তিবরূথিনী || ৩. ২৮. ৮১||
কাশ্চিন্নৃত্যন্তি গায়ন্ত্যো কলক্বণিতমেখলাঃ |
নৃত্যন্তীনাং পুরঃ কাশ্চিৎকরতালং বিতন্বতে || ৩. ২৮. ৮২||
কাশ্চিদ্ধসংতি ব্যাবল্গদ্বল্গুবক্ষোজমণ্ডলাঃ |
পতন্ত্যন্যোন্যমঙ্গেষু কাশ্চিদানন্দমন্থরাঃ || ৩. ২৮. ৮৩||
কাশ্চিদ্বল্গন্তি চ শ্রোণিবিগলন্মেখলাংবরাঃ |
কাশ্চিদুত্থায় সংনদ্ধা ঘূর্ণয়ন্তি নিরায়ুধাঃ || ৩. ২৮. ৮৪||
ইত্থং নির্দিশ্যমানাস্তাঃ শক্তী মৈরেয় সিংধুনাং |
অবলোক্য ভৃশং তুষ্টা দণ্ডিনী তমুবাচ হ || ৩. ২৮. ৮৫||
পরিতুষ্টাস্মি মদ্যাব্ধে ৎবয়া সাহ্যমনুষ্ঠিতম্ |
দেবকার্যমিদ কিঞ্চ নির্বিঘ্নিতমিদং কৃতম্ || ৩. ২৮. ৮৬||
অতঃ পরং মৎপ্রসাদাদ্দ্বাপরে যাজ্ঞিকৈর্মখে |
সোমপানবদত্যন্তমুপয়োজ্যো ভবিষ্যসি || ৩. ২৮. ৮৭||
মন্ত্রেণ পূতং ৎবাং যাগে পাস্যন্ত্যখিলদেবতাঃ |
যাগেষু মন্ত্রপূতেন পীতেন ভবতা জনাঃ || ৩. ২৮. ৮৮||
সিদ্ধিমৃদ্ধিং বলং স্বর্গমপবর্গং চ বিভ্রতু |
মহেশ্বরী মহাদেবো বলদেবশ্চ ভার্গবঃ |
দত্তাত্রেয়ো বিধির্বিষ্ণুস্ত্বাং পাস্যন্তি মহাজনাঃ || ৩. ২৮. ৮৯||
যাগে সমর্চিতস্ত্বং তু সর্বসিদ্ধিং প্রদাস্যসি || ৩. ২৮. ৯০||
ইত্থং বরপ্রদানেন তোষয়িৎবা সুরাংবুধিম্ || ৩. ২৮. ৯১||
মন্ত্রিণীং ৎবরয়ামাস পুনর্যুদ্ধায় দণ্ডিনী |
পুনঃ প্রববৃতে যুদ্ধং শক্তীনাং দানবৈঃ সহ || ৩. ২৮. ৯২||
মুদাট্টহাসনির্ভিন্নদিগষ্টকধরা ধরম্ |
প্রত্যগ্রমদিরামত্তাঃ পাটলীকৃতলোচনাঃ |
শক্তয়ো দৈত্যচক্রেষু ন্যপতন্নেকহেলয়া || ৩. ২৮. ৯৩||
দ্বয়েন দ্বয়মারেজে শক্তীনাং সমদশ্রিয়াম্ |
মদরাগেণ চক্ষূংষি দৈত্যরক্তেন শস্ত্রিকা || ৩. ২৮. ৯৪||
তথা বভূব তুমুলং যুদ্ধং শক্তিসুরদ্বিষাম্ |
যথা মৃত্যুরবিত্রস্তঃ প্রজাঃ সংহরতে স্বয়ম্ || ৩. ২৮. ৯৫||
সংস্খলৎপদবিন্যাসা মদেনারক্তদৃষ্টয়ঃ |
স্খলদক্ষরসংদর্ভবীরভাষা রণোদ্ধতাঃ || ৩. ২৮. ৯৬||
কদংবগোলকাকারা দৃষ্টসর্বাঙ্গদৃষ্টয়ঃ |
যুবরাজস্য সৈন্যানি শক্ত্যঃ সমানাশয়ন্ || ৩. ২৮. ৯৭||
অক্ষৌহিণীশতং তত্র দণ্ডিনী সা ব্যদারয়ৎ |
অক্ষৌহিণীসার্দ্ধশত নাশয়ামাস মন্ত্রিণী || ৩. ২৮. ৯৮||
অশ্বারূঢাপ্রভৃতয়ো মদারুণবিলোচনাঃ |
অক্ষৌহিণীসার্ধশতং নিত্যুরন্তকমন্দিরম্ || ৩. ২৮. ৯৯||
অঙ্কুশেনাতিতীক্ষ্ণেন তুরগা রোহিণী রণে |
উলূকজিতমুন্মথ্য পরলোকাতিথিং ব্যধাৎ || ৩. ২৮. ১০০||
সম্পৎকরীপ্রভৃতয়ঃ শক্তিদণ্ডাধিনায়িকাঃ |
পরুষেণ মুখান্যন্যান্যবরুদ্ধাব্যদারয়ন্ || ৩. ২৮. ১০১||
অস্তং গতে সবিতরি ধ্বস্তসর্ববলং ততঃ |
বিশুক্রং যোধয়ামাস শ্যামলা কোপশালিনী || ৩. ২৮. ১০২||
অস্ত্রপ্রত্য স্ত্রমোক্ষেণ ভীষণেন দিবৌকসাম্ |
মহতা রণকৃত্যেন যোধয়ামাস মন্ত্রিণী || ৩. ২৮. ১০৩||
আয়ুধানি সুতীক্ষ্ণানি বিশুক্রস্য মহৌজসঃ |
ক্রমশঃ খণ্ডয়ন্তী সা কেতনং রথসারথিম্ || ৩. ২৮. ১০৪||
ধনুর্গুণং ধনুর্দণ্ডং খণ্ডয়ন্তী শিলীমুখৈঃ |
অস্ত্রেণ ব্রহ্মশিরসা জ্বলৎপাবকরোচিষা || ৩. ২৮. ১০৫||
বিশুক্রং মর্দয়ামাস সোঽপতচ্ছূর্ণবিগ্রহঃ |
বিষঙ্গং চ মহাদৈত্যং দণ্ডনাথা মদোদ্ধতা || ৩. ২৮. ১০৬||
যোধয়ামাস চণ্ডন মুসলেন বিনিঘ্নতী |
সচাপি দুষ্টো দনুজঃ কালদণ্ডনিভাং গদাম্ |
উদ্যম্য বাহুনা যুদ্ধং চকারাশেষভীষণম্ || ৩. ২৮. ১০৭||
অন্যোন্যমঙ্গং মৃদ্নন্তৌ গদায়ুদ্ধপ্রবর্তিনৌ |
চণ্ডাট্টহাসমুখরৌ পরিভ্রমণকারিণৌ || ৩. ২৮. ১০৮||
কুর্বাণৌ বিবিধাংশ্চারান্ঘূর্ণন্তৌ তূর্মবেষ্টিনৌ |
অন্যোন্যদণ্ডহননৈর্মোহয়ন্তৌ মুহুর্মুহুঃ || ৩. ২৮. ১০৯||
অন্যোন্যপ্রহৃতৌ রন্ধ্রমীক্ষমাণৌ মহোদ্ধতৌ |
মহামুসলদণ্ডাগ্রঘট্টনক্ষোভিতাংবরৌ |
অয়ুধ্যেতাং দুরাধর্ষৌং দণ্ডিনীদৈত্যশেখরৌ || ৩. ২৮. ১১০||
অথার্দ্ধরাত্রিসময়পর্যন্তং কৃতসংগরা |
সংক্রুদ্ধা হন্তুমারেভে বিষঙ্গং দণ্ডনায়িকা || ৩. ২৮. ১১১||
তং মূর্ধনি নিমগ্নেন হলেনাকৃষ্য বৈরিণম্ |
কঠোরং তাডনং চক্রে মুসলেনাথ পোত্রিণী || ৩. ২৮. ১১২||
ততো মুসলঘাতেন ত্যক্তপ্রাণো মহাসুরঃ |
চূর্ণিতেন শতাঙ্গেন সমং ভূতলমাশ্রয়ৎ || ৩. ২৮. ১১৩||
ইতি কৃৎবা মহৎকর্ম মন্ত্রিণীদণ্ডনায়িকে |
তত্রৈব তং নিশা শেষং নিন্যতুঃ শিবিরং প্রতি || ৩. ২৮. ১১৪||
ইতি শ্রীব্রহ্মাণ্ডমহাপুরাণে উত্তরভাগে হয়গ্রীবাগস্ত্যসংবাদে ললিতোপখ্যানে বিশুক্রবিষঙ্গবধো নামাষ্টাবিংশোঽধ্যায়ঃ

অগস্ত্য উবাচ
অশ্বানন মহাপ্রাজ্ঞ বর্ণিতং মন্ত্রিণীবলম্ |
বিষঙ্গস্য বধো যুদ্ধে বর্ণিতো দণ্ডনাথয়া || ৩. ২৯. ১||
শ্রীদেব্যাঃ শ্রোতুমিচ্ছামি রণচক্রে পরাক্রমম্ |
সোদরস্যাপদং দৃষ্ট্বা ভণ্ডঃ কিমকরোচ্ছুচা || ৩. ২৯. ২||
কথং তস্য রণোৎসাহঃ কৈঃ সমং সময়ুধ্যত |
সহায়াঃ কেঽভবংস্তস্য হতভ্রাতৃতনূভুবঃ || ৩. ২৯. ৩||
হয়গ্রীব উবাচ
ইদং শৃণু মহাপ্রাজ্ঞ সর্বপাপনিকৃন্তনম্ |
ললিতাচরিতং পুণ্যমণিমাদিগুমপ্রদম্ || ৩. ২৯. ৪||
বৈষুবায়নকালেষু পুণ্যেষু সময়েষু চ |
সিদ্ধিদং সর্বপাপঘ্নং কীর্তিদং পঞ্চপর্বসু || ৩. ২৯. ৫||
তদা হতৌ রণে তত্র শ্রুৎবা নিজসহোদরৌ |
শোকেন মহতাবিষ্টো ভণ্ডঃ প্রবিললাপ সঃ || ৩. ২৯. ৬||
বিকীর্মকেশো ধরণৌ মূর্ছিতঃ পতিতস্তদা |
ন লেভে কিঞ্চিদাশ্বাসং ভ্রাতৃব্যসনকর্শিতঃ || ৩. ২৯. ৭||
পুনঃ পুনঃ প্রবিলপন্কুটিলাক্ষেণ ভূরিশঃ |
আশ্বাস্যামানঃ শোকেন যুক্তঃ কোপমবাপ সঃ || ৩. ২৯. ৮||
ফালং বহন্নতিক্রূরং ভ্রমদ্ভ্রুকুটিভীষণম্ |
অঙ্গারপাটলাক্ষশ্চ নিঃশ্বসন্কৃষ্ণসর্পবৎ || ৩. ২৯. ৯||
উবাচ কুটিলাক্ষং দ্রাক্সমস্তপৃতনাপতিম্ |
ক্ষিপ্রং মুহুর্মুহুঃ স্পৃষ্ট্বা ধুন্বানঃ করবালিকাম্ || ৩. ২৯. ১০||
ক্রোধহুঙ্কারমাতন্বন্গর্জন্নুৎপাতমেঘবৎ || ৩. ২৯. ১১||
যয়ৈব দৃষ্টয়া মায়াবলাদ্যুদ্ধে বিনাশিতাঃ |
ভ্রাতরো মম পুত্রাশ্চ সেনানাথাঃ সহস্রশঃ || ৩. ২৯. ১২||
তস্যাঃ স্ত্রিয়াঃ প্রমত্তায়াঃ কণ্ঠোত্থৈঃ শোণিতদ্রবৈঃ |
ভ্রাতৃপুত্রমহাশোকবহ্নিং নির্বাপয়াম্যহম্ || ৩. ২৯. ১৩||
গচ্ছ রে কুটিলাক্ষ ৎবং সজ্জীকুরু পতাকিনীম্ |
ইত্যুক্ত্বা কঠিনং বর্ম বজ্রপাতসহং মহৎ || ৩. ২৯. ১৪||
দধানো ভুজমধ্যেন বধ্নন্পৃষ্ঠ তথেষুধী |
উদ্দামমৌর্বিনিঃশ্বাসকঠোরং ভ্রাময়ন্ধনুঃ || ৩. ২৯. ১৫||
কালাগ্নিরিব সংক্রুদ্ধো নির্জগাম নিজাৎপুরাৎ |
তালজঙ্ঘাদিকৈঃ সার্দ্ধংপূর্বদ্বারে নিবেশিতে || ৩. ২৯. ১৬||
চতুর্ভির্ধৃতশস্ত্রৌঘৈর্ধৃতবর্মভিরুদ্ধতৈঃ |
পঞ্চত্রিংশচ্চমূনাথৈঃ কুটিলাক্ষপুরঃসরৈঃ || ৩. ২৯. ১৭||
সর্বসেনাপতীন্দ্রেণ কুটিলাক্ষেণ স ক্রুধা |
মিলিতেন চ ভণ্ডেন চৎবারিংশচ্চমূবরাঃ || ৩. ২৯. ১৮||
দীপ্তায়ুধা দীপ্তকেশা নির্জগ্মুর্দীপ্তকঙ্কটাঃ |
দ্বিসহস্রাক্ষৌহিণীনাং পঞ্চাশীতিঃ পরার্ধিকা || ৩. ২৯. ১৯||
তদেনমন্বগাদেকহেলয়া মথিতুং দ্বিষঃ |
ভণ্ডাসুরে বিনির্যাতে সর্বসৈনিকসংকুলে || ৩. ২৯. ২০||
শূন্যকে নগরে তত্র স্ত্রীমাত্রমবশেষিতম্ |
আভিলো নাম দৈত্যেন্দ্রো রথবর্যো মহারথঃ |
সহস্রয়ুগ্যসিংহাঢ্যমারুরোহ রণোদ্ধতঃ || ৩. ২৯. ২১||
তৎবরে বিজ্বলজ্জ্বালাকালাগ্নিরিব দীপ্তিমান্ |
ঘাতকো নাম বৈ খড্গশ্চন্দ্রহাসসমাকৃতিঃ || ৩. ২৯. ২২||
ইতস্ততশ্চলন্তীনাং সেনানাং ধূলিরুত্থিতা |
বোঢুং তাসাং ভরং ভূমিরক্ষমেব দিবং যয়ৌ || ৩. ২৯. ২৩||
কেচিদ্ভূমেরপর্যাপ্তাঃ প্রচেলুর্ব্যোমবর্ত্মনা |
কেষাঞ্চিৎস্কন্ধমারূঢাঃ কেচিচ্চেলুর্মহারথাঃ || ৩. ২৯. ২৪||
ন দিক্ষু ন চ ভূচক্রে ন ব্যোমনি চ তে মমুঃ |
দুঃখদুখেন তে চেলুরন্যোন্যাশ্লেষপীডিতাঃ || ৩. ২৯. ২৫||
অত্যন্ত সেনাসংমর্দাদ্রথচক্রৈর্বিচূর্ণিতাঃ |
কেচিৎপাদেন নাগানাং মর্দিতা ন্যপতন্ভুবি || ৩. ২৯. ২৬||
ইত্থং প্রচলিতা তেন সমং সর্বৈশ্চ সৈনিকৈঃ |
বজ্রনিষ্পেষসদৃশো মেঘনাদো ব্যধীয়ত || ৩. ২৯. ২৭||
তেনাতীব কঠোরেণ সিংহনাদেন ভূয়সা |
ভণ্ডদৈত্যমুখোত্থেন বিদীর্ণমভবজ্জগৎ || ৩. ২৯. ২৮||
সাগরাঃ শোষমাপন্নাশ্চন্দ্রাকারৈ প্রপলায়িতৌ |
উডূনি ন্যপতন্ব্যোম্নো ভূমির্দেলায়িতাভবৎ || ৩. ২৯. ২৯||
দিঙ্নাগাশ্চাভবংস্ত্রস্তা মূর্চ্ছিতাশ্চ দিবৌকসঃ |
শক্তীনাং কটকং চাসীদকাণ্ডত্রাসবিহ্বলম্ || ৩. ২৯. ৩০||
প্রাণান্সংধারয়ামাসুঃ কথঞ্চিন্মধ্য আহবে |
শক্তয়ো ভয়বিভ্রষ্টান্যায়ুধানি পুনর্দধুঃ || ৩. ২৯. ৩১||
বহ্নিপ্রাকারবলয়ং প্রশান্তং পুনরুত্থিতম্ |
দৈত্যেন্দ্রসিংহনাদেন চমূনাথধনুঃস্বনৈঃ || ৩. ২৯. ৩২||
ক্রন্দনৈশ্চাপি যোদ্ধৄণামভূচ্ছব্দময়ং জগৎ |
তেন নাদেন মহতা ভণ্ডদৈত্যবিনির্গমম্ |
নিশ্চিত্য ললিতা দেবী স্বয়ং যোদ্ধুং প্রচক্রমে || ৩. ২৯. ৩৩||
অশক্যমন্যশক্তীনামাকলয়্য মহাহবম্ |
ভণ্ডদৈত্যেন দুষ্টেন স্বয়মুদ্যোগমাস্থিতা || ৩. ২৯. ৩৪||
চক্ররাজরথস্তস্যাঃ প্রচচাল মহোদয়ঃ |
চতুর্বেদমহাচক্রপুরুষার্থমহাভয়ঃ || ৩. ২৯. ৩৫||
আনন্দধ্বজসংযুক্তো নবভিঃ পর্বভির্যুতঃ |
নবপর্বস্থদেবীভিরাকৃষ্টগুরুধন্বিভিঃ || ৩. ২৯. ৩৬||
পরার্ধাধিকসংখ্যাতপরিবারসমৃদ্ধিভিঃ |
পর্বস্থানেষু সর্বেষু পালিতঃ সর্বতো দিশম্ || ৩. ২৯. ৩৭||
দশয়োজনমুন্নদ্ধশ্চতুর্যোজন বিস্তৃতঃ |
মহারাজ্ঞীচক্ররাজো রথেন্দ্রঃ প্রচলন্বভৌ || ৩. ২৯. ৩৮||
তস্মিন্প্রচলিতে জুষ্টে শ্যাময়া দণ্ডনাথয়া |
গেয়চক্রং তু বালাগ্রে কিরিচক্রং তু বৃষ্ঠতঃ || ৩. ২৯. ৩৯||
অন্যাসামপি শক্তীনাং বাহনানি পরার্দ্ধশঃ |
নৃসিংহোষ্ট্রনরব্যালমৃগপক্ষিহয়াস্তথা || ৩. ২৯. ৪০||
গজভেরুণ্ডশরভ ব্যাঘ্রবাতমৃগাস্তথা |
এতাদৃশশ্চ তির্যঞ্চোঽপ্যন্যে বাহনতাং গতাঃ || ৩. ২৯. ৪১||
মুহুরুচ্চাবচাঃ শক্তীর্ভণ্ডাসুরবধোদ্যতাঃ |
যোজনায়ামবিস্তারমপি তদ্দ্বারমণ্ডলম্ |
বহ্নিপ্রাকারচক্রস্য ন পর্যাপ্তং চমূপতেঃ || ৩. ২৯. ৪২||
জ্বালামালিনিকা নিত্যা দ্বারস্যাত্যন্তবিস্তৃতিম্ |
বিততান সমস্তানাং সৈন্যানাং নির্গমৈষিণী || ৩. ২৯. ৪৩||
অথ সা জগতাং মাতা মহারাজ্ঞী মহোদয়া |
নির্জগামা গ্নিপুরতা বরদ্বারাৎপ্রতাপিনী || ৩. ২৯. ৪৪||
দেবদুন্দুভয়ো নেদুঃ পতিতাঃ পুষ্পবৃষ্টয়ঃ |
মহামুক্তাতপত্রং তদ্দিবি দীপ্তমদৃশ্যত || ৩. ২৯. ৪৫||
নিমিত্তানি প্রসন্নানি শংসকানি জয়শ্রিয়াঃ |
অভবংল্ললিতাসৈন্যে উৎপাতাস্তু দ্বিষাং বলে || ৩. ২৯. ৪৬||
ততঃ প্রববৃতে যুদ্ধং সেন যোরুভয়োরপি |
প্রসর্পদ্বিশিখৈঃ স্তোমবদ্ধান্ধতমসচ্ছটম্ || ৩. ২৯. ৪৭||
হন্যমানগজস্তোমসৃতশোণিতবিন্দুভিঃ |
হ্নীয়মাণশিরশ্ছন্নদৈত্যশ্বেতাতপত্রকম্ || ৩. ২৯. ৪৮||
ন দিশো ন নভো নাগা ন ভূমির্ন চ কিঞ্চন |
দৃশ্যতে কেবলং দৃষ্টং রজোমাত্রং চ সূর্চ্ছিতম্ || ৩. ২৯. ৪৯||
নৃত্যৎকবন্ধনিবহাবির্ভূততটপাদপম্ |
দৈত্যকেশসহস্রৈস্তু শৈবালাঙ্কুরকোমলা || ৩. ২৯. ৫০||
শ্বেতাতপত্রয়বলয়শ্বেতপঙ্কজভাসুরা |
চক্রকৃত্তকরিগ্রামপাদকূর্মপরংপরা || ৩. ২৯. ৫১||
শক্তিধ্বস্তমহাদৈত্যগলগণ্ডশিলোচ্চয়া |
বিলূনকাণ্ডৈঃ পতিতৈঃ সফেনা বলচামরৈঃ || ৩. ২৯. ৫২||
তীক্ষ্ণাসিবল্লরীজালৈর্নিবিডীকৃততীরভূঃ |
দৈত্যবীরেক্ষমশ্রেণিমুক্তিংসপুটভাসুরা || ৩. ২৯. ৫৩||
দৈত্যবাহনসংঘাতন ক্রমীনশতাকুলা |
প্রাবহচ্ছোণিতনদী সেনয়োর্যুধ্যমানয়োঃ || ৩. ২৯. ৫৪||
ইত্থং প্রববৃতে যুদ্ধং মৃত্যোশ্চ ত্রাসদায়কম্ |
চতুর্থয়ুদ্ধদিবসে প্রাতরা রভ্যভীষণম্ |
প্রহরদ্বয়পর্যন্তং সেনয়োরুভয়োরপি || ৩. ২৯. ৫৫||
ততঃ শ্রীললিতাদেব্যা ভণ্ডস্যাথাভবদ্রণঃ |
অস্ত্রপ্রত্যস্ত্রসংক্ষোভৈস্তুমুলীকৃতদিক্তটঃ || ৩. ২৯. ৫৬||
ধনুর্জ্যাতলটঙ্কারহুঙ্কারৈরতিভীষণঃ |
তূণীরবদনাৎকৃষ্টধনুর্বরবিনিঃ সৃতৈঃ |
বিমুক্তৈর্বিশিশৈর্ভীমৈরাহবে প্রাণহারিভিঃ || ৩. ২৯. ৫৭||
হস্তলাঘববেগেন ন প্রাজ্ঞায়ত কিঞ্চন |
মহারাজ্ঞীকরাংভোজব্যাপারং শরমোক্ষণে |
শৃণু সর্বং প্রবক্ষ্যামি কুম্ভসংভব সঙ্গরে || ৩. ২৯. ৫৮||
সংধানে ৎবেকধা তস্য দশধা চাপনির্গমে |
শতধা গগনে দৈত্যসৈন্যপ্রাপ্তৌ সহস্রধা |
দৈত্যাঙ্গসংগে সংপ্রাপ্তাঃ কোটিসংখ্যাঃ শিলীমুখাঃ || ৩. ২৯. ৫৯||
পরান্ধকারং সৃজতী ভিন্দতী রোদসী শরৈঃ |
মর্মাভিনৎপ্রচণ্ডস্য মহারাজ্ঞী মহেষুভিঃ || ৩. ২৯. ৬০||
বহৎকোপারুণং নেত্রং ততো ভণ্ডঃ স দানবঃ |
ববষ শরজালেন মহতা ললিতেশ্বরীম্ || ৩. ২৯. ৬১||
অন্ধতামিস্রকং নাম মহাস্ত্রং প্রমুমোচ সঃ |
মহাতরণিবাণেন তন্নুনোদ মহেশ্বরী || ৩. ২৯. ৬২||
পাখণ্ডাস্ত্রং মহাবীরো ভণ্ডঃ প্রমুমুচে রণে |
গায়ত্র্যস্ত্রং তস্য নুত্যৈ সসর্জ জগদংবিকা || ৩. ২৯. ৬৩||
অন্ধাস্ত্রমসৃজদ্ভণ্ডঃ শক্তিদৃষ্টিবিনাশনম্ |
চাক্ষুষ্মতমহাস্ত্রেণ শময়ায়াস তৎপ্রসূঃ || ৩. ২৯. ৬৪||
শক্তিনাশাভিধং ভণ্ডো মুমোচাস্ত্রং মহারণে |
বিশ্বাবসোরথাস্ত্রেণ তস্য দর্পমপাকরোৎ || ৩. ২৯. ৬৫||
অন্তকাস্ত্রং সসর্জোচ্চৈঃ সংক্রুদ্ধো ভডদানবঃ |
মহামৃত্যুঞ্জয়াস্ত্রেণ নাশয়ামাস তদ্বলম্ || ৩. ২৯. ৬৬||
সর্বাস্ত্রস্মৃতিনাশাখ্যমস্ত্রং ভণ্ডো ব্যমুঞ্চত |
ধারণাস্ত্রেণ চক্রেশী তদ্বলং সমনাশয়ৎ || ৩. ২৯. ৬৭||
ভয়াস্ত্রমসৃজদ্ভণ্ডঃ শক্তীনাং ভীতিদায়কম্ |
অভয়ঙ্করমৈন্দ্রাস্ত্রং মুমুচে জগদংবিকা || ৩. ২৯. ৬৮||
মহারোগাস্ত্রমসৃজচ্ছক্তিসেনাসু দানবঃ |
রাজয়ক্ষ্মাদয়ো রোগাস্ততোঽভূবন্সহস্রশঃ || ৩. ২৯. ৬৯||
তন্নিবারণসিদ্ধ্যর্থং ললিতা পরমেশ্বরী |
নামত্রয়মহামন্ত্রমহাস্ত্রং সা মুমোচ হ || ৩. ২৯. ৭০||
অচ্যুতশ্চাপ্যনন্তশ্চ গোবিন্দস্তু শরোত্থিতাঃ |
হুঙ্কারমাত্রতো দগ্ধ্বারোগাংস্তাননয়ন্মুদম্ || ৩. ২৯. ৭১||
নৎবা চ তাং মহেশানীং তদ্ভক্তব্যাধিমর্দনম্ |
বিধাতুং ত্রিষু লোকেষু নিয়ুক্তাঃ স্বপদং যয়ুঃ || ৩. ২৯. ৭২||
আয়ুর্নাশনমস্ত্রং তু মুক্তবান্ভণ্ডদানবঃ |
কালসংকর্ষণীরূপমস্ত্রং রাজ্ঞী ব্যমুঞ্চত || ৩. ২৯. ৭৩||
মহাসুরাস্ত্রমুদ্দামং ব্যসৃজদ্ভণ্ডদানবঃ |
ততঃ সহস্রশো জাতা মহাকায়া মহাবলাঃ || ৩. ২৯. ৭৪||
মধুশ্চ কৈটভশ্চৈব মহিষাসুর এব চ |
ধূম্রলোচনদৈত্যশ্চ চণ্ডমুণ্ডাদয়োঽসুরাঃ || ৩. ২৯. ৭৫||
চিক্ষুভশ্চামরশ্চৈব রক্তবীজোঽসুরস্তথা |
শুম্ভশ্চৈব নিশুম্ভশ্চ কালকেয়া মহাবলাঃ || ৩. ২৯. ৭৬||
ধূম্রাভিধানাশ্চ পরে তস্মাদস্ত্রাৎসমুত্থিতাঃ |
তে সর্বে দানবশ্রেষ্ঠাঃ কঠোরৈঃ শস্ত্রমণ্ডলৈঃ || ৩. ২৯. ৭৭||
শক্তিসেনাং মর্দয়ন্তো নর্দ্দন্তশ্চ ভয়ঙ্করম্ |
হাহেতি ক্রন্দমানাশ্চশক্তয়ো দৈত্যমর্দিতাঃ || ৩. ২৯. ৭৮||
ললিতাং শরণং প্রাপ্তাঃ পাহি পাহীতি সৎবরম্ |
অথ দেবী ভৃশং ক্রুদ্ধা রুষাট্টহাসমাতনোৎ || ৩. ২৯. ৭৯||
ততঃ সমুত্থিতা কাচিদ্দুর্গা নাম যশস্বিনী |
সমস্তদেবতেজোভির্নির্মিতা বিশ্বরূপিণী || ৩. ২৯. ৮০||
শূলং চ শূলিনা দত্তং চক্রং চক্রিসমর্পিতম্ |
শঙ্খং বরুণদত্তশ্চ শক্তিং দত্তাং হবির্ভুজা || ৩. ২৯. ৮১||
চাপমক্ষয়তূণীরৌ মরুদ্দত্তৌ মহামৃধে |
বজ্রিদত্তং চ কুলিশং চষকন্ধনদার্পিতম্ || ৩. ২৯. ৮২||
কালদণ্ডং মহাদণ্ডং পাশং পাশধরার্পিতম্ |
ব্রহ্মদত্তাং কুণ্ডিকাং চ ঘণ্টামৈরাবতার্পিতাম্ || ৩. ২৯. ৮৩||
মৃত্যুদত্তৌ খড্গখেটৌ হারং জলধিনার্পিতম্ |
বিশ্বকর্মপ্রদত্তানি ভূষণানি চ বিভ্রতী || ৩. ২৯. ৮৪||
অঙ্গৈঃ সহস্রকিরণশ্রেণিভাসুররশ্মিভিঃ |
আয়ুধানি সমস্তানি দীপয়ন্তি মহোদয়ৈঃ || ৩. ২৯. ৮৫||
অন্যদত্তৈরথান্যৈশ্চ শোভমানা পরিচ্ছদৈঃ |
সিংহবাহনমারুহ্য যুদ্ধং নারায়ণীব্যধাৎ || ৩. ২৯. ৮৬||
তথা তে মহিষপ্রখ্যা দানবা বিনিপাতিতাঃ |
চণ্ডিকাসপ্তশত্যাং তু যথা কর্ম পুরাকরোৎ || ৩. ২৯. ৮৭||
তথৈব সমরঞ্চক্রে মহিষাদিমদাপহম্ |
তৎকৃৎবা দুষ্করং কর্ম ললিতাং প্রণনাম সা || ৩. ২৯. ৮৮||
মূকাস্ত্রমসৃদ্দুষ্টঃ শক্তিসেনাসু দানবঃ |
মহাবাগ্বা দিনী নাম সসর্জাস্ত্রং জগৎপ্রসূঃ || ৩. ২৯. ৮৯||
বিদ্যারূপস্য বেদস্য তস্করানসুরাধমান্ |
সসর্জ তত্র সমরে দুর্মদো ভণ্ডদানবঃ || ৩. ২৯. ৯০||
দক্ষহস্তাঙ্গুষ্ঠনখান্মহারাজ্ঞ্যা তিরস্কৃতঃ |
অর্ণবাস্ত্রং মহাদীরো ভণ্ডদৈত্যো রণেঽসৃজৎ || ৩. ২৯. ৯১||
তত্রোদ্দামপয়ঃ পূরে শক্তিসৈন্যং মমজজ চ |
অথ শ্রীললিতাদক্ষহস্ততর্জনিকানখাৎ |
আদিকূর্মঃ সমুৎপন্নো যোজনায়তবিস্তরঃ || ৩. ২৯. ৯২||
ধৃতাস্তেন মহাভোগখর্পরেণ প্রথীয়সা |
শক্তয়ো হর্ষমাপন্নাঃ সাগরাস্ত্রভয়ং জহুঃ || ৩. ২৯. ৯৩||
তৎসামুদ্রং চ ভগবান্সকলং সলিলং পপৌ |
হৈরণ্যাক্ষং মহাস্ত্রং তু বিজহৌ দুষ্টদানবঃ || ৩. ২৯. ৯৪||
তস্মাৎসহস্রশো জাতা হিরণ্যাক্ষা গদায়ুধাঃ |
তৈর্হন্যমানে শক্তীনাং সৈন্যে সন্ত্রা সবিহ্বলে |
ইতস্ততঃ প্রচলিতে শিথিলে রণকর্মণি || ৩. ২৯. ৯৫||
অথ শ্রীললিতাদক্ষহস্তমধ্যাঙ্গুলীনখাৎ |
মহাবরাহঃ সমভূচ্ছ্বেতঃ কৈলাসসংনিভঃ || ৩. ২৯. ৯৬||
তেন বজ্রসমানেন পোত্রিণাভিবিদারিতাঃ |
কোটিশস্তে হিরণ্যাক্ষা মর্দ্যমানাঃ ক্ষয়ং গতাঃ || ৩. ২৯. ৯৭||
অথভণ্ডস্ত্বতিক্রোধাদ্ভুকুটীং বিততান হ |
তস্য ভ্রুকুটিতো জাতা হিরণ্যাঃ কোটিসংখ্যকাঃ || ৩. ২৯. ৯৮||
জ্বলদাদিত্যবদ্দীপ্তা দীপপ্রহরণাশ্ব তে |
অমর্দয়চ্চক্তিসৈন্যং প্রহ্লাদং চাপ্যমর্দয়ন্ || ৩. ২৯. ৯৯||
যঃ প্রহ্লাদোঽস্তি শক্তীনাং পরমানন্দলক্ষণঃ |
স এব বালকোভূৎবা হিরণ্যপরিপীডিতঃ || ৩. ২৯. ১০০||
ললিতাং শরণং প্রাপ্তস্তেন রাজ্ঞী কৃপামগাৎ |
অথ শক্ত্যা নন্দরূপং প্রহ্লাদং পরিরক্ষিতুম্ || ৩. ২৯. ১০১||
দক্ষহস্তানামিকাগ্রং ধুনোতি স্ম মহেশ্বরী |
তস্মাদ্ ধূতসটাজালঃ প্রজ্বলল্লোচনত্রয়ঃ || ৩. ২৯. ১০২||
সিংহাস্যঃ পুরুষা কারঃ কণ্ঠস্যাধো জনার্দনঃ |
নখায়ুধঃ কালরুদ্ররূপী ঘোরাট্টহাসবান্ || ৩. ২৯. ১০৩||
সহস্রসংখ্যদোর্দণ্ডো ললিতাজ্ঞানুপালকঃ |
হিরণ্যকশিপূন্সর্বান্ভণ্ডভ্রুকুটিসংভবান্ || ৩. ২৯. ১০৪||
ক্ষণাদ্বিদারয়ামাস নখৈঃ কুলিশকর্কশৈঃ |
বলীন্দ্রাস্ত্রং মহাঘোরং সর্বদৈবতনাশনম্ |
অমুঞ্চল্ললিতা দেবী প্রতিভণ্ডমহাসুরম্ || ৩. ২৯. ১০৫||
তদস্ত্রদর্পনাশায় বামনাঃ শতশোঽভবন্ |
মহারাজ্ঞীদক্ষহস্তকনিষ্ঠাগ্রান্মহৌজসঃ || ৩. ২৯. ১০৬||
ক্ষণেক্ষণে বর্ধমানাঃ পাশহস্তা মহাবলাঃ |
বলীন্দ্রানস্ত্রসংভূতান্বধ্নন্তঃ পাশবন্ধনৈঃ || ৩. ২৯. ১০৭||
দক্ষহস্তকনিষ্ঠাগ্রাজ্জাতাঃ কামেশয়োষিতঃ |
মহাকায়া মহোৎসাহাস্তদস্ত্রং সমনাশয়ন্ || ৩. ২৯. ১০৮||
হৈহয়াস্ত্রং সমসৃজদ্ভণ্ডদৈত্যো রণাজিরে |
তস্মাৎসহস্রশোজাতাঃ সহস্রার্জুনকোটয়ঃ || ৩. ২৯. ১০৯||
অথ শ্রীললিতাবামহস্তাঙ্গুষ্টনখাদিতঃ |
প্রজ্বলন্ভার্গবো রামঃ সক্রোধঃ সিংহনাদবান্ || ৩. ২৯. ১১০||
ধারয়া দারয়ন্নেতান্কুঠারস্য কঠোরয়া |
সহস্রার্জুনসংখ্যাতান্ক্ষণাদেব ব্যনাশয়ন্ || ৩. ২৯. ১১১||
অথ ক্রুদ্ধো ভণ্ডদৈত্যঃ ক্রোধাদ্ধুঙ্কারমাতনোৎ |
তস্মাদ্ধুঙ্কারতো জাতশ্চন্দ্রহাসকৃপাণবান্ || ৩. ২৯. ১১২||
সহস্রাক্ষৌহিণীরক্ষঃসেনয়া পরিবারিতঃ |
কনিষ্ঠং কুংভকর্ণং চ মেঘনাদং চ নন্দনম্ |
গৃহীৎবা শক্তিসৈন্যং তদতিদূরমমর্দয়ৎ || ৩. ২৯. ১১৩||
অথ শ্রীললিতাবামহস্ততর্জনিকানখাৎ |
কোদণ্ডরামঃ সমভূল্লক্ষ্মণেন সমন্বিতঃ || ৩. ২৯. ১১৪||
জটামুকুটবান্বল্লীবন্ধ্ধতূণীরপৃষ্টভূঃ |
নীলোৎপলদলশ্যামো ধনুর্বিস্ফারয়ন্মুহুঃ || ৩. ২৯. ১১৫||
নাশয়ামাস দিব্যাস্ত্রৈঃ ক্ষণাদ্রাক্ষসসৈনিকম্ |
মর্দয়ামাস পৌলস্ত্যং কুংভকর্ণং চ সোদরম্ |
লক্ষ্মণো মেঘনাদং চ মহাবীরমনাশয়ৎ || ৩. ২৯. ১১৬||
দ্বিবিদাস্ত্রং মহাভীমমসৃজদ্ভণ্ডদানবঃ |
তস্মাদনেকশো জাতাঃ কপয়ঃ পিঙ্গলোচনাঃ || ৩. ২৯. ১১৭||
ক্রোধেনাত্যন্ততা ম্রাস্যাঃ প্রত্যেকং হনুমৎসমাঃ |
ব্যনাশয়চ্ছক্তিসৈন্যং ক্রূরক্রেঙ্কারকারিণঃ || ৩. ২৯. ১১৮||
অথ শ্রীললিতাবামহস্তমধ্যাঙ্গুলীনখাৎ |
আবির্বভূব তালাঙ্কঃ ক্রোধমধ্যারুণেক্ষণঃ || ৩. ২৯. ১১৯||
নীলাংবরপিনদ্ধাঙ্গঃ কৈলাসাচলনির্মলঃ |
দ্বিবিদাস্ত্রসমুদ্ভূতান্কপীন্সর্ন্বান্ব্যনাশয়ন্ || ৩. ২৯. ১২০||
রাজাসুরং নাম মহৎসসর্জাস্ত্রং মহাবলঃ |
তস্মাদস্ত্রাৎসমুদ্ভূতা বহবো নৃপদানবাঃ || ৩. ২৯. ১২১||
শিশুপালো দন্তবক্ত্রঃ শাল্বঃ কাশীপতিস্তথা |
পৈণ্ড্রকো বাসুদেবশ্চ রুক্মী ডিংভকহংসকৌ || ৩. ২৯. ১২২||
শংবরশ্চ প্রলংবশ্চ তথা বাণাসুরোঽপি চ |
কংসশ্চাণূরমল্লশ্চ মুষ্টিকোৎপলশেখরৌ || ৩. ২৯. ১২৩||
অরিষ্টো ধেনুকঃ কেশী কালিয়ো যমলার্জুনৌ |
পূতনা শকটশ্চৈব তৃণাবর্তাদয়োঽসুরাঃ || ৩. ২৯. ১২৪||
নরকাখ্যো মহাবীরো বিষ্ণুরূপী মুরাসুরঃ |
অনেকে সহ সেনাভিরুত্থিতাঃ শস্ত্রপাণয়ঃ || ৩. ২৯. ১২৫||
তান্বিনাশয়িতুংসর্বান্বাসুদেবঃ সনাতনঃ |
শ্রীদেবীবামহস্তাব্জানামিকানখসংভবঃ || ৩. ২৯. ১২৬||
চতুর্ব্যূহং সমাতেনে চৎবারস্তে ততোঽভবন্ |
বাসুদেবো দ্বিতীয়স্তু সংকর্ষণ ইতি স্মৃতঃ || ৩. ২৯. ১২৭||
প্রদ্যুম্নশ্চানিরুদ্ধশ্চ তে সর্বে প্রীদ্যতায়ুধাঃ |
তানশেষান্দুরাচারান্ভূমভোরপ্রবর্তকান্ || ৩. ২৯. ১২৮||
নাশয়ামাসুরুর্বীশবেষচ্ছন্নান্মহাসুরান্ || ৩. ২৯. ১২৯||
অথ তেষু বিনষ্টেষু সংক্রুদ্ধো ভণ্ড্রদানবঃ |
ধর্মবিপ্লাবকং ঘোরং কল্যস্ত্রং সমমুঞ্চত || ৩. ২৯. ১৩০||
ততঃ কল্যস্ত্রতোজাতা আন্ধ্রাঃ পুণ্ডাশ্চ ভূমিপাঃ |
কিরাতাঃ শবরা হূণা যবনাঃ পাপবৃত্তয়ঃ || ৩. ২৯. ১৩১||
বেদ বিপ্লাবকা ধর্মদ্রোহিণঃ প্রাণহিংসকাঃ |
বর্ণাশ্রমেষু সাংকর্যকারিণো মলিনাঙ্গকাঃ |
ললিতাশক্তিসৈন্যানি ভূয়োভূয়ো ব্যমর্দয়ন্ || ৩. ২৯. ১৩২||
অথ শ্রীললিতাবামহস্তপদ্মস্য ভাস্বতঃ |
কনিষ্ঠিকানখোদ্ভূতঃ কল্কির্নাম জনার্দনঃ || ৩. ২৯. ১৩৩||
অশ্বারূঢঃ প্রতীপ্ত শ্রীরট্টহাসং চকার সঃ |
তস্যৈব ধ্বনিনা সর্বে বজ্রনিষ্পেষবন্ধুনা || ৩. ২৯. ১৩৪||
কিরাতা মূর্চ্ছিতা নেশুঃ শক্তয়শ্চাপি হর্ষিতাঃ |
দশাবতারনাথাস্তে কৃৎবেদং কর্ম দুষ্করম্ || ৩. ২৯. ১৩৫||
ললিতাং তাং নমস্কৃত্য বদ্ধাঞ্জলিপুটাঃ স্থিতাঃ |
প্রতিকল্পং ধর্মরক্ষাং কর্তুং মৎস্যা দিজন্মভিঃ |
ললিতাংবানিয়ুক্তাস্তে বৈকুণ্ঠায় প্রতস্থিরে || ৩. ২৯. ১৩৬||
ইত্থং সমস্তেষ্বস্ত্রংষু নাশিতেষু দুরাশয়ঃ |
মহামোহাস্ত্রমসৃজচ্ছক্তয়স্তেন মূর্ছিতাঃ || ৩. ২৯. ১৩৭||
শাংভবাস্ত্রং বিসৃজ্যাংবা মহামোহাস্ত্রমক্ষিণোৎ |
অস্ত্রপ্রত্যস্ত্রধারাভিরিত্থং জাতে মহাহবে |
অস্তশৈলঙ্গভস্তীশো গন্তুমারভতারুণঃ || ৩. ২৯. ১৩৮||
অথ নারায়ণাস্ত্রেণ সা দেবী ললিতাংবিকা |
সর্বা অক্ষৌহিণীস্তস্য ভস্মসাদকরোদ্রণে || ৩. ২৯. ১৩৯||
অথ পাশুপতাস্ত্রেণ দীপ্তকালানলৎবিষা |
চৎবারিংশচ্চমূনাথান্মহারাজ্ঞী ব্যমর্দয়ৎ || ৩. ২৯. ১৪০||
অথৈকশেষং তং দুষ্টং নিহতাশেষবান্ধবম্ |
ক্রোধেন প্রজ্বলন্তং চ জগদ্বিপ্লবকারিণম্ || ৩. ২৯. ১৪১||
মহাসুরং মহাসত্ত্বং ভণ্ডং চণ্ডপরাক্রমম্ |
মহাকামেশ্বরাস্ত্রেণ সহস্রাদিত্যবর্চসা |
গতাসুমকরোন্মাতা ললিতা পরমেশ্বরী || ৩. ২৯. ১৪২||
তদস্ত্রজ্বালয়াক্রান্তং শূন্যকং তস্য পট্টনম্ |
সস্ত্রীকং চ সবালং চ সগোষ্ঠং ধনধান্যকম্ || ৩. ২৯. ১৪৩||
নির্দগ্ধমাসীৎসহসা স্থলমাত্রমশিষ্যত |
ভণ্ডস্য সংক্ষয়েণাসীত্ত্রৈলোক্যং হর্ষনর্তিতম্ || ৩. ২৯. ১৪৪||
ইত্থং বিধায় সুরকার্যমনিন্দ্যশীলা শ্রীচক্ররাজরথমণ্ডলমণ্ডনশ্রীঃ |
কামেশ্বরী ত্রিজগতাং জননী বভাসে বিদ্যোতমানবিভবা বিজ্যশ্রিয়াঢ্যা || ৩. ২৯. ১৪৫||
সৈন্যং সমস্তমপি সঙ্গরকর্মখিন্নং ভণ্ডাসুরপ্রবলবাণকৃশানুতপ্তম্ |
অস্তং গতে সবিতরি প্রথিতপ্রভাবা শ্রীদেবতা শিবিরমাত্মন আনিনায় || ৩. ২৯. ১৪৬||
যো ভণ্ডদানববধং ললিতাংবয়েমং কৢপ্তং সকৃৎপঠতি তস্য তপোধনেন্দ্র |
নাশং প্রয়ান্তি কদনানি দৃতাষ্টসিদ্ধের্ভুক্তিশ্চ মুক্তিরপি বর্তত এব হস্তে || ৩. ২৯. ১৪৭||
ইমং পবিত্রং ললিতাপরাক্রমং সমস্তপাপঘ্নমশেষসিদ্ধিদম্ |
পঠন্তি পুণ্যেষু দিনেষু যে নরা ভজন্তি তে ভাগ্যসমৃদ্ধিমুত্তমাম্ || ৩. ২৯. ১৪৮||
ইতি শ্রীব্রহ্মাণ্ডপুরাণে উত্তরভাগে হয়গ্রীবাগস্ত্যসংবাদে ললিতোপাখ্যানে ভণ্ডাসুরবধো নামৈকোনত্রিংশোঽধ্যায়ঃ

অগস্ত্য উবাচ
অশ্বানন মহাপ্রাজ্ঞ শ্রুতমাখ্যানমুত্তমম্ |
বিক্রমো ললিতাদেব্যা বিশিষ্টো বর্ণিতস্ত্বয়া || ৩. ৩০. ১||
চরিতৈরনঘৈর্দেব্যাঃ সুপ্রীতোঽস্মি হয়ানন |
শ্রুতা সা মহতীশক্তির্মন্ত্রিণীদণ্ডনাথয়োঃ || ৩. ৩০. ২||
পশ্চাৎকিমকরোত্তত্র যুদ্ধানন্তরমংবিকা |
চতুর্থদিনশর্বর্যাং বিভাতায়াং হয়ানন || ৩. ৩০. ৩||
হয়গ্রীব উবাচ
শৃণু কুম্ভজ তৎপ্রাজ্ঞ যত্তয়া জগদংবয়া |
পশ্চাদাচরিতং কর্ম নিহতে ভণ্ডদানবে || ৩. ৩০. ৪||
শক্তীনামখিলং সৈন্যং দৈত্যয়ুধশতার্দিতম্ |
মুহুরাহ্লাদয়ামাস লোচনৈরমৃতাপ্লুতৈঃ || ৩. ৩০. ৫||
ললিতাপরমেশান্যাঃ কটাক্ষামৃতধারয়া |
জহুর্যুদ্ধপরিশ্রান্তিং শক্তয়ঃ প্রীতিমানসাঃ || ৩. ৩০. ৬||
অস্মিন্নবসরে দেবা ভণ্ডমর্দনতোষিতাঃ |
সর্বেঽপি সেবিতুং প্রাপ্তা ব্রহ্মবিষ্ণুপুরোগমাঃ || ৩. ৩০. ৭||
ব্রহ্মা বিষ্ণুশ্চ রুদ্রশ্চ শক্রাদ্যাস্ত্রিদশাস্তথা |
আদিত্যা বসবো রুদ্রা মরুতঃ সাধ্যদেবতাঃ || ৩. ৩০. ৮||
সিদ্ধাঃ কিংপুরুষা যক্ষা নিরৃত্যাদ্যা নিশাচরাঃ |
প্রহ্লাদাদ্যা মহাদৈত্যাঃ সর্বেঽপ্যণ্ডনিবাসিনঃ || ৩. ৩০. ৯||
আগত্য তুষ্টুবুঃ প্রীত্যা সিংহাসনমহেশ্বরীম্ || ৩. ৩০. ১০||
ব্রহ্মাদ্যা ঊচুঃ
নমোনমস্তে জগদেকনাথে নমোনমঃ শ্রীত্রিপুরাভিধানে |
নমোনমো ভণ্ডমহাসুরঘ্নে নমোঽস্তু কামেশ্বরি বামকেশি || ৩. ৩০. ১১||
চিন্তামণে চিন্তিতদানদক্ষেঽচিন্তয়ে চিরাকারতরঙ্গমালে |
চিত্রাম্বরে চিত্রজগৎপ্রসূতে চিত্রাখ্যনিত্যে সুখদে নমস্তে || ৩. ৩০. ১২||
মোক্ষপ্রদে মুগ্ধশশাঙ্কচূডে মুগ্ধস্মিতে মোহনভেদদক্ষে |
মুদ্রেশ্বরীচর্চিতরাজতন্ত্রে মুদ্রাপ্রিয়ে দেবি নমোনমস্তে || ৩. ৩০. ১৩||
ক্রূরান্তকধ্বংসিনি কোমলাঙ্গে কোপেষু কালীং তনুমাদধানে |
ক্রোডাননে পালিতসৈন্যচক্রে ক্রোডীকৃতাশেষভয়ে নমস্তে || ৩. ৩০. ১৪||
ষডঙ্গদেবীপরিবারকৃষ্ণে ষডঙ্গয়ুক্তশ্রুতিবাক্যমৃগ্যে |
ষট্চক্রসংস্থে চ ষডূর্মিয়ুক্তে ষড্ভাবরূপে ললিতে নমস্তে || ৩. ৩০. ১৫||
কামে শিবে মুখ্যসমস্তনিত্যে কান্তাসনান্তে কমলায়তাক্ষি |
কামপ্রদে কামিনি কামশংভোঃ কাম্যে কলানামধিপে নমস্তে || ৩. ৩০. ১৬||
দিব্যৌষধাদ্যে নগরৌঘরূপে দিব্যে দিনাধীশসহস্রকান্তে |
দেদীপ্যমানে দয়য়া সনাথে দেবাধিদেবপ্রমদে নমস্তে || ৩. ৩০. ১৭||
সদাণিমাদ্যষ্টকসেবনীয়ে সদাশিবাত্মোজ্জ্বলমঞ্চবাসে |
সভ্যে সদেকাল যপাদপূজ্যে সবিত্রি লোকস্য নমোনমস্তে || ৩. ৩০. ১৮||
ব্রাহ্মীমুখৈর্মাতৃগণৈর্নিষেব্যে ব্রহ্মপ্রিয়ে ব্রাহ্মণবন্ধমেত্রি |
ব্রহ্মামৃতস্রোতসি রাজহংসিব্রহ্মেশ্বরি শ্রীললিতে নমস্তে || ৩. ৩০. ১৯||
সংক্ষোভিণীমুখ্যসমস্তমুদ্রাসংসেবিতে সংসরণপ্রহন্ত্রি |
সংসারলীলাকৃতিসারসাক্ষি সদা নমস্তে ললিতেঽধিনাথে |
নিত্যে কলাষোডশকেন নামাকর্ষিণ্যধীশি প্রমথেন সেব্যে || ৩. ৩০. ২০||
নিত্যে নিরাতঙ্কদয়াপ্রপঞ্চে নীলালকশ্রেণি নমোনমস্তে |
অনঙ্গপুষ্পাদিভিরুন্নদাভিরনঙ্গদেবীভিরজস্রসেব্যে |
অভব্যহন্ত্র্যক্ষররাশিরূপে হতারিবর্গে ললিতে নমস্তে || ৩. ৩০. ২১||
সংক্ষোভিণীমুখ্যচতুর্দশার্চির্মালাবৃতোদারমহাপ্রদীপ্তে |
আত্মানমাবিভ্রতি বিভ্রমাঢ্যে শুভ্রাশ্রয়ে শুভ্রপদে নমস্তে || ৩. ৩০. ২২||
সশর্বসিদ্ধাদি কশক্তিবন্দ্যে সর্বজ্ঞবিজ্ঞাতপদারবিন্দে |
সর্বাধিকে সর্বগতে সমস্তসিদ্ধিপ্রদে শ্রীললিতে নমস্তে || ৩. ৩০. ২৩||
সর্বজ্ঞজাতপ্রথমাভিরন্যদেবী ভিরপ্যাশ্রিতচক্রভূমে |
সর্বামরাকাঙ্ক্ষিতপূরয়িত্রি সর্বস্য লোকস্য সবিত্রি পাহি || ৩. ৩০. ২৪||
বন্দে বশিন্যাদিকবাগ্বিভূতে বর্দ্ধিষ্ণুচক্র দ্যুতিবাহবাহে |
বলাহকশ্যামকচে বচোঽব্ধে বরপ্রদে সুংদরি পাহি বিশ্বম্ || ৩. ৩০. ২৫||
বাণাদিদিব্যায়ুধসার্বভৌমে ভণ্ডাসুরানীকবনান্তদাবে |
অত্যুগ্রতেজোজ্জ্বলিতাংবুরাশে প্রসেব্যমানে পরিতো নমস্তে || ৩. ৩০. ২৬||
কামেশি বজ্রেশি ভগেশ্যরূপে কন্যে কলে কালবিলোপদক্ষে |
কথাবিশেষীকৃতদৈত্যসৈন্যে কামেশয়ান্তে কমলে নমস্তে || ৩. ৩০. ২৭||
বিন্দুস্থিতে বিন্দুকলৈকরূপে বিন্দ্বাত্মিকে বৃংহিতচিৎপ্রকাশে |
বৃহৎকুচংভোজবিলোলহারে বৃহৎপ্রভাবে ললিতে নমস্তে || ৩. ৩০. ২৮||
কামেশ্বরোৎসংগসদানিবাসে কালাত্মিকে দেবি কৃতানুকংপে |
কল্পাবসানোত্থিত কালিরূপে কামপ্রদে কল্পলতে নমস্তে || ৩. ৩০. ২৯||
সবারুণে সাংদ্রসুধাংশুশীতে সারঙ্গশাবাক্ষি সরোজবক্ত্রে |
সারস্য সারস্য সদৈকভূমে সমস্তবিদ্যেশ্বরি সংনতিস্তে || ৩. ৩০. ৩০||
তব প্রভাবেণ চিদগ্নিজায়াং শ্রীশংভুনাথপ্রকডীকৃতায়াঃ |
ভণ্ডাসুরাদ্যাঃ সমরে প্রচণ্ডা হতা জগৎকণ্টকতাং প্রয়াতাঃ || ৩. ৩০. ৩১||
নব্যানি সর্বাণি বপূংষি কৃৎবা হি সাংদ্রকারুণ্যসুধাপ্লবৈর্ন্নঃ |
ৎবয়া সমস্তং ভুবনং সহর্ষং সুজীবিতং সুংদরি সভ্যলভ্যে || ৩. ৩০. ৩২||
শ্রীশংভুনাথস্য মহাশয়স্য দ্বিতীয়তেজঃ প্রসরাত্মকে যঃ |
স্থাণ্বাশ্রমে কৢপ্ততয়া বিরক্তঃ সতীবিয়োগেন বিরস্তভোগঃ || ৩. ৩০. ৩৩||
তেনাদ্রিবংশে ধৃতজন্মলাভাং কন্যামুমাং যোজয়িতুং প্রবৃত্তাঃ |
এবং স্মরং প্রেরিতবন্ত এব তস্যান্তিকং ঘোর তপঃস্থিতস্য || ৩. ৩০. ৩৪||
তেনাথ বৈরাগ্যতপোবিঘাতক্রোধেন লালাটকৃশানুদগ্ধঃ |
ভস্মাবশেষো মদনস্ততোঽভূত্ততো হি ভণ্ডাসুর এষ জাতঃ || ৩. ৩০. ৩৫||
ততো বধস্তস্য দুরাশয়স্য কৃতো ভবত্যা রণদুর্মদস্য |
অথাস্মদর্থে ৎবতনুস্সজাতস্ত্বং কামসংজীবনমাশুকুর্যাঃ || ৩. ৩০. ৩৬||
ইয়ং রতির্ভর্তৃবিয়োগখিন্না বৈধব্যমত্যন্তমভব্যমাপ |
পুনস্ত্বদুৎপাদিতকামসংগাদ্ভবিষ্যতি শ্রীললিতে সনাথা || ৩. ৩০. ৩৭||
তয়া তু দৃষ্টেন মনোভবেন সংমোহিতঃ পূর্ববদিন্দুমৌলিঃ |
চিরং কৃতাত্যন্তমহাসপর্যা তাং পার্বতীং দ্রাক্পরিণেষ্যতীশঃ || ৩. ৩০. ৩৮||
তয়োশ্চ সংগাদ্ভবিতা কুমারঃ সমস্তগীর্বাণচমূবিনেতা |
তেনৈব বীরেণ রণে নিরস্য স তারকো নাম সুরারিরাজঃ || ৩. ৩০. ৩৯||
যো ভণ্ডদৈত্যস্য দুরাশয়স্য মিত্রং স লোকত্রয়ধূমকেতুঃ |
শ্রীকণ্ঠপুত্রৈণ রণে হতশ্চেৎপ্রাণপ্রতিষ্ঠৈব তদা ভবেন্নঃ || ৩. ৩০. ৪০||
তস্মাত্ত্বমংবত্রিপুরে জনানাং মানাপহং মন্মথবীরবর্যম্ |
উৎপাদ্যরত্যা বিধবাৎবদুঃখমপাকুরু ব্যাকুলকুন্তলায়াঃ || ৩. ৩০. ৪১||
এষা ৎবনাথা ভবতীং প্রপন্না ভর্তৃপ্রণাশেন কৃশাঙ্গয়ষ্টিঃ |
নমস্করোতি ত্রিপুরাভিধানে তদত্র কারুণ্যকলাং বিধেহি || ৩. ৩০. ৪২||
হয়গ্রীব উবাচ
ইতি স্তুৎবা মহেশানী ব্রহ্মাদ্যা বিবুধোত্তমাঃ |
তাং রতিং দর্শয়মাসুর্মলিনাং শোককর্শিতম্ || ৩. ৩০. ৪৩||
সা পর্যশ্রুমুখী কীর্ণকুন্তলা ধূলিধূসরা |
ননাম জগদংবাং বৈ বৈধব্যত্যক্তভূষণা || ৩. ৩০. ৪৪||
অথ তদ্দর্শনোৎপন্নকারুণ্যা পরমেশ্বরী |
ততঃ কটাক্ষাদুৎপন্নঃ স্ময়মানসুখাংবুজঃ || ৩. ৩০. ৪৫||
পূর্বদেহাধিকরুচির্মন্মথো মদমেদুরঃ |
দ্বিভুজঃ সর্বভূষাঢ্যঃ পুষ্পেষুঃ পুষ্পকার্মুকঃ || ৩. ৩০. ৪৬||
আনন্দয়ন্কটাক্ষেণ পূর্বজন্মপ্রিয়াং রতিম্ |
অথ সাপি রতির্দেবী মহত্যানন্দসাগরে |
মজ্জন্তী নিজভর্তারমবরোক্য মুদং গতা || ৩. ৩০. ৪৭||
আনন্দয়ন্কটাক্ষেণ পূর্বজন্মপ্রিয়াং রতিম্ |
অথ সাপি রতির্দেবী মহত্যানন্দসাগরে |
মজ্জন্তী নিজভর্তারমবলোক্য মুদং গতা || ৩. ৩০. ৪৮||
শ্যামলে স্নাপয়িৎবৈনাং বস্ত্রকাঞ্চ্যাদিভূষণৈঃ |
অলঙ্কৃত্য যথাপূর্বং শীঘ্রমানীয়তামিহ || ৩. ৩০. ৪৯||
তদাজ্ঞাং শিরসা ধৃৎবা শ্যামা সর্বং তথাকরোত |
ব্রহ্মর্ষিভির্বসিষ্ঠাদ্যৈর্বৈবাহি কবিধানতঃ || ৩. ৩০. ৫০||
কারয়ামাস দংপত্যোঃ পাণিগ্রহণমঙ্গলম্ |
অপ্সরোভিশ্চ সর্বাভির্নৃত্যগীতাদিসংযুতম্ || ৩. ৩০. ৫১||
এতদ্দৃষ্ট্বা মহেন্দ্রাদ্যা ঋষয়শ্চ তপোধনাঃ |
সাধুসাধ্বিতি শংসংতস্তুষ্টুবুর্ললিতাংবিকাম্ || ৩. ৩০. ৫২||
পুষ্পবৃষ্টিং বিমুঞ্চন্তঃ সর্বে সন্তুষ্টমানসাঃ |
বভূবুস্তৌ মহাভক্ত্যা প্রণম্য ললিতেশ্বরীম্ || ৩. ৩০. ৫৩||
তৎপার্শ্বে তু সমাগত্য বদ্ধাঞ্জলিপুটৌ স্থিতৌ |
অথ কন্দর্পবীরোঽপি নমস্কৃত্য মহেশ্বরীম্ |
ব্যজ্ঞাপয়দিদং বাক্যং ভক্তিনির্ভরমানসঃ || ৩. ৩০. ৫৪||
যদ্দগ্ধমীশনেত্রেণ বপুর্মে ললিতাংবিকে |
তত্ত্বদীয়কটাক্ষস্য প্রসাদাৎপুনরাগতম্ || ৩. ৩০. ৫৫||
তব পুত্রোঽস্মি দাসোঽস্মি ক্বাপি কৃত্যে নিয়ুঙ্ক্ষ্ব মাম্ |
ইত্যুক্তা পরমেশানী তমাহ মকরধ্বজম্ || ৩. ৩০. ৫৬||
শ্রীদেব্যুবাচ
বৎসাগচ্ছ মনোজন্মন্ন ভয়ং তব বিদ্যতে |
মৎপ্রসাদাজ্জগৎসর্বং মোহয়াব্যাহতাশুগ || ৩. ৩০. ৫৭||
তদ্বাণপাতনাজ্জাতধৈর্যবিপ্লব ঈশ্বরঃ |
পর্বতস্য সুতাং গৌরীং পরিণেষ্যতি সৎবরম্ || ৩. ৩০. ৫৮||
সহস্রকোটয়ঃ কামা মৎপ্রসাদাত্ত্বদুদ্ভবাঃ |
সর্বেষাং দেহমাবিশ্য দাস্যন্তি রতিমুত্তমাম্ || ৩. ৩০. ৫৯||
মৎপ্রসাদেন বৈরাগ্যাৎসংক্রুদ্ধোঽপি স ঈশ্বরঃ |
দেহদাহং বিধাতুং তে ন সমর্থো ভবিষ্যতি || ৩. ৩০. ৬০||
অদৃশ্যমূর্তিঃ সর্বেষাং প্রাণিনাং ভবমোহনঃ |
স্বভার্যাবিরহাশঙ্কী দেহস্যার্ধং প্রদাস্যতি |
প্রয়াতোঽসৌ কাতরাত্মা ৎবদ্বাণাহতমানসঃ || ৩. ৩০. ৬১||
অদ্য প্রভৃতি কন্দর্প মৎপ্রসাদান্মহীয়সঃ |
ৎবন্নিন্দাং যে করিষ্যন্তি ৎবয়ি বা বিমুখাশয়াঃ |
অবশ্যং ক্লীবতৈব স্যাত্তেষাং জন্মনিজন্মনি || ৩. ৩০. ৬২||
যে পাপিষ্ঠা দুরাত্মানো মদ্ভক্তদ্রোহিণশ্চ হি |
তানগম্যাসু নারীষু পাতয়িৎবা বিনাশয় || ৩. ৩০. ৬৩||
যেষাং মদীয় পূজাসু মদ্ভক্তেষ্বাদৃতং মনঃ |
তেষাং কামসুখং সর্বং সংপাদয় সমীপ্সিতম্ || ৩. ৩০. ৬৪||
ইতি শ্রীললিতাদেব্যা কৃতাজ্ঞাবচনং স্মরঃ |
তথেতি শিরসা বিভ্রৎসাংজলির্নির্যয়ৌ ততঃ || ৩. ৩০. ৬৫||
তস্যানঙ্গস্য সর্বেভ্যো রোমকূপেভ্য উত্থিতাঃ |
বহবঃ শোভনাকারা মদনা বিশ্বমোহনাঃ || ৩. ৩০. ৬৬||
তৈর্বিমোহ্য সমস্তং চ জগচ্চক্রং মনোভবঃ |
পুনঃ স্থাণ্বাশ্রমং প্রাপ চন্দ্রমৌলের্জিগীষয়া || ৩. ৩০. ৬৭||
বসংতেন চ মিত্রেণ সেনান্যা শীতরোচিষা |
রাগেণ পীঠমর্দেন মন্দানিলরয়েণ চ || ৩. ৩০. ৬৮||
পুংস্কোকিলগলৎস্বানকাহলীভিশ্চ সংযুতঃ |
শৃঙ্গারবীরসংপন্নো রত্যালিঙ্গিতবিগ্রহঃ || ৩. ৩০. ৬৯||
জৈত্র শরাসনং ধুন্বন্প্রবীরাণাং পুরোগমঃ |
মদনারেরভিমুখং প্রাপ্য নিভয় আস্থিতঃ || ৩. ৩০. ৭০||
তপোনিষ্ঠং চন্দ্রচূডং তাডয়ামাস সায়কৈঃ |
অথ কন্দর্পবাণৌধৈস্তাডিতশ্চন্দ্রশেখরঃ |
দূরীচকার বৈরাগ্যং তপস্তত্ত্যাজ দুষ্করম্ || ৩. ৩০. ৭১||
নিয়মানখিলাংস্ত্যক্ত্বা ত্যক্তধৈর্যঃ শিবঃ কৃতঃ |
তামেব পার্বতীং ধ্যাৎবা ভূয়োভূয়ঃ স্মরাতুরঃ || ৩. ৩০. ৭২||
নিশশ্বাস বহঞ্শর্বঃ পাণ্ডুরং গণ্ডমণ্ডলম্ |
বাষ্পায়মাণো বিরহী সংতপ্তো ধৈর্যবিপ্লবাৎ |
ভূয়োভূয়ো গিরিসুতাং পূর্বদৃষ্টামনুস্মরন্ || ৩. ৩০. ৭৩||
অনঙ্গবাণদহনৈস্তপ্যমানস্য শূলিনঃ |
ন চন্দ্ররেখা নো গঙ্গা দেহতাপচ্ছিদেঽভবৎ || ৩. ৩০. ৭৪||
নন্দিভৃঙ্গিমহাকালপ্রমুখৈর্গণমণ্ডলৈঃ |
আহৃতে পুষ্পশয়নে বিলুলোঠ মুহুর্মুহুঃ || ৩. ৩০. ৭৫||
নন্দিনো হস্তমালংব্য পুষ্পতল্পান্তরাৎপুনঃ |
পুষ্পতল্পান্তরং গৎবা ব্যচেষ্টত মুহুর্মুহুঃ || ৩. ৩০. ৭৬||
ন পুষ্পশয়নেনেন্দুখণ্ডনির্গলিতামৃতে |
ন হিমানীপয়সি বা নিবৃত্তস্তদ্বপুর্জ্বরঃ || ৩. ৩০. ৭৭||
স তনেরতনুজ্বালাং শময়িষ্যন্মুহুর্মুহুঃ |
শিলীভূতান্হিমপয়ঃ পট্টানধ্যবসচ্ছিবঃ |
ভূয়ঃ শৈলসুতারূপং চিত্রপট্টে নখৈর্লিখৎ || ৩. ৩০. ৭৮||
তদালোকনতোঽদূরমনঙ্গার্তিমবর্ধয়ৎ |
তামালিখ্য হ্রিয়া নম্রাং বীক্ষমাণাং কটাক্ষতঃ || ৩. ৩০. ৭৯||
তচ্চিত্রপট্টমঙ্গেষু রোমহর্ষেষু চাক্ষিপৎ |
চিন্তাসংগেন মহতা মহাত্যা রতিসংপদা |
ভূয়সা স্মরতাপেন বিব্যথে বিষমেক্ষণঃ || ৩. ৩০. ৮০||
তামেব সর্বতঃ পশ্যংস্তস্যামেব মনো দিশন্ |
তথৈব সংল্লপন্সার্ধমুন্মাদেনোপপন্নয়া || ৩. ৩০. ৮১||
তন্মাত্রভূতহৃদয়স্তচ্চিত্তস্তৎপরায়ণঃ |
তৎকথাসুধয়া নীতসমস্তরজনীদিনঃ || ৩. ৩০. ৮২||
তচ্ছীলবর্ণন রতস্তদ্রূপালোকনোৎসুকঃ |
তচ্চারুভোগসংকল্পমালাকরসুমালিকঃ |
তন্ময়ৎবমনুপ্রাপ্তস্ততাপাতিতরাং শিবঃ || ৩. ৩০. ৮৩||
ইমাং মনোভব রুজমচিকিৎস্যাং স ধূর্জটিঃ |
অবলোক্য বিবাহায় ভৃশমুদ্যমবানভূৎ || ৩. ৩০. ৮৪||
ইত্থং বিমোহ্য তং দেবং কন্দর্পো ললিতাজ্ঞয়া |
অথ তাং পর্বতসুতামাশুগৈরভ্যতাপয়ৎ || ৩. ৩০. ৮৫||
প্রভূতবিরহজ্বালামলিনৈঃ শ্বসিতানলৈঃ |
শুষ্যমাণাধরদলো ভৃশং পাণ্ডুকপোলভূঃ || ৩. ৩০. ৮৬||
নাহারে বা ন শয়নে ন স্বাপে ধৃতিমিচ্ছতি |
মখীসহস্রৈঃ সিষিচে নিত্যং শীতোপচারকৈঃ || ৩. ৩০. ৮৭||
পুনঃ পুনস্তপ্যমানা পুনরেব চ বিহ্বলা |
ন জগাম রুজাশান্তি মন্মথাগ্নের্মহীয়সঃ || ৩. ৩০. ৮৮||
ন নিদ্রাং পার্বতী ভেজে বিরহেণোপতাপিতা |
স্বতনোস্তাপনেনাসৌ পিতুঃ খেদমবর্ধয়ৎ || ৩. ৩০. ৮৯||
অপ্রতীকারপুরুষং বিরহং তুহিতুঃ শিবে |
অবলোক্য স শৈলেন্দ্রো মহাদুঃখমবাপ্তবান্ || ৩. ৩০. ৯০||
ভদ্রে ৎবং তপসা দেবং তোষয়িৎবা মহেশ্বরম্ |
ভার্তারং তং সমৃচ্ছেতি পিত্রা সম্প্রেরিতাথ সা || ৩. ৩০. ৯১||
হিমবচ্ছৈলশিখরে গৌরীশিখরনামনি |
বকার পতিলাভায় পার্বতী দুষ্করং তপঃ || ৩. ৩০. ৯২||
শিশিরেষু জলাবাসা গ্রীষ্মে দহনমধ্যগা |
অর্কে নিবিষ্টদৃষ্টিশ্চ সুঘোরং তপ আস্থিতা || ৩. ৩০. ৯৩||
তেনৈব তপসা তুষ্টঃ সান্নিধ্যং দত্তবাঞ্ছিবঃ |
অঙ্গীচকার তাং ভার্যাং বৈবাহিকবিধানতঃ || ৩. ৩০. ৯৪||
অথাদ্রিপতিনা দত্তাং তনয়াং নলিনেক্ষণাম্ |
সপ্তর্ষিদ্বারতঃ পূর্বং প্রার্থিতামুদবোঢ সঃ || ৩. ৩০. ৯৫||
তয়া চ রমমাণোঽসৌ বহুকালং মহেশ্বরঃ |
ওষধীপ্রস্থনগরে শ্বশুরস্য গৃহেঽবসৎ || ৩. ৩০. ৯৬||
পুনঃ কৈলাসমাগত্য সমস্তৈঃ প্রমথৈঃ সহ |
পার্বতীমানিনায়াদ্রিনাথস্য প্রীতিমাবহৎ || ৩. ৩০. ৯৭||
রমমাণস্তয়া সার্থং কৈলাসে মন্দরে তথা |
বিন্ধ্যাদ্রৌ হেমশৈলে চ মলয়ে পারিয়াত্রকে || ৩. ৩০. ৯৮||
নানাবিধেষু স্থানেষু রতিং প্রাপ মহেশ্বরঃ |
অথ তস্যাং সসর্জোগ্রং বীর্যং সা সোঢুমক্ষমা || ৩. ৩০. ৯৯||
ভুব্যত্যজৎসাপি বহ্নৌ কৃত্তিকাসু স চাক্ষিপৎ |
তাশ্চ গঙ্গাজলেঽমুঞ্চন্সা চৈব শরকাননে || ৩. ৩০. ১০০||
তত্রোদ্ভূতো মহাবীরো মহাসেনঃ ষডাননঃ |
গঙ্গায়াশ্চান্তিকং নীতো ধূর্জটির্বৃদ্ধি মাগমৎ || ৩. ৩০. ১০১||
স বর্ধমানো দিবসেদিবসে তীব্রবিক্রমঃ |
শিক্ষিতো নিজতাতেন সর্বা বিদ্যা অবাপ্তবান্ || ৩. ৩০. ১০২||
অথ তাতকৃতানুজ্ঞঃ সুরসৈন্যপতির্ভবন্ |
তারকং মারয়ামাস সমস্তৈঃ সহ দানবৈঃ || ৩. ৩০. ১০৩||
ততস্তারকদৈত্যেন্দ্রবধসন্তোষশালিনা |
শক্রেণ দত্তাং স গুহো দেবসেনামুপানয়ৎ || ৩. ৩০. ১০৪||
সা শক্রতনয়া দেবসেনা নাম যশস্বিনী |
আসাদ্যরমণং স্কন্দমানন্দং মৃশমাদধৌ || ৩. ৩০. ১০৫||
ইত্থং সংমোহিতাশেষবিশ্বচক্রো মনোভবঃ |
দেবকার্যং সুসম্পাদ্য জগাম শ্রীপুরং পুনঃ || ৩. ৩০. ১০৬||
যত্র শ্রীনগরে পুণ্যে ললিতা পরমেশ্বরী |
বর্ততে জগতামৃদ্ধ্যৈ তত্র তাং সেবিতুং যয়ৌ || ৩. ৩০. ১০৭||
ইতি শ্রীব্রহ্মাণ্ডমহাপুরাণে উত্তরভাগে হয়গ্রীবাগস্ত্যসংবাদে ললিতোপাখ্যানে মদনপুনর্ভবো নাম ত্রিংশোঽধ্যায়ঃ