৩.২ ব্রহ্মাণ্ডমহাপুরাণং – উত্তরভাগ (অধ্যায় ১১-২০)

অগস্ত্য উবাচ
কথং ভণ্ডাসুরো জাতঃ কথং বা ত্রিপুরাংবিকা |
কথং বভঞ্জ তং সংখ্যে তৎসর্বং বদ বিস্তরাৎ || ৩. ১১. ১||
হয়গ্রীব উবাচ
পুরা দাক্ষায়ণীং ত্যক্ত্বা পিতুর্যজ্ঞবিনাশনম্ || ৩. ১১. ২||
আত্মানমাত্মনা পশ্যঞ্জ্ঞানানন্দরসাত্মকঃ |
উপাস্যমানো মুনিভিরদ্বন্দ্বগুণলক্ষণঃ || ৩. ১১. ৩||
গঙ্গাকূলে হিমবতঃ পর্যন্তে প্রবিবেশ হ |
সাপি শঙ্করমা রাধ্য চিরকালং মনস্বিনী || ৩. ১১. ৪||
যোগেন স্বাং তনুং ত্যক্ত্বা সুতাসীদ্ধিমভূভৃতঃ || ৩. ১১. ৫||
স শৈলো নারদাচ্ছ্রুৎবা রুদ্রাণীতি স্বকন্যাকাম্ |
তস্য শুশ্রূষণার্থায় স্থাপয়ামাস চান্তিকে || ৩. ১১. ৬||
এতস্মিন্নন্তরে দেবাস্তারকেণ হি পীডিতাঃ |
ব্রহ্মণোক্তাঃ সমাহূয় মদনং চেদমব্রুবন্ || ৩. ১১. ৭||
সর্গাদৌ ভগবান্ব্রহ্ম সৃজমানোঽখিলাঃ প্রজাঃ |
ন নির্বৃতিরভূত্তস্য কদাচিদপি মানসে |
তপশ্চচার সুচিরং মনোবাক্কায়কর্মভিঃ || ৩. ১১. ৮||
ততঃ প্রসন্নো ভগবান্সলক্ষ্মীকো জনার্দনঃ |
বরেণ চ্ছন্দয়ামাস বরদঃ সর্বদেহিনাম্ || ৩. ১১. ৯||
ব্রহ্মোবাচ |
যদি তুষ্টোঽসি ভগবন্ননায়াসেন বৈ জগৎ |
চরাচরয়ুতং চৈতৎসৃজামি ৎবৎপ্রসাদতঃ || ৩. ১১. ১০||
এবমুক্তো বিধাত্রা তু মহাল ক্ষ্মীমুদৈক্ষত |
তদা প্রাদুরভূস্ত্বং হি জগন্মোহনরূপধৃক্ || ৩. ১১. ১১||
তবায়ুধার্থং দত্তং চ পুষ্পবাণেক্ষুকার্মুকম্ |
বিজয়ৎবমজেয়ৎবং প্রাদা ৎপ্রমুদিতো হরিঃ || ৩. ১১. ১২||
অসৌ সৃজতি ভূতানি কারণেন স্বকর্মণা |
সাক্ষিভূতঃ স্বজনতো ভবান্ভজতু নির্বৃন্তিম্ || ৩. ১১. ১৩||
এষ দত্তবরো ব্রহ্মা ৎবয়ি বিন্যস্য তদ্ভরম্ |
মনসো নির্বৃতিং প্রাপ্য বর্ততেঽদ্যাপি মন্মথ || ৩. ১১. ১৪||
অমোঘং বলবীর্যং তে ন তে মোঘঃ পরাক্রমঃ || ৩. ১১. ১৫||
সুকুমারাণ্যমোঘানি কুসুমাস্ত্রাণি তে সদা |
ব্রহ্মদত্তবরোঽযং হি তারকো নাম দানবঃ || ৩. ১১. ১৬||
বাধতে সকলাংল্লোকানস্মানপি বিশেষতঃ |
শিবপুত্রাদৃতেঽন্যত্র ন ভয়ং তস্য বিদ্যতে || ৩. ১১. ১৭||
ৎবাং বিনাস্মিন্মহাকার্যে ন কশ্চিৎপ্রবদেদপি |
স্বকরাচ্চ ভবেৎকার্যং ভবতো নান্যতঃ ক্বচিৎ || ৩. ১১. ১৮||
আত্ম্যৈক্যধয়াননিরতঃ শিবো গৌর্যা সমন্বিতঃ |
হিমাচলতলে রম্যে বর্ততে মুনিভির্বৃতঃ || ৩. ১১. ১৯||
তং নিয়োজয় গৌর্যাং তু জনিষ্যতি চ তৎসুতঃ |
ঈষৎকার্যমিদং কৃৎবা ত্রায়স্বাস্মান্মহাবল || ৩. ১১. ২০||
এবমভ্যর্থিতো দেবৈঃ স্তূয়মানো মুহুর্মুহুঃ |
জগামাত্মবিনাশায় যতো হিমবতস্তটম্ || ৩. ১১. ২১||
কিমপ্যারাধয়ান্তং তু ধ্যানসংমীলিতেক্ষণম্ |
দদর্শেশানমাসীনং কুসুমষুরুদায়ুধঃ || ৩. ১১. ২২||
এতস্মিন্নন্তরে তত্র হিমবত্তনয়া শিবম্ |
আরিরাধয়িষুশ্চা গাদ্বিভ্রাণা রূপমদ্ভুতম্ || ৩. ১১. ২৩||
সমেত্য শম্ভুং গিরিজাং গন্ধপুষ্পোপহারকৈঃ |
শুশ্রূষণপরাং তত্র দদর্শাতিবলঃ স্মরঃ || ৩. ১১. ২৪||
অদৃশ্যঃ সর্বভূতানান্নাতিদূরেঽস্য সংস্থিতঃ |
সুমনোমার্গণৈরগ্র্যৈস্স বিব্যাধ মহেশ্বরম্ || ৩. ১১. ২৫||
বিস্মৃত্য স হি কার্যাণি বাণবিদ্ধোঽন্তিকে স্থিতাম্ |
গৌরীং বিলোকয়ামাস মন্মথাবিষ্টচেতনঃ || ৩. ১১. ২৬||
ধৃতিমালংব্য তু পুনঃ কিমেতদিতি চিন্তয়ন্ |
দদর্শাগ্রে তু সন্নদ্ধং মন্মথং কুসুমায়ুধম্ || ৩. ১১. ২৭||
তং দৃষ্ট্বা কুপিতঃ শূলী ত্রৈলোক্যদহনক্ষমঃ |
তার্তীয়ং চক্ষুরুন্মীল্য দদাহ মকরধ্বজম্ || ৩. ১১. ২৮||
শিবেনৈবমবজ্ঞাতা দুঃখিতা শৈলকন্যকা |
অনুজ্ঞয়া ততঃ পিত্রোস্তপঃ কর্তুমগাদ্বনম্ || ৩. ১১. ২৯||
অথ তদ্ভস্ম সংবীক্ষ্য চিত্রকর্মা গণেশ্বরঃ |
তদ্ভস্মনা তু পুরুষং চিত্রাকারং চকার সঃ || ৩. ১১. ৩০||
তং বিচিত্রতনুং রুদ্রো দদর্শাগ্রে তু পূরুষম্ |
তৎক্ষণাজ্জাত জীবোঽভূন্মূর্তিমানিব মন্মথঃ |
মহাবলোঽতিতেজস্বী মধ্যাহ্নার্কসমপ্রভঃ || ৩. ১১. ৩১||
তং চিত্রকর্মা বাহুভ্যাং সমালিঙ্গ্য মুদান্বিতঃ |
স্তুহি বাল মহাদেবং স তু সর্বার্থসিদ্ধিদঃ || ৩. ১১. ৩২||
ইত্যুক্ত্বা শতরুদ্রীয়মুপাদিশদমেয়ধীঃ |
ননাম শতশো রুদ্রং শতরুদ্রিয়মাজপন্ || ৩. ১১. ৩৩||
ততঃ প্রসন্নো ভগবান্মহাদেবো বৃষধ্বজঃ |
বরেণ চ্ছন্দয়ামাস বরং বব্রে স বালকঃ || ৩. ১১. ৩৪||
প্রতিদ্বন্দ্বিবলার্থং তু মদ্বলেনোপয়োক্ষ্যতি |
তদস্ত্রশস্ত্রমুখ্যানি বৃথা কুর্বন্তু নো মম || ৩. ১১. ৩৫||
তথেতি তৎপ্রতিশ্রুত্য বিচার্য কিমপি প্রভুঃ |
ষষ্টিবর্ষসহস্রাণি রাজ্যমস্মৈ দদৌ পুনঃ || ৩. ১১. ৩৬||
এতদ্দৃষ্ট্বা তু চরিতং ধাতা ভণ্ডিতি ভণ্ডিতি |
যদুবাচ ততো নাম্না ভণ্ডো লোকেষু কথ্যতে || ৩. ১১. ৩৭||
ইতি দত্ত্বা বরং তস্মৈ সর্বৈর্মুনিগণৈর্বৃতঃ |
দত্ত্বাস্ত্রাণি চ শস্ত্রাণি তত্রৈবান্তরধাচ্চ সঃ || ৩. ১১. ৩৮||
ইতি শ্রীব্রহ্মাণ্ডমহাপুরাণে উত্তরভাগে হয়গ্রীবাগস্ত্যসংবাদে ললিতোপাখ্যানে ভণ্ডাসুরপ্রাদুর্ভাবো নামৈকাদশোঽধ্যায়ঃ

রুদ্রকোপানলাজ্জাতো যতো ভণ্ডো মহাবলঃ |
তস্মাদ্রৌদ্রস্বভাবো হি দানবশ্চাভবত্ততঃ || ৩. ১২. ১||
অথাগচ্ছন্মহাতেজাঃ শুক্রো দৈত্যপুরোহিতঃ |
সমায়াতাশ্চ শতশো দৈতেয়াঃ সুমহাবলাঃ || ৩. ১২. ২||
অথাহূয় ময়ং ভণ্ডো দৈত্যবংশ্যাদিশিল্পিনম্ |
নিয়ুক্তো ভৃগুপুত্রেণ নিজগাদার্থবদ্বচঃ || ৩. ১২. ৩||
যত্র স্থিৎবা তু দৈত্যেন্দ্রৈস্ত্রৈলোক্যং শাসিতং পুরা |
তদ্গৎবা শোণিতপুরং কুরুষ্ব ৎবং যথাপুরম্ || ৩. ১২. ৪||
তচ্ছ্রুৎবা বচনং শিল্পী স গৎবাথ পুরং মহৎ |
চক্রেঽমরপুরপ্রখ্যং মনসৈবেক্ষণেন তু || ৩. ১২. ৫||
অথাভিষিক্তঃ শুক্রেণ দৈতেয়ৈশ্চ মহাবলৈঃ |
শুশভে পরয়া লক্ষ্ম্যা তেজসা চ সমন্বিতঃ || ৩. ১২. ৬||
হিরণ্যায় তু যদ্দত্তং কিরীটং ব্রহ্মণা পুরা |
সজীবমবিনাশ্যং চ দৈত্যেন্দ্রৈরপি ভূষিতম্ |
দধৌ ভৃগুসুতোৎসৃষ্টং ভণ্ডো বালার্কসন্নিভম্ || ৩. ১২. ৭||
চামরে চন্দ্রসংকাশে সজীবে ব্রহ্ম নির্মিতে |
ন রোগো ন চ দুঃখানি সংদধৌ যন্নিষেবণাৎ || ৩. ১২. ৮||
তস্যাতপত্রং প্রদদৌ ব্রহ্মণৈব পুরা কৃতম্ |
যস্য চ্ছায়ানিষণ্ণাস্তু বাধ্যন্তে নাস্ত্রকোটিভিঃ || ৩. ১২. ৯||
ধনুশ্চ বিজয়ং নাম শঙ্খং চ রিপুঘাতিনম্ |
অন্যান্যপি মহার্হাণি ভূষণানি প্রদত্তবান্ || ৩. ১২. ১০||
তস্য সিংহাসনং প্রাদাদক্ষয়্যং সূর্যসন্নিভম্ |
ততঃ সিংহাসনাসীনঃ সর্বাভরণভূষিতঃ |
বভূবাতীব তেজস্বী রত্নমুত্তেজিতং যথা || ৩. ১২. ১১||
বভূবুরথ দৈতেয়াস্তয়াষ্টৌ তু মহাবলাঃ |
ইন্দ্রশত্রুরমিত্রঘ্নো বিদ্যুন্মালী বিভীষণঃ |
উগ্রকর্মোগ্রধন্বা চ বিজয়শ্রুতি পারগঃ || ৩. ১২. ১২||
সুমোহিনী কুমুদিনী চিত্রাঙ্গী সুংদরী তথা |
চতস্রো বনিতাস্তস্য বভূবুঃ প্রিয়দর্শনাঃ || ৩. ১২. ১৩||
তমসেবন্ত কালজ্ঞা দেবাঃ সর্বে সবাসবাঃ |
স্যন্দনাস্তুরগা নাগাঃ পাদাতাশ্চ সহস্রশঃ || ৩. ১২. ১৪||
সংবভূবুর্মহাকায়া মহান্তো জিতকাশিনঃ |
বভূবুর্দানবাঃ সর্বে ভৃগুপুত্রমতানুগাঃ || ৩. ১২. ১৫||
অর্চয়ন্তো মহাদেবমাস্থিতাঃ শিবশাসনে |
বভূবুর্দানবাস্তত্র পুত্রপৌত্রধনান্বিতাঃ |
গৃহেগৃহে চ যজ্ঞাশ্চ সংবভূবুঃ সমন্ততঃ || ৩. ১২. ১৬||
ঋচো যজূংষি সামানি মীমাংসান্যায়কাদয়ঃ |
প্রবর্তন্তে স্ম দৈত্যানাং ভূয়ঃ প্রতিগৃহং তদা || ৩. ১২. ১৭||
যথাশ্রমেষু মুখ্যেষু মুনীনাং চ দ্বিজন্মনাম্ |
তথা যজ্ঞেষু দৈত্যানাং বুভুজুর্হব্যভোজিনঃ || ৩. ১২. ১৮||
এবং কৃতবতোঽপ্যস্য ভণ্ডস্য জিতকাশিনঃ |
ষষ্টিবর্ষসহস্রাণি ব্যতীতানি ক্ষণার্ধবৎ || ৩. ১২. ১৯||
বর্ধমানমথো দৈত্যং তপসা চ বলেন চ |
হীয়মানবলং চেন্দ্রং সংপ্রেক্ষ্য কমলাপতিঃ || ৩. ১২. ২০||
সসর্জ সহসা কাঞ্চিন্মায়াং লোকবিমোহিনীম্ |
তামুবাচ ততো মায়াং দেবদেবো জনার্দনঃ || ৩. ১২. ২১||
ৎবং হি সর্বাণি ভূতানি মোহয়ন্তী নিজৌজসা |
বিচরস্ব যথাকামং ৎবাং ন জ্ঞাস্যতি কশ্চন || ৩. ১২. ২২||
ৎবং তু শীঘ্রমিতো গৎবা ভণ্ডং দৈতেয়নায়কম্ |
মোহয়িৎবাচিরেণৈব বিষয়ানুপভোক্ষ্যসে || ৩. ১২. ২৩||
এবং লব্ধ্বা বরং মায়া তং প্রণম্য জনার্দনম্ |
যয়াচেঽপ্সরসো মুখ্যাঃ সহায়ার্থং তু কাশ্চন || ৩. ১২. ২৪||
তয়া সংপ্রার্থিতো ভূয়ঃ প্রেষয়ামাস কাশ্চন |
তাভির্বিশ্বাচিমুখ্যাভিঃ সহিতা সা মৃগেক্ষণা |
প্রয়য়ৌ মানসস্যাগ্যং তটমুজ্জ্বলভূরুহম্ || ৩. ১২. ২৫||
যত্র ক্রীডতি দৈত্যেন্দ্রো নিজনারীভিরন্বিতঃ |
তত্র সা মৃগশাবাক্ষী মূলে চংপকশাখিনঃ |
নিবাসমকরোদ্রম্যং গায়ন্তী মধুরস্বরম্ || ৩. ১২. ২৬||
অথাগতস্তু দৈত্যেন্দ্রো বলিভির্ভন্ত্রিভির্বৃতঃ |
শ্রুৎবা তু বীণানিনদং দদর্শ চ বরাঙ্গনাম্ || ৩. ১২. ২৭||
তাং দৃষ্ট্বা চারুসর্বাঙ্গীং বিদ্যুল্লেখামিবাপরাম্ |
মায়াময়ে মহাগর্তে পতিতো মদনাভিধে || ৩. ১২. ২৮||
অথাস্য মন্ত্রিণোঽভূবন্ত্দৃদয়ে স্মরতাপি তাঃ || ৩. ১২. ২৯||
তেন দৈতেয়নাথেন চিরং সংপ্রর্থিতা সতী |
তৈশ্চ সংপ্রর্থিতাস্তাশ্চ প্রতিশূশ্রুবুরঞ্জসা || ৩. ১২. ৩০||
যাস্ত্বলভ্যা মহায়জ্ঞৈরশ্বমেধাদিকৈরপি |
তা লব্ধ্বা মোহিনীমুখ্যা নির্বৃতিং পরমাং যয়ুঃ || ৩. ১২. ৩১||
বিসস্মরুস্তদা বেদাংস্তথা দেবমুমাপতিম্ |
বিজহুস্তে তথা যজ্ঞক্রিয়াশ্চান্যাঃ শুভাবহাঃ || ৩. ১২. ৩২||
অবমানহতশ্চাসীত্তেষামপি পুরোহিতঃ |
মুহূর্ত্তমিব তেষাং তু যয়াবব্দায়ুতং তদা || ৩. ১২. ৩৩||
মোহিতেষ্বথ দৈত্যেষু সর্বে দেবাঃ সবাসবাঃ |
বিমুক্তোপদ্রবা ব্রহ্মন্নামোদং পরমং যয়ুঃ || ৩. ১২. ৩৪||
কদাচিদথ দেবেন্দ্রং বীক্ষ্য সিংহাসনে স্থিতম্ |
সর্বদেবৈঃ পরিবৃতং নারদো মুনিরায়য়ৌ || ৩. ১২. ৩৫||
প্রণম্য মুনিশার্দূলং জ্বলন্তমিব পাবকম্ |
কৃতাঞ্জলিপুটো ভূৎবা দেবেশো বাক্যমব্রবীৎ || ৩. ১২. ৩৬||
ভগবন্সর্বধর্মজ্ঞ পরাপরবিদাং বর |
তত্রৈব গমনং তে স্যাদ্যং ধন্যং কর্তুমিচ্ছসি || ৩. ১২. ৩৭||
ভবিষ্যচ্ছোভনাকারং তবাগমনকারণম্ |
ৎবদ্বাক্যামৃতমাকর্ণ্য শ্রবণানন্দনির্ভরম্ |
অশেষদুঃখান্যুত্তীর্য কৃতার্থঃ স্যাং মুনীশ্বর || ৩. ১২. ৩৮||
নারদ উবাচ
অথ সংমোহিতো ভণ্ডো দৈত্যেন্দ্রো বিষ্ণুমায়য়া |
তয়া বিমুক্তো লোকাংস্ত্রীন্দহেতাগ্নিরিবাপরঃ || ৩. ১২. ৩৯||
অধিকস্তব তেজোভিরস্ত্রৈর্মায়াবলেন চ |
তস্য তেজোঽপহারস্তু কর্তব্যোঽতিবলস্য তু || ৩. ১২. ৪০||
বিনারাধনতো দেব্যাঃ পরাশক্তেস্তু বাসব |
অশক্যোঽন্যেন তপসা কল্পকোটিশতৈরপি || ৩. ১২. ৪১||
পুরৈবোদয়তঃ শত্রোরারাধয়ত বালিশাঃ |
আরাধিতা ভগবতী সা বঃ শ্রেয়ো বিধাস্যতি || ৩. ১২. ৪২||
এবং সংবোধিতস্তেন শক্রো দেবগণেশ্বরঃ |
তং মুনিং পূজয়ামাস সর্বদেবৈঃ সমন্বিতঃ |
তপসে কৃতসন্নাহো যয়ৌ হৈমবতং তটম্ || ৩. ১২. ৪৩||
তত্র ভাগীরথীতীরে সর্বর্তুকুসুমোজ্জ্বলে |
পরাশক্তের্মহাপূজাং চক্রেঽখিলসুরৈঃ সমম্ |
ইন্দ্রপ্রস্থমভূন্নাম্রা তদাদ্যখিলসিদ্ধিদম্ || ৩. ১২. ৪৪||
ব্রহ্মাত্মজোপদিষ্টেন কুর্বতাং বিধিনা পরাম্ |
দেব্যাস্তু মহতীং পূজাং জপধ্যানরতাত্মনাম্ || ৩. ১২. ৪৫||
উগ্রে তপসি সংস্থানামনন্যা র্পিতচেতসাম্ |
দশবর্ষসহস্রাণি দশাহানি চ সংযয়ুঃ || ৩. ১২. ৪৬||
মোহিতানথ তান্দৃষ্ট্বা ভৃগুপুত্রো মহামতিঃ |
ভণ্ডাসুরং সমভ্যেত্য নিজগাদ পুরোহিতঃ || ৩. ১২. ৪৭||
ৎবামেবাশ্রিত্য রাচৈন্দ্র সদা দানবসত্তমাঃ |
নির্ভয়াস্ত্রিষু লোকেষু চরন্তীচ্ছবিহারিণঃ || ৩. ১২. ৪৮||
জাতিমাত্রং হি ভবতো হন্তি সর্বান্সদা হরিঃ |
তেনৈব নির্মিতা মায়া যয়া সংমোহিতো ভবান্ || ৩. ১২. ৪৯||
ভবন্তং মোহিতং দৃষ্ট্বা রন্ধ্রান্বেষণ তৎপরঃ |
ভবতাং বিজয়ার্থায় করোতীন্দ্রো মহত্তপঃ || ৩. ১২. ৫০||
যদি তুষ্টা জগদ্ধাত্রী তস্যৈব বিজয়ো ভবেৎ |
ইমাং মায়াময়ীং ত্যক্ত্বা মন্ত্রিভিঃ সহিতো ভবান্ |
গৎবা হৈমবতং শৈলং পরেষাং বিঘ্নমাচর || ৩. ১২. ৫১||
এবমুক্তস্তু গুরুণা হিৎবা পর্যঙ্কমুত্তমম্ |
মন্ত্রিবৃদ্ধানু পাহূয় যথাবৃত্তান্তমাহ সঃ || ৩. ১২. ৫২||
তচ্ছ্রুৎবা নৃপতিং প্রাহ শ্রুতবর্মা বিমৃশ্য চ |
ষষ্টিবর্ষসহস্রাণাং রাজ্যং তব শিবার্পিতম্ || ৩. ১২. ৫৩||
তস্মাদপ্যধিকং বীর গতমাসীদনেকশঃ |
অশক্যপ্রতিকার্যোঽযং যঃ কালশিবচোদিতঃ || ৩. ১২. ৫৪||
অশক্যপ্রতিকার্যোঽযং তদভ্যর্চনতো বিনা |
কালে তু ভোগঃ কর্ত্তব্যো দুঃখস্য চ সুখস্য বা || ৩. ১২. ৫৫||
অথাহ ভীমকর্মাখ্যো নোপেক্ষ্যোঽরির্যথাবলম্ |
ক্রিয়াবিঘ্নে কৃতেঽস্মাভির্বিজয়স্তে ভবিষ্যতি || ৩. ১২. ৫৬||
তব যুদ্ধে মহারাজ পরার্থং বলহারিণী |
দত্তা বিদ্যা শিবেনৈব তস্মাত্তে বিজয়ঃ সদা || ৩. ১২. ৫৭||
অনুমেনে চ তদ্বাক্যং ভণ্ডো দানবনায়কঃ |
নির্গত্য সহসেনাভির্যয়ৌ হৈমবতং তটম্ || ৩. ১২. ৫৮||
তপোবিঘ্নকরান্দৃষ্ট্বা দানবাঞ্জগদংবিকা |
অলঙ্ঘ্যমকরোদগ্রে মহাপ্রাকারমুজ্জ্বলম্ || ৩. ১২. ৫৯||
তং দৃষ্ট্বা দানবেন্দ্রোঽপি কিমেতদিতি বিস্মিতঃ |
সংক্রুদ্ধো দানবাস্ত্রেণ বভঞ্জাতিবলেন তু || ৩. ১২. ৬০||
পুনরেব তদগ্রেঽভূদলঙ্ঘ্যঃ সর্বদানবৈঃ |
বায়ব্যাস্ত্রেণ তং ধীরো বভঞ্জ চ ননাদ চ || ৩. ১২. ৬১||
পৌনঃ পুন্যেন তদ্ভস্ম প্রাভূৎপুনরুপস্থিতম্ |
এতদ্দৃষ্ট্বা তু দৈত্যেন্দ্রো বিষণ্মঃ স্বপুরং যয়ৌ || ৩. ১২. ৬২||
তাং চ দৃষ্ট্বা জগদ্ধাত্রীং দৃষ্ট্বা প্রাকারমুজ্জ্বলম্ |
ভয়াদ্বিব্যথিরে দেবা বিমুক্তসকলক্রিয়াঃ || ৩. ১২. ৬৩||
তানুবাচ ততঃ শক্রো দৈত্যেন্দ্রোঽযমিহাগতঃ |
অশক্যঃ সমরে যোদ্ধুমস্মাভিরখিলৈরপি || ৩. ১২. ৬৪||
পলায়িতানামপি নো গতিরন্যা ন কুত্রচিৎ |
কুণ্ডং যোজনবিস্তারং সম্যক্কৃৎবা তু শোভনম্ || ৩. ১২. ৬৫||
মহায়াগবিধানেন প্রণিধায় হুতাশনম্ |
যজামঃ পরমাং শাক্তিং মহামাসৈর্বয়ং সুরাঃ || ৩. ১২. ৬৬||
ব্রহ্মভূতা ভবিষ্যামো ভোক্ষ্যামো বা ত্রিবিষ্টপম্ |
এবমুক্তাস্তু তে সর্বেদেবাঃ সেন্দ্রপুরোগমাঃ || ৩. ১২. ৬৭||
বিধিবজ্জুহুবুর্মাংসান্যুৎকৃত্যোৎকৃত্য মন্ত্রতঃ |
হুতেষু সর্বমাংসেষু পাদেষু চ করেষু চ || ৩. ১২. ৬৮||
হোতুমিচ্ছৎসু দেবেষু কলেবরমশেষতঃ |
প্রাদুর্বভূব পরমন্তেজঃ পুঞ্জো হ্যনুত্তমঃ || ৩. ১২. ৬৯||
তন্মধ্যতঃ সমুদভূচ্চক্রাকারমনুত্তমম্ |
তন্মধ্যে তু মহাদেবীমুদয়ার্কসমপ্রভাম্ || ৩. ১২. ৭০||
জগদুজ্জীবনকরীং ব্রহ্মবিষ্ণুশিবাত্মিকাম্ |
সৌন্দর্যসারসীমাং তামানন্দরসসাগরাম্ || ৩. ১২. ৭১||
জপাকুসুমসংকাশাং দাডিমীকুসুমাংবরাম্ |
সর্বাভরণসংযুক্তাং শৃঙ্গারৈকরসালয়াম্ || ৩. ১২. ৭২||
কৃপাতরঙ্গিতাপাঙ্গনয়নালোককৌমুদীম্ |
পাশাঙ্কুশেক্ষুকোদণ্ডপঞ্চবাণলসৎকরাম্ || ৩. ১২. ৭৩||
তাং বিলোক্য মহাদেবীং দেবাঃ সর্বে সবাসবাঃ |
প্রণেমুর্মুদিতাত্মানো ভূয়োভূয়োঽখিলাত্মিকম্ || ৩. ১২. ৭৪||
তয়া বিলোকিতাঃ সদ্যস্তে সর্বে বিগতজ্বরাঃ |
সংপূর্ণাঙ্গা দৃঢতরা বজ্রদেহা মহাবলাঃ |
তুষ্টুবুশ্চ মহাদেবীমংবিকামখিলার্থদাম্ || ৩. ১২. ৭৫||
ইতি শ্রীব্রহ্মাণ্ডমহাপুরাণে উত্তরভাগে হয়গ্রীবাগস্ত্যসংবাদে ললিতোপাখ্যানে ললিতাপ্রাদুর্ভাবো নাম দ্বাদশোঽধ্যায়ঃ

দেবা ঊচুঃ
জয় দেবি জগন্মাতর্জয় দেবি পরাৎপরে |
জয় কল্যাণনিলয়ে জয় কামকলাত্মিকে || ৩. ১৩. ১||
জয়কারি চ বামাক্ষি জয় কামাক্ষি সুন্দরি |
জয়াখিলসুরারাধ্যে জয় কামেশি মানদে || ৩. ১৩. ২||
জয় ব্রহ্মময়ে দেবি ব্রহ্মাত্মকরসাত্মিকে |
জয় নারায়ণি পরে নন্দিতাশেষবিষ্টপে || ৩. ১৩. ৩||
জয় শ্রীকণ্ঠদয়িতে জয় শ্রীললিতেংবিকে |
জয় শ্রীবিজয়ে দেবি বিজয় শ্রীসমৃদ্ধিদে || ৩. ১৩. ৪||
জাতস্য জায়মানস্য ইষ্টাপূর্তস্য হেতবে |
নমস্তস্যৈ ত্রিজগতাং পালয়িত্র্যৈ পরাৎপরে || ৩. ১৩. ৫||
কলামুহূর্তকাষ্ঠাহর্ মাসর্তুশরদাত্মনে |
নমঃ সহস্রশীর্ষায়ৈ সহস্রমুখলোচনে || ৩. ১৩. ৬||
নমঃ সহস্রহস্তাব্জপাদপঙ্কজশোভিতে |
অণোরণুতরে দেবি মহতোঽপি মহীয়সি || ৩. ১৩. ৭||
পরাৎপরতরে মাতস্তেজস্তেজীয়সামপি |
অতলং তু ভবেৎপাদৌ বিতলং জানুনী তব || ৩. ১৩. ৮||
রসাতলং কটীদেশঃ কুক্ষিস্তে ধরণী ভবেৎ |
হৃদয়ং তু ভুবর্লোকঃ স্বস্তে মুখমুদাহৃতম্ || ৩. ১৩. ৯||
দৃশশ্চন্দ্রার্কদহনা দিশস্তে বাহবোংবিকে |
মরুতস্তু তবোচ্ছ্বাসা বাচস্তে শ্রুতয়োঽখিলাঃ || ৩. ১৩. ১০||
ক্রীডা তে লোকরচনা সখা তে চিন্ময়ঃ শিবঃ |
আহারস্তে সদানন্দো বাসস্তে হৃদয়ে সতাম্ || ৩. ১৩. ১১||
দৃশ্যাদৃশ্য স্বরূপাণি রূপাণি ভুবনানি তে |
শিরোরুহা ঘনাস্তে তু তারকাঃ কুসুমানি তে || ৩. ১৩. ১২||
ধর্মাদ্যা বাহবস্তে স্যুরধর্মাদ্যায়ুধানি তে |
যমাশ্চ নিয়মাশ্চৈব করপাদরুহাস্তথা || ৩. ১৩. ১৩||
স্তনৌ স্বাহাস্বধাকরৌ লোকোজ্জীবনকারকৌ |
প্রাণায়ামস্তু তে নাসা রসনা তে সরস্বতী || ৩. ১৩. ১৪||
প্রত্যাহারস্ত্বিদ্রিংযাণি ধ্যানং তে ধীস্তু সত্তমা |
মনস্তে ধারণাশক্তির্হৃদয়ং তে সমাধিকঃ || ৩. ১৩. ১৫||
মহীরুহাস্তেঙ্গরুহাঃ প্রভাতং বসনং তব |
ভূতং ভব্যং ভবিষ্যচ্চ নিত্যং চ তব বিগ্রহঃ || ৩. ১৩. ১৬||
যজ্ঞরূপা জগদ্ধাত্রী বিশ্বরূপা চ পাবনী |
আদৌ যা তু দয়াভূতা সসর্জ নিখিলাঃ প্রজাঃ || ৩. ১৩. ১৭||
হৃদয়স্থাপি লোকানামদৃশ্যা মোহনাত্মিকা || ৩. ১৩. ১৮||
নামরূপবিভাগং চ যা করোতি স্বলীলয়া |
তান্যধিষ্ঠায় তিষ্ঠন্তী তেষ্বসক্তার্থকামদা |
নমস্তস্যৈ মহাদেব্যৈ সর্বশক্ত্যৈ নমোনমঃ || ৩. ১৩. ১৯||
যদাজ্ঞয়া প্রবর্তন্তে বহ্নিসূর্যৈদুমারুতাঃ |
পৃথিব্যাদীনি ভূতানি তস্যৈ দেব্যৈ নমোনমঃ || ৩. ১৩. ২০||
যা সসর্জাদিধাতারং সর্গাদাবাদিভূরিদম্ |
দধার স্বয়মেবৈকা তস্যৈ দেব্যৈ নমোনমঃ || ৩. ১৩. ২১||
যথা ধৃতা তু ধরিণী যয়াকাশমমেয়য়া |
যস্যামুদেতি সবিতা তস্যৈ দেব্যৈ নমোনমঃ || ৩. ১৩. ২২||
যত্রোদেতি জগৎকৃৎস্নং যত্র তিষ্ঠতি নির্ভরম্ |
যত্রান্তমেতি কালে তু তস্যৈ দেব্যৈ নমোনমঃ || ৩. ১৩. ২৩||
নমোনমস্তে রজসে ভবায়ৈ নমোনমঃ সাত্ত্বিকসংস্থিতায়ৈ |
নমোনমস্তে তমসে হরায়ৈ নমোনমো নির্গুণতঃ শিবায়ৈ || ৩. ১৩. ২৪||
নমোনমস্তে জগদেকমাত্রে নমোনমস্তে জগদেকপিত্রে |
নমোনমস্তেঽখিলরূপতন্ত্রে নমোনমস্তেঽখিলয়ন্ত্ররূপে || ৩. ১৩. ২৫||
নমোনমো লোকগুরুপ্রধানে নমোনমস্তেঽখিলবাগ্বিভূত্যৈ |
নমোঽস্তু লক্ষ্ম্যৈ জগদেকতুষ্ট্যৈ নমোনমঃ শাংভবি সর্বশক্ত্যৈ || ৩. ১৩. ২৬||
অনাদিমধ্যান্তমপাঞ্চভৌতিকং হ্যবাঙ্মনোগম্যমতর্ক্যবৈভবম্ |
অরূপমদ্বন্দ্বমদৃষ্টগোচরং প্রভাবমগ্র্যং কথমংব বর্ণয়ে || ৩. ১৩. ২৭||
প্রসীদ বিশ্বেশ্বরি বিশ্ববন্দিতে প্রসীদ বিদ্যেশ্বরি বেদরূপিণি |
প্রসীদ মায়াময়ি মন্ত্রাবিগ্রহে প্রসীদ সর্বেশ্বরি সর্বরূপিণি || ৩. ১৩. ২৮||
ইতি স্তৎবা মহাদেবীং দেবাঃ সর্বে সবাসবাঃ |
ভূয়োভূয়ো নমস্কৃত্য শরণং জগমুরঞ্জসা || ৩. ১৩. ২৯||
ততঃ প্রসন্না সা দেবী প্রণতং বীক্ষ্য বাসবম্ |
বরেণ চ্ছন্দয়ামাস বরদাখিলদেহিনাম্ || ৩. ১৩. ৩০||
ইন্দ্র উবাচ
যদি তুষ্টাসি কর্যাণি বরং দৈত্যেন্দ্র পীডিতঃ |
দুর্ধরং জীবিতং দেহি ৎবাং গতাঃ শরণার্থিনঃ || ৩. ১৩. ৩১||
শ্রীদেব্যুবাচ
অহমেব বিনির্জিত্য ভণ্ডং দৈত্যকুলোদ্ভবম্ |
অচিরাত্তব দাস্যামি ত্রৈলোক্যং সচরাচরম্ || ৩. ১৩. ৩২||
নির্ভয়া মুদিতাঃ সন্তু সর্বে দেবগণাস্তথা |
যে স্তোষ্যন্তি চ মাং ভক্ত্যা স্তবেনানেন মানবাঃ || ৩. ১৩. ৩৩||
ভাজনং তে ভবিষ্যন্তি ধর্মশ্রীয়শসাং সদা |
বিদ্যাবিনয়সংপন্না নীরোগা দীর্ঘজীবিনঃ || ৩. ১৩. ৩৪||
পুত্রমিত্রকল ত্রাঢ্যা ভবন্তু মদনুগ্রহাৎ |
ইতি লব্ধবরা দেবা দেবেন্দ্রোঽপি মহাবলঃ || ৩. ১৩. ৩৫||
আমোদং পরমং জগ্মুস্তাং বিলোক্য মুহুর্মুহুঃ || ৩. ১৩. ৩৬||
ইতি শ্রীব্রহ্মাণ্ডমহাপুরাণে উত্তরভাগে হয়গ্রীবাগস্ত্যসংবাদে ললিতোপাখ্যানে ললিতাস্তবরাজো নাম ত্রয়োদশোঽধ্যায়ঃ

হয়গ্রীব উবাচ
এতস্মিন্নেব কালে তু ব্রহ্মা লোকপিতামহঃ |
আজগামাথ দেবেশীং দ্রষ্টুকামো মহর্ষিভিঃ || ৩. ১৪. ১||
আজগাম ততো বিষ্ণুরারূঢো বিনতাসুতম্ |
শিবোঽপি বৃষমারূঢঃ সমায়াতোঽখিলেশ্বরীম্ || ৩. ১৪. ২||
দেবর্ষয়ো নারদাদ্যাঃ সমাজগ্মুর্মহেশ্বরীম্ |
আয়য়ুস্তাং মহাদেবীং সর্বে চাপ্সরসাং গণাঃ || ৩. ১৪. ৩||
বিশ্বাবসুপ্রভৃতয়ো গন্ধর্বাশ্চৈব যক্ষকাঃ |
ব্রহ্মণাথ সমাদিষ্টো বিশ্বকর্মা বিশাংপতিঃ || ৩. ১৪. ৪||
চকার নগরং দিব্যং যথামরপুরং তথা |
ততো ভগবতী দুর্গা সর্বমন্ত্রাধিদেবতা || ৩. ১৪. ৫||
বিদ্যাধিদেবতা শ্যামা সমাজগ্মতুরংবিকাম্ |
ব্রাহয়াদ্যা মাতরশ্চৈব স্বস্বভূতগণাবৃতাঃ || ৩. ১৪. ৬||
সিদ্ধয়ো হ্যণিমাদ্যাশ্চ যোগিন্যশ্চৈব কোটিশঃ |
ভৈরবাঃ ক্ষেত্রপালাশ্চ মহাশাস্তা গণাগ্রণীঃ || ৩. ১৪. ৭||
মহাগণেশ্বরঃ স্কন্দো বটুকো বীরভদ্রকঃ |
আগত্য তে মহাদেবীং তুষ্টুবুঃ প্রণতাস্তদা || ৩. ১৪. ৮||
তত্রাথ নগরীং রম্যাং সাট্টপ্রাকারতোরণাম্ |
গজাশ্বরথশালাঢ্যাং রাজবীথিবিরাজিতাম্ || ৩. ১৪. ৯||
সামন্তানামমাত্যানাং সৈনিকানাং দ্বিজন্ম নাম্ |
বেতালদাসদাসীনাং গৃহাণি রুচিরাণি চ || ৩. ১৪. ১০||
মধ্যং রাজগৃহং দিব্যং দ্বারগোপুরভূষিতম্ |
শালাভির্বহুভির্যুক্তং সভা ভিরুষশোভিতম্ || ৩. ১৪. ১১||
সিংহাসনসভাং চৈব নবরত্নময়ীং শুভাম্ |
মধ্যে সিংহাসনং দিব্যং চিন্তামণিবীনির্মিতম্ || ৩. ১৪. ১২||
স্বয়ং প্রকাশমদ্বন্দ্বমুদয়াদিত্যসংনিভম্ |
বিলোক্য চিন্তয়ামাস ব্রহ্মা লোকপিতামহঃ || ৩. ১৪. ১৩||
যস্ত্বেতৎসমধিষ্ঠায় বর্ততে বালিশোঽপিবা |
পুরস্যাস্য প্রভাবেণ সর্বলোকাধিকো ভবেৎ || ৩. ১৪. ১৪||
ন কেবলা স্ত্রী রাজ্যার্হা পুরুষোঽপি তয়া বিনা |
মঙ্গলাচার্যসংযুক্তং মহাপুরুষলক্ষণম্ |
অনুকূলাঙ্গনায়ুক্তমভিষিঞ্চেদিতি শ্রুতিঃ || ৩. ১৪. ১৫||
বিভাতীয়ং বরারোহা ভূর্তা শৃঙ্গারদেবতা |
বরোঽস্যাস্ত্রিষু লোকেষু ন চান্যঃ শঙ্করাদৃতে || ৩. ১৪. ১৬||
জডিলো মুণ্ডধারী চ বিরূপাক্ষঃ কপালভৃৎ |
কল্মাষী ভস্মদিগ্ধাঙ্গঃ শ্মশানাস্থিবিভূষণঃ || ৩. ১৪. ১৭||
অমঙ্গলাস্পদং চৈনং বরয়েৎসা সুমঙ্গলা |
ইতি চিন্তয়মানস্য ব্রহ্মণোঽগ্রে মহেশ্বরঃ || ৩. ১৪. ১৮||
কোটিকন্দর্পলাবণ্যয়ুক্তো দিব্য শরীরবান্ |
দিব্যাংবরধরঃ স্রগ্বী দিব্যগন্ধানুলেপনঃ || ৩. ১৪. ১৯||
কিরীটহারকেয়ূরকুণ্ডলাদ্যৈরলঙ্কৃতঃ |
প্রাদুর্বভূব পুরতো জগন্মোহন রুপধৃক্ || ৩. ১৪. ২০||
তং কুমারমথালিঙ্গ্য ব্রহ্মা লোকপিতামহঃ |
চক্রে কামেশ্বরং নাম্না কমনীয়বপুর্ধরম্ || ৩. ১৪. ২১||
তস্যাস্তু পরমাশক্তেরনুরূপো বরস্ত্বয়ম্ |
ইতি নিশ্চিত্য তেনৈব সহিতাস্তামথায়য়ুঃ || ৩. ১৪. ২২||
অস্তুবংস্তে পরাং শক্তিং ব্রহ্মবিষ্ণুমহেশ্বরাঃ |
তাং দৃষ্ট্বা মৃগশাবাক্ষীং কুমারো নীললোহিতঃ |
অভবন্মন্মথাবিষ্টো বিস্মৃত্য সকলাঃ ক্রিয়াঃ || ৩. ১৪. ২৩||
সাপি তং বীক্ষ্য তন্বঙ্গো মূর্তিংমন্তমিব স্মরম্ |
মদনাবিষ্টসর্বাঙ্গী স্বাত্মরূপমমন্যত |
অন্যোন্যালোকনাসক্তৌ তাবৃভৌ মদনাতুরৌ || ৩. ১৪. ২৪||
সর্বভাববিশেষজ্ঞৌ ধৃতিমন্তৌ মনস্বিনৌ |
পরৈরজ্ঞাতচারিত্রৌ মুহূর্তাস্বস্থচেতনৌ || ৩. ১৪. ২৫||
অথোবাচ মহাদেবীং ব্রহ্মা লোকৈকনায়িকাম্ |
ইমে দেবাশ্চ ঋষয়ো গন্ধর্বাপ্সরসাং গণাঃ |
ৎবামীশাং দ্রষ্টুমিচ্ছন্তি সপ্রিয়াং পরমাহবে || ৩. ১৪. ২৬||
কো বানুরূপস্তে দেবি প্রিয়ো ধন্যতমঃ পুমান্ |
লোকসংরক্ষণার্থায় ভজস্ব পুরুষং পরম্ || ৩. ১৪. ২৭||
রাজ্ঞী ভব পুরস্যাস্য স্থিতা ভব বরাসনে |
অভিষিক্তাং মহাভাগৈর্দেবার্ষে ভিরকল্মষৈঃ || ৩. ১৪. ২৮||
সাম্রাজ্যচিহ্নসংযুক্তাং সর্বাভরণসংযুতাম্ |
সপ্রিয়ামাসনগতাং দ্রষ্টুমিচ্ছামহে বয়ম্ || ৩. ১৪. ২৯||
ইতি শ্রীব্রহ্মাণ্ডে মহাপুরাণে উত্তরভাগে হয়গ্রীবাগস্ত্যসংবাদে ললিতোপাখ্যানে মদনকামেশ্বরপ্রাদুর্ভাবো নাম চতুর্দশোঽধ্যায়ঃ

তচ্ছ্রুৎবা বচনং দেবী মন্দস্মিতমুখাংবুজা |
উবাচ স ততো বাক্যং ব্রহ্মবিষ্ণুমুখান্সুরান্ || ৩. ১৫. ১||
স্বতন্ত্রাহং সদা দেবাঃ স্বেচ্ছাচারবিহারিণী |
মমানুরূপচরিতো ভবিতা তু মম প্রিয়ঃ || ৩. ১৫. ২||
তথেতি তৎপ্রতিশ্রুত্য সর্বের্দেবৈঃ পিতামহঃ |
উবাচ চ মহাদেবীং ধর্মার্থসহিতং বচঃ || ৩. ১৫. ৩||
কালক্রীতা ক্রয়ক্রীতা পিতৃদত্তা স্বয়ংযুতা |
নারীপুরুষয়োরেবমুদ্বাহস্তু চতুর্বিধঃ || ৩. ১৫. ৪||
কালক্রীতা তু বেশ্যা স্যাৎক্রয়ক্রীতা তু দাসিকা |
গন্ধর্বোদ্বাহিতা যুক্তা ভার্যা স্যাৎপিতৃদত্তকা || ৩. ১৫. ৫||
সমানধর্মিণী যুক্তা ভার্যা পিতৃবশংবদা |
যদদ্বৈতং পরং ব্রহ্ম সদসদ্ভাববর্জিতম্ || ৩. ১৫. ৬||
চিদানন্দাত্মকং তস্মাৎপ্রকৃতিঃ সমজায়ত |
ৎবমেবাসীচ্চ তদ্ব্রহ্ম প্রকৃতিঃ সা ৎবমেব হি || ৩. ১৫. ৭||
ৎবমেবানাদিরখিলা কার্যকারণরূপিণী |
ৎবামেব হি বিচিন্বন্তি যোগিনঃ সনকাদয়ঃ || ৩. ১৫. ৮||
সদসৎকর্মরূপাং চ ব্যক্তাব্যক্তো দয়াত্মিকাম্ |
ৎবামেব হি প্রশংসংতি পঞ্চব্রহ্মস্বরূপিণীম্ || ৩. ১৫. ৯||
ৎবামেব হি সৃজস্যাদৌ ৎবমেব হ্যবসি ক্ষণাৎ |
ভজস্ব পুরুষং কঞ্চিল্লোকানুগ্রহকাম্যয়া || ৩. ১৫. ১০||
ইতি বিজ্ঞাপিতা দেবী ব্রহ্মণা সকলৈঃ সুরৈঃ |
স্রজমুদ্যম্য হস্তেন চক্ষেপ গগনান্তরে || ৩. ১৫. ১১||
তয়োৎসৃষ্টা হি সা মালা শোভয়ন্তী নভস্থলম্ |
পপাত কণ্ঠদেশে হি তদা কামেশ্বরস্য তু || ৩. ১৫. ১২||
ততো মুমুদিরে দেবা ব্রহ্মবিষ্ণুপুরোগমাঃ |
ববৃষুঃ পুষ্পবর্ষাণি মন্দবাতেরিতা ঘনাঃ || ৩. ১৫. ১৩||
অথোবাচ বিধাতা তু ভগবন্তং জনার্দনম্ |
কর্তব্যো বিধিনোদ্বাহস্ত্বনয়োঃ শিবয়োর্হরে || ৩. ১৫. ১৪||
মুহুর্তো দেবসম্প্রাপ্তো জগন্মঙ্গলকারকঃ |
ৎবদ্রূপা হি মহাদেবী সহজশ্চ ভবানপি || ৩. ১৫. ১৫||
দাতুমর্হসি কল্যাণীমস্মৈ কামশিবায় তু |
তচ্ছ্রুৎবা বচনং তস্য দেবদেবস্ত্রিবিক্রমঃ || ৩. ১৫. ১৬||
দদৌ তস্যৈ বিধানেন প্রীত্যা তাং শঙ্করায় তু |
দেবর্ষিপিতৃমুখ্যানাং সর্বেষাং দেবয়োগিনাম্ || ৩. ১৫. ১৭||
কল্যাণং কারয়ামাস শিবয়োরাদিকেশবঃ |
উপায়নানি প্রদদুঃ সর্বে ব্রহ্মাদয়ঃ সুরাঃ || ৩. ১৫. ১৮||
দদৌ ব্রহ্মেক্ষুচাপং তু বজ্রসারমনশ্বরম্ |
তয়োঃ পুষ্পায়ুধং প্রাদাদম্লানং হরিরব্যয়ম্ || ৩. ১৫. ১৯||
নাগপাশং দদৌ তাভ্যাং বরুণো যাদসাংপতিঃ |
অঙ্কুশং চ দদৌ তাভ্যাং বিশ্বকর্মা বিশাংপতিঃ || ৩. ১৫. ২০||
কিরীটমগ্নিঃ প্রায়চ্ছত্তাটঙ্কৌ চন্দ্রভাস্করৌ |
নবরত্নময়ীং ভূষাং প্রাদাদ্রত্নাকরঃ স্বয়ম্ || ৩. ১৫. ২১||
দদৌ সুরাণামধিপো মধুপাত্রমথাক্ষয়ম্ |
চিন্তামণিময়ীং মালাং কুবেরঃ প্রদদৌ তদা || ৩. ১৫. ২২||
সাম্রাজ্যসূচকং ছত্রং দদৌ লক্ষ্মীপতিঃ স্বয়ম্ |
গঙ্গা চ যমুনা তাভ্যাং চামরে চন্দ্রভাস্বরে || ৩. ১৫. ২৩||
অষ্টৌ চ বসবো রুদ্রা আদিত্যাশ্চাশ্বিনৌ তথা |
দিক্পালা মরুতঃ সাধ্যা গন্ধর্বাঃ প্রমথেশ্বরাঃ |
স্বানিস্বান্যায়ুধান্যস্যৈ প্রদদুঃ পরিতোষিতাঃ || ৩. ১৫. ২৪||
রথাংশ্চ তুরগান্নাগান্মহাবেগান্মহাবলান্ |
উষ্টানরোগানশ্বাংস্তান্ক্ষুত্তৃষ্ণাপরিবর্জিতান্ |
দদুর্বজ্রোপমাকারান্সায়ুধান্সপরিচ্ছদান্ || ৩. ১৫. ২৫||
অথাভিষেকমাতেনুঃ সাম্রাজ্যে শিবয়োঃ শিবম্ |
অথাকরোদ্বিমানং চ নাম্না তু কুসুমাকরম্ || ৩. ১৫. ২৬||
বিধাতাম্লানমালং বৈ নিত্যং চাভেদ্যমায়ুধৈঃ |
দিবি ভুব্যন্তরিক্ষে চ কামগং সুসমৃদ্ধিমৎ || ৩. ১৫. ২৭||
যদ্গন্ধঘ্রাণমাত্রেণ ভ্রান্তিরোগক্ষুর্ধাতয়ঃ |
তৎক্ষণাদেব নশ্যন্তি মনোহ্লাদকরং শুভম্ || ৩. ১৫. ২৮||
তদ্বিমানমথারোপ্য তাবুভৌ দিব্যদংপতী |
চামখ্যাজনচ্ছত্রধ্বজয়ষ্টিমনোহরম্ || ৩. ১৫. ২৯||
বীণাবেণুমৃদঙ্গাদিবিবিধৈস্তৌর্যবাদনৈঃ |
সেব্যমানা সুরগণৈর্নির্গত্য নৃপমন্দিরাৎ || ৩. ১৫. ৩০||
যয়ৌ বীথীং বিহারেশা শোভয়ন্তী নিজৌজসা |
প্রতিহর্ম্যাগ্রসংস্থাভিরপ্সরোভিঃ সহস্রশঃ || ৩. ১৫. ৩১||
সলাজাক্ষতহস্তাভিঃ পুরন্ধ্রীভিশ্চ বর্ষিতা |
গাথাভির্মঙ্গলার্থাভির্বীণাবেণ্বাদিনিস্বনৈঃ |
তুষ্যন্তী বীবীথিবীথীষু মন্দমন্দমথায়য়ৌ || ৩. ১৫. ৩২||
প্রতিগৃহ্যাপ্স রোভিস্তু কৃতং নীরাজনাবিধিম্ |
অবরুহ্য বিমানগ্রাৎপ্রবিবেশ মহাসভাম্ || ৩. ১৫. ৩৩||
সিংহাসনমধিষ্ঠায় সহ দেবেন শংভুনা |
যদ্যদ্বাঞ্ছন্তি তত্রস্থা মনসৈব মহাজনাঃ |
সর্বজ্ঞা সাক্ষিপাতেন তত্তৎকামানপূরয়ৎ || ৩. ১৫. ৩৪||
তদ্দৃষ্ট্বা চরিতং দেব্যা ব্রহ্মা লোক পিতামহঃ |
কামাক্ষীতি তদাভিখ্যাং দদৌ কামেশ্বরীতি চ || ৩. ১৫. ৩৫||
ববর্ষাশ্চর্যমেঘোঽপি পুরে তস্মিংস্তদাজ্ঞয়া |
মহার্হাণি চ বস্তূনি দিব্যান্যাভরণানি চ || ৩. ১৫. ৩৬||
চিন্তামণিঃ কল্পবৃক্ষঃ কমলা কামধেনবঃ |
প্রতিবেশ্ম ততস্তস্থুঃ পুরো দেব্যাজয়ায় তে || ৩. ১৫. ৩৭||
তাং সেবৈকরসাকারাং বিমুক্তান্যক্রিয়াগুণাঃ |
সর্বকামার্থসংযুক্তা হৃষ্যন্তঃ সার্বকালিকম্ || ৩. ১৫. ৩৮||
পিতামহো হরিশ্চৈব মহাদেবশ্চ বাসবঃ |
অন্যে দিশামধীশাস্তু সকলা দেবতাগণাঃ || ৩. ১৫. ৩৯||
দেবর্ষয়ো নারদাদ্যাঃ সনকাদ্যাশ্চ যোগিনঃ |
মহর্ষয়শ্চ মন্বাদ্যা বশিষ্ঠাদ্যাস্তপোধনাঃ || ৩. ১৫. ৪০||
গন্ধর্বাপ্সরসো যক্ষা যাশ্চান্যা দেবজাতয়ঃ |
দিবি ভূম্যন্তরিক্ষেষু সসংবাধং বসংতি যে || ৩. ১৫. ৪১||
তে সর্বে চাপ্যসংবাধং নিবসংতি স্ম তৎপুরে || ৩. ১৫. ৪২||
এবং তদ্বৎসলা দেবী নান্যত্রৈত্যখিলাজ্জনাৎ |
তোষয়ামাস সততমনুরাগেণ ভূয়সা || ৩. ১৫. ৪৩||
রাজ্ঞো মহতি ভূর্লোকে বিদুষঃ সকলেপ্সিতাম্ |
রাজ্ঞী দুদোহাভীষ্টানি সর্বভূতলবাসিনাম্ || ৩. ১৫. ৪৪||
ত্রিলোকৈকমহীপালে সাংবিকে কামশঙ্করে |
দশবর্ষসহস্রাণি যয়ুঃ ক্ষণ ইবাপরঃ || ৩. ১৫. ৪৫||
ততঃ কদা চিদাগত্য নারদো ভগবানৃষিঃ |
প্রণম্য পরমাং শক্তিং প্রোবাচ বিনয়ান্বিতঃ || ৩. ১৫. ৪৬||
পর ব্রহ্ম পরং ধাম পবিত্রং পরমৈশ্বরি |
মদসদ্ভাবসংকল্পবিকল্পকলনাত্মিকা || ৩. ১৫. ৪৭||
জগদভ্যুদয়ার্থায় ব্যক্তভাবমুপাগতা |
অসজ্জনবিনাশার্থা সজ্জনাভ্যুদয়ার্থিনী |
প্রবৃত্তিস্তব কল্যাণি সাধূনাং রক্ষণায় হি || ৩. ১৫. ৪৮||
অয়ং ভণ্ডোঽসুরো দেবি বাধতে জগতাং ত্রয়ম্ |
ৎবয়ৈকয়ৈব জেতব্যো ন শক্যস্ত্বপরৈঃ সুরৈঃ || ৩. ১৫. ৪৯||
ৎবৎসেবৈকপরা দেবাশ্চিরকালমিহোষিতাঃ |
ৎবদাজ্ঞয়া গমিষ্যন্তি স্বানিস্বানি পুরাণি তু || ৩. ১৫. ৫০||
অমঙ্গলানি শূন্যানি সমৃদ্ধার্থানি সংৎবতঃ |
এবং বিজ্ঞাপিতা দেবী নারদেনাখিলেশ্বরী |
স্বস্ববাসনিবাসায় প্রেষয়ামাস চামরান্ || ৩. ১৫. ৫১||
ব্রহ্মাণং চ হরিং শংভুং বাসবাদীন্দিশাং পতীন্ |
যথার্হং পূজয়িৎবা তু প্রেষয়ামাস চাংবিকা || ৩. ১৫. ৫২||
অপরাধং ততস্ত্যক্তুমপি সংপ্রেষিতাঃ সুরাঃ |
স্বস্বাংশৈঃ শিবয়োঃ সেবামাদিপিত্রোরকুর্বত || ৩. ১৫. ৫৩||
এতদাখ্যানমায়ুষ্যং সর্বমঙ্গলকারণম্ |
আবির্ভাবং মহাদেব্যাস্তস্যা রাজ্যাভিষেচনম্ || ৩. ১৫. ৫৪||
যঃ প্রাতরুত্থিতো বিদ্বান্ভক্তিশ্রদ্ধাসমন্বিতঃ |
জপেদ্ধনসমৃদ্ধঃ স্যাৎসুধাসংমিতবাগ্ভবেৎ || ৩. ১৫. ৫৫||
নাশুভং বিদ্যতে তস্য পরত্রেহ চ ধীমতঃ |
যশঃ প্রাপ্নোতি বিপুলং সমানোত্তমতামপি || ৩. ১৫. ৫৬||
অচলা শ্রীর্ভবেতস্য শ্রেয়শ্চৈব পদেপদে |
কদাচিন্ন ভয়ং তস্য তেজস্বী বীর্যবান্ভবেৎ || ৩. ১৫. ৫৭||
তাপত্রয়বিহীনশ্চ পুরুষার্থৈশ্চ পূর্যতে |
ত্রিসংধ্যং যো জপেন্নিত্যং ধ্যাৎবা সিংহাসনেশ্বরীম্ || ৩. ১৫. ৫৮||
ষণ্মাসান্মহতীং লক্ষ্মীং প্রাপ্নুয়াজ্জাপকোত্তমঃ || ৩. ১৫. ৫৯||
ইতি শ্রীব্রহ্মাণ্ডমহাপুরাণে উত্তরভাগে হয়গ্রীবাগস্ত্যসংবাদে ললিতোপাখ্যানে বৈবাহিকোৎসবো নাম পঞ্চদশোঽধ্যায়ঃ

অথ সা জগতাং মাতা ললিতা পরমেশ্বরী |
ত্রৈলোক্যকণ্টকং ভণ্ডং দৈত্যং জেতুং বিনির্যয়ৌ || ৩. ১৬. ১||
চকার মর্দলাকারানংভোরাশীংস্তু সপ্ত তে |
প্রভূতমর্দ্দলধ্বানৈঃ পূরয়ামাসুরংবরম্ || ৩. ১৬. ২||
মৃদঙ্গমুরজাশ্চৈব পটহোঽতুকুলীঙ্গণাঃ |
সেলুকাঝল্লরীরাঙ্ঘাহুহুকাহুণ্ডুকাঘটাঃ || ৩. ১৬. ৩||
আনকাঃ পণবাশ্চৈব গোমুখাশ্চার্ধচন্দ্রিকাঃ |
যবমধ্যা মুষ্টিমধ্যা মর্দ্দলাডিণ্ডিমা অপি || ৩. ১৬. ৪||
ঝর্ঝরাশ্চ বরীতাশ্চ ইঙ্গ্যালিঙ্গ্যপ্রভেদজাঃ |
উদ্ধকাশ্চৈতুহুণ্ডাশ্চ নিঃসাণা বর্বরাঃ পরে || ৩. ১৬. ৫||
হুঙ্কারা কাকতুণ্ডাশ্চ বাদ্যভেদাস্তথাপরে |
দধ্বনুঃ শক্তিসেনাভিরাহতাঃ সমরোদ্যমে || ৩. ১৬. ৬||
ললিতাপরমেশান্যা অঙ্কুশাস্ত্রান্সমুদ্গতা |
সংপৎকরী নাম দেবী চচাল সহ শক্তিভিঃ || ৩. ১৬. ৭||
অনেককোটিমাতঙ্গতুরঙ্গরথপঙ্ক্তিভিঃ |
সেবিতা তরুণাদিত্যপাটলা সংপদীশ্বরী || ৩. ১৬. ৮||
মত্তমুদ্দণ্ডসংগ্রামরসিকং শৈলসন্নিভম্ |
রণকোলাহলং নাম সারুরোহ মতঙ্গজম্ || ৩. ১৬. ৯||
তামন্বগা যয়ৌ সেনা মহতী ধোররাবিণী |
লোলাভিঃ কেতুমালাভিরুল্লিখন্তী ধনাধনাৎ || ৩. ১৬. ১০||
তস্যাশ্চ সংপন্নাথায়াঃ পীনস্তনসুসংকটঃ |
কণ্টকো ঘনসংনাহো রুরুচে বক্ষসিস্থিতঃ || ৩. ১৬. ১১||
কংপমানা খড্গলতা ব্যরুচত্তৎকরে ধৃতা |
কুটিলা কালনাথস্য ভৃকুটীব ভয়ঙ্করা || ৩. ১৬. ১২||
উৎপাতবাতসংপাতাচ্চলিতা ইব পর্বতাঃ |
তামন্বগা যয়ুঃ কোটিসংখ্যাকাঃ কুঞ্জরোত্তমাঃ || ৩. ১৬. ১৩||
অথ শ্রীললিতাদেব্যা শ্রীপাশায়ুধসংভবা |
অতিৎবরিতবিক্রান্তিরশ্বারূঢাচলৎপুরঃ || ৩. ১৬. ১৪||
তয়া সহ হয়প্রায়ং সৈন্যং হেষাতরঙ্গিতম্ |
ব্যচরৎখুরকুদ্দালবিদারিতমহীতলম্ || ৩. ১৬. ১৫||
বনায়ুজাশ্চ কাংবোজাঃ পারদাঃ সিংধুদেশজাঃ |
টঙ্কণাঃ পর্বতীয়াশ্চ পারসীকাস্তথা পরে || ৩. ১৬. ১৬||
অজানেয়া ঘট্টধরা দরদাঃ কাল বন্দিজাঃ |
বাল্মীকয়াবনোদ্ভূতা গান্ধর্বাশ্চাথ যে হয়াঃ || ৩. ১৬. ১৭||
প্রাগ্দেশজাতাঃ কৈরাতা প্রান্তদেশোদ্ভবাস্তথা |
বিনীতাঃ সাধুবোঢারো বেগিনঃ স্থিরচেতসঃ || ৩. ১৬. ১৮||
স্বামিচিত্তবিশেষজ্ঞা মহায়ুদ্ধসহিষ্ণবঃ |
লক্ষণৈর্বহুভির্যুক্তা জিতক্রোধা জিতশ্রমাঃ || ৩. ১৬. ১৯||
পঞ্চধারাসু শক্ষঢ্যা বিনীতাশ্চ প্লবান্বিতাঃ || ৩. ১৬. ২০||
ফলশুক্তিশ্রিয়া যুক্তাঃ শ্বেতশুক্তিসমন্বিতাঃ |
দেবপদ্মং দেবমণিং দেবস্বস্তিকমেব চ || ৩. ১৬. ২১||
অথ স্বস্তিকশুক্তিশ্চ গডুরং পুষ্পগণ্ডিকাম্ |
এতানি শুভলক্ষ্মাণি জ্যরাজ্যপ্রদানি চ |
বহন্তো বাতজবনা বাজিনস্তাং সমন্বয়ুঃ || ৩. ১৬. ২২||
অপরাজিতনামানমতিতেজস্বিনং চলম্ |
অত্যন্তোত্তুঙ্গবর্ষ্মাণং কবিকাবিলসন্মুখম্ || ৩. ১৬. ২৩||
পার্শ্বদ্বয়েঽপি পতিতস্ফুরৎকেসরমণ্ডলম্ |
স্থূলবালধিবিক্ষেপক্ষিপ্যমাণপয়োধরম্ || ৩. ১৬. ২৪||
জঙ্ঘাকাণ্ডসমুন্নদ্ধমণিকিঙ্কিণিভাসুরম্ |
বাদয়ন্তমিবোচ্চণ্ডৈঃ খুরনিষ্ঠুরকুট্টনৈঃ || ৩. ১৬. ২৫||
ভূমণ্ডলমহাবাদ্যং বিজয়স্য সমৃদ্ধয়ে |
ঘোষমাণং প্রতি মুহুঃ সংদর্শিতগতিক্রমম্ || ৩. ১৬. ২৬||
আলোলচামরব্যাজাদ্বহন্তং পক্ষতী ইব |
ভাণ্ডৈর্মনোহরৈর্যুক্তং ঘর্ঘরীজালমণ্ডিতম্ || ৩. ১৬. ২৭||
এষাং ঘোষস্য কপটাদ্ধুঙ্কুর্বতীমি বাসুরান্ |
অশ্বারূঢা মহাদেবী সমারূঢা হয়ং যয়ৌ || ৩. ১৬. ২৮||
চতুর্ভির্বাহুভিঃ পাশমঙ্কুশং বেত্রমেব চ |
হয়বল্গাং চ দধতী বহুবিক্রমশোভিনী || ৩. ১৬. ২৯||
তরুণাদিত্যসঙ্কাশা জ্বলৎকাঞ্চীতরঙ্গিণী |
সঞ্চচাল হয়ারূঢা নর্তয়ন্তীব বাজিনম্ || ৩. ১৬. ৩০||
অথ শ্রীদণ্ডনাথায়া নির্যাণপটহধ্বনিঃ |
উদ্দণ্ডসিন্ধুনিস্বানশ্চকার বধিরং জগৎ || ৩. ১৬. ৩১||
বজ্রবাণৈঃ কঠোরৈশ্চভিন্দন্ত্যঃ ককুভো দশ |
অন্যুদ্ধতভুজাশ্মানঃ শক্তয়ঃ কাশ্চিদুচ্ছ্রিতাঃ || ৩. ১৬. ৩২||
কাশ্চিচ্ছ্রীদণ্ডনাথায়াঃ সেনানাসীরসঙ্গতাঃ |
খড্গং ফলকমাদায় পুপ্লুবুশ্চণ্ডসক্তয়ঃ || ৩. ১৬. ৩৩||
অত্যন্তসৈন্যসম্বাধং বেত্রসংতাডনৈঃ শতৈঃ |
নিবারয়ন্ত্যো বেত্রিণ্যো ব্যুচ্ছলন্তি স্মশক্তয়ঃ || ৩. ১৬. ৩৪||
অথ তুঙ্গধ্বজশ্রেণীর্মহিষাঙ্কা মৃগাঙ্কিকাম্ |
সিহাঙ্কাশ্চৈব বিভ্রাণাঃ শক্তয়ো ব্যচলন্পুরা || ৩. ১৬. ৩৫||
ততঃ শ্রীদণ্ডনাথায়াঃ শ্বেতচ্ছত্রং সহস্রশঃ |
স্ফুরৎকরাঃ প্রচলিতাঃ শক্তয়ঃ কাশ্চিদাদদুঃ || ৩. ১৬. ৩৬||
ইতি শ্রীব্রহ্মাণ্ডে মহাপুরাণে উত্তরভাগে হয়গ্রীবাগস্ত্যসংবাদে ললিতোপাখ্যানে সসেনবিজয়য়াত্রা নাম ষোডশোঽধ্যায়ঃ

দণ্ডনাথাবিনির্যাণে সংখ্যাতীতৈঃ সিতপ্রভৈঃ |
ছত্রৈর্গগনমারেজে নিঃসংখ্যাশশিমণ্ডিতম্ || ৩. ১৭. ১||
অন্যোন্যসক্তৈর্থবলচ্ছত্রৈরন্তর্ঘনীভবৎ |
তিমিরং নুনুদে ভূয়স্তৎকাণ্ডমণিরোচিষা || ৩. ১৭. ২||
বজ্রপ্রভাধগধগচ্ছায়াপূরিতদিঙ্মুখাঃ |
তালবৃন্তাঃ শতবিধাঃ ক্রোডমুখ্যা বলেঽচলন্ || ৩. ১৭. ৩||
চণ্ডো দণ্ডাদয়স্তীব্রাভৈরবাঃ শুলপাণয়ঃ |
জ্বলৎকেশাপিশঙ্গাভাস্তডিদ্ভাসুরদিঙ্মুখাঃ || ৩. ১৭. ৪||
দহত্য ইব দৈত্যৌঘাংস্তীক্ষ্ণৈর্মার্গণবহ্নিভিঃ |
প্রচেলুর্দণ্ডনাথায়াস্সেনা নাসীরধাবিতাঃ || ৩. ১৭. ৫||
অথ পোত্রীমুখীদেবীসমানাকৃতিভূষণাঃ |
তৎসমানায়ুধকরাস্তৎসমানস্ববাহনাঃ || ৩. ১৭. ৬||
তীক্ষ্মদংষ্ট৩বিনিষ্ঠ্যূতবহ্রিধূমামিতাংবরাঃ |
তমালশ্যামলাকারাঃ কপিলাঃ ক্রূরলোচনাঃ || ৩. ১৭. ৭||
সহস্রমহিষারূঢাঃ প্রচেলুঃ সূকরাননাঃ |
অথ শ্রীদণ্ডনাথা চ করিচক্ররথোত্তমাৎ || ৩. ১৭. ৮||
অবরুহ্য মহাসিংহমারুরোহ স্ববাহনম্ |
বজ্রঘোষ ইতি খ্যাতং ধূতকেসরমণ্ডলম্ || ৩. ১৭. ৯||
ব্যক্তাস্যং বিকটাকারং বিশঙ্কটবিলোচনম্ |
দংষ্ট্রাকটকটৎকারবধিরীকৃতদিক্তটম্ || ৩. ১৭. ১০||
আদিকূর্মকঠোরাস্থি খর্পরপ্রতিমৈর্নখৈঃ |
বিবন্তমিব ভূচক্রমাপাতালং নিমজ্জিভিঃ || ৩. ১৭. ১১||
যোজনত্রয়মুত্তুঙ্গং বগাদুদ্ধূতবালধিম্ |
সিংহবাহনমারুহ্য ব্যচলদ্দণ্ডনায়িকা || ৩. ১৭. ১২||
তস্যামসুরসংহারে প্রবৃত্তায়াং জ্বলৎক্রুধি |
উদ্বেগং বহুলং প্রাপ ত্রৈলোক্যং সচরাচরম্ || ৩. ১৭. ১৩||
কিমসৌ ধক্ষ্যতি রুষা বিশ্বমদ্যৈব পোত্রিণী |
কিং বা মুসলঘাতেন ভূমিং দ্বেধা করিষ্যতি || ৩. ১৭. ১৪||
অথ বা হলনির্ঘাতৈঃ ক্ষোভয়িষ্যতি বারিধীন্ |
ইতি ত্রস্তহৃদঃ সর্বে গগনে নাকিনাং গণাঃ || ৩. ১৭. ১৫||
দূরাদ্রুতং বিমানৈশ্চ সত্রাসং দদৃশুর্গতাঃ |
ববন্দিরে চ তা দেবা বদ্ধাঞ্জলিপুটান্বিতাঃ |
মুহুর্দ্বাদশনামানি কীর্তয়ন্তো নভস্তলে || ৩. ১৭. ১৬||
অগস্ত্য উবাচ
কানি দ্বাদশনামানি তস্যা দেব্যা বদ প্রভো |
অশ্বানন মহাপ্রাজ্ঞ যেষু মে কৌতুকং মহৎ || ৩. ১৭. ১৭||
হয়গ্রীব উবাচ
শৃণু দ্বাদশনামানি তস্যা দেব্যা ঘটোদ্ভব |
যদাকর্ণনমাত্রেণ প্রসন্না সা ভবিষ্যতি |
পঞ্চমী দণ্ডনাথা চ সংকেতা সময়েশ্বরী || ৩. ১৭. ১৮||
তথা সময়সংকেতা বারাহী পোত্রিণী তথা |
বার্তালী চ মহাসেনাপ্যাজ্ঞা চক্রেশ্বরী তথা || ৩. ১৭. ১৯||
অরিঘ্নী চেতি সম্প্রোক্তং নামদ্বাদশকং মুনে |
নামদ্বাদশকাভিখ্যবজ্রপঞ্জরমধ্যগঃ |
সংকটে দুঃখমাপ্নোতি ন কদাচন মানবঃ || ৩. ১৭. ২০||
এতৈর্নামভিরভ্রস্থাঃ সংকেতাং বহু তুষ্টুবুঃ |
তেষামনুগ্রহার্থায় প্রচচালচ সা পুনঃ || ৩. ১৭. ২১||
অথ সংকেতয়োগিন্যা মন্ত্রনাথা পদস্পৃশঃ |
নির্যাণসূচনকরী দিবি দধ্বান কাহলী || ৩. ১৭. ২২||
শৃঙ্গারপ্রায়ভূষাণাং শার্দূলশ্যামলৎবিষাম্ |
বীণাসংযতপাণীনাং শক্তীনাং নির্যয়ৌ বলম্ || ৩. ১৭. ২৩||
কাশ্চদ্গায়ন্তি নৃত্যন্তি মত্তকোকিলনিঃস্বনাঃ |
বীণাবেণুমৃদঙ্গাদ্যাঃ সবিলাসপদক্রমাঃ || ৩. ১৭. ২৪||
প্রচেলুঃ শক্তয়ঃ শ্যামা হর্ষয়ন্ত্যো জগজ্জনান্ |
ময়ূরবাহনাঃ কাশ্চিৎকতিচিদ্ধংসবাহনাঃ || ৩. ১৭. ২৫||
কতিচিন্নকুলারূঢাঃ কতিচিৎকোকিলাসনাঃ |
সর্বাশ্চ শ্যামলাকারাঃ কাশ্চিৎকর্ণীরথস্থিতাঃ || ৩. ১৭. ২৬||
কাদংবমধুমত্তাশ্চ কাশ্চিদারূঢসৈন্ধবাঃ |
মন্ত্রনাথাং পুরস্কৃত্য সংপ্রচেলুঃ পুরঃ পুরঃ || ৩. ১৭. ২৭||
অথারুহ্য সমুত্তুঙ্গধ্বজচক্রং মহারথম্ |
বালার্কবর্ণকবচা মদালোলবিলোচনা || ৩. ১৭. ২৮||
ঈষৎপ্রস্বেদকণিকামনোহরমুখাংবুজা |
প্রেক্ষয়ন্তী কটাক্ষৌধৌঃ কিঞ্চিদ্ভ্রূবল্লিতাণ্ডবৈঃ || ৩. ১৭. ২৯||
সমস্তমপি তৎসৈন্যং শক্তীনামুদ্ধতোদ্ধতম্ |
পিচ্ছত্রিকোণচ্ছত্রেণ বিরুদেন মহীয়সা || ৩. ১৭. ৩০||
আসাং মধ্যে ন চান্যাসাং শক্তীনামুজ্জ্বলোদয়া |
নির্জগাম ঘনশ্যামশ্যামলা মন্ত্রনায়িকা || ৩. ১৭. ৩১||
তাং তুষ্টুবুঃ ষোডশভির্নামভির্নাকবাসিনঃ |
তানি ষোডশনামানি শৃণু কুংভসমুদ্ভব || ৩. ১৭. ৩২||
সংগীতয়োগিনী শ্যামা শ্যামলা মন্ত্রনায়িকা |
মন্ত্রিণী সচিবেশী চ প্রধানেশী শুকপ্রিয়া || ৩. ১৭. ৩৩||
বীণাবতী বৈণিকী চ মুদ্রিণী প্রিয়কপ্রিয়া |
নিপপ্রিয়া কদংবেশী কদংববনবাসিনী || ৩. ১৭. ৩৪||
সদামদা চ নামানি ষোডশৈতানি কুংভজ |
এতৈর্যঃ সচিবেশানীং সকৃৎস্তৌতি শরীরবান্ |
তস্য ত্রৈলোক্যমখিলং হস্তে তিষ্ঠত্যসংশয়ম্ || ৩. ১৭. ৩৫||
মন্ত্রিনাথা যত্রয়ত্র কটাক্ষং বিকিরত্যসৌ |
তত্রতত্র গতাশঙ্কং শত্রুসৈন্যং পতত্যলম্ || ৩. ১৭. ৩৬||
ললিতাপরমেশান্যা রাজ্যচর্চা তু যাবতী |
শক্তীনামপি চর্চা যা সা সর্বত্র জয়প্রদা || ৩. ১৭. ৩৭||
অথ সংগীতয়োগিন্যাঃ করস্থাচ্ছুকপোতকাৎ |
নির্জগাম ধনুর্বেদো বহন্সজ্জংশরাসনম্ || ৩. ১৭. ৩৮||
চতুর্বাহুয়ুতো বীরস্ত্রিশিরাস্ত্রিবিলোচনঃ |
নমস্কৃত্য প্রধানেশীমিদমাহ স ভক্তিমান্ || ৩. ১৭. ৩৯||
দেবি ভণ্ডাসুরেদ্রস্য যুদ্ধায় ৎবং প্রবর্ত্তসে |
অতস্তব ময়া সাহ্যং কর্তব্যং মন্ত্রিনায়িকে || ৩. ১৭. ৪০||
চত্রজীবমিমং নাম কোদণ্ডং সুমহত্তরম্ |
গৃহাণ জগতামংব দানবানাং নিবর্হণম্ || ৩. ১৭. ৪১||
ইমৌ চাক্ষয়বাণাঢ্যৌ তূণীরৌ স্বর্ণচিত্রিতৌ |
গৃহাণ দৈত্যনাশায় মমানুগ্রহহেতবে || ৩. ১৭. ৪২||
ইতি প্রণম্য শিরসা ধনুর্বেদেন ভক্তিতঃ |
অর্পিতাংশ্চাপতূণীরাঞ্জগ্রাহ প্রিয়কপ্রিয়া || ৩. ১৭. ৪৩||
চিত্রজীবং মহাচাপমাদায় চ শূকপ্রিয়া |
বিস্ফারং জনয়ামাস মৌর্বীমুদ্বাদ্য ভূরিশঃ || ৩. ১৭. ৪৪||
সংগীতয়োগিনী চাপধ্বনিনা পূরিতং জগৎ |
নাকালয়ানাং চ মনোন যনানন্দসংপদা || ৩. ১৭. ৪৫||
যন্ত্রিণী চেতি দ্বে তস্যাঃ পরিচারিকে |
শুকং বীণাং চ সহসা বহন্ত্যৌ পরিচেরতুঃ || ৩. ১৭. ৪৬||
আলোলবলয়ক্বাণবর্ধিষ্ণুগুণনিস্বনম্ |
ধারয়ন্তী ঘনশ্যামা চকারাতিমনোহরম্ || ৩. ১৭. ৪৭||
চিত্রজীবশরাসেন ভূষিতা গীতয়োগিনী |
কদংবিনীব রুরুচে কদম্বচ্ছত্রকার্মুকা || ৩. ১৭. ৪৮||
কালীকটাক্ষবত্তীক্ষ্ণো নৃত্যদ্ভুজগভীষণঃ |
উল্লসন্দক্ষিণে পাণৌ বিললাস শিলীমুখঃ || ৩. ১৭. ৪৯||
গেয়চক্ররথারূঢাং তাং পশ্চাচ্চ সিষেবিরে |
তদ্বচ্ছ্যামলশোভাঢ্যা দেব্যো বাণধনুর্ধরাঃ || ৩. ১৭. ৫০||
সহস্রাক্ষৌহিণীসংখ্যাস্তীব্রবেগা মদালসাঃ |
আপূরয়ন্ত্যঃ ককুভং কলৈঃ কিলিকিলারবৈঃ || ৩. ১৭. ৫১||
ইতি শ্রীব্রহ্মাণ্ডমহাপুরাণে উত্তরভাগে হয়গ্রীবাগস্ত্যসংবাদে ললিতোপাখ্যানে দণ্ডনাথাশ্যামলাসেনায়াত্রা নাম সপ্তদশোঽধ্যায়ঃ

অথ রাজনায়িকা শ্রিতাজ্বলিতাঙ্কুশা ফণিসমানপাশভৃৎ |
কলনিক্বণদ্বলয়মৈক্ষ্বং ধনুর্দধতী প্রদীপ্তকুসুমেষুপঞ্চকা || ৩. ১৮. ১||
উদয়ৎসহৎস্রমহসা সহস্রতোঽপ্যতিপাটলং নিজবপুঃ প্রভাঝরম্ |
কিরতী দিশাসু বদনস্য কান্তিভিঃ সৃজতীব চন্দ্রময়মভ্রমণ্ডলম্ || ৩. ১৮. ২||
দশয়োজনায়তিমাতা জগত্ত্রয়ীমভিবৃণ্বতা বিশদমৌক্তিকাত্মনা |
ধবলাতপত্রবলয়েন ভাসুরা শশিমণ্ডলস্য সখিতামুপেয়ুষা || ৩. ১৮. ৩||
অভিবীজিতা চ মণিকান্তশোভিনা বিজয়াদিমুখ্যপরিচারিকাগণৈঃ |
নবচন্দ্রিকালহরিকান্তিকন্দলীচতুরেণ চামরচতুষ্টয়েন চ || ৩. ১৮. ৪||
শক্ত্যৈকরাজ্যপদবীমভিসূচয়ন্তী সাম্রাজ্যচিহ্নশতমণ্ডিতসৈন্যদেশা |
সংগীতবাদ্যরচনাভিরথামরীণাং সংস্তূয়মানবিভবা বিশদপ্রকাশা || ৩. ১৮. ৫||
বাচামগোচরমগোচরমেব বুদ্ধেরীদৃক্তয়া ন কলনীয়মনন্যতুল্যম্ || ৩. ১৮. ৬||
ত্রৈলোক্যগর্ভপরিপূরিতশক্তিচক্রসাম্রাজ্যসংপদভিমানমভিস্পৃশন্তী |
আবদ্ধভক্তিবিপুলাঞ্জলিশেখরাণামারাদহংপ্রথমিকা কৃতসেবনানাম্ || ৩. ১৮. ৭||
ব্রহ্মেশবিষ্ণুবৃষমুখ্যসুরোত্তমানাং বক্ত্রাণিবর্ষিতনুতীনি কটাক্ষয়ন্তী |
উদ্দীপ্তপুষ্পশরপঞ্চকতঃ সমুত্থৈজ্যোতির্ময়ং ত্রিভুবনং সহসা দধানা || ৩. ১৮. ৮||
বিদ্যুৎসমদ্যুতিভিরপ্সরসাং সমূহৈর্বিক্ষিপ্যমাণজয়মঙ্গললাজবর্ষা |
কামেশ্বরীপ্রভৃতিভিঃ কমনীয়ভাভিঃ সংগ্রামবেষরচনাসুমনোহরাভিঃ || ৩. ১৮. ৯||
দীপ্তায়ুধদ্যুতিতিরস্কৃত ভাস্করাভির্নিত্যাভিরঙ্ঘ্রিসবিধে সমুপাক্যমানা |
শ্রীচক্রনামতিলকং দশয়োজনাতিতুঙ্গধ্বজোল্লিখিতমেঘকদংবমুচ্চৈঃ || ৩. ১৮. ১০||
তীব্রাভিরাবণসুশক্তিপরংপরভির্যুক্তং রথং সমরকর্মণি চালয়ন্তী |
প্রোদ্যৎপিশঙ্গরুচিভাগমলাংশুকেন বীতামনোহররুচিস্সমরে ব্যভাসীৎ || ৩. ১৮. ১১||
পঞ্চাধিকৈর্বিশতিনামরত্নৈঃ প্রপঞ্চপাপপ্রশমাতিদক্ষৈঃ |
সংস্তূয়মানা ললিতা মরুদ্ভিঃ সংগ্রামমুদ্দিশ্য সমুচ্চচাল || ৩. ১৮. ১২||
অগস্ত্য উবাচ
বীজিবক্ত্র মহাবুদ্ধে পঞ্চবিংশতিনামভিঃ |
ললিতাপরমেশান্যা দেহি কর্ণরসায়নম্ || ৩. ১৮. ১৩||
হয়গ্রীব উবাচ
সিংহাসনা শ্রীললিতা মহারাজ্ঞী পরাঙ্কুশা |
চাপিনী ত্রিপুরা চৈব মহাত্রিপুরসুন্দরী || ৩. ১৮. ১৪||
সুন্দরী চক্রনাথা চ সাম্রাজী চক্রিণী তথা |
চক্রেশ্বরী মহাদেবী কামেশী পরমেশ্বরী || ৩. ১৮. ১৫||
কামরাজপ্রিয়া কামকোটিগা চক্রবর্তিনী |
মহাবিদ্যা শিবানঙ্গবল্লভা সর্বপাটলা || ৩. ১৮. ১৬||
কুলনাথাম্নায়নাথা সর্বাম্নায়নিবাসিনী |
শৃঙ্গারনায়িকা চেতি পঞ্চবিংশতিনামভিঃ || ৩. ১৮. ১৭||
স্তুবন্তি যে মহাভাগাং ললিতাং পরমেশ্বরীম্ |
তে প্রাপ্নুবন্তি সৌভাগ্যমষ্টৌ সিদ্ধীর্মহদ্যশঃ || ৩. ১৮. ১৮||
ইত্থং প্রচণ্ডসংরংভং চালয়ন্তী মহদ্বলম্ |
ভণ্ডাসুরং প্রতি ক্রুদ্ধা চচাল ললিতাংবিকা || ৩. ১৮. ১৯||
ইতি শ্রীব্রহ্মাণ্ডমহাপুরাণে উত্তরভাগে হয়গ্রীবাগস্ত্যসংবাদে ললিতোপাখ্যানে ললিতাপরমেশ্বরীসেনাজয় যাত্রা নামাষ্টাদশোঽধ্যায়ঃ

অগস্ত্য উবাচ
চক্ররাজরথেন্দ্রস্য যাঃপর্বণি সমাশ্রিতাঃ |
দেবতা প্রকটাভিখ্যাস্তাসামাখ্যাং নিবেদয় || ৩. ১৯. ১||
সংখ্যাশ্চ তাসামখিলা বর্ণভেদাংশ্চ শোভনান্ |
আয়ুধানি চ দিব্যানি কথয়স্ব হয়ানন || ৩. ১৯. ২||
হয়গ্রীব উবাচ
নবমং পর্ব দীপ্তস্য রথস্য সমুপস্থিতাঃ |
তশ প্রোক্তা সিদ্ধিদেব্যস্তাসাং নামানি মচ্ছৃণু || ৩. ১৯. ৩||
অণিমা মহিমাচৈব লঘিমা গরিমা তথা |
ঈশিতা বশিতা চৈব প্রাপ্তিঃ সিদ্ধিশ্চ সপ্তমী || ৩. ১৯. ৪||
প্রাকাম্যমুক্তিসিদ্ধিশ্চ সর্বকামাভিধাপরা |
এতাদেব্যশ্চতুর্বাহ্ব্যো জপাকুসুমসংনিভাঃ || ৩. ১৯. ৫||
চিন্তামণিকপালং চ ত্রিশূলং সিদ্ধিকজ্জলম্ |
দধানা দয়য়া পূর্ণা যোগিভিশ্চ নিষেবিতাঃ || ৩. ১৯. ৬||
তত্র পূর্বার্দ্ধভাগে চ ব্রহ্মাদ্যা অষ্ট শক্তয়ঃ |
ব্রাহ্মী মাহেশ্বরী চৈব কৌমারী বৈষ্মবী তথা |
বারাহী চৈব মাংহেন্দ্রী চামুণ্ডা চৈব সপ্তমী || ৩. ১৯. ৭||
মহালক্ষ্মীরষ্টমী চ দ্বিভুজাঃ শোণবিগ্রহাঃ |
কপালমুৎপলং চৈব বিভ্রাণা রক্তবাসসঃ || ৩. ১৯. ৮||
অথ বান্য প্রকারেণ কেচিদ্ধ্যানং পচক্ষতে |
ব্রহ্মাদিসদৃশাকারা ব্রহ্মাদিসদৃশায়ুধাঃ || ৩. ১৯. ৯||
ব্রহ্মাদীনাং পরং চিহ্নং ধারয়ন্ত্যঃ প্রকীর্তিতাঃ |
তাসামূর্ধ্বস্থানগতাং মুদ্রা দেব্যো মহত্তরাঃ || ৩. ১৯. ১০||
মুদ্রাবিরচনায়ুক্তৈর্হস্তৈঃ কমলকান্তিভিঃ |
দাডিমীপুষ্পসঙ্কাশাঃ পীতাংবরমনোহরাঃ || ৩. ১৯. ১১||
চতুর্ভুজা ভুজদ্বন্দ্বধৃতচর্মকৃপাণকাঃ |
মদরক্তবিলোলাক্ষ্যস্তাসাং নামানি মচ্ছৃণু || ৩. ১৯. ১২||
সর্বসংক্ষোভিণী চৈব সর্ববিদ্রাবিণী তথা |
সর্বাকর্ষণকৃন্মুদ্রা তথা সর্ববশঙ্করী || ৩. ১৯. ১৩||
সর্বোন্মাদনমুদ্রা চ যষ্টিঃ সর্বমহাঙ্কুশা |
সর্বখেচরিকা মুদ্রা সর্ববীজা তথাপরা || ৩. ১৯. ১৪||
সর্বয়োনিশ্চ নবমী তথা সর্বত্রিশণ্ডিকা |
সিদ্ধিব্রাহয়াদিমুদ্রাস্তা এতাঃ প্রকটশক্তয়ঃ || ৩. ১৯. ১৫||
ভণ্ডাসুরস্য সংহারং কর্তুং রক্তরথে স্থিতাঃ |
যা গুপ্তাখ্যাঃ পূর্বমুক্তাস্তাসাং নামানি মচ্ছৃণু || ৩. ১৯. ১৬||
কামাকর্ষণিকা চৈব বুদ্ধ্যাকর্ষণিকা কলা |
অহঙ্কারাকর্ষিণী চ শব্দাকর্ষণিকা কলা || ৩. ১৯. ১৭||
স্পর্শাকর্ষণিকা নিত্যা রূপাকর্ষণিকা কলা |
রসাকর্ষণিকা নিত্যা গন্ধাকর্ষণিকা কলা || ৩. ১৯. ১৮||
চিত্তাকর্ষণিকা নিত্যা ধৈর্যাকর্ষণিকা কলা |
স্মৃত্যা কর্ষণিকা নিত্যা নামাকর্ণণিকা কলা || ৩. ১৯. ১৯||
বীজাকর্ষণিকা নিত্যা চাত্মকর্ষণিকা কলা |
অমৃতাকর্ষণী নিত্যা শরীরাকর্ষিণী কলা || ৩. ১৯. ২০||
এতাঃ ষোডশ শীতাংশুকলারূপাশ্চ শক্তয়ঃ |
অষ্টমং পর্ব সম্প্রাপ্তা গুপ্তা নাম্না প্রকীর্তিতাঃ || ৩. ১৯. ২১||
বিদ্রুমদ্রুমসঙ্কাশা মন্দস্মিত মনোহরাঃ |
চতুর্ভুজাস্ত্রিনেত্রাশ্চ চন্দ্রার্কমুকুজোজ্জ্বলাঃ || ৩. ১৯. ২২||
চাপবাণৌ চর্মখড্গৌ দধানা দিব্যকান্তয়ঃ |
ভণ্ডাসুরবধার্থায় প্রবৃত্তাঃ কুম্ভসম্ভব || ৩. ১৯. ২৩||
সায়ন্তনজ্বলদ্দীপপ্রখ্যচক্ররথস্য তু |
সপ্তমে পর্বণি কৃতাবাসা গুপ্ততরাভিধাঃ || ৩. ১৯. ২৪||
অনঙ্গমদনানঙ্গমদনাতুরয়া সহ |
অনঙ্গলেখা চানঙ্গবেগানঙ্গাঙ্কুশাপি চ || ৩. ১৯. ২৫||
অনঙ্গমালিগ্যপরা এতা দেব্যো জপাৎবিষঃ |
ইক্ষুচাপং পুষ্পশরান্পুষ্পকন্দুকমুৎপলম্ || ৩. ১৯. ২৬||
বিভ্রত্যোঽদভ্রবিক্রান্তিশালিন্যো ললিতাজ্ঞয়া |
ভণ্ডাসুরমভিক্রুদ্ধাঃ প্রজ্বলন্ত্য ইব স্থিতাঃ || ৩. ১৯. ২৭||
অথ চক্ররথেন্দ্রস্য ষষ্ঠং পর্ব সমাশ্রিতাঃ |
সর্বসংক্ষোভিণীমুখ্যাঃ সম্প্রদায়াখ্যয়া যুতাঃ || ৩. ১৯. ২৮||
বেণীকৃতকচস্তোমাঃ সিংদূরতিলকোজ্জ্বলাঃ |
অতিতীব্রস্বভাবাশ্চ কালানলসমৎবিষঃ || ৩. ১৯. ২৯||
বহ্নিবাণং বহ্নিচাপং বহ্নিরূপমসিং তথা |
বহ্নিচক্রাখ্যাফলকং দধানা দীপ্তবিগ্রহাঃ || ৩. ১৯. ৩০||
অসুরেন্দ্রং প্রতি ক্রুদ্ধাঃ কামভস্মসমুদ্ভবাঃ |
আজ্ঞাশক্তয় এবৈতা ললিতায়া মহৌজসঃ || ৩. ১৯. ৩১||
সর্বসংক্ষোভিণী চৈব সর্ববিদ্রাবিণী তথা |
সর্বাকর্ষণিকা শক্তিঃ সর্বাহ্লাদিনিকা তথা || ৩. ১৯. ৩২||
সর্বসংমোহিনীশক্তিঃ সর্বস্তম্ভনশক্তিকা |
সর্বজৃংভণশক্তিশ্চ সর্বোন্মাদনশক্তিকা || ৩. ১৯. ৩৩||
সর্বার্থসাধিকা শক্তিঃ সর্বসম্পত্তিপূরণী |
সর্বমন্ত্রময়ী শক্তিঃ সর্বদ্বন্দ্বক্ষয়ঙ্করী || ৩. ১৯. ৩৪||
এবং তু সম্প্রদায়ানাং নামানি কথিতানি বৈ |
অথ পঞ্চমপর্বস্থাঃ কুলোত্তীর্ণা ইতি স্মৃতাঃ || ৩. ১৯. ৩৫||
তাশ্চ সপ্তটিকসঙ্কাশাঃ পরশুং পাশমেব চ |
গদাং ঘণ্টাং মণিং চৈব দধানা দীপ্তবিগ্রহাঃ || ৩. ১৯. ৩৬||
দেবদ্বিষমতি ক্রুদ্ধা ভ্রুকুটীকুটিলাননাঃ |
এতাসামপি নামানি সমাকর্ময় কুম্ভজ || ৩. ১৯. ৩৭||
সর্বসিদ্ধিপ্রদা দেবী সর্বসম্পৎপ্রদা তথা |
সর্বপ্রিয়ঙ্করী দেবী সর্বমঙ্গলকারিণী || ৩. ১৯. ৩৮||
সর্বকামপ্রদা দেবী সর্বদুঃখবিমোচিনী || ৩. ১৯. ৩৯||
সর্বমৃত্যুপ্রশমিনী সর্ববিঘ্ননিবারিণী |
সর্বাঙ্গসুন্দরী দেবী সর্বসৌভাগ্যদায়িনী || ৩. ১৯. ৪০||
দশৈন্তাঃ কথিতা দেব্যো দয়য়া পূরিতাশয়াঃ |
চক্রে তুরীয়পর্বস্থা মুক্তাহারসমৎবিষঃ || ৩. ১৯. ৪১||
নিগর্ভয়োগিনীনাম্না প্রথিতা দশ কীর্তিতাঃ |
সর্বজ্ঞা সর্বশক্তিশ্চ সর্বৈশ্বর্যপ্রদা তথা || ৩. ১৯. ৪২||
সর্বজ্ঞানময়ী দেবী সর্বব্যাধিবিনাশিনী |
সর্বাধারস্বরূপা চ সর্বপাপহরা তথা || ৩. ১৯. ৪৩||
সর্বানন্দময়ী দেবী সর্বরক্ষাস্বরূপিণী |
দশমী দেবতাজ্ঞেয়া সর্বেষ্সিতফলপ্রদা || ৩. ১৯. ৪৪||
এতাশ্চতুর্ভুজা জ্ঞেয়া বজ্রং শক্তিং চ তোমরম্ |
চক্রং চৈবাভিবিভ্রাণা ভণ্ডাসুরবধোদ্যতাঃ || ৩. ১৯. ৪৫||
অথ চক্ররথেন্দ্রস্য তৃতীয়ং পর্বসংশ্রিতাঃ |
রহস্যয়োগিনীনাম্না প্রখ্যাতা বাগধীশ্বরাঃ || ৩. ১৯. ৪৬||
রক্তাশোকপ্রসূনাভাবাণকার্মুকপাণয়ঃ |
কবচচ্ছন্নসর্বাঙ্গয়ো বীণাপুস্তকশোভিতাঃ || ৩. ১৯. ৪৭||
বশিনী চৈব কামেশী ভোগিনী বিমলা তথা |
অরুণাচ জবিন্যাখ্যা সর্বেশী কৌলিনী তথা || ৩. ১৯. ৪৮||
অষ্টাবেতাঃ স্মৃতা দেব্যো দৈত্যসংহারহেতবঃ |
অথ চক্ররথেন্দ্রস্য দ্বিতীয়ং পর্বসংশ্রিতাঃ || ৩. ১৯. ৪৯||
চাপবাণৌ পানপাত্রং মাতুরুঙ্গং কৃপাণিকাম্ |
তিস্রস্ত্রিপীঠনিলয়া অষ্টবাহুসমন্বিতাঃ || ৩. ১৯. ৫০||
পলকং নাগপাশং চ ঘণ্টাং চৈব মহাধ্বনিম্ |
বিভ্রাণা মদিরামত্তা অতিগুপ্তরহস্যকাঃ || ৩. ১৯. ৫১||
কামেশী চৈব বজ্রেশী ভগমালিন্যথাপরা |
তিস্র এতাঃ স্মৃতা দেব্যো ভণ্ডে কোপসমন্বিতাঃ || ৩. ১৯. ৫২||
ললিতাসমমাহাত্ম্যা ললিতাসমতেজসঃ |
এতাস্তু নিত্যং শ্রীদেব্যা অন্তরঙ্গাঃ প্রকীর্তিতাঃ || ৩. ১৯. ৫৩||
অথানন্দমহাপীঠে রথমধ্যমপর্বণি |
পরিতো রচিতাবাসাঃ প্রোক্তাঃ পঞ্চদশাক্ষরাঃ || ৩. ১৯. ৫৪||
তিথিনিত্যাঃ কালরূপা বিশ্বং ব্যাপ্যৈব সংস্থিতাঃ |
ভণ্ডাসুরাদিদৈত্যেষু প্রক্ষুব্ধভ্রুকুটীতটাঃ || ৩. ১৯. ৫৫||
দেবীসমনিজাকারা দেবীসমনিজায়ুধাঃ |
জগতামুপকারায় বর্তমানা যুগেয়ুগে || ৩. ১৯. ৫৬||
তাসাং নামানি মত্তস্ত্বমবধারয়কুম্ভজ |
কামেশী ভগমালা চ নিত্যক্লিন্না তথৈব চ || ৩. ১৯. ৫৭||
ভেরুণ্ডা বহ্নিবাসিন্যো মহাবজ্রেশ্বরী তথা |
দতী চ ৎবরিতা দেবী নবমী কুলসুন্দরী || ৩. ১৯. ৫৮||
নিত্যা নীলপতাকা চ বিজয়া সর্বমঙ্গলা |
জ্বালামালিনিকাচিত্রে দশ পঞ্চ চ কীর্তিতাঃ || ৩. ১৯. ৫৯||
এতাভিঃ সহিতা দেবী সদা সেবৈকবুদ্ধিভিঃ |
দুষ্টং ভণ্ডাসুরং জেতুং নির্যয়ৌ পরমেশ্বরী || ৩. ১৯. ৬০||
মন্ত্রিনাথা মহাচক্রে গীতিং চক্রে রথোত্তমে |
সপ্তপর্বাণি চোক্তানি তত্র দেব্যাশ্চ তাঃ শৃণু || ৩. ১৯. ৬১||
গেয়চক্ররথে পর্বমধ্যপীঢনিকেতনা |
সংগীতয়োগিনী প্রোক্তা শ্রীদেব্যা অতিবল্লভা || ৩. ১৯. ৬২||
তদেব প্রথমং পর্ব মন্ত্রিণ্যাস্তু নিবাসভূঃ |
অথ দ্বিতীয়পর্বস্থা গেয়চক্রে রথোত্তমে || ৩. ১৯. ৬৩||
রতিঃ প্রীতির্মনোজা চ বীণাকার্মুকপাণয়ঃ |
তমালশ্যামলাকারা দানবোন্মূলনক্ষমাঃ || ৩. ১৯. ৬৪||
তৃতীয়পর্বসংরূঢা মনোভূবাণদেবতা |
দ্রাবিণী শোষিণী চৈব বন্ধিনী মোহিনী তথা || ৩. ১৯. ৬৫||
উন্মাদিনীতি পঞ্চৈতা দীপ্তকার্মুকপাণয়ঃ |
তত্র পর্বণ্যধস্তাত্তু বর্তমানা মহৌজসঃ || ৩. ১৯. ৬৬||
কামরাজশ্চ কন্দর্পৌং মন্মথো মকরধ্বজঃ |
মনোভবঃ পঞ্চমঃ স্যাদেতে ত্রৈলোক্যমোহনাঃ || ৩. ১৯. ৬৭||
কস্তূরীতিলকোল্লাসিভালামুক্তাবিরাজিতাঃ |
কবচচ্ছন্নসর্বাঙ্গাঃ পলাশপ্রসবৎবিষঃ || ৩. ১৯. ৬৮||
পঞ্চকামা ইমে প্রোক্তা ভণ্ডাসুরবধার্থিনঃ |
জেয়চক্ররথেন্দ্রস্য চতুর্থং পর্ব সংশ্রিতাঃ || ৩. ১৯. ৬৯||
ব্রহ্মীমুখ্যাস্তু পূর্বোক্তাশ্চণ্ডিকা ৎবষ্টমী পরা |
তত্র পর্বণ্যধস্তাচ্চ লক্ষ্মীশ্চৈব সরস্বতী || ৩. ১৯. ৭০||
রতিঃ প্রীতিঃ কীর্তিশান্তী পুষ্টিস্তুষ্টিশ্চ শক্তয়ঃ |
এতাশ্চক্রোধরক্তাক্ষ্যো দৈত্যং হন্তুং মহাবলম্ || ৩. ১৯. ৭১||
কুন্তচক্রধরাঃ প্রোক্তাঃ কুমার্যঃ কুংভসংভব |
পঞ্চমং পর্ব সংপ্রাপ্তা বামাদ্যাঃ ষোডশাপরাঃ || ৩. ১৯. ৭২||
গীতিং চক্রূ রথেন্দ্রস্য তাসাং নামানি মচ্ছৃণু |
বামা জ্যেষ্টা চ রৌদ্রী চ শান্তিঃ শ্রদ্ধা সরস্বতী || ৩. ১৯. ৭৩||
শ্রীভূশাক্তিশ্চ লক্ষ্মীশ্চ সৃষ্টিশ্চৈব তু মোহিনী |
তথা প্রমাথিনী চাশ্বসিনী বীচিস্তথৈব চ || ৩. ১৯. ৭৪||
বিদ্যুন্মালিন্যথ সুরানন্দাথো নাগবুদ্ধিকা |
এতাস্তু কুরবিন্দাভা জগৎক্ষোভণলংপটাঃ || ৩. ১৯. ৭৫||
মহাসরসমন্নাহমাদধানাঃ পদেপদে |
বজ্রকঙ্কটসংছন্না অট্টহাসোজ্জ্বলাঃ পরে |
বজ্রদণ্ডৌ শতঘ্নীং চ সংবিভ্রাণা ভুশুণ্ডিকাঃ || ৩. ১৯. ৭৬||
অথ গীতিরথেন্দ্রস্য ষষ্ঠং পর্ব সমাশ্রিতাঃ |
অসিতাঙ্গপ্রভৃতয়ো ভৈরবাঃ শস্ত্রভীষণাঃ || ৩. ১৯. ৭৭||
ত্রিশিখং পানপাত্রং চ বিভ্রাণা নীলবর্চসঃ |
অসিতাঙ্গো রুরুশ্চণ্ডঃ ক্রোধ উন্মত্তভৈরবঃ || ৩. ১৯. ৭৮||
কপালী ভীষণশ্চৈব সংহারশ্চাষ্ট ভৈরবাঃ |
অথ গীতিরথেন্দ্রস্য সপ্তমং পর্ব সংশ্রিতাঃ || ৩. ১৯. ৭৯||
মাতঙ্গী সিদ্ধলক্ষ্মীশ্চ মহামাতঙ্গিকাপি চ |
মহতী সিদ্ধলক্ষ্মীশ্চ শোণা বাণধনুর্ধরাঃ || ৩. ১৯. ৮০||
তস্যৈব পর্বণোঽধস্তাদ্গণপঃ ক্ষেত্রপস্তথা |
দুর্গাংবা বটুকশ্চেংব সর্বে তে শস্ত্রপাণয়ঃ || ৩. ১৯. ৮১||
তত্রৈব পর্বণোঽধস্তাল্লক্ষ্মীশ্চৈব সরস্বতী |
শঙ্খঃ পদ্মো নিধিশ্চৈব তে সর্বে শস্ত্রপাণয়ঃ || ৩. ১৯. ৮২||
লোকদ্বিষং প্রতি ক্রুদ্ধা ভণ্ডং চণ্ডপরাক্রমম্ |
শক্রাদয়শ্চ বিষ্ম্বন্তা দশ দিক্চক্রনায়কাঃ || ৩. ১৯. ৮৩||
শক্তিরূপাস্তত্র পর্বণ্যধস্তাৎকৃতসংশ্রয়াঃ |
বজ্রে শক্তিং কালদণ্ডমকিং পাশং ধ্বজং তথা || ৩. ১৯. ৮৪||
গদাং ত্রিশূলং দর্ভাস্ত্রং বজ্রং চ দধতস্ত্বমী |
সেবন্তে মন্ত্রিনাথাং তাং নিত্যং ভক্তিসমন্বিতাঃ || ৩. ১৯. ৮৫||
ভণ্ডাসুরান্দুর্দুরূঢান্নিহন্তুং বিশ্বকণ্টকান্ |
মন্ত্রিনাথাশ্রয়দ্বারা ললিতাজ্ঞাপনোৎসুকাঃ || ৩. ১৯. ৮৬||
গীতিচক্ররথোপান্তে দিক্পালাঃ সংশ্রয়ং দদুঃ |
সর্বেষাং চৈব দেবানাং মন্ত্রিণী দ্বারতঃ কৃতা || ৩. ১৯. ৮৭||
বিজ্ঞাপনা মহাদেব্যাঃ কার্যসিদ্ধিং প্রয়চ্ছতি |
রাক্ষী বিজ্ঞাপনা চেতি প্রধানদ্বারতঃ কৃতা || ৩. ১৯. ৮৮||
যথা খলু ফলপ্রাপ্তিঃ সেবকানাং হি জায়তে |
অন্যথা কথমেতেষাং সামর্থ্যং জ্বলিতৌজসঃ || ৩. ১৯. ৮৯||
অপধৃষ্যপ্রভাবায়াঃ শ্রীদেব্যা উপসর্পণে |
সা হি সংগীতবিদ্যেতি শ্রীদেব্যা অতিবল্লভা || ৩. ১৯. ৯০||
নাতিলঙ্ঘতি চ ক্বাপি তদুক্তং কার্যসিদ্ধিষু |
শ্রীদেব্যাঃশক্তিসাম্রাজ্যে সর্বকর্মাণি মন্ত্রিণী || ৩. ১৯. ৯১||
অকর্ত্তুমন্যথা কর্তুং কর্তুং চৈব প্রগল্ভতে |
তস্মাৎসর্বেঽপি দিক্পালাঃ শ্রীদেব্যা জয়কাঙ্ক্ষিণঃ |
তস্যাঃ প্রধানভূতায়াঃ সেবামেব বিতন্বতে || ৩. ১৯. ৯২||
ইতি শ্রীললিতাদেব্যাশ্চক্ররাজরথোত্তমে |
পর্বস্থিতানাং দেবীনাং নামানি কথিতান্যলম্ || ৩. ১৯. ৯৩||
ভণ্ডাসুরস্য সংহারে তস্যা দিব্যায়ুধান্যপি |
প্রোক্তানি গেয়চক্রস্য পর্বদেব্যাশ্চ কীর্তিতাঃ || ৩. ১৯. ৯৪||
ইমানি সর্বদেবীনাং নামান্যাকর্ণয়ন্তি যে |
সর্বপাপবিনির্মুক্তাস্তে স্যুর্বিজয়িনো নরাঃ || ৩. ১৯. ৯৫||
ইতি শ্রীব্রহ্মাণ্ডমহাপুরাণে উত্তরভাগে হয়গ্রীবাগস্ত্যসংবাদে ললিতোপখ্যানে শ্রীচক্ররাজরথজ্ঞেয়চক্ররথপর্বস্থদেবতানামপ্রকাশনং নামৈকোনবিংশোঽধ্যায়ঃ

হয়গ্রীব উবাচ
কিরিচক্ররথেন্দ্রস্য পঞ্চপর্বসমাশ্রিতাঃ |
দেবতাশ্চ শৃণু প্রাজ্ঞ নাম যচ্ছৃণ্বতাং জয়ঃ || ৩. ২০. ১||
প্রথমং পর্ববিন্দ্বাখ্যং সংপ্রাপ্তা দণ্ডনায়িকা |
সা তত্র জগদুদ্দণ্ডকণ্টকব্রাতঘস্মরী || ৩. ২০. ২||
নানাবিধাভির্জ্বালাভির্নর্তয়ন্তী জয়শ্রিয়ম্ || ৩. ২০. ৩||
উদ্দণ্ডপোত্রনির্ঘাতনির্ভিন্নোদ্ধতদানবাঃ |
দংষ্ট্রাবালমৃগাঙ্কাংশুবিভাবনবিভাবরী || ৩. ২০. ৪||
প্রাবৃষেণ্যপয়োবাহব্যূহনীলবপুর্ল্লতা |
কিরিচক্ররথেন্দ্রস্য সালঙ্কারায়তে সদা |
পোত্রিণী পুত্রিতাশেষবিশ্বাবর্তকদংবিকা || ৩. ২০. ৫||
তস্যৈব রথনাভস্য দ্বিতীয়ং পর্ব সংশ্রিতাঃ |
জৃংভিনী মোহিনী চৈব স্তংভিনী তিস্র এব হি |
উৎফুল্লদাডিমীপ্রখ্যং সর্বদানবমর্দনাঃ || ৩. ২০. ৬||
মুসলং চ হলং হালাপাত্রং মণিগণর্পিতম্ |
জ্বলন্মাণিক্যবলয়ৈর্বি ভ্রাণাঃ পাণিপল্লবৈঃ || ৩. ২০. ৭||
অতিতীক্ষ্ণকরালাক্ষ্যো জ্বালাভির্দৈত্যসৈনিকান্ |
দহন্ত্য ইব নিঃশঙ্কং সেবন্তে সূকরাননাম্ || ৩. ২০. ৮||
কিরিচক্ররথেন্দ্রস্য তৃতীয়ং পর্ব সংশ্রিতাঃ |
অন্ধিন্যাদ্যাঃ পঞ্চ দেব্যো দেবীয়ন্ত্রকৃতাস্পদাঃ || ৩. ২০. ৯||
কঠোরেণাট্টহাসেন ভিন্দন্ত্যো ভুবনত্রয়ম্ |
জ্বালা ইব তু কল্পগ্নেরঙ্গনাবেষমাশ্রিতাঃ || ৩. ২০. ১০||
ভণ্ডাসুরস্য সর্বেষাং সৈন্যানাং রুধিরপ্লুতিম্ |
লিলিক্ষমাণা জিহ্বাভির্লেলিহানাভিরুজ্জ্বলাঃ || ৩. ২০. ১১||
সেবন্তেং সততং দণ্ডনাথামুদ্দণ্ডবিক্রমাম্ |
কিরিচক্ররথেন্দ্রস্য চতুর্থং পর্ব সংশ্রিতাঃ || ৩. ২০. ১২||
ব্রহ্মাদ্যাঃ পঞ্চমীবর্জ্যা অষ্টমীরবর্জিতা অপি |
ষডেব দেব্যঃ ষট্চক্রজ্বলজ্জ্বালাকলেবরাঃ || ৩. ২০. ১৩||
মহতা বিক্রমৌঘেণ বিবন্ত্য ইব দানবান্ |
আজ্ঞয়া দণ্ডনাথায়াস্তং প্রদেশমুপাসতে || ৩. ২০. ১৪||
তস্যৈব পর্বণোঽধস্তাত্ত্বরিতাঃ স্থানমাশ্রিতাঃ |
যক্ষিণী শঙ্খিনী চৈব লাকিনী হাকিনী তথা || ৩. ২০. ১৫||
শাকিনী ডাকিনী চৈব তাসামৈক্যস্বরূপিণী |
হাকিনী সপ্তমীত্যেতাশ্চণ্ডদোর্দণ্ডবিক্রমাঃ || ৩. ২০. ১৬||
পিবন্ত্য ইব ভূতানি পিবন্ত্য ইব মেদিনীম্ |
ৎবচং রক্তং তথা মাংসং মেদোঽস্থি চ বিরোধিনাম্ || ৩. ২০. ১৭||
মজ্জানমথ শুক্রং চ পিবন্তয়ো বিকটাননাঃ |
নিষ্ঠুরৈঃ সিংহনাদৈশ্চ পূরয়ন্ত্যো দিশো দশ || ৩. ২০. ১৮||
ধাতুনাথা ইতি প্রোক্তা অণিমাদ্যষ্টসিদ্ধিদাঃ |
মোহনে মারণে চৈব স্তংভনে তাডনে তথা || ৩. ২০. ১৯||
ভক্ষণে দুষ্টদৈত্যানামামূলং চ নিকৃন্তনে |
পণ্ডিতাঃ খণ্ডিতাশেষবিপদো ভক্তিশালিষু || ৩. ২০. ২০||
ধাতুনাথা ইতিপ্রোক্তাঃ সর্বধাতুষু সংস্থিতাঃ |
সপ্তাপি বারিধীনূর্মিমালাসংচুংবিতাংবরান্ || ৩. ২০. ২১||
ক্ষণর্ধেনৈব নিষ্পাতুং নিষ্পন্নবহুসাহসাঃ |
শকটা কারদন্তাশ্চ ভয়ঙ্করবিলোচনাঃ || ৩. ২০. ২২||
স্বস্বামিনীদ্রোহকৃতাং স্বকীয়সময়দ্রুহাম্ |
বৈদিকদ্রোহণাদেব দ্রোহিণাং বীরবৈরিণাম্ || ৩. ২০. ২৩||
যজ্ঞদ্রোহকৃতাং দুষ্টদৈত্যানাং ভক্ষণে সমাঃ |
নিত্যমেব চ সেবন্তে পোত্রিণীং দণ্ডনায়িকাম্ || ৩. ২০. ২৪||
তস্যৈব পর্বণঃ পার্শ্বে দ্বিতীয়ে দিব্যমন্দিরে |
ক্রোধিনী স্তংভিনী খ্যাতে বর্তেতে দেবতে উভে || ৩. ২০. ২৫||
চামরে বীজয়ন্ত্যৌ চ লোলকঙ্কণদোর্লতে |
দেবদ্বিষাং চমূরক্তহালাপানমহোদ্ধতে || ৩. ২০. ২৬||
সদা বিঘূর্ণমানাক্ষ্যৌ সদা প্রহসিতাননে |
অথ তস্য রথেন্দ্রস্য কিরিচক্রাশ্রিতস্য চ || ৩. ২০. ২৭||
পার্শ্বদ্বয়কৃতাবাসমায়ুধদ্বন্দ্বমুত্তমম্ |
হলং চ মুসলং চৈব দেবতারূপমাস্থিতম্ || ৩. ২০. ২৮||
স্বকীয়মুকুটস্থানে স্বকীয়ায়ুধবিগ্রহম্ |
আবিভ্রাণং জগ ষিঘস্মরং বিবুধৈঃ স্মৃতম্ || ৩. ২০. ২৯||
এতদায়ুধয়ুগ্মেন ললিতা দডনায়িকা |
খণ্ডয়িষ্যতি সংগ্রামং বিষঙ্গং নামদানহম্ || ৩. ২০. ৩০||
তস্যৈব পর্বণো দণ্ডনাথায়া অগ্রসীমনি |
বর্ত্তমানো মহাভীমঃ সিংহো নাদৈর্ধ্বনন্নভঃ || ৩. ২০. ৩১||
দংষ্ট্রাকটকটাৎকার বধিরীকৃতদিঙ্মুখঃ |
চণ্ডোচ্চণ্ড ইতি খ্যাতশ্চতুর্হস্তস্ত্রিলোচনঃ || ৩. ২০. ৩২||
শূলখড্গপ্রেতপাশান্দধানো দীপ্তবিগ্রহঃ |
সদা সংসেবতে দেবীং পশ্যন্নেব হি পোত্রিণীম্ || ৩. ২০. ৩৩||
কিরিচক্ররথেন্দ্রস্য ষষ্টং পর্ব সমাশ্রিতাঃ |
বার্ত্তাল্যাদ্যা অষ্ট দেব্যো দিক্ষ্বষ্টাসূপবিশ্রুতাঃ || ৩. ২০. ৩৪||
অষ্টপর্বতনিষ্পাতঘোরনির্ঘাতনিঃস্বনাঃ |
অষ্টনাগস্ফুরদ্ভূষা অনষ্টবলতেজসঃ || ৩. ২০. ৩৫||
প্রকৃষ্টদোষ্প্রকাণ্ডোষ্মহুতদানবকোটয়ঃ |
সেবন্তে ললিতাং দেব্যো দণ্ডনাথামহর্নিশম্ || ৩. ২০. ৩৬||
তাসামাখ্যাশ্চ বিখ্যাতাঃ সমাকর্ণয় কুংভজ |
বার্তালী চৈব বারাহীসা বারাহমুখী পরা || ৩. ২০. ৩৭||
অন্ধিনী রোধিনী চৈব জৃংভিণী চৈব মোহিনী |
স্তংভিনীতি রিপুক্ষোভস্তংভনোচ্চাটনক্ষমাঃ || ৩. ২০. ৩৮||
তাসাং চ পর্বণো বামভাগে সততসংস্থিতিঃ |
দণ্ডনাথোপবাহ্যস্তু কাসরো ধূসরাকৃতিঃ || ৩. ২০. ৩৯||
অর্ধক্রোশায়তঃ শৃঙ্গদ্বিতয়ে ক্রোশবিগ্রহঃ |
খড্গবন্নিষ্ঠুরৈর্লোমজাতৈঃ সংবৃতবিগ্রহঃ || ৩. ২০. ৪০||
কালদণ্ডবদুচ্চণ্ডবালকাণ্ডভয়ঙ্করঃ |
নীলাঞ্জনাচলপ্রখ্যো বিকটোন্নতরুষ্টভূঃ || ৩. ২০. ৪১||
মহানীলগিরিশ্রেষ্ঠগরিষ্ঠস্কন্ধমণ্ডলঃ |
প্রভূতোষ্মলনিশ্বাসপ্রসরাকংপিতাংবুধিঃ || ৩. ২০. ৪২||
ঘর্ঘরধ্বনিনা কালমহিষং বিহসন্নিব |
বর্ত্ততে খুরবিক্ষিপ্তপুষ্কলাবর্তবারিদঃ || ৩. ২০. ৪৩||
তস্যৈব পর্বণোঽধস্তাচ্চিত্রস্থানকৃতালয়াঃ |
ইন্দ্রাদয়োঽনেকভেদা দিশামষ্টকদেবতাঃ || ৩. ২০. ৪৪||
ললিতায়াং কার্যসিদ্ধিং বিজ্ঞাপয়িতুমাগতাঃ |
ইন্দ্রশ্চাপ্সরসশ্চৈব স চতুষ্ষষ্টিকোটয়ঃ || ৩. ২০. ৪৫||
সিদ্ধ অগ্নিশ্চ সাধ্যাশ্চ বিশ্বেদেবাস্তথাপরে |
বিশ্বকর্মা ময়শ্চৈব মাতরশ্চ বলোন্নতাঃ || ৩. ২০. ৪৬||
রুদ্রাশ্চ পরিচারাশ্চ রুদ্রাশ্চৈব পিশাচকাঃ |
ক্রন্দঞ্চিরক্ষসাং নাথা রাক্ষসা বহবস্তথা || ৩. ২০. ৪৭||
মিত্রাশ্চ তত্র গন্ধর্বাঃ সদা গানবিশারদাঃ |
বিশ্বাবসুপ্রভৃতয়ো বিখ্যাতাস্তৎপুরোগমাঃ || ৩. ২০. ৪৮||
তথা ভূতগণাশ্চান্যে বরুণো বাসবঃ পরে |
বিদ্যাধরাঃ কিন্নরাশ্চ মারুতেশ্বর এব চ || ৩. ২০. ৪৯||
তথা চিত্ররথশ্চৈব রথকারক কারকাঃ |
তুংবুরুর্নারদো যক্ষঃ সোমোয়ক্ষেশ্বরস্তথা || ৩. ২০. ৫০||
দেবৈশ্চ ভগবাংস্তত্র গোবিন্দঃ কমলাপতিঃ |
ঈশানশ্চ জগচ্চক্রভক্ষকঃ শূলভীষণঃ || ৩. ২০. ৫১||
ব্রহ্মা চৈবাশ্বিনীপুত্রো বৈদ্যবিদ্যাবিশারদৌ |
ধন্বন্তরিশ্চ ভগবানথান্যে গণনায়কাঃ || ৩. ২০. ৫২||
কটকাণ্ডগলদ্দান সংতর্পিতমধুব্রতাঃ |
অনন্তো বাসুকিস্তক্ষঃ কর্কেটঃ পদ্ম এব চ || ৩. ২০. ৫৩||
মহাপদ্মঃ শঙ্খপালো গুলিকঃ সুবলস্তথা |
এতে নাগেশ্বরাশ্চৈব নাগকোটিভিরাবৃতাঃ || ৩. ২০. ৫৪||
এবংপ্রকারা বহবো দেবতাস্তত্র জাগ্রতি |
পূর্বাদিদিশমারভ্য পরিতঃ কৃতমন্দিরাঃ || ৩. ২০. ৫৫||
তত্রৈব দেবতাশ্চক্রে চক্রাকারা মরুদ্দিশঃ |
আশ্রিত্য কিল বর্তন্তে তদধিষ্ঠাতৃদেবতাঃ || ৩. ২০. ৫৬||
জৃংভিণী স্তংভিনী চৈব মোহিনী তিস্র এব চ |
তস্যৈব পর্বণঃ প্রান্তে কিরিচক্রস্য ভাস্বতঃ || ৩. ২০. ৫৭||
কপালং চ গদাং বিভ্রদূর্ধ্বকেশো মহাবপুঃ |
পাতালতলজংবালবহুলা কারকালিমা || ৩. ২০. ৫৮||
অট্টহাসমহাবজ্রদীর্ণব্রহ্মাণ্ডমণ্ডলঃ |
ভিন্দন্ডমরুকধ্বানৈ রোদসীকন্দরোদরম্ || ৩. ২০. ৫৯||
ফূৎকারীত্রিপুরায়ুক্তং ফণিপাশং করে বহন্ |
ক্ষেত্রপালঃ সদা ভাতি সেবমানঃ কিটীশ্বরীম্ || ৩. ২০. ৬০||
তস্যৈব চ সমীপস্থস্তস্যা বাহনকেসরী |
যমা রুহ্য প্রববৃতে ভণ্টাসুরবধৈষিণী || ৩. ২০. ৬১||
প্রাগুক্তমেব দেবেশীবাহসিংহস্য লক্ষণ্ম্ |
তস্যৈব পর্বণোঽধস্তাদ্দণ্ডনাথাসমৎবিষঃ || ৩. ২০. ৬২||
দণ্ডিনীসদৃশাশেষভূষণায়ুধমণ্ডিতাঃ |
শম্যাঃ ক্রোডাননাশ্চন্দ্ররেখোত্তংসিতকুন্তলাঃ || ৩. ২০. ৬৩||
হলং চ মুসলং হস্তে ঘূর্ণয়ন্ত্যো মুহুর্মুহুঃ |
ললিতাদ্রোহিণাং শ্যামাদ্রোহিণাং স্বামিনীদ্রুহাম্ || ৩. ২০. ৬৪||
রক্তস্রোতোভিরুৎকূলৈঃ পূরয়ন্ত্যঃ কপালকম্ |
নিজভক্তদ্রোহকৃতা মন্ত্রমালাবিভূষণাঃ || ৩. ২০. ৬৫||
স্বগোষ্ঠীসমায়াক্ষেপকারিণাং মুণ্ডমণ্ডলৈঃ |
অখণ্ডরক্তবিচ্ছর্দৈর্বিভ্রত্যো বক্ষসি ক্রজঃ || ৩. ২০. ৬৬||
সহস্রং দেবতাঃ প্রোক্তাঃ সেবমানাঃ কিটীশ্বরীম্ || ৩. ২০. ৬৭||
তাসাং নামানি সর্বাসাং দণ্ডিন্যাঃ কুংভসংভব |
সহস্রনামাধ্যায়ে তু বক্ষ্যন্তে নাধুনা পুনঃ || ৩. ২০. ৬৮||
অথ তাসাং দেবতানাং কোলাস্যানাং সমীপতঃ |
বাহনং কৃষ্ণসারঙ্গো দণ্ডিন্যাঃ সময়ে স্থিতঃ || ৩. ২০. ৬৯||
ক্রোশার্ধার্দ্ধায়তঃ শৃঙ্গে তদর্ধার্ধায়তো মুখে |
ক্রোশপ্রমাণাপাদশ্চ সদা চোদ্ধৃতবালধিঃ || ৩. ২০. ৭০||
উদরে ধবলচ্ছায়ো হুঙ্কারেণ মহীয়সা |
হসন্মারুতবাহস্য হরিণস্য পরাক্রমম্ || ৩. ২০. ৭১||
তস্যৈব পর্বণো দেশে বর্ত্ততে বাহনোত্তমম্ |
কিরিচক্ররথেন্দ্রস্য স্থিতস্তত্রৈব পর্বণি || ৩. ২০. ৭২||
বর্ত্ততে মদিরাসিংধুর্দেবতারূপমাস্থিতা |
মাণিক্যগিরিবচ্ছোণং হস্তে পিশিতপিণ্ডকম্ || ৩. ২০. ৭৩||
দধানা ঘূর্ণমা নাক্ষী হেমাংভোজস্রগাবৃতা |
মদশক্ত্যা সমাশ্লিষ্টা ধৃতরক্তসরোজয়া || ৩. ২০. ৭৪||
যদায়দা ভণ্ডদৈত্যঃ সংগ্রামে সংপ্রবর্ততে |
যুদ্ধস্বেদ মনুপ্রাপ্তাঃ শক্তয়ঃ স্যুঃ পিপাসিতাঃ || ৩. ২০. ৭৫||
তদাতদা সুরাসিংধুরাত্মানং বহুধা ক্ষিপন্ |
রণে খেদং দেবতানামঞ্জসাপাকরিষ্যতি || ৩. ২০. ৭৬||
তদপ্যদ্ভুতমে বর্ষে ভবিষ্যতি ন সংশয়ঃ |
তদা শ্রোষ্যসি সংগ্রামে কথ্যমানং ময়া মুদা || ৩. ২০. ৭৭||
তস্যৈব পর্বণোঽধস্তাদষ্টদিক্ষ্বঘ এব হি |
উপর্যপি কৃতাবাসা হেতুকাদ্যা দশ স্মৃতাঃ || ৩. ২০. ৭৮||
মহান্তো ভৈরবশ্রেষ্ঠাঃ খ্যাতা বিপুলবিক্রমাঃ |
উদ্দীপ্তায়ুত তেজোভির্দ্দিবা দীপিতভানবঃ || ৩. ২০. ৭৯||
কল্পান্তকালে দণ্ডিন্যা আজ্ঞয়া বিশ্বঘস্মরাঃ |
অত্যুদগ্রপ্রকৃতয়ো রদদষ্টৌষ্ঠসংপুটাঃ || ৩. ২০. ৮০||
ত্রিশূলাগ্রবিনির্ভিন্নমহাবারিদমণ্ডলাঃ |
হেতুকস্ত্রিপুরারিশ্চ তৃতীয়শ্চাগ্নিভৈরবঃ || ৩. ২০. ৮১||
যমজিহ্বৈকপাদৌ চ তথা কালকরালকৌ |
ভীমরূপো হাটকেশস্তথৈবাচলনামবান্ || ৩. ২০. ৮২||
এতে দশৈব বিখ্যাতা দশকোটিভটান্বিতাঃ |
তস্যৈব কিরিচক্রস্য বর্তন্তে পর্বসীমনি || ৩. ২০. ৮৩||
এবং হি দণ্ডনাথায়াঃ কিরিচক্রস্য দেবতাঃ |
জৃংভিণ্যাদ্যচলেন্দ্রান্তাঃ প্রোক্তাস্ত্রৈলোক্যপাবনাঃ || ৩. ২০. ৮৪||
তত্রত্যৈর্দেবতাবৃন্দৈর্বহবস্তত্র সংগরে |
দানবা মারয়িষ্যন্তে পাস্যন্তে রক্তবৃষ্টয়ঃ || ৩. ২০. ৮৫||
ইত্থং বহুবিধত্রাণং পর্বস্থৈর্দেবতাগণৈঃ |
কিরিচক্রং দণ্ডনেত্র্যা রথরত্নং চচাল হ || ৩. ২০. ৮৬||
চক্ররাজরথো যত্র তত্র গেয়রথোত্তমঃ |
যত্র গেয়রথস্তত্র কিরিচক্ররথোত্তমঃ || ৩. ২০. ৮৭||
এতদ্রথ ত্রয়ং তত্র ত্রৈলোক্যমিব জঙ্গমম্ |
শক্তিসেনাসহস্রস্যান্তশ্চচার তদা শুভম্ || ৩. ২০. ৮৮||
মেরুমন্দরবিন্ধ্যানাং সমবায় ইবাভবৎ |
মহাঘোষঃ প্রববৃতে শক্তীনাং সৈন্যমণ্ডলে |
চচাল বসুধা সর্বা তচ্চক্ররবদারিতা || ৩. ২০. ৮৯||
ললিতা চক্ররাজাখ্যা রথনাথস্য কীর্তিতাঃ |
ষট্সারথয় উদ্দণ্ডপাশগ্রহণকোবিদাঃ || ৩. ২০. ৯০||
যত্র গেয়রথস্তত্র কিরিচক্ররথোত্তমম্ |
ইতি দেবী প্রথমতস্তথা ত্রিপুরভৈরবী || ৩. ২০. ৯১||
সংহারভৈরবশ্চান্যো রক্তয়োগিনিবল্লভঃ |
সারসঃ পঞ্চমশ্চৈব চামুণ্ডা চ তথা পরা || ৩. ২০. ৯২||
এতাসু দেবতাস্তত্র রথসারথয়ঃ স্মৃতাঃ |
গেয়চ ক্ররথেন্দ্রস্য সারথিস্তু হসংতিকা || ৩. ২০. ৯৩||
কিরিচক্ররথেন্দ্রস্য স্তংভিনী সারথিঃ স্মৃতা |
দশয়োজনমুন্নম্রো ললিতারথপুঙ্গবঃ || ৩. ২০. ৯৪||
সপ্তয়োজনমুচ্ছ্রায়ো গীতসক্ররথোত্তমঃ |
ষড্যোজনসমুন্নম্রো কিরিচক্ররথো মুনে || ৩. ২০. ৯৫||
মহামুক্তাতপত্রং তু দশয়োজনবিস্তৃতম্ |
বর্ততে ললিতেশান্যা রথ এব ন চান্যতঃ || ৩. ২০. ৯৬||
তদেব শক্তিসাম্রাজ্যসূচকং পরিকীর্তিতম্ |
সামান্যমাতপত্রং তু তথদ্বন্দ্বেপি বর্ততে || ৩. ২০. ৯৭||
অথ সা ললিতেশানী সর্বশক্তিমহেশ্বরী |
মহাসাম্রাজ্যপদবীমারূঢা পরমেশ্বরী || ৩. ২০. ৯৮||
চচাল ভণ্ডদেত্যস্য ক্ষয়সিদ্ধ্যভিকাঙ্ক্ষিণী |
শব্দায়ন্তে দিশঃ সর্বাঃ কংপতে চ বসুংধরা || ৩. ২০. ৯৯||
ক্ষুভ্যন্তি সর্বভূতানি ললিতেশাবিনির্গমে |
দেবদুন্দুভয়ো নেদুর্নিপেতুঃ পুষ্পবৃষ্টয়ঃ || ৩. ২০. ১০০||
বিশ্বাবসুপ্রভৃতয়ো গন্ধর্বাঃ সুরগায়কাঃ |
তুম্বুরুর্নারদশ্চৈব সাক্ষাদেব সরস্বতী || ৩. ২০. ১০১||
জয়মঙ্গল পদ্যানি পঠন্তঃ পটুগীতিভিঃ |
হর্ষসংফুল্লবদনাঃ স্ফুরৎপুলকভূষণাঃ |
মুহুর্জয়জয়েত্যেবং স্তুবানা ললিতেশ্বরীম্ || ৩. ২০. ১০২||
হর্ষেণাঢ্যা মদোন্মত্তাঃ প্রনৃত্যন্তঃ পদেপদে |
সপ্তর্ষয়ো বশিষ্ঠাদ্যা ঋগ্যজুঃ সামরূপিভিঃ || ৩. ২০. ১০৩||
অথর্বরূপৈর্মন্ত্রৈশ্চ বর্ধয়ন্তো জয়শ্রিয়ম্ |
হবিষেব মহাবহ্নিশিখামত্যন্তপাবিনীম্ || ৩. ২০. ১০৪||
আশীর্বাদেন মহতা বর্ধয়ামাসুরুত্তমাঃ |
তৈঃ স্তূয়মানা ললিতা রাজমানা রথোত্তমে || ৩. ২০. ১০৫||
ভণ্ডাসুরং বিনির্জেতুমুদ্দণ্ডৈঃ সহ সৈনিকৈঃ || ৩. ২০. ১০৬||
ইতি শ্রীব্রহ্মাণ্ডমহাপুরাণে উত্তরভাগে হয়গ্রীবাগস্ত্যসংবাদে ললিতোপাখ্যানে কিরিচক্ররথদেবতাপ্রকাশনং নাম বিংশোঽধ্যায়ঃ