গোরক্ষশতকম্ ১

 || গোরক্ষশতকম্ ১ ||

ওঁ পরমগুরবে গোরক্ষনাথায় নমঃ |

ওঁ গোরক্ষশতকং বক্ষ্যে ভবপাশবিমুক্তয়ে |
আত্মবোধকরং পুংসাং বিবেকদ্বারকুঞ্চিকাম্ || ১||
এতদ্বিমুক্তিসোপানমেতৎকালস্য বঞ্চনম্ |
যদ্ব্যাবৃত্তং মনো মোহাদাসক্তং পরমাত্মনি || ২||
দ্বিজসেবিতশাখস্য শ্রুতিকল্পতরোঃ ফলম্ |
শমনং ভবতাপস্য যোগং ভজতি সজ্জনঃ || ৩||
আসনং প্রাণসংযামঃ প্রত্যাহারোঽথ ধারণা |
ধ্যানং সমাধিরেতানি যোগাঙ্গানি ভবন্তি ষট্ || ৪||
আসনানি তু তাবন্তি যাবত্যো জীবজাতয়ঃ |
এতেষামখিলান্ভেদান্বিজানাতি মহেশ্বরঃ || ৫||
চতুরাশীতিলক্ষাণাং একমেকমুদাহৃতম্ |
ততঃ শিবেন পীঠানাং ষোডেশানং শতং কৃতম্ || ৬||
আসনেভ্যঃ সমস্তেভ্যো দ্বয়মেব বিশিষ্যতে |
একং সিদ্ধাসনং প্রোক্তং দ্বিতীয়ং কমলাসনম্ || ৭||

যোনিস্থানকমংঘ্রিমূলঘটিতং কৃৎবা দৃঢং বিন্যসে-
ন্মেঢ্রে পাদমথৈকমেব নিয়তং কৃৎবা সমং বিগ্রহম্ |
স্থাণুঃ সংযমিতেন্দ্রিয়োঽচলদৃশা পশ্যন্ভ্রুবোরন্তরং
এতন্মোক্ষকবাটভেদজনকং সিদ্ধাসনং প্রোচ্যতে || ৮||

বামোরূপরি দক্ষিণং হি চরণং সংস্থাপ্য বামং তথা
দক্ষোরূপরি পশ্চিমেন বিধিনা ধৃৎবা করাভ্যাং দৃঢম্ |
অঙ্গুষ্ঠৌ হৃদয়ে নিধায় চিবুকং নাসাগ্রমালোকয়ে-
দেতদ্ব্যাধিবিকারহারি যমিনাং পদ্মাসনং প্রোচ্যতে || ৯||

আধারং প্রথমং চক্রং স্বাধিষ্ঠানং দ্বিতীয়কম্ |
যোনিস্থানং দ্বয়োর্মধ্যে কামরূপং নিগদ্যতে || ১০||
আধারাখ্যে গুদস্থানে পঙ্কজং যচ্চতুর্দলম্ |
তন্মধ্যে প্রোচ্যতে যোনিঃ কামাখ্যা সিদ্ধবন্দিতা || ১১||
যোনিমধ্যে মহালিঙ্গং পশ্চিমাভিমুখং স্থিতম্ |
মস্তকে মণিবদ্ভিন্নং যো জানাতি স যোগবিৎ || ১২||
তপ্তচামীকরাভাসং তডিল্লেখেব বিস্ফুরৎ |
চতুরস্রং পুরং বহ্নেরধোমেঢ্রাৎপ্রিতিষ্ঠিতম্ || ১৩||
স্বশব্দেন ভবেৎপ্রাণঃ স্বাধিষ্ঠানং তদাশ্রয়ঃ |
স্বাধিষ্ঠানাখ্যয়া তস্মান্মেঢ্রবাভিধীয়তে || ১৪||
তন্তুনা মণিবৎপ্রোতো যত্র কন্দঃ সুষুম্ণয়া |
তন্নাভিমণ্ডলং চক্রং প্রোচ্যতে মণিপূরকম্ || ১৫||
ঊর্ধ্বং মেঢ্রাদধো নাভেঃ কন্দয়োনিঃ স্বগাণ্ডবৎ |
তত্র নাড্যঃ সমুৎপন্নাঃ সহস্রাণি দ্বিসপ্ততিঃ || ১৬||
তেষু নাডিসহস্রেষু দ্বিসপ্ততিরুদাহৃতাঃ |
প্রাধান্যাৎপ্রাণবাহিন্যো ভূয়স্তত্র দশ স্মৃতাঃ || ১৭||
ইডা চ পিঙ্গলা চৈব সুষুম্ণা চ তৃতীয়কা |
গান্ধারী হস্তিজিহ্বা চ পূষা চৈব যশস্বিনী || ১৮||
অলম্বুষা কুহূশ্চৈব শঙ্খিনী দশমী স্মৃতা |
এতন্নাডিময়ং চক্রং জ্ঞাতব্যং যোগিভিঃ সদা || ১৯||
ইডা বামে স্থিতা ভাগে পিঙ্গলা দক্ষিণে তথা |
সুষুম্ণা মধ্যদেশে তু গান্ধারী বামচক্ষুষি || ২০||
দক্ষিণে হস্তিজিহ্বা চ পূষা কর্ণে চ দক্ষিণে |
যশস্বিনী বামকর্ণে চাসনে বাপ্যলম্বুষা || ২১||
কূহুশ্চ লিঙ্গদেশে তু মূলস্থানে চ শঙ্খিনী |
এবং দ্বারমুপাশ্রিত্য তিষ্ঠন্তি দশ নাডিকাঃ || ২২||
সততং প্রাণবাহিন্যঃ সোমসূর্যাগ্নিদেবতাঃ |
ইডাপিঙ্গলাসুষুম্ণা চ তিস্রো নাড্য উদাহৃতাঃ || ২৩||
প্রাণাপানৌ সমানশ্চ হ্যুদানো ব্যান এব চ |
নাগঃ কূর্মশ্চ কৃকরো দেবদত্তো ধনঞ্জয়ঃ || ২৪||
নাগাদ্যাঃ পঞ্চ বিখ্যাতাঃ প্রাণাদ্যাঃ পঞ্চ বায়বঃ |
এতে নাডিসহস্রেষু বর্তন্তে জীবরূপিণঃ || ২৫||
প্রাণাপানবশো জীবো হ্যধশ্চোর্ধ্বং চ ধাবতি |
বামদক্ষিণমার্গেণ চঞ্চলৎবান্ন দৃশ্যতে || ২৬||
আক্ষিপ্তো ভুবি দণ্ডেন যথোচ্চলতি কন্দুকঃ |
প্রাণাপানসমাক্ষিপ্তস্তথা জীবোঽনুকৃষ্যতে || ২৭||
রজ্জুবদ্ধো যথা শ্যেনো গতোঽপ্যাকৃষ্যতে |
গুণবদ্ধস্তথা জীবঃ প্রাণাপানেন কৃষ্যতে || ২৮||
অপানঃ কর্ষতি প্রাণঃ প্রাণোঽপানং চ কর্ষতি |
ঊর্ধ্বাধঃ সংস্থিতাবেতৌ যো জানাতি স যোগবিৎ || ২৯||
কন্দোর্ধ্বে কুণ্ডলীশক্তিরষ্টধা কুণ্ডলীকৃতা |
ব্রহ্মদ্বারমুখং নিত্যং মুখেনাবৃত্য তিষ্ঠতি || ৩০||
প্রবুদ্ধা বহ্নিয়োগেন মনসা মারুতা হতা |
প্রজীবগুণমাদায় ব্রজত্যূর্ধ্বং সুষুম্ণয়া || ৩১||
মহামুদ্রাং নমোমুদ্রামুড্ডিয়ানং জলন্ধরম্ |
মূলবন্ধং চ যো বেত্তি স যোগী সিদ্ধিভাজনম্ || ৩২||

বক্ষোন্যস্তহনুর্নিপীড্য সুচিরং যোনিং চ বামাংঘ্রিণা
হস্তাভ্যামবধারিতং প্রসরিতং পাদং তথা দক্ষিণম্ |
আপূর্য শ্বসনেন কুক্ষিয়ুগলং বদ্ধ্বা শনৈ রেচয়েদ্
এষা পাতকনাশিনী সুমহতী মুদ্রা নৄণাং প্রোচ্যতে || ৩৩||

কপালকুহরে জিহ্বা প্রবিষ্টা বিপরীতগা |
ভ্রুবোরন্তর্গতা দৃষ্টির্মুদ্রা ভবতি খেচরী || ৩৪||
ঊর্ধ্বং মেঢ্রাদধো নাভেরুড্ডিয়ানং প্রচক্ষতে |
উড্ডিয়ানজয়ো বন্ধো মৃত্যুমাতঙ্গকেসরী || ৩৫||
জালন্ধরে কৃতে বন্ধে কণ্ঠসঙ্কোচলক্ষণে |
ন পীয়ূষং পতত্যগ্নৌ ন চ বায়ুঃ প্রকুপ্যতি || ৩৬||
পার্ষ্ণিভাগেন সম্পীড্য যোনিমাকুঞ্চয়েদ্গুদম্ |
অপানমূর্ধ্বমাকৃষ্য মূলবন্ধো নিগদ্যতে || ৩৭||
যতঃ কালভয়াৎ ব্রহ্মা প্রাণায়ামপরায়ণঃ |
যোগিনো মুনয়শ্চৈব ততঃ প্রাণং নিবন্ধয়েৎ || ৩৮||
চলে বাতে চলং সর্বং নিশ্চলে নিশ্চলং ভবেৎ |
যোগী স্থাণুৎবমাপ্নোতি ততো বায়ুং নিবন্ধয়েৎ || ৩৯||
ষট্ত্রিংশদঙ্গুলং হংসঃ প্রয়াণং কুরুতে বহিঃ |
বামদক্ষিণমার্গেণ ততঃ প্রাণোঽভিধীয়তে || ৪০||
বদ্ধপদ্মাসনো যোগী নমস্কৃত্য গুরুং শিবম্ |
নাসাগ্রদৃষ্টিরেকাকী প্রাণায়ামং সমভ্যসেৎ || ৪১||
প্রাণো দেহস্থিতো বায়ুরায়ামস্তন্নিবন্ধনম্ |
একশ্বাসময়ী মাত্রা তদ্যোগো গগনায়তে || ৪২||
বদ্ধপদ্মাসনো যোগী প্রাণং চন্দ্রেণ পূরয়েৎ |
ধারয়িৎবা যথাশক্তি ভূয়ঃ সূর্যেণ রেচয়েৎ || ৪৩||
অমৃতোদধিসঙ্কাশং ক্ষীরোদধবলপ্রভম্ |
ধ্যাৎবা চন্দ্রময়ং বিম্বং প্রাণায়ামে সুখী ভবেৎ || ৪৪||
প্রাণং সূর্যেণ চাকৃষ্য পূরয়েদুদরং শনৈঃ |
কুম্ভয়িৎবা বিধানেন ভূয়শ্চন্দ্রেণ রেচয়েৎ || ৪৫||
প্রজ্বলজ্জ্বলন জ্বালা পুঞ্জমাদিত্যমণ্ডলম্ |
ধ্যাৎবা নাভিস্থিতং যোগী প্রাণায়ামে সুখী ভবেৎ || ৪৬||
রেচকঃ পূরকশ্চৈব কুম্ভকঃ প্রণবাত্মকঃ |
প্রাণায়ামো ভবেত্ত্রেধা মাত্রা দ্বাদশসংযুতঃ || ৪৭||
দ্বাদশাধমকে মাত্রা মধ্যমে দ্বিগুণাস্ততঃ |
উত্তমে ত্রিগুণা মাত্রাঃ প্রাণায়ামস্য নির্ণয়ঃ || ৪৮||
অধমে চ ঘনো ঘর্মঃ কম্পো ভবতি মধ্যমে |
উত্তিষ্ঠত্যুত্তমে যোগী বদ্ধপদ্মাসনো মুহুঃ || ৪৯||
অঙ্গানাং মর্দনং শস্তং শ্রমসংজাতবারিণা |
কট্বম্ললবণত্যাগী ক্ষীরভোজনমাচরেৎ || ৫০||
মন্দং মন্দং পিবেদ্বায়ুং মন্দং মন্দং বিয়োজয়েৎ |
নাধিকং স্তম্ভয়েদ্বায়ুং ন চ শীঘ্রং বিমোচয়েৎ || ৫১||
ঊর্ধ্বমাকৃষ্য চাপানং বাতং প্রাণে নিয়োজয়েৎ |
মূর্ধানং নীয়তে শক্ত্যা সর্বপাপৈঃ প্রমুচ্যতে || ৫২||
প্রাণায়ামো ভবত্যেবং পাতকেন্ধনপাতকঃ |
এনোম্বুধিমহাসেতুঃ প্রোচ্যতে যোগিভিঃ সদা || ৫৩||
আসনেন রুজো হন্তি প্রাণায়ামেন পাতকম্ |
বিকারং মানসং যোগী প্রত্যাহারেণ সর্বদা || ৫৪||
চন্দ্রামৃতময়ীং ধারাং প্রত্যাহারতি ভাস্করঃ |
তৎপ্রত্যাহরণং তস্য প্রত্যাহারঃ স উচ্যতে || ৫৫||
একা স্ত্রী ভুজ্যতে দ্বাভ্যামাগতা সোমমণ্ডলাৎ |
তৃতীয়ো যো ভবেত্তাভ্যাং স ভবত্যজরামরঃ || ৫৬||
নাভিদেশে ভবত্যেকো ভাস্করো দহনাত্মকঃ |
অমৃতাত্মা স্থিতো নিত্যং তালুমূলে চ চন্দ্রমাঃ || ৫৭||
বর্ষত্যধোমুখশ্চন্দ্রো গ্রসত্যূর্ধ্বমুখো রবিঃ |
জ্ঞাতব্যং করণং তত্র যেন পীয়ূষমাপ্যতে || ৫৮||
ঊর্ধ্বনাভিরধস্তালু ঊর্ধ্বভানুরধঃ শশী |
করণং বিপরীতাখ্যং গুরুবক্ত্রেণ লভ্যতে || ৫৯||
ত্রিধা বদ্ধো বৃষো যত্র রৌরবীতি মহাস্বনম্ |
অনাহতং চ তচ্ চক্রং হৃদয়ে যোগিনো বিদুঃ || ৬০||
অনাহতমতিক্রম্য চাক্রম্য মণিপূরকম্ |
প্রাপ্তে প্রাণং মহাপদ্মং যোগিৎবমমৃতায়তে || ৬১||
বিশব্দঃ সংস্মৃতো হংসো নির্মলঃ শুদ্ধ উচ্যতে |
অতঃ কণ্ঠে বিশুদ্ধাখ্যে চক্রং চক্রবিদো বিদুঃ || ৬২||
বিশুদ্ধে পরমে চক্রে ধৃৎবা সোমকলাজলম্ |
মাসেন ন ক্ষয়ং যাতি বঞ্চয়িৎবা মুখং রবেঃ || ৬৩||
সম্পীড্য রসনাগ্রেণ রাজদন্তবিলং মহৎ |
ধ্যাৎবামৃতময়ীং দেবীং ষণ্মাসেন কবির্ভবেৎ || ৬৪||
অমৃতাপূর্ণদেহস্য যোগিনো দ্বিত্রিবৎসরাৎ |
ঊর্ধ্বং প্রবর্ততে রেতোঽপ্যণিমাদিগুণোদয়ঃ || ৬৫||
ইন্ধনানি যথা বহ্নিস্তৈলবর্তি চ দীপকঃ |
তথা সোমকলাপূর্ণং দেহী দেহং ন মুঞ্চতি || ৬৬||
আসনেন সমায়ুক্তঃ প্রাণায়ামেন সংযুতঃ |
প্রত্যাহারেণ সংযুক্তো ধারণাং চ সমভ্যসেৎ || ৬৭||
হৃদয়ে পঞ্চভূতানাং ধারণাশ্চ পৃথক্ পৃথক্ |
মনসো নিশ্চলৎবেন ধারণা চ বিধীয়তে || ৬৮||

যা পৃথ্বী হরিতালদেশরুচিরা পীতা লকারান্বিতা
সংযুক্তা কমলাসনেন হি চতুষ্কোণা হৃদি স্থায়িনী |
প্রাণং তত্র বিনীয় পঞ্চঘটিকাশ্চিত্তান্বিতং ধারয়েদ্
এষা স্তম্ভকরী সদা ক্ষিতিজয়ং কুর্যাদ্ভুবো ধারণা || ৬৯||

অর্ধেন্দুপ্রতিমং চ কুন্দধবলং কণ্ঠেঽম্বুতত্তবং স্থিতং
যৎপীয়ূষবকারবীজসহিতং যুক্তং সদা বিষ্ণুনা |
প্রাণং তত্র বিনীয় পঞ্চঘটিকাশ্চিত্তান্বিতং ধারয়েদ্
এষা দুর্বহকালকূটজরণা স্যাদ্বারিণী ধারণা || ৭০||

যত্তালস্থিতমিন্দ্রগোপসদৃশং তত্ত্বং ত্রিকোণোজ্জ্বলং
তেজোরেফময়ং প্রবালরুচিরং রুদ্রেণ যৎসঙ্গতম্ |
প্রাণং তত্র বিনীয় পঞ্চঘটিকাশ্চিত্তান্বিতং ধারয়ে
এষা বহ্নিজয়ং সদা বিদধতে বৈশ্বানরী ধারণা || ৭১||

যদ্ভিন্নাঞ্জনপুঞ্জসান্নিভমিদং তত্ত্বং ভ্রুবোরন্তরে
বৃত্তং বায়ুময়ং যকারসহিতং যত্রেশ্বরো দেবতা |
প্রাণং তত্র বিনীয় পঞ্চঘটিকাশ্চিত্তান্বিতং ধারয়েদ্
এষা খে গমনং করোতি যমিনাং স্যাদ্বায়বী ধারণা || ৭২||

আকাশং সুবিশুদ্ধবারিসদৃশং যদ্ব্রহ্মরন্ধ্রে স্থিতং
তত্রাদ্যেন সদাশিবেন সহিতং শান্তং হকারাক্ষরম্ |
প্রাণং তত্র বিনীয় পঞ্চঘটিকাশ্চিত্তান্বিতং ধারয়েদ্
এষা মোক্ষকবাটপাটনপটুঃ প্রোক্তা নভোধারণা || ৭৩||

স্তম্ভনী দ্রাবণী চৈব দহনী ভ্রামণী তথা |
শোষণী চ ভবন্ত্যেবং ভূতানাং পঞ্চধারণাঃ || ৭৪||
কর্মণা মনসা বাচা ধারণাঃ পঞ্চ দুর্লভাঃ |
বিধায় সততং যোগী সর্বপাপৈঃ প্রমুচ্যতে || ৭৫||
সর্বং চিন্তাসমাবর্তি যোগিনো হৃদি বর্ততে |
যত্তত্ত্বে নিশ্চিতং চেতস্তত্তু ধ্যানং প্রচক্ষতে || ৭৬||
দ্বিধা ভবতি তদ্ধ্যানং সগুণং নির্গুণং তথা |
সগুণং বর্ণভেদেন নির্গুণং কেবলং বিদুঃ || ৭৭||
আধারং প্রথমং চক্রং তপ্তকাঞ্চনসন্নিভম্ |
নাসাগ্রে দৃষ্টিমাদায় ধ্যাৎবা মুঞ্চতি কিল্বিষম্ || ৭৮||
স্বাধিষ্ঠানং দ্বিতীয়ং তু সন্মাণিক্যসুশোভনম্ |
নাসাগ্রে দৃষ্টিমাদায় ধ্যাৎবা মুঞ্চতি পাতকম্ || ৭৯||
তরুণাদিত্যসংকাশং চক্রং চ মণিপূরকম্ |
নাসাগ্রে দৃষ্টিমাদায় ধ্যাৎবা সংক্ষোভয়েজ্জগৎ || ৮০||
[verse missing]
বিদ্যুৎপ্রভাবং হৃৎপদ্মে প্রাণায়ামবিভেদনৈঃ |
নাসাগ্রে দৃষ্টিমাদায় ধ্যাৎবা ব্রহ্মময়ো ভবেৎ || ৮২||
সন্ততং ঘণ্টিকামধ্যে বিশুদ্ধং চামৃতোদ্ভবম্ |
নাসাগ্রে দৃষ্টিমাদায় ধ্যাৎবা ব্রহ্মময়ো ভবেৎ || ৮৩||
ভ্রুবোর্মধ্যে স্থিতং দেবং স্নিগ্ধমৌক্তিকসন্নিভম্ |
নাসাগ্রে দৃষ্টিমাদায় ধ্যাৎবাঽনন্দময়ো ভবেৎ || ৮৪||
নির্গুণং চ শিবং শান্তং গগনে বিশ্বতোমুখম্ |
নাসাগ্রে দৃষ্টিমাদায় ধ্যাৎবা দুঃখাদ্বিমুচ্যতে || ৮৫||
গুদং মেঢ্রং চ নাভিং চ হৃৎপদ্মে চ তদূর্ধ্বতঃ |
ঘণ্টিকাং লম্পিকাস্থানং ভ্রূমধ্যে পরমেশ্বরম্ || ৮৬||
নির্মলং গগনাকারং মরীচিজলসন্নিভম্ |
আত্মানং সর্বগং ধ্যাৎবা যোগী যোগমবাপ্নুয়াৎ || ৮৭||
কথিতানি যথৈতানি ধ্যানস্থানানি যোগিনাম্ |
উপাধিতত্ত্বয়ুক্তানি কুর্বন্ত্যষ্টগুণোদয়ম্ || ৮৮||
উপাধিশ্চ তথা তত্ত্বং দ্বয়মেবমুদাহৃতম্ |
উপাধিঃ প্রোচ্যতে বর্ণস্তত্ত্বমাত্মাভিধীয়তে || ৮৯||
উপাধিরন্যথাজ্ঞানং তত্ত্বং সংস্থিতমন্যথা |
সমস্তোপাধিবিধ্বংসি সদাভ্যাসেন যোগিনাম্ || ৯০||
আত্মবর্ণেন ভেদেন দৃশ্যতে স্ফাটিকো মণিঃ |
মুক্তো যঃ শক্তিভেদেন সোঽযমাত্মা প্রশস্যতে || ৯১||
নিরাতঙ্কং নিরালম্বং নিষ্প্রপঞ্চং নিরাশ্রয়ম্ |
নিরাময়ং নিরাকারং তত্ত্বং তত্ত্ববিদো বিদুঃ || ৯২||
শব্দাদ্যাঃ পঞ্চ যা মাত্রা যাবৎ কর্ণাদিষু স্মৃতাঃ |
তাবদেব স্মৃতং ধ্যানং তৎসমাধিরতঃ পরম্ || ৯৩||
যদা সংক্ষীয়তে প্রাণো মানসং চ বিলীয়তে |
তদা সমরসৈকৎবং সমাধিরভিধীয়তে || ৯৪||
[verse missing]
ধারণাঃ পঞ্চনাড্যস্তু ধ্যানং চ ষষ্ঠিনাডিকাঃ |
দিনদ্বাদশকেনৈব সমাধিঃ প্রাণসংযমঃ || ৯৬||
ন গন্ধং ন রসং রূপং ন স্পর্শং ন চ নিঃস্বনম্ |
আত্মানং ন পরং বেত্তি যোগী যুক্তঃ সমাধিনা || ৯৭||
খাদ্যতে ন চ কালেন বাধ্যতে ন চ কর্মণা |
সাধ্যতে ন চ কেনাপি যোগী যুক্তঃ সমাধিনা || ৯৮||
নির্মলং নিশ্চলং নিত্যং নিষ্ক্রিয়ং নির্গুণং মহৎ |
ব্যোমবিজ্ঞানমানন্দং ব্রহ্ম ব্রহ্মবিদো বিদুঃ || ৯৯||
দুগ্ধে ক্ষীরং ধৃতে সর্পিরগ্নৌ বহ্নিরিবার্পিতঃ |
অদ্বয়ৎবং ব্রজেন্নিত্যং যোগবিৎপরমে পদে || ১০০||
ভবভয়বনে বহ্নির্মুক্তিসোপানমার্গতঃ |
অদ্বয়ৎবং ব্রজেন্নিত্যং যোগবিৎপরমে পদে || ১০১||

|| ইতি শ্রী গোরক্ষনাথপ্রণীতঃ গোরক্ষশতকং সমাপ্তম্ ||