শৌনকগীতা

 || শৌনকগীতা ||

|| অথ শৌনকগীতা||
শোকস্থানসহস্রাণি ভয়স্থানশতানি চ |
দিবসে দিবসে মূঢমাবিশন্তি ন পণ্ডিতম্ || ১||
ন হি জ্ঞানবিরুদ্ধেষু বহুদোষেষু কর্মসু |
শ্রেয়োঘাতিষু সজ্জন্তে বুদ্ধিমন্তো ভবদ্বিধাঃ || ২||
অষ্টাঙ্গাং বুদ্ধিমাহুর্যা সর্বাশ্রেয়োবিঘাতিনীম্ |
শ্রুতিস্মৃতিসমায়ুক্তাং রাজন্সা ৎবয়্যবস্থিতা || ৩||
অর্থকৃচ্ছ্রেষু দুর্গেষু ব্যাপৎসু স্বজনস্য চ |
শারীর মানসৈর্দুঃখৈর্নসীদন্তি ভবদ্বিধাঃ || ৪||
শ্রূয়তাং চাভিধাস্যামি জনকেন যথা পুরা |
আত্মব্যবস্থানকরা গীতাঃ শ্লোকা মহাত্মনা || ৫||
মনোদেহসমুত্থাভ্যাং দুঃখাভ্যাং মর্দিতং জগৎ |
তয়োর্ব্যাসসমাসাভ্যাং শমোপায়মিমং শ্রুণু || ৬||
ব্যাধেরনিষ্টসংস্পর্শাচ্ছ্রমাদিষ্টবিবর্জনাৎ |
দুঃখং চতুর্ভিঃ শারীরং কারণৈঃ সংপ্রবর্ততে || ৭||
তদাতৎপ্রতিকারাচ্চ সততং চাবিচিন্তনাৎ |
আধিব্যাধিপ্রশমনং ক্রিয়ায়োগদ্বয়েন তু || ৮||
মতিমন্তো হ্যতো বৈদ্যাঃ শমং প্রাগেব কুর্বতে |
মানসস্য প্রিয়াখ্যানৈঃ সংভোগোপনয়ৈর্নৃণাম্ || ৯||
মানসেনহি দুঃখেন শরীরমুপতপ্যতে |
অয়স্তপ্তেন পিণ্ডেন কুম্ভসংস্থমিবোদকম্ || ১০||
মানসং শময়েত্তস্মাজ্জ্ঞানেনাগ্নিমিবাম্বুনা |
প্রশান্তে মানসে হ্যস্য শারীরমুপশাম্যতি || ১১||
মনসো দুঃখমূলং তু স্নেহ ইত্যুপলভ্যতে |
স্নেহাত্তু সজ্জতে জন্তুর্দুঃখয়োগমুপৈতি চ || ১২||
স্নেহমূলানি দুঃখানি স্নেহজানি ভয়ানি চ |
শোকহর্ষৌ তথায়াসঃ সর্বস্নেহাৎপ্রবর্ততে || ১৩||
স্নেহাদ্ভাবোঽনুরাগশ্চ প্রজজ্ঞে বিষয়ে তথা |
অশ্রেয়স্কাবুভাবেতৌ পূর্বস্তত্র গুরুঃ স্মৃতঃ || ১৪||
কোটরাগ্নির্যথাশেষং সমূলং পাদপং দহেৎ |
ধর্মার্থৌ তু তথাঽল্পোপি রাগদোষো বিনাশয়েৎ || ১৫||
বিপ্রয়োগেন তু ত্যাগী দোষদর্শী সমাগমে |
বিরাগং ভজতে জন্তুর্নির্বৈরো নিরবগ্রহঃ || ১৬||
তস্মাৎস্নেহং ন লিপ্সেত মিত্রেভ্যো ধনসংচয়াৎ |
স্বশরীরসমুত্থং চ জ্ঞানেন বিনিবর্তয়েৎ || ১৭||
জ্ঞানান্বিতেষু যুক্তেষু শাস্ত্রজ্ঞেষু কৃতাত্মসু |
ন তেষু সজ্জতে স্নেহঃ পদ্মপত্রেষ্বিবোদকম্ || ১৮||
রাগাভিভূতঃ পুরুষঃ কামেন পরিকৃষ্যতে |
ইচ্ছা সংজায়তে তস্য ততস্তৃষ্ণা বিবর্ধতে || ১৯||
তৃষ্ণাহি সর্বপাপিষ্ঠা নিত্যোদ্বেগকরী স্মৃতা |
অধর্মবহুলা চৈব ঘোরা পাপানুবন্ধিনী || ২০||
যা দুস্ত্যজা দুর্মতিভির্যা ন জীর্যতি জীর্যতঃ |
যোসৌ প্রাণান্তিকো রোগস্তাং তৃষ্ণাং ত্যজতঃ সুখম্ || ২১||
অনাদ্যন্তা হি সা তৃষ্ণা অন্তর্দেহগতা নৃণাম্ |
বিনাশয়তি ভূতানি অয়োনিজ ইবানলঃ || ২২||
যথৈধঃ স্বসমুত্থেন বহ্নিনা নাশমৃচ্ছতি |
তথাঽকৃতাত্মা লোভেন সহজেন বিনশ্যতি || ২৩||
রাজতঃ সলিলাদগ্নেশ্চোরতঃ স্বজনাদপি |
ভয়মর্থবতাং নিত্যং মৃত্যোঃ প্রাণভৃতামিব || ২৪||
যথা হ্যামিষমাকাশে পক্ষিভিঃ শ্বাপদৈর্ভুবি |
ভক্ষ্যন্তে সলিলে মৎস্যৈস্তথা সর্বত্র বিত্তবান্ || ২৫||
অর্থ এব হি কেষাংচিদনর্থ ভজতে নৃণাম্ |
অর্থ শ্রেয়সি চাসক্তো ন শ্রেয়ো বিন্দতে নরঃ || ২৬||
তস্মাদর্থাগমাঃ সর্বে মনোমোহবিবর্ধনাঃ |
কার্পণ্যং দর্পমানৌ চ ভয়মুদ্বেগ এব চ || ২৭||
অর্থজানিং বিদুঃ প্রাজ্ঞা দুঃখন্যেতানি দেহিনাম্ |
অর্থস্যোৎপাদনে চৈব পালনে চ তথাক্ষয়ে || ২৮||
সহন্তি চ মহদ্দুঃখং ঘ্নন্তি চৈবার্থকারণাৎ |
অর্থাদ্দুঃখং পরিত্যক্তং পালিতাশ্চৈব শত্রবঃ || ২৯||
দুঃখেন চাধিগম্যন্তে তস্মান্নাশং ন চিন্তয়েৎ |
অসন্তোষপরা মূঢাঃ সন্তোষং যান্তি পণ্ডিতাঃ || ৩০||
অন্তো নাস্তি পিপাসায়াঃ সন্তোষঃ পরমং সুখম্ |
তস্মাৎসন্তোষমেবেহ পরং পশ্যন্তি পণ্ডিতাঃ || ৩১||
অনিত্যং যৌবনং রূপং জীবিতং রত্নসংচয়ঃ |
ঐশ্বর্যং প্রিয়সংবাসো গৃদ্ধ্যেত্তত্র ন পণ্ডিতঃ || ৩২||
ত্যজেত সঞ্চয়াংস্তস্মাত্তজ্জান্ক্লেশান্ সহেত চ |
ন হি সঞ্চয়বান্কশ্চিদ্দৃশ্যতে নিরুপদ্রবঃ |
অতশ্চ ধার্মিকৈঃ পুংভিরনীহার্থঃ প্রশস্যতে || ৩৩||
ধর্মার্থ যস্য বিত্তেহা বরং তস্য নিরীহতা |
প্রক্ষালনাদ্ধি পঙ্কস্য শ্রেয়ো ন স্পর্শনং নৃণাম্ || ৩৪||
যুধিষ্ঠিরৈবং সর্বেষু ন স্পৃহাং কর্তুমর্হসি |
ধর্মেণ যদিতে কার্য বিমুক্তেচ্ছো ভবার্থতঃ || ৩৫||
|| ইতি শৌনকগীতা সমাপ্তা ||