বাঅমদেবগীতা



.. বাঅমদেবগীতা..

৯৩
কথং ধর্মে স্থাতুমিচ্ছন্রাজা বর্তেত ধার্মিকঃ .
পৃচ্ছামি ৎবা কুরুশ্রেষ্ঠ তন্মে ব্রূহি পিতা মহ .. ১..
অত্রাপ্যুদাহরন্তীমমিতিহাসং পুরাতনম্ .
গীতং দৃষ্টার্থতত্ত্বেন বামদেবেন ধীমতা .. ২..
রাজা বসু মনা নাম কৌসল্যো বলবাঞ্শুচিঃ .
মহর্ষিং পরিপপ্রচ্ছ বামদেবং যশো বিনম্ .. ৩..
ধর্মার্থসহিতং বাক্যং ভগবন্ননুশাধি মাম্ .
যেন বৃত্তেন বৈ তিষ্ঠন্ন চ্যবেয়ং স্বধর্মতঃ .. ৪..
তমব্রবীদ্বামদেবস্তপস্বী জপতাং বরঃ .
হেমবর্ণমুপাসীনং যয়াতিমিব নাহুষম্ .. ৫..
ধর্মমেবানুবর্তস্ব ন ধর্মাদ্বিদ্যতে পরম্ .
ধর্মে স্থিতা হি রাজানো জয়ন্তি পৃথিবীমিমাম্ .. ৬..
অর্থসিদ্ধেঃ পরং ধর্মং মন্যতে যো মহীপতিঃ .
ঋতাং চ কুরুতে বুদ্ধিং স ধর্মেণ বিরোচতে .. ৭..
অধর্মদর্শী যো রাজা বলাদেব প্রবর্ততে .
ক্ষিপ্রমেবাপয়াতোঽস্মাদুভৌ প্রথমমধ্যমৌ .. ৮..
অসৎপাপিষ্ঠ সচিবো বধ্যো লোকস্য ধর্মহা .
সহৈব পরিবারেণ ক্ষিপ্রমেবাবসীদতি .. ৯..
অর্থানামননুষ্ঠাতা কামচারী বিকত্থনঃ .
অপি সর্বাং মহীং লব্ধ্বা ক্ষিপ্রমেব বিনশ্যতি .. ১০..
অথাদদানঃ কল্যাণমনসূয়ুর্জিতেন্দ্রিয়ঃ .
বর্ধতে মতিমান্রাজা স্রোতোভিরিব সাগরঃ .. ১১..
ন পূর্ণোঽস্মীতি মন্যেত ধর্মতঃ কামতোঽর্থতঃ .
বুদ্ধিতো মিত্র তশ্চাপি সততং বসুধাধিপঃ .. ১২..
এতেষ্বেব হি সর্বেষু লোকয়াত্রা প্রতিষ্ঠিতা .
এতানি শৃণ্বঁল্লভতে যশঃ কীর্তিং শ্রিয়ঃ প্রজাঃ .. ১৩..
এবং যো ধর্মসংরম্ভী ধর্মার্থপরিচিন্তকঃ .
অর্থান্সমীক্ষ্যারভতে স ধ্রুবং মহদশ্নুতে .. ১৪..
অদাতা হ্যনতি স্নেহো দণ্ডেনাবর্তয়ন্প্রজাঃ .
সাহস প্রকৃতীরাজা ক্ষিপ্রমেব বিনশ্যতি .. ১৫..
অথ পাপং কৃতং বুদ্ধ্যা ন চ পশ্যত্যবুদ্ধি মান্ .
অকীর্ত্যাপি সমায়ুক্তো মৃতো নরকমশ্নুতে .. ১৬..
অথ মানয়িতুর্দাতুঃ শুক্লস্য রসবেদিনঃ .
ব্যসনং স্বমিবোৎপন্নং বিজিঘাংসন্তি মানবাঃ .. ১৭..
যস্য নাস্তি গুরুর্ধর্মে ন চান্যাননুপৃচ্ছতি .
সুখতন্ত্রোঽর্থলাভেষু নচিরং মহদশ্নুতে .. ১৮..
গুরু প্রধানো ধর্মেষু স্বয়মর্থান্ববেক্ষিতা .
ধর্মপ্রধানো লোকেষু সুচিরং মহদশ্নুতে .. ১৯..
৯৪
যত্রাধর্মং প্রণয়তে দুর্বলে বলবত্তরঃ .
তাং বৃত্তিমুপজীবন্তি যে ভবন্তি তদন্বয়াঃ .. ১..
রাজানমনুবর্তন্তে তং পাপাভিপ্রবর্তকম্ .
অবিনীত মনুষ্যং তৎক্ষিপ্রং রাষ্ট্রং বিনশ্যতি .. ২..
যদ্বৃত্তিমুপজীবন্তি প্রকৃতিস্থস্য মানবাঃ .
তদেব বিষমস্থস্য স্বজনোঽপি ন মৃষ্যতে .. ৩..
সাহস প্রকৃতির্যত্র কুরুতে কিং চিদুল্বণম্ .
অশাস্ত্রলক্ষণো রাজা ক্ষিপ্রমেব বিনশ্যতি .. ৪..
যোঽত্যন্তাচরিতাং বৃত্তিং ক্ষত্রিয়ো নানুবর্ততে .
জিতানামজিতানাং চ ক্ষত্রধর্মাদপৈতি সঃ .. ৫..
দ্বিষন্তং কৃতকর্মাণং গৃহীৎবা নৃপতী রণে .
যো ন মানয়তে দ্বেষাৎক্ষত্রধর্মাদপৈতি সঃ .. ৬..
শক্তঃ স্যাৎসুমুখো রাজা কুর্যাৎকারুণ্যমাপদি .
প্রিয়ো ভবতি ভূতানাং ন চ বিভ্রশ্যতে শ্রিয়ঃ .. ৭..
অপ্রিয়ং যস্য কুর্বীত ভূয়স্তস্য প্রিয়ং চরেৎ .
নচিরেণ প্রিয়ঃ স স্যাদ্যোঽপ্রিয়ঃ প্রিয়মাচরেৎ .. ৮..
মৃষাবাদং পরিহরেৎকুর্যাৎপ্রিয়ময়াচিতঃ .
ন চ কামান্ন সংরম্ভান্ন দ্বেষাদ্ধর্মমুৎসৃজেৎ .. ৯..
নাপত্রপেত প্রশ্নেষু নাভিভব্যাং গিরং সৃজেৎ .
ন ৎবরেত ন চাসূয়েত্তথা সঙ্গৃহ্যতে পরঃ .. ১০..
প্রিয়ে নাতিভৃশং হৃষ্যেদপ্রিয়ে ন চ সঞ্জ্বরেৎ .
ন মুহ্যেদর্থকৃচ্ছ্রেষু প্রজাহিতমনুস্মরন্ .. ১১..
যঃ প্রিয়ং কুরুতে নিত্যং গুণতো বসুধাধিপঃ .
তস্য কর্মাণি সিধ্যন্তি ন চ সন্ত্যজ্যতে শ্রিয়া .. ১২..
নিবৃত্তং প্রতিকূলেভ্যো বর্তমানমনুপ্রিয়ে .
ভক্তং ভজেত নৃপতিস্তদ্বৈ বৃত্তং সতাম্ ইহ .. ১৩..
অপ্রকীর্ণেন্দ্রিয়ং প্রাজ্ঞমত্যন্তানুগতং শুচিম্ .
শক্তং চৈবানুরক্তং চ যুঞ্জ্যান্মহতি কর্মণি .. ১৪..
এবমেব গুণৈর্যুক্তো যো ন রজ্যতি ভূমিপম্ .
ভর্তুরর্থেষ্বসূয়ন্তং ন তং যুঞ্জীত কর্মণি .. ১৫..
মূঢমৈন্দ্রিয়কং লুব্ধমনার্য চরিতং শঠম্ .
অনতীতোপধং হিংস্রং দুর্বুদ্ধিমবহুশ্রুতম্ .. ১৬..
ত্যক্তোপাত্তং মদ্য রতং দ্যূতস্ত্রী মৃগয়া পরম্ .
কার্যে মহতি যো যুঞ্জ্যাদ্ধীয়তে স নৃপঃ শ্রিয়ঃ .. ১৭..
রক্ষিতাত্মা তু যো রাজা রক্ষ্যান্যশ্চানুরক্ষতি .
প্রজাশ্চ তস্য বর্ধন্তে ধ্রুবং চ মহদশ্নুতে .. ১৮..
যে কে চিদ্ভূমিপতয়স্তান্সর্বানন্ববেক্ষয়েৎ .
সুহৃদ্ভিরনভিখ্যাতৈস্তেন রাজা ন রিষ্যতে .. ১৯..
অপকৃত্য বলস্থস্য দূরস্থোঽস্মীতি নাশ্বসেৎ .
শ্যেনানুচরিতৈর্হ্যেতে নিপতন্তি প্রমাদ্যতঃ .. ২০..
দৃঢমূলস্ত্বদুষ্টাত্মা বিদিৎবা বলমাত্মনঃ .
অবলানভিয়ুঞ্জীত ন তু যে বলবত্তরাঃ .. ২১..
বিক্রমেণ মহীং লব্ধ্বা প্রজা ধর্মেণ পালয়ন্ .
আহবে নিধনং কুর্যাদ্রাজা ধর্মপরায়ণঃ .. ২২..
মরণান্তমিদং সর্বং নেহ কিং চিদনাময়ম্ .
তস্মাদ্ধর্মে স্থিতো রাজা প্রজা ধর্মেণ পালয়েৎ .. ২৩..
রক্ষাধিকরণং যুদ্ধং তথা ধর্মানুশাসনম্ .
মন্ত্রচিন্ত্যং সুখং কালে পঞ্চভির্বর্ধতে মহী .. ২৪..
এতানি যস্য গুপ্তানি স রাজা রাজসত্তম .
সততং বর্তমানোঽত্র রাজা ভুঙ্ক্তে মহীমিমাম্ .. ২৫..
নৈতান্যেকেন শক্যানি সাতত্যেনান্ববেক্ষিতুম্ .
এতেষ্বাপ্তান্প্রতিষ্ঠাপ্য রাজা ভুঙ্ক্তে মহীং চিরম্ .. ২৬..
দাতারং সংবিভক্তারং মার্দবোপগতং শুচিম্ .
অসন্ত্যক্ত মনুষ্যং চ তং জনাঃ কুর্বতে প্রিয়ম্ .. ২৭..
যস্তু নিঃশ্রেয়সং জ্ঞাৎবা জ্ঞানং তৎপ্রতিপদ্যতে .
আত্মনো মতমুৎসৃজ্য তং লোকোঽনুবিধীয়তে .. ২৮..
যোঽর্থকামস্য বচনং প্রাতিকূল্যান্ন মৃষ্যতে .
শৃণোতি প্রতিকূলানি বি মনা নচিরাদিব .. ২৯..
অগ্রাম্যচরিতাং বুদ্ধিমত্যন্তং যো ন বুধ্যতে .
জিতানামজিতানাং চ ক্ষত্রধর্মাদপৈতি সঃ .. ৩০..
মুখ্যানমাত্যান্যো হিৎবা নিহীনান্কুরুতে প্রিয়ান্ .
স বৈ ব্যসনমাসাদ্য গাধ মার্তো ন বিন্দতি .. ৩১..
যঃ কল্যাণ গুণাঞ্জ্ঞাতীন্দ্বেষান্নৈবাভিমন্যতে .
অদৃঢাত্মা দৃঢক্রোধো নাস্যার্থো রমতেঽন্তিকে .. ৩২..
অথ যো গুণসম্পন্নান্হৃদয়স্যাপ্রিয়ানপি .
প্রিয়েণ কুরুতে বশ্যাংশ্চিরং যশসি তিষ্ঠতি .. ৩৩..
নাকালে প্রণয়েদর্থান্নাপ্রিয়ে জাতু সঞ্জ্বরেৎ .
প্রিয়ে নাতিভৃশং হৃষ্যেদ্যুজ্যেতারোগ্য কর্মণি .. ৩৪..
কে মানুরক্তা রাজানঃ কে ভয়াৎসমুপাশ্রিতাঃ .
মধ্যস্থ দোষাঃ কে চৈষামিতি নিত্যং বিচিন্তয়েৎ .. ৩৫..
ন জাতু বলবান্ভূৎবা দুর্বলে বিশ্বসেৎক্ব চিৎ .
ভারুণ্ড সদৃশা হ্যেতে নিপতন্তি প্রমাদ্যতঃ .. ৩৬..
অপি সর্বৈর্গুণৈর্যুক্তং ভর্তারং প্রিয়বাদিনম্ .
অভিদ্রুহ্যতি পাপাত্মা তস্মাদ্ধি বিভিষেজ্জনাৎ .. ৩৭..
এতাং রাজোপনিষদং যয়াতিঃ স্মাহ নাহুষঃ .
মনুষ্যবিজয়ে যুক্তো হন্তি শত্রূননুত্তমান্ .. ৩৮..
৯৫
অয়ুদ্ধেনৈব বিজয়ং বর্ধয়েদ্বসুধাধিপঃ .
জঘন্যমাহুর্বিজয়ং যো যুদ্ধেন নরাধিপ .. ১..
ন চাপ্যলব্ধং লিপ্সেত মূলে নাতিদৃঢে সতি .
ন হি দুর্বলমূলস্য রাজ্ঞো লাভো বিধীয়তে .. ২..
যস্য স্ফীতো জনপদঃ সম্পন্নঃ প্রিয় রাজকঃ .
সন্তুষ্টপুষ্টসচিবো দৃঢমূলঃ স পার্থিবঃ .. ৩..
যস্য যোধাঃ সুসন্তুষ্টাঃ সান্ত্বিতাঃ সূপধাস্থিতাঃ .
অল্পেনাপি স দণ্ডেন মহীং জয়তি ভূমিপঃ .. ৪..
পৌরজানপদা যস্য স্বনুরক্তাঃ সুপূজিতাঃ .
সধনা ধান্যবন্তশ্চ দৃঢমূলঃ স পার্থিবঃ .. ৫..
প্রভাবকালাবধিকৌ যদা মন্যেত চাত্মনঃ .
তদা লিপ্সেত মেধা বী পরভূমিং ধনান্যুত .. ৬..
ভোগেষ্বদয়মানস্য ভূতেষু চ দয়া বতঃ .
বর্ধতে ৎবরমাণস্য বিষয়ো রক্ষিতাত্মনঃ .. ৭..
তক্ষত্যাত্মানমেবৈষ বনং পরশুনা যথা .
যঃ সম্যগ্বর্তমানেষু স্বেষু মিথ্যা প্রবর্ততে .. ৮..
ন বৈ দ্বিষন্তঃ ক্ষীয়ন্তে রাজ্ঞো নিত্যমপি ঘ্নতঃ .
ক্রোধং নিয়ন্তুং যো বেদ তস্য দ্বেষ্টা ন বিদ্যতে .. ৯..
যদার্য জনবিদ্বিষ্টং কর্ম তন্নাচরেদ্বুধঃ .
যৎকল্যাণমভিধ্যায়েত্তত্রাত্মানং নিয়োজয়েৎ .. ১০..
নৈনমন্যেঽবজানন্তি নাত্মনা পরিতপ্যতে .
কৃত্যশেষেণ যো রাজা সুখান্যনুবুভূষতি .. ১১..
ইদং বৃত্তং মনুষ্যেষু বর্ততে যো মহীপতিঃ .
উভৌ লোকৌ বিনির্জিত্য বিজয়ে সম্প্রতিষ্ঠতে .. ১২..
ইত্যুক্তো বামদেবেন সর্বং তৎকৃতবান্নৃপঃ .
তথা কুর্বংস্ত্বমপ্যেতৌ লোকৌ জেতা ন সংশয়ঃ .. ১৩..

.. ইতি বাঅমদেবগীতা সমাপ্তা ..