রমণগীতা

 || শ্রীরমণগীতা ||

অধ্যায় নাম
১. উপাসনাপ্রাধান্যনিরূপণম্
২. মার্গত্রয়কথনম্
৩. মুখ্যকর্তব্য নিরূপণম্
৪. জ্ঞানস্বরূপকথনম্
৫. হৃদয়বিদ্যা
৬. মনোনিগ্রহোপায়ঃ
৭. আত্মবিচারাধিকারিতদঙ্গনিরূপণম্
৮. আশ্রমবিচারঃ
৯. গ্রন্থিভেদকথনম্
১০. সঙ্ধবিদ্যা
১১. জ্ঞানসিদ্ধিসামরস্যকথনম্
১২. শক্তিবিচারঃ
১৩. সংন্যাসে স্ত্রীপুরুষয়োস্তুল্যাধিকারনিরূপণম্
১৪. জীবন্মুক্তি বিচারঃ
১৫. শ্রবণমনননিদিধ্যাসননিরূপণম্
১৬. ভক্তিবিচারঃ
১৭. জ্ঞানপ্রাপ্তিবিচারঃ
১৮. সিদ্ধমহিমানুকীর্তনম্

|| শ্রীরমণগীতা ||
অথ প্রথমোঽধ্যায়ঃ | (উপাসনাপ্রাধান্যনিরূপণম্)

মহর্ষি রমণং নৎবা কার্তিকেয়ং নরাকৃতিম্ |
মতং তস্য প্রসন্নেন গ্রন্থেনোপনিবধ্যতে || ১||
ইষপুত্রশকে রাম ভূমিনন্দধরামিতে |
একোন্ত্রিংশদ্দিবসে দ্বাদশে মাসি শীতলে || ২||
উপবিষ্টেষু সর্বেষু শিষ্যেষু নিয়তাত্মসু |
ভগবন্তমৃষি সোঽহমপৃচ্ছং নির্ণয়াপ্তয়ে || ৩||
প্রথমঃ প্রশ্নঃ
সত্যাসত্যবিবেকেন মুচ্যতে কেবলেন কিম্ |
উতাহো বন্ধহানায় বিদ্যতে সাধনান্তরম্ || ৪||
দ্বিতীয়ঃ প্রশ্নঃ
কিমলং শাস্ত্রচর্চৈব জিজ্ঞাসূনাং বিমুক্তয়ে |
যথা গুরুপদেশং কিমুপাসনপেক্ষতে || ৫||
তৃতীয় প্রশ্নঃ
স্থিতপ্রজ্ঞঃ স্থিতপ্রজ্ঞমাত্মানং কিং সমর্থয়েৎ |
বিদিৎবা পরিপূর্ণৎবং জ্ঞানস্যোপরতেরুত || ৬||
চতুর্থঃ প্রশ্নঃ
জ্ঞানিনং কেন লিঙ্গেন জ্ঞাতুং শক্ষ্যন্তি কোবিদাঃ || ৭||
পঞ্চমঃ প্রশ্নঃ
জ্ঞানায়ৈব সমাধিঃ কিং কামায়াপ্যুত কল্পতে || ৭||
ষষ্ঠঃ প্রশ্নঃ
কামেন যোগমভ্যস্য স্থিতপ্রজ্ঞো ভবেদ্যদি |
সকামোঽমুষ্য সাফল্যমধিগচ্ছতি বা ন বা || ৮||
এবং মম গুরুঃ প্রশ্নানকর্ণ্য করুণানিধিঃ |
অব্রবীৎসংশয়চ্ছেদী রমণো ভগবানৃষিঃ || ৯||
প্রথমপ্রশ্নস্যোত্তরম্
মোচয়েৎসকলান্ বন্ধানাত্মনিষ্ঠৈব কেবলম্ |
সত্যাসত্যবিবেকং তু প্রাহুর্বৈরাগ্যসাধনম্ || ১০||
সদা তিষ্ঠতি গম্ভীরো জ্ঞানী কেবলমাত্মনি |
নাসত্যং চিন্তয়েদ্বিশ্বং ন বা স্বস্য তদন্যতাম্ || ১১||
দ্বিতীয়প্রশ্নস্যোত্তরম্
ন সংসিদ্ধির্বিজিজ্ঞাসোঃ কেবলং শাস্ত্রচর্চয়া |
উপাসনং বিনা সিদ্ধির্নৈব স্যাদিতি নির্ণয়ঃ || ১২||
অভ্যাসকালে সহজাং স্থিতিং প্রাহুরুপাসনম্ |
সিদ্ধিং স্থিরাং যদা গচ্ছেৎসৈব জ্ঞানং তদোচ্যতে || ১৩||
বিষয়ান্ত্সম্পরিত্যজ্য স্বস্বভাবেন সংস্থিতিঃ |
জ্ঞানজ্বালাকৃতিঃ প্রোক্ত্তা সহজা স্থিতিরাত্মনঃ || ১৪||
তৃতীয়প্রশ্নস্যোত্তরম্
নির্বাসেন মৌনেন স্থিরায়াং সহজস্থিতৌ |
জ্ঞানী জ্ঞানিনমাত্মানং নিঃসন্দেহঃ সমর্থয়েৎ || ১৫||
চতুর্থপ্রশ্নস্যোত্তরম্
সর্বভূতসমৎবেন লিঙ্গেন জ্ঞানমূহ্যতাম্ |
পঞ্চমপ্রশ্নস্যোত্তরম্
কামারব্ধস্সমাধিস্তু কামং ফলৈ নিশ্চিতম্ || ১৬||
ষষ্ঠপ্রশ্নস্যোত্তরম্
কামেন যোগমভ্যস্য স্থিতপ্রজ্ঞো ভবেদ্যদি |
স কামোঽমুষ্য সাফল্যং গচ্ছন্নপি ন হর্ষয়েৎ || ১৭||
|| ইতি শ্রীরমণগীতাসু ব্রহ্মবিদ্যায়াং যোগশাস্ত্রে রমণান্তেবাসিনো
বাসিষ্ঠস্য গণপতেরুপনিবন্ধে উপাসনপ্রাধান্যনিরূপণং
নাম প্রথমোঽধ্যায়ঃ || ১

অথ দ্বিতীয়োঽধ্যায়ঃ | (মার্গত্রয়কথনম্)

ঈশপুত্রশকে বাণভূমিনন্দধরামিতে |
চাতুর্মাস্যে জগৌ সারং সঙ্গৃহ্য ভগবানৃষি || ১||
হৃদয়কুহরমধ্যে কেবলং ব্রহ্মমাত্রং
হ্যহমহমিতি সাক্ষাদাত্মরূপেণ ভাতি |
হৃদি বিশ মনসা স্বং চিন্ব্তা মজ্জতা বা
পবনচলনরোধাদাত্মনিষ্ঠো ভব ৎবম্ || ২||
শ্লোকং ভগবতো বক্ত্রান্মহর্ষেরিমমুদ্গতম্ |
শ্রুত্যন্তসারং যো বেদ সংশয়ো নাস্য জাতুচিৎ || ৩||
অত্র শ্লোকে ভগবতা পূর্বার্ধে স্থানমীরিতম্ |
শারীরকস্য দৃশ্যেঽস্মিঞ্ছরীরে পাঞ্চভৌতিকে || ৪||
তত্রৈব লক্ষণং চোক্তং দ্বৈতমীশা চ বারিতম্ |
উক্তং চাপ্যপরোক্ষৎবং নানালিঙ্গনিবর্হণম্ || ৫||
উপদেশো দ্বিতীয়ার্ধে শিষ্যাভ্যাসকৃতে কৃতঃ |
ত্রেধা ভিন্নেন মার্গেণ তত্ত্বাদৈক্যং সমীয়ুষা || ৬||
উপায়ো মার্গণাভিখ্যঃ প্রথমঃ সম্প্রকীর্তিতঃ |
দ্বিতীয়ো মজ্জ্নাভিখ্যঃ প্রাণরোধস্তৃতীয়কঃ || ৭||
|| ইতি শ্রীরমণগীতাসু ব্রহ্মবিদ্যায়াং যোগশাস্ত্রে রমণান্তেবাসিনো
বাসিষ্ঠস্য গণপতেরুপনিবন্ধে মার্গত্রয়কথনং
নাম দ্বিতীয়োঽধ্যায়ঃ || ২

অথ তৃতীয়োঽধ্যায়ঃ | (মুখ্যকর্তব্যনিরূপণম্)

দৈবরাতস্য সংবাদমাচার্যরমণস্য চ |
নিবধ্নীমস্তৃতীয়েঽস্মিন্নধ্যায়ে বিদুষাং মুদে || ১||
দৈবরত উবাচ
কিং কর্তব্য মনুষ্যস্য প্রধানমিহ সংসৃতৌ |
একং নির্ধায় ভগবাংস্তন্মে ব্যাখ্যাতুমর্হতি || ২||
ভগবানুবাচ
স্বস্য স্বরূপং বিজ্ঞেয়ং প্রধানং মহদিচ্ছতা |
প্রতিষ্ঠা যত্র সর্বেষাং ফলানামুত কর্মণাম্ || ৩||
দৈবরাত উবাচ
স্বস্য স্বরূপবিজ্ঞানে সাধনং কিং সমাসতঃ |
সিধ্যেৎকেন প্রয়ত্নেন প্রত্যগ্দৃষ্টির্মহীয়সি || ৪||
ভগবানুবাচ
বিষয়েভ্যঃ পরাবৃত্য বৃত্তীঃ সর্বাঃ প্রয়ত্নতঃ |
বিমর্শে কেবলং তিষ্ঠেদচলে নিরুপাধিকে || ৫||
স্বস্য স্বরূপবিজ্ঞানে সাধনং তৎসমাসতঃ |
সিধ্যেত্তেনৈব যত্নেন প্রত্যগ্দৃষ্টির্মহীয়সি || ৬||
দৈবরাত উবাচ
যাবৎসিদ্ধির্ভবেন্নৄণাং যোগস্য মুনিকুঞ্জর |
তাবন্তং নিয়মাঃ কালং কিং যত্নমুপকুর্বতে || ৭||
ভগবানুবাচ
প্রয়ত্নমুপকুর্বন্তি নিয়মা যুঞ্জতাং সতাম্ |
সিদ্ধানাং কৃতকৃত্যানাং গলন্তি নিয়মাস্স্বয়ম্ || ৮||
দৈবরাত উবাচ
কেবলেন বিমর্শেন স্থিরেণ নিরুপাধিনা |
যথা সিদ্ধিস্তথা মন্ত্রৈর্জপ্তৈঃ সিদ্ধির্ভবেন্ন বা || ৯||
ভগবানুবাচ
অচঞ্চলেন মনসা মন্ত্রৈর্জপ্তৈর্নিরন্তরম্ |
সিদ্ধিঃ স্যাচ্ছদ্দধানানাং জপ্তেন প্রণবেন বা || ১০||
বৃতির্জপেন মন্ত্রাণাং শুদ্ধস্য প্রণবস্য বা |
বিষয়েভ্যঃ পরাবৃত্তা স্বস্বরূপাত্মিকা ভবেৎ || ১১||
ঈশপুত্রশকে শৈলভূমিনন্দধরামিতে |
সপ্তমে সপ্তমে সোঽযং সংবাদোঽভবদদ্ভুতঃ || ১২||
|| ইতি শ্রীরমণগীতাসু ব্রহ্মবিদ্যায়াং যোগশাস্ত্রে রমণান্তেবাসিনো
বাসিষ্ঠস্য গণপতেরুপনিবন্ধে মুখ্যকর্তব্যনিরূপণং
নাম তৃতীয়োঽধ্যায়ঃ || ৩

অথ চতুর্থোঽধ্যায়ঃ | (জ্ঞানস্বরূপকথনম্)

প্রথমঃ প্রশ্নঃ
অহং ব্রহ্মাস্মীতি বৃত্তিঃ কিং জ্ঞানং মুনিকুন্জর |
উত ব্রহ্মাহমিতি ধীর্ধীরহং সর্বমিত্যুত || ১||
অথবা সকলং চৈতদ্ব্রহ্মেতি জ্ঞানমুচ্যতে |
অস্মাদ্বৃত্তিচতুষ্কাদ্বা কিং নু জ্ঞানং বিলক্ষণম্ || ২||
অস্যোত্তরম্
ইমং মম গুরুঃ প্রশ্নমন্তেবাসিন আদরাৎ |
আকর্ণ্য রমণো বাক্যমুবাচ ভগবান্মুনি || ৩||
বৃত্তয়ো ভাবনা এব সর্বা এতা ন সংশয়ঃ |
স্বরূপাবস্থিতিং শুদ্ধাং জ্ঞানমাহুর্মনীষিণঃ || ৪||
গুরোর্বচস্তদাকর্ণ্য সংশয়চ্ছেদকারকম্ |
অপৃচ্ছং পুনরেবাহমন্যং সংশয়মুদ্গতম্ || ৫||
দ্বিতীয় প্রশ্নঃ
বৃত্তিব্যাপ্যং ভবেদ্ব্রহ্ম ন বা নাথ তপস্বিনাম্ |
ইমং মে হৃদি সঞ্জাতং সংশয়ং ছেত্তুমর্হসি || ৬||
তমিমং প্রশ্নমাকর্ণ্য মিত্রমঙ্ধ্রিজুষামৃষিঃ |
অভিষিচ্য কটাক্ষেণ মামিদং বাক্যমব্রবীৎ || ৭||
অস্যোত্তরম্
স্বাত্মভূতং যদি ব্রহ্ম জ্ঞাতুং বৃত্তিঃ প্রবর্ততে |
স্বাত্মাকারা তদা ভূৎবা ন পৃথক্ প্রতিতিষ্ঠতি || ৮||
অয়ং প্রাগুক্ত এবাব্দে সপ্তমে ৎবেকবিংশকে |
অভবন্নো মিতগ্রন্থঃ সংবাদো রোমহর্ষণঃ || ৯||
|| ইতি শ্রীরমণগীতাসু ব্রহ্মবিদ্যায়াং যোগশাস্ত্রে রমণান্তেবাসিনো
বাসিষ্ঠস্য গণপতেরুপনিবন্ধে জ্ঞানস্বরুপকথনং
নাম চতুর্থোঽধ্যায়ঃ || ৪

অথ পঞ্চমোঽধ্যায়ঃ | (হৃদয়বিদ্যা)

প্রাগুক্তেঽব্দেঽষ্টমে মাসি নবমে দিবসে নিশি |
উপন্যসিতবান্ সংযগুদ্দিশ্য হৃদয়ং মুনিঃ || ১||
নির্গচ্ছন্তি যতঃ সর্বা বৃত্তয়োঃ দেহধারিণাম্ |
হৃদয়ং তৎসমাখ্যাতং ভাবনাঽঽকৃতিবর্ণনম্ || ২||
অহংবৃত্তিঃ সমস্তানাং বৃত্তীনাং মূলমুচ্যতে |
নির্গচ্ছন্তি যতোঽহন্ধীর্হৃদয়ং তৎসমাসতঃ || ৩||
হৃদয়স্য যদি স্থানং ভবেচ্চক্রমনাহতম্ |
মূলাধারং সমারভ্য যোগস্যোপক্রমঃ কুতঃ || ৪||
অন্যদেব ততো রক্তপিণ্ডাদদৃদয়মুচ্যতে
অয়ং হৃদিতি বৃত্ত্যা তদাত্মনো রূপমীরিতম্ || ৫||
তস্য দক্ষিণতো ধাম হৃৎপীঠে নৈব বামতঃ |
তস্মাৎপ্রবহতি জ্যোতিঃ সহস্রারং সুষুম্ণয়া || ৬||
সর্বং দেহং সহস্রারাত্তদা লোকানুভূতয়ঃ |
তাঃ প্রপশ্যন্ বিভেদেন সংসারী মনুজো ভবেৎ || ৭||
আত্মস্থস্য সহস্রারং শুদ্ধং জ্যোতির্ময়ং ভবেৎ |
তত্র জীবেন্ন সঙ্কল্পো যদি সান্নিধ্যতঃ পতেৎ || ৮||
বিজ্ঞানমানবিষয়ং সন্নিকর্ষেণ যদ্যপি |
ন ভবেদ্যোগভঙ্গায় ভেদস্যাগ্রহণে মনঃ || ৯||
গৃহ্যতোঽপি স্থিরৈকাধীঃ সহজা স্থিতিরুচ্যতে |
নির্বিকল্পঃ সমাধিস্তু বিষয়াসন্নিধৌ ভবেৎ || ১০||
অণ্ডং বপুষি নিঃশেষং নিঃশেষং হৃদয়ে বপুঃ |
তস্মাদণ্ডস্য সর্বস্য হৃদয়ং রুপসঙ্গ্রহঃ || ১১|
ভুবনং মনসো নান্যদন্যন্ন হৃদয়ান্মনঃ |
অশেষা হৃদয়ে তস্মাৎকথা পরিসমাপ্যতে || ১২||
কীর্ত্যতে হৃদয়ং পিণ্ডে যথাণ্ডে ভানূমণ্ডলম্ |
মনঃ সহস্রারগতং বিম্বং চান্দ্রমসং যথা || ১৩||
যথা দদাতি তপনস্তেজঃ কৈরববন্ধবে |
ইদং বিতরতি জ্যোতির্হ্রদয়ং মনসে তথা || ১৪||
হ্রদ্যসন্নিহিতো মর্ত্যো মনঃ কেবলমীক্ষতে |
অসন্নিকর্ষে সূর্যস্য রাত্রৌ চন্দ্রে যথা মহঃ || ১৫||
অপশ্যংস্তেজসো মূলং স্বরূপং সত্যমাত্মনঃ |
মনসা চ পৃথক্পশ্যন্ ভাবান্ ভ্রাম্যতি পামরঃ || ১৬||
হৃদি সন্নিহিতো জ্ঞানী লীনং হৃদয়তেজসি |
ঈক্ষতে মানসং তেজো দিবা ভানাবিবৈন্দবম্ || ১৭||
প্রজ্ঞানস্য প্রবেত্তারো বাচ্যমর্থং মনো বিদুঃ
অর্থং তু লক্ষ্যং হৃদয়ং হৃদয়ান্নপরঃ পরঃ || ১৮||
দৃগ্দৃশ্যভেদধীরেষা মনসি প্রতিতিষ্ঠতি |
হৃদয়ে বর্তমানাং দৃগ্দৃশ্যেনৈকতাং ব্রজেৎ || ১৯||
মূর্চ্ছা নিদ্রাতিসন্তোষশোকাবেশভয়াদিভিঃ |
নিমিত্তৈরাহতা বৃত্তিঃ স্বস্থানং হৃদয়ং ব্রজেৎ || ২০||
তদা ন জ্ঞায়তে প্রাপ্তির্হৃদয়স্য শরীরিণা |
বিজ্ঞায়তে সমাধৌ তু নামভেদো নিমিত্ততঃ || ২১||
|| ইতি শ্রীরমণগীতাসু ব্রহ্মবিদ্যায়াং যোগশাস্ত্রে রমণান্তেবাসিনো
বাসিষ্ঠস্য গণপতেরুপনিবন্ধে হৃদয়বিদ্যা
নাম পঞ্চমোঽধ্যায়ঃ || ৫

অথ ষষ্টোঽধ্যায়ঃ | (মনোনিগ্রহোপায়ঃ)

নিরুপ্য হৃদয়স্যৈবং তত্ত্বং তত্ত্ববিদাং বরঃ |
মনসো নিগ্রহোপায়মবদদ্রমণো মুনিঃ || ১||
নিত্যবত্তিমতাং নৄণাং বিষয়াসক্ত্তচেতসাম্ |
বাসনানাং বলিয়স্ত্বান্মনো দুর্নিগ্রহং ভবেৎ || ২||
চপলং তন্নিগৃহ্ণীয়াৎপ্রাণরোধেন মানবঃ |
পাশবদ্ধো যথা জন্তুস্তথা চেতো ন চেষ্টতে || ৩||
প্রাণরোধেন বৃত্তিনাং নিরোধঃ সাধিতো ভবেৎ |
বৃত্তিরোধেন বৃত্তিনাং জন্মস্থানে স্থিতো ভবেৎ || ৪||
প্রাণরোধশ্চ মনসা প্রাণস্য প্রত্যবেক্ষণম্ |
কুম্ভকং সিধ্যতি হ্যেয়ং সততপ্রত্যবেক্ষণাৎ || ৫||
যেষাং নৈতেন বিধিনা শক্তিঃ কুম্ভকসাধনে |
হঠয়োগবিধানেন তেষাং কুম্ভকমিষ্যতে || ৬||
একদা রেচকং কুর্যাৎকুর্যাৎপূরকমেকদা |
কুম্ভকং তু চতুর্বারং নাডীশুদ্ধির্ভবেত্ততঃ || ৭||
প্রাণো নাডীষু শুদ্ধাসু নিরুদ্ধঃ ক্রমশো ভবেৎ |
প্রাণস্য সর্বধা রোধঃ শুদ্ধং কুম্ভকমুচ্যতে || ৮||
ত্যাগং দেহাত্মভাবস্য রেচকং জ্ঞানিনঃ পরে |
পূরকং মার্গণং স্বস্য কুম্ভকং সহজস্থিতিম্ || ৯||
জপেন বাঽথ মন্ত্রাণাং মনসো নিগ্রহো ভবেৎ |
মানসেন তদা মন্ত্রপ্রাণয়োরেকতা ভবেৎ || ১০||
মন্ত্রাক্ষরাণাং প্রাণেন সায়ুজ্যং ধ্যানমুচ্যতে |
সহজস্থিতয়ে ধ্যানং দৃঢভূমিঃ প্রকল্পতে || ১১||
সহবাসেন মহতাং সতামারুঢচেতসাম্
ক্রিয়মাণেন বা নিত্যং স্থানে লীনং মনো ভবেৎ || ১২||
|| ইতি শ্রীরমণগীতাসু ব্রহ্মবিদ্যায়াং যোগশাস্ত্রে রমণান্তেবাসিনো
বাসিষ্ঠস্য গণপতেরুপনিবন্ধে মনোনিগ্রহোপায়ঃ
নাম ষষ্টোঽধ্যায়ঃ || ৬

অথ সপ্তমোঽধ্যায়ঃ | (আত্মবিচারাধিকারিতদঙ্গনিরূপণম্)

ভারদ্বাজস্য বৈ কার্ষ্ণেরাচার্যরমণস্য চ |
অধ্যায়ে কথ্যতে শ্রেষ্ঠঃ সংবাদ ইহ সপ্তমে || ১||
কার্ষ্ণিরুবাচ
রূপমাত্মবিচারস্য কিং নু কিং বা প্রয়োজনম্ |
লভ্যাদাত্মবিচারেণ ফলং ভূয়োঽন্যতোঽস্তি বা || ২||
ভগবানুবাচ
সর্বাসামপি বৃত্তীনাং সমষ্টির্যা সমীরিতা |
অহংবৃত্তেরমুষ্যাস্তু জন্মস্থানং বিমৃশ্যতাম্ || ৩||
এষ আত্মবিচারঃ স্যন্ন শাস্ত্রপরিশীলনম্ |
অহঙ্কারো বিলীনঃ স্যান্মূলস্থানগবেষণে || ৪||
আত্মাভাসস্ত্বহঙ্কারঃ স যদা সম্প্রলিয়তে |
আত্মা সত্যোঽভিতঃ পূর্ণঃ কেবলঃ পরিশিষ্যতে || ৫||
সর্বক্লেশনিবৃত্তিঃ স্যাৎফলমাত্মবিচারতঃ |
ফলানামবধিঃ সোঽযমস্তি নেতোঽধিকং ফলম্ || ৬||
অদ্ভুতাঃ সিদ্ধয়ঃ সাধ্যা উপায়ান্তরতশ্চ যাঃ |
তাঃ প্রাপ্তোঽপি ভবত্যন্তে বিচারেণৈব নিবৃতঃ || ৭||
কার্ষ্ণিরুবাচ
এতস্যাত্মবিচারস্য প্রাহুঃ কমধিকারিণম্ |
অধিকারস্য সম্পত্তিঃ কিং জ্ঞাতুং শক্যতে স্বয়ম্ || ৮||
ভগবানুবাচ
উপাসনাদিভিঃ শুদ্ধং প্রাগ্জমসুকৃতেন বা |
দৃষ্টদোষং মনো যস্য শরীরে বিষয়েষু চ || ৯||
মনসা চরতো যস্য বিষ্যেষ্বরুচির্ভৃশম্ |
দেহে চানিত্যতা বুদ্ধিস্তং প্রহুরধিকারিণম্ || ১০||
দেহে নশ্বরতাবুদ্ধের্বৈরাগ্যাদ্বিষয়েষু চ |
এতাভ্যামেব লিঙ্গাভ্যাং জ্ঞেয়া স্বস্যাধিকারিতা || ১১||
কার্ষ্ণিরুবাচ
স্নানং সন্ধ্যাং জপো হোমঃ স্বাধ্যায়ো দেবপূজনম্ |
সঙ্কীর্তনং তির্থয়াত্রা যজ্ঞো দানং ব্রতানি চ || ১২||
বিচারে সাধিকারস্য বৈরাগ্যাচ্চ বিবেকতঃ |
কিং বা প্রয়োজনায় স্যুরুত কালবিধূতয়ে || ১৩||
ভগবানুবাচ
আরম্ভিণাং ক্ষীয়মাণরাগাণামধিকারিণাম্ |
কর্মাণ্যেতানি সর্বাণি ভূয়স্যৈ চিতশিদ্ধয়ে || ১৪||
যৎকর্ম সুকৃতং প্রোক্তং মনোবাক্কায়সম্ভবম্ |
তত্তু কর্মান্তরং হন্তি মনোবাক্কায়সম্ভবম্ || ১৫||
অত্যন্তশুদ্ধমনসাং পক্বানামধিকারিণাম্ |
ইদং লোকোপকারায় কর্মজালং ভবিষ্যতি || ১৬||
পরেষামুপদেশায়্ ক্ষেমায় চ মনীষিণঃ |
পক্বাশ্চ কর্ম কুর্বন্তি ভয়ান্নাদেশশাস্ত্রতঃ || ১৭||
বিচারপ্রতিকূলানি ন পুণ্যানি নরর্ষভ |
ক্রিয়মাণান্যসঙ্গেন ভেদবুদ্ধ্যুপমর্দিনা || ১৮||
ন চাকৃতানি পাপায় পক্বনামধিকারিণাম্ |
স্ববিমর্শো মহৎপুণ্যং পাবনানাং হি পাবনম্ || ১৯||
দৃশ্যতে দ্বিবিধা নিষ্ঠা পক্বানামধিকারিণাম্ |
ত্যাগ একান্তয়োগায় পরার্থং চ ক্রিয়াদরঃ || ২০||
কার্ষ্ণিরুবাচ
নির্বাণায়াস্তি চেদন্যো মার্গ আত্মবিচারতঃ |
একো বা বিবিধস্তং মে ভগবান্বক্তুমর্হতি || ২১||
ভগবানুবাচ
একঃ প্রাপ্তুং প্রয়ততে পরঃ প্রাপ্তারমৃচ্ছতি |
চিরায় প্রথমো গচ্ছন্ প্রাপ্তোত্যাত্মান্মন্ততঃ || ২২||
একস্য ধ্যানতশ্চিত্তমেকাকৃতির্ভবিষ্যতি |
একাকৃতিৎবং চিত্তস্য স্বরুপে স্থিতয়ে ভবেৎ || ২৩||
অনিচ্ছয়াপ্যতো ধ্যায়ন্ বিন্দত্যাত্মনি সংস্থিতিম্ |
বিচারকস্তু বিজ্ঞায় ভবেদাত্মনি সংস্থিতঃ || ২৪||
ধ্যায়ো দেবতাং মন্ত্রমন্যদ্বা লক্ষ্যমুত্তমম্ |
ধ্যেয়মাত্মাত্মমহাজ্যোতিষ্যন্ততো লীনতাং ব্রজেৎ || ২৫||
গতিরেবং দ্বয়োরেকা ধ্যাতুশ্চাত্মবিমর্শিনঃ |
ধ্যায়ন্নেকঃ প্রশান্তঃ স্যাদন্যো বিজ্ঞায় শাম্যতি || ২৬||
|| ইতি শ্রীরমণগীতাসু ব্রহ্মবিদ্যায়াং যোগশাস্ত্রে রমণান্তেবাসিনো
বাসিষ্ঠস্য গণপতেরুপনিবন্ধে আত্মবিচারাধিকারিতদঙ্গনিরূপণং
নাম সপ্তমোঽধ্যায়ঃ || ৭

অথ অষ্টমোঽধ্যায়ঃ | (আশ্রমবিচারঃ)

কার্ষ্ণেরেবাপরং প্রশ্নং নিশম্য ভগবান্মুনিঃ |
চাতুরাশ্রম্যসম্বদ্ধমদিকারং ন্যরূপয়ৎ || ১||
ব্রহ্মচারী গৃহী বাঽপি বানপ্রস্থোঽথবা যতিঃ |
নারী বা বৃষলো বাপি পক্বো ব্রহ্ম বিচারয়েৎ || ২||
সোপানবৎপরং প্রাপ্তুং ভবিষ্যত্যাশ্রমক্রমঃ |
অত্যন্তপক্বচিত্তস্য ক্রমাপেক্ষা ন বিদ্যতে || ৩||
গতয়ে লোককার্যাণামাদিশন্ত্যাশ্রামক্রমম্
আশ্রমত্রয়ধর্মাণাং ন জ্ঞানপ্রতিকূলতা || ৪||
সংন্যাসো নির্মলং জ্ঞানং ন কাষায়ো ন মুণ্ডনম্ ||
প্রতিবন্ধকবাহুল্যবারণায়াশ্রমো মতঃ || ৫||
ব্রহ্মচয়র্যাশ্রমে যস্য শক্তিরুজ্জৃম্ভতে ব্রতৈঃ |
বিদ্যয়া জ্ঞানবৃদ্ধয়া চ স পশ্চাৎপ্রজ্বলিষ্যতি || ৬||
ব্রহ্মচর্যেণ শুদ্ধেন গৃহিৎবে নির্মলো ভবেৎ |
সর্বেষামুপকারায় গৃহস্থাশ্রম উচ্যতে || ৭||
সর্বথা বীতসঙ্গস্য গৃহস্থস্যাপি দেহিনঃ |
পরং প্রস্ফুরতি জ্যোতিস্তত্র নৈবাস্তি সংশয়ঃ || ৮||
তপসস্ত্বাশ্রমঃ প্রোক্ত্তস্তৃতীয়ঃ পণ্ডিতোত্তমৈঃ |
অভার্যো বা সভার্যো বা তৃতীয়াশ্রমভাগ্ভবেৎ || ৯||
তপসা দগ্ধপাপস্য পক্বচিত্তস্য যোগিনঃ |
চতুর্থ আশ্রমঃ কালে স্বয়মেব ভবিষ্যতি || ১০||
এষ প্রাগুক্ত এবাব্ধে ৎবষ্টমে দ্বাদশে পুনঃ |
উপদেশো ভগবতঃ সপ্তমাষ্টময়োরভূৎ || ১১||
|| ইতি শ্রীরমণগীতাসু ব্রহ্মবিদ্যায়াং যোগশাস্ত্রে রমণান্তেবাসিনো
বাসিষ্ঠস্য গণপতেরুপনিবন্ধে আশ্রমবিচারঃ
নাম অষ্টমোঽধ্যায়ঃ || ৮

অথ নবমোঽধ্যায়ঃ | (গ্রন্থিভেদকথনম্)

চতুর্দশেঽষ্টমে রাত্রৌ মহর্ষি পৃষ্টবানহম্ |
গ্রন্থিভেদং সমুদ্দিশ্য বিদুষাং যত্র সংশয়ঃ || ১||
তমাকর্ণ্য মম প্রশ্নং রমণো ভগবানৃষিঃ |
ধ্যাৎবা দিব্যেন ভাবেন কিঞ্চিদাহ মহামহাঃ || ২||
শরীরস্যাত্মনশ্চাপি সম্বন্ধো গ্রন্থিরুচ্যতে |
সম্বন্ধেনৈব শারীরং ভবতি জ্ঞানমাত্মনঃ || ৩||
শরীরং জডমেতৎস্যাদাত্মা চৈতন্যমিষ্যতে |
উভয়োরপি সম্বন্ধো বিজ্ঞানেনানুমীয়তে || ৪||
চৈতন্যচ্ছায়য়াশ্লিষ্টং শরীরং তাত চেষ্টতে |
নিদ্রাদৌ গ্রহণাভাবাদূহ্যতে স্থানমাত্মনঃ || ৫||
সূক্ষ্মাণাং বিদ্যুদাদীনাং স্থূলে তন্ত্র্যাদিকে যথা |
তথা কলেবরে নাড্যাং চৈতন্যজ্যোতিষো গতিঃ || ৬||
স্থলমেকমুপাশ্রিত্য চৈতন্যজ্যোতিরুজ্জ্বলম্ |
সর্বং ভাসয়তে দেহং ভাস্করো ভুবনং যথা || ৭||
ব্যাপ্তেন তৎপ্রকাশেন শরীরে ৎবনুভূতয়ঃ |
স্থলং তদেব হৃদয়ং সূরয়স্সম্প্রচক্ষতে || ৮||
নাডীশক্তিবিলাসেন চৈতন্যাংশুগতির্মতা |
দেহস্য শক্তয়স্সর্বাঃ পৃথঙ্নাডীরূপাশ্রিতাঃ || ৯||
চৈতন্যং তু পৃথঙ্নাড্যাং তাং সুষুম্ণাং প্রচক্ষতে |
আত্মনাডীং পরামেকে পরেৎবমৃতনাডিকাম্ || ১০||
সর্বং দেহং প্রকাশেন ব্যাপ্তো জীবোঽভিমানবান্ |
মন্যতে দেহমাত্মানং তেন ভিন্নং চ বিষ্টপম্ || ১১||
অভিমানং পরিত্যজ্য দেহে চাত্মধিয়ং সুধীঃ |
বিচারয়েচ্চেদেকাগ্রো নাডীনাং মথনং ভবেৎ || ১২||
নাডীনাং মথনেনৈবাত্মা তাভ্যঃ পৃথক্কৃতঃ |
কেবলামমৃতাং নাডীমাশ্রিত্য প্রজ্বলিষ্যতি || ১৩||
আত্মনাড্যাং যদা ভাতি চৈতন্যজ্যোতিরুজ্জ্বলম্ |
কেবলায়াং তদা নান্যদাত্মনস্সম্প্রভাসতে || ১৪||
সান্নিধ্যাদ্ভাসমানং বা ন পৃথক্প্রতিতিষ্ঠতি |
জানাতি স্পষ্টমাত্মানং স দেহমিব পামরঃ || ১৫||
আত্মৈব ভাসতে যস্য বহিরন্তশ্চ সর্বতঃ |
পামরস্যেব রূপাদি স ভিন্নগ্রন্থিরুচ্যতে || ১৬||
নাডীবন্ধোঽভিমানশ্চ দ্বয়ং গ্রন্থিরুদীর্যতে |
নাডীবন্ধেন সূক্ষমোঽপি স্থূলং সর্বং প্রপশ্যতি || ১৭||
নিবৃত্তং সর্বনাডীভ্যো যদৈকাং নাডীকাং শ্রিতম্ |
ভিন্নগ্রন্থি তদা জ্যোতিরাত্মভাবায় কল্পতে || ১৮||
অগ্নিতপ্তময়োগোলং দৃশ্যতেঽগ্নিময়ং যথা |
স্ববিচারাগ্নিসন্তপ্তং তথেদং স্বময়ং ভবেৎ || ১৯||
শরীরাদিজুষাং পূর্ববাসনানাং ক্ষয়স্তদা |
কর্তৃৎবমশরীরৎবান্নৈব তস্য ভবিষ্যতি || ২০||
কর্তৃৎবাভাবতঃ কর্মবিনাশোঽস্য সমীরিতঃ |
তস্য বস্ত্বন্তরাভাবাৎসংশয়ানামনুদ্ভবঃ || ২১||
ভবিতা ন পুনর্বদ্ধো বিভিন্নগ্রন্থিরেকদা |
সা স্থিতিঃ পরমা শক্তিস্সা শান্তিঃ পরমা মতা || ২২||
|| ইতি শ্রীরমণগীতাসু ব্রহ্মবিদ্যায়াং যোগশাস্ত্রে রমণান্তেবাসিনো
বাসিষ্ঠস্য গণপতেরুপনিবন্ধে গ্রন্থিভেদকথনং
নাম নবমোঽধ্যায়ঃ || ৯

অথ দশমোঽধ্যায়ঃ | (সঙ্ঘবিদ্যা)

যতিনো যোগনাথস্য মহর্ষিরমণস্য চ |
দশমেঽত্র নীবঘ্নিমস্সংবাদং সঙ্ঘহর্ষদম্ || ১||
যোগনাথ উবাচ
সাঙ্ঘিকস্য চ সঙ্ঘস্য কস্সম্বন্ধো মহামুনে |
সঙ্ঘস্য শ্রেয়সে নাথ তমেতং বক্তুমর্হসি || ২||
ভগবানুবাচ
জ্ঞেয়শ্শরীরবৎসঙ্ঘস্তত্তদাচারশালিনম্ |
অঙ্গানীবাত্র বিজ্ঞেয়াস্সাঙ্ঘিকাস্সধুসত্তম || ৩||
অঙ্গং যথা শরীরস্য করোত্যুপকৃতিং যতে |
তথোপকারং সঙ্ঘস্য কুর্বন্ জয়তি সাঙ্ঘিকঃ ||
সঙ্ঘস্য বাঙ্মনঃকায়ৈরুপকারো যথা ভবেৎ |
স্বয়ং তথাঽঽচরন্নিত্যং স্বকীয়ানপি বোঘয়েৎ || ৫||
আনুকূল্যেন সঙ্ঘস্য স্থাপয়িৎবা নিজং কুলম্ |
সঙ্ঘস্যৈব ততো ভূত্যৈ কুর্যাদ্ভুতিয়ুতং কুলম্ || ৬||
যোগনাথ উবাচ
শান্তিং কেচিৎপ্রশংসন্তি শক্তিং কেচিন্মনীষিণঃ |
অনয়োঃ কো গুণো জ্যায়ান্ত্সঙ্ঘক্ষেমকৃতে বিভো || ৭||
ভগবানুবাচ
স্বমনশ্শুদ্ধয়ে শান্তিশ্শক্তিস্সঙ্ঘস্য বৃদ্ধয়ে |
শক্ত্যা সঙ্ঘং বিধায়োচ্চৈশ্শান্তিং সংস্থাপয়েত্ততঃ || ৮||
যোগনাথ উবাচ
সর্বস্যাপি চ সঙ্ঘস্য নরাণাণামৃষিকুঞ্জর |
গন্তব্যং সমুদায়েন কিং পরং ধরণীতলে || ৯||
ভগবানুবাচ
সমুদায়েন সর্বস্য সঙ্ঘস্য তনুধারিণাম্ |
সৌভ্রাত্রং সমভাবেন গন্তব্যং পরমুচ্যতে || ১০||
সৌভ্রাত্রেণ পরা শান্তিরন্যোন্যং দেহধারিণাম্ |
তদেত্যং শোভতে সর্বা ভূমিরেকং গৃহং যথা || ১১||
অভূৎপঞ্চদশে ঘস্ত্রে সংবাদস্সোঽযমষ্টমে |
যোগনাথস্য যতিনো মহর্ষেশ্চ দয়াবতঃ || ১২||
|| ইতি শ্রীরমণগীতাসু ব্রহ্মবিদ্যায়াং যোগশাস্ত্রে রমণান্তেবাসিনো
বাসিষ্ঠস্য গণপতেরুপনিবন্ধে সঙ্ঘবিদ্যা
নাম দশমোঽধ্যায়ঃ || ১০

অথ একাদশোঽধ্যায়ঃ | (জ্ঞানসিদ্ধিসামরস্যকথনম্)

ষোডশে দিবসে রাত্রৌ বিবিক্তে মুনিসত্তমম্ |
গুরুং ব্রহ্মবিদাং শ্রেষ্ঠং নিত্যমাত্মনি সংস্থিতম্ || ১||
উপগম্য মহাভাগং সোঽহং কৈবতমানবম্ |
রমণং স্তুতবানস্মি দুর্লভজ্ঞানলব্ধয়ে || ২||
ৎবয়্যেব পরমা নিষ্ঠা ৎবয়্যেব বিশদা মতিঃ |
অম্ভসামিব বারাশির্বিজ্ঞানানাং ৎবমাস্পদম্ || ৩||
ৎবং তু সপ্তদশে বর্ষে বাল্য এব মহায়শঃ |
লব্ধবানসি বিজ্ঞানং যোগিনামপি দুর্লভম্ || ৪||
সর্বে দৃশ্যা ইমে ভাবা যস্য ছায়াময়াস্তব |
তস্য তে ভগবন্নিষ্ঠাং কো নু বর্ণয়িতুং ক্ষমঃ || ৫||
মজ্জতাং ঘোরসংসারে ব্যপৃতানামিতস্ততঃ |
দুঃখং মহত্তিতীষূর্ণাং ৎবমেকা পরমা গতিঃ || ৬||
পশ্যামি দেবদত্তেন জ্ঞানেন ৎবাং মুহুর্মুহুঃ |
ব্রহ্মণ্যানাং বরং ব্রহ্মন্ত্সুব্রহ্মণ্যং নরাকৃতিম্ || ৭||
ন ৎবং স্বামিগিরৌ নাথ ন ৎবং ক্ষণিকপর্বতে |
ন ৎবং বেঙ্কটশৈলাগ্রে শোণাদ্রাবসি বস্তুতঃ || ৮||
ভূমবিদ্যাং পুরা নাথ নারদায় মহর্শয়ে |
ভবান্ শুশ্রূষমাণায় রহস্যামুপদিষ্টবান্ || ৯||
সনৎকুমারং ব্রহ্মর্ষি ৎবামাহুর্বেদবেদিনঃ |
আগমানাং তু বেত্তারস্সুব্রহ্মণ্যং সুরর্ষভম্ || ১০||
কেবলং নাম ভেদোঽযং ব্যক্তিভেদো ন বিদ্যতে |
সনৎকুমারস্স্কন্দশ্চ পর্যায়ৌ তব তত্ত্বতঃ || ১১||
পুরা কুমারিলো নাম ভূৎবা ব্রাহ্মণসত্তমঃ |
ধর্মং বেদোদিতং নাথ ৎবং সংস্থাপিতবানসি || ১২||
জৈনৈর্ব্যাকুলিতে ধর্মে ভগবন্দ্রবিডেষু চ |
ভূৎবা ৎবং জ্ঞানসম্বন্ধো ভক্তিং স্থাপিতবানসি || ১৩||
অধুনা ৎবং মহাভাগ ব্রহ্মজ্ঞানস্য গুপ্তয়ে |
শাস্ত্রজ্ঞানেন সন্ত্ৠপ্তৈর্নিরুদ্ধস্যাগতো ধরাম্ || ১৪||
সন্দেহা বহবো নাথ শিষ্যাণাং বারিতাস্ত্বয়া |
ইমং চ মম সন্দেহং নিবারয়িতুমর্হসি || ১৫||
জ্ঞানস্য চাপি সিদ্ধীনাং বিরোধঃ কিং পরস্পরম্ |
উতাহো কোঽপি সম্বন্ধো বর্ততে মুনিকুঞ্জর || ১৬||
ময়ৈবং ভগবান্পৃষ্টো রমণো নুতিপূর্বকম্ |
গভিরয়া দৃশা বীক্ষ্য মামিদং বাক্যমব্রবিৎ || ১৭||
সহজাং স্থিতিমারুঢঃ স্বভাবেন দিনে দিনে |
তপশ্চরতিদুর্ধর্ষং নালস্যং সহজস্থিতৌ || ১৮||
তপস্তদেব দুর্ধর্ষং য নিষ্ঠ সহজাত্মনি |
তেন নিত্যেন তপসা ভবেৎপাকঃ ক্ষণে ক্ষণে || ১৯||
পরিপাকেন কালে স্যুঃ সিদ্ধয়স্তাত পশ্যতঃ |
প্রারব্ধং যদি তাভিঃ স্যাদ্বিহারো জ্ঞানিনোঽপি চ || ২০||
যথা প্রপঞ্চগ্রহণে স্বরুপান্নেতরন্মুনেঃ |
সিদ্ধয়ঃ ক্রিয়মাণাশ্চ স্বরুপান্নেতরত্তথা || ২১||
ভবেন্ন যস্য প্রারব্ধং শক্তিপূর্ণোঽপ্যয়ং মুনিঃ |
অতরঙ্গ ইবাম্ভোধির্ন কিঞ্চিৎদপি চেষ্টতে || ২২||
নান্যং মৃগয়তে মার্গং নিসর্গাদাত্মনি স্থিতঃ ||
সর্বাসামপি শক্তীনাং সমষ্টিঃ স্বাত্মনি স্থিতিঃ || ২৩||
অপ্রয়ত্নেন তু তপঃ সহজা স্থিতিরুচ্যতে |
সহজায়াং স্থিতৌ পাকাচ্ছক্ত্তিনামুদ্ভবো মতঃ || ২৪||
পরীবৃতোঽপি বহুভির্নিত্যমাত্মনি সংস্থিতঃ |
ঘোরং তপশ্চরত্যেব ন তস্যৈকান্তকামিতা || ২৫||
জ্ঞানং শক্তেরপেতং যো মন্যতে নৈব বেদ সঃ |
সর্বশক্তেঽভিতঃ পূর্ণে স্বস্বরূপে হি বোধবান্ || ২৬||
|| ইতি শ্রীরমণগীতাসু ব্রহ্মবিদ্যায়াং যোগশাস্ত্রে রমণান্তেবাসিনো
বাসিষ্ঠস্য গণপতেরুপনিবন্ধে জ্ঞানসিদ্ধিসামরস্যকথনং
নাম একাদশোঽধ্যায়ঃ || ১১

অথ দ্বাদশোঽধ্যায়ঃ | (শক্তিবিচারঃ)

একোনবিংশে দিবসে ভারদ্বাজো মহামনাঃ |
কপালী কৃতিষু জ্যায়ানপৃচ্ছদ্রমণং গুরুম্ || ১|
কপাল্যুবাচ
বিষয়ী বিষয়ো বৃত্তিরিতীদং ভগবংস্ত্রিকম্ |
জ্ঞানিনাং পামরাণাং চ লোকয়াত্রাসু দৃশ্যতে || ২||
অথ কেন বিশেষেণ জ্ঞানী পামরতোঽধিকঃ |
ইমং মে নাথ সন্দেহং নিবর্তয়িতুমর্হসি || ৩||
ভগবানুবাচ
অভিন্নো বিষয়ী যস্য স্বরূপান্মনুজর্ষভ |
ব্যাপারবিষয়ৌ ভাতস্তস্যাভিন্নৌ স্বরূপতঃ || ৫||
ভেদভাসে বিজানাতি জ্ঞান্যভেদং তি তাত্ত্বিকম্ |
ভেদাভাসবশং গৎবা পামরস্তু বিভিদ্যতে || ৬||
কপাল্যুবাচ
নাথ যস্মিন্নিমে ভেদ ভাসন্তে ত্রিপুটীময়াঃ |
শক্তিমদ্বা স্বরূপং তদুতাহো শক্তিবর্জিতম্ || ৭||
ভগবানুবাচ
বৎস যস্মিন্নিমে ভেদা ভাসন্তে ত্রিপুটীময়াঃ |
সর্বশক্তং স্বরূপং তদাহুর্বেদান্তবেদিনঃ || ৮||
কপাল্যুবাচ
ঈশ্বরস্য তু যা শক্তির্গীতা বেদান্তবেদিভিঃ |
অস্তি বা চলনং তস্যমাহোস্বিন্নাথ নাস্তি বা || ৯||
ভগবানুবাচ
শক্তেস্সঞ্চলনাদেব লোকানাং তাত সম্ভবঃ |
চলনস্যাশ্রয়ো বস্তু ন সঞ্চলতি কর্হিচিৎ || ১০||
অচলস্য তু যচ্ছক্তশ্চলনং লোককারণম্ |
তামোবাচক্ষতে মায়ামনির্বাচ্যাং বিপশ্চিতঃ || ১১||
চঞ্চলৎবং বিষয়িণো যথার্থমিব ভাসতে |
চলনং ন নরশ্রেষ্ঠ স্বরূপস্য তু বস্তুতঃ || ১২||
ঈশ্বরস্য চ শক্তেশ্চ ভেদো দৃষ্তিনিমিত্তকঃ |
মিথুনং ৎবিদমেকং স্যাদ্দৃষ্টিশ্চেদুপসংহৃতা || ১৩||
কপাল্যুবাচ
ব্যাপার ঈশ্বরস্যায়ং দৃশ্যব্রহ্মাণ্ডকোটিকৃৎ |
নিত্যঃ কিমথবাঽনিত্যো ভগবান্বক্তুমর্হতি || ১৪||
ভগবানুবাচ
নিজয়া পরয়া শক্ত্যা চলন্নপ্যচলঃ পরঃ |
কেবলং মুনিসংবেদ্যং রহস্যমিদমুত্তমম্ || ১৫||
চলৎবমেব ব্যাপারো ব্যাপারশ্শক্তিরুচ্যতে |
শক্ত্যা সর্বমিদং দৃশ্যং সসর্জ পরমঃ পুমান্ || ১৬||
ব্যাপারস্তু প্রবৃতিশ্চ নিবৃত্তিরিতি চ দ্বিধা |
নিবৃরিস্থা যত্র সর্বমাত্মৈবাভূদিতি শ্রুতিঃ || ১৭||
নানাৎবং দ্বৈতকালস্থং গম্যতে সর্বমিত্যতঃ |
অভূদিতি পদেনাত্র ব্যাপারঃ কোঽপি গম্যতে || ১৮||
আত্মৈবেতি বিনির্দেশদ্বিশেষাণাং সমং ততঃ |
আত্মন্যেবোপসংহারস্তজ্জাতানাং প্রকীর্তিতঃ || ১৯||
বিনা শক্তিং নরশ্রেষ্ঠ স্বরূপং ন প্রতীয়তে |
ব্যাপার আশ্রয়শ্চেতি দ্বিনামা শক্তিরুচ্যতে || ২০||
ব্যাপারো বিশ্বসর্গাদিকার্যমুক্তং মনীষিভিঃ |
আশ্রয়ো দ্বিপদাং শ্রেষ্ঠ স্বরূপান্নাতিরিচ্যতে || ২১||
স্বরূপমন্যসাপেক্ষং নৈব সর্বাত্মকৎবতঃ |
শক্তিং বৃত্তিং স্বরূপং চ য এবং বেদ বেদ সঃ || ২২||
বৃত্তেরভাবে তু সতো নানাভাবো ন সিধ্যতি |
সত্তা শক্ত্যতিরিক্ত্তা চেদ্ বৃতের্নৈব সমুদ্ভবঃ || ২৩||
যদি কালেন ভবিতা জগতঃ প্রলয়ো মহান্ |
অভেদেন স্বরূপেঽযং ব্যাপারো লীনবদ্ভবেৎ || ২৪||
সর্বোপি ব্যবহারোঽযং ন ভবেচ্ছক্তিমন্তরা |
ন সৃষ্টির্নাপি বিজ্ঞানং যদেতৎ ত্রিপুটীময়ম্ || ২৫||
স্বরুপমাশ্রয়ৎবেন ব্যাপারস্সর্গকর্মণা |
নামভ্যামুচ্যতে দ্বাভ্যাং শক্তিরেকা পরাৎপরা || ২৬||
লক্ষণং চলনং যেষাং শক্তেস্তেষাং তদাশ্রয়ঃ |
যৎ কিঞ্চিৎপরমং বস্তু ব্যক্তব্যং স্যান্নরর্ষভ || ২৭||
তদেকং পরমং বস্তু শক্তিমেকে প্রচক্ষতে |
স্বরুপং কেঽপি বিদ্বাংসো ব্রহ্মান্যে পুরুষং পরে || ২৮||
বৎস সত্যং দ্বিধা গম্যং লক্ষণেন চ বস্তুতঃ |
লক্ষণেনোচ্যতে সত্যং বস্তুতস্ত্বনুভূয়তে || ২৯||
তস্মাৎস্বরূপবিজ্ঞানং ব্যাপারেণ চ বস্তুতঃ |
তাটস্থ্যেন চ সাক্ষাচ্চ দ্বিবিধং সম্প্রচক্ষতে || ৩০||
স্বরুপমাশ্রয়ং প্রাহুর্ব্যাপারং তাত লক্ষণম্ |
বৃত্যা বিজ্ঞায় তন্মূলমাশ্রয়ে প্রতিতিষ্ঠতি || ৩১||
স্বরূপং লক্ষণোপেতং লক্ষণং চ স্বরুপবৎ |
তাদাত্ম্যেনৈব সম্বন্ধস্ত্বনয়োস্সম্প্রকীর্তিতঃ || ৩২||
তটস্থলক্ষণেনৈবং ব্যাপারাখ্যেন মারিষ |
যতো লক্ষ্যং স্বরূপং স্যান্নিত্যব্যাপারবত্ততঃ || ৩৩||
ব্যাপারো বস্তুনো নান্যো যদি পশ্যসি তত্ত্বতঃ |
ইদং তু ভেদবিজ্ঞানং সর্বং কাল্পনিকং মতম্ || ৩৪||
শক্ত্যুল্লাসাহ্যয়া সেয়ং সৃষ্টিঃ স্যাদীশকল্পনা |
কল্পনেয়মতীত চেৎ স্বরূপমবশিষ্যতে || ৩৫||
|| ইতি শ্রীরমণগীতাসু ব্রহ্মবিদ্যায়াং যোগশাস্ত্রে রমণান্তেবাসিনো
বাসিষ্ঠস্য গণপতেরুপনিবন্ধে শক্তিবিচারো
নাম দ্বাদশোঽধ্যায়ঃ || ১২

অথ ত্রয়োদশোঽধ্যায়ঃ | (সংন্যাসে স্ত্রীপুরুষয়োস্তুল্যাধিকারনিরূপণম্)

অত্রিণামন্বয়জ্যোৎস্না বসিষ্ঠানাং কুলস্নুষা |
মহাদেবস্য জননী ধীরস্য ব্রহ্মবেদিনঃ || ১||
প্রতিমানং পুরন্ধ্রীণাং লোকসেবাব্রতে স্থিতা |
বিভ্রাণা মহতীং বিদ্যাং ব্রহ্মাদিবিবুধস্তুতাম্ || ২||
দক্ষিণে বিন্ধ্যতশ্শ্ক্তেস্তারিণ্যা আদিমা গুরুঃ |
তপস্সখী মে দয়িতা বিশালাক্ষী যশস্বিনী || ৩||
প্রশ্নদ্বয়েন রমণাহ্যয়ং বিশ্বহিতং মুনিম্ |
অভ্যগচ্ছদদুষ্টাঙ্গী নিক্ষিপ্তেন মুখে মম || ৪||
আত্মস্থিতানাং নারীণামস্তি চেৎপ্রতিবন্ধকম্ |
গৃহত্যাগেন হংসীৎবং কিমু স্যাচ্ছাস্ত্রসম্মতম্ || ৫||
জীবন্ত্যা এব মুক্তায়া দেহপাতো ভবেদ্যদি |
দহনং বা সমাধির্বা কার্যং যুক্তমনন্তরম্ || ৬||
প্রশ্নদ্বয়মিদং শ্রুৎবা ভগবানৃষিসত্তমঃ |
অবোচন্নির্ণয়ং তত্র সর্বশাস্ত্রার্থতত্ত্ববিৎ || ৭||
স্বরূপে বর্তমানানাং পক্বানাং যোষিতামপি |
নিবৃত্তৎবান্নিষেধস্য হংসীৎবং নৈব দুষ্যতি || ৮||
মুক্তৎবস্যাবিশিষ্টৎবদ্বোধস্য চ বধূরপি |
জীবন্মুক্তা ন দাহ্যা স্যাৎ তদ্দেহো হি সুরালয়ঃ || ৯||
যে দোষো দেহদহনে পুংসো মুক্তস্য সংস্মৃতাঃ |
মুক্তায়াস্সন্তি তে সর্বে দেহদাহে চ যোষিতঃ || ১০||
একবিংশেঽহ্নি গীতোঽভূদয়মর্থো মনীষিণা |
অধিকৃত্য জ্ঞানবতীং রমণেন মহর্ষিণা || ১১||
|| ইতি শ্রীরমণগীতাসু ব্রহ্মবিদ্যায়াং যোগশাস্ত্রে রমণান্তেবাসিনো
বাসিষ্ঠস্য গণপতেরুপনিবন্ধে সংন্যাসে স্ত্রীপুরুষয়োস্তুল্যাধিকারনিরূপণং
নাম ত্রয়োদশোঽধ্যায়ঃ || ১৩

অথ চতুর্দশোঽধ্যায়ঃ | (জীবন্মুক্তিবিচারঃ)

নিশায়ামেকবিংশেঽহ্নি ভারদ্বাজি বিদাং বরঃ |
প্রাজ্ঞশ্শিবকুলোপাধির্বৈদর্ভো বদতাং বরঃ || ১||
জীবনমুক্তিং সমুদ্দিশ্য মহর্ষি পরিপৃষ্টবান্ |
অথ সর্বেষু শৃণ্বৎসু মহর্ষির্বাক্যমব্রবিৎ || ২||
শাস্ত্রীয়ৈর্লোকিকৈশ্চাপি প্রত্যয়ৈরবিচালিতা |
স্বরূপে সুদৃঢা নিষ্ঠা জীবন্মুক্তিরুদাহৃতা || ৩||
মুক্তিরেকবিধৈব স্যাৎপ্রজ্ঞানস্যাবিশেষতঃ |
শরীরস্থং মুক্তবন্ধং জীবন্মুক্তং প্রচক্ষতে || ৪||
ব্রহ্মলোকগতো মুক্তশ্শ্রূয়তে নিগমেষু যঃ |
অনুভূতৌ ন ভেদোঽস্তি জীবন্মুক্তস্য তস্য চ || ৫||
প্রাণাঃ সমবলীয়ন্তে যস্যাত্রৈব মহাত্মনঃ |
তস্যাপ্যনুভবো বিদ্বন্নেতয়োরুভয়োরিব || ৬||
সাম্যাৎস্বরূপনিষ্ঠায়া বন্ধহানেশ্চ সাম্যতঃ |
মুক্তিরেকবিধৈব স্যাদ্ভেদস্তু পরবুদ্ধিগঃ || ৭||
মুক্তো ভবতি জীবন্যো মাহাত্মাত্মনি সংস্থিতঃ |
প্রাণাঃ সমবলীয়ন্তে তস্যৈবাত্র নরর্ষভ || ৮||
জীবন্মুক্তস্য কালেন তপসঃ পরিপাকতঃ |
স্পর্শাভাবোঽপি সিদ্ধঃ স্যাদ্রূপে সত্যপি কুত্রচিৎ || ৯||
ভূয়শ্চ পরিপাকেন রূপাভাবোঽপি সিদ্ধ্যতি |
কেবলং চিন্ময়ো ভূৎবা স সিদ্ধো বিহরিষ্যতি || ১০||
শরীরসংশ্রয়ং সিদ্ধ্যোর্দ্বয়মেতন্নরোত্তম |
অল্পেনাপি চ কালেন দেবতানুগ্রহাদ্ভবেৎ || ১১||
ভেদমেতং পুরস্কৃত্য তারতম্যং ন সম্পদি |
দেহবানশরীরো বা মুক্ত আত্মনি সংস্থিতঃ || ১২||
নাডীদ্বারার্চিরোদ্যেন মার্গেণোর্ধ্বগতির্নরঃ |
তত্রোৎপন্নেন বোধেন সদ্যো মুক্তো ভবিষ্যতি || ১৩||
উপাসকস্য সুতরাং পক্বচিত্তস্য যোগিনঃ |
ঈশ্বরানুগ্রহাৎপ্রোক্তা নাডীদ্বারোত্তমা গতিঃ || ১৪||
সর্বেষু কামচারোঽস্য লোকেষু পরিকীর্তিতঃ |
ইচ্ছয়াঽনেকদেহানাং গ্রহণং চাপ্যনুগ্রহঃ || ১৫||
কৈলাশং কেঽপি মুক্তানাং লোকমাহুর্মনীষিণঃ |
একে বদন্তি বৈকুণ্ঠং পরে ৎবাদিত্যমণ্ডলম্ || ১৬||
মুক্তলোকাশ্চ তে সর্বে বিদ্বন্ভূম্যাদিলোকবৎ |
চিত্রবৈভবয়া শক্ত্যা স্বরুপে পরিকল্পিতাঃ || ১৭||
|| ইতি শ্রীরমণগীতাসু ব্রহ্মবিদ্যায়াং যোগশাস্ত্রে রমণান্তেবাসিনো
বাসিষ্ঠস্য গণপতেরুপনিবন্ধে জীবন্মুক্তিবিচারো
নাম চতুর্দশোঽধ্যায়ঃ || ১৪

অথ পঞ্চদশোঽধ্যায়ঃ | (শ্রবণমনননিদিধ্যাসননিরূপণম্)

শ্রবণং নাম কিং নাথ মননং নাম কিং মতম্ |
কিং বা মুনিকুলশ্রেষ্ঠ নিদিধ্যাসনমুচ্যতে || ১||
ইত্যেবং ভগবান্পৃষ্টো ময়া ব্রহ্মবিদাং বরঃ |
দ্বাবিংশে দিবসে প্রাতরব্রবীচ্ছিষ্যসংসদি || ২||
বেদশীর্ষস্থবাক্যানামর্থব্যাখ্যানপূর্বকম্ |
আচার্যাচ্ছৃবণং কেচিচ্ছৃবণং পরিচক্ষতে || ৩||
অপরে শ্রবণং প্রাহুরাচার্যাদ্বিদিতাত্মনঃ |
গিরাং ভাষাময়ীনাং চ স্বরূপং বোধয়ন্তি যাঃ || ৪||
শ্রুৎবা বেদান্তবাক্যানি নিজবাক্যানি বা গুরোঃ |
জন্মান্তরীয়পুণ্যেন জ্ঞাৎবা বোভয়মন্তরা || ৫||
অহম্প্রত্যয়মূলং ৎবং শরীরাদের্বিলক্ষণঃ |
ইতীদং শ্রবণং চিত্তাচ্ছৃবণং বস্তুতো ভবেৎ || ৬||
বদন্তি মননং কেচিচ্ছাস্ত্রাত্রর্থস্য বিচারণম্ |
বস্তুতো মননং তাত স্বরুপস্য বিচারণম্ || ৭||
বিপর্যাসেন রহিতং সংশয়েন চ মানদ |
কৈশ্চিদ্ব্রহ্মাত্মবিজ্ঞানং নিদিধ্যাসনমুচ্যতে || ৮||
বিপর্যাসেন রহিতং সংশয়েন চ যদ্যপি |
শাস্ত্রীয়মৈক্যবিজ্ঞানং কেবলং নানুভূতয়ে || ৯||
সংশয়শ্চ বিপর্যাসো নিবার্যেতে উভাবপি |
অনুভূত্যৈব বাসিষ্ঠ ন শাস্ত্রশতকৈরপি || ১০||
শাস্ত্রং শ্রদ্ধাবতো হন্যাৎ সংশয়ং চ বিপর্যয়ম্ |
শ্রদ্ধায়াঃ কিঞ্চিদূনৎবে পুনরভ্যুদয়স্তয়োঃ || ১১||
মূলচ্ছেদস্তু বাসিষ্ঠ স্বরুপানুভবে তয়োঃ |
স্বরুপে সংস্থিতিস্তস্মান্নিদিধ্যাসনমুচ্যতে || ১২||
বহিস্সঞ্চরতস্তাত স্বরুপে সংস্থিতিং বিনা |
অপরোক্ষো ভবেদ্বোধো ন শাস্ত্রশতচর্চয়া || ১৩||
স্বরুপসংস্থিতিঃ স্যাচ্চেৎ সহজা কুণ্ডিনর্ষভ |
সা মুক্তিঃ সা পরা নিষ্ঠা স সাক্ষাৎকার ঈরিতঃ || ১৪||
|| ইতি শ্রীরমণগীতাসু ব্রহ্মবিদ্যায়াং যোগশাস্ত্রে রমণান্তেবাসিনো
বাসিষ্ঠস্য গণপতেরুপনিবন্ধে শ্রবণমনননিদিধ্যাসন নিরূপণং
নাম পঞ্চদশোঽধ্যায়ঃ || ১৫

অথ ষোডশোঽধ্যায়ঃ | (ভক্তিবিচারঃ)

অথ ভক্তিং সমুদ্দিশ্য পৃষ্টঃ পুরুষসত্তমঃ |
অভাষত মহাভাগো ভগবান্ রমণো মুনিঃ || ১||
আত্মা প্রিয়ঃ সমস্তস্য প্রিয়ং নেতরদাত্মনঃ |
অচ্ছিন্না তৈলধারাবৎ প্রীতির্ভক্তিরুদাহৃতা || ২||
অভিন্নং স্বাত্মনঃ প্রীত্যা বিজানাতীশ্বরং কবিঃ |
জানন্নপ্যপরো ভিন্নং লীন আত্মনি তিষ্ঠতি || ৩||
বহন্তী তৈলধারাবদ্যা প্রীতিঃ পরমেশ্বরে |
অনিচ্ছতোঽপি সা বুদ্ধিং স্বরুপং নয়তি ধ্রুবম্ || ৪||
পরিচ্ছিন্নং যদাত্মানং স্বল্পজ্ঞং চাপি মন্যতে |
ভক্তো বিষয়িরূপেণ তদা ক্লেশনিবৃত্তয়ে || ৫||
ব্যাপকং পরমং বস্তু ভজতে দেবতাধিয়া |
ভজংশ্চ দেবতাবুদ্ধ্যা তদেবান্তে সমশ্নুতে || ৬||
দেবতায়া নরশ্রেষ্ঠ নামরূপপ্রকল্পনাৎ |
তাভ্যাং তু নামরূপাভ্যাং নামরুপে বিজেষ্যতে || ৭||
ভক্তৌ তু পরিপূর্ণায়মলং শ্রবণমেকদা |
জ্ঞানায় পরিপূর্ণায় তদা ভক্তিঃ প্রকল্পতে || ৮||
ধারাব্যপেতা যা ভক্তিঃ সা বিচ্ছিন্নেতি কীর্ত্যতে |
ভক্তেঃ পরস্য সা হেতুর্ভবতীতি বিনির্ণয়ঃ || ৯||
কামায় ভক্তিং কুর্বাণঃ কামং প্রাপ্যাপ্যনিবৃতঃ |
শাশ্বতায় সুখস্যান্তে ভজতে পুনরীশ্বরম্ || ১০||
ভক্তিঃ কামসমেতাঽপি কামাপ্তৌ ন নিবর্ততে |
শ্রদ্ধা বৃদ্ধা পরে পুংসি ভূয় এবাভির্বর্ধতে || ১১||
বর্ধমানা চ সা ভক্তিঃ কালে পূর্ণা ভবিষ্যতি |
পূর্ণয়া পরয়া ভক্ত্যা জ্ঞানেনেব ভবং তরেৎ || ১২||
|| ইতি শ্রীরমণগীতাসু ব্রহ্মবিদ্যায়াং যোগশাস্ত্রে রমণান্তেবাসিনো
বাসিষ্ঠস্য গণপতেরুপনিবন্ধে ভক্তিবিচারঃ
নাম ষোডশোঽধ্যায়ঃ || ১৬

অথ সপ্তদশোঽধ্যায়ঃ | (জ্ঞানপ্রাপ্তিবিচারঃ)

পঞ্চবিংশে তু দিবসে বৈদর্ভো বিদুষং বরঃ |
প্রশ্রয়ানবতো ভূৎবা মুনিং ভূয়োঽপি পৃষ্টবান্ || ১||
বৈদর্ভ উবাচ
ক্রমেণায়াতি কিং জ্ঞানং কিঞ্চিৎকিঞ্চিদ্দিনে দিনে |
একস্মিন্নেব কালে কিং পূর্ণমাভাতি ভানুবৎ || ২||
ভগবানুবাচ
ক্রমেণায়াতি ন জ্ঞানং কিঞ্চিৎকিঞ্চিদ্দিনে দিনে |
অভ্যাসপরিপাকেন ভাসতে পূর্ণমেকদা || ৩||
বৈদর্ভ উবাচ
অভ্যাসকালে ভগবন্ বৃত্তিরন্তর্বহিস্তথা |
যাতায়াতং প্রকুর্বাণা যাতে কিং জ্ঞানমুচ্যতে || ৪||
ভগবানুবাচ
অন্তর্যাতা মতির্বিদ্বন্বহিরায়াতি চেৎপুনঃ |
অভ্যাসমেব তামাহুর্জ্ঞানং হ্যনুভবোঽচ্যুতঃ || ৫||
বৈদর্ভ উবাচ
জ্ঞানস্য মুনিশার্দূল ভূমিকাঃ কাশ্চিদীরিতাঃ |
শাস্ত্রেষু বিদুষাং শ্রেষ্ঠৈঃ কথং তাসাং সমন্বয়ঃ || ৬||
ভগবানুবাচ
শাস্ত্রোক্তা ভূমিকাস্সর্বা ভবন্তি পরবুদ্ধিগাঃ |
মুক্তিভেদা ইব প্রাজ্ঞ জ্ঞানমেকং প্রজানতাম্ || ৭||
চর্যাং দেহেন্দ্রিয়াদীনাং বীক্ষ্যাব্ধানুসারিণীম্ |
কল্পয়ন্তি পরে ভূমিস্তারতম্যং ন বস্তুতঃ || ৮||
বৈদর্ভ উবাচ
প্রজ্ঞানমেকদা সিদ্ধং সর্বাজ্ঞাননিবর্হণম্ |
তিরোধতে কিমজ্ঞানাৎসঙ্গাদঙ্কুরিতাৎপুনঃ || ৯||
ভগবানুবাচ
অজ্ঞানস্য প্রতিদ্বন্দি ন পরাভূয়তে পুনঃ |
প্রজ্ঞানমেকদা সিদ্ধং ভরদ্বাজকুলোদ্বহ || ১০||
|| ইতি শ্রীরমণগীতাসু ব্রহ্মবিদ্যায়াং যোগশাস্ত্রে রমণান্তেবাসিনো
বাসিষ্ঠস্য গণপতেরুপনিবন্ধে জ্ঞানপ্রাপ্তিবিচারো
নাম সপ্তদশোঽধ্যায়ঃ || ১৭

অথ অষ্টাদশোঽধ্যায়ঃ | (সিদ্ধমহিমানুকীর্তনম্)

বরপরাশরগোত্রসমুদ্ভবং বসুমতীসুরসঙ্ঘয়শস্করম্ |
বিমলসুন্দরপণ্ডিতনন্দনং কমলপত্রবিশালবিলোচনম্ || ১||
অরুণশৈলগতাশ্রমবাসিনং পরমহংসমনঞ্জনমচ্যুতম্ |
করুণয়া দধতং ব্যবহারিতাং সততমাত্মনি সংস্থিতমক্ষরে || ২||
অখিলসংশয়বারণভাষণং ভ্রমমদদ্বিরদাঙ্কুশবীক্ষণম্ |
অবিরতং পরসৌখ্যধৃতোদ্যমং নিজতনূবিষয়েষ্বলসালসম্ || ৩||
পরিণতাম্রফলপ্রভবিগ্রহং চলতরেন্দ্রিয়নিগ্রহসগ্রহম্ |
অমৃতচিদ্ধনবল্লিপরিগ্রহং মিতবচোরচিতাগমসঙ্গ্রহম্ || ৪||
অমলদিপ্ততরাত্মমরীচিভির্নিজকরৈরিব পঙ্কজবান্ধবম্ |
পদজুষাং জডভাবমনেহসা পরিহরন্তমনন্তগুণাকরম্ || ৫||
মৃদুতমং বচনে দৃশি শীতলং বিকসিতং বদনে সরসীরুহে |
মনসি শূন্যমহশ্শশিসন্নিভে হৃদি লসন্তমনন্ত ইবারুণম্ || ৬||
অদয়মাত্মতনৌ কঠিনং ব্রতে প্রুষচিত্তমলং বিষয়ব্রজে |
ঋষিমরোষমপেতমনোরথং ধৃতমদং ঘনচিল্লহরীবশাৎ || ৭||
বিগতমোহমলোভমভবনং শমিতমৎসরমুৎসবিনং সদা |
ভবমহোদধিতারণকর্মণি প্রতিফলেন বিনৈব সদোদ্যতম্ || ৮||
মাতামমেতি নগরাজসুতোরুপীঠং
নাগাননে ভজতি যাহি পিতা মমেতি |
অঙ্কং হরস্য সমবাপ্য শিরস্যনেন
সঞ্চুম্বিতস্য গিরিন্ধ্রকৃতো বিভূতিম্ || ৯||
বেদাদিপাকদমনোত্তরকচ্ছপেশৈ-
র্যুক্তৈর্ধরাধরসুষুপ্ত্যমরেশ্বরৈশ্চ |
সূক্ষ্মামৃতায়ুগমৃতেন সহ প্রণত্যা
সম্পন্নশব্দপটলস্য রহস্যমর্থম্ || ১০||
দণ্ডং বিনৈব যতিনং বত দণ্ডপাণিং
দুঃখাব্ধিতারকমরিং বত তারকস্য |
ত্যক্ত্বা ভবং ভবমহো সততং ভজন্তং
হংসং তথাপি গতমানসসঙ্গরাগম্ || ১১||
ধীরৎবসম্পদি সুবর্ণগিরেরনূনং
বারন্নিরোধেধিকমেব গভিরতায়াম্ |
ক্ষান্তৌ জয়ন্তমচলামখিলস্য ধাত্রীং
দান্তৌ নির্দশনমশন্তিকথাদবিষ্ঠম্ || ১২||
নীলারবিন্দসুহৃদা সদৃশং প্রসাদে
তুল্যং তথা মহসি তোয়জবান্ধবেন |
ব্রাহ্ম্যাং স্থিতৌ তু পিতরং বটমূলবাসং
সংস্মারয়ন্তমচলন্তমনূদিতং মে || ১৩||
যস্যাধুনাপি রমণী রমণীয়ভাবা
গির্বাণলোকপৃতনা শুভবৃত্তিরূপা |
সংশোভতে শিরসি নাপি মনোজগন্ধ-
স্তত্তাদৃশং গৃহিণমপ্যধিপং যতীনাম্ || ১৪||
বন্দারুলোকবরদং নরদন্তিনোঽপি
মন্ত্রেশ্বরস্য মহতো গুরুতাং বহন্তম্ |
মন্দারবৃক্ষমিব সর্বজনস্য পাদ-
চ্ছায়াং শ্রিতস্য পরিতাপমপাহরন্তম্ || ১৫||
যস্তন্ত্রবার্তিকমনেকবিচিত্রয়ুক্তি-
সংশোভিতং নিগমজীবনমাততান |
ভুস্য তস্য বুধসংহতিসংস্তুতস্য
বেষান্তরং তু নিগমানতবচো বিচারি || ১৬||
বেদশীর্ষচয়সারসঙ্গ্রহং পঞ্চরত্নমরুণাচলস্য যঃ |
গুপ্তমল্পমপি সর্বতোমুখং সূত্রভূতমতনোদিমং গুরুম্ || ১৭||
দেববাচি সুতরামশিক্ষিতং কাব্যগন্ধরহিতং চ যদ্যপি |
গ্রন্থক্রমণি তথাঽপি সস্ফুরদ্ভাষিতানুচরভাবসঞ্চয়ম্ || ১৮||
লোকমাতৃকুচদুগ্ধপায়িনশ্শঙ্করস্তবকৃতো মহাকবেঃ |
দ্রাবিডদ্বিজশিশোর্নটদ্গিরো ভূমিকান্তরমপারমেধসম্ || ১৯||
ভূতলে ৎবিহ তৃতিয়মুদ্ভবং ক্রৌঞ্চভূমিধররন্ধ্রকারিণঃ |
ব্রহ্মনিষ্ঠিতদশাপ্রদর্শনাদ্যুক্তিবাদতিমিরস্য শান্তয়ে || ২০||
কুম্ভয়োনিমুখমৌনিপূজিতে দ্রাবিডে বচসি বিশ্রুতং কবিম্ |
দৃষ্টবন্তমজরং পরং মহঃ কেবলং ধিষণয়া গুরুং বিনা || ২১||
বালকেঽপি জডগোপকেঽপি ব বানরেঽপি শুনি বা খলেঽপি বা |
পণ্ডিতেঽপি পদসংশ্রিতেঽপি বা পক্ষপাতরহিতং সমেক্ষণম্ || ২২||
শক্তিমন্তমপি শান্তিসংযুতং ভক্তিমন্তমপি ভেদবর্জিতম্ |
বীতরাগমপি লোকবৎসলং দেবতাংশমপি নম্রচেষ্টিতম্ || ২৩||
এষ যামি পিতুরন্তিকং মমান্বেষণং তু ন বিধীয়তামিতি |
সংবিলিখ্য গৃহতো বিনির্গতং শোণশৈলচরণং সমাগতম্ || ২৪||
ঈদৃশং গুণগণৈরভিরামং প্রশ্রয়েণ রমণং ভগবন্তম্ |
সিদ্ধলোকমহিমানমপারং পৃষ্টবানমৃতনাথয়তীন্দ্রঃ || ২৫||
আহ তং স ভগবানগবাসী সিদ্ধলোকমহিমা তু দুরূহঃ |
তে শিবেন সদৃশাঃ শিবরূপাঃ শক্রুবন্তি চ বরাণ্যপি দাতুম্ || ২৬||
|| ইতি শ্রীরমণগীতাসু ব্রহ্মবিদ্যায়াং যোগশাস্ত্রে রমণান্তেবাসিনো
বাসিষ্ঠস্য গণপতেরুপনিবন্ধে সিদ্ধমহিমানুকীর্তনং
নাম অষ্টাদশোঽধ্যায়ঃ || ১৮
|| ইতি শ্রীরমণগীতা সমাপ্তা ||

|| অত্রেমে ভবন্ত্যুপসংহারশ্লোকাঃ ||
দ্বিতীয়ে তু দ্বিতীয়েঽত্র শ্লোকো গ্রন্থে স্বয়ং মুনেঃ |
দ্বিতীয়াধ্যায়গাঃ শ্লোকা অন্যেমেতং বিবৃণ্বতে || ১||
ইতরত্র তু সর্বত্র প্রশ্নার্থঃ প্রশ্নকারিণঃ |
উত্তরার্থো ভগবতঃ শ্লোকবন্ধো মম স্বয়ম্ || ২||
অয়ং গণপতের্গ্রন্থমালায়ামুজ্জ্বলো মণিঃ |
গুরোঃ সরস্বতী যত্র বিশুদ্ধে প্রতিবিম্বিতা || ৩||

|| গ্রন্থপ্রশংসা ||
গলন্তি গঙ্গেয়ং বিমলতরগীতৈব মহতো
নগাধীশাচ্ছ্রিমদ্রমণমুনিরূপাজ্জনিমতি |
পথো বাণীরূপাদ্গণপতিকবের্ভক্তহৃদয়ং
সমুদ্রং সংযাতি প্রবলমলহারিণ্যনুপদম্ ||
—প্রণবানন্দঃ

|| শ্রীরমণগীতাপ্রকাশপীঠিকা ||
ঈশ্বরঃ সর্বভূতানমেকোঽসৌ হৃদয়াশ্রয়ঃ |
স আত্মা সা পরা দৃষ্টিস্তদন্যন্নাস্তি কিঞ্চন || ১||
সা বিয়োগাসহা শক্তিরেকা শক্তস্য জগ্রতি |
দৃশ্যব্রহ্মাণ্ডকোটিনাং ভাতি জন্মাদি বিভ্রতী || ২||
যমিয়ং বৃণুতে দৃষ্টির্মার্জারীব নিজং শিশুম্ |
স তামন্বেষতে পোতঃ কপিঃ স্বামিব মাতরম্ || ৩||
জয়তি স ভগ্বান্রমণো বাক্পতিরাচার্যগণপতির্জয়তি |
অস্য চ বাণী ভগ্বদ্ -রমণীয়ার্থানুবর্তিনী জয়তি || ৪||
—কপালি শাস্ত্রী

|| শ্রীরমণাঞ্জলীঃ ||
অরুণাদ্রিতটে দিশো বসানং
পরিতঃ পুণ্যভুবঃ পুনঃ পুনানম্ |
রমণাখ্যামহো মহো বিশেষং
জয়তি ধ্বান্তহরং নরাত্মবেষম্ || ১||
চরিতেন নরানরেষু তুল্যং
মহসাং পুঞ্জমিদং বিদামমূল্যম্ |
দুরিতাপহমাশ্রিতেষু ভাস্বৎ-
করুণামূর্তিবরং মহর্ষিমাহুঃ || ২||
জ্বলিতেন তপঃপ্রভাবভূম্না
কবলিকৃত্য জগদ্বিহস্য ধাম্না |
বিলসন্ ভগবান্ মহর্ষিরস্ম-
ৎপরমাচার্যপুমান্ হরৎবধং নঃ || ৩||
প্রথমং পুরুষং তমীশমেকে
পুরুষাণাং বিদুরুত্তমং তথাঽন্যে |
সরসীজভবাণ্ডমণ্ডলানা-
মপরে মধ্যমামনন্তি সন্তঃ || ৪||
পুরুষত্রিয়তেঽপি ভাসমানং
যমহন্ধিমলিনো ন বেদ জন্তুঃ |
অজহত্তমখণ্ডমেষ নৄণাং
নিজবৃত্তেন নিদর্শনায় ভাতি || ৫||
মৃদুলো হসিতেন মন্দমন্দং
দুরবেক্ষঃ প্রবলো দৃশা জ্বলন্ত্যা |
বিপুলো হৃদয়েন বিশ্বভোক্ত্রা
গহনো মৌনগৃহিতয়া চ বৃত্ত্যা || ৬||
গুরুরাট্ কিমু শঙ্করোঽযমন্যঃ
কিমু বা শঙ্করসম্ভবঃ কুমারঃ |
কিমু কুণ্ডিনজঃ স এব বালঃ
কিমু বা সংহৃতশক্তিরেষ শম্ভুঃ || ৭||
বহুধেতি বিকল্পনায় বিদুভি
র্বহুভাগস্তব মৌনিনো বিলাশঃ |
হৃদয়েষু তু নঃ সদাঽবিকল্পং
রমণ ৎবং রমসে গুরো গুরূণাম্ || ৮||

ঔপচ্ছন্দসিকৈরেতৈর্বন্ধং নীতঃ স্তবাঞ্জলিঃ |
উপহারায়তামেষ মহর্ষিচরণাব্জয়োঃ || ১||
গুণোঽত্র রমণে ভক্তিঃ কৃতবিত্ত চ শাশ্বতী |
রম্যো রমণনাম্নোঽযং ধ্বনিশ্চ হৃদয়ঙ্গমঃ || ২||
মহর্ষের্মৌনিরাজস্য যশোগানমলঙ্কৃতিঃ |
তদয়ং ধ্বন্যকঙ্কারগুণৈরেবং নবোজ্জ্বলঃ || ৩||
রমণস্য পদাম্ভোজস্মরণং হৃদয়ঙ্গমম্ |
ইক্ষুখণ্ডরসাস্বাদে কো বা ভৃতিমপেক্ষতাম্ || ৪||
অয়ং রমণপাদাব্জকিঙ্করস্যাপি কিঙ্কৃতা |
কাব্যকন্ঠমুনেরন্তেবাসিনা বাগ্বিলাসিনা || ৫||
রমণাঙ্ধ্রিসরোজাতরসজ্ঞেন কপালিনা |
ভারদ্বাজেন ভক্তেন রচিতো রমণাঞ্জলিঃ || ৬||