দেবীগীতা

 || দেবীগীতা ||

|| শ্রী গণেশায় নমঃ ||
|| ওঁ নমঃ শ্রী দেব্যৈ ||
অথ শ্রীমদ্দেবীগীতা প্রারভ্যতে |
প্রথমোঽধ্যায়ঃ |
হিমালয় উবাচ –
যোগং চ ভক্তিসহিতং জ্ঞানং চ শ্রুতিসংমতম্ |
বদস্ব পরমেশানি ৎবমেবাহং যতো ভবেঃ ||
ব্যাস উবাচ –
ইতি তস্য বচঃ শ্রুৎবা প্রসন্নমুখপংকজা |
বক্তুমারভতাম্বা সা রহস্যং শ্রুতিগূহিতম্||
শৃণ্বন্তু নির্জরাঃ সর্বে ব্যাহরন্ত্যা বচো মম |
যস্য শ্রবণমাত্রেণ মদ্রূপৎবং প্রপদ্যতে || ১||
অহমেবাস পূর্বং মে নান্যৎকিংচিন্নগাধিপ |
তদাত্মরূপং চিৎসংবিৎপরব্রহ্মৈকনামকম্ || ২||
অপ্রতর্ক্যমনির্দেশ্যমনৌপম্যমনাময়ম্ |
তস্য কাচিৎস্বতঃসিদ্ধা শক্তির্মায়েতি বিশ্রুতা || ৩||
ন সতী সা নাসতী সা নোভয়াত্মা বিরোধতঃ |
এতদ্বিলক্ষণা কাচিদ্বস্তুভূতাঽস্তি সর্বদা || ৪||
পাবকস্যোষ্ণতেবেয়মুষ্ণাংশোরিব দীধিতিঃ |
চন্দ্রস্য চন্দ্রিকেবেয়ং মমেয়ং সহজা ধ্রুবা || ৫||
তস্যাং কর্মাণি জীবানাং জীবাঃ কালাশ্চ সংচরে |
অভেদেন বিলীনাঃ স্যুঃ সুষুপ্তৌ ব্যবহারবৎ || ৬||
স্বশক্তেশ্চ সমায়োগাদহং বীজাত্মতাং গতা |
স্বধারাবরণাত্তস্যা দোষৎবং চ সমাগতম্ || ৭||
চৈতন্যস্য সমায়োগান্নিমিত্তৎবং চ কথ্যতে |
প্রপংচপরিণামাচ্চ সমবায়িৎবমুচ্যতে || ৮||
কেচিত্তাং তপ ইত্যাহুস্তমঃ কেচিজ্জডং পরে |
জ্ঞানং মায়া প্রধানং চ প্রকৃতিং শক্তিমপ্যজাম্ || ৯||
বিমর্শ ইতি তাং প্রাহুঃ শৈবশাস্ত্রবিশারদাঃ |
অবিদ্যামিতরে প্রাহুর্বেদতত্ত্বার্থচিন্তকাঃ || ১০||
এবং নানাবিধানি স্যুর্নামানি নিগমাদিষু |
তস্যাজডৎবং দৃশ্যৎবাজ্জ্ঞাননাশাত্ততোঽসতী || ১১||
চৈতন্যস্য ন দৃশ্যৎবং দৃশ্যৎবে জডমেব তৎ |
স্বপ্রকাশং চ চৈতন্যং ন পরেণ প্রকাশিতম্ || ১২||
অনবস্থাদোষসত্ত্বান্ন স্বেনাপি প্রকাশিতম্ |
কর্মকর্তৃবিরোধঃ স্যাত্তস্মাত্তদ্দীপবৎস্বয়ম্ || ১৩||
প্রকাশমানমন্যেষাং ভাসকং বিদ্ধি পর্বত |
অত এব চ নিত্যৎবং সিদ্ধং সংবিত্তনোর্মম || ১৪||
জাগ্রৎস্বপ্নসুষুপ্ত্যাদৌ দৃশ্যস্য ব্যভিচারতঃ |
সংবিদো ব্যভিচারশ্চ নানুভূতোঽস্তি কর্হিচিৎ || ১৫||
যদি তস্যাপ্যনুভবতর্হ্যয়ং যেন সাক্ষিণা |
অনুভূতঃ স এবাত্র শিষ্টঃ সংবিদ্বপুঃ পুরা || ১৬||
অত এব চ নিত্যৎবং প্রোক্তং সচ্ছাস্ত্রকোবিদঃ |
আনন্দরূপতা চাস্যাঃ পরপ্রেমাস্পদৎবতঃ || ১৭||
মা ন ভূবং হি ভূয়াসমিতি প্রেমাত্মনি স্থিতম্ |
সর্বস্যান্যস্য মিথ্যাৎবাদসংগৎবং স্ফুটং মম || ১৮||
অপরিচ্ছিন্নতাপ্যেবমত এব মতা মম |
তচ্চ জ্ঞানং নাত্মধর্মো ধর্মৎবে জডতাঽঽত্মনঃ || ১৯||
জ্ঞানস্য জডশেষৎবং ন দৃষ্টং ন চ সম্ভবি |
চিদ্ধর্মৎবং তথা নাস্তি চিতশ্চিন্ন হি ভিদ্যতে || ২০||
তস্মাদাত্মা জ্ঞানরূপঃ সুখরূপশ্চ সর্বদা |
সত্যঃ পূর্ণোঽপ্যসংগশ্চ দ্বৈতজালবিবর্জিতঃ || ২১||
স পুনঃ কামকর্মাদিয়ুক্তয়া স্বীয়মায়য়া |
পূর্বানুভূতসংস্কারাৎকালকর্মবিপাকতঃ || ২২||
অবিবেকাচ্চ তত্ত্বস্য সিসৃক্ষাবান্প্রজায়তে |
অবুদ্ধিপূর্বঃ সর্গোঽযং কথিতস্তে নগাধিপ || ২৩||
এতদ্ধি যন্ময়া প্রোক্তং মম রূপমলৌকিকম্ |
অব্যাকৃতং তদব্যক্তং মায়াশবলমিত্যপি || ২৪||
প্রোচ্যতে সর্বশাস্ত্রেষু সর্বকারণকারণম্ |
তত্ত্বানামাদিভূতং চ সচ্চিদানন্দবিগ্রহম্ || ২৫||
সর্বকর্মঘনীভূতমিচ্ছাজ্ঞানক্রিয়াশ্রয়ম্ |
হ্রীংকারমন্ত্রবাচ্যং তদাদিতত্ত্বং তদুচ্যতে || ২৬||
তস্মাদাকাশ উৎপন্নঃ শব্দতন্মাত্ররূপকঃ |
ভবেৎস্পর্শাত্মকো বায়ুস্তেজো রূপাত্মকং পুনঃ || ২৭||
জলং রসাত্মকং পশ্চাত্ততো গন্ধাত্মিকা ধরা |
শব্দৈকগুণ আকাশো বায়ুঃ স্পর্শরবান্বিতঃ || ২৮||
শব্দস্পর্শরূপগুণং তেজ ইত্যুচ্যতে বুধৈঃ |
শব্দস্পর্শরূপরসৈরাপো বেদগুণাঃ স্মৃতাঃ || ২৯||
শব্দস্পর্শরূপরসগন্ধৈঃ পংচগুণা ধরা |
তেভ্যোঽভবন্মহৎসূত্রং যল্লিংগং পরিচক্ষতে || ৩০||
সর্বাত্মকং তৎসম্প্রোক্তং সূক্ষ্মদেহোঽযমাত্মনঃ |
অব্যক্তং কারণো দেহঃ স চোক্তঃ পূর্বমেব হি || ৩১||
যস্মিঞ্জগদ্বীজরূপং স্থিতং লিংগোদ্ভবো যতঃ |
ততঃ স্থূলানি ভূতানি পংচীকরণমার্গতঃ || ৩২||
পংচ সংখ্যানি জায়ন্তে তৎপ্রকারস্ত্বথোচ্যতে |
পূর্বোক্তানি চ ভূতানি প্রত্যেকং বিভজেদ্দ্বিধা || ৩৩||
একৈকং ভাগমেকস্য চতুর্ধা বিভজেদ্গিরে |
স্বস্বেতরদ্বিতীয়াংশে যোজনাৎপংচ পংচ তে|| ৩৪||
তৎকার্যং চ বিরাড্ দেহঃ স্থূলদেহোঽযমাত্মনঃ |
পংচভূতস্থসত্ত্বাংশৈঃ শ্রোত্রাদীনাং সমুদ্ভবঃ || ৩৫||
জ্ঞানেন্দ্রিয়াণাং রাজেন্দ্র প্রত্যেকং মীলিতৈস্তু তৈঃ |
অন্তঃকরণমেকং স্যাদ্বৃত্তিভেদাচ্চতুর্বিধম্ || ৩৬||
যদা তু সংকল্পবিকল্পকৃত্যং
তদা ভবেত্তন্মন ইত্যভিখ্যম্ |
স্যাদ্বুদ্ধিসঞ্জ্ঞং চ যদা প্রবেত্তি
সুনিশ্চিতং সংশয়হীনরূপম্ || ৩৭||
অনুসন্ধানরূপং তচ্চিত্তং চ পরিকীর্তিতম্ |
অহংকৃত্যাঽঽত্মবৃত্যা তু তদহংকারতাং গতম্ || ৩৮||
তেষাং রজোংঽশৈর্জাতানি ক্রমাৎকর্মেন্দ্রিয়াণি চ |
প্রত্যেকং মীলিতৈস্তৈস্তু প্রাণো ভবতি পংচধা || ৩৯||
হৃদি প্রাণো গুদেঽপানো নাভিস্থস্তু সমানকঃ |
কণ্ঠদেশেপ্যুদানঃ স্যাদ্ব্যানঃ সর্বশরীরগঃ || ৪০||
জ্ঞানেন্দ্রিয়াণি পংচৈব পংচ কর্মেন্দ্রিয়াণি চ |
প্রাণাদি পংচকং চৈব ধিয়া চ সহিতং মনঃ || ৪১||
এতৎসূক্ষ্মশরীরং স্যান্মম লিংগং যদুচ্যতে |
তত্র যা প্রকৃতিঃ প্রোক্তা সা রাজন্বিবিধা স্মৃতা || ৪২||
সত্ত্বাত্মিকা তু মায়া স্যাদবিদ্যা গুণমিশ্রিতা |
স্বাশ্রয়ং যা তু সংরক্ষেৎসা মায়েতি নিগদ্যতে || ৪৩||
তস্যাং যৎপ্রতিবিম্বং স্যাদ্বিম্বভূতস্য চেশিতুঃ |
স ঈশ্বরঃ সমাখ্যাতঃ স্বাশ্রয়জ্ঞানবান্ পরঃ || ৪৪||
সর্বজ্ঞঃ সর্বকর্তা চ সর্বানুগ্রহকারকঃ |
অবিদ্যায়াং তু যৎকিংচিৎপ্রতিবিম্বং নগাধিপ || ৪৫||
জ্ঞানেন্দ্রিয়াণি পংচৈব পংচ কর্মেন্দ্রিয়াণি চ |
প্রাণাদি পংচকং চৈব ধিয়া চ সহিতং মনঃ || ৪১||
এতৎসূক্ষ্মশরীরং স্যান্মম লিংগং যদুচ্যতে |
তত্র যা প্রকৃতিঃ প্রোক্তা সা রাজন্বিবিধা স্মৃতা || ৪২||
সত্ত্বাত্মিকা তু মায়া স্যাদবিদ্যা গুণমিশ্রিতা |
স্বাশ্রয়ং যা তু সংরক্ষেৎসা মায়েতি নিগদ্যতে || ৪৩||
তস্যাং যৎপ্রতিবিম্বং স্যাদ্বিম্বভূতস্য চেশিতুঃ |
স ঈশ্বরঃ সমাখ্যাতঃ স্বাশ্রয়জ্ঞানবান্ পরঃ || ৪৪||
সর্বজ্ঞঃ সর্বকর্তা চ সর্বানুগ্রহকারকঃ |
অবিদ্যায়াং তু যৎকিংচিৎপ্রতিবিম্বং নগাধিপ || ৪৫||
তদেব জীবসঞ্জ্ঞং স্যাৎসর্বদুঃখাশ্রয়ং পুনঃ |
দ্বয়োরপীহ সম্প্রোক্তং দেহত্রয়মবিদ্যয়া || ৪৬||
দেহত্রয়াভিমানাচ্চাপ্যভূন্নামত্রয়ং পুনঃ |
প্রাজ্ঞস্তু কারণাত্মা স্যাৎসূক্ষ্মধী তু তৈজসঃ || ৪৭||
স্থূলদেহী তু বিশ্বাখ্যস্ত্রিবিধঃ পরিকীর্তিতঃ |
এবমীশোঽপি সম্প্রোক্ত ঈশসূত্রবিরাট্পদৈঃ || ৪৮||
প্রথমো ব্যষ্টিরূপস্তু সমষ্ট্যাত্মা পরঃ স্মৃতঃ |
স হি সর্বেশ্বরঃ সাক্ষাজ্জীবানুগ্রহকাম্যয়া || ৪৯||
করোতি বিবিধং বিশ্বং নানাভোগাশ্রয়ং পুনঃ |
মচ্ছক্তিপ্রেরিতো নিত্যং ময়ি রাজন্প্রকল্পিতঃ || ৫০||
ইতি শ্রীদেবীভাগবতে দেবীগীতায়াং প্রথমোঽধ্যায়ঃ ||

|| অথ দ্বিতীয়োঽধ্যায়ঃ ||
দেব্যুবাচ –
মন্মায়াশক্তিসঙ্ক্লৃপ্তঞ্জগৎসর্বং চরাচরম্ |
সাপি মত্তঃ পৃথঙ্ মায়া নাস্ত্যেব পরমার্থতঃ || ১||
ব্যবহারদৃশা সেয়ং মায়াঽবিদ্যেতি বিশ্রুতা |
তত্ত্বদৃষ্ট্যা তু নাস্ত্যেব তত্ত্বমেবাস্তি কেবলম্ || ২||
সাহং সর্বং জগৎসৃষ্ট্বা তদন্তঃ প্রবিশাম্যহম্ |
মায়া কর্মাদিসহিতা গিরে প্রাণপুরঃসরা || ৩||
লোকান্তরগতির্নো চেৎকথং স্যাদিতি হেতুনা |
যথা যথা ভবন্ত্যেব মায়াভেদাস্তথা তথা || ৪||
উপাধিভেদাদ্ভিন্নাঽহং ঘটাকাশাদয়ো যথা |
উচ্চনীচাদি বস্তূনি ভাসয়ন্ভাস্করঃ সদা || ৫ ||
ন দুষ্যতি তথৈবাহং দোষৈর্লিপ্তা কদাপি ন |
ময়ি বুদ্ধ্যাদিকর্তৃৎবমধ্যস্যৈবাপরে জনাঃ || ৬||
বদন্তি চাত্মা কর্তেতি বিমূঢা ন সুবুদ্ধয়ঃ |
অজ্ঞানভেদতস্তদ্বন্মায়ায়া ভেদতস্তথা || ৭||
জীবেশ্বরবিভাগশ্চ কল্পিতো মায়য়ৈব তু |
ঘটাকাশমহাকাশবিভাগঃ কল্পিতো যথা || ৮||
তথৈব কল্পিতো ভেদো জীবাত্মপরমাত্মনোঃ |
যথা জীববহুৎবং চ মায়য়ৈব ন চ স্বতঃ || ৯||
তথেশ্বরবহুৎবং চ মায়য়া ন স্বভাবতঃ |
দেহেন্দ্রিয়াদিসংঘাতবাসনাভেদভেদিতা || ১০||
অবিদ্যা জীবভেদস্য হেতুর্নান্যঃ প্রকীর্তিতঃ |
গুণানাং বাসনাভেদভেদিতা যা ধরাধর || ১১||
মায়া সা পরভেদস্য হেতুর্নান্যঃ কদাচন |
ময়ি সর্বমিদং প্রোতমোতং চ ধরণীধর || ১২||
ঈশ্বরোঽহং চ সূত্রাত্মা বিরাডাত্মাঽহমস্মি চ |
ব্রহ্মাঽহং বিষ্ণুরুদ্রৌ চ গৌরী ব্রাহ্মী চ বৈষ্ণবী || ১৩||
সূর্যোঽহং তারকাশ্চাহং তারকেশস্তথাস্ম্যহম্ |
পশুপক্ষিস্বরূপাঽহং চাণ্ডালোঽহং চ তস্করঃ || ১৪||
ব্যাধোঽহং ক্রূরকর্মাঽহং সৎকর্মোঽহং মহাজনঃ |
স্ত্রীপুন্নপুংসকাকারোঽপ্যহমেব ন সংশয়ঃ || ১৫||
যচ্চ কিংচিৎক্বচিদ্বস্তু দৃশ্যতে শ্রূয়তেঽপি বা |
অন্তর্বহিশ্চ তৎসর্বং ব্যাপ্যাহং সর্বদা স্থিতা || ১৬||
ন তদস্তি ময়া ত্যক্তং বস্তু কিংচিচ্চরাচরম্ |
যদ্যস্তি চেত্তচ্ছূন্যং স্যাদ্বন্ধ্যাপুত্রোপমং হি তৎ || ১৭||
রজ্জুর্যথা সর্পমালাভেদৈরেকা বিভাতি হি |
তথৈবেশাদিরূপেণ ভাম্যহং নাত্র সংশয়ঃ || ১৮||
অধিষ্ঠানাতিরেকেণ কল্পিতং তন্ন ভাসতে |
তস্মান্মৎসত্তয়ৈবৈতৎসত্তাবন্নান্যথা ভবেৎ || ১৯||
হিমালয় উবাচ –
যথা বদসি দেবেশি সমষ্ট্যাঽঽত্মবপুস্ত্বিদম্ |
তথৈব দ্রষ্টুমিচ্ছামি যদি দেবি কৃপা ময়ি || ২০||
ব্যাস উবাচ –
ইতি তস্য বচঃ শ্রুৎবা সর্বে দেবাঃ সবিষ্ণবঃ |
ননন্দুর্মুদিতাত্মানঃ পূজয়ন্তশ্চ তদ্বচঃ || ২১||
অথ দেবমতং জ্ঞাৎবা ভক্তকামদুঘা শিবা |
অদর্শয়ন্নিজং রূপং ভক্তকামপ্রপূরিণী || ২২||
অপশ্যংস্তে মহাদেব্যা বিরাডরূপং পরাৎপরম্ |
দ্যৌর্মস্তকং ভবেদ্যস্য চন্দ্রসূর্যৌ চ চক্ষুষী || ২৩||
দিশঃ শ্রোত্রে বচো বেদাঃ প্রাণো বায়ুঃ প্রকীর্তিতঃ |
বিশ্বং হৃদয়মিত্যাহুঃ পৃথিবী জঘনং স্মৃতম্ || ২৪||
নভস্তলং নাভিসরো জ্যোতিশ্চক্রমুরস্থলম্ |
মহর্লোকস্তু গ্রীবা স্যাজ্জনো লোকো মুখং স্মৃতম্ || ২৫||
তপো লোকো ররাটিস্তু সত্যলোকাদধঃ স্থিতঃ |
ইন্দ্রাদয়ো বাহবঃ স্যুঃ শব্দঃ শ্রোত্রং মহেশিতুঃ || ২৬||
নাসত্যদস্রৌ নাসে স্তৌ গন্ধো ঘ্রাণং স্মৃতো বুধৈঃ |
মুখমগ্নিঃ সমাখ্যাতো দিবারাত্রী চ পক্ষ্মণী || ২৭||
ব্রহ্মস্থানং ভ্রূবিজৃম্ভোঽপ্যাপস্তালুঃ প্রকীর্তিতাঃ |
রসো জিহ্বা সমাখ্যাতা যমো দংষ্ট্রাঃ প্রকীর্তিতাঃ || ২৮||
দন্তাঃ স্নেহকলা যস্য হাসো মায়া প্রকীর্তিতা |
সর্গস্ত্বপাংগমোক্ষঃ স্যাদ্ব্রীডোর্ধ্বোষ্ঠো মহেশিতুঃ || ২৯||
লোভঃ স্যাদধরোষ্ঠোঽস্যা ধর্মমার্গস্তু পৃষ্ঠভূঃ |
প্রজাপতিশ্চ মেঢ্রং স্যাদ্যঃ স্রষ্টা জগতীতলে || ৩০||
কুক্ষিঃ সমুদ্রা গিরয়োঽস্থীনি দেব্যা মহেশিতুঃ |
নদ্যো নাড্যঃ সমাখ্যাতা বৃক্ষাঃ কেশাঃ প্রকীর্তিতাঃ || ৩১||
কৌমারয়ৌবনজরাবয়োঽস্য গতিরুত্তমা |
বলাহকাস্তু কেশাঃ স্যুঃ সন্ধ্যে তে বাসসী বিভোঃ || ৩২||
রাজঞ্ছ্রীজগদম্বায়াশ্চন্দ্রমাস্তু মনঃ স্মৃতঃ |
বিজ্ঞানশক্তিস্তু হরী রুদ্রোন্তঃকরণং স্মৃতম্ || ৩৩||
অশ্বাদিজাতয়ঃ সর্বাঃ শ্রোণিদেশে স্থিতা বিভোঃ |
অতলাদিমহালোকাঃ কট্যধোভাগতাং গতাঃ || ৩৪||
এতাদৃশং মহারূপং দদৃশুঃ সুরপুংগবাঃ |
জ্বালামালাসহস্রাঢ্যং লেলিহানং চ জিহ্বয়া || ৩৫||
দংষ্ট্রাকটকটারাবং বমন্তং বহ্নিমক্ষিভিঃ |
নানায়ুধধরং বীরং ব্রহ্মক্ষত্রৌদনং চ যৎ || ৩৬||
সহস্রশীর্ষনয়নং সহস্রচরণং তথা |
কোটিসূর্যপ্রতীকাশং বিদ্যুৎকোটিসমপ্রভম্ || ৩৭||
ভয়ংকরং মহাঘোরং হৃদক্ষ্ণোস্ত্রাসকারকম্ |
দদৃশুস্তে সুরাঃ সর্বে হাহাকারং চ চক্রিরে || ৩৮||
বিকম্পমানহৃদয়া মূর্চ্ছামাপুর্দুরত্যয়াম্ |
স্মরণং চ গতং তেষাং জগদম্বেয়মিত্যপি || ৩৯||
অথ তে যে স্থিতা বেদাশ্চতুর্দিক্ষু মহাবিভোঃ |
বোধয়ামাসুরত্যুগ্রং মূর্চ্ছাতো মূর্চ্ছিতান্সুরান্ || ৪০||
অথ তে ধৈর্যমালম্ব্য লব্ধ্বা চ শ্রুতিমুত্তমাম্ |
প্রেমাশ্রুপূর্ণনয়না রুদ্ধকণ্ঠাস্তু নির্জরাঃ || ৪১||
বাষ্পগদ্গদদয়া বাচা স্তোতুং সমুপচক্রিরে |
দেবা ঊচুঃ –
অপরাধং ক্ষমস্বাম্ব পাহি দীনাংস্ত্বদুদ্ভবান্ || ৪২||
কোপং সংহর দেবেশি সভয়া রূপদর্শনাৎ |
কা তে স্তুতিঃ প্রকর্তব্যা পামরৈর্নিজরৈরিহ || ৪৩||
স্বস্যাপ্যজ্ঞেয় এবাসৌ যাবান্যশ্চ স্ববিক্রমঃ |
তদর্বাগ্জায়মানানাং কথং স বিষয়ো ভবেৎ || ৪৪||
নমস্তে ভুবনেশানি নমস্তে প্রণবাত্মকে |
সর্ব বেদান্তসংসিদ্ধে নমো হ্রীংকারমূর্তয়ে || ৪৫||
যস্মাদগ্নিঃ সমুৎপন্নো যস্মাৎসূর্যশ্চ চন্দ্রমাঃ |
যস্মাদোষধয়ঃ সর্বাস্তস্মৈ সর্বাত্মনে নমঃ || ৪৬||
যস্মাচ্চ দেবাঃ সম্ভূতাঃ সাধ্যাঃ পক্ষিণ এব চ |
পশবশ্চ মনুষ্যাশ্চ তস্মৈ সর্বাত্মনে নমঃ || ৪৭||
প্রাণাপানৌ ব্রীহিয়বৌ তপঃ শ্রদ্ধা ঋতং তথা |
ব্রহ্মচর্যং বিধিশ্চৈব যস্মাত্তস্মৈ নমো নমঃ || ৪৮||
সপ্ত প্রাণার্চিষো যস্মাৎসমিধঃ সপ্ত এব চ |
হোমাঃ সপ্ত তথা লোকাস্তস্মৈ সর্বাত্মনে নমঃ || ৪৯||
যস্মাৎসমুদ্রা গিরয়ঃ সিন্ধবঃ প্রচরন্তি চ |
যস্মাদোষধয়ঃ সর্বা রসাস্তস্মৈ নমো নমঃ || ৫০||
যস্মাদ্যজ্ঞঃ সমুদ্ভূতো দীক্ষায়ূপশ্চ দক্ষিণাঃ |
ঋচো যজূংষি সামানি তস্মৈ সর্বাত্মনে নমঃ || ৫১||
নমঃ পুরস্তাৎপৃষ্ঠে চ নমস্তে পার্শ্বয়োর্দ্বয়োঃ |
অধ ঊর্ধ্বং চতুর্দিক্ষু মাতর্ভূয়ো নমো নমঃ || ৫২||
উপসংহর দেবেশি রূপমেতদলৌকিকম্ |
তদেব দর্শয়াস্মাকং রূপং সুন্দরসুন্দরম্ || ৫৩||
ব্যাস উবাচ –
ইতি ভীতান্সুরান্দৃষ্ট্বা জগদম্বা কৃপার্ণবা |
সংহৃত্য রূপং ঘোরং তদ্দর্শয়ামাস সুন্দরম্ || ৫৪||
পাশাংকুশবরাভীতিধরং সর্বাংগকোমলম্ |
করুণাপূর্ণনয়নং মন্দস্মিতমুখাম্বুজম্ || ৫৫||
দৃষ্ট্বা তৎসুন্দরং রূপং তদা ভীতিবিবর্জিতাঃ |
শান্তিচিত্তা প্রণেমুস্তে হর্ষগদ্গদনিঃস্বনাঃ || ৫৬||
|| ইতি শ্রীদেবীভাগবতে দেবীগীতায়াং দ্বিতীয়োঽধ্যায়ঃ ||

|| অথ তৃতীয়োঽধ্যায়ঃ ||
শ্রীদেব্যুবাচ –
ক্ব যূয়ং মংদভাগ্যা বৈ ক্বেদং রূপং মহাদ্ভুতম্ |
তথাপি ভক্তবাৎসল্যাদীদৃশং দর্শিতং ময়া || ১||
ন বেদাধ্যয়নৈর্যোগৈর্ন দানৈস্তপসেজ্যয়া |
রূপং দ্রষ্টুমিদং শক্যং কেবলং মৎকৃপাং বিনা || ২||
প্রকৃতং শৃণু রাজেন্দ্র পরমাত্মাত্র জীবতাম্ |
উপাধিয়োগাৎসম্প্রাপ্তঃ কর্তৃৎবাদিকমপ্যুত || ৩||
ক্রিয়াঃ করোতি বিবিধা ধর্মাধর্মৈকহেতবঃ |
নানায়োনীস্ততঃ প্রাপ্য সুখদুঃখৈশ্চ যুজ্যতে || ৪||
পুনস্তৎসংস্কৃতিবশান্নানাকর্মরতঃ সদা |
নানাদেহান্সমাপ্নোতি সুখদুঃখৈশ্চ যুজ্যতে || ৫||
ঘটীয়ংত্রবদেতস্য ন বিরামঃ কদাপি হি |
অজ্ঞানমেব মূলং স্যাত্ততঃ কামঃ ক্রিয়াস্ততঃ || ৬||
তস্মাদজ্ঞাননাশায় যতেত নিয়তং নরঃ |
এতদ্ধি জন্মসাফল্যং যদজ্ঞানস্য নাশনম্ || ৭||
পুরুষার্থসমাপ্তিশ্চ জীবন্মুক্তিদশাঽপি চ |
অজ্ঞাননাশনে শক্তা বিদ্যৈব তু পটীয়সী || ৮||
ন কর্ম তজ্জং নোপাস্তির্বিরোধাভাবতো গিরে |
প্রত্যুতাশাঽজ্ঞাননাশে কর্মণা নৈব ভাব্যতাম্ || ৯||
অনর্থদানি কর্মাণি পুনঃ পুনরুশন্তি হি |
ততো রাগস্ততো দোষস্ততোঽনর্থো মহান্ভবেৎ || ১০||
তস্মাৎসর্বপ্রয়ত্নেন জ্ঞানং সম্পাদয়েন্নরঃ |
কুর্বন্নেবেহ কর্মাণীত্যতঃ কর্মাপ্যবশ্যকম্ || ১১||
জ্ঞানাদেব হি কৈবল্যমতঃ স্যাত্তৎসমুচ্চয়ঃ |
সহায়তাং ব্রজেৎকর্ম জ্ঞানস্য হিতকারি চ || ১২||
ইতি কেচিদ্বদন্ত্যত্র তদ্বিরোধান্ন সম্ভবেৎ |
জ্ঞানাধৃদ্গ্রন্থিভেদঃ স্যাধৃদ্গ্রন্থৌ কর্মসম্ভবঃ || ১৩||
যৌগপদ্যং ন সম্ভাব্যং বিরোধাত্তু ততস্তয়োঃ |
তমঃপ্রকাশয়োর্যদ্বদ্যৌগপদ্যং ন সম্ভবি || ১৪||
তস্মাৎসর্বাণি কর্মাণি বৈদিকানি মহামতে |
চিত্তশুদ্ধ্যন্তমেব স্যুস্তানি কুর্যাৎপ্রয়ত্নতঃ || ১৫||
শমো দমস্তিতিক্ষা চ বৈরাগ্যং সত্ত্বসম্ভবঃ |
তাবৎপর্যন্তমেব স্যুঃ কর্মাণি ন ততঃ পরম্ || ১৬||
তদন্তে চৈব সংন্যস্য সশ্রয়েদ্গুরুমাত্মবান্ |
শ্রোত্রিয়ং ব্রহ্মনিষ্ঠং চ ভক্ত্যা নির্ব্যাজয়া পুনঃ || ১৭||
বেদান্তশ্রবণং কুর্যান্নিত্যমেবমতন্দ্রিতঃ |
তত্ত্বমস্যাদিবাক্যস্য নিত্যমর্থং বিচারয়েৎ || ১৮||
তত্ত্বমস্যাদিবাক্যং তু জীবব্রহ্মৈক্যবোধকম্ |
ঐক্যে জ্ঞাতে নির্ভয়স্তু মদ্রূপো হি প্রজায়তে || ১৯||
পদার্থাবগতিঃ পূর্বং বাক্যার্থাবগতিস্ততঃ |
তৎপদস্য চ বাচ্যার্থো গিরেঽহং পরিকীর্তিতঃ || ২০||
ৎবম্পদস্য চ বাচ্যার্থো জীব এব ন সংশয়ঃ |
উভয়োরৈক্যমসিনা পদেন প্রোচ্যতে বুধৈঃ || ২১||
বাচ্যার্থয়োর্বিরুদ্ধৎবাদৈক্যং নৈব ঘটেত হ |
লক্ষণাঽতঃ প্রকর্তব্যা তত্ত্বমোঃ শ্রুতিসংস্থয়োঃ || ২২||
চিন্মাত্রং তু তয়োর্লক্ষ্যং তয়োরৈক্যস্য সম্ভবঃ |
তয়োরৈক্যং তথা জ্ঞাৎবা স্বাভেদেনাদ্বয়ো ভবেৎ || ২৩||
দেবদত্তঃ স এবায়মিতিবল্লক্ষণা স্মৃতা |
স্থূলাদিদেহরহিতো ব্রহ্মসম্পদ্যতে নরঃ || ২৪ ||
পংচীকৃতমহাভূতসম্ভূতঃ স্থূলদেহকঃ |
ভোগালয়ো জরাব্যাধিসংযুতঃ সর্বকর্মণাম্ || ২৫||
মিথ্যাভূতোঽযমাভাতি স্ফুটং মায়াময়ৎবতঃ |
সোঽযং স্থূল উপাধিঃ স্যাদাত্মনো মে নগেশ্বর || ২৬||
জ্ঞানকর্মেংদ্রিয়য়ুতং প্রাণপংচকসংযুতম্ |
মনোবুদ্ধিয়ুতং চৈতৎসূক্ষ্মং তৎকবয়ো বিদুঃ || ২৭||
অপংচীকৃতভূতোত্থং সূক্ষ্মদেহোঽযমাত্মনঃ |
দ্বিতীয়োঽযমুপাধিঃ স্যাৎসুখাদেরববোধকঃ || ২৮||
অনাদ্যনির্বাচ্যমিদমজ্ঞানং তু তৃতীয়কঃ |
দেহোঽযমাত্মনো ভাতি কারণাত্মা নগেশ্বর || ২৯||
উপাধিবিলয়ে জাতে কেবলাত্মাঽবশিষ্যতে |
দেহত্রয়ে পংচকোশা অন্তস্থাঃ সন্তি সর্বদা || ৩০||
পংচকোশপরিত্যাগে ব্রহ্মপুচ্ছং হি লভ্যতে |
নেতি নেতীত্যাদিবাক্যৈর্মম রূপং যদুচ্যতে || ৩১||
ন জায়তে ম্রিয়তে বা কদাচি-
ন্নায়ং ভূৎবা ন বভূব কশ্চিৎ |
অজো নিত্যঃ শাশ্বতোঽযং পুরাণো
ন হন্যতে হন্যমানে শরীরে || ৩২||
হন্তা চেন্মন্যতে হন্তুং হতশ্চেন্মন্যতে হতম্ |
উভৌ তৌ ন বিজানীতো নায়ং হন্তি ন হন্যতে || ৩৩||
অণোরণীয়ান্মহতো মহীয়া-
নাত্মাঽস্য জন্তোর্নিহিতো গুহায়াম্ |
তমক্রতুঃ পশ্যতি বীতশোকো
ধাতুপ্রসাদান্মহিমানমস্য || ৩৪||
আত্মানং রথিনং বিদ্ধি শরীরং রথমেব তু |
বুদ্ধিং তু সারথিং বিদ্ধি মনঃ প্রগ্রহমেব চ || ৩৫||
ইন্দ্রিয়াণি হয়ানাহুর্বিষয়াংস্তেষু গোচরান্ |
আত্মেন্দ্রিয়মনোয়ুক্তং ভোক্তেত্যাহুর্মনীষিণঃ || ৩৬||
যস্ত্ববিদ্বান্ভবতি চামনস্কঃ সদাঽশুচিঃ |
স তু তৎপদমবাপ্নোতি সংসারং চাধিগচ্ছতি || ৩৭||
যস্তু বিজ্ঞানবান্ভবতি সমনস্কঃ সদা শুচিঃ |
স তু তৎপদমাপ্নোতি যস্মাদ্ভূয়ো ন জায়তে || ৩৮||
বিজ্ঞানসারথির্যস্তু মনঃ প্রগ্রহবান্নরঃ |
সোঽধ্বনঃ পারমাপ্নোতি মদীয়ং যৎপরং পদম্ || ৩৯||
ইত্থং শ্রুত্যা চ মত্যা চ নিশ্চিত্যাত্মানমাত্মনা |
ভাবয়েন্মামাত্মরূপাং নিদিধ্যাসনতোঽপি চ || ৪০||
যোগবৃত্তেঃ পুরা স্বামিন্ভাবয়েদক্ষরত্রয়ম্ |
দেবীপ্রণবসঞ্জ্ঞস্য ধ্যানার্থং মংত্রবাচ্যয়োঃ || ৪১||
হকারঃ স্থূলদেহঃ স্যাদ্রকারঃ সূক্ষ্মদেহকঃ |
ঈকারঃ কারাণাত্মাঽসৌ হ্রীংকারোঽহং তুরীয়কম্ || ৪২||
এবং সমষ্টিদেহেঽপি জ্ঞাৎবা বীজত্রয়ং ক্রমাৎ |
সমষ্টিব্যষ্ট্যোরেকৎবং ভাবয়েন্মতিমান্নরঃ || ৪৩||
সমাধিকালাৎপূর্বং তু ভাবয়িৎবৈবমাদৃতঃ |
ততো ধ্যায়েন্নিলীনাক্ষো দেবীং মাং জগদীশ্বরীম্ || ৪৪||
প্রাণাপানৌ সমৌ কৃৎবা নাসাভ্যন্তরচারিণৌ |
নিবৃত্তবিষয়াকাংক্ষো বীতদোষো বিমৎসরঃ || ৪৫||
ভক্ত্যা নির্ব্যাজয়া যুক্তো গুহায়াং নিঃস্বনে স্থলে |
হকারং বিশ্বমাত্মানং রকারে প্রবিলাপয়েৎ || ৪৬||
রকারং তৈজসং দেবমীকারে প্রবিলাপয়েৎ |
ঈকারং প্রাজ্ঞয়াত্মানং হ্রীংকারে প্রবিলাপয়েৎ || ৪৭||
বাচ্যবাচকতাহীনং দ্বৈতভাববিবর্জিতম্ |
অখণ্ডং সচ্চিদানন্দং ভাবয়েত্তচ্ছিখান্তরে || ৪৮||
ইতি ধ্যানেন মাং রাজন্সাক্ষাৎকৃত্য নরোত্তমঃ |
মদ্রূপ এব ভবতি দ্বয়োরপ্যেকতা যতঃ || ৪৯||
যোগয়ুক্ত্যাঽনয়া দ্রষ্টা মামাত্মানং পরাৎপরম্ |
অজ্ঞানস্য সকার্যস্য তৎক্ষণে নাশকো ভবেৎ || ৫০||
|| ইতি শ্রীদেবীভাগবতে দেবীগীতায়াং তৃতীয়োঽধ্যায়ঃ ||

|| অথ চতুর্তোঽধ্যায়ঃ ||
হিমালয় উবাচ –
যোগং বদ মহেশানি সাংগ সংবিৎপ্রদায়কম্ |
কৃতেন যেন যোগ্যোঽহং ভবেয়ং তত্ত্বদর্শনে || ১||
শ্রীদেব্যুবাচ –
ন যোগো নভসঃ পৃষ্ঠে ন ভূমৌ ন রসাতলে |
ঐক্যং জীবাত্মনোরাহুর্যোগং যোগবিশারদাঃ || ২||
তৎপ্রত্যূহাঃ ষডাখ্যাতা যোগবিঘ্নকরানঘ |
কামক্রোধৌ লোভমোহৌ মদমাৎসর্যসঞ্জ্ঞকৌ || ৩||
যোগাংগৈরেব ভিত্ত্বা তান্যোগিনো যোগমাপ্নুয়ুঃ |
যমং নিয়মমাসনপ্রাণায়ামৌ ততঃপরম্ || ৪||
প্রত্যাহারং ধারণাখ্যং ধ্যানং সার্ধং সমাধিনা |
অষ্টাঙ্গান্যাহুরেতানি যোগিনাং যোগসাধনে || ৫||
অহিংসা সত্যমস্তেয়ং ব্রহ্মচর্যং দয়াঽঽর্জবম্ |
ক্ষমা ধৃতির্মিতাহারঃ শৌচং চেতি যমা দশ || ৬||
তপঃ সংতোষ আস্তিক্যং দানং দেবস্য পূজনম্ |
সিদ্ধান্তশ্রবণং চৈব হ্রীর্মতিশ্চ জপো হুতম্ || ৭||
দশৈতে নিয়মাঃ প্রোক্তা ময়া পর্বতনায়ক |
পদ্মাসনং স্বস্তিকং চ ভদ্রং বজ্রাসনং তথা || ৮||
বীরাসনমিতি প্রোক্তং ক্রমাদাসনপংচকম্ |
ঊর্বোরুপরি বিন্যস্য সম্যক্পাদতলে শুভে || ৯||
অংগিষ্ঠৌ চ নিবধ্নীয়াদ্ধস্তাভ্যাং ব্যুৎক্রমাত্ততঃ |
পদ্মাসনমিতি প্রোক্তং যোগিনাং হৃদয়ঙ্গমম্ || ১০||
জানূর্বোরন্তরে সম্যক্কৃৎবা পাদতলে শুভে |
ঋজুকায়ো বিশেদ্যোগী স্বস্তিকং তৎপ্রচক্ষতে || ১১||
সীবন্যাঃ পার্শ্বয়োর্ন্যস্য গুল্ফয়ুগ্মং সুনিশ্চিতম্ |
বৃষণাধঃ পাদপার্ষ্ণী পাণিভ্যাং পরিবন্ধয়েৎ || ১২||
ভদ্রাসনমিতি প্রোক্তং যোগিভিঃ পরিপূজিতম্ |
ঊর্বোঃ পাদৌ ক্রমান্ন্যস্য জান্বোঃপ্রত্যঙ্মুখাংগুলী || ১৩||
করৌ বিদধ্যাদাখ্যাতং বজ্রাসনমনুত্তমম্ |
একং পাদমধঃ কৃৎবা বিন্যস্যোরুং তথোত্তরে || ১৪||
ঋজুকায়ো বিশেদ্যোগী বীরাসনমিতীরিতম্ |
ঈডয়াকর্ষয়েদ্বায়ুং বাহ্যং ষোডশমাত্রয়া
ধারয়েৎপূরিতং যোগী চতুঃষষ্ট্যা তু মাত্রয়া || ১৫||
সুষুম্নামধ্যগং সম্য দ্বাত্রিংশন্মাত্রয়া শনৈঃ || ১৬||
নাড্যা পিংগলয়া চৈব রেচয়েদ্যোগবিত্তমঃ |
প্রাণায়ামমিমং প্রাহুর্যোগশাস্ত্রবিশারদাঃ || ১৭||
ভূয়ো ভূয়ঃ ক্রমাত্তস্য বাহ্যমেবং সমাচরেৎ |
মাত্রাবৃদ্ধিঃ ক্রমেণৈব সম্যগ্দ্বাদশ ষোডশ || ১৮||
জপধ্যানাদিভিঃ সার্থং সগর্ভং তং বিদুর্বুধাঃ |
তদপেতং বিগর্ভং চ প্রাণায়ামং পরে বিদুঃ || ১৯||
ক্রমাদভ্যস্যতঃ পুংসো দেহে স্বেদোদ্গমোঽধমঃ |
মধ্যমঃ কম্পসংযুক্তো ভূমিত্যাগঃ পরো মতঃ || ২০||
উত্তমস্য গুণাবাপ্তির্যাবচ্ছীলনমিষ্যতে |
ইন্দ্রিয়াণাং বিচরতাং বিষয়েষু নিরর্গলম্ || ২১||
বলাদাহরণং তেভ্যঃ প্রত্যাহারোঽভিধীয়তে |
অংগুষ্ঠগুল্ফজানূরুমূলাধারলিংগনাভিষু || ২২||
হৃদ্গ্রীবাকংঠদেশেষু লম্বিকায়াং ততো নসি |
ভ্রূমধ্যে মস্তকে মূর্ধ্নি দ্বাদশান্তে যথাবিধি || ২৩||
ধারণং প্রাণমরুতো ধারণেতি নিগদ্যতে |
সমাহিতেন মনসা চৈতন্যান্তরবর্তিনা || ২৪||
আত্মন্যভীষ্টদেবানাং ধ্যানং ধ্যানমিহোচ্যতে |
সমৎবভাবনা নিত্যং জীবাত্মপরমাত্মনোঃ || ২৫||
সমাধির্মাহুর্মুনয়ঃ প্রোক্তমষ্টাংগলক্ষণম্ |
ইদানীং কথয়ে তেঽহং মংত্রয়োগমনুত্তমম্ || ২৬||
বিশ্বং শরীরমিত্যুক্তং পংচভূতাত্মকং নগ |
চন্দ্রসূর্যাগ্নিতেজোভির্জীবব্রহ্মৈক্যরূপকম্ || ২৭||
তিস্রঃ কোট্যস্তদর্ধেন শরীরে নাডয়ো মতাঃ |
তাসু মুখ্যা দশ প্রোক্তাস্তাভ্যস্তিস্রো ব্যবস্থিতাঃ || ২৮||
প্রধানা মেরুদংডেঽত্র চন্দ্রসূর্যাগ্নিরূপিণী |
ইডা বামে স্থিতা নাডী শুভ্রা তু চন্দ্ররূপিণী || ২৯||
শক্তিরূপা তু সা নাডী সাক্ষাদমৃতবিগ্রহা |
দক্ষিণে যা পিংগলাখ্যা পুংরূপা সূর্যবিগ্রহা || ৩০||
সর্বতেজোময়ী সা তু সুষুম্না বহ্নিরূপিণী |
তস্যা মধ্যে বিচিত্রাখ্যে ইচ্ছাজ্ঞানক্রিয়াত্মকম্ || ৩১||
মধ্যে স্বয়ম্ভূলিংগং তু কোটিসূর্যসমপ্রভম্ |
তদূর্ধ্বং মায়াবীজং তু হরাত্মাবিন্দুনাদকম্ || ৩২||
তদূর্ধ্বং তু শিখাকারা কুণ্ডলী রক্তবিগ্রহা |
দেব্যাত্মিকা তু সা প্রোক্তা মদভিন্না নগাধিপ || ৩৩||
তদ্বাহ্যে হেমরূপাভং বাদিসান্তচতুর্দলম্ |
দ্রুতহেমসমপ্রখ্যং পদ্মং তত্র বিচিন্তয়েৎ || ৩৪||
তদূর্ধ্বং ৎবনলপ্রখ্যং ষড্দলং হীরকপ্রভম্ |
বাদিলান্তষড্বর্ণেন স্বাধিষ্ঠানমনুত্তমম্ || ৩৫||
মূলাধার ষট্কোণং মূলাধারং ততো বিদুঃ |
স্বশব্দেন পরং লিংগং স্বাধিষ্ঠানং ততো বিদুঃ || ৩৬||
তদূর্ধ্বং নাভিদেশে তু মণিপূরং মহাপ্রভম্ |
মেঘাভং বিদ্যুদাভং চ বহুতেজোময়ং ততঃ || ৩৭||
মণিবদ্ভিন্নং তৎপদ্মং মণিপদ্মং তথোচ্যতে |
দশভিশ্চ দলৈর্যুক্তং ডাদিফান্তাক্ষরান্বিতম্ || ৩৮||
বিষ্ণুনাঽধিষ্ঠিতং পত্রং বিষ্ণ্বালোকনকারণম্ |
তদূর্ধ্বেঽনাহতং পদ্মমুদ্যদাদিত্যসংনিভম্ || ৩৯||
কাদিঠান্তদলৈরর্কপত্রৈশ্চ সমধিষ্ঠিতম্ |
তন্মধ্যে বাণলিংগং তু সূর্যায়ুতসমপ্রভম্ || ৪০||
শব্দব্রহ্মময়ং শব্দানাহতং তত্র দৃশ্যতে |
অনাহতাখ্যং তৎপদ্মং মুনিভিঃ পরিকীর্তিতম্ || ৪১||
আনন্দসদনং তত্তু পুরুষাধিষ্ঠিতং পরম্ |
তদূর্ধ্বং তু বিশুদ্ধাখ্যং দলষোডশপংকজম্ || ৪২||
স্বরৈঃ ষোডশভির্যুক্তং ধূম্রবর্ণং মহাপ্রভম্ |
বিশুদ্ধং তনুতে যস্মাজ্জীবস্য হংসলোকনাৎ || ৪৩||
বিশুদ্ধং পদ্মমাখ্যাতমাকাশাখ্যং মহাদ্ভুতম্ |
আজ্ঞাচক্রং তদূর্ধ্বে তু আত্মনাঽধিষ্ঠিতং পরম্ || ৪৪||
আজ্ঞাসংক্রমণং তত্র তেনাজ্ঞেতি প্রকীর্তিতম্ |
দ্বিদলং হক্ষসংযুক্তং পদ্মং তৎসুমনোহরম্ || ৪৫||
কৈলাসাখ্যং তদূর্ধ্বং তু রোধিনী তু তদূর্ধ্বতঃ |
এবং ৎবাধারচক্রাণি প্রোক্তানি তব সুব্রত || ৪৬||
সহস্রারয়ুতং বিংদুস্থানং তদূর্ধ্বমীরিতম্ |
ইত্যেতৎকথিতং সর্বং যোগমার্গমনুত্তমম্ || ৪৭||
আদৌ পূরকয়োগেনাপ্যাধারে যোজয়েন্মনঃ |
গুদমেঢ্রান্তরে শক্তিস্তামাকুংচ্য প্রবোধয়েৎ || ৪৮||
লিংগভেদক্রমেণৈব বিংদুচক্রং চ প্রাপয়েৎ |
শম্ভুনা তাং পরাশক্তিমেকীভূতাং বিচিংতয়েৎ || ৪৯||
তত্রোত্থিতামৃতং যত্তু দ্রুতলাক্ষারসোপমম্ |
পায়য়িৎবা তু তাং শক্তিং মায়খ্যাং যোগসিদ্ধিদাম্ || ৫০||
ষট্চক্রদেবতাস্তত্র সংতর্প্যামৃতধারয়া |
আনয়েত্তেন মার্গেণ মূলাধারং ততঃ সুধীঃ || ৫১||
এবমভ্যস্যমানস্যাপ্যহন্যহনি নিশ্চিতম্ |
পূর্বোক্তদূষিতা মংত্রাঃ সর্বে সিধ্যন্তি নান্যথা || ৫২||
জরামরণদুঃখাদ্যৈর্মুচ্যতে ভববংধনাৎ |
যে গুণাঃ সন্তি দেব্যা মে জগন্মাতুর্যথা তথা || ৫৩||
তে গুণাঃ সাধকবরে ভবন্ত্যেব চান্যথা |
ইত্যেবং কথিতং তাত বায়ুধারণমুত্তমম্ || ৫৪||
ইদানীং ধারণাখ্যং তু শৃণুষ্বাবহিতো মম |
দিক্কালাদ্যনবচ্ছিন্নদেব্যাং চেতো বিধায় চ || ৫৫||
তন্ময়ো ভবতি ক্ষিপ্রং জীবব্রহ্মৈক্যয়োজনাৎ |
অথবা সমলং চেতো যদি ক্ষিপ্রং ন সিধ্যতি || ৫৬||
তদাবয়বয়োগেন যোগী যোগান্সমভ্যসেৎ |
মদীয়হস্তপাদাদাবংগে তু মধুরে নগ || ৫৭||
চিত্তং সংস্থাপয়েন্মংত্রী স্থানস্থানজয়াৎপুনঃ |
বিশুদ্ধচিত্তঃ সর্বস্মিন্রূপে সংস্থাপয়েন্মনঃ || ৫৮||
যাবন্মনোলয়ং যাতি দেব্যাং সংবিদি পর্বত |
তাবদিষ্টমিদং মংত্রী জপহোমৈঃ সমভ্যসেৎ || ৫৯||
মন্ত্রাভ্যাসেন যোগেন জ্ঞেয়জ্ঞানায় কল্পতে |
ন যোগেন বিনা মন্ত্রো ন মন্ত্রেণ বিনা হি সঃ || ৬০||
দ্বয়োরভ্যাসয়োগো হি ব্রহ্মসংসিদ্ধিকারণম্ |
তমঃপরিবৃতে গেহে ঘটো দীপেন দৃশ্যতে || ৬১||
এবং মায়াবৃতো হ্যাত্মা মনুনা গোচরীকৃতঃ |
ইতি যোগবিধিঃ কৃৎস্নঃ সাঙ্গঃ প্রোক্তো ময়াঽধুনা || ৬২||
|| ইতি শ্রীদেবীভাগবতে দেবীগীতায়াং চতুর্থোঽধ্যায়ঃ ||

|| অথ পংচমোঽধ্যায়ঃ ||
শ্রীদেব্যুবাচ –
ইত্যাদি যোগয়ুক্তাত্মা ধ্যায়েন্মাং ব্রহ্মরূপিণীম্ |
ভক্ত্যা নির্ব্যাজয়া রাজন্নাসনে সমুপস্থিতঃ || ১||
আবিঃ সন্নিহিতং গুহাচরং নাম মহৎপরম্ |
অত্রৈতৎসর্বমর্পিতমেজৎপ্রাণনিমিষচ্চ যৎ || ২||
এতজ্জানথ সদসদ্বরেণ্যং
বিজ্ঞানাদ্যদ্বরিষ্ঠং প্রজানাম্ |
যদর্চিমদ্যদণুভ্যোঽণু চ
যস্মিংল্লোকা নিহিতা লোকিনশ্চ || ৩||
তদেতদক্ষরং ব্রহ্ম স প্রাণস্তদু বাঙ্ মনঃ |
তদেতৎসত্যমমৃতং তদ্বেদ্ধব্যং সৌম্য বিদ্ধি || ৪||
ধনুর্গৄৎবৌপনিষদং মহাস্ত্রং
শরং হ্যুপাসানিশিতং সন্ধয়ীত |
আয়ম্য তদ্ভাবগতেন চেতসা
লক্ষ্যং তদেবাক্ষরং সৌম্য বিদ্ধি || ৫||
প্রণবো ধনুঃ শরো হ্যাত্মা ব্রহ্মতল্লক্ষ্যমুচ্যতে |
অপ্রমত্তেন বেদ্ধব্যং শরবত্তন্ময়ো ভবেৎ || ৬||
যস্মিন্দ্যৌশ্চ পৃথিবী চান্তরিক্ষ-
মোতং মনঃ সহ প্রাণৈশ্চ সর্বৈঃ |
তমেবৈকং জানথাত্মানমন্যা
বাচো বিমুংচথা অমৃতস্যৈষ সেতুঃ || ৭||
অরা ইব রথনাভৌ সংহতা যত্র নাড্যঃ |
স এষোন্তশ্চরতে বহুধা জায়মানঃ || ৮||
ওমিত্যেবং ধ্যায়থাত্মানং স্বস্তি বঃ পারায় তমসঃ পরস্তাৎ |
দিব্যে ব্রহ্মপুরে ব্যোম্নি আত্মা সম্প্রতিষ্ঠিতঃ || ৯||
মনোময়ঃ প্রাণশরীরনেতা
প্রতিষ্ঠিতোঽন্নে হৃদয়ং সংনিধায় |
তদ্বিজ্ঞানেন পরিপশ্যন্তি ধীরা
আনন্দরূপমমৃতং যদ্বিভাতি || ১০||
ভিদ্যতে হৃদয়গ্রন্থিশ্চ্ছিদ্যন্তে সর্বসংশয়াঃ |
ক্ষীয়ন্তে চাস্য কর্মাণি তস্মিন্দৃষ্টে পরাবরে || ১১||
হিরণ্ময়ে পরে কোশে বিরজং ব্রহ্ম নিষ্কলম্ |
তচ্ছুভ্রং জ্যোতিষাং জ্যোতিস্তদ্যদাত্মবিদো বিদুঃ || ১২||
ন তত্র সূর্যো ভাতি ন চন্দ্রতারকং
নেমা বিদ্যুতো ভান্তি কুতোঽযমগ্নিঃ |
তমেব ভান্তমনুভাতি সর্বং
তস্য ভাসা সর্বমিদং বিভাতি || ১৩||
ব্রহ্মৈবেদমমৃতং পুরস্তাদ্
ব্রহ্ম পশ্চাদ্ ব্রহ্ম দক্ষিণশ্চোত্তরেণ |
অধশ্চোর্ধ্বং প্রসৃতং ব্রহ্ম
এবেদং বিশ্বং বরিষ্ঠম্ || ১৪||
এতাদৃগনুভবো যস্য স কৃতার্থো নরোত্তমঃ |
ব্রহ্মভূতঃ প্রসন্নাত্মা ন শোচতি ন কাঙ্ক্ষতি || ১৫||
দ্বিতীয়াদ্বৈ ভয়ং রজংস্তদভাবাদ্বিভেতি ন |
ন তদ্বিয়োগো মেঽপ্যস্তি মদ্বিয়োগোঽপি তস্য ন || ১৬||
অহমেব স সোঽহং বৈ নিশ্চিতং বিদ্ধি পর্বত |
মদ্দর্শনং তু তত্র স্যাদ্যত্র জ্ঞানী স্থিতো মম || ১৭||
নাহং তীর্থে ন কৈলাসে বৈকুণ্ঠে বা ন কর্হিচিৎ |
বসামি কিংতু মজ্জ্ঞানিহৃদয়াম্ভোজমধ্যমে || ১৮||
মৎপূজাকোটিফলদং সকৃন্মজ্জ্ঞানিনোঽর্চনম্ |
কুলং পবিত্রং তস্যাস্তি জননী কৃতকৃত্যকা || ১৯||
বিশ্বম্ভরা পুণ্যবতী চিল্লয়ো যস্য চেতসঃ |
ব্রহ্মজ্ঞানং তু যৎপৃষ্টং ৎবয়া পর্বতসত্তম || ২০||
কথিতং তন্ময়া সর্বং নাতো বক্তব্যমস্তি হি |
ইদং জ্যেষ্ঠায় পুত্রায় ভক্তিয়ুক্তায় শীলিনে || ২১||
শিষ্যায় চ যথোক্তায় বক্তব্যং নান্যথা ক্বচিৎ |
যস্য দেবে পরা ভক্তির্যথা দেবে তথা গুরৌ || ২২||
তস্যৈতে কথিতা হ্যর্থাঃ প্রকাশন্তে মহাত্মনঃ |
যেনোপদিষ্টা বিদ্যেয়ং স এব পরমেশ্বরঃ || ২৩||
যস্যায়ং সুকৃতং কর্তুমসমর্থস্ততো ঋণী |
পিত্রোরপ্যধিকঃ প্রোক্তো ব্রহ্মজন্মপ্রদায়কঃ || ২৪||
পিতৃজাতং জন্ম নষ্টং নেত্থং জাতং কদাচন |
তস্মৈ ন দ্রুহ্যেদিত্যাদি নিগমোঽপ্যবদন্নগ || ২৫||
তস্মাচ্ছাস্ত্রস্য সিদ্ধান্তো ব্রহ্মদাতা গুরুঃ পরঃ |
শিবে রুষ্টে গুরুস্ত্রাতা গুরৌ রুষ্টে ন শংকরঃ || ২৬||
তস্মাৎসর্বপ্রয়ত্নেন শ্রীগুরুং তোষয়েন্নগ |
কায়েন মনসা বাচা সর্বদা তৎপরো ভবেৎ || ২৭||
অন্যথা তু কৃতঘ্নঃ স্যাৎকৃতঘ্নে নাস্তি নিষ্কৃতিঃ |
ইন্দ্রেণাথর্বণায়োক্তা শিরশ্ছেদপ্রতিজ্ঞয়া || ২৮||
অশ্বিভ্যাং কথনে তস্য শিরশ্ছিন্নং চ বজ্রিণা |
অশ্বীয়ং তচ্ছিরো নষ্টং দৃষ্ট্বা বৈদ্যো সুরোত্তমৌ || ২৯||
পুনঃ সংযোজিতং স্বীয়ং তাভ্যাং মুনিশিরস্তদা |
ইতি সংকটসম্পাদ্যা ব্রহ্মবিদ্যা নগাধিপ |
লব্ধা যেন স ধন্যঃ স্যাৎকৃতকৃত্যশ্চ ভূধর || ৩০||
|| ইতি শ্রীদেবীভাগবতে দেবীগীতায়াং পংচমোঽধ্যায়ঃ ||

|| অথ ষষ্ঠোঽধ্যায়ঃ ||
হিমালয় উবাচ –
স্বীয়াং ভক্তিং বদস্বাম্ব যেন জ্ঞাতং সুখেন হি |
জায়তে মনুজস্যাস্য মধ্যমস্যবিরাগিণঃ || ১||
দেব্যুবাচ –
মার্গাস্ত্রয়ো মে বিখ্যাতা মোক্ষপ্রাপ্তৌ নগাধিপ |
কর্ময়োগো জ্ঞানয়োগো ভক্তিয়োগশ্চ সত্তম || ২||
ত্রয়াণামপ্যয়ং যোগ্যঃ কর্তুং শক্যোঽস্তি সর্বথা |
সুলভৎবান্মানসৎবাৎকায়চিত্তাদ্যপীডনাৎ || ৩||
গুণভেদান্মনুষ্যাণাং সা ভক্তিস্ত্রিবিধা মতা |
পরপীডাং সমুদ্দিশ্য দম্ভং কৃৎবা পুরঃসরম্ || ৩||
মাৎসর্যক্রোধয়ুক্তো যস্তস্য ভক্তিস্তু তামসী |
পরপীডাদিরহিতঃ স্বকল্যাণার্থমেব চ || ৫||
নিত্যং সকামো হৃদয়ে যশোর্থী ভোগলোলুপঃ |
তত্তৎফলসমাবাপ্ত্যৈ মামুপাস্তেঽতিভক্তিতঃ || ৬||
ভেদবুদ্ধ্যা তু মাং স্বস্মাদন্যাং জানাতি পামরঃ |
তস্য ভক্তিঃ সমাখ্যাতা নগাধিপ তু রাজসী || ৭||
পরমেশার্পণং কর্ম পাপসংক্ষালনায় চ |
বেদোক্তৎবাদবশ্যং তৎকর্তব্যং তু ময়ানিশম্ || ৮||
ইতি নিশ্চিতবুদ্ধিস্তু ভেদবুদ্ধিমুপাশ্রিতঃ |
করোতি প্রীয়তে কর্ম ভক্তিঃ সা নগ সাত্ত্বিকী || ৯||
পরভক্তেঃ প্রাপিকেয়ং ভেদবুদ্ধ্যবলম্বনাৎ |
পূর্বপ্রোক্তেত্যুভে ভক্তী ন পরপ্রাপিকে মতে || ১০||
অধুনা পরভক্তিং তু প্রোচ্যমানাং নিবোধ মে |
মদ্গুণশ্রবণং নিত্যং মম নামানুকীর্তনম্ || ১১||
কল্যাণগুণরত্নানামাকরায়াং ময়ি স্থিরম্ |
চেতসো বর্তনং চৈব তৈলধারাসমং সদা || ১২||
হেতুস্তু তত্র কো বাপি ন কদাচিদ্ভবেদপি |
সামীপ্যসার্ষ্টিসায়ুজ্যসলোক্যানাং ন চএষণা || ১৩||
মৎসেবাতোঽধিকং কিংচিন্নৈব জানাতি কর্হিচিৎ |
সেব্যসেবকতাভাবাতত্র মোক্ষং ন বাংছতি || ১৪||
পরানুরক্ত্যা মামেব চিন্তয়েদ্যো হ্যতন্দ্রিতঃ |
স্বাভেদেনৈব মাং নিত্যং জানাতি ন বিভেদতঃ || ১৫||
মদ্রূপৎবেন জীবানাং চিন্তনং কুরুতে তু যঃ |
যথা স্বস্যাত্মনি প্রীতিস্তথৈব চ পরাত্মনি || ১৬||
চৈতন্যস্য সমানৎবান্ন ভেদং কুরুতে তু যঃ |
সর্বত্র বর্তমানাং মাং সর্বরূপাং চ সর্বদা || ১৭||
নমতে যজতে চৈবাপ্যাচাংডালান্তমীশ্বরম্ |
ন কুত্রাপি দ্রোহবুদ্ধিং কুরুতে ভেদবর্জনাৎ || ১৮||
মৎস্থানদর্শনে শ্রদ্ধা মদ্ভক্তদর্শনে তথা |
মচ্ছাস্ত্রশ্রবণে শ্রদ্ধা মংত্রতংত্রাদিষু প্রভো || ১৯||
ময়ি প্রেমাকুলমতী রোমাংচিততনুঃ সদা |
প্রেমাশ্রুজলপূর্ণাক্ষঃ কংঠগদ্গদনিস্বনঃ || ২০||
অনন্যেনৈব ভাবেন পূজয়েদ্যো নগাধিপ |
মামীশ্বরীং জগদ্যোনিং সর্বকারণকারণম্ || ২১||
ব্রতানি মম দিব্যানি নিত্যনৈমিত্তিকান্যপি |
নিত্যং যঃ কুরুতে ভক্ত্যা বিত্তশাঠ্যবিবর্জিতঃ || ২২||
মদুৎস্বদিদৃক্ষা চ মদুৎস্বকৃতিস্তথা |
জায়তে যস্য নিয়তং স্বভাবাদেব ভূধর || ২৩||
উচ্চৈর্গায়ংশ্চ নামানি মমৈব খলু নৃত্যতি |
অহংকারাদিরহিতো দেহতাদাত্ম্যবর্জিতঃ || ২৪||
প্রারব্ধেন যথা যচ্চ ক্রিয়তে তত্তথা ভবেৎ |
ন মে চিন্তাস্তি তত্রাপি দেহসংরক্ষণাদিষু || ২৫||
ইতি ভক্তিস্তু যা প্রোক্তা পরভক্তিস্তু সা স্মৃতা |
যস্যাং দেব্যতিরিক্তং তু ন কিংচিদপি ভাব্যতে || ২৬||
ইত্থং জাতা পরা ভক্তির্যস্য ভূধর তত্ত্বতঃ |
তদৈব তস্য চিন্মাত্রে মদ্রূপে বিলয়ো ভবেৎ || ২৭||
ভক্তেস্তু যা পরা কাষ্ঠা সৈব জ্ঞানং প্রকীর্তিতম্ |
বৈরাগ্যস্য চ সীমা সা জ্ঞানে তদুভয়ং যতঃ || ২৮||
ভক্তৌ কৃতায়াং যস্যাপি প্রারব্ধবশতো নগ |
ন জায়তে মম জ্ঞানং মণিদ্বীপং স গচ্ছতি || ২৯||
তত্র গৎবাঽখিলান্ভোগাননিচ্ছন্নপি চর্চ্ছতি |
তদন্তে মম চিদ্রূপজ্ঞানং সম্যগ্ভবেন্নগ || ৩০||
তেন যুক্তঃ সদৈব স্যাজ্জ্ঞানান্মুক্তির্ন চান্যথা |
ইহৈব যস্য জ্ঞানং স্যাধৃদ্গতপ্রত্যগাত্মনঃ || ৩১||
মম সংবিৎপরতনোস্তস্য প্রাণা ব্রজন্তি ন |
ব্রহ্মৈব সংস্তদাপ্নোতি ব্রহ্মৈব ব্রহ্ম বেদ যঃ || ৩২||
কংঠচামীকরসমমজ্ঞানাত্তু তিরোহিতম্ |
জ্ঞানাদজ্ঞাননাশেন লব্ধমেব হি লভ্যতে || ৩৩||
বিদিতাবিদিতাদন্যন্নগোত্তম বপুর্মম |
যথাঽঽদর্শে যথাঽঽত্মনি যথা জলে তথা পিতৃলোকে || ৩৪||
ছায়াতপৌ তথা স্বচ্ছৌ বিবিক্তৌ তদ্বদেব হি |
মম লোকে ভবেজ্জ্ঞানং দ্বৈতভানবিবর্জিতম্ || ৩৫||
যস্তু বৈরাগ্যবানেব জ্ঞানহীনো ম্রিয়েত চেৎ |
ব্রহ্মলোকে বসেন্নিত্যং যাবৎকল্পং ততঃপরম্ || ৩৬||
শুচীনাং শ্রীমতাং গেহে ভবেত্তস্যা জনিঃ পুনঃ |
করোতি সাধনং পশ্চাত্ততো জ্ঞানং হি জায়তে || ৩৭||
অনেকজন্মভী রাজঞ্জ্ঞানং স্যান্নৈকজন্মনা |
ততঃ সর্বপ্রয়ত্নেন জ্ঞানার্থং যত্নমাশ্রয়েৎ || ৩৮||
নোচেন্মহাবিনাশঃ স্যাজ্জন্মেতদ্দুর্লভং পুনঃ |
তত্রাপি প্রথমে বর্ণে বেদে প্রাপ্তিশ্চ দুর্লভা || ৩৯||
শমাদিষট্কসম্পত্তির্যোগসিদ্ধিস্তথৈব চ |
তথোত্তমগুরুপ্রাপ্তিঃ সর্বমেবাত্র দুর্লভম্ || ৪০||
তথেন্দ্রিয়াণাং পটুতা সংস্কৃতৎবং তনোস্তথা |
অনেকজন্মপুণ্যৈস্তু মোক্ষেচ্ছা জায়তে ততঃ || ৪১||
সাধনে সফলেঽপ্যেবং জায়মানেঽপি যো নরঃ |
জ্ঞানার্থং নৈব যততে তস্য জন্ম নিরর্থকম্ || ৪২||
তস্মাদ্রাজন্যথাশক্ত্যা জ্ঞানার্থং যত্নমাশ্রয়েৎ |
পদে পদেঽশ্বমেধস্য ফলমাপ্নোতি নিশ্চিতম্ || ৪৩||
ঘৃতমিব পয়সি নিগূঢং ভূতে চ বসতি বিজ্ঞানম্ |
সততং মন্থয়িতব্যং মনসা মন্থানভূতেন || ৪৪||
জ্ঞানং লব্ধ্বা কৃতার্থঃ স্যাদিতি বেদান্তদিণ্ডিমঃ |
সর্বমুক্তং সমাসেন কিং ভূয়ঃ শ্রোতুমিচ্ছসি || ৪৫||
|| ইতি শ্রীদেবীভাগবতে দেবীগীতায়াং ষষ্ঠোঽধ্যায়ঃ ||

|| অথ সপ্তমোঽধ্যায়ঃ ||
হিমালয় উবাচ –
কতি স্থানানি দেবেশি দ্রষ্টব্যানি মহীতলে |
মুখ্যানি চ পবিত্রাণি দেবীপ্রিয়তমানি চ || ১||
ব্রতান্যপি তথা যানি তুষ্টিদান্যুৎসবা অপি |
তৎসর্বং বদ মে মাতঃ কৃতকৃত্যো যতো নরঃ || ২||
শ্রীদেব্যুবাচ –
সর্বং দৃশ্যং মম স্থানং সর্বে কালা ব্রতাত্মকাঃ |
উৎসবাঃ সর্বকালেষু যতোঽহং সর্বরূপিণী || ৩||
তথাপি ভক্তবাৎসল্যাৎকিংচিৎকিংচিদথোচ্যতে |
শৃণুষ্বাবহিতো ভূৎবা নগরাজ বচো মম || ৪||
কোলাপুরং মহাস্থানং যত্র লক্ষ্মীঃ সদা স্থিতা |
মাতুঃপুরং দ্বিতীয়ং চ রেণুকাধিষ্ঠিতং পরম্ || ৫||
তুলজাপুরং তৃতীয়ং স্যাৎসপ্তশৃংগং তথৈব চ |
হিংগুলায়াং মহাস্থানং জ্বালামুখ্যাস্তথৈব চ || ৬||
শাকম্ভর্যাঃ পরং স্থানং ভ্রামর্যাঃ স্থানমুত্তমম্ |
শ্রীরক্তদংতিকাস্থানং দুর্গাস্থানং তথৈব চ || ৭||
বিংধ্যাচলনিবাসিন্যাঃ স্থানং সর্বোত্তমোত্তমম্ |
অন্নপূর্ণামহাস্থানং কাংচীপুরমনুত্তমম্ || ৮||
ভীমাদেব্যাঃ পরং স্থানং বিমলাস্থানমেব চ |
শ্রীচংদ্রলামহাস্থানং কৌশিকীস্থানমেব চ || ৯||
নীলাম্বায়াঃ পরং স্থানং নীলপর্বতমস্তকে |
জাম্বূনদেশ্বরীস্থানং তথা শ্রীনগরং শুভম্ || ১০||
গুহ্যকাল্যা মহাস্থানং নেপালে যৎপ্রতিষ্ঠিতম্ |
মীনাক্ষ্যাঃ পরমং স্থানং যচ্চ প্রোক্তং চিদম্বরে || ১১||
বেদারণ্যং মহাস্থানং সুন্দর্যা সমধিষ্ঠিতম্ |
একাম্বরং মহাস্থানং পরশক্ত্যা প্রতিষ্ঠিতম্ || ১২||
মহালসা পরং স্থানং যোগেশ্বর্যাস্তথৈব চ |
তথা নীলসরস্বত্যাঃ স্থানং চীনেষু বিশ্রুতম্ || ১৩||
বৈদ্যনাথে তু বগলাস্থানং সর্বোত্তমং মতম্ |
শ্রীমচ্ছ্রীভুবনেশ্বর্যা মণিদ্বীপং মম স্মৃতম্ || ১৪||
শ্রীমত্ত্রিপুরভৈরব্যাঃ কামাখ্যায়োনিমণ্ডলম্ |
ভূমণ্ডলে ক্ষেত্ররত্নং মহামায়াধিবাসিতম্ || ১৫||
নাতঃ পরতরং স্থানং ক্বচিদস্তি ধরাতলে |
প্রতিমাসং ভবেদ্দেবী যত্র সাক্ষাদ্রজস্বলা || ১৬||
তত্রত্যা দেবতাঃ সর্বাঃ পর্বতাত্মকতাং গতাঃ |
পর্বতেষু বসন্ত্যেব মহত্যো দেবতা অপি || ১৭||
তত্রত্যা পৃথিবী সর্বা দেবীরূপা স্মৃতা বুধৈঃ |
নাতঃ পরতরং স্থানং কামাখ্যায়োনিমণ্ডলাৎ || ১৮||
গায়ত্র্যাশ্চ পরং স্থানং শ্রীমৎপুষ্করমীরিতম্ |
অমরেশে চংডিকা স্যাৎপ্রভাসে পুষ্করেক্ষিণী || ১৯||
নৈমিষে তু মহাস্থানে দেবী সা লিংগধারিণী |
পুরুহূতা পুষ্করাক্ষে আষাঢৌ চ রতিস্তথা || ২০||
চণ্ডমুণ্ডী মহাস্থানে দণ্ডিনী পরমেশ্বরী |
ভারভূতৌ ভবেদ্ভূতির্নাকুলে নকুলেশ্বরী || ২১||
চংদ্রিকা তু হরিশ্চন্দ্রে শ্রীগিরৌ শাংকরী স্মৃতা |
জপ্যেশ্বরে ত্রিশূলা স্যাৎসূক্ষ্মা চাম্রাতকেশ্বরে || ২২||
শাংকরী তু মহাকালে শর্বাণী মধ্যমাভিধে |
কেদারাখ্যে মহাক্ষেত্রে দেবী সা মার্গদায়িনী || ২৩||
ভৈরবাখ্যে ভৈরবী সা গয়ায়াং মংগলা স্মৃতা |
স্থাণুপ্রিয়া কুরুক্ষেত্রে স্বায়ম্ভুব্যপি নাকুলে || ২৪||
কনখলে ভবেদুগ্রা বিশ্বেশা বিমলেশ্বরে |
অট্টহাসে মহানন্দা মহেন্দ্রে তু মহান্তকা || ২৫||
ভীমে ভীমেশ্বরী প্রোক্তা রুদ্রাণী ৎবর্ধকোটিকে || ২৬||
অবিমুক্তে বিশালাক্ষী মহাভাগা মহালয়ে |
গোকর্ণে ভদ্রকর্ণী স্যাদ্ভদ্রা স্যাদ্ভদ্রকর্ণকে || ২৭||
উৎপলাক্ষী সুবর্ণাক্ষে স্থাণ্বীশা স্থাণুসঞ্জ্ঞকে |
কমলালয়ে তু কমলা প্রচণ্ডা ছগলণ্ডকে || ২৮||
কুরণ্ডলে ত্রিসন্ধ্যা স্যান্মাকোটে মুকুটেশ্বরী |
মণ্ডলেশে শাণ্ডকী স্যাৎকালী কালংজরে পুনঃ || ২৯||
শংকুকর্ণে ধ্বনিঃ প্রোক্তা স্থূলা স্যাৎস্থূলকেশ্বরে |
জ্ঞানিনাং হৃদয়াম্ভোজে হৃল্লেখা পরমেশ্বরী || ৩০||
প্রোক্তানীমানি স্থানানি দেব্যাঃ প্রিয়তমানি চ |
তত্তৎক্ষেত্রস্য মাহাত্ম্যং শ্রুৎবা পূর্বং নগোত্তম || ৩১||
তদুক্তেন বিধানেন পশ্চাদ্দেবীং প্রপূজয়েৎ |
অথবা সর্বক্ষেত্রাণি কাশ্যাং সন্তি নগোত্তম || ৩২||
তত্র নিত্যং বসেন্নিত্যং দেবীভক্তিপরায়ণঃ |
তানি স্থানানি সম্পশ্যঞ্জপন্দেবীং নিরন্তরম্ || ৩৩||
ধ্যায়ংস্তচ্চরণাম্ভোজং মুক্তো ভবতি বংধনাৎ |
ইঅমানি দেবীনামানি প্রাতরুত্থায় যঃ পঠেৎ || ৩৪||
ভস্মীভবন্তি পাপানি তৎক্ষণান্নগ সৎবরম্ |
শ্রাদ্ধকালে পঠেদেতান্যমলানি দ্বিজাগ্রতঃ || ৩৫||
প্রতিপক্ষং বিশেষেণ তদ্দেবীপ্রীতিকারকম্ |
সোমবারব্রতং চৈব মমাতিপ্রিয়কৃন্নগ || ৪১||
তত্রাপি দেবীং সম্পূজ্য রাত্রৌ ভোজনমাচরেৎ |
নবরাত্রদ্বয়ং চৈব ব্রতং প্রীতিকরং মম || ৪২||
এবমন্যান্যপি বিভো নিত্যনৈমিত্তিকানি চ |
ব্রতানি কুরুতে যো বৈ মৎপ্রীত্যর্থং বিমৎসরঃ || ৪৩||
প্রাপ্নোতি মম সায়ুজ্যং স মে ভক্তঃ স মে প্রিয়ঃ |
উৎসবানপি কুর্বীত দোলোৎসবমুখান্বিভো || ৪৪||
শয়নোৎসবং তথা কুর্যাত্তথা জাগরণোৎসবম্ |
রথোৎসবং চ মে কুর্যাদ্দমনোৎসবমেব চ || ৪৫||
পবিত্রোৎসবমেবাপি শ্রাবণে প্রীতিকারকম্ |
মম ভক্তঃ সদা কুর্যাদেবমন্যান্মহোৎসবান্ || ৪৬||
মদ্ভক্তান্ভোজয়েৎপ্রীত্যা তথা চৈব সুবাসিনীঃ |
কুমারীবটুকাংশ্চাপি মদ্বুদ্ধ্যা তদ্গতান্তরঃ || ৪৭||
বিত্তশাঠ্যেন রহিতো যজেদেতান্সুমাদিভিঃ |
য এবং কুরুতে ভক্ত্যা প্রতিবর্ষমতন্দ্রিতঃ || ৪৮||
স ধন্যঃ কৃতকৃত্যোঽসৌ মৎপ্রীতেঃ পাত্রমংজসা |
সর্বমুক্তং সমাসেন মম প্রীতিপ্রদায়কম্ |
নাশিষ্যায় প্রদাতব্যং নাভক্তায় কদাচন || ৪৯ ||
|| ইতি শ্রীদেবীভাগবতে দেবীগীতায়াং সপ্তমোঽধ্যায়ঃ ||

|| অথ অষ্টমোঽধ্যায়ঃ ||
হিমালয় উবাচ –
দেবদেবি মহেশানি করুণাসাগরেঽম্বিকে |
ব্রূহি পূজাবিধিং সম্যগ্যথাবদধুনা নিজম্ || ১||
শ্রীদেব্যুবাচ –
বক্ষ্যে পূজাবিধিং রাজন্নম্বিকায়া যথাপ্রিয়ম্ |
অত্যন্তশ্রদ্ধয়া সার্ধং শৃণু পর্বতপুংগব || ২||
দ্বিবিধা মম পূজা স্যাদ্বাহ্যা চাভ্যান্তরাপি চ |
বাহ্যাপি দ্বিবিধা প্রোক্তা বৈদিকী তান্ত্রিকী তথা || ৩||
বৈদিক্যর্চাপি দ্বিবিধা মূর্তিভেদেন ভূধর |
বৈদিকী বৈদিকৈঃ কার্যা বেদদীক্ষা সমন্বিতৈঃ || ৪||
তন্ত্রোক্তদীক্ষাবদ্ভিস্তু তান্ত্রিকী সংশ্রিতা ভবেৎ |
ইত্থং পূজারহস্যং চ ন জ্ঞাৎবা বিপরীতকম্ || ৫||
করোতি যো নরো মূঢঃ স পতত্যেব সর্বথা |
তত্র যা বৈদিকী প্রোক্তা প্রথমা তাং বদাম্যহম্ || ৬||
যন্মে সাক্ষাৎপরং রূপং দৃষ্টবানসি ভূধর |
অনন্তশীর্ষনয়নমনন্তচরণং মহৎ || ৭||
সর্বশক্তিসমায়ুক্তং প্রেরকং যৎপরাৎপরম্ |
তদেব পূজয়েন্নিত্যং নমেদ্ধ্যায়েৎস্মরেদপি || ৮||
ইত্যেতৎপ্রথমাচার্যাঃ স্বরূপং কথিতং নগ |
শান্তঃ সমাহিতমনা দম্ভাহংকারবর্জিতঃ || ৯||
তৎপরো ভব তদ্যাজী তদেব শরণং ব্রজ |
তদেব চেতসা পশ্য জপ ধ্যায়স্ব সর্বদা || ১০||
অনন্যয়া প্রেময়ুক্তভক্ত্যা মদ্ভাবমাশ্রিতঃ |
যজ্ঞৈর্যজ তপোদানৈর্মামেব পরিতোষয় || ১১||
ইত্থং মমানুগ্রহতো মোক্ষ্যসে ভববন্ধনাৎ |
মৎপরা যে মদাসক্তচিত্তা ভক্তপরা মতাঃ || ১২||
প্রতিজানে ভবাদস্মাদুদ্ধারাম্যচিরেণ তু |
ধ্যানেন কর্ময়ুক্তেন ভক্তিজ্ঞানেন বা পুনঃ || ১৩||
প্রাপ্যাহং সর্বথা রাজন্ন তু কেবলকর্মভিঃ |
ধর্মাৎসংজায়তে ভক্তির্ভক্ত্যা সংজায়তে পরম্ || ১৪||
শ্রুতিস্মৃতিভ্যামুদিতং যৎস ধর্মঃ প্রকীর্তিতঃ |
অন্যশাস্ত্রেণ যঃ প্রোক্তো ধর্মাভাসঃ স উচ্যতে || ১৫||
সর্বজ্ঞাৎসর্বশক্তেশ্চ মত্তো বেদঃ সমুত্থিতঃ |
অজ্ঞানস্য মমাভাবাদপ্রমাণা ন চ শ্রুতিঃ || ১৬||
স্মৃতয়শ্চ শ্রুতেরর্থং গৃহীৎবৈব চ নির্গতাঃ |
মন্বাদীনাং স্মৃতীনাং চ ততঃ প্রামাণ্যমিষ্যতে || ১৭||
ক্বচিৎকদাচিত্তন্ত্রার্থকটাক্ষেণ পরোদিতম্ |
ধর্মং বদন্তি সোংঽশস্তু নৈব গ্রাহ্যোঽস্তি বৈদিকৈঃ || ১৮||
অন্যেষাং শাস্ত্রকর্ত্ৠণামজ্ঞানপ্রভবৎবতঃ |
অজ্ঞানদোষদুষ্টৎবাত্তদুক্তের্ন প্রমাণতা || ১৯||
তস্মান্মুমুক্ষুর্ধর্মার্থং সর্বথা বেদমাশ্রয়েৎ |
রাজাজ্ঞা চ যথা লোকে হন্যতে ন কদাচন || ২০||
সর্বেশায়া মমাজ্ঞা সা শ্রুতিস্ত্যাজ্যা কথং নৃভিঃ |
মদাজ্ঞারক্ষণার্থং তু ব্রহ্মক্ষত্রিয়জাতয়ঃ || ২১||
ময়া সৃষ্টাস্ততো জ্ঞেয়ং রহস্যং মে শ্রুতের্বচঃ |
যদা যদা হি ধর্মস্য গ্লানির্ভবতি ভূধর || ২২||
অভ্যুত্থানমধর্মস্য তদা বেষান্বিভর্ম্যহম্ |
দেবদৈত্যবিভাগশ্চাপ্যত এবাভবন্নৃপ || ২৩||
যে ন কুর্বন্তি তদ্ধর্মং তচ্ছিক্ষার্থং ময়া সদা |
সম্পাদিতাস্তু নরকাস্রাসো যচ্ছ্রবণাদ্ভবেৎ || ২৪||
যো বেদধর্মমুজ্ঝিত্য ধর্মমন্যং সমাশ্রয়েৎ |
রাজা প্রবাসয়েদ্দেশান্নিজাদেতানধর্মিণঃ || ২৫||
ব্রাহ্মণৈর্ন চ সম্ভাষ্যাঃ পংক্তিগ্রাহ্যা ন চ দ্বিজৈঃ |
অন্যানি যানি শাস্ত্রাণি লোকেঽস্মিন্বিবিধানি চ || ২৬||
শ্রুতিস্মৃতিবিরুদ্ধানি তামসান্যেব সর্বশঃ |
বামং কাপালকং চৈব কৌলকং ভৈরবাগমঃ || ২৭||
শিবেন মোহনার্থায় প্রণীতো নান্যহেতুকঃ |
যক্ষশাপাদ্ ভৃগোঃ শাপাদ্দধীচস্য চ শাপতঃ || ২৮||
দগ্ধা যে ব্রাহ্মণবরা বেদমার্গবহিষ্কৃতাঃ |
তেষামুদ্ধরণার্থায় সোপানক্রমতঃ সদা || ২৯||
শৈবাশ্চ বৈষ্ণবাশ্চৈব সৌরাঃ শাক্তাস্তথৈব চ |
গাণপত্যা আগমাশ্চ প্রণীতাঃ শংকরেণ তু || ৩০||
তত্র বেদাবিরুদ্ধোংঽশোঽপ্যুক্ত এব ক্বচিৎক্বচিৎ |
বৈদিকস্তদ্গ্রহে দোষো ন ভবত্যেব কর্হিচিৎ || ৩১||
সর্বথা বেদভিন্নার্থে নাধিকারী দ্বিজো ভবেৎ |
বেদাধিকারহীনস্তু ভবেত্তত্রাধিকারবান্ || ৩২||
তস্মাৎসর্বপ্রয়ত্নেন বৈদিকো বেদমাশ্রয়েৎ |
ধর্মেণ সহিতং জ্ঞানং পরং ব্রহ্ম প্রকাশয়েৎ || ৩৩||
সর্বৈষণাঃ পরিত্যজ্য মামেব শরণং গতাঃ |
সর্বভূতদয়াবন্তো মানাহংকারবর্জিতাঃ || ৩৪||
মচ্চিত্তা মদ্গতপ্রাণা মৎস্থানকথনে রতাঃ |
সংন্যাসিনো বনস্থাশ্চ গৃহস্থা ব্রহ্মচারিণঃ || ৩৫||
উপাসন্তে সদা ভক্ত্যা যোগমৈশ্বরসংজ্ঞিতম্ |
তেষাং নিত্যাভিয়ুক্তানামহমজ্ঞানজং তমঃ || ৩৬||
জ্ঞানসূর্যপ্রকাশেন নাশয়ামি ন সংশয়ঃ |
ইত্থং বৈদিকপূজায়াঃ প্রথমায়া নগাধিপ || ৩৭||
স্বরূপমুক্তং সংক্ষেপাদ্দ্বিতীয়ায়া অথো ব্রুবে |
মূর্তৌ বা স্থণ্ডিলে বাপি তথা সূর্যেন্দুমণ্ডলে || ৩৮||
জলেঽথবা বাণলিংগে যন্ত্রে বাপি মহাপটে |
তথা শ্রীহৃদয়াম্ভোজে ধ্যাৎবা দেবীং পরাৎপরাম্ || ৩৯||
সগুণাং করুণাপূর্ণাং তরুণীমরুণারুণাম্ |
সৌন্দর্যসারসীমান্তাং সর্বাবয়বসুংদরাম্ || ৪০||
শৃংগাররসসম্পূর্ণাং সদা ভক্তার্তিকাতরাম্ |
প্রসাদসুমুখীমম্বাং চন্দ্রখণ্ডাশিখণ্ডিনীম্ || ৪১||
পাশাংকুশবরাভীতিধরামানন্দরূপিণীম্ |
পূজয়েদুপচারৈশ্চ যথাবিত্তানুসারতঃ || ৪২||
যাবদান্তরপূজায়ামধিকারো ভবেন্ন হি |
তাবদ্বাহ্যামিমাং পূজাং শ্রয়েজ্জাতে তু তাং ত্যজেৎ || ৪৩||
আভ্যন্তরা তু যা পূজা সা তু সংবিল্লয়ঃ স্মৃতঃ |
সংবিদেবপরং রূপমুপাধিরহিতং মম || ৪৪||
অতঃ সংবিদি মদ্রূপে চেতঃ স্থাপ্যং নিরাশ্রয়ম্ |
সংবিদ্রূপাতিরিক্তং তু মিথ্যা মায়াময়ং জগৎ || ৪৫||
অতঃ সংসারনাশায় সাক্ষিণীমাত্মরূপিণীম্ |
ভাবয়ন্নির্মনস্কেন যোগয়ুক্তেন চেতসা || ৪৬||
অতঃপরং বাহ্যপূজাবিস্তারঃ কথ্যতে ময়া |
সাবধানেন মনসা শৃণু পর্বতসত্তম || ৪৭||
|| ইতি শ্রীদেবীভাগবতে দেবীগীতায়াং অষ্টমোঽধ্যায়ঃ ||

অথ নবমোঽধ্যায়ঃ ||
শ্রীদেব্যুবাচ –
প্রাতরুত্থায় শিরসি সংস্মরেৎপদ্মমুজ্জ্বলম্ |
কর্পূরাভং স্মরেত্তত্র শ্রীগুরুং নিজরূপিণম্ || ১||
সুপ্রসন্নং লসদ্ভূষাভূষিতং শক্তিসংযুতম্ |
নমস্কৃত্য ততো দেবীং কুণ্ডলীং সংস্মরেদ্বুধঃ || ২||
প্রকাশমানাং প্রথমে প্রয়াণে
প্রতিপ্রয়াণেঽপ্যমৃতায়মানাম্ |
অন্তঃপদব্যামনুসংচরন্তী-
মানন্দরূপামবলাং প্রপদ্যে || ৩||
ধ্যাৎবৈবং তচ্ছিখামধ্যে সচ্চিদানন্দরূপিণীম্ |
মাং ধ্যায়েদথ শৌচাদিক্রিয়াঃ সর্বাঃ সমাপয়েৎ || ৪||
অগ্নিহোত্রং ততো হুৎবা মৎপ্রীত্যর্থং দ্বিজোত্তমঃ |
হোমান্তে স্বাসনে স্থিৎবা পূজাসংকল্পমাচরেৎ || ৫||
ভূতশুদ্ধিং পুরা কৃৎবা মাতৃকান্যাসমেব চ |
হৃল্লেখামাতৃকান্যাসং নিত্যমেব সমাচরেৎ || ৬||
মূলাধারে হকারং চ হৃদয়ে চ রকারকম্ |
ভ্রূমধ্যে তদ্বদীকারং হ্রীংকারং মস্তকে ন্যসেৎ || ৭||
তত্তন্মন্ত্রোদিতানন্যান্ন্যাসান্সর্বান্সমাচরেৎ |
কল্পয়েৎস্বাত্মনো দেহে পীঠং ধর্মাদিভিঃ পুনঃ || ৮||
ততো ধ্যায়েন্মহাদেবীং প্রাণায়ামৈর্বিজৃম্ভিতে |
হৃদম্ভোজে মম স্থানে পংচপ্রেতাসনে বুধঃ || ৯||
ব্রহ্মা বিষ্ণুশ্চ রুদ্রশ্চ ঈশ্বরশ্চ সদাশিবঃ |
এতে পংচ মহাপ্রেতাঃ পাদমূলে মম স্থিতাঃ || ১০||
পংচভূতাত্মকা হ্যেতে পংচাবস্থাত্মকা অপি |
অহং ৎবব্যক্তচিদ্রূপা তদতীতাঽস্মি সর্বথা || ১১||
ততো বিষ্টরতাং যাতাঃ শক্তিতন্ত্রেষু সর্বদা |
ধ্যাৎবৈবং মানসৈর্ভোগৈঃ পূজয়েন্মাং জপেদপি || ১২||
জপং সমর্প্য শ্রীদেব্যৈ ততোঽর্ঘ্যস্থাপনং চরেৎ |
পাত্রাসাদনকং কৃৎবা পূজাদ্রব্যাণি শোধয়েৎ || ১৩||
জলেন তেন মনুনা চাস্ত্রমন্ত্রেণ দেশিকঃ |
দিগ্বন্ধং চ পুরা কৃৎবা গুরূন্নৎবা ততঃ পরম্ || ১৪||
তদনুজ্ঞাং সমাদায় বাহ্যপীঠে ততঃ পরম্ |
হৃদিস্থাং ভাবিতাং মূর্তিং মম দিব্যাং মনোহরাম্ || ১৫||
আবাহয়েত্ততঃ পীঠে প্রাণস্থাপনবিদ্যয়া |
আসনাবাহনে চার্ঘ্যং পাদ্যাদ্যাচমনং তথা || ১৬||
স্নানং বাসোদ্বয়ং চৈব ভূষণানি চ সর্বশঃ |
গন্ধপুষ্পং যথায়োগ্যং দত্ত্বা দেব্যৈ স্বভক্তিতঃ || ১৭||
যংত্রস্থানামাবৃতীনাং পূজনং সম্যগাচরেৎ |
প্রতিবারমশক্তানাং শুক্রবারো নিয়ম্যতে || ১৮||
মূলদেবীপ্রভারূপাঃ স্মর্তব্যা অংগদেবতাঃ |
তৎপ্রভাপটলব্যাপ্তং ত্রৈলোক্যং চ বিচিংতয়েৎ || ১৯||
পুনরাবৃত্তিসহিতাং মূলদেবীং চ পূজয়েৎ |
গন্ধাদিভিঃ সুগন্ধৈস্তু তথা পুষ্পৈঃ সুবাসিতৈঃ || ২০||
নৈবেদ্যৈস্তর্পণৈশ্চৈব তাম্বূলৈর্দক্ষিণাদিভিঃ |
তোষয়েন্মাং ৎবৎকৃতেন নাম্নাং সাহস্রকেণ চ || ২১||
কবচেন চ সূক্তেনাহং রুদ্রেভিরিতি প্রভো |
দেব্যথর্বশিরোমন্ত্রৈর্হৃল্লেখোপনিষদ্ভবৈঃ || ২২||
মহাবিদ্যামহামন্ত্রৈস্তোষয়েন্মাং মুহুর্মুহুঃ |
ক্ষমাপয়েজ্জগদ্ধাত্রীং প্রেমার্দ্রহৃদয়ো নরঃ || ২৩||
পুলকাংকিতসর্বাংগৈর্বাল্যরুদ্ধাক্ষিনিঃস্বনঃ |
নৃত্যগীতাদিঘোষেণ তোষয়েন্মাং মুহুর্মুহুঃ || ২৪||
বেদপারায়ণৈশ্চৈব পুরাণৈঃ সকলৈরপি |
প্রতিপাদ্যা যতোঽহং বৈ তস্মাত্তৈস্তোষয়েত্তু মাম্ || ২৫||
নিজ সর্বস্বমপি মে সদেহং নিত্যশোঽর্পয়েৎ |
নিত্যহোমং ততঃ কুর্যাদ্ব্রাহ্মণাংশ্চ সুবাসিনীঃ || ২৬||
বটুকান্পামরাননন্যান্দেবীবুদ্ধ্যা তু ভোজয়েৎ |
নৎবা পুনঃ স্বহৃদয়ে ব্যুৎক্রমেণ বিসর্জয়েৎ || ২৭||
সর্বং হৃল্লেখয়া কুর্যাৎপূজনং মম সুব্রত |
হৃল্লেখা সর্বমংত্রাণাং নায়িকা পরমা স্মৃতা || ২৮ ||
হৃল্লেখাদর্পণে নিত্যমহং তু প্রতিবিম্বিতা |
তস্মাধৃল্লেখয়া দত্তং সর্বমন্ত্রৈঃ সমর্পিতম্ || ২৯||
গুরুং সম্পূজ্য ভৃষাদ্যৈঃ কৃতকৃত্যৎবমাবহেৎ |
য এবং পূজয়েদ্দেবীং শ্রীমদ্ভুবনসুন্দরীম্ || ৩০||
ন তস্য দুর্লভং কিংচিৎকদাব্হিৎক্বচিদস্তি হি |
দেহান্তে তু মণিদ্বীপং মাম যাত্যেব সর্বথা || ৩১||
জ্ঞেয়ো দেবীস্বরূপোঽসৌ দেবা নিত্যং নমন্তি তম্ |
ইতি তে কথিতং রাজন্মহাদেব্যাঃ প্রপূজনম্ || ৩২||
বিমৃশ্যৈতদশেষেণাপ্যধিকারানুরূপতঃ |
কুরু মে পূজনং তেন কৃতার্থস্ত্বং ভবিষ্যসি || ৩৩||
ইদং তু গীতাশাস্ত্রং মে নাশিষ্যায় বদেৎক্বচিৎ |
নাভক্তায় প্রদাতব্যং ন ধূর্তায় চ দুর্হৃদে || ৩৪||
এতৎপ্রকাশনং মাতুরুদ্ধাটনমুরোজয়োঃ |
তস্মাদবশ্যং যত্নেন গোপনীয়মিদং সদা || ৩৫||
দেয়ং ভক্তায় শিষ্যায় জ্যেষ্ঠপুত্রায় চৈব হি |
সুশীলায় সুবেষায় দেবীভক্তিয়ুতায় চ || ৩৬||
শ্রাদ্ধকালে পঠেদেতদ্ ব্রাহ্মণানাং সমীপতঃ |
তৃপ্তাস্তৎপিতরঃ সর্বে প্রয়ান্তি পরমং পদম্ || ৩৭||
ব্যাস উবাচ –
ইত্যুক্ত্বা সা ভগবতী তত্রৈবান্তরধীয়ত |
দেবাশ্চ মুদিতাঃ সর্বে দেবীদর্শনতোঽভবন্ || ৩৮||
ততা হিমালয়ে জজ্ঞে দেবী হৈমবতী তু সা |
যা গৌরীতি প্রসিদ্ধাসীদ্দত্তা সা শংকরায় চ || ৩৯||
ততঃ স্কন্দঃ সমুদ্ভূতস্তারকস্তেন পাতিতঃ |
সমুদ্রমন্থনে পূর্বং রত্নান্যাসুর্নরাধিপ || ৪০||
তত্র দেবৈস্তুতা দেবী লক্ষ্মীপ্রাপ্ত্যর্থমাদরাৎ |
তেষামনুগ্রহার্থায় নির্গতা তু রমা ততঃ || ৪১||
বৈকুংঠায় সুরৈর্দত্তা তেন তস্য শমাভবৎ |
ইতি তে কথিতং রাজন্দেবীমাহাত্ম্যমুত্তমম্ || ৪২||
গৌরীলক্ষ্ম্যোঃ সমুদ্ভূতিবিষয়ং সর্বকামদম্ |
ন বাচ্যং ৎবেতদন্যস্মৈ রহস্যং কথিতং যতঃ || ৪৩||
গীতা রহস্যভূতেয়ং গোপনীয়া প্রয়ত্নতঃ |
সর্বমুক্তং সমাসেন যৎপৃষ্টং তৎবয়ানঘ |
পবিত্রং পাবনং দিব্যং কিং ভূয়ঃ শ্রোতুমিচ্ছসি || ৪৪ ||
|| ইতি শ্রীদেবীভাগবতে দেবীগীতায়াং নবমোঽধ্যায়ঃ ||
|| ইতি শ্রীমদ্দেবীগীতা সমাপ্তা||