কুমারসম্ভবম্ সর্গঃ ০৪

কুমারসম্ভবম্ সর্গঃ ৪

অথ মোহপরায়ণা সতী বিবশা কামবধূর্বিবোধিতা |
বিধিনা প্রতিপাদয়িষ্যতা নববৈধব্যমসহ্যবেদনম্ || ৪.১||
অবধানপরে চকার সা প্রলয়ান্তোন্মিষিতে বিলোচনে |
ন বিবেদ তয়োরতৃপ্তয়োঃ প্রিয়মত্যন্তবিলুপ্তদর্শনম্ || ৪.২||
অয়ি জীবিতনাথ জীবসীত্যভিধায়োত্থিতয়া তয়া পুরঃ |
দদৃশে পুরুষাকৃতি ক্ষিতৌ হরকোপানলভস্ম কেবলম্ || ৪.৩||
অথ সা পুনরেব বিহ্বলা বসুধালিঙ্গনধূসরস্তনী |
বিললাপ বিকীর্ণমূর্ধজা সমদুঃখামিব কুর্বতী স্থলীম্ || ৪.৪||
উপমানমভূদ্বিলাসিনাং করণং যত্তব কান্তিমত্তয়া |
তদিদং গতমীদৃশীং দশাং ন বিদীর্যে কঠিনাঃ খলু স্ত্রিয়ঃ || ৪.৫||
ক্ব নু মাং ৎবদধীনজীবিতাং বিনিকীর্য ক্ষণভিন্নসৌহৃদঃ |
নলিনীং ক্ষতসেতুবন্ধনো জলসঙ্ঘাত ইবাসি বিদ্রুতঃ || ৪.৬||
কৃতবানসি বিপ্রিয়ং ন মে প্রতিকূলং ন চ তে ময়া কৃতম্ |
কিমকারণমেব দর্শনং বিলপন্ত্যৈ রতয়ে ন দীয়তে || ৪.৭||
স্মরসি স্মর মেখলাগুণৈরুত গোত্রস্খলিতেষু বন্ধনম্ |
চ্যুতকেশরদূষিতেক্ষণান্যবতংসোৎপলতাডনানি বা || ৪.৮||
হৃদয়ে বসসীতি মৎপ্রিয়ং যদবোচস্তদবৈমি কৈতবম্ |
উপচারপদং ন চেদিদং ৎবমনঙ্গঃ কথমক্ষতা রতিঃ || ৪.৯||
পরলোকনবপ্রবাসিনঃ প্রতিপৎস্যে পদবীমহং তব |
বিধিনা জন এষ বঞ্চিতস্ত্বদধীনং খলু দেহিনাং সুখম্ || ৪.১০||
রজনীতিমিরাবগুণ্ঠিতে পুরমার্গে ঘনশব্দবিক্লবাঃ |
বসতিং প্রিয় কামিনাং প্রিয়াস্ত্বদৃতে প্রাপয়িতুং ক ঈশ্বরঃ || ৪.১১||
নয়নান্যরুণানি ঘূর্ণয়ন্বচনানি স্খলয়ন্পদে-পদে |
অসতি ৎবয়ি বারুণীমদঃ প্রমদানামধুনা বিডম্বনা || ৪.১২||
অবগম্য কথীকৃতং বপুঃ প্রিয়বন্ধোস্তব নিষ্ফলোদয়ঃ |
বহুলে | অপি গতে নিশাকরস্তনুতাং দুঃখমনঙ্গ মোক্ষ্যতি || ৪.১৩||
হরিতারুণচারুবন্ধনঃ কলপুংস্কোকিলশব্দসূচিতঃ |
বদ সম্প্রতি কস্য বাণতাং নবচূতপ্রসবো গমিষ্যতি || ৪.১৪||
অলিপঙ্ক্তিরনেকশস্ত্বয়া গুণকৃত্যে ধনুষো নিয়োজিতা |
বিরুতৈঃ করুণস্বনৈরিয়ং গুরুশোকামনুরোদিতীব মাম্ || ৪.১৫||
প্রতিপদ্য মনোহরং বপুঃ পুনরপ্যাদিশ তাবদুত্থিতঃ |
রতিদূতিপদেষু কোকিলাং মধুরালাপনিসর্গপণ্ডিতাম্ || ৪.১৬||
শিরসা প্রণিপত্য যাচিতান্যুপগূঢানি সবেপথূনি চ |
সুরতানি চ তানি তে রহঃ স্মর সংস্মৃত্য ন শান্তিরস্তি মে || ৪.১৭||
রচিতং রতিপণ্ডিত ৎবয়া স্বয়মঙ্গেষু মমেদমার্তবম্ |
ধ্রিয়তে কুসুমপ্রসাধনং তব তচ্চারু বপুর্ন দৃশ্যতে || ৪.১৮||
বিবুধৈরসি যস্য দারুণৈরসমাপ্তে পরিকর্মণি স্মৃতঃ |
তমিমং কুরু দক্ষিণেতরং চরণং নির্মিতরাগমেহি মে || ৪.১৯||
অহমেত্য পতঙ্গবর্ত্মনা পুনরঙ্কাশ্রয়িণী ভবামি তে |
চতুরৈঃ সুরকামিনীজনৈঃ প্রিয় যাবন্ন বিলোভ্যসে দিবি || ৪.২০||
মদনেন বিনাকৃতা রতিঃ ক্ষণমাত্রং কিল জীবিতেতি মে |
বচনীয়মিদং ব্যবস্থিতং রমণ ৎবামনুয়ামি যদ্যপি || ৪.২১||
ক্রিয়তাং কথমন্ত্যমণ্ডনং পরলোকান্তরিতস্য তে ময়া |
সমমেব গতো | অস্যতর্কিতাং গতিমঙ্গেন চ জীবিতেন চ || ৪.২২||
ঋজুতাং নয়তঃ স্মরামি তে শরমুৎসঙ্গনিষণ্ণধন্বনঃ |
মধুনা সহ সস্মিতং কথাং নয়নোপান্তবিলোকিতং চ যৎ || ৪.২৩||
ক্ব নু তে হৃদয়ঙ্গমঃ সখা কুসুমায়োজিতকার্মুকো মধুঃ |
ন খলূগ্ররুষা পিনাকিনা গমিতঃ সো | অপি সুহৃদ্গতাং গতিম্ || ৪.২৪||
অথ তৈঃ পরিদেবিতাক্ষরৈর্হৃদয়ে দিগ্ধশরৈরিবার্দিতঃ |
রতিমভ্যুপপত্তুমাতুরাং মধুরাত্মানমদর্শয়ৎপুরঃ || ৪.২৫||
তমবেক্ষ্য রুরোদ সা ভৃশং স্তনসম্বাধমুরো জঘান চ |
স্বজনস্য হি দুঃখমগ্রতো বিবৃতদ্বারমিবোপজায়তে || ৪.২৬||
ইতি চৈনমুবাচ দুঃখিতা সুহৃদঃ পশ্য বসন্ত কিং স্থিতম্ |
যদিদং কণশঃ প্রকীর্যতে পবনৈর্ভস্ম কপোতকর্বুরম্ || ৪.২৭||
অয়ি সম্প্রতি দেহি দর্শনং স্মর পর্যুৎসুক এষ মাধবঃ |
দয়িতাস্বনবস্থিতং নৃণাং ন খলু প্রেম চলং সুহৃজ্জনে || ৪.২৮||
অমুনা ননু পার্শ্ববর্তিনা জগদাজ্ঞাং সসুরাসুরং তব |
বিসতন্তুগুণস্য কারিতং ধনুষঃ পেলবপুষ্পপত্রিণঃ || ৪.২৯||
গত এব ন তে নিবর্ততে স সখা দীপ ইবানিলাহতঃ |
অহমস্য দশেব পশ্য মামবিষহ্যব্যসনপ্রধূষিতাম্ || ৪.৩০||
বিধিনা কৃতমর্ধবৈশসং ননু মাম্কামবধে বিমুঞ্চতা |
অনঘাপি হি সংশ্রয়দ্রুমে গজভগ্নে পতনায় বল্লরী || ৪.৩১||
তদিদং ক্রিয়তামনন্তরং ভবতা বন্ধুজনপ্রয়োজনম্ |
বিধুরাং জ্বলনাতিসর্জনান্ননু মাং প্রাপয় পত্যুরন্তিকম্ || ৪.৩২||
শশিনা সহ যাতি কৌমুদী সহ মেঘেন তডিৎপ্রলীয়তে |
প্রমদাঃ পতিবর্ত্মগা ইতি প্রতিপন্নং হি বিচেতনৈরপি || ৪.৩৩||
অমুনৈব কষায়িতস্তনী সুভগেন প্রিয়গাত্রভস্মনা |
নবপল্লবসংস্তরে যথা রচয়িষ্যামি তনুং বিভাবসৌ || ৪.৩৪||
কুসুমাস্তরণে সহায়তাং বহুশঃ সৌম্য গতস্ত্বমাবয়োঃ |
কুরু সম্প্রতি তাবদাশু মে প্রণিপাতাঞ্জলিয়াচিতশ্চিতাম্ || ৪.৩৫||
তদনু জ্বলনং মদর্পিতং ৎবরয়ের্দক্ষিণবাতবীজনৈঃ |
বিদিতং খলু তে যথা স্মরঃ ক্ষণমপ্যুৎসহতে ন মাং বিনা || ৪.৩৬||
ইতি চাপি বিধায় দীয়তাং সলিলস্যাঞ্জলিরেক এব নৌ |
অবিভজ্য পরত্র তং ময়া সহিতঃ পাস্যতি তে স বান্ধবঃ || ৪.৩৭||
পরলোকবিধৌ চ মাধব স্মরমুদ্দিশ্য বিলোলপল্লবাঃ |
নিবপেঃ সহকারমঞ্জরীঃ প্রিয়চূতপ্রসবো হি তে সখা || ৪.৩৮||
ইতি দেববিমুক্তয়ে স্থিতাং রতিমাকাশভবা সরস্বতী |
শফরীং হ্রদশোষবিক্লবাং প্রথমা বৃষ্টিরিবান্বকম্পত || ৪.৩৯||
কুসুমায়ুধপত্নি দুর্লভস্তব ভর্তা ন চিরাদ্ভবিষ্যতি |
শৃণু যেন স কর্মণা গতঃ শলভৎবং হরলোচনার্চিষি || ৪.৪০||
অভিলাষমুদীরিতেন্দ্রিয়ঃ স্বসুতায়ামকরোৎপ্রজাপতিঃ |
অথ তেন নিগৃহ্য বিক্রিয়ামভিশপ্তঃ ফলমেতদন্বভূৎ || ৪.৪১||
পরিণেষ্যতি পার্বতীং যদা তপসা তৎপ্রবণীকৃতো হরঃ |
উপলব্ধসুখস্তদা স্মরং বপুষা স্বেন নিয়োজয়িষ্যতি || ৪.৪২||
ইতি চাহ স ধর্ময়াচিতঃ স্মরশাপাবধিদাং সরস্বতীম্ |
অশনেরমৃতস্য চোভয়োর্বশিনশ্চাম্বুধরাশ্চ যোনয়ঃ || ৪.৪৩||
তদিদং পরিরক্ষ শোভনে ভবিতব্যপ্রিয়সঙ্গমং বপুঃ |
রবিপীতজলা তপাত্যয়ে পুনরোঘেন হি যুজ্যতে নদী || ৪.৪৪||
ইত্থং রতেঃ কিমপি ভূতমদৃশ্যরূপং মন্দীচকার মরণব্যবসায়বুদ্ধিম্ |
তৎপ্রত্যয়াচ্চ কুসুমায়ুধবন্ধুরেনামাশ্বাসয়ৎসুচরিতার্থপদৈর্বচোভিঃ || ৪.৪৫||
অথ মদনবধূরুপপ্লবান্তং ব্যসনকৃশা পরিপালয়াং বভূব |
শশিন ইব দিবাতনস্য লেখা কিরণপরিক্ষয়ধূসরা প্রদোষম্ || ৪.৪৬||