রঘুবংশং সর্গ ১৩

|| কালিদাসকৃতম্ রঘুবংশম্ সর্গ ১৩ ||

অথাত্মনঃ শব্দগুণং গুণজ্ঞঃ পদং বিমানেন বিগাহমানঃ |
রত্নাকরং বীক্ষ্য মিথঃ স জায়াং রামাভিধানো হরিরিত্যুবাচ || ১৩-১||
বৈদেহি পশ্যঽঽমলয়াদ্বিভক্তং মৎসেতুনা ফেনিলমম্বুরাশিম্
ছায়াপথেনেব শরৎপ্রসন্নমাকাশমাবিষ্কৃতচারুতারম্ || ১৩-২||
গুরোর্যিয়ক্ষোঃ কপিলেন মেধ্যে রসাতলং সংক্রমিতে তুরংগে |
তদর্থমুর্বীমবধারয়দ্ভিঃ পূর্বৈঃ কিলায়ং পরিবর্ধিতো নঃ || ১৩-৩||
গর্ভং দধত্যর্কমরীচয়োঽস্মাদ্বিবৃদ্ধিমত্রাশ্নুবতে বসূনি |
অবিন্ধনং বহ্নিমসৌ বিভর্তি প্রহ্লাদনং জ্যোতিরজন্যনেন || ১৩-৪||
তাং তামবস্থাং প্রতিপদ্যমানং স্থিতং দশ ব্যাপ দিশো মহিম্না |
বিষ্ণোরিবাস্যানবধারণীয়মীদৃক্তয়া রূপমিয়ত্তায়া বা || ১৩-৫||
নাভিপ্ররূঢাম্বুরুহাসনেন সংস্তূয়মানঃ প্রথমেন ধাত্রা |
অমুং যুগান্তোচিতয়োগনিদ্রঃ সংহৃত্য লোকান্পুরুষোঽধিশেতে || ১৩-৬||
পক্ষচ্ছিদা গোত্রভিদাত্তগন্ধাঃ শরণ্যমেনং শতশো মহীধ্রাঃ |
নৃপা ইবোপপ্লবিনঃ পরেভ্যো ধর্মোত্তরং মধ্যমমাশ্রয়ন্তে || ১৩-৭||
রসাতলাদাদিভবেন পুংসা ভুবঃ প্রয়ুক্তোদ্বহনক্রিয়ায়াঃ |
অস্যাচ্ছমম্ভঃ প্রলয়প্রবৃদ্ধং মুহূর্তবক্ত্রাভরণং বভূব || ১৩-৮||
মুখার্পণেষু প্রকৃতিপ্রগল্ভাঃ স্বয়ং তরংগাধরদানদক্ষঃ |
অনন্যসামান্যকলত্রবৃত্তিঃ পিবত্যসৌ পায়য়তে চ সিন্ধুঃ || ১৩-৯||
সসৎবমাদায় নদীমুখাম্ভঃ সংমীলয়ন্তো বিবৃতাননৎবাৎ |
অমী তিরোভিস্তিময়ঃ সরন্ধ্রৈরূধ্বং বিতন্বন্তি জলপ্রবাহান্ || ১৩-১০||
মাতংগনক্রৈঃ সহসোৎপতদ্ভির্ভিন্নান্দ্বিধা পশ্য সমুদ্রফেনান্ |
কপোলসংসর্পিতয়া য এষাং ব্রজন্তি কর্ণক্ষণচামরৎবম্ || ১৩-১১||
বেলানিলায় প্রসৃতা ভুজংগা বহোর্মিবিস্ফূর্জথুনির্বিশেষাঃ |
সূর্যাংশুসংপর্কবিবৃদ্ধরাগৈর্ব্যজ্যন্ত এতে মণিভিঃ ফণস্থৈঃ || ১৩-১২||
তবাধরস্পর্ধিষু বিদ্রুমেষু পর্যস্তমেতৎসহসোর্মিবেগাৎ |
ঊর্ধ্বাঙ্কুরপ্রোতমুখং কথংচিৎক্লেশাদপক্রামতি শঙ্খয়ূথম্ || ১৩-১৩||
প্রবৃত্তমাত্রেণ পয়াংসি পাতুমাবর্তবেগাদ্ভ্রমতা ঘনেন |
আভাতি ভূয়িষ্ঠময়ং সমুদ্রঃ প্রমথ্যমানো গিরিণেব ভূয়ঃ || ১৩-১৪||
দূরাদয়শ্চক্রনিভস্য তন্বী তমালতালীবনরাজিনীলা |
আভাতি বেলা লবণাম্বুরাশের্ধারানিবদ্ধেব কলঙ্করেখা || ১৩-১৫||
বেলানিলঃ কেতকরেণুভিস্তে সংভাবয়ত্যাননমায়তাক্ষি |
মামক্ষমং মণ্ডলকালহানের্বেত্তীব বিম্বাধরবদ্ধতৃষ্ণম্ || ১৩-১৬||
এতে বয়ং সৈকতভিন্নশুক্তিপর্যস্তমুক্তাপটলং পয়োধেঃ |
প্রাপ্তা মুহূর্তেন বিমানবেগাৎকূলং ফলাবর্জিতপূগমালম্ || ১৩-১৭||
কুরুষ্ব তাবৎকরভোরু পশ্চান্মার্গে মৃগপ্রেক্ষিণি দৃষ্টিপাতম্ |
এষা বিদূরীভবতঃ সমুদ্রাৎসকাননা নিষ্পততীব ভূমিঃ || ১৩-১৮||
ক্বচিৎপথা সংচরতে সুরাণাং ক্বচিদ্ঘনানাং পততাং ক্বচিচ্চ |
যথাবিধো মে মনসোঽভিলাষঃ প্রবর্ততে পশ্য তথা বিমানম্ || ১৩-১৯||
অসৌ মহেন্দ্রদ্বিপদানগন্ধিস্ত্রিমার্গগাবীচিবিমর্দশীতঃ |
আকাশবায়ুর্দিনয়ৌবনোত্থানাচামতি স্বেদলবান্মুখে তে || ১৩-২০||
করেণ বাতায়নলম্বিতেন স্পৃষ্টস্ত্বয়া চণ্ডি কুতূহলিন্যা |
আমুঞ্চতীবাভরণং দ্বিতীয়মুদ্ভিন্নবিদ্যুদ্বলয়ো ঘনস্তে || ১৩-২১||
অমী জনস্থানমপোঢবিঘ্নং মৎবা সমারব্ধনবোটজানি |
অধ্যাসতে চীরভৃতো যথাস্বং চিরোজ্ঝিতান্যাশ্রমমণ্ডলানি || ১৩-২২||
সৈষা স্থলী যত্র বিচিন্বতা ৎবাং ভ্রষ্টং ময়া নূপুরমেকমুর্ব্যাম্ |
অদৃষ্যত ৎবচ্চরণারবিন্দবিশ্লেষদুঃখাদিব বদ্ধমৌনম্ || ১৩-২৩||
ৎবং রক্ষসা ভীরু যতোঽপনীতা তং মার্গমেতাঃ কৃপয়া লতা মে |
অদর্শয়ন্বক্তুমশক্নুবত্যঃ শাখাভিরাবর্জিতপল্লবাভিঃ || ১৩-২৪||
মৃগ্যশ্চ দর্ভাঙ্কুরনির্ব্যপেক্ষাস্তবাগতিজ্ঞং সমবোধয়ন্মাম্ |
ব্যাপারয়ন্ত্যো দিশি দক্ষিণস্যামুৎপক্ষরাজীনি বিলোচনানি || ১৩-২৫||
এতদ্গিরের্মাল্যবতঃ পুরস্তাদাবির্ভত্যম্বরলেখি শৃঙ্গম্ |
নবং পয়ো যত্র ঘনৈর্ময়া চ ৎবদ্বিপ্রয়োগাশ্রু সমং বিসৃষ্টম্ || ১৩-২৬||
গন্ধশ্চ ধারাহতপল্বলানাং কাদম্বমর্ধোদ্গতকেসরং চ |
স্নিগ্ধাশ্চ কেকাঃ শিখিনাং বভূবুর্যস্মিন্নসহ্যানি বিনা ৎবয়া মে || ১৩-২৭||
পূর্বানুভূতং স্মরতা চ যত্র কম্পোত্তরং ভীরু তবোপগূঢম্ |
গুহাবিসারীণ্যতিবাহিতানি ময়া কথংচিদ্ঘনগর্জিতানি || ১৩-২৮||
আসারসিক্তক্ষিতিবাষ্পয়োগান্মামক্ষিণোদ্যত্র বিভিন্নকোশৈঃ |
বিডম্ব্যমানা নবকন্দলৈস্তে বিবাহধূমারুণলোচনশ্রীঃ || ১৩-২৯||
উপান্তবানীরবনোপগূঢান্যালক্ষপারিপ্লবসারসানি |
দূরাবতীর্ণা পিবতীব খেদাদমূনি পম্পাসলিলানি দৃষ্টিঃ || ১৩-৩০||
অত্রাবিয়ুক্তানি রথঙ্গনাম্নামন্যোন্যদত্তোৎপলকেসরাণি |
দ্বন্দ্বানি দূরান্তরবর্তিনা তে ময়া প্রিয়ে সস্মিতমীক্ষিতানি || ১৩-৩১||
ইমাং তটাশোকলতাং চ তন্বীং স্তনাভিরামস্তবকাভিনম্রাম্ |
ৎবৎপ্রাপ্তিবুদ্ধ্যা পরিরব্ধুকামঃ সৌমিত্রিণা সাশ্রুরহং নিষিদ্ধঃ || ১৩-৩২||
অমূর্বিমানান্তরলম্বিনীনাং শ্রুৎবা স্বনং কাঞ্চনকিঙ্কিণীনাম্ |
প্রত্যুদ্ব্রজন্তীব খমুৎপতন্ত্যো গোদাবরীসারসপঙ্ক্তয়স্ত্বাম্ || ১৩-৩৩||
এষা ৎবয়া পেশলমধ্যয়াপি ঘটাম্বুসংবর্ধিতবালচূতা |
আনন্দয়ত্যুন্মুখকৃষ্ণসারা দৃষ্টা চিরাৎপঞ্চবটী মনো মে || ১৩-৩৪||
অত্রানুগোদং মৃগয়ানিবৃত্তস্তরংগবাতেন বিনীতখেদঃ |
রহস্ত্বদুৎসঙ্গনিষণ্ণমূর্ধা স্মরামি বানীরগৃহেষু সুপ্তঃ || ১৩-৩৫||
ভ্রূভেদমাত্রেণ পদান্মঘোনঃ প্রভ্রংশয়াং যো নহুষং চকার |
তস্যাবিলাম্ভঃপরিশুদ্ধিহেতোর্ভৌমো মুনেঃ স্থানপরিগ্রহোঽযম্ || ১৩-৩৬||
ত্রেতাগ্নিধূমাগ্রমনিন্দ্যকীর্তেস্তস্যেদমাক্রান্তবিমানমার্গম্ |
ঘ্রাৎবা হবির্গন্ধি রজোবিমুক্তঃ সমশ্নুতে মে লঘিমানমাত্মা || ১৩-৩৭||
এতন্মুমুনের্মানিনি শাতকর্ণেঃ পঞ্চাপ্সরো নাম বিহারবারি |
আভাতি পর্যন্তবনং বিদূরান্মেঘান্তরালক্ষ্যমিবেন্দুবিম্বম্ || ১৩-৩৮||
পুরা স দর্ভাঙ্কুরমাত্রবৃত্তিশ্চরন্মৃগৈঃ সার্ধমৃষির্মঘোনা |
সমাধিভীতেন কিলোপনীতঃ পঞ্চাপ্সরোয়ৌবনকূটবন্ধম্ || ১৩-৩৯||
তস্যায়মন্তর্হিতসৌধভাজঃ প্রসক্তসংগীতমৃদঙ্গঘোষঃ |
বিয়দ্গতঃ পুষ্পকচন্দ্রশালাঃ ক্ষণং প্রতিশ্রুন্মুখরাঃ করোতি || ১৩-৪০||
হবির্ভুজামেধবতাং চতুর্ণাং মধ্যে ললাটংতপসপ্তসপ্তিঃ |
অসৌ তপস্যত্যপরস্তপস্বী নাম্না সুতীক্ষ্ণশ্চরিতেন দান্তঃ || ১৩-৪১||
অমুং সহাসপ্রহিতেক্ষণানি ব্যাজার্ধসংদর্শিতমেখলানি |
নালং বিকর্তুং জনিতেন্দ্রশঙ্কং সুরাঙ্গনাবিভ্রমচেষ্টিতানি || ১৩-৪২||
এষোঽক্ষমালাবলয়ং মৃগাণাং কণ্ডূয়িতারং কুশসূচিলাবম্ |
সভাজনে মে ভুজমূর্ধ্ববাহুঃ সব্যেতরং প্রাধ্বমিতঃ প্রয়ুঙ্ক্তে || ১৩-৪৩||
বাচংযমৎবাৎপ্রণতিং মমৈষ কম্পেন কিঞ্চিৎপ্রতিগৃহ্য মূর্ধ্নঃ |
দৃষ্টিং বিমানব্যবধানমুক্তাং পুনঃ সহস্রার্চিষি সংনিধত্তে || ১৩-৪৪||
অদঃ শরণ্যং শরভঙ্গনাম্নস্তপোবনং পাবনমাহিতাগ্নেঃ |
চিরায় সংতর্প্য সমিদ্ভিরগ্নিং যো মন্ত্রপূতাং তনুমপ্যহৌষীৎ || ১৩-৪৫||
ছায়াবিনীতাধ্বপরিশ্রমেষু ভূয়িষ্ঠসংভাব্যফলেষ্বমীষু |
তস্যাতিথীনামধুনাসপর্যা স্থিতা সুপুত্রেষ্বিব পাদপেষু || ১৩-৪৬||
ধারাস্বনোদ্গারিদরীমুখোঽসৌ শৃঙ্গাঙ্গলগ্নাম্বুজবপ্রপঙ্কঃ |
বধ্নাতি মে বন্ধুরগাত্রি চক্ষুর্দৃপ্তঃ ককুদ্মানিব চিত্রকূটঃ || ১৩-৪৭||
এষা প্রসন্নস্তিমিতপ্রবাহা সরিদ্বিদূরান্তরভাবতন্বী |
মন্দাকিনী ভাতি নগোপকণ্ঠে মুক্তাবলী কণ্ঠগতেব ভূমেঃ || ১৩-৪৮||
অয়ং সুজাতোঽনুগিরং তমালঃ প্রবালমাদায় সুগন্ধি যস্য |
যবাঙ্কুরাপাণ্ডুকপোলশোভী ময়াবতংসঃ পরিকল্পিতস্তে || ১৩-৪৯||
অনিগ্রহত্রাসবিনীতসত্ত্বমপুষ্পলিঙ্গাৎফলবন্ধিবৃক্ষম্ |
বনং তপঃসাধনমেতদত্রেরাবিষ্কৃতোদগ্রতরপ্রভাবম্ || ১৩-৫০||
অত্রাভিষেকায় তপোধনানাং সপ্তর্ষিহস্তোদ্ধৃতহেমপদ্মাম্ |
প্রবর্তয়ামাস কিলানসূয়া ত্রিস্রোতসং ত্র্যম্বকমৌলিমালাম্ || ১৩-৫১||
বীরাসনৈর্ধ্যানজুষামৃষীণামমী সমধ্যাসিতবেদিমধ্যাঃ |
নিবাতনিষ্কম্পতয়া বিভান্তি যোগাধিরূঢা ইব শাখিনোঽপি || ১৩-৫২||
ৎবয়া পুরস্তাদুপয়াচিতো যঃ সোঽযং বটঃ শ্যাম ইতি প্রতীতঃ |
রাশির্মণীনামিব গারুডানাং সপদ্মরাগঃ ফলিতো বিভাতি || ১৩-৫৩||
ক্বচিৎপ্রভালেপিভিরিন্দ্রনীলৈর্মুক্তাময়ী যষ্টিরিবানুবিদ্ধা |
অন্যত্র মালা সিতপঙ্কজানামিন্দীবরৈরুৎখচিতান্তরেব || ১৩-৫৪||
ক্বচিৎখগানাং প্রিয়মানসানাং কাদম্বসংসর্গবতীব পঙ্ক্তিঃ |
অন্যত্র কালাগুরুদতাপত্রা ভক্তির্ভুবশ্চন্দনকল্পিতেব || ১৩-৫৫||
ক্বচিৎপ্রভা চান্দ্রমসী তমোভিশ্ছায়াবিলীনৈঃ শবলীকৃতেব |
অন্যত্র শুভ্রা শরদভ্রলেখা রন্ধ্রেষ্বিবালক্ষ্যনভঃপ্রদেশা || ১৩-৫৬||
ক্বচিচ্চ কৃষ্ণোরগভূষণেব ভস্মাঙ্গরাগা তনুরীশ্বরস্য |
পশ্যানবদ্যাঙ্গি বিভাতি গঙ্গা ভিন্নপ্রবাহা যমুনাতরঙ্গৈঃ || ১৩-৫৭||
সমুদ্রপত্যোর্জলসংনিপাতে পূতাত্মনামত্র কিলাভিষেকাৎ |
তত্ত্বাববোধেন বিনাপি ভূয়স্তনুত্যজাং নাস্তি শরীরবন্ধঃ || ১৩-৫৮||
পুরং নিষাদাধিপতেরিদং তদ্যস্মিন্ময়া মৌলিমণিং বিহায় |
জটাসু বদ্ধাস্বরুদৎসুমন্ত্রঃ কৈকেয়ি কামাঃ ফলিতাস্তবেতি || ১৩-৫৯||
পয়োধরৈঃ পুণ্যজনাঙ্গনানাং নির্বিষ্টহেমাম্বুজরেণু যস্যাঃ |
ব্রাহ্মং সরঃ কারণমাপ্তবাচো বুদ্ধেরিবাব্যক্তমুদাহরন্তি || ১৩-৬০||
জলানি যা তীরনিখাতয়ূপা বহত্যয়োধ্যামনু রাজধানীম্ |
তুরংগমেধাবভৃথাবতীর্ণৈরিক্ষ্বাকুভিঃ পুণ্যতরীকৃতানি || ১৩-৬১||
যাং সৈকতোৎসঙ্গসুখোচিতানাং প্রাজ্যৈঃ পয়োভিঃ পরিবর্ধিতানাম্ |
সামান্যধাত্রীমিব মানসং মে সংভাবয়ত্যুত্তরকোসলানাম্ || ১৩-৬২||
সেয়ং মদীয়া জননীব তেন মান্যেন রাজ্ঞা সরয়ূর্বিয়ুক্তা |
দূরে বসন্তং শিশিরানিলৈর্মাং তরংগহস্তৈরুপগূহতীব || ১৩-৬৩||
বিরক্তসংধ্যাকপিশং পরস্তাদ্যতো রজঃ পার্থিবমুজ্জিহীতে |
শঙ্কে হনূমৎকথিতপ্রবৃত্তিঃ প্রত্যুদ্গতো মাং ভরতঃ সসৈন্যঃ || ১৩-৬৪||
অদ্ধা শ্রিয়ং পালিতসংগরায় প্রত্যর্পয়িষ্যত্যনঘাং স সাধুঃ |
হৎবা নিবৃত্তায় মৃধে খরাদীন্সংরক্ষিতাং ৎবামিব লক্ষ্মণো মে || ১৩-৬৫||
অসৌ পুরস্কৃত্য গুরুং পদাতিঃ পশ্চাদবস্থাপিতবাহিনীকঃ |
বৃদ্ধৈরমাত্যৈঃ সহ চীরবাসা মামর্ঘ্যপাণির্ভরতোঽপ্যুপৈতি || ১৩-৬৬||
পিত্রা বিসৃষ্টাং মদপেক্ষয়া যঃ শ্রিয়ং যুবাপ্যঙ্কগতামভোক্তা |
ইয়ন্তি বর্ষাণি তয়া সহোগ্রমভ্যস্যতীব ব্রতমাসিধারম্ || ১৩-৬৭||
এতাবদুক্তবতি দাশরথৌ তদীয়া-
মিচ্ছাং বিমানমধিদেবতয়া বিদিৎবা |
জ্যোতিষ্পথাদবতার সবিস্ময়াভি-
রুদ্বীক্ষিতং প্রকৃতিভির্ভরতানুগাভিঃ || ১৩-৬৮||
তস্মাৎপুরঃসরবিভীষণদর্শনেন
সেবাবিচক্ষণহরীশ্বরদত্তহস্তঃ |
যানাদবাতরদদূরমহীতলেন
মার্গেণ ভঙ্গিরচিতস্ফটিকেন রামঃ || ১৩-৬৯||
ইক্ষ্বাকুবংশগুরবে প্রয়তঃ প্রণম্য
স ভ্রাতরং ভরতমর্ঘ্যপরিগ্রহান্তে |
পর্যশ্রুরস্বজত মূর্ধনি চোপজঘ্রৌ
তদ্ভক্ত্যপোঢপিতৃরাজ্যমহাভিষেকে || ১৩-৭০||
শ্মশ্রুপ্রবৃদ্ধিজনিতাননবিক্রিয়াংশ্চ
প্লক্ষান্প্ররোহজটিলানিব মন্ত্রিবৃদ্ধান্ |
অন্বগ্রহীৎপ্রণবতঃ শুভদৃষ্টিপাতৈ-
র্বাতানুয়োগমধুরাক্ষরয়া চ বাচা || ১৩-৭১||
দুর্জাতবন্ধুরয়মৃক্ষহরীশ্বরো মে
পৌলস্ত্য এষ সমরেষু পুরঃপ্রহর্তা |
ইত্যাদৃতেন কথিতৌ রঘুনন্দনেন
ব্যুৎক্রম্য লক্ষ্মণমুভৌ ভরতো ববন্দে || ১৩-৭২||
সৌমিত্রিণা তদনু সংসসৃজে স চৈন-
মুত্থাপ্য নম্রশিরসং ভৃশমালিলিঙ্গ |
রূঢেন্দ্রজিৎপ্রহরণব্রণকর্কশেন
ক্লিশ্যন্নিবাস্য ভুজমধ্যমুরস্থলেন || ১৩-৭৩||
রামাজ্ঞয়া হরিচমূপতয়স্তদানীং
কৃৎবা মনুষ্যবপুরারুরুহুর্গজেন্দ্রান্ |
তেষু ক্ষরৎসু বহুধা মদবারিধারাঃ
শৈলাধিরোহণসুখান্যুপলেভিরেমে || ১৩-৭৪||
সানুপ্লবঃ প্রভুরপি ক্ষণদাচরাণাং
ভেজে রথান্দশরথপ্রভবানুশিষ্টঃ |
মায়াবিকল্পরচিতৈরপি যে তদীয়ৈ-
র্ন স্যন্দনৈস্তুলিতকৃত্রিমভক্তিশোভাঃ || ১৩-৭৫||
ভূয়স্ততো রঘুপতির্বিলসৎপতাক-
মধ্যাস্ত কামগতি সাবরজো বিমানম্ |
দোষাতনং বুধবৃহস্পতিয়োগদৃশ্য-
স্তারাপতিস্তরলবিদ্যুদিবাভ্রবৃন্দম্ || ১৩-৭৬||
তত্রেশ্বরেণ জগতাং প্রলয়াদিবোর্বীং
বর্ষাত্যয়েন রুচমভ্রঘনাদিবেন্দোঃ|
রামেণ মৈথিলসুতাং দশকণ্ঠকৃচ্ছ্রা-
ৎপ্রত্যুদ্ধৃতাং ধৃতিমতীং ভরতো ববন্দে || ১৩-৭৭||
লঙ্কেশ্বরপ্রণতিভঙ্গদৃঢব্রতং ত-
দ্বন্দ্যং যুগং চরণয়োর্জনকাত্মজায়াঃ |
জেষ্ঠানুবৃত্তিজটিলং চ শিরোঽস্য সাধো-
রন্যোন্যপাবনমভূদুভয়ং সমেত্য || ১৩-৭৮||
ক্রোশার্ধং প্রকৃতিপুরঃসরেণ গৎবা
কাকুৎস্থঃ স্তিমিতজবেন পুষ্পকেণ |
শত্রুঘ্নপ্রতিবিহিতোপকার্যমার্যঃ
সাকেতোপবনমুদারমধ্যুবাস || ১৩-৭৯||

ইতি শ্রীরঘুবংশে মহাকাব্যে কবিশ্রীকালিদাসকৃতৌ
দণ্ডকাপ্রত্যাগমনো নাম ত্রয়োদশঃ সর্গঃ ||